សឿន សំណាង - La Reine Media

យន្តហោះចម្បាំង អាហ្វហ្គានីស្ថាន «ហោះចោលស្រុក» តែទៅបុកនឹងយន្តហោះចម្បាំង អ៊ូសបេគីស្ថាន

យន្តហោះចម្បាំង Super Tucano របស់ប្រទេសអាហ្វហ្គានីស្ថាន បានប៉ះទង្គិចគ្នានឹងយន្តយន្តហោះចម្បាំង MiG-29 របស់ អ៊ូសបេគីស្ថាន នៅពេលត្រូវបានអមដំណើរហោះទៅចុះចតនៅមូលដ្ឋាន Termez ក្បែរព្រំដែន ប៉ុន្តែ អ្នកបើកបរបានរួចពីការស្លាប់។

យន្តហោះចម្បាំងធុនស្រាល A-29 Super Tucano របស់កងទ័ពអាកាស អាហ្វហ្គានីស្ថាន បានហោះចូលដែនអាកាសរបស់ប្រទេសអ៊ូសបេគីស្ថាន និងសុំការអនុញ្ញាតចុះចតលើព្រលានយន្តហោះ Khanabad នៅភាគខាងត្បូងប្រទេសនេះ កាលពីថ្ងៃទី 15 សីហា។ អ្នកបើកបរយន្តហោះ A-29 Super Tucano ត្រូវបានស្នើឱ្យឆ្ពោះទៅកាន់មូលដ្ឋាន Termez និងត្រូវបានអមដំណើរដោយយន្តហោះចម្បាំង MiG-29 ពីរគ្រឿង របស់ អ៊ូសបេគីស្ថាន។

«ក៏ប៉ុន្តែ នៅក្នុងពេលតាមដាន យន្តហោះ A-29 Super Tucano ក៏បានប៉ះទង្គិចនឹងយន្តហោះ MiG-29។ យន្តហោះចម្បាំងទាំងពីរគ្រឿងនេះក៏បានធ្លាក់ទៅលើខណ្ឌ Sherabad ក្នុងខេត្ត Surkhandarya។ អ្នកបើកបររបស់យន្តហោះទាំងពីរនេះ បានចុចដំណើរការកៅអីសង្គ្រោះបន្ទាន់ និងបានរួចផុតការការស្លាប់» ការិយាល័យប្រធានាធិបតី អ៊ូសបេគីស្ថាន បានប្រកាសដូច្នេះកាលពីម្សិលមិញ។

ការប្រកាសថ្មីខាងលើនេះគឺផ្ទុយពីការប្រកាសមុននោះរបស់ក្រសួងការពារជាតិ អ៊ូសបេគីស្ថាន ដែលស្ថាប័ននេះបានប្រកាសថា កងទ័ពការពារដែនអាកាសបានបាញ់ទម្លាក់យន្តហោះយោធា អាហ្វហ្គានីស្ថាន នៅពេលវាបានរំលោភដែនអាកាសរបស់ អ៊ូសបេគីស្ថាន។

តាលីបង់ បានចូលមកគ្រប់គ្រងកាប៊ុលវិញ ក្រោយ 20 ឆ្នាំ ដែលត្រូវ អាមេរិក កម្ចាត់ បន្ទាប់ពីមានអំពីភេរវកម្ម «11 កញ្ញា 2001 នៅអាមេរិក»

ក្រុមមន្ត្រីបានឱ្យដឹងថា ទាហានជាង 700 នាក់ និងយន្តហោះច្រើនប្រភេទ ចំនួន 46 គ្រឿង របស់ អាហ្វហ្គានីស្ថាន បានចូលទៅកាន់ អ៊ូសបេគីស្ថានក្នុងថ្ងៃទី 15 សីហា។ យន្តហោះទាំងនេះ ត្រូវបានស្នើឱ្យចុះចតក្នុងមូលដ្ឋាន Termez។ បច្ចុប្បន្ន មិនទាន់ដឹងច្បាស់ថា យន្តហោះ និងទាហាន អាហ្វហ្គានីស្ថានទាំងនេះ ស្ថិតនៅទីណានៅឡើយ។

ក្រុមតាលីបង់ ចូលគ្រប់គ្រងរដ្ឋធានីកាប៊ុល បានយ៉ាងងាយស្រួល កាលពីព្រលប់ថ្ងៃទី 15 សីហា។ តាលីបង់ ដណ្ដើមបានជោគជ័យលើកងទ័ពរដ្ឋាភិបាល អាហ្វហ្គានីស្ថាន ក្រោយពី សហរដ្ឋអាមេរិក និងសម្ព័ន្ធមិត្តបានដកទ័ពភាគច្រើនរបស់ពួកគេ ចេញពី អាហ្វហ្គានីស្ថាន។

នៅពេល តាលីបង់ ជិតចូលដល់រដ្ឋធានី ប្រធានាធិបតី អាហ្វហ្គានីស្ថាន Ashraf Ghani ក៏បានរត់ចោលប្រទេស ដោយលើកឡើងថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយប្រទេសលោកខាងលិច ត្រូវដួលរលំ។ ក្រុមតាលីបង់ បានចូលដល់វិមានប្រធានាធិបតី ហើយប្រកាសថានឹងបង្កើត រដ្ឋ Islamic Emirate of Afghanistan (បកប្រែក្រៅផ្លូវការថា រដ្ឋអ៊ីស្លាមរួបរួមនៃអាហ្វហ្គានីស្ថាន)៕

August 17, 2021

អាហ្វហ្គានីស្ថាន៖ ជាង 600 នាក់ ប្រជ្រៀតគ្នាក្នុងយន្តហោះ អាមេរិក រង់ចាំចាកចេញពីប្រទេស

មនុស្សប្រហែល 640 នាក់ អង្គុយស្ទើរតែលើគ្នានៅក្នុងបន្ទប់ដាក់ទំនិញរបស់យន្តហោះ អាមេរិក C-17 ដែលកំពុងជម្លៀសមនុស្សចេញពីប្រទេសអាហ្វហ្គានីស្ថាន នៅពេលក្រុម តាលីបង់ ចូលកាន់កាប់រដ្ឋធានីកាប៊ុល។

