សឿន សំណាង - La Reine Media

ចិន ថា «ការពារអធិបតេយ្យភាព លើ កោះតៃវ៉ាន់ ដោយគ្រប់មធ្យោបាយ» ក្រោយតំណាងរាស្ត្រអាមេរិក ជិះយន្តហោះយោធា ទៅជួបមេដឹកនាំតៃវ៉ាន់

ក្រសួងការពារជាតិចិន ប្រកាសថា នឹងការពារអធិបតេយ្យភាពលើ កោះតៃវ៉ាន់ បន្ទាប់ពីប្រតិភូសហរដ្ឋអាមេរិក បានធ្វើទស្សនកិច្ចខ្លីមកកាន់កោះនេះ ដោយជិះយន្តហោះរបស់កងទ័ព។

«កងទ័ពរំដោះប្រជាជនចិន (PLA) នឹងឆ្លើយតប ដោយការប្ដេជ្ញាចិត្ត ការពារឯកភាពជាតិ និងបូរណភាពទឹកដី ដោយប្រើគ្រប់មធ្យបាយទាំងអស់ បើសិនជាមានគេមកបំបែក តៃវ៉ាន់ ចេញពីប្រទេសចិន» អ្នកនាំពាក្យក្រសួងការពារជាតិចិន Wu Qian បានឱ្យដឹងកាលពីម្សិលមិញ។

ការអធិប្បាយខាងលើ ត្រូវបានលើកឡើង បន្ទាប់ពីយន្តហោះដឹកជញ្ជូនផ្នែកយោធា C-17 នៃកងទ័ពអាកាសរបស់ សហរដ្ឋអាមេរិក បានដឹកប្រតិភូ ដែលរួមមាន តំណាងរាស្ត្រ 3រូបនៃសភាជាន់ខ្ពស់ ចុះចតលើទីក្រុងតៃប៉ិ នៃកោះតៃវ៉ាន់ និងឈប់នៅទីនេះរយៈពេល 3ម៉ោង កាលពីថ្ងៃទី6 ខែមិថុនា។ ប្រតិភូអាមេរិកនេះ បានជួបពិភាក្សាជាមួយមេដឹកនាំកោះតៃវ៉ាន់ លោក Tsai Ing-wen និងបានសន្យាថា ផ្ដល់វ៉ាក់សាំងប្រឆាំង Covid-19 ចំនួន 750,000ដូស ដល់កោះនេះផងដែរ។

លោក Wu Qian ថ្លែងថា ដំណើរទស្សនកិច្ចរបស់តំណាងរាស្ត្រអាមេរិក បង្កការខូចខាតធ្ងន់ធ្ងរដល់ទំនាក់ទំនងរវាងទីក្រុងប៉េកាំង និងទីក្រុងវ៉ាស៊ីងតោន ក៏ដូចជាស្ថិរភាពនៅច្រកសមុទ្រតៃវ៉ាន់។ អ្នកនាំពាក្យរូបនេះ បានហៅសកម្មភាពខាងលើនេះថាជា ឥរិយាបថ «មិនប្រកបដោយការទទួលខុសត្រូវ»។ លោក Wu Qian បន្ថែមថា គណៈបក្សប្រជាធិបតេយ្យជឿនលឿន (Democratic Progressive Party) ដែលកំពុងកាន់អំណាចនៅ តៃវ៉ាន់ កំពុង «ប្រលែងលេងជាមួយភ្លើង» ហើយថា ប្រាកដជាទទួលបរាជ័យ។

កន្លងមក អ្នកនាំពាក្យនៃក្រសួងការបរទេសចិន Zhao Lijian ក៏បាននិយាយថា សហរដ្ឋអាមេរិក មិនគួរបញ្ជូនសារខុសឆ្គង ដល់កម្លាំងគាំទ្រឯករាជ្យនៅតៃវ៉ាន់ ហើយទន្ទឹមនឹងនេះ គួរតែបញ្ចប់រាល់សកម្មភាពផ្លូវការជាមួយកោះនេះ។

ប្រទេសចិន ចាត់ទុកកោះតៃវ៉ាន់ ជាផ្នែកមួយនៃទឹកដីរបស់ខ្លួន ដែលមិនអាចកាត់ផ្ដាច់បាន ហើយថា នឹងប្រើប្រាស់កម្លាំងបាយដើម្បីបង្រួបបង្រួម បើសិនចាំបាច់។ ចំណែក សហរដ្ឋអាមេរិក វិញ បើទោះជា ទទួលស្គាល់ប្រទេសចិនតែមួយ ប៉ុន្តែ អាមេរិក នៅតែសន្យាជួយដល់កោះតៃវ៉ាន់ ក្នុងការរក្សាសិទ្ធិការពារខ្លួន ដោយយោងទៅតាមសន្ធិសញ្ញាទំនាក់ទំនងជាមួយតៃវ៉ាន់ ឆ្នាំ1979 និងតែងផ្គត់ផ្គង់អាវុធដល់កោះនេះជាញឹកញាប់។

ប្រតិភូរបស់ សហរដ្ឋអាមេរិក និងក្រុមមន្ត្រីកោះតៃវ៉ាន់ នៅព្រលានយន្តហោះ Songshan នៃកោះតៃវ៉ាន់

