សឿន សំណាង - La Reine Media

ក្រុមហ៊ុនអ៊ីនធើណិត Opennet ត្រូវបិទជាបណ្ដោះអាសន្ននៅសប្ដាហ៍ក្រោយ ព្រោះមិនទាន់ទូទាត់បំណុលរាប់លានដុល្លារ

ដោយសារមិនទាន់ចូលទៅទូទាត់បំណុលប្រមាណជា ៦.៦ លានដុល្លារអាមេរិក ជូនរដ្ឋ ដូច្នេះ ក្រុមហ៊ុនផ្ដល់សេវាអ៊ីនធឺណិត ឈ្មោះ King Technologies (Opennet) នឹងត្រូវបាន ក្រសួងប្រៃសណីយ៍ និងទូរគមនាគមន៍ ចុះទៅបិទជាបណ្ដោះអាសន្ននៅសប្ដាហ៍ក្រោយ។

Opennet នៅជំពាក់បំណុលរដ្ឋ ជាង ៦ លានដុល្លារអាមេរិក ដែលបានជំពាក់ចាប់តាំងពីឆ្នាំ ២០១៧ ដល់ឆ្នាំ ២០១៩ និងវិភាគទានបន្ថែមចូលមូលនិធិ USO និង CBRD សរុបជាង ១.៨ លានដុល្លារ ដែលមិនបានប្រកាសពីឆ្នាំ ២០១៨ ដល់ឆ្នាំ ២០២០។ នេះបើតាម លោក សូ វិសុទ្ធី ដែលជារដ្ឋលេខាធិការ និងជាអ្នកនាំពាក្យក្រសួងប្រៃសណីយ៍ និងទូរគមនាគមន៍ ដែលបានប្រាប់សារព័ត៌មានក្នុងស្រុកមួយកាលពីម្សិលមិញ។

អ្នកនាំពាក្យរូបនេះថ្លែងថា Opennet មិនបានធ្វើការទូទាត់ប្រាក់បំណុលឱ្យបានសព្វគ្រប់ ដោយបានបង់បំណុលតែ ១.៣ លានដុល្លារ និងនៅជំពាក់ ៦.៦ លានដុល្លារ។ «នៅអាទិត្យក្រោយនេះ ក្រុមការងារក្រសួងនឹងចុះទៅបិទក្រុមហ៊ុនជាបណ្ដោះអាសន្ន» លោក សូ វិសុទ្ធី ប្រាប់ដូច្នេះ។

កាលពីថ្ងៃទី ១០ កុម្ភៈ ២០២២ ក្រសួងប្រៃសណីយ៍ និងទូរគមនាគមន៍ រួមនឹង ក្រសួងសេដ្ឋកិច្ច និងហិរញ្ញវត្ថុ បានចេញលិខិតរួមគ្នាមួយ បង្គាប់ឱ្យក្រុមហ៊ុន King Technologies (Opennet) ចូលមកទូទាត់ប្រាក់បំណុលក្នុងរយៈពេល ៧ ថ្ងៃ ហើយថា នឹងចាត់វិធានការតាមច្បាប់ ក្នុងករណីក្រុមហ៊ុននេះនៅតែគេចវេះមិនព្រមទូទាត់បំណុលជូនរដ្ឋ។

ក្រុមហ៊ុន Opennet គឺជាក្រុមហ៊ុនបុត្រសម្ព័ន្ធមួយរបស់ ក្រុមហ៊ុន វៀតណាម FPT Group ដែលដើមឡើយមានឈ្មោះថា The Corporation for Financing and Promoting Technology (FPT)។ FPT Group មានទីស្នាក់ការកណ្ដាលនៅ រដ្ឋធានីហាណូយ ប្រទេសវៀតណាម។

ក្រុមហ៊ុន Opennet និងក្រុមហ៊ុន Viettel (Metfone) គឺជាដៃគូរកស៊ីក្នុងវិស័យអ៊ីនធើណិត នៅ កម្ពុជា។ Metfone គឺជាក្រុមហ៊ុនបុត្រសម្ព័ន្ធរបស់ Viettel Group ដែលជាក្រុមហ៊ុនរបស់ រដ្ឋវៀតណាម និងគ្រប់គ្រងដោយកងទ័ពវៀតណាម មានទីស្នាក់ការកណ្ដាលនៅ ហាណូយ៕

February 19, 2022

ម៉ាឡេស៊ី កំពុងពិចារណាលើការ «ហាមជប់បារីចំពោះពលរដ្ឋកើតក្រោយឆ្នាំ ២០០៥»

រដ្ឋមន្ត្រីក្រសួងសុខាភិបាលម៉ាឡេស៊ី បានឱ្យដឹងថា ប្រទេសនេះនឹងចេញច្បាប់ហាមជក់ និងរក្សាទុកបណ្ដាផលិតផលបារី ចំពោះពលរដ្ឋដែលកើតក្រោយឆ្នាំ ២០០៥។

«យើងសង្ឃឹមថា សេចក្ដីព្រាងច្បាប់នឹងត្រូវបានអនុម័តនៅក្នុងឆ្នាំនេះ និងបញ្ចប់ជំនាន់ជក់បារី ដោយចាត់វិធានការប្រែក្លាយសកម្មភាពលក់បារី និងបណ្ដាផលិតផលសម្រាប់ជក់ផ្សេងទៀត ចំពោះអ្នកដែលកើតក្រោយឆ្នាំ ២០០៥ ឱ្យទៅជាអំពើខុសច្បាប់» រដ្ឋមន្ត្រីសុខាភិបាល Khairy Jamaluddin បានថ្លែងដូច្នេះក្នុងពិធីប្រកាសទិវាជំងឺមហារីករបស់ ម៉ាឡេស៊ី កាលពីថ្ងៃទី ១៧ កុម្ភៈ ២០២១។

