សឿន សំណាង - La Reine Media

នាយកដ្ឋានព័ត៌មានវិទ្យា៖ ជនខិលខូច កំពុងប្រើល្បិច «ស្ទង់មតិ និងចែកចាយ Link តាម Facebook Messenger និង WhatsApp ដើម្បីឈ្នះរង្វាន់ 2សែនរៀល»

(ភ្នំពេញ)៖ «កម្មវិធីមួយដែលមានឈ្មោះថា “និធិសុខុមាលភាពកូកា-កូឡា” ដែលស្នើឱ្យបុគ្គលគោលដៅ ឆ្លើយនឹងសំណួរស្ទង់មតិ និងចែករំលែកតំណភ្ជាប់ ទៅកាន់មិត្តភក្តិ ដើម្បីឈ្នះរង្វាន់ជាទឹកប្រាក់ 2សែនរៀល គឺជា ល្បិចបោកប្រាស់របស់ជនខិលខូច» នេះបើតាម នាយកដ្ឋានព័ត៌មានវិទ្យា នៃក្រសួងមហាផ្ទៃ។

នាយកដ្ឋានព័ត៌មានវិទ្យា បានបញ្ជាក់ថា កម្មវិធីឆ្លើយសំណួរ និងចែកចាយតំណភ្ជាប់ ដើម្បីឈ្នះរង្វាន់ប្រាក់ 2សែនរៀល ពីក្រុមហ៊ុន កូកាកូឡា ខាងលើនេះ ត្រូវបានធ្វើឡើងតាមរយៈកម្មវិធីបណ្ដាញសង្គម Facebook Messenger និងកម្មវិធី WhatsApp។

ក្រុមការងារបច្ចេកទេស នៃនាយកដ្ឋានព័ត៌មានវិទ្យា បានប្រកាសថា កម្មវិធីខាងលើ គឺជាល្បិចបោកប្រាស់ របស់ជនខិលខូច ក្នុងបំណងខាងក្រោម៖

* ធ្វើការអូសទាញជនរងគ្រោះចូលទៅកាន់តំណភ្ជាប់ (Link) ដែលជាគេហទំព័រក្លែងបន្លំ

* ធ្វើការបញ្ឆោតជនរងគ្រោះឆ្លើយសំណួរ ដើម្បីទទួលបានរង្វាន់

* ធ្វើការបញ្ឆោតជនរងគ្រោះចែករំលែកតំណភ្ជាប់ទៅកាន់មិត្តភក្តិ ដោយផ្តល់សិទ្ធិឱ្យគេហទំព័ររបស់ជនខិលខូចនោះ ដំណើរការកម្មវិធីផ្ញើសារ របស់ជនរងគ្រោះ តួយ៉ាង កម្មវិធី Facebook Messenger ឬកម្មវិធី WhatsApp និងធ្វើការចែករំលែកតំណភ្ជាប់ខាងលើ ដោយស្វ័យប្រវត្ត ទៅកាន់មិត្តភក្តិទាំងអស់ (Contact List) របស់ជនរងគ្រោះ។

ក្រៅពីចំណុចដែលបានរៀបរាប់នេះ ជនខិលខូច ក៏អាចប្រើប្រាស់យុទ្ធនាការនេះ ក្នុងគោលបំណង ផ្សេងៗ ដូចជា ប្រើប្រាស់គេហទំព័រក្លែងបន្លំ ដើម្បីឆបោក លួចយកព័ត៌មានគណនីរបស់ជនរងគ្រោះ (ឧទាហរណ៍៖ គណនីអ៊ីនធឺណិត ឬគណនីធនាគារ) និងប្រើប្រាស់ គេហទំព័រក្លែងបន្លំ ធ្វើការចម្លងមេរោគជាដើម។

ដូច្នេះ នាយកដ្ឋានព័ត៌មានវិទ្យា នៃក្រសួងមហាផ្ទៃ អំពាវនាវឱ្យអ្នកលេងបណ្ដាញសង្គម បញ្ឈប់ការចែករំលែក និងការចុចលើតំណភ្ជាប់ ដើម្បីចៀសវាងបញ្ហាដូចបានរៀបរាប់ខាងលើ៕

