សម្រាប់ប្រេងសាំងធម្មតា ក្រសួងសម្រេចឱ្យលក់ក្នុងតម្លៃ ៥,២៥០ រៀល/លីត្រ ខណៈប្រេងម៉ាស៊ូត ត្រូវលក់ក្នុងតម្លៃ ៥.៣០០ រៀល/លីត្រ។
ការសម្រេចនេះត្រូវបានអនុវត្តចាប់ពីថ្ងៃទី ១ ដល់ថ្ងៃទី ១០ ខែមេសា ឆ្នាំ ២០២២។ ព័ត៌មានលម្អិត សូមអានសេចក្ដីជូនដំណឹងខាងក្រោម៖
ប្រធានាធិបតីអ៊ុយក្រែន លោក ហ្សេឡែនស្គី បានកាត់តំណែងរបស់មន្ត្រីសន្តិសុខពីររូប ដែលត្រូវបានចោទប្រកាន់ថា មានសកម្មភាពក្បត់ និងរំលោភលើពាក្យសម្បថដែលថា ស្មោះត្រង់នឹង អ៊ុយក្រែន។
«ថ្ងៃនេះ ការសម្រេចចិត្តមួយទៀតត្រូវបានធ្វើឡើងទាក់ទងនឹងពួកក្បត់។ ពេលនេះ ខ្ញុំមិនមានពេលដើម្បីទប់ទល់នឹងពួកក្បត់ទាំងអស់ ប៉ុន្តែ ពួកវានឹងត្រូវបានដាក់ទោសជាបន្តបន្ទាប់» ប្រធានាធិបតី វ៉ូឡូឌីមៀ ហ្សេឡែនស្គី កាលពីថ្ងៃទី ៣១ មីនា ឱ្យដឹងដូច្នេះ ទាក់ទងនឹងការសម្រេចកាត់តំណែងមន្ត្រីសន្តិសុខជាន់ខ្ពស់ពីររូបរបស់ប្រទេសអ៊ុយក្រែន។
មន្ត្រីដែលត្រូវបានទម្លាក់ពីតំណែងខាងលើរួមមាន លោក Naumov Olehovych ប្រធាននាយកដ្ឋានសន្តិសុខផ្ទៃក្នុង នៃ អគ្គនាយកដ្ឋានសន្តិសុខជាតិអ៊ុយក្រែន (SBU) និងលោក Kryvoruchko Oleksandrovych អតីតប្រធាននាយកដ្ឋានសន្តិសុខខេត្ត Kherson។
ប្រធានាធិបតីអ៊ុយក្រែន មិនបានលើកឡើងច្បាស់អំពីសកម្មភាពដែលលោកហៅថា «អំពើក្បត់» របស់មន្ត្រីទាំងពីររូបនេះទេ។
រុស្ស៊ី បានបើកការឈ្លានពានចូលទឹកដីរបស់ អ៊ុយក្រែន កាលពីថ្ងៃទី ២៤ កុម្ភៈ ២០២២ ដើម្បី បំបាត់ការពង្រីកកម្លាំងយោធារបស់ អ៊ុយក្រែន។ ក្រោយការប្រយុទ្ធគ្នារយៈពេល ៣៥ ថ្ងៃ រុស្ស៊ី បានដកទ័ពចេញពីរោងចក្រ Chernobyl ហើយប្រគល់មក អ៊ុយក្រែន វិញ។
មន្ត្រីតួកគី ឱ្យដឹងថា រដ្ឋមន្ត្រីការបរទេសរបស់ រុស្ស៊ី និង អ៊ុយក្រែន អាចនឹងជួបចរចាក្នុងរង្វង់ ១ ឬ ២ សប្ដាហ៍ខាងមុខ ដើម្បីជំរុញឱ្យមានការបញ្ចប់សង្គ្រាម។
កាស Dyson Zone មានរូបរាងចម្លែក ដែលជាការរួមផ្សំរវាងកាសបំបាត់សំឡេងរំខាន និងម៉ាស៊ីនបន្សុទ្ធខ្យល់ខ្នាតល្អិត។