ភាពតានតឹងអាចនឹងកាន់តែអាក្រក់ជាងនេះ នៅពេលប្រធានក្រុមប្រឹក្សាពាណិជ្ជកម្មសហរដ្ឋអាមេរិក-តៃវ៉ាន់ Rupert Hammond-Chambers បានឱ្យដឹងថា ទីក្រុងវ៉ាស៊ីងតោន ជិតអនុម័តលើកិច្ចព្រមព្រៀងលក់អាវុធថ្មីមួយចំនួន ឱ្យកោះតៃវ៉ាន់។ នេះត្រូវបានគេមើលឃើញថាជា សកម្មភាពប្រឈមនឹង «បន្ទាត់ក្រហម» របស់ប្រទេសចិន ហើយអាចនាំឱ្យ «មហាយក្ស» អាស៊ីមួយនេះ ប្រតិកម្មខ្លាំងក្លាជាងមុន ចំពោះបញ្ហាកោះតៃវ៉ាន់៕

ប្រភព៖ SCMP
ប្រែសម្រួល៖ បុត្រា

June 9, 2021

អគ្គលេខាធិការនៃអង្គការសហប្រជាជាតិ Antonio Guterres ជាប់ឆ្នោតអាណត្តិទីពីរ

នៅក្នុងការបោះឆ្នោតកាលពីថ្ងៃទី8 ខែមិថុនា នៅឯក្រុមប្រឹក្សាសន្តិសុខនៃអង្គការសហប្រជាជាតិ លោក Antonio Guterres បានជាប់ឆ្នោតអាណត្តិទីពីរ ជាអគ្គលេខាធិការនៃអង្គការសហប្រជាជាតិ។

បុគ្គលប្រមាណជា 10រូបផ្សេងទៀត ក៏មានបំណងប្រជែងឆ្នោតសម្រាប់តំណែងអគ្គលេខាធិការនៃអង្គការសហប្រជាជាតិ (UN) នេះដែរ ប៉ុន្តែ សុទ្ធតែមិនបានក្លាយជាបេក្ខភាពផ្លូវការ ព្រោះថា មិនទទួលបានការគាំទ្រពីប្រទេសណាមួយ ក្នុងចំណោមសមាជិកចំនួន 193ប្រទេស នៃអង្គការនេះ។ ដូច្នេះ នៅក្នុងការបោះឆ្នោតខាងលើ អតីតនាយករដ្ឋមន្ត្រី នៃប្រទេសព័រទុយហ្គាល វ័យ 72ឆ្នាំ លោក Antonio Guterres ពុំមានគូប្រជែងនោះទេ។ លោក Antonio Guterres បានកាន់តំណែងនេះ តាំងពីឆ្នាំ2017។ អាណត្តិ 5ឆ្នាំលើកទីពីររបស់លោក Antonio Guterres នឹងចាប់ផ្ដើមពីថ្ងៃទី1 ខែមករា ឆ្នាំ2022។

នៅក្នុងអាណត្តិដំបូងរបស់ខ្លួន លោក Antonio Guterres ត្រូវផ្ដោតទៅលើការកាត់បន្ថយហានិភ័យ នៃការខូចខាតដែលកើតឡើងដោយសារគោលនយោបាយការបរទេសឯកតោភាគី បញ្ហាជាតិនិយមជ្រុល របស់ប្រធានាធិបតីសហរដ្ឋអាមេរិក ដែលកាលណោះគឺលោក Donald Trump ជាបុគ្គលដែលតែងដាក់ជាសំណួរស្ដីពីតម្លៃរបស់អង្គការសហប្រជាជាតិ និងពហុភាគីនិយម។

សហរដ្ឋអាមេរិក គឺជាប្រទេសដែលផ្ដល់វិភាគទានច្រើនជាងគេដល់អង្គការសហប្រជាជាតិ ពោលគឺប្រហាក់ប្រហែលនឹង 22% នៃថវិកាសរុបប្រចាំឆ្នាំ និង ¼ នៃថវិកាសរុបសម្រាប់កម្លាំងរក្សាសន្តិភាព។ ប្រធានាធិបតីសហរដ្ឋអាមេរិក លោក Joe Biden បានចាប់ផ្ដើមបំពេញខ្ទង់វិភាគទានខាងលើ ដែលត្រូវបានលោក Trump កាត់បន្ថយសម្រាប់ស្ថាប័នខ្លះនៃអង្គការសហប្រជាជាតិ ទន្ទឹមនឹងការសន្យាជាថ្មី ចំពោះអង្គការពិភពលោកមួយនេះ៕

ប្រភព៖ NY Times
ប្រែសម្រួល៖ បុត្រា

June 9, 2021

ការរៀបចំតុបតែងផ្ទះ ឱ្យគួរចង់ស្នាក់នៅ

ការរៀបចំតុបតែងផ្ទះ ឱ្យគួរចង់ស្នាក់នៅ មានបច្ច័យច្រើនយ៉ាងរួមប្រកបចូលគ្នា ដោយបែងជាគោលការណ៍សំខាន់ៗ ត្រួសៗដូចខាងក្រោមនេះ…៖

សុវត្ថិភាព

ជ្រើសរើសប្រើគ្រឿងតុបតែងផ្ទះណា ដែលគ្មានជ្រុងមុតស្រួច មិនងាយបាក់បែក មិនទើសទែងផ្លូវដើរ មិនធ្វើឱ្យសឹករេចរឹលកម្រាលឥដ្ឋ ឬធ្វើឱ្យកាំជណ្តើររលោងជ្រុលពេក រហូតអាចបណ្តាលឱ្យក្មេងៗដើររអឹលដួល រួមទាំងការបំពាក់ឧបករណ៍គ្រឿងអគ្គិសនី និងខ្សែភ្លើង ឱ្យស្ថិតក្នុងសភាពមានសុវត្ថិភាពផង។