ប្រភព៖ Press OCM
ដកស្រង់៖ បុត្រា

June 3, 2021

យុទ្ធនាការចាក់វ៉ាក់សាំង Covid-19! កម្ពុជា ចាក់វ៉ាក់សាំងជូនពលរដ្ឋ បានជាង 2.6លាននាក់

គណៈកម្មការចំពោះកិច្ចចាក់វ៉ាក់សាំងទូទាំងប្រទេស បានឱ្យដឹងនាព្រឹកថ្ងៃទី3 ខែមិថុនានេះថា ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងបង្ការវីរុសCovid-19 ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស សរុបចំនួន 2,665,822នាក់។

ខាងលើនេះគឺជាតួលេខនៃអ្នកបានទទួលការចាក់វ៉ាក់សាំង ម្ជុល (ដូស) ទីមួយ គិតត្រឹមថ្ងៃទី2 ខែមិថុនា ឆ្នាំ2021។ ចំណែកអ្នកដែលបានទទួលការចាក់វ៉ាក់សាំងម្ជុលទីពីរ មានចំនួន 2,058,122នាក់។

សូមបញ្ជាក់ថា យុទ្ធនាការចាក់វ៉ាក់សាំងបង្ការ Covid-19 នៅ កម្ពុជា ត្រូវបានធ្វើឡើងចាប់ពីថ្ងៃទី10 ខែកុម្ភៈ ឆ្នាំ2021។ ព័ត៌មានបន្ថែម សូមអានតារាងបញ្ជីបូកសរុបការចាក់វ៉ាក់សាំងបង្ការជំងឺCovid-19 ដែលមានដូចខាងក្រោម៖

ប្រភព៖ Pres OCM
ដកស្រង់៖ បុត្រា

June 3, 2021

នាវាល្បាតសមុទ្រ ដែល អាមេរិក ផ្ទេរមកឱ្យក្រុង ហាណូយ កំពុងធ្វើដំណើរឆ្ពោះមកកាន់ វៀតណាម

នាវាល្បាតឆ្នេរសមុទ្រទម្ងន់ជាង 3,000តោន ដែល សហរដ្ឋអាមេរិក ផ្ទេរមកឱ្យឆ្មាំសមុទ្រ វៀតណាម បានចាកចេញពីទីក្រុង Seattle សហរដ្ឋអាមេរិក កាលពីថ្ងៃទី1 ខែមិថុនា ឆ្នាំ2021 ដើម្បីឆ្ពោះមកកាន់ប្រទេស វៀតណាម។ នេះបើតាមសារព័ត៌មាន VNexpress។

«ក្រុមនាវិកនៃឆ្មាំសមុទ្រវៀតណាម នឹងនាំនាវាដែលធ្លាប់បានបំពេញភារកិច្ចនៅក្នុងកងកម្លាំងការពារសមុទ្ររបស់ សហរដ្ឋអាមេរិក ទៅកាន់កំពង់ផែថ្មីរបស់ខ្លួន នៅតំបន់ឆ្មាំសមុទ្រលេខ3 ក្នុងរដូវក្ដៅនេះ» ស្ថានទូត សហរដ្ឋអាមេរិក ប្រចាំ វៀតណាម បានសរសេរដូច្នេះនៅលើ Facebook កាលពីថ្ងៃទី2 ខែមិថុនា នៅពេលដែលប្រកាសថា នាវា បានចាកចេញពីទីក្រុង Seattle រដ្ឋ វ៉ាស៊ីងតោន នៃ សហរដ្ឋអាមេរិក ដើម្បីចាប់ផ្ដើមដំណើរឆ្ពោះមកកាន់ប្រទេស វៀតណាម។

«ការផ្ទេរនាវានេះមកឱ្យ វៀតណាម បានបន្ថែមឧទាហរណ៍ជាក់ស្ដែងមួយទៀត ស្ដីពីទំនាក់ទំនងលើវិស័យសន្តិសុខក្នុងតំបន់ កាន់តែត្រូវបានពង្រឹង រវាង វៀតណាម និង សហរដ្ឋអាមេរិក។ យើងពិតជាទន្ទឹងរង់ចាំទទួលស្វាគមន៍នាវា CSB 8021 នៅ វៀតណាម» ស្ថានទូត អាមេរិក បន្ថែម។

