សឿន សំណាង - La Reine Media

ក្រុមប្រឆាំងវ៉ាក់សាំង មានផែនការធ្វើឃាតមេដឹកនាំរដ្ឋរបស់ អាល្លឺម៉ង់ នាំឱ្យ Telegram ប្រឈមនឹងបញ្ហា

សមាជិកនៃក្រុមប្រឆាំងវ៉ាក់សាំងជ្រុលនិយម នៅក្នុងរដ្ឋ Sachsen (Saxony) ត្រូវបានចោទប្រកាន់ពីបទមានផែនការវាយប្រហារដោយស្នា និងការគំរាមធ្វើឃាតលោកអភិបាល Michael Kretschmer។

សមត្ថកិច្ចរដ្ឋ Sachsen កាលពីថ្ងៃទី ១៥ ធ្នូ ឱ្យដឹងថា កងកម្លាំងសន្តិសុខ ក្នុងនោះមានអង្គភាពពិសេសប្រឆាំងអំពើជ្រុលនិយម Soko Rex បានឆ្មក់ចូលទីតាំងមួយ ដើម្បីជាការប្រតិកម្មទៅនឹងការគំរាមធ្វើឃាតអភិបាលរដ្ឋ Michael Kretschmer ដែលផែនការនេះត្រូវបានបង្ហើបឱ្យដឹងនៅក្នុងខ្សែភាពយន្តឯកសារមួយដែលបានផ្សាយតាមទូរទស្សន៍អាល្លឺម៉ង់ កាលពីសប្ដាហ៍មុន។

ផែនការធ្វើឃាតអភិបាលរដ្ឋ Sachsen លោក Kretschmer ត្រូវបានក្រុមអ្នកយកព័ត៌មានរបស់ អាល្លឺម៉ង់ លាតត្រដាង បន្ទាប់ពីពួកគេបានជ្រៀតចូលក្នុងក្រុមអ្នកប្រឆាំងវ៉ាក់សាំង មានសមាជិកប្រមាណ ១០០ នាក់ ដែលទាក់ទងគ្នាតាមរយៈកម្មវិធីផ្ញើសារ Telegram។

សមាជិកម្នាក់របស់ក្រុមខាងលើបាននិយាយថា បានត្រៀមអាវុធរួចរាល់សម្រាប់ការវាយប្រហារ។ ពួកគេបានពិភាក្សាអំពីផែនការធ្វើឃាតលោកអភិបាល រួមនឹងមន្ត្រីមួយចំនួនរបស់រដ្ឋ Sachsen។ នេះបើតាមការឱ្យដឹងរបស់សមត្ថកិច្ច។

ទាក់ទងនឹងបញ្ហា កូវីដ-១៩ លោក Kretschmer ដំបូងឡើយ មានការជំទាស់ទៅនឹងវិធានការរឹតបន្តឹងនានាដើម្បីទប់ស្កាត់ការឆ្លងរាលដាល។ ប៉ុន្តែ នៅពេល Sachsen ក្លាយជារដ្ឋដែលរងគ្រោះធ្ងន់ធ្ងរដោយសារវីរុសនេះ លោក Kretschmer ក៏បានផ្លាស់ប្ដូរជំហរ។

លោក Kretschmer ថ្លែងថា ក្រុមមន្ត្រីកំពុងតែរត់ប្រណាំងជាមួយនឹងពេលវេលា នៅក្នុងការចាក់វ៉ាក់សាំងដល់ប្រជាជន។

នាយរដ្ឋមន្ត្រី នៃ ប្រទេសអាល្លឺម៉ង់ លោក Olaf Scholz បានគាំទ្រសំណើដែលទាក់ទិននឹងការតម្រូវឱ្យចាក់វ៉ាក់សាំងចំពោះពលរដ្ឋពេញវ័យនៅ អាល្លឺម៉ង់ ចាប់ពីដើមឆ្នាំ ២០២១។

បាតុកម្មជាច្រើនត្រូវបានបង្កើតឡើងនៅ អាល្លឺម៉ង់ ដើម្បីប្រឆាំងនឹងបម្រាមគោចរ។ បាតុករប្រមាណ ៣,៥០០ នាក់ បានចូលរួមធ្វើបាតុកម្មនៅទីក្រុង Magdeburg ភាគខាងកើតរបស់ ប្រទេសអាល្លឺម៉ង់ កាលពីថ្ងៃទី ១៣ ធ្នូ។

យ៉ាងហោចណាស់ មានសំបុត្រគំរាមចំនួន ១០ ច្បាប់ ដែលខាងក្នុងមានផ្ទុកសាច់ស្រស់ ត្រូវបានផ្ញើទៅកាន់អ្នកនយោបាយ អង្គភាពសារព័ត៌មាន និងស្ថាប័នរដ្ឋាភិបាលអាល្លឺម៉ង់។ សារព័ត៌មានប្រទេសនេះយល់ថា នេះគឺជាការគំរាមអំពី «ការប្រឆាំងប្រកបដោយការបង្ហូរឈាម» តបតនឹងបទបញ្ជាតម្រូវឱ្យចាក់វ៉ាក់សាំង។

នាយរដ្ឋមន្ត្រី Olaf Scholz បានថ្កោលទោសចំពោះអំពើទាំងឡាយរបស់ក្រុមអ្នកប្រឆាំងវ៉ាក់សាំងខាងលើ។

Telegram កំពុងត្រូវបានរិះគន់នៅ ប្រទេសអាល្លឺម៉ង់ និងត្រូវគេចោទថា កំពុងបិទបាំងទោសកំហុសរបស់ក្រុមអ្នកជ្រុលនិយមប្រឆាំងវ៉ាក់សាំងបង្ការជំងឺកូវីដ-១។

មន្ត្រីជាន់ខ្ពស់មួយរូបរបស់រដ្ឋ Lower Saxony កាលពីថ្ងៃទី ១៤ ធ្នូ ឱ្យដឹងថា ផ្សារលក់កម្មវិធីរបស់ Google និង Apple គួរតែលុប Telegram ចេញពីថ្នាលបច្ចេកវិទ្យារបស់ពួកគេ បើសិនម្ចាស់ Telegram បដិសេធការដោះស្រាយខ្លឹមសារជ្រុលនិយម៕

December 16, 2021

មហាសេដ្ឋីដែលមានទ្រព្យច្រើនជាងគេក្នុងប្រវត្តិសាស្ត្រ ទូន្មានដល់កូនថា៖ មានប្រការមួយដែលត្រូវលាក់ ហើយបើកាន់តែអួតបង្ហាញ នោះជីវិតនឹងកាន់តែជួបឧបសគ្គ

របៀបប្រៀនប្រដៅកូនចៅរបស់មហាសេដ្ឋី Rockefeller Sr. បានជួយឱ្យត្រកូលរបស់លោក រក្សាបាននូវភាពមានបានរហូតដល់ ៦ ជំនាន់។

