សឿន សំណាង - La Reine Media

ត្រូវគេគប់នឹងដុំថ្មរហូតដល់ស្លាប់ ព្រោះតែដុត គម្ពីរកូរ៉ាន (Qu’ran)

(ប៉ាគីស្ថាន)-មនុស្សម្នាក់ដែលមានបញ្ហាសតិអារមណ៍ នៅក្នុងខេត្ត Punjab ត្រូវបានក្រុមមនុស្សដែលកំពុងខឹងខ្លាំង នាំគ្នាយកដុំថ្មគប់រហូតដល់បាត់បង់ជីវិត ដោយចោទថា បានប្រមាថលើ គម្ពីរកូរ៉ាន (Qu’ran ឬ Koran)។

Mian Mohammad Ramzan អ្នកគ្រប់គ្រងវិហារអ៊ីស្លាមមួយនៅក្នុងភូមិដាច់ស្រយាល Tulamba ក្នុងខណ្ឌ Khanewal ខេត្ត Punjab បានឱ្យដឹងថា គាត់បានឃើញបុរសម្នាក់ដុត គម្ពីរកូរ៉ាន កាលពីព្រលប់ថ្ងៃទី ១២ កុម្ភៈ និងបានប្រាប់ដល់អ្នកផ្សេង មុននឹងរាយការណ៍ប្រាប់សមត្ថកិច្ច។

ប៉ូលិសបានប្រញាប់ទៅកាន់កន្លែងកើតហេតុ និងបានឃើញបុរសម្នាក់កំពុងត្រូវបានឡោមព័ទ្ធដោយហ្វូងមនុស្សដែលកំពុងខឹងខ្លាំង។ ប៉ូលិសឈ្មោះ Mo ammad Iqbal រួមនឹងថ្នាក់ក្រោម ២ នាក់ បានព្យាយាមចូលទៅជួយជនរងគ្រោះ ប៉ុន្តែ ក៏ត្រូវហ្វូងមនុស្សចោលនឹងដុំថ្ម ធ្វើឱ្យ Iqbal ត្រូវរងរបួសធ្ងន់ និងប៉ូលិស ២ នាក់ទៀត រងរបួសស្រាល។

Munawar Gujjar ប្រធានការិយាល័យនគរបាល Tulamba ឱ្យដឹងថា លោកបានប្រញាប់បញ្ជូនកម្លាំងបន្ថែមទៅកាន់កន្លែងកើតហេតុ ប៉ុន្តែ ហ្វូងមនុស្សនោះបានសម្លាប់ និងចងព្យួរសាកសពជនរងគ្រោះទៅលើដើមឈើទៅហើយ។

ជនរងគ្រោះមានឈ្មោះថា Mushtaq Ahmed អាយុ ៤១ ឆ្នាំ រស់នៅក្នុងភូមិក្បែរនោះ។ ជនរងគ្រោះមានបញ្ហាសតិអារម្មណ៍អស់រយៈពេល ១៥ ឆ្នាំមកហើយ។ បើតាមក្រុមគ្រួសារ បុរសនេះតែងបាត់ខ្លួនជាញឹកញាប់ និងដើរសុំទាន និងហូបគ្រប់យ៉ាងដែលគាត់បានរកឃើញ» ប៉ូលិស Gujjar ប្រាប់ដូច្នេះ។

Ramzan ដែលជាអ្នកគ្រប់គ្រងវិហារអ៊ីស្លាម នៅកន្លែងកើតហេតុនោះ បានប្រាប់ថា គាត់បានឃើញផ្សែងបាញ់ចេញពីខាងក្នុងវិហារ ហើយគាត់បានឃើញ គម្ពីរកូរ៉ាន មួយក្បាលកំពុងឆេះ ចំណែក Ahmed ក៏កំពុងព្យាយាមដុតគម្ពីរមួយក្បាលទៀត។ Ramzan ស្រែកឱ្យឈប់ ក្នុងពេលដែលប្រជាជនក្នុងភូមិកំពុងនាំគ្នាមកវិហារដើម្បីបួងសួង។

សាក្សីបានឱ្យដឹងថា ហ្វូងមនុស្សបានរារាំងក្រុមប៉ូលិសចូលទៅជួយជនរងគ្រោះ។ ក្រោយហេតុការណ៍នេះ ប៉ូលិសក៏បានមកកាន់កន្លែងកើតហេតុ ដើម្បីនាំយកសាកសពជនរងគ្រោះ។

សមត្ថកិច្ចកំពុងស្រាវជ្រាវរកជនដៃដល់ទាំងឡាយនៅក្នុងករណីនេះ ដោយពិនិត្យវីដេអូដែលថតបានពីកាមេរ៉ាសុវត្ថិភាព។ ប៉ូលិសបានចាប់ខ្លួនមនុស្សប្រហែល ៨០ នាក់ ដែលរស់នៅក្បែរទីតាំងកើតហេតុ ប៉ុន្តែ តាមការស្រាវជ្រាវ ជនសង្ស័យប្រហែល ៣០០ នាក់ បានចូលរួមគប់ដុំថ្មសម្លាប់បុរសខាងលើ។

នាយករដ្ឋមន្ត្រីប៉ាគីស្ថាន Imran Khan បានសម្ដែងការសោកស្ដាយចំពោះហេតុការណ៍នេះ និងបានថ្លែងថា លោកកំពុងស្នើឱ្យអភិបាលខេត្ត Punjab រាយការណ៍អំពីវិធីដែលក្រុមប៉ូលិសដោះស្រាយបញ្ហានេះ។ លោកថា ប៉ូលិសបាន «បរាជ័យក្នុងការបំពេញភារកិច្ចរបស់ខ្លួន» ក្នុងករណីនេះ៕

February 14, 2022

ភាពតានតឹងរវាង អ៊ុយក្រែន និង រុស្ស៊ី! ប្រទេសនានាអំពាវនាវឱ្យពលរដ្ឋចាកចេញពី អ៊ុយក្រែន