តាមគម្រោង Dyson Zone នឹងត្រូវបានដាក់លក់ក្នុងឆ្នាំនេះ ជាមួយនឹងតម្លៃ ៥០០ ដុល្លារ។ ប្រព័ន្ធបន្សុទ្ធខ្យល់ខ្នាតល្អិតរបស់ Dyson Zone នឹងចម្រាញ់ចោលធូលី ក៏ដូចជាសារធាតុអាក្រក់ ហើយបាញ់ខ្យល់ដែលបន្សុទ្ធរួច ចូលទៅក្បែរច្រមុះ ដើម្បីឱ្យអ្នកប្រើប្រាស់ដកដង្ហើមចូល។
ចំណុចពិសេសរបស់ Dyson Zone នោះគឺ វាមានបន្ទះបាំងមុខដែលមិនប៉ះទៅនឹងផ្ទៃមុខ ឬមាត់ មិនដូចទៅនឹងម៉ាស ប៉ុន្តែ វាស្ថិតនៅខាងមុខ ដោយទុកចន្លោះមួយដើម្បីបង្កើតបានជាបណ្ដុំខ្យល់បរិសុទ្ធសម្រាប់អ្នកប្រើប្រាស់។ Dyson Zone ក៏ត្រូវបានបំពាក់ឧបករណ៍នានាដើម្បីប្រែក្លាយបន្ទះបាំងមុខ ឱ្យទៅជាម៉ាស ក្នុងករណីចាំបាច់។
របាំងមុខត្រូវបានភ្ជាប់ទៅនឹងកាសដោយប្រើប្រាស់មេដែក អនុញ្ញាតឱ្យអ្នកប្រើប្រាស់ដោះចេញនៅពេលចង់ប្រើតែកាស ឬក្រឡាស់ចុះដើម្បីនិយាយគ្នា។ ប្រព័ន្ធបន្សុទ្ធខ្យល់នេះមានល្បឿនចំនួន ៤ កម្រិតសម្រាប់ជ្រើសរើស ដើម្បីឱ្យសមស្របនឹងចង្វាក់ដង្ហើម រួមមាន កម្រិតយឺត មធ្យម លឿន នឹងស្វ័យប្រវត្ត។
ឧបករណ៍ខាងលើនេះក៏បំពាក់ប្រព័ន្ធបន្សុទ្ធខ្យល់ចំនួន ២ សម្រាប់កាស ដែលអាចបន្សុទ្ធធូលី មេរោគ និងកាបូន ប៉ុន្តែ ត្រូវប្ដូរថ្មីបន្ទាប់ពីប្រើបាន ១ ឆ្នាំ។
កាស Dyson Zone ប្រើប្រាស់មុខងារភ្ជាប់រលកសញ្ញា ប្ល៊ូធូស រួមនឹងមុខងារបំបាត់សំឡេងរំខានដែលមាន ៣ ជម្រើស គឺ Isolation, Conversation និង Transparence។ Isolation អនុញ្ញាតឱ្យអ្នកប្រើប្រាស់បំបាត់សំឡេងរំខាន់ពីជុំវិញស្ទើរតែទាំងស្រុង ខណៈដែល Conversation បិទមុខងារបន្សុទ្ធខ្យល់ដើម្បីសំច័យថ្ម និងដើម្បីនិយាយគ្នាបានស្រួល ចំណែក Transparency អនុញ្ញាតឱ្យអ្នកប្រើប្រាស់ស្ដាប់ឮសំឡេងនៅជុំវិញខ្លួន។
ផលិតផលនេះមានរន្ធ USB C និងបញ្ជាតាមរយៈកម្មវិធីទូរស័ព្ទ Dyson Link។ Dyson Link ក៏ផ្ដល់ព័ត៌មានស្ដីពីគុណភាពខ្យល់នៅជុំវិញឧបករណ៍នេះផងដែរ៕
បាតុកររាប់រយនាក់បានរកវិធីវាយប្រហារទៅលើវិមានប្រធានាធិបតីរបស់ ស្រីលង្កា ជាប្រទេសកោះនៅ មហាសមុទ្រឥណ្ឌា នាំឱ្យអាជ្ញាធររដ្ឋធានី ដាក់បម្រាមគោចរ។