ពលរដ្ឋអាហ្វហ្គានីស្ថានរាប់ពាន់នាក់ កាលពីថ្ងៃទី 15 សីហា បានសម្រុកចូលព្រលានយន្តហោះអន្តរជាតិនៅរដ្ឋធានីកាប៊ុល ដើម្បីរកវិធីចាកចេញពីប្រទេស ក្នុងពេលដែលក្រុមឧទ្ទាមតាលីបង់ គ្រប់គ្រងទឹកដីបានទាំងស្រុង។ មនុស្សរាប់រយនាក់ បានព្យាយាមឡើងលើយន្តហោះ C-17 Globemaster III ដែលកំពុងត្រៀមចេញដំណើរទៅកាន់ប្រទេសកាតា បើទោះត្រូវប្រជ្រៀតគ្នាយ៉ាងណែនក៏ដោយ។

រូបថតមួយសន្លឹកដែលសារព័ត៌មាន Defense One ថតបាននៅលើយន្តហោះ បង្ហាញថា ហ្វូងមនុស្សដែលរួមមានទាំងស្ត្រី និងកុមារផងដែរ កំពុងអង្គុយស្ទើរតែគរលើគ្នានៅក្នុងយន្តហោះ រង់ចាំចាក់ចេញពី អាហ្វហ្គានីស្ថាន។

មនុស្សប្រហែល 640 នាក់នៅលើយន្តហោះនេះ គឺជាចំនួនដ៏ច្រើន ពោលគឺច្រើនជាងឆ្ងាយបើធៀបនឹងចំនួនមនុស្សដែលក្រុមហោះហើរគ្រោងនឹងដឹកទៅទៀត នេះបើតាមសម្ដីរបស់មន្ត្រីការពារជាតិម្នាក់។ ប៉ុន្តែ ក្រុមហោះហើរនៅតែសម្រេចអនុញ្ញាតឱ្យពួកគេស្ថិតនៅលើយន្តហោះ ដើម្បីចាកចេញពីរដ្ឋធានីកាប៊ុល ដោយសុវត្ថិភាព។

មន្ត្រីមួយរូបខាងលើនិយាយថា៖ «ក្រុមហោះហើរ បានសម្រេចបើកបរយន្តហោះនេះ ដោយដឹកពលរដ្ឋទាំងនេះចាកចេញ (ពីអាហ្វហ្គានីស្ថាន)» ទៅ។ យន្តហោះដឹកជញ្ជូននេះ ស្ថិតក្នុងអង្គភាពលេខ436 ដែលមានមូលដ្ឋាននៅបន្ទុយ Dover ក្នុងរដ្ឋ Delaware សហរដ្ឋអាមេរិក។

ក្រុមហ៊ុនផលិតយន្តហោះនេះ (Boeing) បានឱ្យដឹងថា យន្តហោះដឹកជញ្ជូន C-17 នេះ អាចផ្ទុកមនុស្សច្រើនបំផុតត្រឹម «134 នាក់ប៉ុណ្ណោះ»។ ការដែលយន្តហោះនេះដឹកមនុស្សរហូតដល់ 640 នាក់ គឺលើសចំណុះដែល Boeing បានអនុញ្ញាត ប៉ុន្តែ នេះមិនមែនជាករណីដំបូងនោះឡើយ។

កាលពីឆ្នាំ 2013 នៅពេលព្យុះមហាកំណាចបានវាយលុកចូលប្រទេសហ្វីលីពីន កងទ័ពអាកាសអាមេរិក ក៏បានបញ្ជូនយន្តហោះ C-17 មួយគ្រឿង ពី Hawaii សំដៅទៅដឹកមនុស្សប្រមាណ 670 នាក់ ដើម្បីជម្លៀសទៅកាន់ទីសុវត្ថិភាព។

ព្រលានយន្តហោះនៅ កាប៊ុល គឺជាកន្លែងចុងក្រោយនៅ អាហ្វហ្គានីស្ថាន ដែលត្រូវបានការពារដោយ សហរដ្ឋអាមេរិក ក្នុងគ្រាដែលការជម្លៀសកំពុងត្រូវបានធ្វើឡើង។ នេះក៏ជាពេលដ៏ច្របូកច្របល់ ហើយទិដ្ឋភាពមនុស្សម្នារត់រកយន្តហោះ ក្នុងនោះមានអ្នកខ្លះតោងយន្តហោះ អ្នកខ្លះត្រូវធ្លាក់ពីយន្តហោះ ធ្វើឱ្យគេនឹកឃើញដល់សម័យសង្គ្រាមនៅអាស៊ីអាគ្នេយ៍ នៅពេលដែល អាមេរិក ដកទ័ពចេញពីប្រទេសជាសម្ព័ន្ធមិត្តមួយចំនួន៕

August 17, 2021

អាហ្វហ្គានីស្ថាន៖ ចិន ត្រៀមខ្លួនដើម្បីសហការ ខណៈ រុស្ស៊ី ជិតជួបពិភាក្សានឹង តាលីបង់

ប្រទេសចិន បានប្រកាសថា បានត្រៀមខ្លួនរួចហើយ ដើម្បីលើកកម្ពស់ «ទំនាក់ទំនងទ្វេភាគី» ជាមួយឧទ្ទាម តាលីបង់ ចំណែកឯ រុស្សី វិញ ក៏បាននិយាយថា ឯកអគ្គរដ្ឋទូតរបស់ខ្លួន នឹងជួបប្រជុំជាមួយក្រុមនេះ ក្រោយពីពួកគេដណ្ដើមបានអំណាចពីរដ្ឋាភិបាលដែលគាំទ្រដោយបណ្ដាប្រទេសលោកខាងលិច។

អ្នកនាំពាក្យក្រសួងការបរទេសចិន Hua Chunying បានប្រាប់ក្រុមអ្នកយកព័ត៌មាននាថ្ងៃនេះថា៖ «ប្រទេសចិន គោរពសិទ្ធិរបស់ប្រជាជន អាហ្វហ្គានីស្ថាន នៅក្នុងការសម្រេចចិត្តលើជោគវាសនារបស់ខ្លួន ហើយក៏បានត្រៀមខ្លួនជាស្រេចសម្រាប់លើកកម្ពស់កិច្ចសហប្រតិបត្តិការជាមួយ អាហ្វហ្គានីស្ថាន»។

ចំណែកឯ Zamir Kabulov ដែលជាមន្ត្រីការទូតនៃប្រទេសរុស្ស៊ី ឯណោះវិញ ក៏បានប្រាប់វិទ្យុ Ekho Moskvy ថា៖ «ឯកអគ្គរដ្ឋទូតរបស់យើង កំពុងតែទាក់ទងទៅកាន់មេដឹកនាំ តាលីបង់។ ស្អែកនេះ ឯកអគ្គរដ្ឋទូត នឹងជួបពិភាក្សាជាមួយមន្ត្រីសម្របសម្រួលដែលទទួលបន្ទុកផ្នែកសន្តិសុខរបស់ តាលីបង់»។