យោងតាមស្ថិតិ ភាគច្រើននៃត្រកូលអ្នកមានៗក្នុងប្រវត្តិសាស្ត្រ សុទ្ធតែក្ស័យធននៅក្នុងជំនាន់ទី ២ ហើយការដែលរក្សាបាននូវភាពស្ដុកស្ដម្ភដល់ជំនាន់ទី ៣ គឺជារឿងលំបាក។ ប៉ុន្តែ ប្រការនេះមិនមែនសុទ្ធតែត្រឹមត្រូវគ្រប់ករណីឡើយ។

នៅ សហរដ្ឋអាម៉េរិក ឆ្លងកាត់រយៈពេលជាង ១០០ ឆ្នាំ ត្រកូល Rockefeller អាចរក្សាភាពមានបានរបស់ពួកគេរហូតដល់ជំនាន់ទី ។ មកដល់ជំនាន់ទី ៧ ដោយមានសមាជិក ១៧៤ នាក់ ជាអ្នកស្នងមរតក ត្រកូលនេះនៅតែអាចរក្សាទ្រព្យបានជាង ១១ ពាន់លានដុល្លារ ក្នុងឆ្នាំ ២០១។

អ្នកដំបូងគេដែលបាននាំមកនូវភាពជោគជ័យ និងប្រាក់កាសហូរហៀរដល់ត្រកូលនេះគឺ លោក John Davison Rockefeller Sr. (៨ កក្កដា ១៨៣៩ ដល់ ២៣ ឧសភា ១៩៣៧) ដែលជាកំពូលអ្នកជំនួញ ជាសប្បុរសជន ជាជនជាតិអាម៉េរិក ដែលមានទ្រព្យច្រើនជាងគេបង្អស់ក្នុងប្រវត្តិសាស្ត្រមនុស្សជាតិ។

លោក John Davison Rockefeller Sr. គឺជាស្ថាបនិករបស់ក្រុមហ៊ុនប្រេង Standard Oil និងមានរហ័សនាមថា «ស្ដេចអណ្ដូងប្រេង»។ ឆ្នាំ ១៩១៦ ទ្រព្យរបស់ លោក John Davison Rockefeller Sr. ជិតស្មើនឹង ២% បើធៀបនឹងតម្លៃសេដ្ឋកិច្ចជាតិរបស់ សហរដ្ឋអាម៉េរិក ហើយបើសិនគណនាទៅតាមអតិផរណា នោះពេលនេះទ្រព្យរបស់លោកនឹងមានតម្លៃប្រមាណ ៤១៨ ពាន់លានដុល្លារ។

នៅក្នុងមួយជីវិត លោក John Davison Rockefeller Sr. បានសរសេរសំបុត្រទុកទូន្មានកូនចៅ សរុបចំនួន ៣៨ ច្បាប់។ នៅក្នុងសំបុត្រមួយនោះ លោកបានផ្ដែផ្ដាំប្រការមួយដល់កូន ដែលប្រការនេះធ្វើឱ្យមនុស្សជាច្រើនមានការភ្ញាក់ផ្អើល៖ «មនុស្សម្នាក់ដែលកាន់តែឆ្លាតវៃគឺជាមនុស្សដែលកាន់តែចេះធ្វើពុតជាល្ងង់»។

«បុគ្គលដែលក្រអែងក្រអោង អួតអំពីភាពឆ្លាតវៃរបស់ខ្លួនគឺជាបុគ្គលល្ងង់ខ្លៅ។ ចំណែកមនុស្សដែលចេះធ្វើពុតជាល្ងង់ ទើបជាមនុស្សឆ្លាតពិតប្រាកដ» លោក John Davison Rockefeller Sr. បានសរសេរដូច្នេះនៅក្នុងសំបុត្ររបស់លោក ដែលទុកប្រៀបប្រដៅដល់កូនចៅ៕

December 15, 2021

ថ្ងៃដំបូង កម្ពុជា ធ្វើបានយ៉ាងល្អ នៅក្នុងការប្រកួតកីឡាទូកក្ដោងជ្រើសរើសជើងឯកអាស៊ីអាគ្នេយ៍ ឆ្នាំ ២០២១

ព្រឹត្តិការណ៍ប្រកួតកីឡាទូកក្ដោងជ្រើសរើសជើងឯកអាស៊ីអាគ្នេយ៍ ឆ្នាំ ២០២១ បានចាប់ផ្ដើមការប្រកួតជាផ្លូវការ ខណៈលទ្ធផលបច្ចេកទេសសម្រាប់ថ្ងៃដំបូង (១៣ ខែធ្នូ) ត្រូវបានប្រកាសរួចហើយ។

នៅក្នុងការប្រកួតកីឡាទូកក្ដោងជ្រើសរើសជើងឯកអាស៊ីអាគ្នេយ៍ ឆ្នាំ២០២១ ដែលមានកីឡាករ-កីឡាការិនីចូលរួម ២៧ រូប មកពី ៣ ប្រទេស រួមមាន កម្ពុជា សិង្ហបុរី និង ម៉ាឡេស៊ី កីឡាកររបស់ កម្ពុជា ធ្វើបានយ៉ាងល្អ ក្នុងចំណោម ៤ វិញ្ញាសា ដែល កម្ពុជា បានបញ្ជូនអត្តពលិកចូលរួមប្រកួត លើកលែងវិញ្ញាសា ILCA 4 នេះបើតាមរបាយការណ៍ ស្ដីពីការប្រកួតថ្ងៃទី។

លទ្ធផកនៃការប្រកួត ៣ ជុំ នៃថ្ងៃដំបូង កីឡាកររបស់ កម្ពុជា សម្រេចបាន៖

១-វិញ្ញាសា ILCA 7 កីឡាករកម្ពុជា ចូលរួម ២រូប ទទួលបានចំណាត់ថ្នាក់លេខ ១ និងលេខ ៣ ក្នុងចំណោមកីឡាករ ៣ រូប។

២-វិញ្ញាសា ILCA 6 កីឡាករកម្ពុជាចូលរួម ២ រូប ទទួលបានចំណាត់ថ្នាក់លេខ ៤ និងលេខ ៥ ក្នុងចំណោមកីឡាករ ៥រូប

៣-វិញ្ញាសា RS:One កីឡាករកម្ពុជាចូលរួម ៣ រូប ទទួលបានចំណាត់ថ្នាក់លេខ១ លេខ២ និងលេខ៣ ក្នុងចំណោមកីឡាករ ៥រូប

៤-វិញ្ញាសា Techno 293 កីឡាករកម្ពុជាចូលរួម ៥ រូប ទទួលបានចំណាត់ថ្នាក់លេខ១ និងលេខ៣ ក្នុងចំណោមកីឡាករសរុប ៨រូប