រលកនៃបាតុកម្មដោយសារបញ្ហាខ្វះប្រេងឥន្ធនៈ និងអតិផរណាកើនឡើងក្នុងរយៈពេលច្រើនសប្ដាហ៍នៅ ប្រទេសស្រីលង្កា បានប្រែទៅជាអំពើហិង្សានៅយប់ថ្ងៃទី ៣១ មីនា នៅ កូឡុំបូ (Colombo) រដ្ឋធានីរបស់ ស្រីលង្កា ក្នុងគ្រាដែលក្រុមបាតុករបានរកវិធីដើម្បីវាយប្រហារទៅលើវិមានរបស់ប្រធានាធិបតី និងទាមទារឱ្យលោក Gotabaya Rajapaksa ចុះចេញពីតំណែង។
កងកម្លាំងសន្តិសុខ បានប្រើប្រាស់គ្រាប់បែកផ្សែងបង្ហូរទឹកភ្នែក និងបាញ់ទឹក ដើម្បីបំបែងហ្វូងបាតុករ ដែលមានគ្នារាប់រយនាក់។ សាក្សីបានឱ្យដឹងថា កម្លាំងសន្តិសុខបានបាញ់កាំភ្លើង ប៉ុន្តែ មិនច្បាស់ថា ពួកគេប្រើគ្រាប់ពិត ឬគ្រាប់កៅស៊ូនោះទេ។ ការប៉ះទង្គិចរវាងក្រុមបាតុករ និងក្រុមប៉ូលិសកាលពីយប់មិញ បានបណ្ដាលឱ្យមានអ្នករងរបួសធ្ងន់យ៉ាងតិច ១ នាក់។
ក្រុមបាតុករបានដុតបំផ្លាញរថយន្តប៉ូលិស ១ គ្រឿង និងរថយន្តយោធា ១ គ្រឿង ដែលចតនៅលើដងផ្លូវទៅកាន់វិមានប្រធានាធិបតី Gotabaya Rajapaksa។ ពួកគេបានផ្ដួលរំលំជញ្ជាំងមួយនៅក្នុងតំបន់ ហើយយកដុំថ្មគប់ទៅលើក្រុមប៉ូលិស និងទាហាន។
ហេតុការណ៍ខាងលើនាំឱ្យក្រុមមន្ត្រីយោធាជាន់ខ្ពស់ បើកកិច្ចប្រជុំបន្ទាន់ដើម្បីរកវិធីទប់ទល់នឹងវិបត្តិ។ រដ្ឋធានីកូឡុំបូ ក៏ត្រូវបានដាក់ក្នុងបម្រាមគោចរដោយគ្មានកាលកំណត់។
មេដឹកនាំរបស់ សាធារណរដ្ឋប្រជាមានិត ដូណេតស្ក៍ (Donetsk) (ស្វ័យប្រកាស) បានចេញបញ្ជាឱ្យបង្កើតរដ្ឋបាលនៅ ម៉ារីប៉ូល ដែលជាទីក្រុងរបស់ អ៊ុយក្រែន កំពុងត្រូវបានឡោមព័ទ្ធដោយ កងទ័ពរុស្ស៊ី។
«អាជ្ញាធរក្នុងតំបន់មួយរបស់ សាធារណរដ្ឋប្រជាមានិត ដូណេតស្ក៍ (DPR) នឹងត្រូវបានបង្កើតឡើងនៅ ទីក្រុងម៉ារីប៉ូល» សារព័ត៌មាន TASS ដកស្រង់បទបញ្ជាដែលត្រូវបានប្រកាសលើគេហទំព័ររបស់ Denis Pushilin ដែលជាមេដឹកនាំរបស់ DPR កាលពីថ្ងៃទី ៣១ មីនា ឱ្យដឹងដូច្នេះ។
បទបញ្ជាដែលមានសុពលភាពចាប់ពីថ្ងៃទី ៣១ មីនា ណែនាំឱ្យមេដឹកនាំរដ្ឋបាលទីក្រុងម៉ារីប៉ូល ធានានូវការកសាង និងអនុម័តសេចក្ដីសម្រេចដែលទាក់ទងនឹងការគ្រប់គ្រង រចនាសម្ព័ន្ធ និងធនធានមនុស្សរបស់ទីក្រុង បង្កើតស្ថានប័នថ្នាក់ខណ្ឌនៅ ម៉ារីប៉ូល ក្នុងនោះមានទាំងការជ្រើសតាំងមេដឹកនាំនានាផងដែរ។ ជំហានទាំងនេះត្រូវអនុវត្តដោយមានការសហការពីអាជ្ញាធរ DPR។