ត្រូវនឹងសុខលក្ខណៈ និងស្អាតបាត

រៀបចំឱ្យមានខ្យល់អាកាសបក់ចេញ-ចូល និងមានពន្លឺភ្លឺគ្រប់គ្រាន់ រួមទាំងជូតសម្អាតគ្រឿងតុបតែងផ្ទះឱ្យបានស្អាតជាប់ជានិច្ចផង។

ងាយស្រួលក្នុងការប្រើប្រាស់

ត្រូវគិតដល់ភាពងាយស្រួលក្នុងការរៀបចំធ្វើពិធីផ្សេងៗ រៀបចំឱ្យមានទីកន្លែងទំនេរ និងទុកដាក់របស់របរ ឱ្យត្រូវតាមកន្លែងដើម្បីងាយស្រួលចាប់យកមកប្រើប្រាស់។

ភាពស្រួល សប្បាយ

រៀបចំផ្ទះ ឱ្យមានប្រដាប់ការពារភាពចាំងខ្លាំងរបស់ពន្លឺថ្ងៃ ដូចជា វាំងនន មានប្រឡោះបំភាយកម្ដៅចេញពីខាងក្នុងផ្ទះ និងឱ្យខ្យល់អាកាស បក់ចេញ-ចូលបានងាយស្រួល អាចមើលឃើញទេសភាពខាងក្រៅផ្ទះ ដែលនឹងធ្វើឱ្យយើងសប្បាយរីករាយចិត្តបានផង។

មានរបៀបរៀបរយ និងស្រស់ស្អាត

របស់របរតុបតែងមានច្រើនជ្រុលពេក និងទុកដាក់គ្មានរបៀប នឹងធ្វើឱ្យភាពស្រស់ស្អាតខាងក្នុងផ្ទះ បាត់បង់អស់ ហើយជាពិសេសរឿងពណ៌ ក៏មានភាពសំខាន់ក្នុងការតុបតែងផ្ទះដែរ។ ក្រៅពីនោះ គួរនាំយកផ្កាស្អាតៗ និងរូបភាពផ្សេងៗ មកតុបតែងលម្អដើម្បីភាពស្រស់ស្អាតផង។

សន្សំសំចៃ

ត្រូវនឹកដល់ការសន្សំសំចៃផង ទាំងពេលវេលា កម្លាំង និងលុយកាក់ រួមទាំងការមើលថែទាំសម្អាត តម្លៃវត្ថុ របស់របរដែលចង់ទិញ យកមកតុបតែងផង តាមរយៈការច្នៃប្រឌិត ឬយករបស់ដែលមានស្រាប់ មកជូតសម្អាត ដុសខាត់ លាបពណ៌ជាថ្មី ឱ្យស្អាតមកដាក់តាំងលម្អឡើងវិញជាដើម៕

June 8, 2021

គេង…បំបាត់រោគា

ការគេងសម្រាកឱ្យលង់លក់ ក្រៅពីជាការសម្រាកដ៏ល្អបំផុតមួយហើយ ឥរិយាបថដំណេក ដែលស័ក្តិសម នៅអាចបំបាត់អាការឈឺថ្កាត់របស់យើងបានទៀតផង។

ឥរិយាបថគេងផ្ងារ

គឺជាឥរិយាបថដំណេកដ៏ត្រឹមត្រូវ តែនឹងមិនស័ក្តិសមជាមួយនឹងអ្នក ដែលមានជំងឺបេះដូង និងសួតឡើយ ព្រោះថានៅពេលដែលយើងគេងផ្ងារ សាច់ដុំក្បាំងខ្យល់ ដែលឃាំងរវាងប្រអប់ទ្រូង និងប្រហោងពោះ នឹងសង្កត់លើសួត ធ្វើឱ្យពិបាកដកដង្ហើម។

ចំណែកបេះដូងវិញ ក៏មិនអាចបឺត-បាញ់ឈាម ចេញពីបេះដូងបានស្រួលដែរ ធ្វើឱ្យដង្ហក់ និងដកដង្ហើមរាងស្ទះៗ តែបើសិនជានៅតែចង់ ឬចាំបាច់ត្រូវតែគេងក្នុងឥរិយាបថនេះ ចូរគេងក្នុងឥរិយាបថ ស្ទើរគេង ស្ទើរអង្គុយ ដោយឱ្យផ្នែកខាងលើនៃរាងកាយ(ត្រឹមចង្កេះឡើង) ខ្ពស់ឡើងបន្តិច។

ឥរិយាបថគេងផ្អៀង

ក្រៅពីជួយកាត់បន្ថយសំឡេងស្រមុកហើយ ឥរិយាបថនេះ នៅស័ក្តិសម សម្រាប់អ្នកដែលមានអាការឈឺខ្នងទៀតផង ព្រោះបើអ្នកដែលឈឺខ្នង គេងផ្ងារវិញនោះ ច្បាស់ជាបានឈឺឥតឈប់ឈរ ពេញមួយយប់មិនខាន។

តែបើចូលចិត្តគេងផ្អៀងខាងឆ្វេងវិញ គួរឱបខ្នើយឱប និងយកជើងគងពីលើផង នឹងរឹតតែប្រសើរ ព្រោះចំណុចមិនល្អរបស់ឥរិយាបថនេះ គឺធ្វើឱ្យបេះដូង ដែលស្ថិតនៅក្នុងប្រអប់ទ្រូងប៉ែកខាងឆ្វេង ពិបាកធ្វើការ ហើយអាហារ ដែលនៅមិនទាន់រំលាយអស់ នឹងសេសសល់នៅក្នុងក្រពះ ធ្វើឱ្យកើតអាការចុកឆ្អល់ឡើងមកចុងដង្ហើមបាន ។ ចំណែកអ្នកដែលចូលចិត្តគេងផ្អៀងខាងស្តាំវិញអាចនិយាយបានថា សំណាងល្អណាស់ ព្រោះជាឥរិយាបថដំណេកដែលល្អបំផុត ព្រោះបេះដូងនឹងធ្វើការបានស្រួល ហើយអាហារក្នុងក្រពះ ក៏នឹងត្រូវច្របាច់ចុះទៅក្នុងពោះវៀនតូច បានយ៉ាងល្អដែរ និងថែមទាំងជាឥរិយាបថ ដែលជួយកាត់បន្ថយអាការឈឺខ្នងបានទៀតផង។