ក្នុងចំណោម ៥ វិញ្ញាសាខាងលើនេះ នឹងមានការប្រកួតចំនួន ១៦ជុំ សម្រាប់វិញ្ញាសានីមួយៗ ដោយរាប់ចាប់ពីថ្ងៃទី ១៣ ដល់ ១៧ ខែធ្នូ ឆ្នាំ ២០២១ នៅឆ្នេរសុខា ខេត្តព្រះសីហនុ មុនពេលគណៈកម្មការរៀបចំការប្រកួត ធ្វើការបូកសរុបពិន្ទុ ដើម្បីកំណត់កីឡាករជាជ័យលាភី ប្រចាំការប្រកួត។ នេះបើតាម ឯកឧត្តម ថោង រដ្ឋសក្ដិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងជាអនុប្រធានសហព័ន្ធកីឡាទូកក្ដោងកម្ពុជា៕

December 14, 2021

មហាសេដ្ឋីទូទាំងសកលលោក រកបាន ១,៦០០,០០០,០០០,០០០ ដុល្លារ បន្ថែមទៀត ក្នុងឆ្នាំ ២០២១

យោងតាមស្ថិតិរបស់ Forbes ឆ្នាំ ២០២១ បន្តជាឆ្នាំដ៏អស្ចារ្យសម្រាប់ក្រុមមហាសេដ្ឋីនៅទូទាំងពិភពលោក ដែលភាគច្រើនគឺដោយសារទីផ្សារមូលបត្រ។

ទស្សនាវដ្ដី Forbes ឱ្យដឹងថា មនុស្សជាង ២,៦០០ នាក់ ដែលមានទ្រព្យចាប់ពីខ្ទង់ពាន់ដុល្លារអាម៉េរិក នៅលើពិភពលោក រកប្រាក់បាន ១.៦ ទ្រីលាន (១.៦ លានលាន ឬ ១,៦០០,០០០,០០០,០០០) ដុល្លារអាម៉េរិក នៅក្នុងឆ្នាំ ២០២១ គិតត្រឹមថ្ងៃទី ៣ ធ្នូ ២០។ ជាសរុប ពួកគេកាន់កាប់ទ្រព្យ ១៣.៦ ទ្រីលាន (១៣.៦ លានលាន ឬ ១៣,៦00,000,000,000) ដុល្លារអាម៉េរិក។

ក្រុមមហាសេដ្ឋីអាម៉េរិក នាំមុខគេនៅក្នុងកំណើននេះ នៅពេលរកបាន ៩៤៥ ពាន់លានដុល្លារបន្ថែមទៀត។ មូលហេតុសំខាន់គឺដោយសារទីផ្សារមូលបត្រកើនឡើង។ សន្ទស្សន៍ S&P ៥០០ ឆ្នាំនេះ បានកើន ២១% ខណៈ Nasdaq កើន ៥០%។

CEO របស់ Tesla លោក អ៊ីឡុន ម៉ាស (Elon Musk) មកដល់បច្ចុប្បន្នគឺជាអ្នកដែលមានទ្រព្យកើនឡើងលឿនជាងគេក្នុងពិភពលោក ដោយរកបានប្រាក់ ១១០ ពាន់លានដុល្លារបន្ថែមទៀត។ បច្ចុប្បន្ន លោក ម៉ាស មានទ្រព្យសរុប ២៦៦ ពាន់លានដុល្លារ ដោយសារភាគហ៊ុន Tesla កើន ៤៤% ខណៈ SpaceX ត្រូវបានកំណត់តម្លៃខ្ពស់។

មហាសេដ្ឋីលំដាប់ទី ២ របស់ពិភពលោកគឺ ចេហ្វ ប៊េហ្សូស (Jeff Bezos)។ ម្ចាស់ Amazon នេះ មានទ្រព្យសរុប ១៩៦ ពាន់លានដុល្លារ។

សហស្ថាបនិករបស់ Google គឺ ឡារី ផេក (Larry Page) រកបាន ៤៤ ពាន់លានដុល្លារ និង សឺរហ្គេ ប្រេន (Sergey Brin) រកបាន ៤២ ពាន់លានដុល្លារ ចំណែក នាយកប្រតិបត្តិរបស់ Oracle លោកឡារី អេល្លីសឹន ( Larry Ellison) រកបាន ៣២ ពាន់លានដុល្លារ និង ស្ទេវ បាលម៉ឺរ (Steve Ballmer) ដែលជាម្ចាស់ក្លិបបាល់បោះ Los Angeles Clippers រកបាន ២៧ ពាន់លានដុល្លារបន្ថែមទៀតនៅក្នុងឆ្នាំនេះ។

ក្រុមមហាសេដ្ឋីនៅ ឥណ្ឌា រកបានប្រាក់ច្រើនជាងគេលំដាប់ទី ២ ក្នុងពិភពលោក ដោយរកបានសរុប ២១០ ពាន់លានដុល្លារក្នុងឆ្នាំ ២០២១។

រីឯក្រុមមហាសេដ្ឋីនៅ ប្រទេសចិន វិញ ឆ្នាំនេះ ទ្រព្យរបស់ពួកគេកើនតែ ៤% ទាបជាងឆ្ងាយ ធៀបនឹង ៦០% កាលពីឆ្នាំ ២០២១។ មូលហេតុគឺដោយសាររដ្ឋាភិបាលចិន រឹតបន្តឹងការគ្រប់គ្រងវិស័យនានានៅក្នុងស្រុក។ ទ្រព្យរបស់មហាសេដ្ឋី Jack Ma បានបាត់ខ្លួន ២៣ ពាន់លានដុល្លារ ចំណែក ខូលីន ចេងហួង (Colin Zheng Huang) បាត់បង់ ៤៣ ពាន់លានដុល្លារ៕

December 14, 2021

Ford Ranger FX4 ស៊េរីថ្មីឆ្នាំ 2022 បានមកដល់ទីផ្សារប្រទេសកម្ពុជាហើយ!