បច្ចុប្បន្ន ភាគីខាងអ៊ុយក្រែន មិនទាន់បញ្ចេញប្រតិកម្មអ្វីនៅឡើយ ទាក់ទងនឹងបញ្ហាខាងលើ។
លោក Pushilin កាលពីថ្ងៃទី ៣០ មីនា ឱ្យដឹងថា អាចពិចារណាអំពីលទ្ធភាពនៃការបម្រួបបម្រួមជាមួយ រុស្ស៊ី នៅពេលពួកគេគ្រប់គ្រងតំបន់ដូណេតស្ក៍ បានទាំងមូល ក្នុងនោះមានទាំង ទីក្រុងម៉ារីប៉ូល នៅភាគខាងកើតរបស់ ប្រទេសអ៊ុយក្រែន ផងដែរ។ មេដឹកនាំរបស់ សាធារណរដ្ឋប្រជាមានិត លូហានស្ក៍ (Luhansk ឬ Lugansk-LPR) (ស្វ័យប្រកាស) Leonid Pasechnik មុននោះក៏បាននិយាយថា តំបន់នេះអាចនឹងមានការធ្វើប្រជាមតិឆាប់ៗខាងមុខ ស្ដីពីលទ្ធភាពនៃការច្របាច់បញ្ចូលទៅក្នុង សហព័ន្ធរុស្ស៊ី។
អ្នកនាំពាក្យរបស់ក្រសួងការបរទេសអ៊ុយក្រែន Oleg Nikolenko អះអាងថា ជារឿងមិនសមស្របតាមច្បាប់នៅពេលធ្វើប្រជាមតិដូច្នេះ។
ប្រធានាធិបតីអាម៉េរិក លោក បៃដិន បានចេញបញ្ជាឱ្យបើកឃ្លាំងយុទ្ធសាស្ត្រ បញ្ចេញប្រេងចំនួន ១ លានធុងជារៀងរាល់ថ្ងៃ ក្នុងរយៈពេល ៦ ខែ ដើម្បីជួយរក្សាស្ថិរភាពទីផ្សារ នៅពេលដែលសង្គ្រាមរវាង រុស្ស៊ី និង អ៊ុយក្រែន កំពុងបន្តទៅមុខ។
បទបញ្ជានេះ «នឹងជួយបន្ធូរបន្ថយការលំបាករបស់បណ្ដាគ្រួសារអាម៉េរិក បញ្ចប់ដំណាក់កាលពឹងផ្អែក និងស្រពេច ស្រពិលនាបច្ចុប្បន្ន បង្កើតបានជាគ្រឹះថ្មីសម្រាប់ទឹកដីអាម៉េរិក ដែលឯករាជ្យផ្នែកថាមពលពិតប្រាកដ និងយូរអង្វែង» ប្រធានាធិបតីអាម៉េរិក លោក ចូបៃដិន ថ្លែងដូច្នេះកាលពីថ្ងៃទី ៣១ មីនា នៅពេលប្រកាសផែនការថាមពលដើម្បីទប់ទល់នឹងផលប៉ះពាល់ពីវិបត្តិនៅ អ៊ុយក្រែន។
លោក បៃដិន ក៏បានចោទប្រកាន់លើ ប្រធានាធិបតីរុស្ស៊ី លោក ពូទីន ថា «រុញច្រានតម្លៃថាមពលសកលឱ្យឡើងថ្លៃ» និង «កំពុងវាយសំដៅលើប្រជាជនអាម៉េរិក នៅតាមស្ថានីយប្រេង»។ ដើម្បីដោះស្រាយស្ថានភាពប្រេងឡើងថ្លៃ ចាប់ពីខែឧសភា រដ្ឋាភិបាលអាម៉េរិក នឹងបញ្ចេញប្រេងពីឃ្លាំងយុទ្ធសាស្ត្រ ចំនួន ១ លានធុង ជារៀងរាល់ថ្ងៃ ក្នុងរយៈពេល ៦ ខែ។