លោក Khairy យល់ថា សេចក្ដីព្រាងច្បាប់នេះ នៅពេលត្រូវបានអនុម័ត នឹងជួយកាត់បន្ថយហានិភ័យកើតជំងឺផ្សេងៗដោយសារការជក់បារី របស់មនុស្សជំនាន់ក្រោយ ព្រោះតែបារី ត្រូវបានចាត់ទុកថា ជាមូលហេតុបណ្ដាលឱ្យកើតជំងឺមហារីក។

«បើសិនអ្នកមានអាយុ ១៧ ឆ្នាំ ហើយសភាម៉ាឡេស៊ី បានអនុម័តសេចក្ដីព្រាងច្បាប់នេះ អ្នកនឹងមិនអាចរកទិញបារីបានទៀតទេ នៅប្រទេសនេះ» លោក Khairy Jamaluddin បញ្ជាក់ដូច្នេះ។

លោករដ្ឋមន្ត្រីជឿថា សេចក្ដីព្រាងនេះនឹងក្លាយជាច្បាប់ដែលមានប្រសិទ្ធភាពក្នុងការទប់ស្កាត់ និងគ្រប់គ្រងបណ្ដាជំងឺដែលមិនឆ្លង ដូចជា ជំងឺមហារីកជាដើម។ ករណីជំងឺមហារីកនៅ ម៉ាឡេស៊ី ឆ្នាំ ២០១២-២០១៦ កើន ១១% ឡើងដល់ ១១៥,២៣៨ ករណី ខណៈដែលតួលេខនេះក្នុងអំឡុង ៥ ឆ្នាំមុននោះ គឺ ១០៣,៥០៧ ករណី។

មហារីកគឺជាមូលហេតុនៃការស្លាប់ក្នុងអត្រាខ្ពស់ដែលត្រូវបានកត់ត្រានៅតាមមន្ទីរពេទ្យឯកជន នៅ ម៉ាឡេស៊ី ស្មើនឹង ៣៤.៩៥% និងឈរលំដាប់ទី ៤ នៅតាមមន្ទីរពេទ្យរដ្ឋ ដោយមាន ១១.៥៦%៕

February 19, 2022

ភាគខាងត្បូងអ៊ុយក្រែន ប្រៀបដូចរំសេវនៅក្បែរអណ្ដាតភ្លើង

ការប៉ះទង្គិចគ្នាដោយអាវុធកំពុងតែកើនឡើងទៅភាគខាងត្បូងនៃ ប្រទេសអ៊ុយក្រែន ដោយមានការបាញ់បន្តក់គ្រាប់ប្លោងជាបន្តបន្ទាប់ ធ្វើឱ្យគេជឿថា តំបន់នេះប្រៀបដូចរំសេវដែលស្ថិតនៅមិនឆ្ងាយពីអណ្ដាតភ្លើង អាចនឹងឆាបឆេះផ្ទុះឡើងហួសពីការគ្រប់គ្រង។

អំពើហិង្សាបានកើនឡើងនៅភាគខាងត្បូងអ៊ុយក្រែន នៅពេលក្រុមផ្ដាច់ខ្លួនដែលស្និទ្ធនឹង រុស្ស៊ី និងអាជ្ញាធររបស់ទីក្រុងកៀវ បានចោទប្រកាន់គ្នាថា បានរំលោភបទឈប់បាញ់នៅតាមបណ្ដោយសមរភូមិរវាងក្រុមទាំងនេះ។ ប្រធានាធិបតីអាម៉េរិក លោក ចូ បៃដិន ថ្ងៃនេះ បានឱ្យដឹងថា លោកជឿថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសម្រេចចិត្តវាយលុក អ៊ុយក្រែន ហើយសង្គ្រាមអាចចាប់ផ្ដើម «នៅប៉ុន្មានថ្ងៃខាងមុខ» បើទោះជា វិមានក្រឹមឡាំង ធ្លាប់អះអាងថា មិនដែលមានបំណងលុកលុយ អ៊ុយក្រែន ក៏ដោយ។

ភាពតានតឹងបានកើនឡើងមួយកម្រិតថែមទៀត បន្ទាប់ពី រុស្ស៊ី បានផ្ញើឯកសារ ១០ ទំព័រ ឱ្យទៅ សហរដ្ឋអាម៉េរិក ដែលព្រមានថា រុស្ស៊ី នឹងប្រើប្រាស់ «វិធានការយោធា-បច្ចេកទេស» បើសិន អាម៉េរិក និងសម្ព័ន្ធមិត្ត មិនបានធានាឱ្យបានស្របច្បាប់នូវសំណើផ្នែកសន្តិសុខរបស់ខ្លួន ក្នុងនោះ ណាតូ ត្រូវតែសន្យាថា នឹងមិនអនុញ្ញាតឱ្យ អ៊ុយក្រែន ចូលជាសមាជិក ក៏ដូចជា ការកាត់បន្ថយការពង្រាយទ័ពនៅ អឺរ៉ុបខាងកើត។

នៅឯ អង្គការសហប្រជាជាតិ រុស្ស៊ី បានបន្តចោទ អ៊ុយក្រែន ថា កំពុងអនុវត្ត «ផែនការប្រល័យពូជសាសន៍» ទៅលើសហគមន៍អ្នកនិយាយភាសារុស្ស៊ី នៅប្រទេសនេះ។ ប៉ុន្តែ ក្រុមប្រទេសលោកខាងលិចបានច្រានចោល និងយល់ថា ទីក្រុងមូស្គូ កំពុងលេចល្បិចដើម្បីការពារសកម្មភាពយោធារបស់ខ្លួន ប្រឆាំង ទីក្រុងកៀវ។

