ប្រមុខរដ្ឋាភិបាលកម្ពុជា សម្ដេច ហ៊ុន សែន នៅព្រឹកថ្ងៃ 8 ខែវិច្ឆិកា ឆ្នាំ 2021 នេះ បានអញ្ជើញជាអធិបតី សម្ពោធអគារទីស្តីការថ្មីក្រសួងរៀបចំដែនដីនគរូបនីយកម្មនិងសំណង់ មានតម្លៃជាង 28 លានដុល្លារអាមេរិក។
អគារក្រសួងរៀបចំដែនដីនគរូបនីយកម្ម និងសំណង់ ដែលជាស្នាដៃផ្ទាល់របស់កូនខ្មែរ និងមានទីតាំងស្ថិតនៅ ភូមិអន្លង់ក្ងាន សង្កាត់ឃ្មួញ ខណ្ឌសែន សុខ រាជធានីភ្នំពេញ នាភាគពាយព្យនៃ រាជធានីភ្នំពេញ នេះ ត្រូវបានប្រារព្ធពិធីបើកការដ្ឋានសាងសង់នៅថ្ងៃទី 28 ខែមករា ឆ្នាំ 2020។
អគារនេះ ត្រូវបានសាងសង់នៅលើផ្ទៃដីទំហំ 4.5 ហិកតា។ តួអគារដែលមានបណ្ដោយប្រវែង 132.7 ម៉ែត្រ និងទទឹងប្រវែង 94.7 ម៉ែត្រ នេះ មាន 8 ជាន់ កម្ពស់សរុបពីទ្រនាប់ខ្សាច់ដល់ចុងកំពូលបុស្បុក សរុប 88.5 ម៉ែត្រ។ អគារអាចចតរថយន្តបានប្រមាណ 450 គ្រឿង រួមនឹងចំណតទោចក្រយានយន្តផងដែរ។
ជាន់ផ្ទាល់ដីរបស់អគារ មានសាលបដិសណ្ឋារកិច្ច អាហារដ្ឋាន ឃ្លាំង បណ្ណាល័យ មជ្ឈមណ្ឌលបណ្ឌុះបណ្តាល ការិយាល័យច្រកចេញចូលតែមួយ និងសួនផ្ការំដួលជាដើម។
ជាន់ទី 1 មានសាលប្រជុំខ្នាតតូច និងមធ្យមចំណុះ 386 នាក់ ឃ្លាំង និងបណ្តុំនៃនាយកដ្ឋានរបស់ក្រសួង។
ជាន់ទី 2 មានសាលប្រជុំខ្នាតធំចំណុះ 2,021 កៅអី បណ្តុំនៃអគ្គនាយកដ្ឋាន គណៈស្ថាបត្យករ ឃ្លាំងជាដើម។
នៅជាន់ 3 មានបណ្តុំនៃអគ្គនាយកដ្ឋាន និងនាយកដ្ឋាន ឃ្លាំងជាដើម។
ជាន់ទី 4 មានការិយាល័យរដ្ឋមន្ត្រី រដ្ឋលេខាធិការ អនុរដ្ឋលេខាធិការ សាលសវនាការអន្តរជាតិ សាលចុះពិធីសារ បន្ទប់ប្រជុំ បន្ទប់ពិធីការ ការិយាល័យខុទ្ទកាល័យ អគាធិការដ្ឋានជាដើម។
ជាន់ទី 5 មានសាលប្រជុំអន្តរក្រសួង និងការិយាល័យសម្រាប់ជួយដល់វិស័យឯកជន (ស្លាបស្ដាំ និងឆ្វេង)។
ជាន់ទី 6 និងជាន់ទី 7 ជាការិយាល័យសម្រាប់ជួយដល់វិស័យឯកជន។
https://www.youtube.com/watch?v=5eXNG2p5m5g
អគារក្រសួងរៀបចំដែនដីនគរូបនីយកម្ម និងសំណង់ ត្រូវបានរចនាឡើងតាមបែបស្ថាបត្យកម្មរួមសម័យ គឺសម័យអង្គរ សម័យកណ្តាល ក្លាសសិកសាកល បែបរ៉ូម៉ាំង និងបែបបុរាណខ្មែរ បូកនឹងសម័យទំនើប មានរចនាបថស្ថាបត្យកកម្មអគារមុខដាច់ ឬហៅថាអគារមុខធំ មានដំបូលកិងត្រួតស្លាបពីរជាន់ លម្អដោយជហ្វាក្បាលនាគ និងគ្រឿងលម្អស្ថាបត្យកម្មបុរាណប្រពៃណីខ្មែរនិយមបែបលក្ខណៈអត្តសញ្ញាណជាតិ។
ឯគ្រឿងប្រកបផ្នែកដំបូល ប្រតិស្ឋាននូវព្រះមណ្ឌបបុស្បុកកម្ពស់ 33.28 ម៉ែត្រ តំណាងឱ្យភ្នំព្រះសុមេរុ ដែលមានរួត 7 ជាន់ តំណាងឱ្យភ្នំសត្តបរិភណ្ឌ គឺភ្នំទាំង 7 សង្កាត់ នៅជុំវិញភ្នំព្រះសុមេរុ គឺភ្នំយុគន្ធរ ភ្នំឥសិន្ធរ ភ្នំករវិក ភ្នំសុទស្សនៈ ភ្នំនេមិន្ធរ ភ្នំវិនតកៈ និងភ្នំអស្សកណ្ណៈ។ នេះបើតាមក្រសួងព័ត៌មាន។
តួអគារមានរាងជាចតុកោណកែង មានទម្រង់ស្មើនឹង 1 ភាគ 2 នៃតួបាកាណប្រាសាទអង្គរវត្ត ដែលផ្នែកខាងមុខ និងខាងក្រោយចែកចេញជា 3 សង្កាត់ ចំណែកផ្នែកខាងឆ្វេង និងខាងស្តាំចែកជា 2 សង្កាត់ និងមានទម្រង់ដំបូលជារាងអក្សរអ៊ុយ «U» លាតសន្ធឹងត្រួតស៊ីគ្នាលើតួអគារទាំង 3 ទិស។
តួអគារនេះមានច្រកចេញចូលទាំង 4 ទិស ក្នុងនោះ ច្រកចូលធំ ឬខ្លោងទ្វារអគារលម្អដោយក្បាច់ផ្តែររចនាបថព្រៃក្មេង វិចិត្ររចនាដោយនិមិត្តសញ្ញាក្រសួងរៀបចំដែនដី នគរូបនីយកម្ម និងសំណង់ និងឈ្មោះទីស្តីការក្រសួងនៅលើឋានផ្តែរថ្មម៉ាបកំពង់ស្ពឺពណ៌មរកត ទ្រដោយសសរម៉ាបកំពង់ស្ពឺពណ៌ក្រហមទុំចំនួន 6 ដើមជាទម្រ តំណាងឱ្យនាយកធម៌ទាំង 6 យ៉ាងគឺ ធម៌របស់នាយក ឬធម៌សម្រាប់ថ្នាក់ដឹកនាំទាំងគ្រហស្ថ និងបព្វជិត៕