ដោយសង្កេតឃើញថាទីផ្សារប្រទេសកម្ពុជាមានការពេញនិយមជាមួយនឹងការបំពាក់គ្រឿងតុបតែងលម្អ (Accessories) ឬ កែបន្ថែម (Modified) សម្រាប់ឲ្យរថយន្តមើលទៅខុសប្លែកពីគេ និងកាន់តែមានភាពអំណាច ដូច្នេះថ្ងៃនេះយើងខ្ញុំនឹងលើកយកអត្ថបទមួយនេះមកចែករំលែក ជាពិសេសនឹងត្រូវចិត្តប្រិយមិត្តដែលនិយមចូលចិត្តគ្រឿងតុបតែងលម្អរថយន្តបន្ថែម ដែលយើងខ្ញុំនឹងណែនាំរថយន្ត Ford Ranger មួយម៉ូឌែលថ្មីស្រឡាងដែលទើបតែមានវត្តក្នុងទីផ្សារប្រទេសកម្ពុជានោះគឺរថយន្ត Ford Ranger FX4 ស៊េរីថ្មីឆ្នាំ 2022 ដែលរថយន្តនេះបានបំពាក់មកជាមួយនឹងគ្រឿងតុបតែងលម្អពណ៍ខ្មៅ (Original) មកពីរោងចក្រដែលធ្វើឲ្យរថយន្តនេះមើលទៅកាន់តែមានភាពស្ព័រ និងមានអំណាចដូចជា៖ ប៉ាណាមុខរចនាបែបសំណាញ់ពណ៍ខ្មៅរលោង យ៉ាន់កង់អាលុយមីញ៉ូមពណ៍ខ្មៅរលោង ជាពិសេសនោះគឺមានបន្ថែមជូននូវកាងផ្នែកខាងក្រោយ (Sport Bar) លើសពីរថយន្ត Pickup ដ៏ទៃ។

ក្រៅពីរូបរាងដ៏លេចធ្លោនេះ បើនិយាយពីរថយន្ត Pickup នោះគេនឹងគិតដល់ក្រុមហ៊ុនផលិតរថយន្ត Ford មុនគេដោយសារតែ Ford ជាក្រុមហ៊ុនរថយន្តឈានមុខគេមួយរបស់សហរដ្ឋអាមេរិក ហើយគ្រប់រថយន្ត Ford តែងតែបានបំពាក់មកជាមួយនឹងប្រព័ន្ធសុវត្ថិភាព និងបច្ចេកវិទ្យាលើសគេ។ យើងខ្ញុំនឹងលើកយកគុណសម្បត្តិ 3 ធំៗនៃរថយន្ត Ford Ranger FX4 ស៊េរីថ្មីឆ្នាំ 2022 មកចែកជូនប្រិយមិត្តទាំងអស់គ្នាឲ្យបានដឹង៖

សមត្ថភាព៖ បើនិយាយពីរថយន្ត Ford Ranger FX4 នោះគេនឹងគិតដល់សមត្ថភាពនៃរថយន្តនេះមុនគេ ដោយសារតែរថយន្តនេះមានសមត្ថភាពអាចបើកបរបានគ្រប់ស្ថានភាពផ្លូវ និងជាពិសេសនោះគឺសមត្ថភាពដឹកទម្ងន់ធ្ងន់ ដែលអាចជួយសម្រួលដល់ការប្រើប្រាស់លោកអ្នកបានគ្រប់តម្រូវការ។ ជាក់ស្តែងមានចំណុចជាច្រើនដែលអាចបញ្ជាក់ពីសមត្ថភាពរបស់រថយន្ត Ford Ranger FX4 ស៊េរីថ្មីឆ្នាំ 2022 នេះដូចជា៖

ម៉ាស៊ីនម៉ាស៊ូតជំនាន់ចុងក្រោយសម្រាប់ម៉ូឌែល 2L អាចផលិតនូវកម្លាំងសេះដល់ទៅ 150 PS និងកម្លាំងរមួលបានដល់ទៅ 385 Nm

ប្រអប់លេខ 6 វគ្គអូតូ ដែលអាចប្រើប្រាស់បានទាំងលេខដៃ និងលេខអូតូធ្វើឲ្យការបើកបរកាន់តែរលូន និងចូលលេខបានល្អ
យ៉ាន់កង់បែបស្ព័រទំនើបទាន់សម័យទំហំ 18 អ៊ីញពណ៍ខ្មៅរលោងស័ក្តិសមជាមួយតួរថយន្ត និងអាចបើកបរបានគ្រប់ស្ថានភាពផ្លូវ ជាពិសេសធន់រឹងមាំសម្រាប់ការដឹកទំនិញធ្ងន់ៗ

អាចចុះទឹកបានជម្រៅ 800mm លើសគេ
ប្រព័ន្ធទប់លំនឹងរថយន្តពេលបើកបរលើផ្លូវកោង រអិល និងបញ្ចៀសការក្រឡាប់
ប្រព័ន្ធទប់លំនឹងកុំឲ្យរអិលថយក្រោយពេលឡើងចំណោត
ប្រព័ន្ធទប់លំនឹងពេលចុះចំណោត
ប្រព័ន្ធហ្វ្រាំង ABS និងEBD
ប្រព័ន្ធជំនួយក្នុងការចាប់ហ្វ្រាំង
ប្រព័ន្ធគ្រប់គ្រងប៉ុងរបស់រថយន្ត (កាប់ពីតាស)
ប្រព័ន្ធចាប់ប៉ុងក្រោយដែលជួយសម្រួលដល់ការជាប់ផុង
ប្រព័ន្ធជើងក្រោមផ្លាស់ប្តូរថ្មីដែលអាចកាត់បន្ថយការរលាក់ រំញ័រ និងមានលំនឹងពេលបើកបរ
អាចអូសសណ្តោងបានដល់ 3 តោន
អាចដឹកទំនិញបានដល់ទៅជាង 1 តោន

ប្រព័ន្ធសុវត្ថិភាព និងបច្ចេកវិទ្យា បើនិយាយពីចំណុចនេះ Ford គឺឈរនៅលើគេតែម្តង ដោយគ្រប់រថយន្ត Ford ទាំងអស់គឺពិតជាបានគិតគូដល់សុវត្ថិភាពទាំងអ្នកបើកបរ និងអ្នករួមដំណើរបានយ៉ាងល្អ និងបច្ចេកវិទ្យាដ៏ទំនើបដែលលើសពីដៃគូប្រកួតប្រជែងដែលមានដូចជា៖

ប្រព័ន្ធកូនសោឆ្លាតវៃ ចុចបញ្ឆេះរថយន្ត និងចេញចូលរថយន្តដោយគ្រាន់តែយកដៃទៅស៊កនឹងដៃទ្វារ

កាមេរ៉ាជំនួយចូលចតផ្នែកខាងក្រោយដែលមានខ្សែគំនូសពណ៍ស រេតាមចង្កូត
សេនសឺផ្នែកខាងក្រោយចំនួន 4 គ្រាប់