ដោយសារតែការព្រួយបារម្ភអំពីជម្លោះប្រដាប់អាវុធរវាង អ៊ុយក្រែន និងរុស្ស៊ី យ៉ាងហោចណាស់មានប្រទេសចំនួន ១៩ ហើយ ដែលបានអំពាវនាវឱ្យពលរដ្ឋរបស់ខ្លួន ចាកចេញពី ប្រទេសអ៊ុយក្រែន និងកាត់បន្ថយបុគ្គលិកការទូតនៅប្រទេសនេះ។

គិតមកដល់បច្ចុប្បន្ន ប្រទេសមួយចំនួនដែលបានណែនាំឱ្យពលរដ្ឋចាកចេញពី អ៊ុយក្រែន រួមមាន សហរដ្ឋអាម៉េរិក អាល្លឺម៉ង់ អ៊ីតាលី អង់គ្លេស អៀឡង់ បែហ្ស៊ិក លុចសំបួ ហូឡង់ កាណាដា ន័រវែស អេស្តូនី លីទុយអានី ប៊ុលហ្គារី ស្លូវេនី អូស្ត្រាលី ជប៉ុន អ៊ីស្រាអែល អារ៉ាប៊ីសាអូឌិត និង អេមីរ៉ាតអារ៉ាប់រួម។

ប្រទេសបារាំង បានណែនាំថា មិនគួរទៅកាន់បណ្ដាតំបន់ព្រំដែនភាគខាងជើង និងខាងកើតនៃ ប្រទេសអ៊ុយក្រែន ប៉ុន្តែ មិនទាន់បានស្នើឱ្យពលរដ្ឋរបស់ខ្លួនចាកចេញពីប្រទេសនេះនៅឡើយ។

ប្រទេសរ៉ូម៉ានី ដែលមានព្រំដែនជាប់នឹង អ៊ុយក្រែន បានណែនាំជាពិសេសដល់ពលរដ្ឋ ឱ្យចៀសវាង ប្រទេសអ៊ុយក្រែន និង «ពិនិត្យលើតម្រូវការស្នាក់នៅទីនោះ» បើសិនជាបានជ្រុលធ្វើដំណើរទៅដល់។

រុស្ស៊ី បានកោះហៅបុគ្គលិកមួយចំនួនត្រលប់មកវិញ ព្រោះតែព្រួយបារម្ភចំពោះអ្វីដែលពួកគេហៅថា «សកម្មភាពបង្កហេតុ»។

សហរដ្ឋអាម៉េរិក បានចេញបទបញ្ជាដកបុគ្គលិកស្ទើរតែទាំងអស់ចេញពីទីក្រុង Kiev ដោយយល់ថា រុស្ស៊ី អាចផ្ទុះអាវុធដាក់ អ៊ុយក្រែន គ្រប់ពេល។ ទីក្រុងវ៉ាស៊ីងតោន នឹងរក្សាបុគ្គលិកកុងស៊ុល នៅក្នុងទីក្រុង Lviv ភាគខាងលិចអ៊ុយក្រែន។

កាណាដា និង អូស្ត្រាលី ក៏បិទទ្វារស្ថានទូតនៅ ទីក្រុងកៀវ ខណៈដែលបណ្ដាប្រទេសរបស់ សហភាពអឺរ៉ុប ក៏បានស្នើឱ្យបុគ្គលិកការទូតមិនចាំបាច់នៅ ទីក្រុងកៀវ ចាកចេញពី អ៊ុយក្រែន។

អាម៉េរិក និងបណ្ដាប្រទេសលោកខាងលិច បានចោទថា រុស្ស៊ី មានផែនការវាយប្រហារ អ៊ុយក្រែន បន្ទាប់ពីប្រទេសនេះបានបញ្ជូនទាហានជាង ១០០,០០០ នាក់ រួមនឹងសព្វាវុធទំនើបៗ ចូលទៅក្បែរ ព្រំដែនអ៊ុយក្រែន។ រុស្ស៊ី វិញ អះអាងថា សកម្មភាពនេះរបស់ខ្លួន គ្រាន់តែជាបញ្ហាផ្ទៃក្នុង និងដើម្បីធ្វើសមយុទ្ធ នៅចំពោះមុខការគំរាមកំហែងពី សេណារីយ៉ោ «ណាតូ (NATO) ពង្រីកទឹកដីមកភាគខាងកើត ព្រមទាំងបានចោទ អាម៉េរិក និងសម្ព័ន្ធមិត្តថា បានបំប៉ោងហានិភ័យនៃការកើតមានសង្គ្រាម។

បន្ទាប់ពី រុស្ស៊ី បានចល័តទ័ព សហរដ្ឋអាម៉រិក ក៏បានបញ្ជូននាវាចម្បាំង យន្តហោះទម្លាក់គ្រាប់បែក ទៅកាន់ សមុទ្រខ្មៅ ដើម្បីធ្វើសមយុទ្ធរួមគ្នាជាមួយនឹង ប្រទេសអ៊ុយក្រែន និងប្រទេសជាសមាជិកណាតូ ចំនួន ២ គឺ រ៉ូម៉ានី និង តួកគី។

ក្រៅពីនេះ អាម៉េរិក និងប្រទេសមួយចំនួនរបស់ ណាតូ ក៏បន្តលក់អាវុធ និងផ្ដល់ជំនួយជាអាវុធដល់ អ៊ុយក្រែន ផងដែរ។ ជាមួយនឹងការគាំទ្រពី អាម៉េរិក ប្រទេសអ៊ុយក្រែន បានបង្កើនការប្រយុទ្ធប្រឆាំងនឹងក្រុមផ្ដាច់ខ្លួននៅភាគខាងកើតប្រទេស ដែលបានថយកំដៅក្នុងអំឡុងប៉ុន្មានឆ្នាំចុងក្រោយនេះ៕

February 14, 2022

មហាសេដ្ឋី ប៊ីល ហ្គេត (Bill Gates) សោកស្ដាយចំពោះ «យុវវ័យ» របស់ខ្លួន កាលពីនៅរៀន ព្រោះតែ «មិនចេះសប្បាយ»!