នាវា John Midgett ឈ្មោះដើមរបស់ CSB 8021 គឺជានាវាល្បាតសមុទ្រ ថ្នាក់ Hamilton ប្រភេទធំ របស់ឆ្មាំសមុទ្រ សហរដ្ឋអាមេរិក ដែលត្រូវបានចាប់ផ្ដើមសាងសង់នៅថ្ងៃទី5 ខែមេសា ឆ្នាំ1971 និងត្រូវបានដកចេញពីកម្លាំងឆ្មាំសមុទ្រនៅឆ្នាំ2020។ នេះគឺជានាវាល្បាត ថ្នាក់ Hamilton ទីពីរ ដែលត្រូវបាន សហរដ្ឋអាមេរិក ប្រគល់មកឱ្យ វៀតណាម តាមរយៈកម្មវិធីលក់ឧបករណ៍ការពារជាតិដែលសល់ពីការប្រើប្រាស់ (EDA) បន្ទាប់ពីការលក់នាវា USCGC Morgenthau ឆ្នាំ2017។

USCGC John Midgett ទទួលបានការជួសជុលពេញលេញកាលពីឆ្នាំ1991 ដោយមានការបំពាក់អាវុធទាន់សម័យ បន្ថែមកន្លែងដាក់ឧទ្ធម្ភាគចក្រ។ល។ រាដា និងអាវុធរបស់នាវា ត្រូវបានដោះចេញ មុនពេលប្រគល់ឱ្យ វៀតណាម ដោយរក្សាទុកតែកាំភ្លើងធំ Otobreda ប្រភេទ 76មម ដែលបំពាក់ពីមុខនាវាប៉ុណ្ណោះ។

នាវាដែលមានបណ្ដោយ 115ម៉ែត្រ ទទឹង 13ម៉ែត្រ និងទម្ងន់ 3,050តោននេះ ត្រូវបានបំពាក់ម៉ាស៊ីនម៉ាស៊ូតចំនួនពីរ និងម៉ាស៊ីនទួរប៊ីនហ្គាសចំនួនពីរ អនុញ្ញាតឱ្យវាធ្វើដំណើរក្នុងល្បឿនអតិបរមា 54គីឡូម៉ែត្រ/ម៉ោង។ នាវាមួយគ្រឿងនេះ អាចបំពេញបេសកកម្មរយៈពេល 45ថ្ងៃបន្តបន្ទាប់នៅលើសមុទ្រ ក្នុងរង្វង់ប្រតិបត្តិ 20,000គីឡូម៉ែត្រ។

សហរដ្ឋអាមេរិក ថ្មីៗនេះ បង្កើនកិច្ចសហការជាមួយ វៀតណាម នៅក្នុងវិស័យជាច្រើន ពិសេសគឺបញ្ហាសន្តិសុខដែនសមុទ្រ។ សហរដ្ឋអាមេរិក បានផ្គត់ផ្គង់មធ្យោបាយដឹកជញ្ជូន និងទូក កប៉ាល់ ដល់កងកម្លាំងឆ្មាំសមុទ្រ វៀតណាម។

ក្រៅពីនាវាល្បាតសមុទ្រខាងលើ សហរដ្ឋអាមេរិក ក៏បានប្រគល់ទូកល្បាត Metal Shark ជាច្រើនគ្រឿងឱ្យ វៀតណាម ផងដែរ ដែលនេះបញ្ជាក់អំពីកិច្ចសហការស៊ីជម្រៅ រវាងប្រទេសទាំងពីរ ដើម្បីជួយដល់ វៀតណាម ការពារដែនសមុទ្រដែល វៀតណាម អះអាងថា ជាកម្មសិទ្ធិរបស់ខ្លួន ក្នុងគ្រាដែលប្រទេសនេះ កំពុងមានជម្លោះដែនទឹកជាមួយប្រទេសចិន នៅសមុទ្រចិនខាងត្បូង៕

ប្រភព៖ VNexpress
ប្រែសម្រួល៖ បុត្រា

June 3, 2021

សាលារាជធានីភ្នំពេញ សម្រេច ផ្អាកជាបណ្តោះអាសន្ន នូវសកម្មភាពការងារ មុខរបរ ឬអាជីវកម្មដែលមានហានិភ័យខ្ពស់នៃការឆ្លង Covid-19 និងការជួបជុំមនុស្សមិនឱ្យលើសពី 15នាក់

