សឿន សំណាង - La Reine Media

(វីដេអូ)-កប៉ាល់រាប់រយគ្រឿង កំពុងបូមខ្សាច់រកមាសនៅក្នុងទន្លេ អាម៉ាហ្សូន

(ប្រេស៊ីល)-កប៉ាល់បូមខ្សាច់រាប់រយគ្រឿងដែលតភ្ជាប់គ្នាជាជួរ ចតទទឹងផ្ទៃទន្លេ ម៉ាដេរ៉ា (Madeira) ដែលជាកំណត់សំខាន់នៃទន្លេ អាម៉ាហ្សូន ហើយបញ្ឆេះម៉ាស៊ីនជាបន្តបន្ទាប់ដើម្បីបូមខ្សាច់យកមាស។

កប៉ាល់តម្រៀបជាជួរទាំងនេះ ត្រូវបានគេដាក់ឱ្យដំណើរការពាសពេញផ្ទៃទន្លេ ម៉ាដេរ៉ា នៅតំបន់ អូតាហ្សេស ( Autazes) ក្នុងរដ្ឋ អាម៉ាហ្សូណាស (Amazonas) នៃ ប្រទេសប្រេស៊ីល។

«យើងរាប់បានប្រហែលមិនក្រោម 300 គ្រឿង។ ពួកគេបាននៅទីនោះយ៉ាងតិច 2 សប្ដាហ៍មកហើយ ប៉ុន្តែ រដ្ឋាភិបាលមិនបានធ្វើអ្វីទាំងអស់» សកម្មជនបរិស្ថាន ដាអេនីក្លេ អាគីយ៉ា (DAnicley Aguiar) នៃអង្គការសន្តិភាពបៃតងប្រេស៊ីល បានប្រាប់ដូច្នេះ។

ការបូមខ្សាច់រកមាសខាងលើនេះ បានកើតឡើងបន្ទាប់ពីមានព័ត៌មានចចាមអារ៉ាមថា មនុស្សមួយចំនួនបានរកឃើញមាសនៅក្នុងទន្លេ ម៉ាដេរ៉ា។ ទន្លេនេះមានបណ្ដោយប្រវែងប្រមាណ 3,300 គីឡូម៉ែត្រ រាប់ពី ប្រទេសបូលីវី ឆ្លងកាត់ព្រៃត្រូពិកប្រេស៊ីល ដល់ទន្លេ អាម៉ាហ្សូន។

អាជ្ញាធរប្រេស៊ីល បាននាំគ្នាគេចវេះពីការទទួលខុសត្រូវ ដោយអះអាងថា មិនមែនជាដែនសមត្ថកិច្ចរបស់ខ្លួន៕

November 26, 2021

52 នាក់បានបាត់បង់ជីវិតក្នុងហេតុការណ៍ផ្ទុះអណ្ដូងរ៉ែ នៅ រ៉ុស្ស៊ី

(រ៉ុស្ស៊ី)-មនុស្ស 52 នាក់ ក្នុងនោះមាន បុគ្គលិកសង្គ្រោះបន្ទាន់ 6 នាក់ បានស្លាប់នៅក្នុងហេតុការណ៍ផ្ទុះអណ្ដូងរ៉ែធ្យូងថ្មនៅតំបន់ ស៊ីបេរី (Siberia)។

ករណីផ្ទុះឧស្ម័នមេតាន នៅក្នុងអណ្ដូងរ៉េធ្យូងថ្ម Listvyazhnaya ក្នុងតំបន់ Kemerovo ភាគនិរតីនៃតំបន់ ស៊ីបេរី បានកើតឡើងកាលពីថ្ងៃទី 25 វិច្ឆិកា បណ្ដាលឱ្យផ្សែងរាលដាលគ្រប់កន្លែងនៅក្នុងផ្លូវរូងក្រោមដីនៃអណ្ដូងរ៉ែ។ សមត្ថកិច្ចឱ្យដឹងថា មនុស្ស 52 នាក់ បានបាត់បង់ជីវិត។

ប៉ុន្មានម៉ោងក្រោយការផ្ទុះ កងកម្លាំងសង្គ្រោះបន្ទាន់បានរកឃើញសាកសពចំនួន 14 នាក់ ប៉ុន្តែ ត្រូវផ្អាកសកម្មភាពស្វែងរក ដោយសារផ្សែងពុល។ ក្រុមសង្គ្រោះ បានជួយសង្គ្រោះជីវិតមនុស្ស 239 នាក់ ក្នុងនោះមាន 49 នាក់ រងរបួស។