តាមការគណនា ប្រេងសាំងប្រមាណ ១៨០ លានធុងដែលនឹងត្រូវបានបញ្ចេញពីឃ្លាំងយុទ្ធសាស្ត្ររបស់ អាម៉េរិក គឺស្មើនឹងតម្រូវការប្រេងក្នុងរយៈពេល ២ ថ្ងៃ របស់ពិភពលោកទាំងមូល។ នេះគឺជាលើកទី ៣ ហើយ ដែល វ៉ាស៊ីងតោន បញ្ចេញប្រេងពីឃ្លាំងយុទ្ធសាស្ត្រក្នុងអំឡុងកន្លះឆ្នាំមកនេះ។
ប្រទេសចិន កំពុងអនុវត្តគម្រោងសាងសង់ទីតាំងគ្រប់គ្រងទឹកទ្រង់ទ្រាយធំនៅលើទន្លេ Kumarak ដើម្បីជួយដោះស្រាយបញ្ហាចែកចាយប្រភពទឹកនៅ តំបន់ស៊ីនជាំង។
គម្រោងគ្រប់គ្រងទឹកពហុមុខងារ Dashixia លើទន្លេ Kumarak នៅភាគពាយព្យប្រទេសចិន កំពុងឈានចូលដល់ដំណាក់កាលសំខាន់នៃការសាងសង់ក្នុងឆ្នាំនេះ។ សំណង់នេះត្រូវបានចាប់ផ្ដើមសាងសង់នៅឆ្នាំ ២០១៩ ហើយគ្រោងនឹងរួចរាល់ជាស្ថាពរដោយចំណាយពេល ៨ ឆ្នាំកន្លះ។
Dashixia នឹងជួយកាត់បន្ថយការចំណាយទៅលើការផ្គត់ផ្គង់ទឹក ការស្រោចស្រប និងគ្រប់គ្រងទឹកជំនន់នៅលើទន្លេ។ នេះគឺជាគម្រោងមួយក្នុងចំណោមគម្រោងគ្រប់គ្រង និងផ្គត់ផ្គង់ទឹកទ្រង់ទ្រាយធំជាងគេចំនួន ១៧២ របស់ ក្រុមប្រឹក្សារដ្ឋចិន។
បឹងរក្សាទឹករបស់គម្រោងនេះ អាចផ្ទុកទឹកបានរហូតដល់ ១.១៧ ពាន់លានម៉ែត្រគូប។ ការគ្រប់គ្រងទឹកគឺមានន័យយ៉ាងសំខាន់សម្រាប់ការអភិវឌ្ឍរបស់ តំបន់ស៊ីនជាំង ជាទីដែលការបែងចែកប្រភពទឹកកំពុងបាត់បង់តុល្យភាព។
មេដឹកនាំ អូសេទីខាងត្បូង (South Ossetia) ដែលជាតំបន់ផ្ដាច់ខ្លួននៅ ហ្សកហ្ស៊ី (Georgia) ប្រកាសថា នឹងធ្វើប្រជាមតិស្ដីពីការច្របាច់បញ្ចូលទៅក្នុង សហព័ន្ធរុស្ស៊ី។
«យើងមានមូលហេតុគ្រប់គ្រាន់ដើម្បីចូលរួមក្នុងសហព័ន្ធរុស្ស៊ី និងមិនជួបឧបសគ្គផ្លូវច្បាប់ណាមួយឡើយ» Alan Tadtaev អ្នកតាក់តែងច្បាប់កំពូលមួយរូបរបស់ អូសេទីខាងត្បូង កាលពីថ្ងៃទី ៣០ មីនា បានឱ្យដឹងដូច្នេះ។
«ខ្ញុំយល់ឃើញថា ការបម្រួបបម្រួមជាមួយ រុស្ស៊ី គឺជាគោលដៅយុទ្ធសាស្ត្រ និងជាជម្រើសរបស់យើង ជាបំណងប្រាថ្នារបស់ប្រជាជន» Anatoly Bibilov មេដឹកនាំរបស់ សាធារណរដ្ឋស្វ័យប្រកាស អូសេទីខាងត្បូង ថ្លែងដូច្នេះ។ «យើងនឹងអនុវត្តទៅតាមជំហាននៃផ្លូវច្បាប់នាពេលដ៏ខ្លីខាងមុខ។ អូសេទីខាងត្បូង នឹងក្លាយជាផ្នែកមួយរបស់ រុស្ស៊ី ជាទឹកដីកំណើតប្រវត្តិសាស្ត្រ»។