ចុចកព្ចាក់ក្តោបដោយស្វ័យប្រវត្ត
ផ្លិតទឹកស្វ័យប្រវត្ត
កុងទ័រឌីជីថលរចនាម៉ូដថ្មីស្រឡាងដែលផ្តល់ព័ត៍មានយ៉ាងលម្អិតអំពីរថយន្ត
ចង្កូតបូមអេឡិចត្រូនិចដែលមានលក្ខណះធូរងាយស្រួលបើកបរ )EPAS)
ប្រព័ន្ធបញ្ជាដោយសម្លេង (Voice Command) សម្រាប់ការហៅទូរស័ព្ទ និងបញ្ជាប្រព័ន្ធគ្រប់គ្រងសីតុណ្ហភាពរថយន្ត
ប្រព័ន្ធផ្តល់សញ្ញានៅពេលដែលប្រើប្រាស់ម៉ាស៊ូតមិនល្អ
អេក្រង់ Touch Screen 8 អ៊ីញ សម្រាប់គ្រប់គ្រង វិទ្យុ តន្ត្រី និងការកម្សាន្តផ្សេងៗ
បច្ចេកវិទ្យា SYNC 3 ជំនាន់ថ្មីដែលអាចធ្វើការភ្ជាប់ផ្ទាល់ជាមួយនឹង Apple CarPlay, Android Auto និង Google Map
រន្ធ USB ចំនួន 2 និងរន្ធសាកកម្លាំង 12V ចំនួន 2
សេនសឺខ្សែក្រវ៉ាត់សុវត្ថិភាព
បំពាក់ជូននូវពោងសុវត្ថិភាពចំនួន 6 គ្រាប់
តួរថយន្តធ្វើពីដែកថែបមានភាពរឹងមាំខ្លាំង មានដែកថែបពិសេសចំនួន 2ដើម សម្រាប់ការពារផ្នែកចំហៀងសងខាងនៃរថយន្ត
ខែលដែកថែបការពារម៉ាស៊ីនផ្នែកខាងក្រោម
ប្រព័ន្ធការពារចោរកម្ម
ប្រព័ន្ធពន្លត់ម៉ាស៊ីនដោយស្វ័យប្រវត្ត ពេលបញ្ឆេះរថយន្តចោល
ប្រព័ន្ធកាត់បន្ថយសម្លេងរំខានពីខាងក្រៅ
ប្រព័ន្ធសម្រាប់កំណត់ល្បឿនអតិបរមាពេលបើកបរ

សន្សំសំចៃ និងចំណេញក៏ជាចំណុចមួយដែលមិនគួរមើលរំលង ដែលលោកអ្នកគួរតែពិចារណាមុនពេលទិញរថយន្ត សម្រាប់រថយន្ត Ford Ranger FX4 ស៊េរីថ្មីឆ្នាំ 2022 គឺមានចំណុចទាំងនេះ៖

ការសន្សំសំចៃប្រេងឥន្ធនៈគឺសម្រាប់ការបើកបរលើផ្លូវលាត ត្រឹមតែ 7-8 លីត្រក្នុង 100 គីឡួម៉ែត្រអាស្រ័យលើស្ថានភាពផ្លូវ និងអ្នកបើកបរ
Ford តែងតែគិតគូពីបរិស្ថានដែលនៅលើរថយន្តនេះមានបំពាក់ប្រព័ន្ធកាត់បន្ថយផ្សែងពុល
អាចប្រើប្រាស់បានទាំងលក្ខណៈផ្ទាល់ខ្លួន គ្រួសារ និងប្រភេទអាជីវកម្មផ្សេងៗ
មានសមត្ថភាពខ្ពស់ប្រហាក់ប្រហែលទៅនឹង Ford Ranger Wildtrak ដែរតែតម្លៃវិញធូរជាងរហូតដល់ជាង 1ម៉ឺនដុល្លាឯណោះ
តម្លៃសមរម្យសម្រាប់ប្រជាជនខ្មែរភាគច្រើន និងមានទីផ្សារខ្ពស់ក្នុងប្រទេសកម្ពុជា ងាយស្រួលទិញចូល លក់ចេញ មិនសូវខាត ហើយក្រុមហ៊ុនក៏មានសេវាយករថយន្តចាស់មកផ្លាស់ប្តូររថយន្តថ្មី (Trade-In Service) ផងដែរ
មានឱកាសចូលរួមដំណើរកម្សាន្តដែលរៀបចំដោយក្រុមហ៊ុន Ford
ការធានាផ្ទាល់ពីរោងចក្ររយៈពេល 3ឆ្នាំ ឬ 100,000គីឡូម៉ែត្រ
សេវាថែទាំរថយន្តរយៈពេល 1ឆ្នាំ ឬ 20,000គីឡូម៉ែត្រ
ជាពិសេសមានសេវាជួសជុលរថយន្តចល័ត 24 ម៉ោងទូទាំងប្រទេស

រថយន្ត Ford Ranger FX4 ស៊េរីថ្មីឆ្នាំ 2022 មានតម្លៃ $46,500 ជាពិសេសនោះគឺទិញភ្លាមទទួលបានរថយន្តភ្លាមមិនចាំបាច់រង់ចាំយូរ! សម្រាប់ការបង់ប្រាក់អាចធ្វើបានតាមរយៈសាច់ប្រាក់ ឬការបង់រំលស់ដែលមានអត្រាការប្រាក់ទាបជាងគេគឺលោកអ្នកអាចបង់ប្រចាំខែត្រឹមតែ $392 ក្នុងមួយខែ ឬបង់ប្រាក់កក់ដំបូងត្រឹមតែ $9,300 តែប៉ុណ្ណោះជាមួយនឹងលក្ខខណ្ឌនៃការបង់រំលស់ងាយៗ និងការអនុម័តឆាប់រហ័សត្រឹមតែ 2-3 ថ្ងៃលោកអ្នកអាចយករថយន្តថ្មីទៅប្រើប្រាស់បាន តាមតម្រូវការ។ សម្រាប់ពណ៍គឺមាន 3 ពណ៍ដូចជា៖ ស ខ្មៅ និងទឹកប្រាក់។ ចង់ឃើញច្បាស់ពីរូបរាងថ្មី ប្រព័ន្ធសុវត្ថិភាព និងបច្ចេកវិទ្យាទំនើបៗនៃរថយន្ត Ford Ranger FX4 ស៊េរីថ្មីឆ្នាំ 2022 សូមទស្សនាវីដេអូនេះទាំងអស់គ្នា៖

សម្រាប់ព័ត៍មានបន្ថែមលោកអ្នកអាចអញ្ជើញទៅសាកសួរព័ត៍មានបន្ថែមនៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញសាខាផ្លូវ ព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
អគារតាំងបង្ហាញសាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
អគារតាំងបង្ហាញសាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
អគារតាំងបង្ហាញសាខាខេត្ត សៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357
អគារតាំងបង្ហាញសាខាខេត្ត កំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883។

December 14, 2021

តើ ខ្យល់កំបុតត្បូង ឬហៅថា ខ្យល់ប្រមោយដំរី កើតឡើងដោយរបៀបណា?

ខ្យល់កំបុតត្បូង បង្ហាញវត្តមាននៅក្នុងខ្យល់ព្យុះដែលអមដោយផ្គររន្ទះ និងអាចមានល្បឿនឡើងដល់ ៤០០ គីឡូម៉ែត្រ/ម៉ោង។

ខ្យល់កំបុតត្បូងគឺជាមួយក្នុងចំណោមបាតុភូតអាកាសធាតុដ៏គួរឱ្យចាប់អារម្មណ៍បំផុត។ ដូច្នេះ តើខ្យល់កំបុតត្បូង កើតឡើងដោយរបៀបណា?