សមត្ថកិច្ចទទួលស្គាល់ថា លែងមានឱកាសក្នុងការសង្គ្រោះមនុស្សនៅក្នុងហេតុការណ៍នេះហើយ។ មូលហេតុនៃការស្លាប់របស់មនុស្ស 52 នាក់ខាងលើ ត្រូវបានបញ្ជាក់ថា ដោយសារពុលឧស្ម័នកាបូនឌីអុកស៊ីត (CO2)។

សារព័ត៌មានរុស្ស៊ី បានអះអាងថា តំបន់អណ្ដូងរ៉ែនេះ បំពាក់អុកស៊ីសែនគ្រប់គ្រាន់ដល់បុគ្គលិកដើម្បីរក្សាជីវិតបាន 6 ម៉ោង ហើយបើសិនកែសម្រួលនឹងអាចអូសបន្លាយបានតែប៉ុន្មានម៉ោងបន្ថែមទៀតប៉ុណ្ណោះ។

នេះគឺជាករណីផ្ទុះក្នុងអណ្ដូងរ៉ែដែលបណ្ដាលឱ្យមានមនុស្សស្លាប់ និងរបួសច្រើនបំផុតនៅ រុស្ស៊ី ចាប់តាំងពីឆ្នាំ 2010 បន្ទាប់ពីហេតុការណ៍ផ្ទុះ និងករណីអគ្គិភ័យនៅឯអណ្ដូងរ៉ែ Raspadskaya ដែលបាននាំឱ្យមនុស្ស 91 នាក់ បាត់បង់ជីវិត។

អណ្ដូងរ៉ែធ្យូងថ្ម Listvyazhnaya ធ្លាប់កើតមានហេតុការណ៍ផ្ទុះឆេះកាលពីឆ្នាំ 2004 ម្ដងរួចមកហើយ ដែលទាក់ទិននឹងផ្សែងពុលនៃឧស្ម័នមេតាន និងបានបណ្ដាលឱ្យពលករ 13 នាក់ត្រូវស្លាប់។ ឆ្នាំ 2007 ករណីផ្ទុះមួយក៏បានកើតឡើងនៅឯអណ្ដូងរ៉ែ Ulyanovskaya ក្នុងតំបន់ Kemerovo ធ្វើឱ្យមានមនុស្សស្លាប់រហូតដល់ 110 នាក់៕

November 26, 2021

ក្រុមតំណាងរាស្ត្ររបស់ សហរដ្ឋអាម៉េរិក ធ្វើទស្សនកិច្ច កោះតៃវ៉ាន់ ទៀតហើយ

តំណាងរាស្ត្ររបស់ សហរដ្ឋអាម៉េរិក 5 រូប ដែលដឹកនាំដោយសមាជិកសភាជាន់ទាបមកពីបក្សប្រជាធិបតេយ្យ លោក ម៉ាក តាកាណូ (Mark Takano) បានធ្វើឱ្យមានការភ្ញាក់ផ្អើលខ្លាំងនៅពេលធ្វើទស្សនកិច្ច កោះតៃវ៉ាន់ បន្ទាប់ពីតំណាងរាស្ត្រ អាម៉េរិក មួយក្រុមផ្សេងទៀត បានមកកាន់កោះនេះកាលពីប៉ុន្មានសប្ដាហ៍មុន។

ក្រុមតំណាងរាស្ត្រខាងលើមានមនុស្សសរុប 17 នាក់ រួមមាន តំណាងរាស្ត្របក្សកាន់អំណាចនៃសភាជាន់ទាបចំនួន 4 រូប តំណាងរាស្ត្របក្សសាធារណរដ្ឋ 1 រូប រួមជាមួយនឹងជំនួយការរបស់ពួកគេ បានមកដល់ព្រលានយន្តហោះ សុងសាន (Songshan) នៅ ទីក្រុងតៃប៉ិ នៃ កោះតៃវ៉ាន់ តាមយន្តហោះ C40-C របស់កងទ័ព សហរដ្ឋអាម៉េរិក កាលពីយប់ថ្ងៃទី 25 វិច្ឆិកា។ តាមគម្រោង ក្រុមនេះនឹងជួបពិភាក្សាជាមួយមេដឹកនាំ កោះតៃវ៉ាន់ លោកស្រី ត្សៃ អីងវិន (Tsai Ing-wen) និងមន្ត្រីជាន់ខ្ពស់ដទៃទៀត ក្នុងនោះក៏មានរដ្ឋមន្ត្រីក្រសួងការពារជាតិ ឈីវ គួឆេង (Chiu Kuo-cheng) ផងដែរ។