កាលពីថ្ងៃទី ១៧ កុម្ភៈ សាលារៀន ២ កន្លែង ត្រូវរងគ្រាប់កាំភ្លើងត្បាល់ពីក្រុមផ្ដាច់ខ្លួន។ ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី (Volodymyr Zelensky) បានហៅការវាយប្រហារនេះថា ជា «អំពីបង្កហេតុធំ» របស់កងកម្លាំងផ្ដាច់ខ្លួន។ ក៏ប៉ុន្តែ ក្រុមផ្ដាច់ខ្លួន បានបដិសេធ និងចោទត្រលប់មកវិញថា ជាការបង្កើតឡើងរបស់ អាជ្ញាធរអ៊ុយក្រែន ខណៈ រុស្ស៊ី បន្ទរតាមពីក្រោយ។

ក្រៅពីហេតុការណ៍ខាងលើ ក៏នៅមានករណីជាច្រើនផ្សេងទៀតដែលនាំឱ្យភាពតានតឹងនៅ ភាគខាងត្បូងអ៊ុយក្រែន ឡើងកម្ដៅ ក្នុងនោះមានដូចជា ករណីបំផ្ទុះរថយន្តយោធាមួយគ្រឿងរបស់កងកម្លាំងផ្ដាច់ខ្លួន DPR, ការផ្ទុះបំពង់បង្ហូរប្រេង ការចល័តទ័ពមកកាន់ព្រំដែន អ៊ុយក្រែន ពីសំណាក់ រុស្ស៊ី និងការប្រតិកម្មនានារបស់ ណាតូ និង សហរដ្ឋអាម៉េរិក។ល។

February 19, 2022

Startup ធំៗចំនួន ៤ ដែលស្ថិតក្នុងចំណោមក្រុមហ៊ុនដែលមានតម្លៃជាងគេនៅ សហរដ្ឋអាម៉េរិក មាន CEO ជាជនអន្តោប្រវេសន៍

នាយកប្រតិបត្តិរបស់ក្រុមហ៊ុន SpaceX, Stripe, Instacart និង Databricks គឺសុទ្ធតែជាជនអន្តប្រវេសន៍ ក្នុងនោះមានទាំង ជនជាតិអ៊ីរ៉ង់ ផងដែរ។

ក្នុងរយៈពេលប៉ុន្មានឆ្នាំចុងក្រោយនេះ បណ្ដាជនអន្តោប្រវេសន៍កាន់តែមានតួនាទីសំខាន់នៅក្នុងបណ្ដាក្រុមហ៊ុនបច្ចេកវិទ្យាកំពូលៗនៅ សហរដ្ឋអាម៉េរិក។ យោងតាម Crunchbase ក្រុមហ៊ុនបច្ចេកវិទ្យាធំៗ និងមានតម្លៃជាងគេចំនួន ៤ នៅប្រទេសនេះ សុទ្ធតែមានស្ថាបនិក និងនាយកប្រតិបត្តិជាជនអន្តោប្រវេសន៍។

១-ក្រុមហ៊ុន SpaceX

ក្រុមហ៊ុនអវកាសនេះត្រូវបានកំណត់តម្លៃដល់ជាង ១០០ ពាន់លានដុល្លារអាម៉េរិក កាលពីខែតុលា ២០២១។ SpaceX ត្រូវបានបង្កើតឡើងដោយលោក Elon Musk ដែលជាពលរដ្ឋអាម៉េរិក ដើមកំណើតអាហ្វ្រិកខាងត្បូង។ លោក Musk ធ្លាប់បានរៀននៅសាកលវិទ្យាមួយនៃ ប្រទេសកាណាដា មុននឹងបានមកតាំងលំនៅលើទឹកដី សហរដ្ឋអាម៉េរិក។

បច្ចុប្បន្ន លោក Elon Musk គឺជាអ្នកមានទ្រព្យច្រើនជាងគេលំដាប់ទី ១ ក្នុងពិភពលោក ដោយមានទ្រព្យ ២៣៦ ពាន់លានដុល្លារ នេះបើតាម Bloomberg Billionaires Index។ ទ្រព្យភាគច្រើនរបស់លោក មិនមែនបានមកពី SpaceX នោះទេ ប៉ុន្តែ បានមកពីក្រុមហ៊ុនផលិតរថយន្តអគ្គិសនី Tesla។

២-ក្រុមហ៊ុន Stripe

ក្រុមហ៊ុនសេវាកម្មទូទាត់ប្រាក់តាមអនឡាញ Stripe ត្រូវបានបង្កើតឡើងដោយបងប្អូន ២ នាក់ គឺ Patrick និង John Collison កាលពីឆ្នាំ ២០១០។ Patrick បច្ចុប្បន្នគឺជា នាយកប្រតិបត្តិ ខណៈដែល John កាន់តំណែងជាប្រធានក្រុមហ៊ុន។

ពួកគេបានចាប់កំណើត និងធំឡើងនៅតំបន់ជនបទក្នុងស្រុក Tipperary នៃ ប្រទេសអៀឡង់។ លោក Patrick ធ្លាប់សិក្សាផ្នែកគណិតនៅវិទ្យាស្ថានបច្ចេកវិទ្យា Massachusetts សហរដ្ឋអាម៉េរិក។ ២ ឆ្នាំក្រោយ John ក៏បានប្រឡងជាប់ចូលសាកលវិទ្យាល័យ Havard។

ក្នុងពេលនៅសិក្សា ពួកគេបានក្លាយជាសេដ្ឋីទៅហើយ ដោយសារគម្រោងអាជីវកម្មដំបូងដែលមានឈ្មោះថា Auctomatic។ ក្រុមហ៊ុននេះ ក្រោយមកក៏ត្រូវបានលក់ក្នុងតម្លៃ ៥ លានដុល្លារ កាលពីឆ្នាំ ២០០។ បន្ទាប់មក ពួកគេក៏បានបង្កើតក្រុមហ៊ុន Stripe។ ដើម្បីជាការវិនិយោគឱ្យអស់ពីកម្លាំងកាយចិត្តទៅលើ Stripe ពួកគេក៏បានសម្រេចចិត្តបោះបង់ការសិក្សានៅសាកលវិទ្យាល័យ។