បែបបទផ្លូវច្បាប់ដែលចាំបាច់ដើម្បីឱ្យ អូសេទីខាងត្បូង អាចបម្រួបបម្រួមជាមួយ រុស្ស៊ី នឹងរួចរាល់នៅថ្ងៃទី ១០ មេសា ជាថ្ងៃបោះឆ្នោតជ្រើសរើសមេដឹកនាំរបស់តំបន់នេះ។
ហ្សកហ្ស៊ី គឺជាប្រទេសដែលធ្លាប់ចំណុះឱ្យ សហភាពសូវៀត នៅតំបន់ កៅកាស (Kavkaz) ជាប់ជាមួយរុស្ស៊ី នៅភាគខាងជើង។ ទំនាក់ទំនងរវាង រុស្ស៊ី និង ហ្សកហ្ស៊ី តែងតែមានភាពតានតឹងរាប់ចាប់តាំងពីជម្លោះប្រដាប់អាវុធបានកើតឡើងកាលពីខែសីហា ២០០៨ នៅពេល ហ្សកហ្ស៊ី វាយប្រហារទៅលើតំបន់ផ្ដាច់ខ្លួនចំនួន ២ គឺ អាបខាហ្ស៊ី (Abkhazia) និង អូសេទីខាងត្បូង។
រុស្ស៊ី បានបើកយុទ្ធនាការអន្តរគមន៍យោធានៅ ហ្សកហ្ស៊ី ចាប់ពីថ្ងៃទី ៨ សីហា ២០០៨ និងបញ្ចប់ក្រោយការប្រយុទ្ធគ្នា ៥ ថ្ងៃ។ ហ្សកហ្ស៊ី រងការខូចខាតធ្ងន់ធ្ងរក្នុងសង្គ្រាមភ្លើងចំបើងនោះ។ រុស្ស៊ី បានប្រកាសទទួលស្គាល់ឯករាជ្យរបស់ អាបខាហ្ស៊ី និង អូសេទីខាងត្បូង ប៉ុន្តែ អន្តរជាតិមិនបានទទួលស្គាល់ឡើយ។
រុស្ស៊ី រក្សាវត្តមានកងទ័ពរបស់ខ្លួននៅ អាបខាហ្ស៊ី និង អូសេទីខាងត្បូង ដោយអះអាងថា នេះគឺជាសកម្មភាពសមស្របទៅតាមបំណងប្រាថ្នារបស់ប្រជាជនក្នុងតំបន់។ ក៏ប៉ុន្តែ អាជ្ញាធរហ្សកហ្ស៊ី និងបស្ចិមលោក បានបដិសេធ ដោយចោទថា នេះគឺជាការ «រំលោភកាន់កាប់ដោយខុសច្បាប់»។ រុស្ស៊ី និង ហ្សកហ្ស៊ី បានកាត់ផ្ដាច់ទំនាក់ទំនងការទូតនឹងគ្នារហូតដល់បច្ចុប្បន្ន៕
យន្តហោះ Airbus A៣៨០ ហោះហើរសាកល្បងនៅ ប្រទេសបារាំង ហើយហោះក្នុងរយៈពេល ៣ ម៉ោង ដោយប្រើប្រាស់ឥន្ធនៈដែលកែច្នៃពីប្រេងឆា និងខ្លាញ់ដែលគេប្រើរួច។
យន្តហោះខ្នាតធំ Airbus A៣៨០ ទទួលបានជោគជ័យក្នុងការហោះហើរសាកល្បងជាពិសេស ក្នុងរយៈពេល ៣ ម៉ោង ដោយហោះពីអាកាសយានដ្ឋាន Blagnac នៅកាន់ Toulouse (បារាំង) កាលពីថ្ងៃទី ២៥ មីនា ២០២។ យន្តហោះនេះប្រើប្រាស់ម៉ាស៊ីន Rolls-Royce ៩០០ និងឥន្ធនៈអាកាសចរណ៍និរន្តរភាព (Sustainable Aviation Fuel-SAF) ដែលភាគច្រើនផលិតអំពីប្រេងសណ្ដែក និងខ្លាញ់ដែលប្រើរួច។