វិទ្យាស្ថានអាម៉េរិក ប្រចាំ កោះតៃវ៉ាន់ (AIT) កាលពីយប់កន្លងទៅបានប្រកាសថា ក្រុមតំណាងរាស្ត្រខាងលើនឹងស្ថិតនៅ កោះតៃវ៉ាន់ រហូតដល់ដំណាច់ថ្ងៃទី 26 វិច្ឆិកា។

ចាង ហ្សឺវ៉ៃ (Chang Zewei) អ្នកនាំពាក្យរបស់លោកស្រី ត្សៃ អីងវីន បាននិយាយថា ការិយាល័យប្រធានាធិបតី កោះតៃវ៉ាន់ មានការត្រេកអរខ្លាំងចំពោះទស្សនកិច្ច ដែលត្រូវបានធ្វើឡើងក្រោយពីមានដំណើរទស្សនកិច្ចមួយរបស់ក្រុមតំណាងរាស្ត្របក្សសាធារណរដ្ឋ ដឹកនាំដោយលោក ចន ឃ័រនីន (John Cornyn) កាលពីថ្ងៃទី 9 វិច្ឆិកា។

អ្នកនាំពាក្យខាងលើបន្ថែមថា ទស្សនកិច្ចនេះអាចជួយឱ្យទំនាន់ទំនង និងការចែករំលែកព័ត៌មានរវាង សហរដ្ឋអាម៉េរិក និង កោះតៃវ៉ាន់ ទាក់ទិននឹងបញ្ហាសន្តិសុខតំបន់ និងបញ្ហាជាច្រើនផ្សេងទៀត កាន់តែស៊ីជម្រៅ។

មន្ត្រីចិនដីគោក មានការខឹងខ្លាំង និងបានហៅ ទស្សនកិច្ចនៃក្រុមរបស់លើក ចន ឃ័រនីន ថាជាសកម្មភាពបង្កហេតុ ហើយថានឹងបង្កើនការត្រៀមលក្ខណៈសម្រាប់សង្គ្រាមក្នុងតំបន់ ដើម្បីឆ្លើយតបនឹងទង្វើដែល ទីក្រុងប៉េកាំង ហៅថា «សម្ដី និងសកម្មភាពខុសឆ្គងធ្ងន់ធ្ងរ»។

កាលពីខែមិថុនា តំណាងរាស្ត្រ 3 រូបរបស់ អាម៉េរិក ក៏បានធ្វើទស្សនកិច្ច កោះតៃវ៉ាន់ រយៈពេល 3 ម៉ោង ធ្វើឱ្យចិនដីគោក ខឹងយ៉ាងខ្លាំង និងបានព្រមានដល់ កោះតៃវ៉ាន់ និង សហរដ្ឋអាម៉េរិក។ កាលពីខែមេសា អតីតតំណាងរាស្ត្រអាម៉េរិក 1 រូប រួមនឹងអតីតមន្ត្រីជាន់ខ្ពស់នៃក្រសួងការបរទេស 2 រូប ក៏បានមកកាន់ កោះតៃវ៉ាន់ ជួបពិភាក្សាជាមួយលោកស្រី ត្សៃ អីងវីន ផងដែរ៕

November 26, 2021

Warren Buffett, Elon Musk និងអ្នកជំនួញល្បីឈ្មោះជាច្រើនទៀត ក្លាយជាមហាសេដ្ឋីនៅពេលមានអាយុប៉ុន្មាន?