បច្ចុប្បន្ននេះ ក្រុមហ៊ុន Stripe ត្រូវបានកំណត់តម្លៃឡើងដល់ប្រមាណ ៩៥ ពាន់លានដុល្លារអាម៉េរិក។

៣-ក្រុមហ៊ុន Instacart

នាង Fidji Simo (ស្ដាំបង្អស់) កាលពីនៅ Facebook

Fidji Simo ដែលជាអតីតប្រធានផ្នែកមួយរូបរបស់ Facebook បានចាកចេញពីក្រុមហ៊ុននេះកាលពីខែកក្កដា ២០២១ និងបានក្លាយជា CEO របស់ក្រុមហ៊ុនដឹកជញ្ជូនទំនិញជាគ្រឿងទេស Instacart ចាប់ពីខែសីហា ឆ្នាំដដែល។ Simon គឺជាស្ត្រីអ្នកជំនួញជនជាតិបារាំង។

ចំណែកស្ថាបនិក និងជាអតីត CEO របស់ Instacart ឈ្មោះ Apoorva Mehta កើតនៅ ឥណ្ឌា ក្រោយមកក៏ទៅរស់នៅក្នុង ប្រទេសលីប៊ី និង កាណាដា។ Mehta បានសិក្សាថ្នាក់វិស្វករនៅសាកលវិទ្យាល័យ Waterloo និងធ្លាប់ជាវិស្វករផ្នែករចនាប្រចាំក្រុមហ៊ុន Blackberry និង Qualcomm។ គាត់ក៏ធ្លាប់ធ្វើការឱ្យ Amazon ក្នុងតំណែងជាវិស្វករប្រព័ន្ធផ្គត់ផ្គង់ ដែលបានជួយអភិវឌ្ឍប្រព័ន្ធទទួល និងចាត់ការលើការបញ្ជាទិញ។

ថ្មីៗនេះ ក្រុមហ៊ុនដឹកជញ្ជូនទំនិញគ្រឿងទេស Instacart ត្រូវបានកំណត់តម្លៃឡើងដល់ ៣៩ ពាន់លានដុល្លារអាម៉េរិក។

៤-ក្រុមហ៊ុន Databricks

លោក Ali Ghodsi មានដើមកំណើតជា ជនជាតិអ៊ីរ៉ង់

ស្ថាបនិក និងជា CEO របស់ Databricks ឈ្មោះ Ali Ghodsi មានដើមកំណើតជា ជនជាតិអ៊ីរ៉ង់។ គាត់បានទៅរស់នៅក្នុងទឹកដីនៃ ប្រទេសស្វ៊ីស តាំងពីនៅតូច។ បន្ទាប់ពីបានបញ្ចប់ការសិក្សាថ្នាក់បណ្ឌិតនៅ ប្រទេសស្វ៊ីស លោក Ali ក៏បានមកកាន់ សហរដ្ឋអាម៉េរិក ទៅតាមការអញ្ជើញឱ្យមកបង្រៀននៅ សាកលវិទ្យាល័យ Berkeley។

ក្រុមហ៊ុន Databricks ត្រូវបានបង្កើតឡើងកាលពីឆ្នាំ ២០១៣ និងមានកម្មវិធីកុំព្យូទ័រដែលជួយឱ្យក្រុមហ៊ុននានា អាចចាត់ការបណ្ដុំទិន្នន័យធំៗ និងត្រៀមសម្រាប់ការវិភាគ។ ក្រុមហ៊ុននេះត្រូវបានកំណត់តម្លៃប្រហែល ៣៨ ពាន់លានដុល្លារអាម៉េរិក។ បណ្ដាក្រុមហ៊ុនដែលវិនិយោគទៅលើ Startup នេះ រួមមានទាំង Microsoft, Amazon, Alphabet និង Salesforce ផងដែរ។

យោងតាមលទ្ធផលនៃការស្រាវជ្រាវរបស់ Forbes បច្ចុប្បន្នលោក Ali Ghodsi មានទ្រព្យប្រមាណ ១.៨ ពាន់លានដុល្លារអាម៉េរិក៕

February 18, 2022

(វីដេអូ)-សារមន្ទីរដែលមនុស្សអាចមើលឃើញអនាគតរបស់ពិភពលោកឆ្នាំ ២០៧១

សារមន្ទីរស្ដីពីអនាគត (Museum of the Future) នៅ ទីក្រុងឌូបៃ មានសាលតាំងពិព័រណ៍ដែលមានលក្ខណៈជាពិភពលោកនាពេលអនាគត។

ស្ថិតនៅក្បែរ Jumeirah Emirates Towers សារមន្ទីរដែលតាំងបង្ហាញសិល្បៈតាមរយៈបច្ចេកវិទ្យា ដែលមានឈ្មោះថា Museum of the Future របស់ ឌូបៃ អនុញ្ញាតឱ្យអ្នកចូលទស្សនាមើលឃើញនូវអនាគតនៃសុខភាព លំហ វិញ្ញាណ បច្ចេកទេសជីវសាស្ត្រ និងធម្មជាតិ។ ជាក់ស្ដែង សារមន្ទីរនេះនឹងបង្ហាញគ្រប់គ្នាអំពីពិភពលោកឆ្នាំ ២០៧១។