សមាជិកនៃក្រុមឧទ្ទាម តាលីបង់ បានចូលកាន់កាប់វិមានប្រធានាធិបតី អាហ្វហ្គានីស្ថាន កាលពីថ្ងៃសៅរ៍កន្លងទៅ

មន្ត្រីការទូតរុស្ស៊ីរូបនេះ បានបញ្ជាក់ថា ទីក្រុងមូស្គូ នឹងធ្វើការសម្រេចចិត្តក្នុងការទទួលស្គាល់រដ្ឋាភិបាលថ្មីនៅ អាហ្វហ្កានីស្ថាន ដោយយោងទៅតាមឥរិយាបថជាក់ស្ដែងរបស់ពួកគេ។

ក្រោយការដណ្ដើមបានអំណាចគ្រប់គ្រងរដ្ឋធានីកាប៊ុល ក្រុមតាលីបង់ បានប្រកាសថា សង្គ្រាមនៅ អាហ្វហ្គានីស្ថាន បានបញ្ចប់ ហើយបានអំពាវនាវរកសន្តិភាពជាមួយនឹងសហគមន៍អន្តរជាតិ។ តាលីបង់ បានបញ្ជាក់ថា រដ្ឋាភិបាលថ្មី អាចរួមមានទាំងក្រុមមនុស្សដែលមិនស្ថិតក្នុងជួរកងកម្លាំងតាលីបង់ និងក្រុមមនុស្សដែលស្ថិតក្នុងរដ្ឋាភិបាលចាស់ផងដែរ៕

August 16, 2021

អាហ្វហ្គានីស្ថាន៖ ស្បៃ Burqa បានត្រលប់មកវិញ ខណៈសិទ្ធិស្ត្រីអាចនឹងត្រូវបាត់បង់ទាំងស្រុង ពេល តាលីបង់ ចូលមកគ្រប់គ្រងប្រទេស

នៅក្នុងតំបន់ផ្សារមួយនៃរដ្ឋធានីកាប៊ុល ប្រទេស អាហ្វហ្គានីស្ថាន ថៅកែហាងលក់ Burqa ដែលជាស្បៃបិទមុខប្រពៃណីសម្រាប់ស្ត្រីមូស្លីម (អ៊ីស្លាមសាសនិក) ដឹងច្បាស់ថា ខ្លួនជិតមានឱកាសរកប្រាក់បានច្រើនជាងមុន នៅពេលក្រុម តាលីបង់ ចូលមកកាន់អំណាចវិញ ប៉ុន្តែ ទន្ទឹមនឹងនេះ ស្ត្រីគ្រប់រូប ពិសេសគឺនារីវ័យក្មេងនឹងអាចត្រូវបាត់បង់សិទ្ធិស្ទើរគ្រប់យ៉ាងរបស់ខ្លួន។

ថៅកែហាងលក់ស្បៃ Burqa មួយកន្លែង ឈ្មោះ Aref ឱ្យដឹងថា នៅពេល តាលីបង់ ដែលកងកម្លាំងប្រកាន់តឹងផ្នែកសាសនាអ៊ីស្លាមជាមួយនឹងស្ត្រីភេទ បានសម្រុកចូលមកក្បែររដ្ឋធានីកាប៊ុល ក៏ជាពេលដែលលោកបានទទួលថ្ងៃថ្មី ថ្ងៃដែលការជួញដូរស្បៃបិទមុខ Burqa របស់លោក ចាប់ផ្ដើមមានអតិថិជនច្រើនឡើង។

នៅមុនពេលរដ្ឋាភិបាលអាហ្វហ្គានីស្ថាន ដែលគាំទ្រដោយបណ្ដាប្រទេសលោកខាងលិច មិនទាន់ដួលរលំ អតិថិជនរបស់ Aref ភាគច្រើនគឺជាស្ត្រីមកពីបណ្ដាខេត្ត ដោយសារតែនៅរដ្ឋធានីកាប៊ុល បានប្រែក្លាយជាទីដែលស្ត្រីមានសិទ្ធិស្ទើរតែពេញលេញ បើធៀបនឹងពេលរដ្ឋាភិបាល តាលីបង់ មិនទាន់ត្រូវបានផ្ដួលរំលំដោយ សហរដ្ឋអាមេរិក កាលពីឆ្នាំ 2001។

អតិថិជនម្នាក់របស់ Aref និយាយថា នៅពេលដែលការព្រួយបារម្ភរបស់ស្ត្រីកើនឡើង ក៏ជាពេលដែលហាងនានាដំឡើងថ្លៃស្បៃ Burqa។ កន្លងមក ស្បៃ Burqa មួយឈុត មានតម្លៃប្រហែល 200 AFN (2.77 ដុល្លារអាមេរិក) ប៉ុន្តែ ពេលនេះ វាមានតម្លៃខ្ពស់ជាង 10 ដងឯណោះ។

Burqa គឺជាស្បៃបាំងមុខដែលមិនអាចខ្វះបាន សម្រាប់ស្ត្រីជនជាតិអាហ្វហ្គានីស្ថាន នៅក្នុងពេលដែលក្រុមតាលីបង់ កំពុងគ្រប់គ្រងប្រទេសអំឡុងទសវត្សរ៍ 1990។ កាលណោះ ស្ត្រីដែលមិនពាក់ស្បៃ Burqa នឹងត្រូវបានពិន័យជាប្រាក់យ៉ាងច្រើន ព្រមទាំងត្រូវ «ប៉ូលិសសិលធម៌» វាយនឹងរំពាត់ទៀតផង។

ក្រោយ តាលីបង់ ដួលរលំ ចាប់ពីឆ្នាំ 2001 ស្ត្រីជនជាតិអាហ្វហ្គានីស្ថាន រាប់លាននាក់ ដើរតាមចលនារំដោះស្ត្រី ដោយមានសិទ្ធិសម្រេចថា ខ្លួនគួរស្លៀកពាក់បែបណា និងដោះស្បៃមុខចេញ ដើម្បីទទួលយកសេរីភាព បើទោះជាស្ត្រីអាហ្វហ្គានីស្ថានភាគច្រើន នៅតែប្រើប្រាស់ស្បៃ Burqa ជាសម្លៀកបំពាក់ប្រពៃណី។