កំពូលអ្នកវិនិយោគអាម៉េរិក Warren Buffett ក្លាយជាមហាសេដ្ឋីនៅពេលមានអាយុ 56 ឆ្នាំ ខណៈដែល ស្ថាបនិករបស់ Facebook (បច្ចុប្បន្នជា Meta) លោក Mark Zuckerberg មានទ្រព្យ 1,000 លានដុល្លារពេលមានអាយុទើបតែ 23 ឆ្នាំប៉ុណ្ណោះ។

-មហាសេដ្ឋី Warren Buffett ៖ វ័យ 56 ឆ្នាំ ក្លាយជាមហាសេដ្ឋី
ទ្រព្យបច្ចុប្បន្ន៖ 104.5 ពាន់លានដុល្លារ

-Carlos Slim ៖ វ័យ 51 ឆ្នាំ ក្លាយជាមហាសេដ្ឋី
ទ្រព្យបច្ចុប្បន្ន ៖ 74.4 ពាន់លានដុល្លារ

-Larry Ellison ៖ ក្លាយជាមហាសេដ្ឋី ពេលមានអាយុ 49 ឆ្នាំ
ទ្រព្យបច្ចុប្បន្ន ៖ 127.5 ពាន់លានដុល្លារ

-Oprah Winfrey ៖ ក្លាយជាមហាសេដ្ឋី ពេលមានអាយុ 49 ឆ្នាំ
ទ្រព្យបច្ចុប្បន្ន ៖ 2.6 ពាន់លានដុល្លារ

-Meg Whitman ៖ ក្លាយជាមហាសេដ្ឋី ពេលមានអាយុ 42 ឆ្នាំ
ទ្រព្យបច្ចុប្បន្ន ៖ 5 ពាន់លានដុល្លារ

-Richard Branson ៖ ក្លាយជាមហាសេដ្ឋី ពេលមានអាយុ 41 ឆ្នាំ
ទ្រព្យបច្ចុប្បន្ន ៖ 4 ពាន់លានដុល្លារ

-Elon Musk ៖ ក្លាយជាមហាសេដ្ឋី ពេលមានអាយុ 41 ឆ្នាំ
ទ្រព្យបច្ចុប្បន្ន ៖ 291.3 ពាន់លានដុល្លារ

-Jeff Bezos ៖ ក្លាយជាមហាសេដ្ឋី ពេលមានអាយុ 35 ឆ្នាំ
ទ្រព្យបច្ចុប្បន្ន ៖ 205.4 ពាន់លានដុល្លារ

-Bill Gates ៖ ក្លាយជាមហាសេដ្ឋី ពេលមានអាយុ 31 ឆ្នាំ
ទ្រព្យបច្ចុប្បន្ន ៖ 139.5 ពាន់លានដុល្លារ

-Larry Page ៖ ក្លាយជាមហាសេដ្ឋី ពេលមានអាយុ 30 ឆ្នាំ
ទ្រព្យបច្ចុប្បន្ន ៖ 124.8 ពាន់លានដុល្លារ

-Evan Spiegel ៖ ក្លាយជាមហាសេដ្ឋី ពេលមានអាយុ 25 ឆ្នាំ
ទ្រព្យបច្ចុប្បន្ន ៖ 9.5 ពាន់លានដុល្លារ

-Mark Zuckerberg ៖ ក្លាយជាមហាសេដ្ឋី ពេលមានអាយុ 23 ឆ្នាំ
ទ្រព្យបច្ចុប្បន្ន ៖ 122 ពាន់លានដុល្លារ

November 25, 2021

ចិនដីគោក ខឹងខ្លាំង ក្រោយ អាម៉េរិក អញ្ជើញ ចិនតៃវ៉ាន់ ចូលរួមកិច្ចប្រជុំកំពូល

បន្ទាប់ពីបានអញ្ជើញ កោះតៃវ៉ាន់ ឱ្យចូលរួមកិច្ចប្រជុំកំពូលស្ដីពីប្រជាធិបតេយ្យ សហរដ្ឋអាម៉េរិក បានធ្វើឱ្យ ចិនដីគោក ប្រតិកម្មខ្លាំងក្លា ហើយភាពតានតឹងនៃទំនាក់ទំនងរវាងប្រទេសទាំងបី ក៏កើនឡើងថែមមួយកម្រិតទៀត។

