សឿន សំណាង - La Reine Media

កងកម្លាំងរុស្ស៊ី ដកថយចេញពីព្រលានយន្តហោះក្បែររដ្ឋធានីរបស់ អ៊ុយក្រែន

រូបភាពពីផ្កាយរណបថ្មីបំផុតបង្ហាញថា កងកម្លាំងរបស់ រុស្ស៊ី បានដកចេញពីអាកាសយានដ្ឋាន Antonov ក្នុងទីរួមស្រុក Hostomel ដែលមានចម្ងាយពី រដ្ឋធានីកៀវ ៧ គីឡូម៉ែត្រ ទៅទិសខាងជើង។

មន្ត្រីក្រសួងការពារជាតិអាម៉េរិក ១ រូប កាលពីថ្ងៃទី ៣១ មីនា បានឱ្យដឹងថា ពួកគេជឿថា កងកម្លាំងរបស់ រុស្ស៊ី ទំនងជាបានដកថយចេញពីព្រលានយន្តហោះ Antovov ជាគោលដៅដែលត្រូវបាន កងទ័ពរុស្ស៊ី វាយប្រហារក្នុងថ្ងៃដំបូងនៃយុទ្ធនាការយោធាពិសេសរបស់ ទីក្រុងមូស្គូ នៅ អ៊ុយក្រែន។

ក្រោយមក រូបភាពពីផ្កាយរណបរបស់ Maxar Technologies ដែលថតបានក្នុងថ្ងៃដដែលនោះ បានបញ្ជាក់ថា កងទ័ពរុស្ស៊ី ពិតជាបានដកថយពីព្រលានយន្តហោះនោះមែន ដោយពុំឃើញមានយានយោធា ឬទីតាំងដាក់អាវុធធុនធ្ងន់របស់ រុស្ស៊ី ទៀតនោះទេ។ នៅទីនោះ នៅសល់តែលេណដ្ឋានដែល ទាហានរុស្ស៊ី បានបង្កើតឡើងដើម្បីបាំងការពារខ្លួន។

រុស្ស៊ី បានចាប់ផ្ដើមបើកការឈ្លានពានលើ ទឹកដីអ៊ុយក្រែន កាលពីថ្ងៃទី ២៤ កុម្ភៈ ដើម្បី «បំបាត់ចោលការពង្រីកយោធារបស់ អ៊ុយក្រែន»។ តំណាងក្រុមចរចារបស់ រុស្ស៊ី និង អ៊ុយក្រែន កាលពីម្សិលមិញ បានប្រកាសបន្តកិច្ចពិភាក្សាតាមប្រព័ន្ធវីដេអូ បន្ទាប់ពីបានចរចាគ្នាផ្ទាល់នៅ អ៊ីស្តង់ប៊ុល នៃ ប្រទេសតួកគី កាលពីថ្ងៃទី ២៩ មីនា ដែលត្រូវបានវាយតម្លៃថា វិជ្ជមាន។ ចំណែក ប្រធានាធិបតីអ៊ុយក្រែន វិញ បានឱ្យដឹងថា បានប្រគល់សេចក្ដីព្រាងមួយចំនួនស្ដីពីការធានាសន្តិសុខ ឱ្យបណ្ដាប្រទេស ក្នុងនោះមាន អាម៉េរិក និងសម្ព័ន្ធរបស់ អាម៉េរិក ផងដែរ៕

April 2, 2022

រកបានប្រាក់ច្រើនតាំងពីដើមឆ្នាំ មហាសេដ្ឋីឥណ្ឌា រូបនេះ មានវត្តមានក្នុងក្លឹបអ្នកមានទ្រព្យចាប់ពី ១០០ ពាន់លានដុល្លារអាម៉េរិក

មហាសេដ្ឋី Gautam Adani គឺជាសមាជិកទី ១០ របស់ ក្លឹបអ្នកមានទ្រព្យចាប់ពី ១០០ ពាន់លានដុល្លារ (The 100 Billion Dollar Club) នាបច្ចុប្បន្ន។

ក្លឹបមហាសេដ្ឋីដែលមានទ្រព្យមានលេខចំនួន ១២ ខ្ទង់ ទើបតែបានទទួលសមាជិកថ្មី នោះគឺមហាសេដ្ឋីឥណ្ឌា Gautam Adani។ យោងតាម Bloomberg Billionaire Index ម្ចាស់ Adani Group ដែលជាក្រុមហ៊ុនរកស៊ីក្នុងវិស័យកំពង់ផែសមុទ្រ រុករករ៉ែ និងថាមពលបៃតង បច្ចុប្បន្នមានទ្រព្យដែលមានតម្លៃ ១០០ ពាន់លានដុល្លារអាម៉េរិក។

លោក Adani ក៏ជាមហាសេដ្ឋីដែលរកបានប្រាក់ច្រើនជាងគេបង្អស់ចាប់ពីដើមឆ្នាំមកនេះ ដោយរកបាន ២៤ ពាន់លានដុល្លារអាម៉េរិក ខណៈពេល ១ ឆ្នាំ ២០២១ លោករកបានសរុបជិត ៤៣ ពាន់លានដុល្លារ។ លោក Adani បានយកឈ្នះមហាសេដ្ឋីឥណ្ឌា Mukesh Ambani និងក្លាយជាអ្នកមានទ្រព្យច្រើនជាងគេបង្អស់ក្នុង ទ្វីបអាស៊ី ព្រមទាំងឈរលំដាប់ទី ១០ ក្នុងពិភពលោក។ លោក Ambani ឈរពីក្រោយលោក Adani ដោយមានទ្រព្យ ៩៩ ពាន់លានដុល្លារអាម៉េរិក។