មហាសេដ្ឋីជនជាតិអាម៉េរិក លោក Bill Gates បានឱ្យដឹងថា ប្រការដែលលោកសោកស្ដាយបំផុតគឺ កាលពីនៅរៀន លោកមិនបានចូលរួមក្នុងពិធីជប់លៀង និងដើរលេងសប្បាយឱ្យបានច្រើននឹងគេ។

ឆ្នាំ ១៩៧៥ លោក Bill Gates បានសម្រេចចិត្តបោះបង់ការសិក្សានៅមហាវិទ្យាល័យ Harvard ដ៏ល្បីល្បាញ ប៉ុន្តែនោះមិនមែនជាប្រការដែលធ្វើឱ្យលោកសោកស្ដាយបំផុតនោះទេ។ នៅក្នុងពិធីជួបពិភាក្សាជាមួយក្រុមនិស្សិតរបស់សាលាមួយកាលពីប៉ុន្មានឆ្នាំមុន លោក Bill Gates ថ្លែងថា ប្រការដែលលោកសោកស្ដាយជាងគេបំផុតគឺ កាលពីជំនាន់នៅរៀន គាត់មិនបានចូលរួមក្នុងពិធីជប់លៀង និងដើរលេងសប្បាយឱ្យបានច្រើន។

«ខ្ញុំបានរំលងចោលប្រការជាច្រើន។ ខ្ញុំមិនធ្លាប់បានចូលរួមក្នុងការប្រកួតបាល់ឱប បាល់បោះ ឬកីឡាប្រភេទណាមួយ ពេលនៅ Harvard។ គ្រប់យ៉ាងដែលខ្ញុំបានធ្វើគឺ រៀន និងស្រាវជ្រាវ» លោក Bill Gates ប្រាប់ដូច្នេះ។

លោកបន្តថា «ខ្ញុំមិនបានចូលរួមធ្វើសកម្មភាពសង្គម ឬក្លឹប ឬក្រុមណាមួយឱ្យបានញឹកញាប់។ ខ្ញុំថែមទាំងមិនបានដឹងអំពីវត្តមានរបស់ពួកវា។

Bill Gates និង លោក Paul Allen បង្កើតក្រុមហ៊ុន Microsoft កាលពីឆ្នាំ ១៩៧៥

មហាសេដ្ឋីរូបនេះយល់ថា ការចូលរួមធ្វើសកម្មភាពច្រើន និងជួបមនុស្សច្រើននឹងនាំមកនូវប្រយោជន៍មិនតិចនោះទេសម្រាប់ជោគជ័យនាពេលអនាគត ជាជាងការគិតតែពីការរៀនសូត្រ និងស្រាវជ្រាវ។

ទោះជាយ៉ាងណាក៏ដោយ លោកនៅតែជាឧទាហរណ៍លេចធ្លោស្ដីពីមនុស្សម្នាក់អាចរកឃើញផ្លូវសម្រាប់ខ្លួនឯង និងជោគជ័យត្រចះត្រចង់ ដោយមិនបាច់មានសញ្ញាបត្រមហាវិទ្យាល័យ នៅក្នុងចំណោមបុគ្គលជាច្រើនដែលបានបោះបង់ការសិក្សានៅមហាវិទ្យាល័យ ដើម្បីកសាងមុខជំនួញផ្ទាល់ខ្លួន ក្នុងនោះមានដូចជា សហស្ថាបនិករបស់ Facebook លោក Mark Zuckerberg, Steve Jobs ស្ថាបនិករបស់ Apple ឬ Michael Dell ដែលជា CEO របស់ Dell Technologies ជាដើម។

ក៏ប៉ុន្តែ នេះមិនមែនមានន័យថា គ្រប់គ្នាគួរបោះបង់ការសិក្សា ដើម្បីចេញរកស៊ីនោះទេ។ ជំនួសមកវិញ គ្រប់គ្នាត្រូវមានការវាយតម្លៃឱ្យបានគ្រប់ជ្រុងជ្រោយ មុននឹងសម្រេចយកបុគ្គលណាមួយជាគំរូ៕

February 12, 2022

កូវីដ-១៩! កម្ពុជា រកឃើញអ្នកឆ្លងថ្មី ៣០០ នាក់ទៀត និងស្លាប់ «គ្មាន»

ក្នុងអំឡុង ២៤ ម៉ោងនៃថ្ងៃទី ១១ កុម្ភៈ កម្ពុជា បានរកឃើញអ្នកថ្មីកូវីដ-១៩ ចំនួន ៣០០ នាក់ ក្នុងនោះមាន ករណីឆ្លងក្នុងសហគមន៍ ២៩៥ នាក់ និងអ្នកដំណើរពីបរទេស ៥ នាក់ ដែលទាំងអស់សុទ្ធតែជា ករណី អូមីក្រុង។

February 12, 2022

ប្រទេសចិន អាចនឹងមិនបានក្លាយជា «មហាយក្សសេដ្ឋកិច្ចទីមួយរបស់ពិភពលោក»! នេះជាមូលហេតុ…

វិបត្តិបំណុល ការដាក់ខ្លួនឱ្យដាច់ដោយឡែកពីខាងក្រៅ និងចំនួនប្រជាជនចេះតែថយចុះ គឺជាកត្តាដែលអាចក្លាយជាឧបសគ្គដែលរារាំង ចិន នៅលើវិថីក្លាយជាមហាយក្សសេដ្ឋកិច្ចទីមួយរបស់ពិភពលោក។

បើតាមនិន្នាការបច្ចុប្បន្ន ប្រទេសចិន នឹងយកឈ្នះ សហរដ្ឋអាម៉េរិក ហើយដណ្ដើមបានតំណែងលេខ ១ នៅក្នុងចំណោមប្រទេសមហាយក្សសេដ្ឋកិច្ចពិភពលោក ក្រោយរយៈពេលប្រហែល ១ ទសវត្សរ៍ទៀត។ ក៏ប៉ុន្តែ ពុំមានអ្វីដែលអាចធានាបាននូវការរំពឹងទុកនេះ។