យោងតាម The National អគារកម្ពស់ ៧៨ ម៉ែត្រ ត្រូវបានទស្សនាវដ្ដី National Geographic ចាត់ថាជាសារមន្ទីរមួយក្នុងចំណោម ១៤ ដែលស្អាតបំផុតក្នុងពិភពលោក។ សារមន្ទីរនេះមាន ៧ ជាន់ ក្នុងនោះ មាន ៥ ជាន់ជាសាលពិព័រណ៍សំខាន់។ ជាន់នីមួយៗ មានលក្ខណៈដូចទៅនឹងទីតាំងថតភាពយន្តដែលមកពីអនាគត។

ការតុបតែងខាងក្នុង និងខាងក្រៅរបស់សារមន្ទីរ ក៏បង្ហាញអំពីការចូលរួមចំណែកនៃវប្បធម៌របស់ អារ៉ាប់ នៅក្នុងវិស័យវិទ្យាសាស្ត្រ ស្រាវជ្រាវ និងគណិតវិទ្យាផងដែរ។

តាមរយៈបច្ចេកវិទ្យា ភ្ញៀវក៏អាចស្វែងយល់តំបន់អភិរក្ស ដែលជាផ្នែកមួយរបស់ព្រឹត្តិការណ៍ពិព័រណ៍ស្ដីពីសុខភាព។ សត្វមានជីវិតទាំងឡាយដែលមាននៅក្នុង ព្រៃអាម៉ាហ្សូន ក៏ត្រូវបានលាតត្រដាងនៅទីនេះ។ សម្រាប់កុមារ សារមន្ទីរនេះក៏មានសាលដែលអាចឱ្យពួកគេស្វែងយល់ និងរៀនសូត្រតាមផងដែរ។

ផ្នែកខាងក្រៅរបស់អគារសារមន្ទីរ ត្រូវបានរចនាតាមរូបរាងរបស់ព្រះចន្ទ អនុញ្ញាតឱ្យភ្ញៀវទទួលបានអារម្មណ៍ដូចទៅនឹងការគយគន់ព្រះចន្ទពីស្ថានីយអវកាសដែលមានកម្ពស់ ៦០០ គីឡូម៉ែត្រ ពីផែនដី។

សម្រាប់សំបុត្រចូលទស្សនាសារមន្ទីរនេះវិញ មានតម្លៃ ៣៩.៥ ដុល្លារអាម៉េរិក។ សារមន្ទីរនេះនឹងបើកទ្វារទទួលភ្ញៀវ ចាប់ពីថ្ងៃទី ២២ កុម្ភៈ ២០២២ ខាងមុខ។ កុមារអាយុក្រោម ៣ ឆ្នាំ និងជនពិការ រួមនឹងពលរដ្ឋរបស់ អារ៉ាប់រួម ដែលមានអាយុចាប់ពី ៦០ ឆ្នាំ នឹងត្រូវបានអនុញ្ញាតឱ្យចូលទស្សនាដោយមិនគិតថ្លៃ៕

February 18, 2022

កូវីដ-១៩! កម្ពុជា រកឃើញអ្នកឆ្លងថ្មី ៤១៤ នាក់ទៀត ក្នុងអំឡុងថ្ងៃទី ១៧ ខែកុម្ភៈ ឆ្នាំ ២០២២

February 18, 2022

Facebook ធ្លាក់ពីតារាងចំណាត់ថ្នាក់ស្ដីពី «កំពូលក្រុមហ៊ុនទាំង ១០ ដែលមានតម្លៃជាងគេក្នុងពិភពលោក»

តម្លៃភាគហ៊ុនដាំក្បាលចុះនៅក្នុងប៉ុន្មានសប្ដាហ៍កន្លងទៅនេះ បានធ្វើឱ្យមូលធនទីផ្សាររបស់ Meta Platforms ដែលជាក្រុមហ៊ុនមេរបស់ Facebook បច្ចុប្បន្ននៅសល់តែ ៥៦៥ ពាន់លានដុល្លារអាម៉េរិក។

តួលេខរបស់ Bloomberg បានបង្ហាញថា ជាមួយនឹងមូលធនទីផ្សារដែលមានតម្លៃ ៥៦៥ ពាន់លានដុល្លារ Meta បច្ចុប្បន្នគឺជាក្រុមហ៊ុនធំជាងគេលំដាប់ទី ១១ នៅក្នុងពិភពលោក បន្ទាប់ពី Tencent Holdings (ចិន)។ កាលពីឆ្នាំ ២០២១ Meta Plafroms ធ្លាប់ឈរលំដាប់ថ្នាក់ទី ៦ ដោយមានតម្លៃជាង ១,០០០ ពាន់លាន (១ ទ្រីលាន) ដុល្លារអាម៉េរិក។

ភាគហ៊ុននេះធ្លាក់ចុះខ្លាំងក្នុងរយៈពេល ២ សប្ដាហ៍កន្លង ដោយសារតែរបាយការណ៍ហិរញ្ញវត្ថុត្រីមាសទី ៤ ឆ្នាំ ២០២១ បង្ហាញថា កំណើននៃចំនួនអ្នកប្រើប្រាស់នៅទ្រឹង ចំណែកប្រាក់ចំណេញក៏ថយចុះ។

យោងតាម Bloomberg ក្រុមហ៊ុនដែលបានចូលមកកាន់ចំណាត់ថ្នាក់ទី ៦ ក្នុងចំណោមក្រុមហ៊ុនដែលមានមូលធនទីផ្សារធំជាងទាំង ១០ របស់ពិភពលោក ជំនួស Meta គឺ ក្រុមហ៊ុនផលិតរថយន្តអគ្គិសនី Tesla ដោយមានតម្លៃ ៩០៦ ពាន់លានដុល្លារ។ ចំណែកក្រុមហ៊ុនដែលមានតម្លៃជាងគេក្នុងពិភពលោក នៅតែជា Apple ដោយមាន ២,៨០០ ពាន់លានដុល្លារ។ តាមពីក្រោយ Apple គឺ Microsoft និងក្រុមហ៊ុនរដ្ឋ Aramco របស់ ប្រទេសអារ៉ាប៊ីសាអូឌីត៕