នៅពេលព្រះអាទិត្យដុតកំដៅដី ខ្យល់នៅក្បែរផ្ទៃដីក៏ឡើងក្ដៅជាងមុន ហើយក៏ជះទៅលើអាកាស។ ខ្យល់នេះតែងរីកទៅជាដុំពពកគុយមុលឡូណាំប៊ូស (cumulonimbus) ស្ដើង ជាប្រភេទពពកដែលអាចបង្ហាញខ្លួននៅក្នុងព្យុះ អមដោយផ្គររន្ទះ។ ប៉ុន្តែ បើសិនបរិយាកាសនៅឯស្រទាប់អូហ្សូន មិនមានស្ថិរភាព ខ្យល់បរិយាកាសក្ដៅនឹងបន្តជះទៅលើអាកាសកាន់តែខ្ពស់ និងបង្កើតបានជាពពកគុយមុលឡូណាំប៊ូស នៅលើមេឃ និងរីកធំឡើង។

បើសិនប្រការនេះកើតឡើងនៅក្នុងបរិយាកាសដែលល្បឿនខ្យល់កើនទៅតាមកម្ពស់ ដែលហៅថា បាតុភូតខ្យល់កំបុត ពេលនោះ ខ្យល់អាកាសផ្លាស់ទីក្នុងល្បឿនលឿននៅទីខ្ពស់អាចចាប់ផ្ដើមវិលជុំ និងបង្វិលបរិយាកាសយឺតជាងផ្នែកខាងក្រោម។ ប្រការនេះបង្កើតបានជារលកខ្យល់អរូបិយមួយដែលលាតសន្ធឹងបណ្ដោយពពក ហើយវិលជុំវិញដូចទៅនឹងស៊ីឡាំង។

រលកខ្យល់ក្ដៅ និងមានកម្លាំងខ្លាំង បាញ់ឆ្ពោះទៅលើ ធ្វើឱ្យ «ស៊ីឡាំង» នេះ ត្រូវបញ្ឈរខ្លួន បង្កើតបានជាបង្គោលខ្យល់កួច ដែលខ្មែរហៅថា ខ្យល់ប្រមោយដំរី ឬខ្យល់កំបុតត្បូង។ ខ្យល់ព្យុះអមជាមួយនឹងផ្គររន្ទះ កើតឡើងជាមួយនឹងខ្យល់កំបុតត្បូងដូច្នេះ ត្រូវបានគេហៅថា ព្យុះ «supercell»។

ខ្យល់ត្រជាក់ត្រូវដាំក្បាលចុះនៅក្នុង supercell ទាញខ្យល់ប្រមោយដំរីនេះកាន់តែវែងចុះមកក្រោម។ ចុងក្រោយ រលកនៃខ្យល់កួចអាចប្រមូលផ្ដុំគ្នាយ៉ាងក្រាស់ រហូតដល់ថ្នាក់បង្កើតបានជាខ្យល់កំបុតត្បូងហាប់ណែន និងមានកម្លាំងខ្លាំងក្លា។

នៅពេលខ្យល់កំនួចខ្យល់ដាំក្បាលចុះដល់ដី ពេលនោះ ខ្យល់កំបុតត្បូងក៏កើតមានឡើង។ ខ្យល់កំបុតត្បូង ពេលខ្លះអាចធ្វើដំណើរក្នុងល្បឿនជាង ៤០០ គូឡូម៉ែត្រ/ម៉ោង ហើយអាចកួចប៉ើងរថយន្តដឹកទំនិញ និងកម្ទេចសំណង់នានាបានយ៉ាងងាយស្រួល៕

December 14, 2021

កូវីដ-១៩ នៅ កម្ពុជា ! អ្នកស្លាប់សរុបកើនឡើងដល់ជិត ៣ ពាន់នាក់ ខណៈអ្នកវិជ្ជមានសរុបកើនឡើងដល់ជាង ១.២ សែននាក់

ក្នុងអំឡុង ២៤ ម៉ោង នៃថ្ងៃទី ១៣ ខែធ្នូ ឆ្នាំ ២០២១ កម្ពុជា រកឃើញអ្នកឆ្លងថ្មី ១២ នាក់ទៀត និងអ្នកជាសះស្បើយ ១៤ នាក់ ខណៈអ្នកស្លាប់ មានចំនួន ៣ នាក់។

December 14, 2021

កំពូលមហាសេដ្ឋីលំដាប់ទីមួយនៅក្នុងពិភពលោក អ៊ីឡុន ម៉ាស (Elon Musk) ត្រូវបាន Time ជ្រើសរើសជា «បុគ្គលនៃឆ្នាំ» ២០២១

លោក អ៊ីឡុន ម៉ាស (Elon Musk) ដែលជាមហាសេដ្ឋីអាម៉េរិក និងជានាយកប្រតិបត្តិនៃក្រុមហ៊ុនផលិតរថយន្តអគ្គិសនី Tesla ហើយក៏ជា នាយកប្រតិបត្តិនៃក្រុមហ៊ុនអវកាស SpaceX ត្រូវបានទស្សនាវដ្ដី Time ជ្រើសរើសជាបុគ្គលប្រចាំឆ្នាំ សម្រាប់ឆ្នាំ ២០២១ ព្រោះតែឥទ្ធិពលជាសកលរបស់លោក។

«បុគ្គលប្រចាំឆ្នាំគឺជាមនុស្សដែលបង្កើតបាននូវឥទ្ធិពល។ មានមនុស្សតិចណាស់ដែលមានឥទ្ធិពលទៅលើជីវិតនៅលើពិភពផែនដី និងសូម្បីតែនៅក្រៅភពផែនដី បើធៀបជាមួយនឹង អ៊ីឡុន ម៉ាស។ ក្នុងឆ្នាំ ២០២១ លោក អ៊ីឡុន ម៉ាស មិនត្រឹមតែជាអ្នកមានទ្រព្យច្រើនជាងគេក្នុងពិភពលោក ប៉ុន្តែក៏ជាឧទាហរណ៍ច្បាស់លាស់បំផុតអំពីការប្រែប្រួលក្នុងសង្គម» លោក អែដវ៉ើដ ហ្វែលសឹនថល (Edward Felsenthal) និពន្ធនាយករបស់ទស្សនាវដ្ដី Time បានឱ្យដឹងដូច្នេះ កាលពីថ្ងៃទី ១៣ ខែធ្នូ ២០២១។