តាំងពីពេលនោះមក ទីក្រុងកាប៊ុល ប្រែជាមានពណ៌ចម្រុះ ដោយសារតែស្ត្រីមានសិទ្ធិសេរីភាពក្នុងការជ្រើសរើសរបៀបនៃការស្លៀកពាក់បែបសម័យ និងប្រពៃណីចម្រុះគ្នា។

ពេលនេះ ក្នុងគ្រាដែល តាលីបង់ ត្រលប់មកកាន់ កាប៊ុល វិញ ស្ត្រីជាច្រើនដែលបានទម្លាប់នឹងនិន្នាការសេរីនិយម ក៏ចាប់ផ្ដើមស្រមៃដល់រូបភាពស្បៃ Burqa ដែលត្រូវចូលមមកគ្របដណ្ដប់ក្បាល និងមុខមាត់ពួកគេស្ទើរពេញ 24 ម៉ោងក្នុងមួយថ្ងៃ។ បច្ចុប្បន្ន ក្នុងគ្រួសារនានា អ្នកខ្លះចាប់ផ្ដើមបើកទូសម្លៀកបំពាក់ យកស្បៃ Burqa មកប្រើប្រាស់ អ្នកខ្លះទៀតក៏នាំប្រពន្ធកូនទៅទិញស្បៃនេះ ដើម្បីប្ដូរផ្លាស់របៀបរបបនៃការស្លៀកពាក់ បំណងកុំឱ្យមានការចាប់អារម្មណ៍ពេលចេញក្រៅផ្ទះ។

ជាក់ស្ដែង បន្ទាប់ពីដណ្ដើមបានអំណាចក្នុងការគ្រប់គ្រងទីក្រុង Herat ក្រុម តាលីបង់ បានប្រកាសនៅលើបណ្ដាញសង្គមអំពីការបង្គាប់ឱ្យស្ត្រីក្នុងក្រុង ត្រូវគ្របស្បៃ Burqa នៅទីសាធារណៈ។ រដ្ឋធានី កាប៊ុល ជាកន្លែងដែលមានពលរដ្ឋវ័យក្រោម 30 ឆ្នាំ ចំនួន 2/3 មិនធ្លាប់ឆ្លងកាត់របបតាលីបង់។ Habiba វ័យ 26 ឆ្នាំ គឺជាម្នាក់ក្នុងចំណោមពលរដ្ឋ 2/3 នេះ។ នាងនៅតែមិនព្រមស្ដាប់តាមឪពុកម្ដាយ ដែលបានស្នើឱ្យពាក់ស្បៃ Burqa។ បើទោះជាដឹងថា នេះគឺជាអ្វីដែលពុកម្ដាយចង់ការពារកូន ប៉ុន្តែ Habiba អះអាងថា មិនមានបំណងទិញស្បៃនេះមកប្រើប្រាស់នោះទេ។ Habiba យល់ថា ការពាក់ស្បៃនេះ មានន័យថា នាងទទួលស្គាល់ថា បរាជ័យនៅចំពោះមុខ តាលីបង់ ដោយអនុញ្ញាតឱ្យពួកគេគ្រប់គ្រងជីវិតរបស់នាង និងធ្វើឱ្យនាងត្រូវបាត់បង់សមិទ្ធផលគ្រប់យ៉ាងដែលនាងខំតស៊ូដើម្បីសិទ្ធិស្ត្រីក្នុងរយៈពេលកន្លង។

នារីវ័យក្មេងជាច្រើននៅ កាប៊ុល ក៏កំពុងតែជួបប្រទះនឹងអារម្មណ៍ច្របូកច្របល់ រវាងស្មារតីតស៊ូដើម្បីសិទ្ធិស្ត្រី និងភាពអស់សង្ឃឹម នៅពេលឧទ្ទាមតាលីបង់ បានចូលមកកាន់កាប់រដ្ឋធានីកាប៊ូល បានសម្រេច។ Amul ដែលជានារីម៉ូដែល និងជាអ្នករចនាម៉ូដសម្លៀកបំពាក់មួយរូប បានចំណាយពេលវេលា និងកម្លាំងកាយ ចិត្តក្នុងរយៈពេលច្រើនឆ្នាំ ដើម្បីអាជីវកម្មរបស់ខ្លួន ក៏បានដឹងច្បាស់ថា ពេលនេះគ្រប់យ៉ាងដែលនាងមាន នឹងត្រូវបាត់បង់ទាំងស្រុងជាក់ជាមិនខានឡើយ។

មិនត្រឹមតែការវិលត្រលប់មកវិញនៃស្បៃ Burqa នោះទេ ប៉ុន្តែក្រុមនារីវ័យក្មេងនៅ កាប៊ុល ក៏ព្រួយបារម្ភចំពោះអនាគតរបស់ពួកគេផងដែរ។ និស្សិតជាច្រើនរូប ភ័យព្រួយចំពោះការសិក្សារបស់ពួកគេដែលអាចត្រូវបានបោះបង់ចោល។ នារីម្នាក់ដែលបានបញ្ចប់បរិញ្ញាបត្រពីសាកលវិទ្យាដែលល្អបំផុតនៅ អាហ្វហ្គានីស្ថាន និយាយថា នាងបានបោះបង់ការសិក្សាស្ទើរគ្រប់យ៉ាង ដោយយល់ថា ឱកាសរបស់ស្ត្រី ទំនងជាត្រូវរលាយទាំងស្រុង។ នាងបារម្ភខ្លាំងណាស់នៅពេល តាលីបង់ ត្រលប់មកវិញ។ ស្ត្រីនឹងត្រូវរស់នៅដូចមនុស្សលាក់ខ្លួន ហើយនាងក៏ត្រូវដុតលិខិតស្នាមដែលបញ្ជាក់អត្តសញ្ញាណ និងសញ្ញាបត្រ។ ជាងនេះ នារីទាំងឡាយក៏មិនមានសិទ្ធិស្ដាប់ចម្រៀងដែលខ្លួនចូលចិត្ត ការសើចឮសំឡេងខ្លាំង ការជួបជុំមិត្តភក្ដិនៅហាងកាហ្វេ ការស្លៀកពាក់ខោអាវដែលខ្លួនចូលចិត្ត ខណៈការតុបតែងខ្លួន ការផាត់មុខ ធ្វើសក់ ក៏រឹតតែជារឿងហួសនិស្ស័យដែលអាចធ្វើបានទៅទៀត។ យ៉ាងនេះក្ដី នារីរូបនេះ រួមនឹងស្ត្រីជាច្រើនផ្សេងទៀត នៅតែសង្ឃឹមថា គ្រប់យ៉ាងនឹងមិនវិលត្រលប់ទៅកាន់សម័យកាលជាង 20 ឆ្នាំមុននោះឡើយ៕