February 18, 2022

ជំងឺផ្ដាសាយដ៏អាថ៌កំបាំងនៅ រុស្ស៊ី កាលពី ១៣០ ឆ្នាំមុន អាចបណ្ដាលមកពី វីរុសកូរ៉ូណា

ក្រុមអ្នកវិទ្យាសាស្ត្រកំពុងស្វែងរកប្រភពនៃជំងឺផ្ដាសាយដែលធ្លាប់រាតត្បាតនៅចុងសតវត្សរ៍ទី ១៩ ហើយលទ្ធផលដែលទទួលបាន អាចជួយឱ្យគេព្យាករបាននូវទីបញ្ចប់របស់ កូវីដ-១៩។

ឆ្នាំ ១៨៨៩ ជំងឺផ្លូវដង្ហើមដ៏អាថ៌កំបាំងមួយបានបង្ហាញវត្តមាននៅ ប្រទេសរុស្ស៊ី និងឆ្លងរាលដាលពាសពេញពិភពលោក ដោយមានរលកនៃការឆ្លងធំៗចំនួន ៣ ក្នុងរយៈពេលច្រើនឆ្នាំ។ បច្ចុប្បន្ន អ្នកវិទ្យាសាស្ត្រមួយចំនួនសង្ស័យថា ជំងឺរាតត្បាតដែលមានរហ័សនាមថា «ផ្ដាសាយរុស្ស៊ី» នោះ អាចបង្កឡើងដោយ វីរុសកូរ៉ូណា មួយប្រភេទ ដែលដូចទៅនឹង វីរុស nCoV (កូវីដ-១៩)។

មានចំណុចដូចគ្នាមួយរវាងជំងឺរាតត្បាតសកលទាំងពីរនេះ។ នៅក្នុងជំងឺរាតត្បាត «ផ្ដាសាយរុស្ស៊ី» បណ្ដាសាលារៀន និងកន្លែងធ្វើការ ត្រូវបានបិទទ្វារ ដោយសារតែមានករណីឆ្លងច្រើនពេក។ អ្នកមានជំងឺ «ផ្ដាសាយរុស្ស៊ី» តែងតែបាត់បង់ជីវ្ហាវិញ្ញាញ (រសជាតិ) និង ឃានវិញ្ញាញ (ក្លិន) និងមនុស្សមួយចំនួនត្រូវឆ្លងកាត់ផលប៉ះពាល់ដែលបន្សល់ទុកច្រើនខែ។ «ផ្ដាសាយរុស្ស៊ី» បានសម្លាប់មនុស្សវ័យចំណាស់ច្រើនជាងកុមារ ខុសពី វីរុសផ្ដាសាយធម្មតា ដែលបង្កគ្រោះថ្នាក់ដល់មនុស្សគ្រប់វ័យ។ នេះបើតាមការកត់ត្រាក្នុងប្រវត្តិសាស្ត្រ ដែលរួមមានទាំងទិន្នន័យរបស់រដ្ឋាភិបាល ទស្សនាវដ្ដីវិទ្យាសាស្ត្រ និងសារព័ត៌មាន។

បើទោះជាចំណុចពិសេសនៃ «ផ្ដាសាយរុស្ស៊ី» ដូចខ្លាំងទៅនឹង កូវីដ-១៩ ប៉ុន្តែ សម្មតិកម្មដែលថា «ផ្ដាសាយរុស្ស៊ី» កើតឡើងដោយសារ វីរុសកូរ៉ូណា មួយប្រភេទ ក៏នៅតែមានលក្ខណៈជាការសន្និដ្ឋាន។ នេះបើតាម Peter Palese សាស្ត្រាចារ្យផ្នែកវេជ្ជសាស្ត្រ នៅសាកលវិទ្យា Mount Sinai នាទីក្រុង New York សហរដ្ឋអាម៉េរិក។

វេជ្ជបណ្ឌិត Jeffery Taubenbeerger ប្រធានផ្នែកវីរុសសាស្ត្រ ប្រចាំវិទ្យាស្ថានជាតិប្រតិកម្ម និងជំងឺឆ្លងរបស់ អាម៉េរិក រួមនឹង John Oxford ដែលជាសាស្ត្រាចារ្យផ្នែក វីរុសសាស្ត្រ នៅសាកលវិទ្យាល័យ Queen Mary នៃ ប្រទេសអង់គ្លេស កំពុងស្វែងរកភ័ស្ដុតាងស្ដីពីទំនាក់ទំនងរវាងជំងឺរាតត្បាតទាំងពីរ គឺ កូវីដ-១៩ និង ផ្ដាសាយរុស្ស៊ី ដោយប្រើប្រាស់ទិន្នន័យដែលបានបន្សល់ទុកតាំងពីឆ្នាំ ១៩១៨។

បណ្ឌិត Scott Podolsky សាស្ត្រាចារ្យនៃសាកលវិទ្យាល័យ Harvard និង Dominic W. Hall ដែលជាអ្នកគ្រប់គ្រងសារមន្ទីរផ្នែកវះកាត់ Warren នៅសាកលវិទ្យាល័យ Harvard ក៏ស្វែងរកសំណាកម៉ូលិគុលសួត ដែលត្រូវបានរក្សាទុកនៅក្នុងអំឡុងពេលដូចគ្នានេះ។