ឆ្នាំ ២០២១ ត្រូវបានវាយតម្លៃថាជា ឆ្នាំដែលគួរឱ្យចងចាំសម្រាប់ អ៊ីឡុន ម៉ាស។ លោកបានក្លាយជាអ្នកមានជាងគេក្នុងពិភពលោក ដោយមានទ្រព្យជាង ២៦៤ ពាន់លានដុល្លារ ដោយសារតែមានប្រភពចំណូលច្រើន មានដូចជា ភាគហ៊ុននៅក្នុងក្រុមហ៊ុន Tesla និង SpaceX ជាដើម។

បច្ចុប្បន្ន មហាសេដ្ឋីអាម៉េរិក ដើមកំណើតអាហ្វ្រិកខាងត្បូង រូបនេះ គឺជានាយកប្រតិបត្តិរបស់ Tesla និង SpaceX ហើយក៏កំពុងដឹកនាំ Neuralink ដែលជាក្រុមហ៊ុនធុរកិច្ចថ្មីកំពុងអភិវឌ្ឍឈីបសម្រាប់បំពាក់ក្នុងខួរក្បាលមនុស្ស និងក្រុមហ៊ុនហេដ្ឋារចនាសម្ព័ន្ធ The Boring Company។ លោក អ៊ីឡុន ម៉ាស ត្រូវបានគេប្រៀបប្រដូចទៅនឹង «ម្ចាស់សាសនានៅលើ Twitter» ដោយមានអ្នកតាមដានជិត ៦៦ លាននាក់ នៅលើគណនីបណ្ដាញសង្គមមួយនេះ។

ក្រៅពីយោបល់ដែលបង្កភាពចម្រូងចម្រាសក្នុងវិស័យបច្ចេកវិទ្យា និងប្រាក់ឌីជីថល លោក អ៊ីឡុន ម៉ាស ក៏ទាក់ទាញចំណាប់អារម្មណ៍ដោយការបញ្ចេញទឹកមុខបែបកំប្លែង ការដាក់ឈ្មោះឱ្យកូន ឬម៉ូដសក់ថ្មីជាដើម។ មតិរបស់មហាសេដ្ឋីរូបនេះ ពេលខ្លះក៏បានធ្វើឱ្យលោកជួបបញ្ហាជាមួយអាជ្ញាធរអាម៉េរិក ទន្ទឹមនឹងនេះក៏បណ្ដាលឱ្យសាធារណជន មិនសូវយកចិត្តទុកដាក់ទៅលើជោគជ័យដែលកើតឡើងដោយស្នាដៃរបស់លោក។

ទស្សនាវដ្ដី Time បានផ្ដើមការជ្រើសរើស «បុគ្គលប្រចាំឆ្នាំ» ចាប់ពីឆ្នាំ ១៩២៧ ក្នុងអំឡុងពេលនោះ ស្ត្រីដំបូងគេដែលត្រូវបានជ្រើសរើសគឺ វ៉ល្លិស ស៊ីមសឹន (Wallis Simpson) (ក្នុងឆ្នាំ ១៩៣៦)។

ប្រធានាធិបតីអាម៉េរិក លោក ចូ បៃដិន និងអនុប្រធានាធិបតី Kamala Harris ត្រូវបានជ្រើសរើសជាបុគ្គលរបស់ឆ្នាំ ២០២១។

ការជ្រើសរើសរបស់ Time មិនបានកំណត់ដោយទម្រង់នៃកិត្តិយសតែមួយមុខ ព្រោះថា បុគ្គលដែលត្រូវបានជ្រើសរើសក៏អាចបណ្ដាលមកពីឥទ្ធិពលអវិជ្ជមាន នេះបើតាមសារព័ត៌មាន CNN។ អាដុលហ្វ៍ ហ៊ីទ្លែរ (Adolf Hitler) ក៏ធ្លាប់ត្រូវបានជ្រើសរើសជា «បុរសរបស់ឆ្នាំ» កាលពីឆ្នាំ ១៩៣៨ មិនយូរប៉ុន្មាន មុនពេលសង្គ្រាមលោកលើកទី ២ ផ្ទុះឡើង៕

December 14, 2021

សម្លាប់មនុស្សដើម្បីបន្លំខ្លួនជាអ្នកស្លាប់ ក្រោយពីត្រូវបានដោះលែងពីមន្ទីរឃុំឃាំង ព្រោះមិនចង់ត្រលប់ចូលពន្ធនាគារ

(ឥណ្ឌា)-ជនសង្ស័យឈ្មោះ Sudesh Kumar ដែលត្រូវបានចាប់ខ្លួនពីបទសម្លាប់កូនខ្លួនឯង ត្រូវបានដោះលែងពីពន្ធនាគារដោយសារតែបញ្ហា កូវីដ-១៩ ប៉ុន្តែ បន្ទាប់ពីបានចេញពីមន្ទីរឃុំឃាំង ជននេះបានសម្លាប់មនុស្សម្នាក់ទៀត ដើម្បីឱ្យខ្លួនអាចបន្លំជាអ្នកស្លាប់។

Sudesh Kumar ជនសង្ស័យដែលកំពុងរង់ចាំការកាត់ក្ដីនៅតុលាការ ព្រោះតែបានសម្លាប់កូនកាលពីឆ្នាំ ២០១៨ ត្រូវបានចាប់ខ្លួនជាថ្មីកាលពីថ្ងៃទី ១០ ធ្នូ ក្រោយពីបានប្រព្រឹត្តអំពើមនុស្សឃាតមួយករណីបន្ថែមទៀត និងបានព្យាយាមបន្លំខ្លួនជាសាកសពជនរងគ្រោះ ក្នុងបំណងបានរស់នៅក្រៅឃុំដោយលាក់បាំង។

Kumar ត្រូវបានដោះលែងកាលពីឆ្នាំមុន នៅពេលអាជ្ញាធរធ្វើយុទ្ធនាការទប់ស្កាត់ កូវីដ-១៩ ដោយការកាត់បន្ថយអ្នកទោសនៅក្នុងពន្ធនាគារ។ សមត្ថកិច្ចបានរកឃើញសាកសពរបស់មនុស្សម្នាក់ដែលស្លៀកពាក់ខោអាវរបស់ Kumar និងកាន់អត្តសញ្ញាណប័ណ្ណរបស់ជនសង្ស័យនេះ នៅតំបន់ Ghaziabad ជាយក្រុង New Delhi កាលពីខែមុន។

«សាកសពត្រូវគេដុតមួយផ្នែក មិនអាចកំណត់អត្តសញ្ញាណនៅលើផ្ទៃមុខ។ យើងបានទៅដល់ផ្ទះរបស់ Kumar ដើម្បីឱ្យភរិយាជននេះបញ្ជាក់។ ស្ត្រីជាភរិយាបានអះអាងថា នេះគឺជាសាកសពប្ដីរបស់នាង ប៉ុន្តែមិនអាចធ្វើឱ្យសមត្ថកិច្ចទុកចិត្តបាន នេះបើតាម មេប៉ូលិសប្រចាំតំបន់ Ghaziabad លោក Iraj Raja។