ឥរិយាបថគេងផ្កាប់

មនុស្សភាគច្រើនៗប្រើឥរិយាបថនេះ ពេលគេងអានសៀវភៅ។ ចំណុចមិនល្អរបស់ឥរិយាបថនេះគឺ នឹងធ្វើឱ្យឈឺគល់ក តែបើចាំបាច់ ត្រូវតែគេងក្នុងឥរិយាបថនេះមែនទែននោះ សូមណែនាំឱ្យរកខ្នើយមកទ្រាប់ក្រោមដើមទ្រូង ដើម្បីកុំឱ្យចុករួយ និងដកដង្ហើមបានស្រួលផង៕

June 8, 2021

មហាសេដ្ឋី Jeff Bezos នឹងជិះយាន New Shepard ហោះទៅទេសចរណ៍នៅទីអវកាស នាពេលឆាប់ៗនេះ

មហាសេដ្ឋី Jeff Bezos ដែលជាស្ថាបនិករបស់ក្រុមហ៊ុន Amazon ថ្មីៗនេះ បានប្រកាសថា លោកនឹងរួមដំណើរជាមួយប្អូនប្រុសរបស់លោក និងអ្នកទេសចរណ៍អវកាសច្រើនរូបទៀត ហោះឡើងទៅកាន់ទីអវកាស ដោយប្រើយាន New Shepard ដែលក្រុមហ៊ុន Blue Origin របស់លោក ជាអ្នកផលិតផ្ទាល់។

តាមផែនការ ដំណើរទេសចរណ៍ទៅកាន់់ទីអវកាសនៃក្រុមរបស់មហាសេដ្ឋី Jeff Bezos នេះ នឹងចេញដំណើរនៅថ្ងៃទី20 ខែកក្កដា ឆ្នាំ2021 ដោយប្រើប្រាស់យានមានមនុស្សបើកដំបូងរបស់ក្រុមហ៊ុនអវកាសចរណ៍ Blue Origin។ យាន New Shepard នេះនឹងមានបន្ទប់ដែលមានទំហំល្មមសម្រាប់មនុស្ស 6នាក់។ រ៉ុក្កែងដែលមានបណ្ដោយជាង 17ម៉ែត្រ នឹងក្លាយជាអ្នករុញច្រាន New Shepard ឡើងទៅកាន់ទីអវកាសដែលមានកម្ពស់ប្រមាណ 97,000ម៉ែត្រពីផែនដី និងប្រើពេលយ៉ាងតិច 11នាទី។

លោក Bezos វ័យ 57ឆ្នាំ បានឱ្យដឹងថា ៖ «តាំងពីអាយុ 5ឆ្នាំ ខ្ញុំស្រមៃចង់ហោះទៅទេសចរណ៍នៅទីអវកាស។ នៅថ្ងៃទី 20 ខែកក្កដា ក្ដីស្រមៃរបស់ខ្ញុំ និងប្អូនប្រុស នឹងក្លាយជាការពិត»។

បើសិនគ្រប់យ៉ាងដំណើរការរលូត លោក Bezos ដែលជាអ្នកមានជាងគេលំដាប់លេខ1 ក្នុងពិភពលោក ដោយមានទ្រព្យសរុប 187ពាន់លានដុល្លារ នឹងក្លាយជាមនុស្សដំបូងក្នុងចំណោមមហាសេដ្ឋីផ្នែកអវកាស ដែលនឹងបានទទួលបទពិសោធន៍ក្នុងការហោះហើរដោយប្រើបច្ចេកវិទ្យារ៉ុក្កែត ដែលអភិវឌ្ឍដោយក្រុមហ៊ុនរបស់លោក។

ក្រោយការធ្វើតេស្តរ៉ុក្កែត និងយានអវកាសអស់រយៈពេល 6ឆ្នាំ កាលពីខែឧសភាកន្លងទៅ ក្រុមហ៊ុន Blue Origin បានប្រកាសថា កំពុងត្រៀមនាំអតិថិជនដំបូងទៅទេសចរណ៍នៅទីអវកាស ដោយប្រើយាន New Shepard។ បើទោះមិនទាន់ប្រកាសអំពីតម្លៃសម្រាប់ការហោះទៅកាន់ទីអវកាស ប៉ុន្តែ Blue Origin បានបង្ហើបឱ្យដឹងថា កៅអីមួយក្នុងចំណោមកៅអីចំនួន 6 នឹងត្រូវផ្ដល់ជូនអតិថិជនដែលឈ្នះការដេញថ្លៃដែលកំពុងប្រព្រឹត្តទៅនាបច្ចុប្បន្ន។ តម្លៃសម្រាប់កៅអីមួយនេះ កាលពីព្រឹកថ្ងៃទី7 ខែមិថុនា បានឡើងដល់ 2.8លានដុល្លារ ប៉ុន្តែ បន្ទាប់ពីការប្រកាសព័ត៌មានខាងលើ តម្លៃរបស់វាបានកើនឡើងរហូតដល់ 3.2លានដុល្លារ។