សេចក្ដីសម្រេចខាងលើ ត្រូវបានធ្វើឡើងនាថ្ងៃទី2 ខែមិថុនា ឆ្នាំ2021 និងមានសុពលភាព 14ថ្ងៃ ដោយចាប់ផ្ដើមអនុវត្ត ចាប់ពីម៉ោងសូន្យ នៃថ្ងៃទី3 ខែមិថុនា រហូតដល់ថ្ងៃទី16 ខែមិថុនា ឆ្នាំ2021។

ក្រៅពីការកំណត់ខាងលើ រដ្ឋបាលរាជធានីភ្នំពេញ ក៏នឹងពិនិត្យសម្រេចផ្អាកសកម្មភាពការងារ មុខរបរ និងអាជីវកម្មផ្សេងទៀត ទៅតាមស្ថានភាពជាក់ស្តែង។ យ៉ាងនេះក្ដី សេចក្ដីសម្រេចនេះ ក៏មានបញ្ជាក់អំពីប្រការដែលត្រូវលើកលែងផងដែរ។ ព័ត៌មានបន្ថែម សូមអានសេចក្ដីសម្រេចខាងក្រោម៖

June 3, 2021

ឆេះរោងចក្រ Foxconn របស់ តៃវ៉ាន់ នៅប្រទេសចិន ក្រោយស្ថាបនិកក្រុមហ៊ុននេះ ស្នើទិញវ៉ាក់សាំង Covid-19 ជូនកោះតៃវ៉ាន់

រោងចក្រមួយរបស់ Foxconn ដែលជាក្រុមហ៊ុនមួយក្នុងចំណោមក្រុមហ៊ុនផលិតគ្រឿងអេឡិចត្រូនិក និងកុំព្យូទ័រ ធំជាងគេក្នុងពិភពលោក របស់អ្នកជំនួញ តៃវ៉ាន់ នៅប្រទេសចិន រងគ្រោះអគ្គិភ័យនៅថ្ងៃទី2 ខែមិថុនានេះ។

រោងចក្រដែលរងគ្រោះអគ្គិភ័យនេះ ស្ថិតនៅក្នុងទីក្រុង Shenzhen ខេត្ត Guangdong ភាគខាងត្បូងប្រទេសចិន។ កម្លាំងពន្លត់អគ្គិភ័យ បានទៅដល់កន្លែងកើតហេតុ និងបានគ្រប់គ្រងស្ថានការណ៍ទាន់ពេល។

ហេតុការណ៍នេះ មិនបានបង្កឱ្យមានគ្រោះថ្នាក់ដល់ជីវិត ឬប៉ះពាល់ដល់ផ្នែកផលិតកម្មនោះដែរ។ នេះបើតាមអ្នកនាំពាក្យរបស់ក្រុមហ៊ុន Foxconn។ ក្រុមមន្ត្រីមានសមត្ថកិច្ច កំពុងស៊ើបអង្កេតរកមូលហេតុនៃករណីនេះ។

Foxconn បច្ចុប្បន្ន គឺជាអ្នកផលិតឧបករណ៍អេឡិចត្រូនិកទៅតាមការបញ្ជាទិញ ធំបំផុតក្នុងពិភពលោក។ ក្រុមហ៊ុននេះ មានទីស្នាក់ការកណ្ដាលនៅកោះតៃវ៉ាន់។

គួររំលឹកថា កាលពីថ្ងៃទី1 ខែមិថុនា កន្លងទៅ មហាសេដ្ឋីតៃវ៉ាន់ លោក Terry Gou ដែលជាស្ថាបនិករបស់ក្រុមហ៊ុន Foxconn បានដាក់ពាក្យសុំច្បាប់នាំចូលកោះតៃវ៉ាន់ នូវវ៉ាក់សាំងបង្ការ Covid-19 BioNTech របស់ អាល្លឺម៉ង់ ចំនួន 5លានដូស ដើម្បីចាក់ជូនពលរដ្ឋកោះ។ អាជ្ញាធរកោះតៃវ៉ាន់ កំពុងពិនិត្យសំណើរនេះ៕