បន្ទាប់មក សមត្ថកិច្ចក៏បានទទួលព័ត៌មានថា Kumar នៅមានជីវិត។ កាមេរ៉ាសន្តិសុខនៅតំបន់ដែលប្ដីប្រពន្ធ Kumar រស់នៅ បានបង្ហាញថា មនុស្សម្នាក់មានរូបរាងដូចជនសង្ស័យ បានដឹកអ្វីមួយដែលដូចទៅនឹងសាកសព ដោយដាក់នៅលើកង់។ ប៉ូលិសបានចាប់ខ្លួនជនសង្ស័យនៅខាងក្រៅផ្ទះកាលពីថ្ងៃទី ១០ ខែធ្នូ។

«ក្នុងពេលសួរចម្លើយ ជនសង្ស័យបានក៏បានសារភាព» លោក Raja និយាយដូច្នេះ និងបន្ថែមថា Kumar និងប្រពន្ធសុទ្ធតែត្រូវបានចោទប្រកាន់ពីបទមនុស្សឃាត។

Kumar ឱ្យដឹងថា ព្រោះតែខ្លាចបទបញ្ជាដោះលែងបណ្ដោះអាសន្នដោយសារបញ្ហាកូវីដ-១៩ នឹងត្រូវបញ្ចប់ឆាប់ៗ ហើយអាចត្រូវបានចោទពីបទមនុស្សឃាត ទើបប្រើល្បិចកលសម្លាប់មនុស្ស បន្លំខ្លួនជាអ្នកដែលបានស្លាប់ ដើម្បីមិនត្រូវត្រលប់ចូលពន្ធនាគារ។ ជនសង្ស័យបានបង្កើតទំនាក់ទំនងមិត្តភក្ដិជាមួយនឹងជាងសំណង់ម្នាក់ រួចក៏ហៅជនរងគ្រោះមកផ្ទះដើម្បីជួសជុលផ្ទះ និងបានយកខោអាវឱ្យជនរងគ្រោះស្លៀកពាក់ ហើយក៏ធ្វើសកម្មភាពសម្លាប់ ក្រោយពីជននេះស្រវឹងស្រា។ បន្ទាប់មក ជនសង្ស័យបានដុតភ្លើងលើផ្ទៃមុខរបស់សាកសពដើម្បីមិនឱ្យសមត្ថកិច្ចអាចកំណត់អត្តសញ្ញាណជនរងគ្រោះ៕

December 14, 2021

WHO បន្តព្រមានអំពី «ហានិភ័យខ្ពស់» ពី កូវីដ-១៩ ប្រភេទ អូមីក្រុង (Omicron)

អង្គការសុខភាពពិភពលោក (WHO) យល់ថា អូមីក្រុង ធ្វើឱ្យមានហានិភ័យខ្ពស់ខ្លាំងនៅទូទាំងសកលលោក ប៉ុន្តែ បញ្ជាក់ថា នៅមានកត្តាមិនទាន់ច្បាស់លាស់ជាច្រើនទាក់ទងនឹងវីរុសបំប្លែងខ្លួនថ្មីនេះ។

«ហានិភ័យរួមទាក់ទងនឹង វ៉ារ្យ៉ង់ ដែលគួរឱ្យព្រួយបារម្ភ អូមីក្រុង នៅតែស្ថិតក្នុងកម្រិតខ្ពស់ ដោយសារតែមូលហេតុជាច្រើន» WHO ឱ្យដឹងដូច្នេះនៅក្នុងរបាយការណ៍កាលពីថ្ងៃទី១២ ខែធ្នូ និងបានសង្កាត់ធ្ងន់ថា សញ្ញាមួយចំនួនបង្ហាញថា អ្នកដែលបានទទួលការចាក់វ៉ាក់សាំង ឬធ្លាប់បានឆ្លងវីរុសកូវីដ-១៩ ទំនងជាមិនអាចបង្កើតអង្គបដិប្រាណគ្រប់គ្រាន់ដើម្បីទប់ស្កាត់ អូមីក្រុង នាំឱ្យអត្រាឆ្លងមានកម្រិតខ្ពស់ និង «ផលវិបាកធ្ងន់ធ្ងរ»។

យ៉ាងណាក៏ដោយ WHO ក៏បានព្រមានថា នៅមានប្រការជាច្រើនផ្សេងទៀតដែលមិនទាន់ច្បាស់លាស់ទាក់ទងនឹង អូមីក្រុង។ ការវាយតម្លៃដំបូងៗ បង្ហាញថា អូមីក្រុង បង្កអាការរោគស្រាលជាង ដេលតា ប៉ុន្តែ នៅតែត្រូវការទិន្នន័យបន្ថែមទៀតដើម្បីបញ្ជាក់ថា វាបង្កគ្រោះថ្នាក់ក្នុងកម្រិតទាបជាងបណ្ដាវ៉ារ្យ៉ង់មុនៗដែរឬអត់។

ក្រុមអ្នកវិទ្យាសាស្ត្រនៅសាកលវិទ្យាល័យ Oxford របស់ អង់គ្លេស កាលពីម្សិលមិញបានប្រកាសលទ្ធផលស្រាវជ្រាវមួយបង្ហាញថា អត្រានៃអង្គបដិប្រាណដែលអាចបន្សាប អូមីក្រុង បានថយចុះគួរឱ្យកត់សម្គាល់ នៅលើអ្នកដែលបានទទួលការចាក់វ៉ាក់សាំងចំនួន ២ ដូសរួចហើយ។

វីរុសកូវីដ-១៩ ប្រភេទ អូមីក្រុង ដែលត្រូវបានរកឃើញដំបូងនៅ ប្រទេសបុតស្វាណា កាលពីថ្ងៃទី ១១ វិច្ឆិកា ២០២១ និងត្រូវបាន ប្រទេសអាហ្វ្រិកខាងត្បូង រាយការណ៍ដល់ WHO កាលពីថ្ងៃទី ២៤ វិច្ឆិកា បច្ចុប្បន្ន បានបង្ហាញវត្តមាននៅក្នុងប្រទេសជាង ៦០ រួចហើយ។ ថ្វីបើត្រូវបាន WHO ចាត់ចូលទៅក្នុងក្រុមដែលគួរឱ្យព្រួយបារម្ភ ប៉ុន្តែ មកដល់ពេលនេះ ពុំទាន់មានទិន្នន័យច្បាស់លាស់ និងគ្រប់គ្រាន់ដែលអាចបញ្ជាក់បាននូវកម្រិតនៃការឆ្លងរាលដាល និងភាពសាហាវរបស់ អូមីក្រុង នៅឡើយ៕

December 14, 2021

Author: សឿន សំណាង