(សហរដ្ឋអាម៉េរិក)-ក្រុមអ្នកស្រាវជ្រាវបានរកឃើញអង្គបដិប្រាណមួយប្រភេទដែលត្រូវបានបង្កើតឡើងកាលពីដើមសម័យកូវីដ ទំនងជានៅតែរក្សាបាននូវសមត្ថភាពកម្ចាត់វីរុស នៅពេលប្រើប្រាស់ទៅលើ វ៉ារ្យ៉ង់ អូមីក្រុង។
ក្រុមអ្នកស្រាវជ្រាវអន្តរជាតិនេះ បានអះអាងដូចខាងលើ និងបានបញ្ជាក់ថា អង្គបដិប្រាណដែលត្រូវបានគេដាក់ឈ្មោះថា sotrovimab សំដៅលើគោលដៅត្រង់តំបន់បន្លាប្រូតេអ៊ីដែលមិនប្ដូរផ្លាស់របស់វីរុស នៅពេលវីរុសបំប្លែងខ្លួន។
ដោយវិធីកំណត់គោលដៅរបស់អង្គបដិប្រាណទៅលើបន្លាប្រូតេអ៊ីន ក្រុមអ្នកវិទ្យាសាស្ត្រអាចបង្កើតវ៉ាក់សាំង និងវិធីព្យាបាលដោយប្រើប្រាស់អង្គបដិប្រាណមួយប្រភេទដែលមិនត្រឹមតែមានប្រសិទ្ធភាពចំពោះ អូមីក្រុង នោះទេ តែបូករួមទាំង វ៉ារ្យ៉ង់ ដែលអាចនឹងបង្ហាញវត្តមាននាអនាគតទៀតផង។
ខាងលើនេះគឺជាការអះអាងរបស់ David Veesler អ្នកស្រាវជ្រាវនៅវិទ្យាស្ថានវេជ្ជសាស្ត្រ Howard Hughes និងជាសាស្ត្រាចារ្យផ្នែកជីវគីមីសាស្ត្រប្រចាំមហាវិទ្យាល័យវេជ្ជសាស្ត្រនៃសាកលវិទ្យាល័យវ៉ាស៊ីងតោន នៅទីក្រុង Seattle សហរដ្ឋអាម៉េរិក៕