ប្រភព៖ Global Times, Reuters
ប្រែសម្រួល៖ បុត្រា

June 2, 2021

ស្ថាបនិករបស់ក្រុមហ៊ុន Foxconn ស្នើទិញវ៉ាក់សាំង Covid-19 ជូនពលរដ្ឋកោះតៃវ៉ាន់

ក្រុមហ៊ុន Foxconn និងស្ថាបនិក Terry Gou បានសុំច្បាប់អាជ្ញាធរកោះតៃវ៉ាន់ ដើម្បីចេញប្រាក់ផ្ទាល់ខ្លួន ទិញវ៉ាក់សាំងបង្ការ Covid-19 ចំនួន 5លានដូស ដើម្បីចាក់ជូនពលរដ្ឋនៃកោះនេះ។

សំណើររបស់មហាសេដ្ឋី Terry Gou ត្រូវបានធ្វើឡើងកាលពីថ្ងៃទី1 ខែមិថុនា។ ចំណែកវ៉ាក់សាំងដែលលោកមានបំណងទិញ នោះគឺ BioNTech របស់អាល្លឺម៉ង់។ ក្រោយការទិញបាន វ៉ាក់សាំងទាំងនោះនឹងត្រូវបានបែងចែក និងចាក់ជូនពលរដ្ឋតៃវ៉ាន់ ក្នុងគ្រាដែលកោះនេះ កំពុងប្រឈមនឹងការកើនឡើងខ្លាំងនៃករណីឆ្លងវីរុសCovid-19។

សំណើររបស់ស្ថាបនិកក្រុមហ៊ុន Foxconn នេះ ក៏យោងទៅតាមការបើកភ្លើងខៀវ ពីអាជ្ញាធរកោះតៃវ៉ាន់ ដែលថា អង្គការសាសនា និងអាជ្ញាធរមូលដ្ឋាន មានសិទ្ធិរៀបចំការនាំចូលវ៉ាក់សាំង បើសិនជាមានលក្ខខណ្ឌសមស្រប។

លោក Terry Gou សង្ឃឹមថា នឹងបញ្ជូនវ៉ាក់សាំង BioNTech ពីប្រទេសអាល្លឺម៉ង់ ឆ្ពោះត្រង់មកកោះតៃវ៉ាន់ ដោយ «មិនឆ្លងកាត់អន្តរការី ឬភាគីកណ្ដាលណាមួយឡើយ»។ មហាសេដ្ឋីរូបនេះ ក៏បានបញ្ជាក់ថា លោកបានផ្ដល់ឯកសារទាំងអស់ដែលអាជ្ញាធរត្រូវការ។

រដ្ឋមន្ត្រីក្រសួងសុខាភិបាលតៃវ៉ាន់ លោក Chen Shih-chung បានសំដែងការដឹងគុណចំពោះមហាសេដ្ឋី Terry Gou និងបានប្រាប់ថា អាជ្ញាធរ កំពុងត្រួតពិនិត្យលើពាក្យសុំនាំចូលវ៉ាក់សាំងរបស់លោក។

ក្រៅពី Foxconn នៅមានស្ថាប័នជាច្រើនផ្សេងទៀត ដែលស្នើសុំនាំចូលវ៉ាក់សាំងបង្ការ Covid-19 មកកាន់តៃវ៉ាន់ ក្នុងនោះមានដូចជា សម្ព័ន្ធសមាគមព្រះពុទ្ធសាសនាអន្តរជាតិរបស់តៃវ៉ាន់។ល។

គិតមកដល់ថ្ងៃទី2 ខែមិថុនានេះ កោះតៃវ៉ាក់ បានរកឃើញអ្នកឆ្លង Covid-19 ចំនួន 9,389នាក់ ក្នុងនោះមានអ្នកស្លាប់ចំនួន 149នាក់, ជាសះស្បើយ 1,133នាក់ និងកំពុងព្យាបាល 8,107នាក់។