យន្តហោះ Airbus A៣៨០ ក្រោយមកក៏បានធ្វើការហោះហើរសាកល្បងជាលើកទីពីរ ដោយប្រើប្រាស់ឥន្ធនៈប្រភេទដដែលនេះ និងហោះពី Toulouse ទៅកាន់ Nice ក្នុងថ្ងៃទី ២៩ មីនា។ ការហោះហើរនេះគឺដើម្បីពិនិត្យមើលការប្រើប្រាស់ SAF ក្នុងដំណាក់កាលនៃការហោះឡើង និងចុះចត។
ឥន្ធនៈដែលយន្តហោះ Airbus A៣៨០ បានប្រើប្រាស់ ត្រូវបានផ្គត់ផ្គង់ដោយ TotalEnergies ដែលជាក្រុមហ៊ុនមានមូលដ្ឋាននៅ Normandy របស់ បារាំង។ Airbus បានសាកល្បងហោះហើរដោយប្រើប្រាស់ SAF តាំងពីឆ្នាំកន្លង ចំណែក A៣៥០ បានសាកល្បងហោះហើរតាំងខែមីនា ២០២១ និង A៣១៩ ហោះហើយសាកល្បងដោយប្រើប្រេងឆាកាលពីខែតុលា ២០២១។
ក្រុមហ៊ុន TotalEnergies សង្ឃឹមថា យន្តហោះនឹងទទួលបានការអនុញ្ញាតឱ្យហោះហើរដោយប្រើប្រាស់ឥន្ធនៈប្រភេទ SAF នៅចុងទសវត្សន៍នេះ។ បច្ចុប្បន្ន យន្តហោះ Airbus អាចដំណើរការបានជាមួយនឹង SAF ៥០% លាយជាមួយនឹងប្រេងកាត (kerosene) បុរាណ៕
អាជ្ញាធរសិង្ហបុរី បានប្រហារជីវិតដោយការព្យួរក ចំពោះជនល្មើសគ្រឿងញៀនម្នាក់ ដែលនេះគឺជាការតភ្ជាប់ឡើងវិញនូវការអនុវត្តច្បាប់ប្រហារជីវិតរបស់ប្រទេសនេះ ក្រោយខកខានជាង ២ ឆ្នាំ បើទោះជារងការរិះគន់ពីសាធារណមតិ។
Abdul Kahar Othman អាយុ ៦៨ ឆ្នាំ ជាពលរដ្ឋសិង្ហបុរី ត្រូវបានកាត់ទោសប្រហារជីវិតកាលពីឆ្នាំ ២០១៥ ទាក់ទិននឹងអំពើជួញដូរគ្រឿងញៀន។ ការដាក់ទោសប្រហារជីវិតចំពោះ Kahar ត្រូវបានធ្វើ ឡើងក្រោមរូបភាពព្យូរក កាលពីថ្ងៃទី ៣០ មីនា នៅពន្ធនាគារ Changi។
នេះគឺជាករណីប្រហារជីវិតដំបូងដែលត្រូវបានអនុវត្តនៅ សិង្ហបុរី ក្នុងអំឡុង ២ ឆ្នាំកន្លងមកនេះ ក្រោយពីវាត្រូវបានផ្អាកដោយសារ កូវីដ-១។ ករណីប្រហារជីវិតចុងក្រោយបំផុតនៅ សិង្ហបុរី មុនពេល កូវីដ-១៩ មកដល់ ត្រូវបានធ្វើឡើងកាលពីខែវិច្ឆិកា ២០១៩។
ករណីប្រហារជីវិតចំពោះ Kahar ត្រូវបានអនុវត្តឡើង បើទោះជាក្រុមសកម្មជនសិទ្ធិមនុស្ស ក្នុងនោះមានទាំងការិយាល័យសិទ្ធិមនុស្សរបស់អង្គការសហប្រជាជាតិ បានអំពាវនាវឱ្យមានការសម្រាលទោសមកនៅត្រឹមជាប់ពន្ធនាគារមួយជីវិត។