ក្រសួងការបរទេសអាម៉េរិក កាលពីថ្ងៃទី 23 វិច្ឆិកា បានប្រកាសថា តំណាងនៃប្រទេសជាង 100 ក្នុងនោះមាន កោះតៃវ៉ាន់ ផងដែរ ត្រូវបានអញ្ជើញឱ្យចូលរួមកិច្ចប្រជុំកំពូលស្ដីពីប្រជាធិបតេយ្យ ដែលនឹងត្រូវបានធ្វើឡើងតាមប្រព័ន្ធវីដេអូ នៅថ្ងៃទី 9 ធ្នូ និង 10 ធ្នូ ខាងមុខ។

ភាគី កោះតៃវ៉ាន់ ក្រោយមកក៏បានបញ្ជាក់ថា មេដឹកនាំនៃស្ថាប័នបច្ចេកវិទ្យាឌីជីថល និងតំណាងរបស់ កោះតៃវ៉ាន់ ប្រចាំ សហរដ្ឋអាម៉េរិក នឹងចូលរួមកិច្ចប្រជុំនេះ។

មេដឹកនាំរបស់ប្រទេស និងដែនដីទាំងបី (ចិន កោះតៃវ៉ាន់ និង អាម៉េរិក)

ទង្វើរបស់ អាម៉េរិក ធ្វើឱ្យ ចិនដីគោក ខ្លាំងយ៉ាងខ្លាំង។ អ្នកនាំពាក្យនៃការិយាល័យទទួលបន្ទុកកិច្ចការកោះតៃវ៉ាន់ បានហៅទង្វើរបស់ អាម៉េរិក ថា «ខុសឆ្គង» និងថា ចិនដីគោក «បដិសេធរាល់ទំនាក់ទំនងផ្លូវការរវាងទីក្រុងវ៉ាស៊ីងតោន នឹងតំបន់តៃវ៉ាន់ របស់ ចិន»។

អ្នកនាំពាក្យក្រសួងការបរទេសចិន Zhao Lijian ក៏បានស្នើឱ្យ អាម៉េរិក «បញ្ឈប់ទំនាក់ទំនងជាមួយនឹងក្រុមផ្ដាច់ខ្លួន» នៅ កោះតៃវ៉ាន់ និងបានព្រមានថា «ប្រលែងលេងនឹងភ្លើងគឺមានតែនាំឱ្យរលាកដៃប៉ុណ្ណោះ»៕

November 25, 2021

(វីដេអូ)-កាមេរ៉ាខ្នាតយក្ស ទំហំ 3.2 ពាន់លានភិកសែល ជិតត្រូវបានដាក់ឱ្យប្រើប្រាស់ ដើម្បីសង្កេតមើលទីអវកាសឆ្ងាយៗ

កាមេរ៉ាឌីជីថលធំជាងគេបង្អស់ក្នុងពិភពលោក LSST នៅ ប្រទេសស៊ីលី នឹងជួយដល់ក្រុមអ្នកវិទ្យាសាស្ត្រស្រាវជ្រាវកាឡាក់ស៊ី អាចម៍ផ្កាយ និងបាតុភូតអាថ៌កំបាំងនានានៅក្នុងទីអវកាស។

LSST កំពុងត្រូវបានដំឡើងនៅក្នុងបន្ទប់ពិសោធន៍ជាតិ SLAC ក្នុងរដ្ឋ California សហរដ្ឋអាម៉េរិក ដើម្បីត្រៀមសម្រាប់យកទៅដាក់ឱ្យដំណើរការនៅស្ថានីយតារាសាស្ត្រ Vera C. Rubin នៃ ប្រទេសស៊ីលី។ នេះបើតាម Interesting Engineering ដែលបានចុះផ្សាយកាលពីថ្ងៃទី 23 វិច្ឆិកា។

នៅពេលការដំឡើងបានចប់សព្វគ្រប់ គម្រោងនេះនឹងត្រូវបានគេប្រើប្រាស់ដើម្បីថតផ្ទៃមេឃនៅប៉ូលខាងត្បូងរបស់ផែនដី ចំនួន 3 ដងក្នុង 1 ថ្ងៃ ក្នុងបំណងស្រាវជ្រាវអំពីអវកាសដែលនៅឆ្ងាយ។

បេសកកម្មសង្កេតមើលបេតិកភណ្ឌនៃលំហ និងពេលវេលា (LSST) គឺជាគម្រោងស្រាវជ្រាវអវកាសភាគខាងត្បូងរយៈពេល 10 ឆ្នាំ នៅឯស្ថានីយតារាសាស្ត្រ Vera C. Rubin។ ស្ថានីយតារាសាស្ត្រនេះកំពុងត្រូវបានសាងសង់នៅលើកំពូល El Penon របស់ភ្នំ Cerro Pachon ដែលស្ថិតនៅភាគខាងជើងនៃ ប្រទេសស៊ីលី។