Blue Origin ដែលត្រូវបានលោក Bezos បង្កើតឡើងកាលពីឆ្នាំ2000 បានធ្វើតេស្តហោះហើរគ្មានមនុស្សបើកបរ ចំនួនរាប់សិបលើកមកហើយ។ ក្រៅពី New Shepard ក្រុមហ៊ុននេះក៏កំពុងអភិវឌ្ឍរ៉ុក្កែតមួយប្រភេទទៀតដែលមានឈ្មោះថា New Glenn ដើម្បីនាំយកផ្កាយរណបពាណិជ្ជកម្មរបស់ឯកជន និងរបស់រដ្ឋាភិបាលអាមេរិក ឡើងទៅកាន់គន្លងតារាវិថី ក៏ដូចជាអាចហោះចូលទៅកាន់ទីអវកាសឆ្ងាយ។

Blue Origin ក៏សង្ឃឹមថា នឹងបានចូលរួមគម្រោងនាំមនុស្សទៅកាន់ឋានព្រះចន្ទរបស់អង្គការ NASA នាឆ្នាំ2024 បើទោះ SpaceX របស់ Elon Musk បានចុះកិច្ចព្រមព្រៀងរួចហើយ ដើម្បីផលិតយានចុះចតលើដីរបស់ឋាន សម្រាប់ NASA៕

ប្រភព៖ CNN, CNBC
ប្រែសម្រួល៖ បុត្រា

June 8, 2021

យន្តហោះយោធា ដឹកតំណាងរាស្ត្រ សហរដ្ឋអាមេរិក មកកាន់កោះតៃវ៉ាន់ ៖ ពលរដ្ឋចិនខឹងខ្លាំង ខណៈក្រុងប៉េកាំង ប្រតិកម្មដោយប្រុងប្រយ័ត្ន

ប្រជាជនចិន បាននាំគ្នារិះគន់ និងជំរុញឱ្យរដ្ឋាភិបាលចិន រក្សាជំហរស្ដីពី «បន្ទាត់ក្រហម» នៅពេលយន្តហោះដឹកជញ្ជូនផ្នែកយោធា C-17 ដែលបានដឹកប្រតិភូសហរដ្ឋអាមេរិក ចុះចតលើកោះតៃវ៉ាន់។

យន្តហោះដឹកជញ្ជូន C-17 របស់ទ័ពអាកាស អាមេរិក ដឹកប្រតិភូមួយក្រុម ដែលមានតំណាងរាស្ត្រចំនួន 3រូប មកពីសភាជាន់ខ្ពស់សហរដ្ឋអាមេរិក បានចុះចតនៅឯទីក្រុង តៃប៉ិ នៃកោះតៃវ៉ាន់ កាលពីថ្ងៃទី6 ខែមិថុនា ហើយបានឈប់នៅទីនេះអស់រយៈពេល 3ម៉ោង។

តំណាងរាស្ត្រអាមេរិក ទាំងនេះ រួមមាន Tammy Duckworth, Chris Coons និង Dan Sulliva បានជួបពិភាក្សាជាមួយនឹងមេដឹកនាំតៃវ៉ាន់ លោកស្រី Tsai Ing-wen ព្រមទាំងបានសន្យាផ្ដល់វ៉ាក់សាំង Covid-19 ចំនួន 750,000ដូស ដល់កោះនេះផងដែរ។

សារព័ត៌មានតៃវ៉ាន់ រាយការណ៍ថា នេះគឺជាលើកដំបូងហើយ ដែលយន្តហោះដឹកជញ្ជូនផ្នែកយោធា C-17 ចុះចតលើកោះនេះ រាប់ចាប់ពីឆ្នាំ1995។ ប៉ុន្តែ ភាគីចិនដីគោក បញ្ចេញប្រតិកម្មដោយការប្រុងប្រយ័ត្ន។

សារព័ត៌មានចិន រួមមាន Xinhua ជាដើម មិនបានរាយការណ៍អំពីដំណើរទស្សនកិច្ចរបស់ប្រតិភូសហរដ្ឋអាមេរិក នេះទេ ចំណែកក្រសួងការបរទេសចិន និងការិយាល័យទទួលបន្ទុកបញ្ហាកោះតៃវ៉ាន់ ក៏មិនទាន់មានការអធិប្បាយអ្វីអំពីព័ត៌មាននេះ។

បញ្ហាខាងលើនេះ បានធ្វើឱ្យពលរដ្ឋចិនជាច្រើន មានប្រតិកម្មយ៉ាងខ្លាំងក្លា នៅលើបណ្ដាញសង្គម Weibo និងបានរំលឹកអំពីទស្សនៈរបស់ទីក្រុងប៉េកាំង ដែលថា កោះតៃវ៉ាន់ ជាផ្នែកមួយនៃទឹកដីចិន ដែលកំពុងរង់ចាំតែការបង្រួបបង្រួមប៉ុណ្ណោះ។

«បន្ទាត់ក្រហមរបស់យើង លែងនៅជាបន្ទាត់ក្រហមទៀតហើយ។ បើសិនជាគ្រប់យ៉ាងដំណើរការដូច្នេះ តើធ្វើដូចម្ដេច ជនបរទេសព្រមចាត់ទុកតៃវ៉ាន់ ជាផ្នែកមួយរបស់ចិន?» ការបញ្ចេញមតិនៅលើបណ្ដាញសង្គម Weibo ដែលទទួលបានការចុចចូលចិត្តច្រើនជាងគេ នៅខាងក្រោមរូបថតនៃយន្តហោះ C-17 ដែលកំពុងចតនៅលើកោះតៃវ៉ាន់។