តៃវ៉ាន់ បានបញ្ជាទិញវ៉ាក់សាំងរាប់លានដូស ពី AstraZeneca, Moderna រួមនឹងក្រុមហ៊ុនក្នុងស្រុកចំនួនពីរផ្សេងទៀត។ ចំណែក កិច្ចព្រមព្រៀងជាមួយ BioNTech ត្រូវជួបឧបសគ្គ ដោយសារតែមានការរារាំងពីចិនដីគោក។ នេះបើតាមមេដឹកនាំកោះតៃវ៉ាន់ លោកស្រី Tsai Ing-wen៕

ប្រភព៖ Reuters
ប្រែសម្រួល៖ បុត្រា

June 2, 2021

(វីដេអូ)-នាវាធំបំផុតរបស់កងទ័ពជើងទឹក អ៊ីរ៉ង់ ឆាបឆេះសន្ធោសន្ធៅ មុនពេលលិចក្នុងសមុទ្រ

នាវា IRIS Kharg របស់កងទ័ពជើងទឹកអ៊ីរ៉ង់ បានលិច បន្ទាប់ពីបានឆេះអស់រយៈពេលជិតមួយថ្ងៃ នៅក្បែរច្រកសមុទ្រ Oman ប៉ុន្តែ មិនមានករណីបាត់បង់ជីវិតមនុស្សនោះទេ។

អគ្គីភ័យ បានឆាបឆេះនៅលើនាវាដឹកជញ្ជូន IRIS Kharg កាលពីថ្ងៃទី1 ខែមិថុនា ក្នុងពេលចូលរួមធ្វើសមយុទ្ធនៅលើដែនសមុទ្ររបស់ទីក្រុង Jask ក្បែរសមុទ្រ Oman។ ក្រុមនាវិក និងសិក្ខាកាមនៃកងទ័ពជើងទឹកទាំងអស់ដែលនៅលើនាវានោះ ត្រូវបានជម្លៀសចេញដោយសុវត្ថិភាព។

ក្រុមមន្ត្រីរបស់ អ៊ីរ៉ង់ បានបញ្ជូលកម្លាំងទៅជួយពន្លត់អគ្គិភ័យនេះ ប៉ុន្តែ មិនអាចគ្រប់គ្រងស្ថានការណ៍បាន បើទោះបានចំណាយពេលជាង 20ម៉ោង។ សារព័ត៌មានរបស់ អ៊ីរ៉ង់ Fars News រាយការណ៍ថា៖ «ការប្រឹងប្រែងដើម្បីជួយសង្គ្រោះនាវានេះ បានទទួលបរាជ័យ ហើយនាវានេះក៏បានលិច»។

ទាក់ទិននឹងមូលហេតុដែលនាំឱ្យមានអគ្គិភ័យបំផ្លាញនាវានេះ បច្ចុប្បន្ន កងទ័ព អ៊ីរ៉ង់ មិនទាន់បានបង្ហើបឱ្យដឹងនៅឡើយ។

IRIS Kharg គឺជានាវាដឹកជញ្ជូនសំខាន់ ស្ថិតក្នុងកងនាវាចម្បាំង Ol ដែលត្រូវបានផលិតដោយប្រទេសអង់គ្លេស កាលពីឆ្នាំ1977 និងប្រគល់ឱ្យ អ៊ីរ៉ង់ កាលពីឆ្នាំ1984។ IRIS Kharg មានប្រវែង 207ម៉ែត្រ ទទឹង 25.5ម៉ែត្រ និងមានទម្ងន់ជាង 33,000តោន។ នេះគឺជានាវាធំបំផុតរបស់កងទ័ពជើងទឹក អ៊ីរ៉ង់ បើនិយាយពីសមត្ថភាពផ្ទុក។

IRIS Kharg ត្រូវបានគេជឿថា មានតួនាទីសំខាន់ក្នុងការពង្រីកកម្លាំងជើងទឹករបស់ អ៊ីរ៉ង់។ នាវានេះ ផ្គត់ផ្គង់គ្រប់យ៉ាងដែលនាវាចម្បាំងជួរមុខត្រូវការ ហើយវាជួយឱ្យនាវាចម្បាំងខ្នាតតូចរបស់ អ៊ីរ៉ង់ ធ្វើសកម្មភាពក្នុងរយៈពេលយូរ ដោយមិនត្រូវចូលចតញឹកញាប់ដើម្បីចាក់ប្រេង។