August 16, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 16 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 593 នាក់, អ្នកជាចំនួន 806 នាក់ និងអ្នកស្លាប់ចំនួន 21 នាក់បន្ថែមទៀត នៅក្នុងថ្ងៃទី 15 ខែសីហា ឆ្នាំ 2021។

គិតត្រឹមព្រឹកថ្ងៃទី 16 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 86,041 នាក់ ក្នុងនោះមានអ្នកជាសះស្បើយជាង 81,200 នាក់ និងអ្នកស្លាប់ 1,704 នាក់។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 16 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 83.97% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 28.05%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 55.93%។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 207,994,270 នាក់ ត្រូវបានរកឃើញ ក្នុងនោះមានជាង 186,465,390 នាក់បានជា, ជាង 4,374,930 នាក់បានស្លាប់ និងជាង 17,017,190 នាក់ កំពុងព្យាបាល៕

August 16, 2021

អាហ្វហ្គានីស្ថាន៖ អាមេរិក បញ្ជូនទាហានរាប់ពាន់នាក់បន្ថែមទៀត ដើម្បីគ្រប់គ្រងដែនអាកាស កាប៊ុល

មន្ទីរបញ្ចកោណ បញ្ជូនទាហានចំនួន 1,000 នាក់បន្ថែមទៀត ទៅកាន់ អាហ្វហ្គានីស្ថាន ដើម្បីជួយដល់ការជម្លៀសពលរដ្ឋអាមេរិក និងដើម្បីគ្រប់គ្រងដែនអាកាសនៅរដ្ឋធានី ដូច្នេះចំនួនទាហាអាមេរិក ដែលនៅឈរជើងក្នុងទីក្រុងកាប៊ុល កើនឡើងដល់ជិត 6,000 នាក់។

«ក្នុងអំឡុង 48 ម៉ោងទៀត កងកម្លាំងអាមេរិក នឹងកើនឡើងដល់ជិត 6,000 នាក់ និងបន្តគ្រប់គ្រងសិទ្ធិចាត់ចែងផ្លូវអាកាស ក្នុងបេសកកម្មជម្លៀសពលរដ្ឋអាមេរិក និងជនជាតិ អាហ្វហ្គានីស្ថាន។ យើងកំពុងធានាសន្តិសុខនៅព្រលានយន្តហោះ ដើម្បីនាំកម្លាំងរបស់ សហរដ្ឋអាមេរិក និងសម្ព័ន្ធមិត្ត ចាកចេញពី អាហ្វហ្គានីស្ថាន តាមរយៈជើងយន្តហោះស៊ីវិល និងយោធា» មន្ទីរបញ្ចកោណ និងក្រសួងការបរទេសអាមេរិក បានឱ្យដឹងដូច្នេះ នៅក្នុងសេចក្ដីប្រកាសរួមនាថ្ងៃនេះ។

ក្រុមមន្ត្រីអាមេរិក ឱ្យដឹងថា នឹងដឹកមនុស្សរាប់ពាន់នាក់ចេញពី អាហ្វហ្គានីស្ថាន ក៏ដូចជាពន្លឿនដំណើរការជម្លៀសពលរដ្ឋ អាហ្វហ្គានីស្ថាន ដែលធ្លាប់បានធ្វើការឱ្យ សហរដ្ឋអាមេរិក ដោយការផ្ដល់ទិដ្ឋាការពិសេស។

នៅព្រលានយន្តហោះ Hamid Karzai ភាពច្របូកច្របល់កំពុងកើតឡើង ខណៈដែលប្រជាជន អាហ្វហ្គានីស្ថាន រកវិធីដើម្បីបានឡើងយន្តហោះ ភៀសខ្លួនទៅបរទេស ក្នុងគ្រាដែលក្រុម តាលីបង់ ចូលគ្រប់គ្រងរដ្ឋធានីកាប៊ុល។ ព្រលានយន្តហោះ Hamid Karzai ដែលបច្ចុប្បន្ន គ្រប់គ្រងដោយសហរដ្ឋអាមេរិក គឺជាទីតាំងចុងក្រោយមួយដែលមិនទាន់ត្រូវបានគ្រប់គ្រងដោយ តាលីបង់។

ស្ថានការណ៍ច្របូកច្របល់ដល់ថ្នាក់ កងទ័ពរបស់ សហរដ្ឋអាមេរិក ត្រូវសម្រេចពន្យារការហោះហើរទៅ-មក នៃជើងយន្តហោះស៊ីវិល ដើម្បីបើកផ្លូវឱ្យយន្តហោះយោធាជាអ្នកជម្លៀស។ «ស្ត្រី កុមារ និងបុគ្គលិករដ្ឋាភិបាល មិនអាចចាកចេញពីប្រទេស ព្រោះតែសហរដ្ឋអាមេរិក មិនបើកផ្លូវ» នេះបើតាមមន្ត្រីម្នាក់របស់រដ្ឋាភិបាល អាហ្វហ្គានីស្ថាន។

កាលពីម្សិលមិញ (15 សីហា) ក្រុម តាលីបង់ បានសម្រុកចូលរដ្ឋធានីកាប៊ុល ដោយពុំជួបប្រទះការរារាំងណាមួយគួរឱ្យកត់សម្គាល់។ ដូច្នេះ តាលីបង់ ប្រាកដជានឹងស្ដារឡើងវិញនូវអំណាចដែលត្រូវបានផ្ដួលរំលំកាលពី 20 ឆ្នាំមុន បានលឿនជាងឆ្ងាយ បើធៀបនឹងការព្យាករ 90 ថ្ងៃ របស់ក្រុមស៊ើបការណ៍សម្ងាត់ សហរដ្ឋអាមេរិក។ សមាជិករបស់ក្រុមឧទ្ទាម តាលីបង់ បានប្រកាសថា នឹងបង្កើតរដ្ឋ Islamic Emirate of Afghanistan (បកប្រែបណ្ដោះអាសន្នថា «រដ្ឋអ៊ីស្លាមរួបរួមនៃអាហ្វហ្កានីស្ថាន» នាពេលឆាប់ៗខាងមុខ៕

August 16, 2021

រដ្ឋាភិបាល អាហ្វហ្គានីស្ថាន ដួលរលំ៖ Trump ស្នើឱ្យ Biden ចុះចេញពីតំណែង ព្រោះតែស្ថានការណ៍នៅកាប៊ុល