ពលរដ្ឋចិនជាច្រើន បានអំពាវនាវឱ្យមានការទប់ស្កាត់ ទង្វើដែល សហរដ្ឋអាមេរិក កំពុងពង្រឹង និងពង្រីកទំនាក់ទំនងជាមួយកោះតៃវ៉ាន់ ដោយមិនបង្កជម្លោះប្រដាប់អាវុធ។ អត្ថបទមួយដែលត្រូវបានគេចែករំលែកច្រើន បានអះអាងថា ដំណើរទស្សនកិច្ចមកកាន់តៃវ៉ាន់ របស់ក្រុមមន្ត្រី សហរដ្ឋអាមេរិក គឺជាឥរិយាបថដែល «រុញច្រានយើងទៅកាន់បន្ទាត់ក្រហមបន្តិចម្ដង»។

ក្រុមអ្នកជំនាញយល់ថា ប្រតិកម្មរបស់ប្រជាជនចិនខាងលើនេះ កំពុងជំរុញឱ្យរដ្ឋាភិបាលចិន រក្សាតុល្យភាពអំណាច ក្រោយទីក្រុងប៉េកាំង បានប្រឹងប្រែងរិះគន់យ៉ាងខ្លាំងក្លា និងបង្កើនវត្តមានយោធានៅជុំវិញកោះតៃវ៉ាន់ ដើម្បីរារាំងទីក្រុងវ៉ាស៊ីងតោន ខិតចូលជិតទីក្រុងតៃប៉ិ។

រដ្ឋមន្ត្រីការបរទេសចិន Wang Yi កាលពីខែមីនា បានព្រមានដល់ សហរដ្ឋអាមេរិក ថា «កុំឆ្លងផុតបន្ទាត់ក្រហម និងប្រលែងលេងជាមួយនឹងភ្លើង» នៅក្នុងបញ្ហាកោះតៃវ៉ាន់។

Natasha Kassam ប្រធានកម្មវិធីគោលនយោបាយការបរទេស និងសាធារណៈរបស់វិទ្យាស្ថាន Lowy នៃប្រទេសអូស្ត្រាលី ឱ្យដឹងថា៖ «ស្ថានការណ៍មិនដែលមានស្ថិរភាព ហើយទាំងចិន និងសហរដ្ឋអាមេរិក សុទ្ធតែមានការផ្លាស់ប្ដូរគួរឱ្យកត់សម្គាល់ នៅក្នុងគោលនយោបាយសម្រាប់កោះតៃវ៉ាន់។ សហរដ្ឋអាមេរិក កំពុងឆ្លងចេញពីទម្លាប់ដើម ដែលនេះគឺជាការប្រតិកម្មនៅចំពោះមុខទស្សនៈដាច់ខាតរបស់ចិន»។

Drew Thompson អតីតមន្ត្រីតាមដានទំនាក់ទំនងផ្នែកការពារជាតិ របស់រដ្ឋមន្ត្រីការពារជាតិសហរដ្ឋអាមេរិក អះអាងថា៖ «ដំណើរទស្សនកិច្ចនេះគឺជាការធានាចំពោះមេដឹកនាំ Tsai Ing-wen ថា សហរដ្ឋអាមេរិក យកចិត្តទុកដាក់លើស្ថិរភាពនៃឆ្នេរទាំងពីរ នៅច្រកសមុទ្រតៃវ៉ាន់ និងសង្កត់ធ្ងន់ថា កោះនេះត្រូវការការគាំទ្រ ដើម្បីការពារខ្លួន»៕

ប្រភព៖ Bloomberg
ប្រែសម្រួល៖ បុត្រា

June 8, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី8 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី8 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 678នាក់ និងអ្នកស្លាប់ថ្មីចំនួន 12នាក់បន្ថែមទៀត នៅក្នុងថ្ងៃទី7 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 35,511នាក់ ក្នុងនោះមាន 278នាក់បានបាត់បង់ជីវិត, 28,649នាក់បានជា និងប្រមាណ 6,475នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។
នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 174,379,088នាក់ ត្រូវបានរកឃើញ ក្នុងនោះមាន 157,640,687នាក់បានជា, 3,752,046នាក់បានស្លាប់ និង 12,986,355នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 8, 2021

ចិន «ទាត់ចោល» ការទាមទារសំណង 10លានលានដុល្លារ របស់លោក Trump

ប្រទេសចិន យល់ថា ក្រុមអ្នកនយោបាយដែល «មើលស្រាលអាយុជីវិតរបស់ប្រជាជន» ទើបជាអ្នកត្រូវទទួលខុសត្រូវ បន្ទាប់ពីលោក Donald Trump ទាមទារសំណង 10លានលាន (10,000,000,000,000) ដុល្លារអាមេរិក ដោយសារតែវីរុសCovid-19។

«Trump តែងតែគេចវេះពីការពិត និងការទទួលខុសត្រូវរបស់ខ្លួន ដោយសារតែមិនទប់ទល់នឹងរោគរាតត្បាត តែបែរជាបង្វែរចំណាប់អារម្មណ៍របស់គ្រប់គ្នាទៅវិញ» អ្នកនាំពាក្យក្រសួងការបរទេសចិន Wang Wenbin ឆ្លើយតបដូច្នេះ នៅឯរដ្ឋធានីប៉េកាំង កាលពីថ្ងៃទី7 ខែមិថុនា នៅពេលត្រូវបានសួរអំពីបញ្ហាអតីតប្រធានាធិបតីសហរដ្ឋអាមេរិក Donald Trump ទាមទារឱ្យចិន សងសំណង ព្រោះតែការខាតបង់ដោយសារវីរុសCovid-19។