គម្រោងនេះនឹងជួយឱ្យអ្នកវិទ្យាសាស្ត្រយល់កាន់តែច្បាស់អំពីថាមពលងងឹត និងវត្ថុងងឹត ដំណើរការកកើតរបស់កាឡាក់ស៊ីមីលគីវ៉េ ចំនុចពិសេសរបស់ដុំអាចម៍ផ្កាយ ឬកូនភពក្នុងប្រព័ន្ធព្រះអាទិត្យ គន្លងគោចររបស់អាចម៍ផ្កាយដែលអាចបង្កគ្រោះថ្នាក់ដល់ផែនដី រួមនឹងវត្តមាននៃបាតុភូតផ្ទុះដែលមិនទាន់ត្រូវបានរកឃើញជាដើម។

កាមេរ៉ា 3.2 ពាន់លានភិកសែលនេះ អាចមើលទៅដល់តំបន់មហាសែនឆ្ងាយ ដែលស្មើនឹងការមើលឃើញអតីតកាល និងថតរូបភាពតំបន់មួយដ៏ធំ។ កាមេរ៉ានេះមានទទឹងប្រវែង 1.7 ម៉ែត្រ និងបណ្ដោយ 3 ម៉ែត្រ។ ផ្ទៃខាងមុខរួមមានឡែនចំនួន 3 និងប្រព័ន្ធចម្រាញ់រូបភាព ខណៈខាងក្រោយគឺជាផ្ទៃរាបស្មើនៃប្រព័ន្ធ Focal Plane។

តាមគម្រោងដំបូង កាមេរ៉ានេះនឹងត្រូវបានដំឡើងនៅ ប្រទេសស៊ីលី ឆ្នាំ 2014 ប៉ន្តែ វាត្រូវបានពន្យារពេលដល់បច្ចុប្បន្ន ដោយសារមានបញ្ហាជាច្រើនត្រូវដោះស្រាយ៕

November 25, 2021

កម្ពុជា ប្រកាសផ្តល់អាហារូបករណ៍រាប់សិបកន្លែងដល់និស្សិត ទៅបន្តការសិក្សានៅ ប្រទេសហុងគ្រី

ក្រសួងអប់រំ យុវជន និងកីឡា របស់ កម្ពុជា ប្រកាសផ្តល់អាហារូបករណ៍ចំនួនរាប់សិបកន្លែងដល់និស្សិត ទៅបន្តការសិក្សានៅ ប្រទេសហុងគ្រី (Hungary) សម្រាប់ឆ្នាំសិក្សា 2022-2023។

ក្នុងក្របខណ្ឌនៃកម្មវីធី អាហារូបករណ៍ Stipendium Hungaricum Programme រដ្ឋាភិបាលនៃ ប្រទេសហុងគ្រី នឹងផ្ដល់អាហារូបករណ៍ចំនួន 30 កន្លែង ដល់និស្សិតរបស់ កម្ពុជា ដើម្បីទៅបន្តការសិក្សានៅតាមសាកលវិទ្យាល័យនានាក្នុងប្រទេសនេះ សម្រាប់ឆ្នាំសិក្សា 2022-2023 ដែលចាប់ផ្ដើមពីខែកញ្ញា ឆ្នាំ 2022 តទៅ។ នេះបើតាម សេចក្ដីជូនដំណឹងរបស់ក្រសួងអប់រំ យុវជន និងកីឡាកម្ពុជា។

ចំពោះនិស្សិតដែលមានបំណងចង់បន្តការសិក្សានេះ តាមកម្មវិធីខាងលើ អាចដាក់ពាក្យតាមរយៈ៖ http://apply. stipendiumhungaricum.hu ឬ www.stipendiumhungaricum.hu ឱ្យបានមុនថ្ងៃទី 15 ខែមករា ឆ្នាំ 2022។