យោងតាម Bloomberg កត្តាដែលបាននិយាយខាងដើម អាចធ្វើឱ្យ ប្រទេសចិន នៅតែឈរលំដាប់លេខ ២ បន្ទាប់ពី សហរដ្ឋអាម៉េរិក។ Bloomberg Economics បានបង្កើតរូបមន្តស្ដីពី សេណារីយ៉ោ ចំនួន ៣ ដែលអាចកើតមានឡើងនៅ ប្រទេសចិន។

សេណារីយ៉ោ ទីមួយ គឺជា សេណារីយ៉ោ ដែលអាចទៅរួចសម្រាប់ ប្រទេសចិន៖ ប្រទេសនេះនឹងយកឈ្នះលើ សហរដ្ឋអាម៉េរិក នៅឆ្នាំ ២០៣០។

កំណែទម្រង់ថ្មី និងការច្នៃប្រឌិត គឺជាកត្តាសំខាន់ដើម្បីជំរុញឱ្យមានការរីកចម្រើន និងដោយមានប្រភពវិនិយោគធំសម្រាប់វិស័យស្រាវជ្រាវ អភិវឌ្ឍជាដើម ប្រទេសចិន កំពុងតែលេចធ្លោជាងគេបង្អស់។ ដូច្នេះ ចិន មានលទ្ធភាពអាចផ្ដួល អាម៉េរិក ដើម្បីក្លាយជាប្រទេសដែលមានសេដ្ឋកិច្ចធំជាងគេទីមួយក្នុងពិភពលោក។

សេណារីយ៉ោ ទីពីរ គឺវិបត្តិហិរញ្ញវត្ថុ។ នៅពេលដែល ប្រទេសជប៉ុន ស្វែងរកវិធីដើម្បីក្លាយជាមហាយក្សសេដ្ឋកិច្ចនាំមុខគេ ប្រទេសនេះបានធ្លាក់ទៅក្នុងវិបត្តិបំណុល។ ប្រការដូចគ្នានេះក៏អាចកើតឡើងចំពោះ ប្រទេសចិន។ ស្ថានភាពបំណុលកើនឡើងខ្ពស់ចាប់តាំងពីឆ្នាំ ២០០៨ នៅ ប្រទេសចិន គឺជាសញ្ញាប្រកាសអាសន្នកម្រិតពណ៌ក្រហម។

បណ្ដាខឿនសេដ្ឋកិច្ចជឿនលឿនដូចជា សហរដ្ឋអាម៉េរិក ជាដើម មានបំណុលខ្ពស់ ប៉ុន្តែ ពួកគេបានឈានដល់ដំណាក់កាលរកចំណូលបានក្នុងកម្រិតខ្ពស់។ ឥណ្ឌា និងបណ្ដាប្រទេសដែលមានចំណូលទាប បង្កលក្ខណៈងាយស្រួលដើម្បីអភិវឌ្ឍ និងរីកចម្រើន។ ចំណែកចំណូលទាប និងបំណុលខ្ពស់របស់ ចិន ធ្វើឱ្យប្រទេសនេះ ធ្លាក់ទៅក្នុងស្ថានការណ៍លំបាក។

ករណីវិបត្តិបំណុលរបស់ក្រុមហ៊ុន Evergrande Group និងបញ្ហាជាច្រើនដែលកើតឡើងលើបណ្ដាក្រុមហ៊ុនអភិវឌ្ឍអចលនទ្រព្យនៅ ប្រទេសចិន បានបង្ហាញថា ប្រទេសនេះមានគ្រឹះមិនរឹងមាំ។ លទ្ធផលគឺថា ចិន អាចធ្លាក់ទៅក្នុងវិបត្តិហិរញ្ញវត្ថុ ធ្វើឱ្យល្បឿននៃកំណើនសេដ្ឋកិច្ចត្រូវថយចុះ នាំឱ្យជាប់នៅក្នុងលំដាប់ទីពីរដដែល។

សេណារីយ៉ោ ទីបី គឺ ល្បឿននៃកំណើនសេដ្ឋកិច្ចធ្លាក់ចុះ។ មិនចាំបាច់មានវិបត្តិហិរញ្ញវត្ថុ ក៏ការលោតឡើងរបស់ ចិន នៅតែអាចត្រូវបានបន្ថយល្បឿន។ ការរួមផ្សំរវាងកត្តាមួយចំនួនដូចជា ការដាក់ខ្លួនដោយឡែកពីពិភពខាងក្រៅ ឧបសគ្គទាក់ទងនឹងប្រជាសាស្ត្រ និងចំណុចអវិជ្ជមានក្នុងការគ្រប់គ្រង អាចបង្កឱ្យមានផលប៉ះពាល់ដូចគ្នា។

សង្គ្រាមពាណិជ្ជកម្មរវាង ចិន-អាម៉េរិក លែងនៅជារឿងក្ដៅគគុកដូចមុន ប៉ុន្តែ អត្រាពន្ធដែល អាម៉េរិក អនុវត្តចំពោះ ប្រទេសចិន នៅតែខ្ពស់។ ស្ថានការណ៍នៃការដាក់ខ្លួនឯងឱ្យនៅដាច់ដោយឡែកពីអន្តរជាតិ ពិសេសគឺបញ្ហាដែលកើតឡើងដោយសារ កូវីដ-១៩ បូករួមនឹងរនាំងនៃទីផ្សារសកល និងបច្ចេកវិទ្យា អាចកាត់បន្ថយល្បឿននៃកំណើនសេដ្ឋកិច្ចរបស់ ប្រទេសចិន បានដែរ។

ចិន មានកម្មវិធីវិបុលភាពរួម ក្នុងបំណងដោះស្រាយបញ្ហាវិសមភាពនានានៅក្នុងទីផ្សារ ប៉ុន្តែ វាក៏ជាការសំពងមួយយ៉ាងធ្ងន់ធ្ងន់ទៅលើវិនិយោគិន។