IRIS Kharg ក៏អាចផ្ទុកឧទ្ធម្ភាគចក្រប្រភេទធំជាច្រើនគ្រឿង ដូចជា SH-3 Sea King ជាដើម ដើម្បីពង្រីកសមត្ថភាពរបស់ក្រុមប្រយុទ្ធ ក្នុងការប្រមាញ់នាវាមុជទឹករបស់សត្រូវ៕

ប្រភព៖ NY Times, Reuters
ប្រែសម្រួល៖ បុត្រា

June 2, 2021

កម្ពុជារកឃើញករណីវិជ្ជមាននឹង COVID-19 ជាង 700នាក់ ខណៈពិភពលោករកឃើញជាង 21,913នាក់ទៀត ក្នុងថ្ងៃទី1 ខែមិថុនា

ក្នុងរយៈពេល 24ម៉ោងនៃថ្ងៃទី1 ខែមិថុនា ឆ្នាំ2021 កម្ពុជា បានររកឃើញអ្នកឆ្លង Covid-19 ចំនួន 750នាក់ និងអ្នកស្លាប់ចំនួន 10នាក់ទៀតបន្ថែមទៀត។

គិតមកដល់ព្រឹកថ្ងៃទី2 ខែមិថុនានេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 31,460នាក់ ក្នុងនោះមាន 24,042នាក់បានជាសះស្បើយ និង 230នាក់បានស្លាប់។ ព័ត៌មានបន្ថែម សូមអានរបាយការណ៍សង្ខេបរបស់ក្រសួងសុខាភិបាល ដូចមាននៅខាងក្រោម។

នៅទូទាំងពិភពលោក បច្ចុប្បន្ន តួលេខអ្នកឆ្លងវីរុសCovid-19 បានកើនដល់ 171,938,586នាក់ ក្នុងនោះមានអ្នកស្លាប់ 3,575,782នាក់, ជាសះស្បើយ 154,427,901នាក់ និងកំពុងព្យាបាល 13,934,903នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 2, 2021

កូរ៉េខាងត្បូង បង្ហាញរ៉ុក្កែតអវកាសក្នុងស្រុកដំបូងក្នុងប្រវត្តិសាស្ត្រ

កូរ៉េខាងត្បូង កាលពីថ្ងៃទី1 មិថុនា ឆ្នាំ2021 បានប្រកាសបង្ហាញម៉ូដែលរ៉ុក្កែតអវកាសដំបូងដែលប្រទេសនេះបានអភិវឌ្ឍ និងផលិតដោយផ្ទាល់ដៃ។ ប្រទេសនេះ នឹងបំពេញបែបបទចុងក្រោយនានា មុនពេលបាញ់បង្ហោះនៅចុងឆ្នាំនេះ។

សារព័ត៌មាន Yonhap ដកស្រង់ព័ត៌មានពីក្រសួងវិទ្យាសាស្ត្រនិងព័ត៌មានវិទ្យារបស់ កូរ៉េខាងត្បូង ឱ្យដឹងថា គំរូរបស់រ៉ុក្កែត Nuri ត្រូវបានដំឡើងលើជើងទម្រ ក្នុងមជ្ឈមណ្ឌលអវកាស Naro នាស្រុក Goheung ចម្ងាយ 473គីឡូម៉ែត្រទៅទិសខាងត្បូងនៃរដ្ឋធានី សេអ៊ូល។ រ៉ុក្កែតនេះនឹងត្រូវឆ្លងកាត់ការសាកល្បងជាង 1ខែ ហើយត្រូវបាញ់បង្ហោះទៅកាន់ទីអវកាសនៅក្នុងខែតុលា ឆ្នាំ2021នេះ។

កូរ៉េខាងត្បូង បានចំណាយប្រាក់ 1.8ពាន់លានដុល្លារអាមេរិក ដើម្បីអភិវឌ្ឍ Nuri តាំងពីឆ្នាំ2010។ នេះគឺជាម៉ូដែលរ៉ុក្កែតផលិតក្នុងស្រុកដំបូងគេរបស់ កូរ៉េខាងត្បូង។