បេក្ខជនក៏តម្រូវឱ្យមកចុះឈ្នោះនៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍ អគារលេខ 80 មហាវីថីព្រះនរោត្តម (ស្ថិតនៅក្នុងទីស្ដីការក្រសួងអប់រំ យុវជន និងកីឡា) ចាប់ពីថ្ងៃផ្សាយដំណឹងនេះ រហូតដល់ថ្ងៃទី 21 ខែមករា ឆ្នាំ 2022៕

November 25, 2021

ករណីឆ្លងថ្មីនូវជំងឺ COVID-19 នៅ កម្ពុជា បន្តថយចុះពីមួយថ្ងៃ ទៅមួយថ្ងៃ

កម្ពុជា បានរកឃើញអ្នកឆ្លងថ្មី 32 (PCR) នាក់ទៀត ខណៈអ្នកស្លាប់ថ្មី 04 នាក់ អំឡុង 24 ម៉ោងនៃថ្ងៃទី 24 វិច្ឆិកា 2021។

ក្នុងចំណោមអ្នកឆ្លងថ្មី មាន៖
– ករណីឆ្លងសហគមន៍ 25 នាក់
– អ្នកដំណើរពីបរទេស 07 នាក់

ករណី COVID-19 សរុបនៅ កម្ពុជា គិតមកដល់ថ្ងៃទី 25 វិច្ឆិកា 2021 រួមមាន៖
– អ្នកឆ្លងសរុប= 120,009 នាក់
– អ្នកជាសះស្បើយ= 116,387 នាក់
– អ្នកស្លាប់= 2,918 នាក់

ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖

នៅទូទាំងពិភពលោក ករណី COVID-19 មានដូចខាងក្រោម៖

-ឆ្លងថ្មី ៖ 41,844 នាក់
-ឆ្លងសរុប ៖ 259,731,904 នាក់
-ស្លាប់សរុប ៖ 5,192,249 នាក់
-ជាសះស្បើយសរុប ៖ 234,886,211 នាក់
-កំពុងព្យាបាល៖ 19,653,444 នាក់

November 25, 2021

អាកាសយានដ្ឋានអន្តរជាតិសៀមរាប បានត្រៀមខ្លួនរួចរាល់ហើយ ដើម្បីទទួលស្វាគមន៍ទេសចរបរទេសដែលបានចាក់វ៉ាក់សាំងពេញលេញ

«អាកាសយានដ្ឋានអន្តរជាតិសៀមរាប បានត្រៀមខ្លួនរួចជាស្រេចហើយ ជាមួយនឹងការរង់ចាំទទួលស្វាគមន៍ ទេសចរបរទេសដែលបានវ៉ាក់សាំងពេញលេញ ដែលអញ្ជើញមកទស្សនាខេត្តសៀមរាប» នាយកអាកាសយានដ្ឋានអន្តរជាតិសៀមរាប មានប្រសាសន៍ដូច្នេះ។

ការអះអាងខាងលើនេះត្រូវបានធ្វើឡើងកាលពីរសៀលថ្ងៃទី 24 វិច្ឆិកា 2021 នៅក្នុងកិច្ចប្រជុំពិភាក្សាអំពីកិច្ចប្រតិបត្តិស្តង់ដារវិធានសុវត្ថិភាព SOP ដើម្បីទទួលភ្ញៀវទេសចរបរទេសដែលបានចាក់វ៉ាក់សាំងបង្ការជំងឺ COVID-19 ពេញលេញ។

នាយកអាកាសយានដ្ឋានអន្តរជាតិសៀមរាប ឯកឧត្តម ប៊ុន រដ្ឋា បានបន្តថា កម្ពុជាគឺជាប្រទេសដែលបានបើកឡើងទ្វារសង្គម សេដ្ឋកិច្ចឡើងវិញ ដោយសារអត្រានៃការចាក់វ៉ាក់សាំងជូនប្រជាពលរដ្ឋក្នុងកម្រិតភាគរយខ្ពស់ ដែលពិភពលោកបានទទួលស្គាល់។

កម្ពុជាបានកំណត់ក្នុងបញ្ជីរួចហើយស្ដីពីពលរដ្ឋនៃប្រទេសមួយចំនួននៅលើពិភពលោក មកកាន់ កម្ពុជាដោយមិនចាំបាច់មានទិដ្ឋាការ (VISA) ជាពិសេសគឺបណ្ដាប្រទេសនៅក្នុងតំបន់ អាស៊ាន។ ឯកឧត្តម ប៊ុន រដ្ឋា ក៏បានថ្លែងថា ព្រលានយន្តហោះអន្តរជាតិសៀមរាប ក៏បានត្រៀមខ្លួនជាស្រេចហើយដែរ សម្រាប់បម្រើការហោះហើររបស់ក្រុមហ៊ុនអាកាសចរណ៍នានា៕