ការបញ្ចប់គោលនយោបាយកូនមួយគឺជាក្ដីសង្ឃឹមរបស់ ប្រទេសចិន ប៉ុន្តែ ចំនួនប្រជាជនក្នុងវ័យពលកម្មដែលចេះតែថយចុះពីមួយថ្ងៃទៅមួយថ្ងៃ នឹងជាកម្លាំងរារាំងដល់កំណើនសេដ្ឋកិច្ច។

ជាលទ្ធផល ប្រទេសចិន អាចធ្លាក់ចូលទៅក្នុងផ្លូវដែលមានកំណើនសេដ្ឋកិច្ចយឺតជាងបច្ចុប្បន្ន ហើយត្រូវដេញតាមឱ្យទាន់ សហរដ្ឋអាម៉េរិក ប៉ុន្តែ មិនអាចតាមពីក្រោយក្នុងគម្លាតឆ្ងាយ៕

February 12, 2022

ថវិកា ៧ ពាន់លានដុល្លារ របស់ អាហ្វហ្គានីស្ថាន ដែលបង្កកនៅធនាគារអាម៉េរិក ត្រូវបានលោក ចូ បៃដិន បញ្ជាឱ្យដកយកមកប្រើប្រាស់

កាលពីថ្ងៃទី ១១ កុម្ភៈ ប្រធានាធិបតីអាម៉េរិក លោក ចូ បៃដិន បានចុះហត្ថលេខាលើបទបញ្ជាមួយដើម្បីបញ្ចេញខ្ទង់ថវិកាចំនួន ៧ ពាន់លានដុល្លារ របស់រដ្ឋាភិបាលចាស់នៅ អាហ្វហ្គានីស្ថាន។

ខ្ទង់ប្រាក់នេះ ក្រោយមកនឹងត្រូវបានប្រើប្រាស់ដើម្បីផ្ដល់ជាជំនួយផ្នែកមនុស្សធម៌ ដល់ប្រជាជាអាហ្វហ្គានីស្ថាន ក៏ដូចជាផ្ដល់ជាសំណងដល់ជនរងគ្រោះនៃករណីភេរវកម្មសំដៅលើ សហរដ្ឋអាម៉េរិក កាលពីថ្ងៃទី ១១ កញ្ញា ២០០១។

ជាក់ស្ដែង ខ្ទង់ថវិកា ៧ ពាន់លានដុល្លារខាងលើ ត្រូវបានបង្កកនៅក្នុងធនាគារកណ្ដាលរបស់អាម៉េរិក (FED) បន្ទាប់ពីរដ្ឋាភិបាលចាស់នៅ កាប៊ុល បានដួលរលំ ហើយកម្លាំងតាលីបង់ បានត្រលប់មកកាន់អំណាចនៅ អាហ្វហ្គានីស្ថាន កាលពីពាក់កណ្ដាលឆ្នាំ ២០២១។

មន្ត្រីជាន់ខ្ពស់មួយរូបរបស់ សហរដ្ឋអាម៉េរិក បានឱ្យដឹងថា ប្រធានាធិបតី ចូ បៃដិន គ្រោងនឹងប្រើប្រាស់ថវិកា ៣.៥ ពាន់លានដុល្លារនៅក្នុងខ្ទង់ប្រាក់ខាងលើ ដើម្បីបង្កើតមូលនិធិមួយសម្រាប់ផ្ដល់ជំនួយមនុស្សធម៌ដល់ អាហ្វហ្គានីស្ថាន «ដើម្បីផលប្រយោជន៍របស់ប្រជាជន និងអនាគតរបស់ប្រទេសនេះ»។

រដ្ឋាភិបាលបច្ចុប្បន្ននៅ អាហ្វហ្គានីស្ថាន នឹងមិនមានសិទ្ធិគ្រប់គ្រងមូលនិធិខាងលើ។ ចំណែក ៣.៥ ពាន់លានដុល្លារទៀត នឹងត្រូវបានប្រើប្រាស់សម្រាប់ជាសំណងដល់ជនរងគ្រោះនៅក្នុងអំពើភេរវកម្មថ្ងៃទី ១១ កញ្ញា ២០០១ បើសិនសំណើរបស់ជនរងគ្រោះត្រូវបានតុលាការអាម៉េរិក យល់ស្រប៕

February 12, 2022

អង្គការសុខភាពពិភពលោក (WHO) ថា ដំណាក់កាលស្រួចស្រាវរបស់ជំងឺរាតត្បាតសកល កូវីដ-១៩ អាចនឹងបញ្ចប់ក្នុងឆ្នាំនេះ

មេដឹកនាំ WHO បានឱ្យដឹងថា ដំណាក់កាលធ្ងន់ធ្ងររបស់ជំងឺរាតត្បាតសកល កូវីដ-១៩ អាចបញ្ចប់នៅក្នុងឆ្នាំ ២០២២ នេះ បើសិនប្រជាជនប្រមាណ ៧០% របស់ពិភពលោក បានទទួលការចាក់វ៉ាក់សាំង។

«យើងរំពឹងថា ដំណាក់កាលស្រួចស្រាវរបស់ជំងឺរាតត្បាតសកលនឹងបញ្ចប់ក្នុងឆ្នាំនេះ ជាមួយនឹងលក្ខខណ្ឌ ត្រូវសម្រេចដល់គោលដៅចាក់វ៉ាក់សាំងឱ្យបាន ៧០% នៃចំនួនប្រជាជនសរុប នៅពាក់កណ្ដាលឆ្នាំនេះ ខ្ទង់ខែមិថុនា-កក្កដា» លោក Tedros Adhanom Ghebreyesus ប្រធានអង្គការសុខភាពពិភពលោក ថ្លែងដូច្នេះកាលពីថ្ងៃទី ១១ កុម្ភៈ ពេលកំពុងធ្វើទស្សនកិច្ចក្រុមហ៊ុន Afrigen Biologics&Vaccines នៅ អាហ្វ្រិកខាងត្បូង។