លោក Wang Wenbin ជឿថា ពលរដ្ឋអាមេរិកាំង នឹងមានការសម្រេចចិត្តដោយយុត្តិធម៌ ចំពោះបញ្ហាដែលថា អ្នកណាត្រូវទទួលខុសត្រូវលើរោគរាតត្បាតនេះ។ «អ្នកនយោបាយលាក់ពុត ដែលមិនបានយកចិត្តទុកដាក់លើអាយុជីវិត និងសុខភាពរបស់ប្រជាជនទេតើ ទើបជាអ្នកត្រូវទទួលខុសត្រូវ»។

អ្នកនាំពាក្យខាងលើ ថែមទាំងបាននបញ្ជាក់ថា នៅក្នុងអាណត្តិរបស់អតីតប្រធានាធិបតី Trump សហរដ្ឋអាមេរិក បានរកឃើញអ្នកឆ្លងវីរុសជាង 24លាននាក់ ក្នុងនោះមានជាង 410,000នាក់បានស្លាប់។

លោក Trump មុននោះ បាននិយាយនៅក្នុងកិច្ចប្រជុំមួយរបស់បក្សសាធារណរដ្ឋប្រចាំរដ្ឋ Carolina ខាងជើង ថា គ្រប់ប្រទេស ត្រូវការរួបរួមគ្នា «ផ្ញើវិក្កយបត្រត្រមួយទៅឱ្យចិន ដើម្បីទាមទារសំណងយ៉ាងតិច 10លានលានដុល្លារអាមេរិក សម្រាប់ការខូចខាតដោយសារ Covid-19។ លោក Trump ក៏បានចោទចិនថា បានធ្វើឱ្យសហរដ្ឋអាមេរិក ខាតបង់ប្រាក់ជិត 16លានលានដុល្លារ ព្រោះតែបាន «បញ្ចេញ» Covid-19 ឱ្យឆ្លងរាលដាលពេញពិភពលោក និង «ឆក់យកជីវិតពលរដ្ឋអាមេរិកាំងរាប់សែននាក់»។

លោក Trump ក៏បានអះអាងថា បើសិនជាលោកមិនចាត់ចែងរឿងវ៉ាក់សាំងក្នុងពេលលោកកាន់អំណាចនោះទេ សហរដ្ឋអាមេរិក ប្រហែលជានឹងត្រូវឆ្លងកាត់ស្ថានភាពអាក្រក់ដូចសម័យមហារោគរាតត្បាត ផ្ដាសាយអេស្ប៉ាញ ដោយមានរាប់រយលាននាក់ត្រូវបាត់បង់ជីវិត។

បើទោះជាបានចាកចេញពីសេតវិមាន ប៉ុន្តែ លោក Trump នៅតែចោទប្រកាន់ចិន ជាបន្តបន្ទាប់ ដោយយល់ថា ប្រទេសចិន មិនបានគ្រប់វីរុសក្នុងស្រុកឱ្យបានល្អ បណ្ដោយឱ្យវាឆ្លងរាលដាលពាសពេញពិភពលោក»។

នៅចំពោះមុខការសង្ស័យអំពីប្រភពវីរុសCovid-19 មកលើចិន ពីសំណាក់ប្រទេសនានា ប្រទេសចិន ក៏បានស្នើឱ្យសហរដ្ឋអាមេរិក អនុញ្ញាតឱ្យអង្គការសុខភាពពិភពលោក (WHO) ចូលមកស្រាវជ្រាវលើប្រភពរបស់វីរុស ដូចអ្វីដែលប្រទេសចិន បានអនុញ្ញាតឱ្យក្រុមអ្នកជំនាញអន្តរជាតិ ចូលស្រាវជ្រាវនៅទីក្រុង Wuhan នាពេលកន្លង៕

ប្រភព៖ NDTV
ប្រែសម្រួល៖ បុត្រា

June 8, 2021

ជាលើកដំបូងក្នុងប្រវត្តិសាស្ត្រ! យន្តហោះដ្រោន ចាក់សាំងឱ្យយន្តហោះចម្បាំងអាមេរិក នៅលើអាកាស

យន្តហោះគ្មានមនុស្សបើក (ដ្រោន/drone) នេះ បានផ្គត់ផ្គង់ឥន្ធនៈនៅលើអាកាស ទៅឱ្យយន្តហោះចម្បាំងមួយគ្រឿង នៅក្នុងព្រឹត្តិការណ៍មួយដែលក្រុមហ៊ុន Boeing ចាត់ទុកថាជាលើកដំបូងក្នុងប្រវត្តិសាស្ត្រអាកាសចរណ៍។

ក្រុមហ៊ុន Boeing កាលពីថ្ងៃទី7 ខែមិថុនា បានប្រកាសថា យន្តហោះគ្មានមនុស្សបើកមួយគ្រឿង បានផ្គត់ផ្គង់ប្រេងដល់យន្តហោះចម្បាំងមួយគ្រឿងផ្សេងទៀត ជាលើកដំបូងក្នុងប្រវត្តិសាស្ត្រ។ ប្រកាសនេះត្រូវបានធ្វើឡើងបន្ទាប់ពីការសាកល្បងដោយជោគជ័យ ទៅលើគំរូនៃយន្តហោះគ្មានមនុស្សបើកពិសេស ជំនាញខាងចាក់ប្រេងឱ្យយន្តហោះដទៃ ដែលត្រូវបានកងទ័ពជើងទឹកសហរដ្ឋអាមេរិក ដាក់ឈ្មោះឱ្យថា MQ-25 Stringray។