November 25, 2021

នាយករដ្ឋមន្ត្រីជាស្ត្រីភេទដំបូងបង្អស់នៅ ប្រទេសអ៊ុយអែត លាលែងពីតំណែង ក្រោយពីកាន់អំណាចបានប៉ុន្មានម៉ោងប៉ុណ្ណោះ

យោងតាមសារព័ត៌មាននៅ អឺរ៉ុប នាយករដ្ឋមន្ត្រីជាស្ត្រីភេទដំបូងបង្អស់របស់ ប្រទេសស៊ុយអែត លោកស្រី Magdalena Andersson ដែលទើបតែត្រូវបានសភាជ្រើសតាំងមុននេះប៉ុន្មានម៉ោងក្នុងថ្ងៃទី 24 វិច្ឆិកា បានប្រកាសថា សម្រេចចិត្តលាលែងពីតំណែង ដោយសារតែការមន្ទិលអំពីភាពស្របច្បាប់។

សារព័ត៌មានអាល្លឺម៉ង់ ដកស្រង់សម្ដីរបស់លោកស្រី Andersson ឱ្យដឹងថា លោកស្រីបានប្រកាសនៅឯ Stockholm កាលពីថ្ងៃទី 24 វិច្ឆិកា ថា លោកស្រីបានស្នើឱ្យប្រធានសភា Andreas Norlen បញ្ចប់តំណែងរបស់លោកស្រី ប៉ុន្តែ លោកស្រីនៅតែមានបំណងត្រលប់មកកាន់អំណាចនៅក្នុងរដ្ឋាភិបាលនៃប្រទេសអឺរ៉ុបមួយនេះ។

ប្រធានសភា Norlen បានយល់ព្រមតាមសំណើរបស់លោកស្រី Andersson និងបានឱ្យដឹងថា នឹងទាក់ទងទៅកាន់ក្រុមមេដឹកនាំបក្សដើម្បីពិភាក្សាអំពីបញ្ហានេះ ហើយថានឹងប្រកាសអំពីជំហានបន្ទាប់ក្នុងថ្ងៃទី 25 វិច្ឆិកា។

លោកស្រី Andersson បានមានប្រសាសន៍ថា លោកស្រីមិនចង់ដឹកនាំរដ្ឋាភិបាលមួយដែលត្រូវបានគេសង្ស័យអំពីភាពស្របច្បប់។ ទន្ទឹមនឹងនេះ លោកស្រីក៏បានបញ្ជាក់ថា បក្សបៃតង នឹងនៅតែគាំទ្រលោកស្រីឱ្យធ្វើជានាយករដ្ឋមន្ត្រី។

មុននេះ បក្សបៃតង បានសម្រេចដកខ្លួនពីរដ្ឋាភិបាលចម្រុះ បន្ទាប់ពីសភាបានអនុម័តសំណើថវិការបស់ក្រុមប្រឆាំង។ សហប្រធានបក្សបៃតង Per Bolund ឱ្យដឹងថា នេះគឺជាលើកដំបូងដែលសភាបានអនុម័តលើសំណើថវិកាដែលត្រូវបានចរចាជាមួយបក្សនិយមជ្រុល ដែលនេះចង់សំដៅលើបក្សប្រជាធិបតេយ្យស៊ុយអែត។

ថ្ងៃទី 24 ដទៃ សភាបានជ្រើសតាំងលោកស្រី Andersson ជានាយរដ្ឋមន្ត្រី ជំនួសលោក Stefan Lofven ដែលបានលាលែងពីតំណែងជាផ្លូវការកាលពីដើមខែនេះ ក្រោយកាន់អំណាចបាន 7 ឆ្នាំ។ នៅ ប្រទេសស៊ុយអែត ជាធម្មតា មេដឹកនាំរដ្ឋាភិបាលចម្រុះនឹងលាលែងពីតំណែង បន្ទាប់ពីបក្សមួយបានដកខ្លួនពីសម្ព័ន្ធភាព៕

November 25, 2021

Author: សឿន សំណាង