លោក Tedros បន្ថែមថា៖ «បើសិនប្រការនោះត្រូវបានអនុវត្ត ដំណាក់កាលស្រួចស្រាវរបស់ជំងឺរាតត្បាតសកល ពិតជាអាចត្រូវបានបញ្ចប់ ហើយនោះគឺជាការដែលយើងរំពឹងទុក។ វាស្ថិតក្នុងដៃរបស់យើងគ្រប់គ្នា វាមិនមែនជារឿងសំណាងល្អ ឬសំណាងអាក្រក់ ប៉ុន្តែ វាគឺជាបញ្ហានៃការជ្រើសរើស»។

Afrigen គឺជាក្រុមហ៊ុនដំបូងគេនៅ ទ្វីបអាហ្វ្រិក ដែលផលិតវ៉ាក់សាំងបង្ការជំងឺកូវីដ-១៩ ដោយប្រើប្រាស់បច្ចេកវិទ្យា mRNA របស់ Moderna។ ផលិតផលនេះនឹងត្រូវពិសោធលើមនុស្សនៅខែវិច្ឆិកា ២០២២ និងអនុម័តនៅឆ្នាំ ២០២៤។

ប្រធាន WHO រំពឹងថា វ៉ាក់សាំងនេះ «សមស្របជាមួយនឹងស្ថានការណ៍ដែលវាត្រូវបានប្រើប្រាស់ដោយមានឧបសគ្គតិចតួចទាក់ទងនឹងការទុកដាក់ ហើយតម្លៃក៏ទាបជាងទីផ្សារ»។

Afrigen កំពុងតែនាំមុខគេនៅក្នុងគម្រោងពិសោធដែលផ្ដល់ជំនួយដោយ WHO និង COVAX។ មជ្ឈមណ្ឌលផ្ទេរបច្ចេកវិទ្យាដែលត្រូវបានបង្កើតឡើងកាលពីឆ្នាំ ២០២១ នឹងបណ្ដុះបណ្ដាលប្រទេសមួយចំនួន ហើយផ្ទេរបច្ចេកវិទ្យាផលិតវ៉ាក់សាំងបង្ការជំងឺកូវីដ-១៩ ឱ្យទៅបណ្ដាប្រទេសក្រីក្រដែលស្ថិតនៅក្រោយគេក្នុងការប្រកួតប្រជែងចាក់វ៉ាក់សាំង៕

February 12, 2022

(វីដេអូ)-«បើសិនផែនដីឈប់វិល ៥ វិនាទី» តើនឹងមានរឿងអ្វីកើតឡើងខ្លះ?

ការដែលផែនដីឈប់វិលភ្លាមៗ អាចបង្កឱ្យមានរលកយក្ស និងខ្យល់ខ្លាំងរហូតដល់ ១,៦៧០ គីឡូម៉ែត្រ/ម៉ោង ដែលអាចហែកកម្ទេចគ្រប់យ៉ាងនៅលើពិភពបៃតងនេះ។

ផែនដីបញ្ចប់រង្វិលជុំមួយជុំខ្លួនវាក្នុងរយៈពេលមួយថ្ងៃ ប្រការនេះបានបង្កើតឱ្យមានថ្ងៃ និងយប់។ ផែនដីវិលគឺកើតឡើងដោយសារការប៉ះទង្គិចនៅក្នុងដំណាក់កាលកកើតកាលពី ៤.៦ ពាន់លានឆ្នាំមុន។ នៅពេលថាសធូលី និងឧស្ម័នដ៏មហិមាមួយវិលជុំវិញព្រះអាទិត្យ ធូលី និងគ្រាប់ថ្ម បានប្រមូលផ្ដុំគ្នា បង្កើតបានជាកម្លាំងដែលរក្សាភពផែនដីវិលទៅតាមទិសតែមួយ ហើយទំនងជាមិនមានកម្លាំងអ្វីមួយក្នុងលំហអវកាស អាចធ្វើឱ្យវាវិលយឺតមកវិញ។ ផែនដីបន្តវិលទៅទៀត និងបន្តក្នុងរយៈពេលរាប់ពាន់លានឆ្នាំ។

ក៏ប៉ុន្តែ បើសិនជាផែនដីឈប់វិលមួយស្របក់ តើគ្រប់យ៉ាងអាចខ្ទាតចេញពីផ្ទៃផែនដី ឬទេ?

នៅពេលផែនដីឈប់វិលភ្លាមៗ បរិយាកាសនឹងនៅតែមានចលនា។ ប្រការនេះមានន័យថា បើទោះជាគ្រប់យ៉ាងបានឈប់ ប៉ុន្តែ ខ្យល់ខ្លាំងនឹងនៅតែបន្តបោកបក់ ហើយនោះមិនមែនជាខ្យល់ខ្លាំងធម្មតា។ វានឹងខ្លាំងជាងច្រើនដង ធៀបនឹងខ្យល់ព្យុះដែលធ្លាប់មានកន្លងមកនៅលើផែនដី។ ប៉ុន្តែ កម្លាំងរបស់ខ្យល់នឹងមានភាពខុសគ្នា ពីតំបន់មួយទៅតំបន់មួយ។

នៅតំបន់អេក្វាទ័រ ឬក្បែរតំបន់អេក្វាទ័រ ផែនដីវិលលឿនបំផុត ហើយនៅទីនេះខ្យល់នឹងមានល្បឿន ១,៦៧០ គីឡូម៉ែត្រ/ម៉ោង អាចបក់អ្នកទៅលើអាកាស។ មិនត្រឹមតែប៉ុណ្ណោះទេ វាក៏មានកម្លាំងគ្រប់គ្រាន់ដើម្បីហែកបំបែកសម្បកផែនដី។ ដូច្នេះ បើទោះកំពុងនៅកណ្ដាលវាល ឬខាងក្នុងអគារដ៏មហារឹងមាំ ខ្យល់នេះក៏នៅតែអាចយកជីវិតអ្នកបាន។