បើសិនជា ហ្សែន របស់ វីរុស ដែលបង្កជំងឺផ្ដាសាយរុស្ស៊ី បង្ហាញខ្លួននៅក្នុង ម៉ូលិគុល របស់សួត នោះវានឹងអាចបង្ហើបឱ្យដឹងអំពីទីបញ្ចប់ដែលកើតឡើងដោយរបៀបណា។ បើសិនជំងឺផ្ដាសាយកាលពីចុងសតវត្សរ៍ទី ១៩ កើតឡើងដោយសារ វីរុសកូរ៉ូណា មួយប្រភេទ ក្រុមអ្នកវិទ្យាសាស្ត្រយល់ថា វាអាចនៅតែមានវត្តមានក្រោមទម្រង់ជា វីរុស មួយ ក្នុងចំណោម វីរុសកូរ៉ូណា ចំនួន ៤ ប្រភេទ ដែលបង្កជំងឺផ្ដាសាយធម្មតា ជាជាងជំងឺឆ្លងធ្ងន់ធ្ងរ៕

February 18, 2022

ការប្ដូរឈ្មោះរាជធានីរបស់ ប្រទេសថៃ ត្រូវបានក្រុមមន្ត្រីពន្យល់បញ្ជាក់

សារព័ត៌មាននៅ ប្រទេសថៃ បានរាយការណ៍ថា រាជធានីបាងកក ត្រូវប្ដូរឈ្មោះទៅជា ក្រុងទេពមហានគរ ប៉ុន្តែ ក្រុមមន្ត្រីឱ្យដឹងថា ការផ្លាស់ប្ដូរនេះគ្រាន់តែទាក់ទងទៅនឹងវណ្ណយុត្តិនៅក្នុងឃ្លាតែប៉ុណ្ណោះ។

Bangkok Post និងបណ្ដាទំព័រសារព័ត៌មានជាច្រើនទៀតនៅ ប្រទេសថៃ កាលពីថ្ងៃទី ១៦ កុម្ភៈ បានចេញផ្សាយថា ប្រទេសនេះនឹងប្ដូរឈ្មោះផ្លូវការរបស់រាជធានីបាងកក ទៅជា ក្រុងទេពមហានគរ (Krung Thep Maha Nakhon) ប៉ុន្តែ ឈ្មោះ បាងកក នៅតែត្រូវបានទទួលស្គាល់។

ដំណឹងខាងលើនេះ ធ្វើឱ្យអ្នកលេងបណ្ដាញសង្គមមានការភ្ញាក់ផ្អើល ក្នុងនោះអ្នកខ្លះមិនដឹងថា គួរតែហៅរាជធានីរបស់ ថៃ ថា បាងកក ដែលជាឈ្មោះត្រូវបានស្គាល់តាំងពីយូរយារមកហើយ ឬឈ្មោះផ្លូវការថ្មី ក្រុងទេពមហានគរ ដែលបង្កការលំបាកក្នុងការចងចាំ។

នៅចំពោះមុខភាពច្របូកច្របល់លើបណ្ដាញសង្គម អ្នកនាំពាក្យរងរបស់រាជរដ្ឋាភិបាលថៃ Rachada Dhnadirek កាលពីថ្ងៃទី ១៧ កុម្ភៈ បានបកស្រាយថា ក្រុងទេពមហានគរ ត្រូវបានដាក់ជាឈ្មោះផ្លូវការរបស់រាជធានី តាំងពីឆ្នាំ ២០០១ និងមិនមានការផ្លាស់ប្ដូរឈ្មោះនោះទេ លើកលែងតែវិធីសរសេរវណ្ណយុត្តនៅក្នុងឃ្លា។

«ចាប់ពីឆ្នាំ ២០០១ យើងប្រើប្រាស់ការសរសេរ ‘ក្រុងទេពមហានគរ; បាងកក’ ដោយមានសញ្ញាចុចក្បៀសនៅកណ្ដាល» Rachada Dhnadirek ពន្យល់។ «ប៉ុន្តែ បច្ចុប្បន្ន វិធីសរសេរនឹងត្រូវប្ដូរទៅជា ‘ក្រុងទេពមហានគរ (បាងកក)’» ដោយមានសញ្ញាវង់ក្រចក»។

ចំណែកនៅលើទំព័រ Facebook របស់ខ្លួន ការិយាល័យព្រះបរមរាជវាំង (ORST) បានឱ្យដឹងថា ប្រជាជនអាចប្រើប្រាស់ឈ្មោះទាំងពីរនេះបាន គឺ ក្រុងទេពមហានគរ និង បាងកក។

កាលពីថ្ងៃទី ១៥ កុម្ភៈ គណៈរដ្ឋមន្ត្រីថៃ បានអនុម័តកំណែទម្រង់នេះ ប៉ុន្តែ ការផ្លាស់ប្ដូរនេះនឹងមិនទាន់មានសុពលភាព រហូតដល់ពេលត្រូវបានគណៈកម្មការតាមដានខ្លឹមសារច្បាប់ ធ្វើការត្រួតពិនិត្យ។

ក្រុងទេពមហានគរ មានន័យថា «ទីក្រុងធំរបស់ពពួកទេវតា» ដែលជាពាក្យកាត់នៃពិធីបុណ្យមួយដែលមានឈ្មោះថា «Krung Thep Mahankhon Amon Rattanakosin Mahinthara Ayuthaya Mahadilok Phop Noppharat Ratchathani Burirom Udomratchniwet Mahasathan Amon Piman Awatan Sathit Sakkathattiya Witsanukam Prasit»៕

February 18, 2022

អ្នកជួញដូរប្រាក់ឌីជីថល គួរប្រយ័ត្ន! វេជ្ជបណ្ឌិតម្នាក់ បាត់បង់ Bitcoin តម្លៃជាង ១ សែនដុល្លារអាម៉េរិក ព្រោះតែត្រូវ bot ឆបោក