នៅពេលក្រុម តាលីបង់ ចូលកាន់កាប់រដ្ឋធានីកាប៊ុល បានសម្រេច អតីតប្រធានាធិបតីអាមេរិក លោក Donald Trump បានស្នើឱ្យប្រធានាធិបតី Joe Biden ចុះចេញពីតំណែង ដោយសារតែបានបណ្ដោយឱ្យក្រុមឧទ្ទាម តាលីបង់ មានឱកាសក្ដោបក្ដាប់ អាហ្វហ្គានីស្ថាន ខណៈអាមេរិក ដកទ័ពទៅតាមបំណងរបស់ Biden។

«ដល់ពេលដែល Joe Biden គួរតែលាលែងពីតំណែងក្នុងភាពអាម៉ាស់ ព្រោះតែអ្វីដែលគាត់បានបណ្ដោយឱ្យកើតមានឡើងនៅ អាហ្វហ្គានីស្ថាន» លោក Donald Trump ប្រកាសក្នុងថ្ងៃទី 16 សីហា។ ទន្ទឹមនឹងនេះ លោក Trump ក៏បានរិះគន់ លោក Biden អំពីតួលេខ COVID-19 ដែលបានកើនឡើងនៅ សហរដ្ឋអាមេរិក រួមទាំងគោលនយោបាយអន្តោប្រវេសន៍ សេដ្ឋកិច្ច និងថាមពលជាដើម ដែលលោក Biden កំពុងតែអនុវត្ត។

តាលីបង់ បានចាប់ផ្ដើមយុទ្ធនាការវាយសម្រុកតាំងពីខែឧសភា បន្ទាប់ពី សហរដ្ឋអាមេរិក និងសម្ព័ន្ធមិត្ត ដកទ័ពភាគច្រើនចេញពី អាហ្វហ្គានីស្ថាន ទៅតាមការសម្រេចចិត្តរបស់ប្រធានាធិបតី Joe Biden ក្នុងការបញ្ចប់វត្តមានយោធាអាមេរិក រយៈពេល 20 ឆ្នាំនៅក្នុងប្រទេសនេះ។

កាលពីម្សិលមិញ (15 សីហា) ក្រុម តាលីបង់ បានសម្រុកចូលរដ្ឋធានីកាប៊ុល ដោយពុំជួបប្រទះការរារាំងណាមួយគួរឱ្យកត់សម្គាល់។ ដូច្នេះ តាលីបង់ ប្រាកដជានឹងស្ដារឡើងវិញនូវអំណាចដែលត្រូវបានផ្ដួលរំលំកាលពី 20 ឆ្នាំមុន បានលឿនជាងឆ្ងាយ បើធៀបនឹងការព្យាករ 90 ថ្ងៃ របស់ក្រុមស៊ើបការណ៍សម្ងាត់ សហរដ្ឋអាមេរិក។ សមាជិករបស់ក្រុមឧទ្ទាម តាលីបង់ បានប្រកាសថា នឹងបង្កើតរដ្ឋ Islamic Emirate of Afghanistan (បកប្រែបណ្ដោះអាសន្នថា «រដ្ឋអ៊ីស្លាមរួបរួមនៃអាហ្វហ្កានីស្ថាន» នាពេលឆាប់ៗខាងមុខ។

ជាក់ស្ដែង ក្នុងសម័យលោក Donald Trump សហរដ្ឋអាមេរិក ក៏ធ្លាប់បានធ្វើជាអាជ្ញាកណ្ដាលសម្រាប់ការបង្កើតកិច្ចព្រមព្រៀងមួយរវាងរដ្ឋាភិបាល អាហ្វហ្គានីស្ថាន និងក្រុមឧទ្ទាម តាលីបង់ នៅ Doha កាលពីឆ្នាំ 2020។ តាមការចរចានោះ សហរដ្ឋអាមេរិក នឹងដកទ័ពទាំងស្រុងចេញពី អាហ្វហ្គានីស្ថាននៅក្នុងខែឧសភា ឆ្នាំ 2021 ដើម្បីជាថ្នូរនឹងការធានាសន្តិសុខមួយចំនួនពី តាលីបង់។

នៅពេល Biden ឡើងកាន់អំណាចកាលពីដើមឆ្នាំ លោកបានពន្យារពេលនៃការដកទ័ព និងពុំបានលើកឡើងអំពីលក្ខខណ្ឌអ្វីទាំងអស់សម្រាប់កិច្ចការនេះ។

លោក Donald Trump បានរិះគន់លោក Biden ជាបន្តបន្ទាប់អំពីបញ្ហាខាងលើនេះ ហើយលោកក៏ធ្លាប់បាននិយាយថា គ្រប់យ៉ាង «នឹងខុសពីនេះ ហើយការដកទ័ព (ពី អាហ្វហ្គានីស្ថាន) នឹងជោគជ័យច្រើនជាងនេះឆ្ងាយ» បើសិនជាលោកនៅតែជាប្រធានាធិបតី។

«ទង្វើដែល Joe Biden ធ្វើចំពោះ អាហ្វហ្គានីស្ថាន គឺពីជារឿងចម្លែក។ វានឹងក្លាយជាបរាជ័យមួយធំបំផុតក្នុងប្រវត្តិសាស្ត្រអាមេរិក!» លោក Trump សង្កត់ធ្ងន់ដូច្នេះ នៅក្នុងសេចក្ដីថ្លែងការណ៍មួយនាថ្ងៃដដែលនេះ។

ប្រតិកម្មនឹងសេចក្ដីថ្លែងការណ៍របស់លោក Trump រដ្ឋាភិបាលរបស់លោក Biden ក៏បានវាយបកថា រដ្ឋាភិបាលរបស់លោក Trump ឯណោះទេ ជាអ្នកដែលបានចរចានៅទីក្រុង Doha ស្ដីអំពីការដកទ័ពនេះ ហើយសាធារណជនអាមេរិក ក៏សុទ្ធតែគាំទ្រចំពោះការបញ្ចប់ «សង្គ្រាមទាំងឡាយដែលអូសបន្លាយពេលយូរ»។