រ៉ុក្កែងដែលមានទម្ងន់ 200តោន និងប្រើប្រាស់ម៉ាស៊ីនចំនួន 4 នេះ នឹងត្រូវបានបាញ់បង្ហោះអមជាមួយនឹងវត្ថុតំណាងមួយចំនួន នៅក្នុងខែតុលា មុនពេលត្រូវហោះនាំយកផ្កាយរណបទម្ងន់ 200គីឡូក្រាម ទៅកាន់ទីអវកាស នៅក្នុងខែឧសភា ឆ្នាំ2022។

ក្រៅពីនេះ កូរ៉េខាងត្បូង ក៏មានគម្រោងបញ្ជូនផ្កាយរណបដំបូងរបស់ខ្លួន ឡើងទៅកាន់គន្លងតារាវិថី នៃឋានព្រះចន្ទ នៅឆ្នាំក្រោយផងដែរ៕

ប្រភព៖ Yonhap, Koreatimes
ប្រែសម្រួល៖ បុត្រា

June 2, 2021

រាជរដ្ឋាភិបាលថៃ អនុម័តកញ្ចប់ថវិកាជំនួយសេដ្ឋកិច្ច តម្លៃ 4.5ពាន់លានដុល្លារអាមេរិក

រាជរដ្ឋាភិបាលនៃប្រទេសថៃ កាលពីថ្ងៃទី1 ខែមិថុនា ឆ្នាំ2021 បានអនុម័តកញ្ចប់ថវិកាជំរុញកំណើនសេដ្ឋកិច្ច ដែលមានទំហំទឹកប្រាក់ 140ពាន់លានបាត (ប្រហាក់ប្រហែលនឹង 4.5ពាន់លានដុល្លារអាមេរិក) ដើម្បីកាត់បន្ថយផលប៉ះពាល់លើសេដ្ឋកិច្ចដែលបង្កឡើងដោយវិបត្តិ Covid-19។

អ្នកនាំពាក្យនៃក្រសួងហិរញ្ញវត្ថុ លោកស្រី Kulaya Tantitemit បានឱ្យដឹងថា កញ្ចប់ថវិកានេះ មានតួនាទីជួយដល់ពលរដ្ឋដែលរងផលប៉ះពាល់ធ្ងន់ធ្ងរពី Covid-19 និងដើម្បីជំរុញការចាយវាយក្នុងស្រុក។ វិធានការនេះ តាមគម្រោង នឹងត្រូវផ្ដល់ជូន ចាប់ពីខែកក្កដា ដល់ខែធ្នូ ឆ្នាំ2021 តាមរយៈសាច់ប្រាក់សុទ្ធ ប័ណ្ណទូទាត់អេឡិចត្រូនិច (e-voucher) ឬតាមទម្រង់ទូទាត់រួម។

ទំហំទឹកប្រាក់ប្រមាណ 93ពាន់លានបាត ដែលទូទាត់ក្រោមរូបភាពទូទាត់រួម នឹងជួយដល់ពលរដ្ឋចំនួន 31លាននាក់ ខណៈ 16.4ពាន់លានបាត និង 3ពាន់លានបាតទៀត នឹងត្រូវបែងចែកក្រោមរូបភាពប្រគល់ប្រាក់ដល់ដៃ សម្រាប់ពលរដ្ឋដែលកំពុងស្ថិតក្នុងរបបនៃគោលនយោបាយសន្តិសុខសង្គម និងជនពិការ។ ទន្ទឹមនឹងនេះ ខ្ទង់ប្រាក់ 28ពាន់លានបាត នឹងត្រូវបែងចែកតាមទម្រង់ ប័ណ្ណទូទាត់អេឡិចត្រូនិច សម្រាប់ក្រុមពលរដ្ឋដែលមានប្រាក់ចំណូលមធ្យម និងខ្ពស់។

ប្រទេសថៃ គិតត្រឹមព្រឹកថ្ងៃទី2 ខែមិថុនា ឆ្នាំ2021 បានរកឃើញអ្នកឆ្លង Covid-19 សរុបចំនួន 162,022នាក់ ក្នុងនោះមាន អ្នកស្លាប់ 1,069នាក់ អ្នកជាសះស្បើយចំនួន 111,735នាក់ និងកំពុងព្យាបាលចំនួន 49,218នាក់៕

ប្រភព៖ Xinhuanet
ប្រែសម្រួល៖ បុត្រា

June 2, 2021

Author: សឿន សំណាង