កាលពីខែមុន វេជ្ជបណ្ឌិត Anders Apgar និងគ្រួសារ បានទៅទទួលទានអាហារពេលយប់នៅក្នុងភោជនីយដ្ឋានមួយ ស្រាប់តែទូរស័ព្ទរបស់គាត់រោទ៍ឡើងជាបន្តបន្ទាប់ ហើយក្រោយពីបានធ្វើតាមការណែនាំរបស់ខ្សែទូរស័ព្ទម្ខាងទៀត វេជ្ជបណ្ឌិតរូបនេះ ក៏បាត់បង់ប្រាក់ Bitcoin ដែលមានតម្លៃជាង ១ សែនដុល្លារ។

ដំបូងឡើយ Apgar យល់ថា ការហៅទូរស័ព្ទនេះ គឺដូចទៅនឹងការហៅស្វ័យប្រវត្ត ទើបមិនបានចាប់អារម្មណ៍។ ការហៅទូរស័ព្ទលើកបន្ទាប់ក៏ត្រូវភរិយារបស់លោកលើកទទួល។

«ពេលប្រពន្ធខ្ញុំលើកទូរស័ព្ទ ក៏មានសារប្រកាសថា គណនីរបស់អ្នកកំពុងជួបគ្រោះថ្នាក់» លោក Apgar រៀបរាប់។ គាត់យកទូរស័ព្ទពីប្រពន្ធមកស្ដាប់ដោយផ្ទាល់ ប៉ុន្តែ នោះក៏ជាពេលដែលគ្រួសារនេះចាប់ផ្ដើមត្រូវរន្ធត់ជាទីបំផុត។

ប្ដីប្រពន្ធ Apgar សុទ្ធតែជាវេជ្ជបណ្ឌិតនៅក្នុងមន្ទីរពេទ្យមួយក្នុងរដ្ឋ Maryland (សហរដ្ឋអាម៉េរិក)។ អ្នកទាំងពីរបានចាប់ផ្ដើមវិនិយោគទៅលើទីផ្សាររូបិយវត្ថុឌីជីថល តាំងពីប៉ុន្មានខែមុន។ ខែធ្នូ ២០២១ គណនីរបស់បុរសជាប្ដី កើនដល់ ១០៦,០០០ ដុល្លារ ដែលភាគច្រើនគឺដោយសារ Bitcoin។ ដូចទៅនឹងពលរដ្ឋអាម៉េរិក រាប់លាននាក់ផ្សេងទៀត ពួកគេក៏ជួញដូរ និងរក្សាទុកកាក់ Bitcoin របស់ខ្លួននៅក្នុងផ្សារ Coinbase។

នៅពេលលោក Apgar ស្ដាប់ទូរស័ព្ទ សំឡេងស្ត្រីម្នាក់បាននិយាយថា៖ «ស្វាគមន៍អ្នកមកកាន់ខ្សែទូរស័ព្ទការពារសុវត្ថិភាពបន្ទាន់របស់ Coinbase។ យើងរកឃើញថា មានសកម្មភាពខុសច្បាប់កើតឡើងដោយសារតែការព្យាយាមចូលក្នុងគណនីរបស់អ្នកដោយមិនបានសម្រេច ពីអាសយដ្ឋាន IP នៅ កាណាដា។ បើសិនមិនមែនជាអ្នក សូមចុចលេខ ១ ដើម្បីបញ្ចប់ដំណើរការនៃការការពារ និងស្ដារគណនី»។ ភ្លាមនោះ Apgar ក៏ចុចលេខ ១ ដោយមិនបានសង្ស័យអ្វីទាំងអស់។

២ នាទីក្រោយមក គណនីរបស់វេជ្ជបណ្ឌិត Apgar ក៏ត្រូវបានបិទ ហើយរហូតដល់បច្ចុប្បន្ន នៅតែមិនអាចយកមកវិញបាន។ លោក Apgar បញ្ជាក់ថា លោកបានបាត់បង់ប្រាក់ Bitcoin ទាំងអស់ដែលមាននៅក្នុងគណនី។

យោងតាមអ្នកជំនាញផ្នែកសន្តិសុខអ៊ីនធើណិត លោក Apgar ត្រូវបានគេឆបោកដោយប្រើប្រាស់កម្មវិធីបញ្ជាក់លេខកូដត្រួត ២ ជាន់ ឈ្មោះ ២FA។ ២FA គឺជាវិធីការពារសន្តិសុខនៅលើអ៊ីនធើណិត ដែលត្រូវគេប្រើប្រាស់ច្រើននៅក្នុងការជួញដូរនៅធនាគារ ផ្សាររូបិយវត្ថុឌីជីថល បណ្ដាញសង្គម និង អ៊ីមេល។ល។ វាត្រូវបានវាយតម្លៃថា អាចការពារគណនីបានក្នុងកម្រិតខ្ពស់ ដោយការបញ្ជាក់អំពីលេខសម្ងាត់ប្រើម្ដងចោល (OTP) ដែលផ្ញើមកទូរស័ព្ទ ទន្ទឹមនឹងលេខសម្ងាត់គោល។

ក៏ប៉ុន្តែ OTP ក៏កំពុងក្លាយជាគោលដៅដែលក្រុមចោរអ៊ីនធើណិតប្រើប្រាស់ដើម្បីឆបោកយកប្រាក់ពីអ្នកប្រើប្រាស់ផងដែរ។ មិនត្រឹមតែធ្វើការហៅតាមទូរស័ព្ទ ឬផ្ញើសារធម្មតានោះទេ ប៉ុន្តែ ពួកហែកឃើ ថែមទាំងឆបោកយកប្រាក់ឌីជីថល ដោយប្រើកម្មវិធីណែនាំស្វ័យប្រវត្ត bot ទៀតផង៕

February 17, 2022

Author: សឿន សំណាង