ដើម្បីប្រៀបធៀប៖ ខ្យល់កំបុតត្បូង F៥ ខ្លាំងបំផុត មានល្បឿន ៥១១ គីឡូម៉ែត្រ/ម៉ោង អាចហែក និងដកកម្ទេចផ្ទះចេញពីគ្រឹះ និងកួចរថយន្តទៅលើអាកាស ហើយអាចកម្ទេចហេដ្ឋារចនាសម្ព័ន្ធផ្លូវបេតុងផងដែរ។ ប៉ុន្តែ ខ្យល់ដែលកើតឡើងនៅពេលផែនដី «ចាប់ហ្វ្រាំងបន្ទាន់» គឺខ្លាំងជាងនេះ ៣ ដងឯណោះ។ ដូច្នេះ បើសិនជាបេតុងនៅក្រោមជើងរបស់អ្នកមិនត្រូវខ្ទេច អ្នក និងវត្ថុជាច្រើនផ្សេងទៀតអាចត្រូវបានខ្យល់កួចហោះទៅយ៉ាងឆ្ងាយ ប៉ុន្តែ មិនអាចចេញផុតពីផែនដី។ ល្បឿនដែលអ្នកត្រូវការដើម្បីអាចចេញផុតពីទំនាញផែនដី និងអណ្ដែតត្រសែតក្នុងទីអវកាស គឺប្រហែល ៤០,០០០ គីឡូម៉ែត្រ/ម៉ោង។

នៅតំបន់ផ្សេងលើផែនដី ដូចជា នូវែលសេឡង់ ឬបារាំង អ្នកនឹងបានជួបខ្យល់ដែលមានកម្លាំងខ្សោយជាងបន្តិច ប៉ុន្តែ ល្បឿននៅតែឡើងដល់ ១,១៨០ គីឡូម៉ែត្រ/ម៉ោង ខ្លាំងជាងខ្យល់ព្យុះដែលមានបច្ចុប្បន្ន។ វាក៏នឹងអាចកម្ទេចសំណង់ជាច្រើនប្រភេទ។

យ៉ាងនេះក៏ដោយ ខ្យល់មិនមែនជាការគំរាមតែមួយគត់ ដែលអ្នកនឹងត្រូវប្រឈមក្នុងរយៈពេល ៥ វិនាទីនេះនោះទេ។ ផែនដីរបស់យើង ពុំមែនជាពិភពដែលមានរាងមូលពេញលេញឡើយ។ វានឹងប៉ោងឡើងនៅតំបន់ក្បែរខ្សែអាក្វាទ័រ ដោយសារតែកម្លាំងមួយដែលហៅថា «centrifugal force» កើតឡើងព្រោះតែការវិលរបស់ផែនដី។

បើសិនការវិលរបស់ផែនដី បានឈប់មកវិញ ផែនដីនឹងប្រែរូបរាងទៅជាមូលពេញលេញ។ ទឹកទាំងអស់ដែលប្រមូលផ្ដុំក្បែរខ្សែអេក្វាទ័រ នឹងហូរទៅកាន់ប៉ូលទាំងពីរ បង្កើតបានជារលកយក្សដ៏មហិមា។ ៥ វិនាទីក្រោយ នៅពេលផែនដីចាប់ផ្ដើមវិលក្នុងល្បឿនធម្មតាឡើងវិញ ទឹកនឹងហូរត្រលប់ទៅកាន់កន្លែងដើម។ រលកយក្សនឹងបោកខ្ទប់ពីរលើកទៅលើគ្រប់យ៉ាង។

តំបន់តែមួយគត់ដែលអាចមានសុវត្ថិភាពនៅក្នុងករណីនេះ គឺតំបន់ក្បែរប៉ូលខាងជើង ឬប៉ូលខាងត្បូង។ នៅទីនេះ ខ្យល់នឹងមានកម្លាំងស្រាលបំផុត។ អ្នកប្រហែលជាបានធូរស្រាលក្នុងអារម្មណ៍នៅពេលដឹងថា ផែនដីបានត្រលប់មកសភាពធម្មតា។ ប៉ុន្តែ ពេលនោះគ្រប់យ៉ាងលែងមាននៅលើផែនដីទៀតហើយ។

អគារ ដីកសិកម្ម និងបច្ចេកវិទ្យាគ្រប់ប្រភេទនឹងត្រូវបានកម្ទេច។ មនុស្សរាប់ពាន់លាននាក់នឹងស្លាប់ដោយសារតែកម្លាំងដ៏មហាសាលរបស់ខ្យល់។ ដូច្នេះ បើសិនជាអ្នកចង់នៅមានជីវិតក្នុងស្ថានភាពនេះ ល្អបំផុត អ្នកគួរតែចាប់ផ្ដើមសាងសង់ជម្រកក្រោមដីដែលប្រកបដោយភាពមហារឹងមាំ។

ក៏ប៉ុន្តែ សំណាងល្អ អ្នកវិទ្យាសាស្ត្រព្យាករថា ផែនដីនឹងមិនឈប់វិលសោះឡើយនៅក្នុងរយៈពេលរាប់ពាន់លានឆ្នាំទៀត៕

February 11, 2022

ទិវានៃក្ដីស្រលាញ់ (១៤ កុម្ភៈ) ជិតមកដល់ ក្រសួងអប់រំចេញសេចក្ដីណែនាំអំពីវិធានការទប់ស្កាត់អំពើមិនគាប់បី

ដោយមានការព្រួយបារម្ភអំពីសកម្មភាពមិនប្រក្រតីក្នុងទិវានៃក្ដីស្រលាញ់ ក្រសួងអប់រំ បានចេញសេចក្ដីណែនាំអំពីវិធានការទប់ស្កាត់នៅតាមគ្រឹះស្ថានសិក្សា។

ថ្ងៃទី ១៤ កុម្ភៈ គឺជាទិវានៃក្ដីស្រលាញ់ ដែលគ្រប់គ្នាអាចយកឱកាសនេះដើម្បីផ្សាយមេត្តា ការគោរពស្រលាញ់ ការដឹងគុណចំពោះលោកអ្នកមានគុណ ដូចជា មាតា បិតា ។ល។