លោក Biden បានការពារចំពោះការសម្រេចដកទ័ពរបស់ សហរដ្ឋអាមេរិក ដោយនិយាយថា ប្រទេសនេះបានចំណាយប្រាក់ជាង 1 លានលានដុល្លារ (1 ទ្រីលាន) អំឡុង 20 ឆ្នាំ ក្នុងការបណ្ដុះបណ្ដាល និងបំពាក់សព្វាវុធទាន់សម័យដល់ទាហានជាង 300,000 នាក់ របស់ អាហ្វហ្គានីស្ថាន។ លោក Biden ថ្លែងថា ជនជាតិអាមេរិក រាប់ពាន់នាក់បានស្លាប់ និងរបួសក្នុងសង្គ្រាមនៅ អាហ្វហ្គានីស្ថាន ហើយពេលនេះជាពេលដែលអាជ្ញាធរក្រុងកាប៊ុល ត្រូវតស៊ូដើម្បីប្រទេសជាតិរបស់ពួកគេ៕

August 16, 2021

អាហ្វហ្គានីស្ថាន៖ ព្រលានយន្តហោះ កាប៊ុល កំពុងច្របូកច្របល់ខ្លាំង (វីដេអូ)

មនុស្សរាប់ពាន់នាក់ បាននាំគ្នាឆ្ពោះទៅកាន់ព្រលានយន្តហោះ Hamid Karzai នៅពេលឧទ្ទាម តាលីបង់ ចូលគ្រប់គ្រងរដ្ឋធានី បង្កឱ្យមានភាពវឹកវរ ច្របូកច្របល់ខ្លាំង បណ្ដាលឱ្យយន្តហោះស៊ីលវិលដែលដឹកជនភៀសខ្លួន មិនអាចហោះឡើងបាន។

វីដេអូដែលត្រូវបានចែករំលែកក្នុងបណ្ដាញសង្គម កាលពីថ្ងៃទី 15 សីហា បានបង្ហាញអំពីភាពច្របូកច្របល់ខ្លាំងនៅឯព្រលានយន្តហោះអន្តរជាតិ Hamid Karzai ខណៈដែលប្រជាជន អាហ្វហ្គានីស្ថាន រកវិធីដើម្បីបានឡើងយន្តហោះ ភៀសខ្លួនទៅបរទេស ក្នុងគ្រាដែលក្រុម តាលីបង់ ចូលគ្រប់គ្រងរដ្ឋធានីកាប៊ុល។ ព្រលានយន្តហោះ Hamid Karzai ដែលបច្ចុប្បន្ន គ្រប់គ្រងដោយសហរដ្ឋអាមេរិក គឺជាទីតាំងចុងក្រោយមួយដែលមិនទាន់ត្រូវបានគ្រប់គ្រងដោយ តាលីបង់។

ស្ថានការណ៍ច្របូកច្របល់ដល់ថ្នាក់ កងទ័ពអាមេរិក ត្រូវសម្រេចពន្យារការហោះហើរទៅ-មក នៃជើងយន្តហោះស៊ីវិល ដើម្បីបើកផ្លូវឱ្យយន្តហោះយោធាជាអ្នកជម្លៀស។ «ស្ត្រី កុមារ និងបុគ្គលិករដ្ឋាភិបាល មិនអាចចាកចេញពីប្រទេស ព្រោះតែសហរដ្ឋអាមេរិក មិនបើកផ្លូវ» នេះបើតាមមន្ត្រីម្នាក់របស់រដ្ឋាភិបាល អាហ្វហ្គានីស្ថាន។

New York Times ឱ្យដឹងថា នៅលើផ្លូវយន្តហោះក្នុងព្រលាន Hamid Karzai មានសម្លៀកបំពាក់ជាឯកសណ្ឋានគ្រប់ប្រភេទ រួមមានឯកសណ្ឋានយោធារបស់មនុស្សជាច្រើនដែលមកពីបណ្ដាប្រទេស។ «ក្រុមអ្នកការទូត អ្នកវិនិយោគផ្នែកយោធា និងពលរដ្ឋសាមញ្ញ សុទ្ធតែរកវិធីដើម្បីបានឡើងយន្តហោះ បំណងចាកចេញពី កាប៊ុល។ អ្នកដែលមានសិទ្ធិឡើងយន្តហោះ សុទ្ធតែត្រូវបានគេផ្ដល់ខ្សែដៃពិសេសដើម្បីជាសញ្ញា»។

នៅពេល តាលីបង់ សម្រុកចូលរដ្ឋធានីកាប៊ុល ប្រធានាធិបតី អាហ្វហ្គានីស្ថាន Ashraf Ghani បានប្រញាប់ចាកចេញពីប្រទេស ក្រោមមូលហេតុថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយក្រុមប្រទេសលោកខាងលិច ត្រូវដួលរលំ។

តាលីបង់ បានចាប់ផ្ដើមយុទ្ធនាការវាយសម្រុកតាំងពីខែឧសភា បន្ទាប់ពី សហរដ្ឋអាមេរិក និងសម្ព័ន្ធមិត្ត ដកទ័ពភាគច្រើនចេញពី អាហ្វហ្គានីស្ថាន ទៅតាមការសម្រេចចិត្តរបស់ប្រធានាធិបតី Joe Biden ក្នុងការបញ្ចប់វត្តមានយោធាអាមេរិក រយៈពេល 20 ឆ្នាំនៅក្នុងប្រទេសនេះ។

https://www.youtube.com/watch?v=-upyPouRrB8

កាលពីម្សិលមិញ (15 សីហា) តាលីបង់ បានសម្រុកចូលរដ្ឋធានីកាប៊ុល ដោយពុំជួបប្រទះការរារាំងណាមួយគួរឱ្យកត់សម្គាល់។ ដូច្នេះ តាលីបង់ ប្រាកដជានឹងស្ដារឡើងវិញនូវអំណាចដែលត្រូវបានផ្ដួលរំលំកាលពី 20 ឆ្នាំមុន បានលឿនជាងឆ្ងាយ បើធៀបនឹងការព្យាករ 90 ថ្ងៃ របស់ក្រុមស៊ើបការណ៍សម្ងាត់ សហរដ្ឋអាមេរិក។ សមាជិករបស់ក្រុមឧទ្ទាម តាលីបង់ បានប្រកាសថា នឹងបង្កើតរដ្ឋ Islamic Emirate of Afghanistan (បកប្រែបណ្ដោះអាសន្នថា «រដ្ឋអ៊ីស្លាមរួបរួមនៃអាហ្វហ្កានីស្ថាន» នាពេលឆាប់ៗនេះ៕

August 16, 2021

តាលីបង់៖ សង្គ្រាមនៅ អាហ្វហ្គានីស្ថាន បានបញ្ចប់! តាលីបង់ ត្រៀមជាស្រេចក្នុងការចរចាជាមួយគ្រប់ភាគី