យន្តហោះគ្មានមនុស្សបើក ដែលត្រូវបានបញ្ជាពីចម្ងាយ បានចាក់សាំងដោយជោគជ័យ ទៅឱ្យយន្តហោះចម្បាំង F/A 18 Super Hornet របស់កងទ័ពជើងទឹកសហរដ្ឋអាមេរិក នៅក្នុងជើងហោះហើរសាកល្បងកាលពីថ្ងៃទី4 ខែមិថុនា ឆ្នាំ2021។

Leanne Caret ដែលជាប្រធាន និងជានាយកប្រតិបត្តិរបស់ក្រុមហ៊ុន Boeing Defense បាននិយាយថា៖ «នេះគឺជាព្រឹត្តិការណ៍គួរកត់សម្គាល់ សម្រាប់ក្រុមរួមរបស់ Boeing និងកងទ័ពជើងទឹកអាមេរិក»។

ឧត្តមនាវីទោ Brian Corey ប្រធានការិយាល័យកម្មវិធីអាវុធវាយប្រហារ និងអាកាសចរណ៍គ្មានមនុស្សបើក ឱ្យដឹងថា ជើងហោះហើរសាកល្បងនេះ «ជាគ្រឹះសម្រាប់ការដាក់ឱ្យប្រើប្រាស់នៅលើនាវាផ្ទុកយន្តហោះចម្បាំង ដែលលើកកម្ពស់លទ្ធភាពសម្រាប់និយមន័យ “ប្រព័ន្ធគ្មានមនុស្សបើក”»។

កងទ័ពជើងទឹកសហរដ្ឋអាមេរិក បាន និងកំពុងជំរុញឱ្យមានការបំពាក់យន្តហោះគ្មានមនុស្សបើកច្រើនជាងមុន ទៅក្នុងកិច្ចការភ័ស្តុភារ ដើម្បីកាត់បន្ថយកម្លាំង និងប្រាក់កាស សម្រាប់អាទិភាពដទៃ។

អនុសេនីយ៍ឯក Chad Reed ប្រធានការិយាល័យនៃកម្មវិធីអាកាសចរណ៍គ្មានមនុស្សបើក របស់កងទ័ពជើងទឹកសហរដ្ឋអាមេរិក បានហៅព្រឹត្តិការណ៍នោះថាជា «ព្រឹត្តិការណ៍សំខាន់ និងគួរឱ្យចាប់អារម្មណ៍»។

យន្តហោះគ្មានមនុស្សបើកខាងលើ ប្រើប្រាស់ប្រព័ន្ធផ្គត់ផ្គង់ប្រេងនៅលើអាកាស Cobham (ARS) ដែលកងទ័ពជើងទឹកសហរដ្ឋអាមេរិក បំពាក់នៅលើយន្តហោះ Super Hornet មួយចំនួន ដែលធ្វើសកម្មភាពពីនាវាផ្ទុកយន្តហោះរបស់ពួកគេ។ កងទ័ពជើងទឹកអាមេរិក មានគម្រោងទិញយន្តហោះប្រភេទនេះ ជាង 70គ្រឿងទៀត ដើម្បីផ្ទេរយន្តហោះចម្បាំង និងអ្នកបើកបរ ដែលកំពុងធ្វើកិច្ចការផ្គត់ផ្គង់ប្រេង ទៅបំពេញបេសកកម្មប្រយុទ្ធវិញ។

ជើងហោះហើរសាកល្បងខាងលើ ត្រូវបានចាប់ផ្ដើមពីនាវាផ្ទុកយន្តហោះ MidAmerica នៅ Mascoutah នៃរដ្ឋ Illinois ក្បែរមូលដ្ឋានរបស់ក្រុមហ៊ុន Boeing នៅ St. Louis ក្នុងរដ្ឋ Missouri៕

ប្រភព៖ RT
ប្រែសម្រួល៖ បុត្រា

June 8, 2021

រដ្ឋបាលខណ្ឌច្បារអំពៅ ជូនដំណឹងដល់ពលរដ្ឋដែលត្រូវចាក់វាក់សាំងស៊ីណូវ៉ាក់ (SINOVAC) ដូសទីពីរ

រដ្ឋបាលខណ្ឌច្បារអំពៅ នារសៀលថ្ងៃទី7 ខែមិថុនា ឆ្នាំ2021 នេះ បានចេញសេចក្តីជូនដំណឹងស្តីពីការចាក់វ៉ាក់សាំងបង្ការវីរុសCovid-19 ម្ជុលទីពីរ នៅក្នុងមូលដ្ឋាននៃខណ្ឌនេះ។

វ៉ាក់សាំងដែលនឹងត្រូវយកមកចាក់ជូនពលរដ្ឋនៅក្នុងខណ្ឌច្បារអំពៅដូសទីពីរនេះគឺ ប្រភេទវ៉ាក់សាំងស៊ីណូវ៉ាក់ (Sinovac) របស់ប្រទេសចិន។

ការចាក់វ៉ាក់សាំងជូនប្រជាពលរដ្ឋដែលមានអាយុចាប់ពី 18ឆ្នាំឡើងទៅនេះ នឹងធ្វើឡើងនៅក្នុងមូលដ្ឋានខណ្ឌច្បារអំពៅ ចាប់ពីថ្ងៃទី8 ដល់ថ្ងៃទី21 ខែមិថុនា ឆ្នាំ2021។ ព័ត៌មានបន្ថែម សូមអានសេចក្ដីជូនដំណឹងខាងក្រោម។

ប្រភព៖ រដ្ឋបាលខណ្ឌច្បារអំពៅ
ដកស្រង់៖ បុត្រា

June 7, 2021

Author: សឿន សំណាង