ក៏ប៉ុន្តែ បច្ចុប្បន្ន យុវវ័យមួយចំនួន បានចាត់ទុកទិវានេះថា ជាថ្ងៃបុណ្យសង្សារទៅវិញ ដោយអ្នកខ្លះថែមទាំងឆ្លៀតយកឱកាសនេះដើម្បីធ្វើរឿងមិនគាប់បីដល់ដៃគូជាសង្សារទៀតផង។

ដោយបារម្ភអំពីសកម្មភាពមិនល្អក្នុងទិវានៃក្ដីស្រលាញ់ ១៤ កុម្ភៈ ក្រសួងអប់រំយុវជន និងកីឡា បានចេញសេចក្តីណែនាំ ស្ដីពីវិធានការទប់ស្កាត់សកម្មភាពមិនប្រក្រតីក្នុងទិវានៃក្តីស្រឡាញ់នៅតាមគ្រឹះស្ថានសិក្សាសាធារណៈ និងឯកជន។ ព័ត៌មានលំអិត សូមអានសេចក្ដីណែនាំខាងក្រោម៖

February 11, 2022

(វីដេអូ)-របកគំហើញថ្មី! ត្រីសិប្បនិម្មិតដែលអភិវឌ្ឍពីកោសិកាបេះដូងមនុស្ស គឺជាចំណុចចាប់ផ្ដើមដើម្បីបង្កើតបេះដូងកូនកាត់

(សហរដ្ឋអាម៉េរិក)-ក្រុមអ្នកវិទ្យាសាស្ត្រអភិវឌ្ឍកោសិកាចំនួន ៧៣,០០០ គ្រាប់ដែលយកពីកោសិកាដើមរបស់បេះដូងមនុស្ស ឱ្យទៅជារូបរាងត្រី អាចហែលបានដោយពឹងលើការកន្ទុយដែលបក់ទៅតាមចង្វាក់លោត។

ក្រុមអ្នកវិទ្យាសាស្ត្រនៃសាកលវិទ្យាល័យ Harvard កំពុងរកវិធីបង្កើតបេះដូងសិប្បនិម្មិតអភិវឌ្ឍពីកោសិកាដើមរបស់បេះដូង សម្រាប់ករណីចាំបាច់ ព្រោះតែកង្វះនៃការបរិច្ចាគបេះដូង។ បើទោះជាត្រូវចំណាយពេលយូរអង្វែងទៀតទើបអាចសម្រេចបាន ប៉ុន្តែ បច្ចុប្បន្ន ពួកគេអាចអភិវឌ្ឍបណ្ដាកោសិកាឱ្យទៅជាឧបករណ៍កូនកាត់ជីវសាស្ត្រដែលមានរូបរាងដូចត្រី។

នេះគឺជាឧបករណ៍កូនកាត់ជីវសាស្ត្រស្វ័យប្រវត្តដំបូងដែលធ្វើអំពីកោសិកាបេះដូងដែលបានអភិវឌ្ឍពីបណ្ដាកោសិកាដើមរបស់មនុស្ស។ លទ្ធផលនៃការស្រាវជ្រាវនេះ ត្រូវបានប្រកាសនៅលើទស្សនាវដ្ដី Science កាលពីថ្ងៃទី ១០ កុម្ភៈ។

ឧបករណ៍នេះត្រូវបានគេហៅថា ប្រភេទកូនកាត់ជីវសាស្ត្រ ព្រោះតែវាជាការរួមផ្សំរវាងបណ្ដាកោសិការបស់មនុស្ស និងវត្ថុធាតុមិនមែនជាជីវសាស្ត្រ ដោយដងខ្លួនរបស់វាធ្វើអំពីក្រដាស ចំណែក «អាវពោង» របស់វា ធ្វើអំពីជ័រ។ ឧបករណ៍ថ្មីនេះ មិនមានអ្វីមួយដែលត្រូវបានយកមកពីត្រីពិតនោះទេ។

ចំណុចពិសេសរបស់បេះដូងគឺចង្វាក់លោត ហើយបណ្ដាកោសិការបស់វាក៏ដំណើរការគ្នានេះដែរ។ ក្រុមអ្នកវិទ្យាសាស្ត្របានប្រែក្លាយកោសិកាដើមចំនួន ៧៣,០០០ កោសិកា ឱ្យទៅជាកោសិកាបេះដូង រួចដាក់ពួកវាទៅក្នុងរចនាសម្ព័ន្ធមួយដែលមានរាងដូចត្រី ដោយមានកោសិកាសាច់ដុំចំនួន ២ ស្រទាប់នៅត្រង់សងខាងកន្ទុយ។ កោសិកាសាច់ដុំទាំងនេះ ផ្ទុកប្រូតេអ៊ីនរីទីណា (retinal protein) ដែលមានភាពរសើប ឬរំញោចខ្លាំងជាមួយនឹងពណ៌របស់ពន្លឺផ្សេងៗគ្នា។

ដោយការផ្លាស់ប្ដូរពណ៌របស់ពន្លឺ ក្រុមអ្នកវិទ្យាសាស្ត្របានធ្វើឱ្យកោសិកាសាច់ដុំទាំងសងខាងកន្ទុយ លោតមិនស្របគ្នា ដោយម្ខាងរួញចូល ខណៈម្ខាងទៀតលាចេញ បណ្ដាលឱ្យកន្ទុយរបស់ត្រីសិប្បនិម្មិតនេះ ម្ដងបក់ទៅខាងស្ដាំ និងម្ដងបក់ទៅខាងឆ្វេង។ ចលនានេះរុញច្រានត្រីឱ្យទៅមុខ។ ក្រុមអ្នកវិទ្យាសាស្ត្រក៏បានបញ្ជាក់ថា កោសិកានានាអាចរក្សាចលនានេះរយៈពេល ១០៨ ថ្ងៃ នៅពេលហែលក្នុងធាតុរាវអំបិលដែលសម្បូរគ្លុយកូស។

February 11, 2022

Author: សឿន សំណាង