អ្នកនាំពាក្យការិយាល័យនយោបាយរបស់ តាលីបង់ កាលពីថ្ងៃទី 15 សីហា បានអះអាងប្រាប់ទូរទស្សន៍ Al-Jazeera Mubasher ថា សង្គ្រាមនៅ អាហ្វហ្គានីស្ថាន បានបញ្ចប់ ហើយរបៀបរបបដឹកនាំរបស់រដ្ឋាភិបាល នឹងត្រូវបានមើលឃើញច្បាស់ក្នុងពេលឆាប់។

អ្នកនាំពាក្យនៃ ការិយាល័យនយោបាយរបស់ តាលីបង់ Mohammad Naeem ឱ្យដឹងថា ស្ថាប័នការទូត ឬការិយាល័យទាំងឡាយណាដែលត្រូវបានកំណត់ជាគោលដៅ តាលីបង់ សូមធានាថា នឹងការពារសន្តិសុខគ្រប់បែបសព្វយ៉ាង។

លោក Naeem ក៏បានបញ្ជាក់ថា ក្រុមនេះ ត្រៀមខ្លួនជាស្រេចក្នុងការចរចាជាមួយគ្រប់ភាគីនៅ អាហ្វហ្គានីស្ថាន ហើយថា នឹងធានាសន្តិសុខដែលចាំបាច់។ អ្នកនាំពាក្យរូបនេះក៏សង្កត់ធ្ងន់ថា កងកម្លាំងរបស់ខ្លួន «នឹងធ្វើសកម្មភាពប្រកបដោយការទទួលខុសត្រូវតាមដំណាក់កាល និងធានាសន្តិភាពជាមួយគ្រប់ប្រទេស»។ តាលីបង់ ត្រៀមជាស្រេចដើម្បីដោះស្រាយរាល់បញ្ហាដែលនាំឱ្យសហគមន៍អន្តរជាតិមានការព្រួយបារម្ភ តាមរយៈការចរចា»។

ក្រុមប្រដាប់អាវុធ តាលីបង់ កំពុងគ្រប់គ្រងរដ្ឋធានីកាប៊ុល

ការប្រកាសរបស់ តាលីបង់ នេះ ត្រូវបានធ្វើឡើងក្នុងគ្រាដែលកងកម្លាំងប្រដាប់អាវុធរបស់ក្រុមឧទ្ទាមនេះ បានចូលគ្រប់គ្រងរដ្ឋធានីកាប៊ុល ចំណែកឯប្រធានាធិបតី Ashraf Ghani ក៏បានចាកចេញពីប្រទេស ដោយមូលហេតុថា «ដើម្បីបញ្ចៀសការបង្ហូរឈាម»។

តាលីបង់ បានចាប់ផ្ដើមយុទ្ធនាការវាយសម្រុកតាំងពីខែឧសភា បន្ទាប់ពី សហរដ្ឋអាមេរិក និងសម្ព័ន្ធមិត្ត ដកទ័ពភាគច្រើនចេញពី អាហ្វហ្គានីស្ថាន ទៅតាមការសម្រេចចិត្តរបស់ប្រធានាធិបតី Joe Biden ក្នុងការបញ្ចប់វត្តមានយោធាអាមេរិក រយៈពេល 20 ឆ្នាំនៅក្នុងប្រទេសនេះ។

កាលពីម្សិលមិញ (15 សីហា) តាលីបង់ បានសម្រុកចូលរដ្ឋធានីកាប៊ុល ដោយពុំជួបប្រទះការរារាំងណាមួយគួរឱ្យកត់សម្គាល់។ ដូច្នេះ តាលីបង់ ប្រាកដជានឹងស្ដារឡើងវិញនូវអំណាចដែលត្រូវបានផ្ដួលរំលំកាលពី 20 ឆ្នាំមុន បានលឿនជាងឆ្ងាយ បើធៀបនឹងការព្យាករ 90 ថ្ងៃ របស់ក្រុមស៊ើបការណ៍សម្ងាត់ សហរដ្ឋអាមេរិក៕

August 16, 2021

អាហ្វហ្គានីស្ថាន៖ ប្រធានាធិបតី Ghani ប្រកាសពីមូលហេតុចាកចេញពីប្រទេស

កាលពីថ្ងៃទី 15 សីហា ប្រធានាធិបតី អាហ្វហ្គានីស្ថាន លោក Ashraf Ghani បានប្រកាសអំពីមូលហេតុដែលនាំឱ្យលោកចាកចេញពីប្រទេស ក្នុងពេលដែលក្រុមឧទ្ទាមតាលីបង់ បានសម្រុកចូលកាន់កាប់រដ្ឋធានីកាប៊ុល។

នៅក្នុងសារដែលបង្ហោះលើបណ្ដាញសង្គម Facebook ប្រធានាធិបតី Ghani ឱ្យដឹងថា បើសិនជាលោកនៅក្នុងប្រទេសបន្តទៀត នោះ «នឹងមានមនុស្សជាច្រើនត្រូវបាត់បង់ជីវិត ហើយរដ្ឋធានីកាប៊ុល នឹងត្រូវបានកម្ទេច»។ លោក Ghani ទទួលស្គាល់ថា៖ «តាលីបង់ បានទទួលជ័យជំនះ ហើយបច្ចុប្បន្ន កងកម្លាំងនេះមានភារកិច្ចការពារទ្រព្យសម្បត្តិ និងពលរដ្ឋ អាហ្វហ្គានីស្ថាន»។

ប៉ុន្តែ ក្នុងសារនេះ ប្រធានាធិបតី Ghani មិនបាននិយាយដល់ទីតាំងដែលលោកត្រូវទៅនោះទេ បន្ទាប់ពីបានចាកចេញពីប្រទេស។ មុននោះ សារព័ត៌មានអាហ្វហ្គានីស្ថាន បានរាយការណ៍ថា ប្រធានាធិបតី Ghani បានទៅកាន់ប្រទេសតាហ្ស៊ីគីស្ថាន។

ក្នុងថ្ងៃដដែលនោះ មេបញ្ជាការពីររូបរបស់ តាលីបង់ បានឱ្យដឹងថា ពួកគេបានគ្រប់គ្រងវិមានប្រធានាធិបតី អាហ្វហ្គានីស្ថាន។ មន្ត្រីម្នាក់របស់ក្រុម តាលីបង់ បានបញ្ជាក់ថា ក្រុមនេះគ្រោងនឹងប្រកាសបង្កើតរដ្ឋាភិបាលអ៊ីស្លាមអាហ្វហ្គានីស្ថាន នៅក្នុងវិមាននេះ៕

August 16, 2021

Author: សឿន សំណាង