មហាសេដ្ឋី Adani ចាប់ដៃជាមួយលោក Modi ដែលបច្ចុប្បន្នជានាយករដ្ឋមន្ត្រីរបស់ ប្រទេសឥណ្ឌា

លទ្ធផលខាង បានកើតឡើងបន្ទាប់ពី ក្រុមហ៊ុន Adani Group បង្វែរទិសដៅទៅរកវិស័យថាមពលបៃតង និងហេដ្ឋារចនាសម្ព័ន្ធ ហើយទាក់ទាញបានប្រភពទុនវិនិយោគច្រើនពីបរទេស រួមមានពី Total SE របស់ បារាំង និង Warburg Pincus របស់ សហរដ្ឋអាម៉េរិក។

មហាសេដ្ឋីកើតឆ្នាំ ១៩៦២ រូបនេះ ក៏បានពង្រីកខ្លួនទៅក្នុងវិស័យនានាដែល នាយករដ្ឋមន្ត្រីឥណ្ឌា Narendra Modi បានវាយតម្លៃថា មានសារសំខាន់សម្រាប់ការកសាងប្រទេសជាតិ។

ក្នុងគ្រាដែលក្រុមមហាសេដ្ឋីមកពីបណ្ដាក្រុមហ៊ុនខ្នាតយក្សក្នុងវិស័យបច្ចេកវិទ្យារបស់ សហរដ្ឋអាម៉េរិក បានស្គាល់ការធ្លាក់ចុះនៃទ្រព្យសម្បត្តិរបស់ខ្លួន គេឃើញថា មហាសេដ្ឋី ២ រូប របស់ ឥណ្ឌា គឺលោក Adani និង Ambani បែរជាមានទ្រព្យកាន់តែច្រើន។ ដូចទៅនឹងមហាសេដ្ឋី Adani ម្ចាស់ក្រុមហ៊ុន Reliance Industries លោក Ambani ក៏កំពុងតែពង្រីកវត្តមានទៅក្នុងវិស័យថ្មី មានដូចជា ពាណិជ្ជកម្មបែបឌីជីថល និងបច្ចេកវិទ្យាជាដើម ដែលទាក់ទាញបានអ្នកវិនិយោគធំៗមួយចំនួន ក្នុងនោះមានទាំង Facebook និង Google ផងដែរ៕

April 2, 2022

សម្ព័ន្ធមិត្តទាំងឡាយរបស់ អាម៉េរិក យល់ព្រមបញ្ចេញប្រេងពីឃ្លាំងយុទ្ធសាស្ត្រ

បណ្ដាប្រទេសជាសម្ព័ន្ធមិត្តរបស់ សហរដ្ឋអាម៉េរិក យល់ស្របក្នុងការបញ្ចេញប្រេងពីឃ្លាំងយុទ្ធសាស្ត្រដើម្បីបញ្ចុះតម្លៃប្រេងដែលបាន និងកំពុងឡើងខ្ពស់ ដោយសារសង្គ្រាមរវាង រុស្ស៊ី និង អ៊ុយក្រែន។

ការសម្រេចនេះត្រូវបានធ្វើឡើងនៅក្នុងកិច្ចប្រជុំវិសាមញ្ញថ្នាក់រដ្ឋមន្ត្រី របស់ អង្គការថាមពលអន្តរជាតិ (IEA) ដែលដឹកនាំដោយ រដ្ឋមន្ត្រីថាមពលអាម៉េរិក Jennifer Granholm កាលពីថ្ងៃទី ១ មេសា។ IEA ឱ្យដឹងថា ព័ត៌មានលម្អិតស្ដីពីការសម្រេចចិត្តខាងលើ នឹងត្រូវបានប្រកាសនៅដើមសប្ដាហ៍ក្រោយ។

ប្រធានាធិបតីអាម៉េរិក លោក បៃដិន មុននោះបានឱ្យដឹងថា IEA បានយល់ព្រម «បញ្ចេញប្រេងរាប់សិបលានធុងទៅក្នុងទីផ្សារ»។ IEA ដែលមានសមាជិក ៣១ ប្រទេស ក្នុងនោះមាន សហរដ្ឋអាម៉េរិក បណ្ដាប្រទេសនៅអឺរ៉ុប អូស្ត្រាលី និង ជប៉ុន កាលពីខែមីនា បានសន្យាបញ្ចេញប្រេងចំនួន ៦២.៧ លានធុងពីឃ្លាំងយុទ្ធសាស្ត្រ។

កិច្ចប្រជុំរបស់ IEA ត្រូវបានធ្វើឡើង ១ ថ្ងៃ បន្ទាប់ពី ប្រធានាធិបតី បៃដិន ប្រកាសថា អាម៉េរិក នឹងបញ្ចេញប្រេង ១ លានធុងជារៀងរាល់ថ្ងៃ ក្នុងរយៈពេល ៦ ខែ ដែលប្រហាក់ប្រហែលនឹងជាង ១៨០ លានធុង ដើម្បីរួមចំណែកក្នុងការទប់ទល់នឹងការហក់ឡើងនៃតម្លៃប្រេង ដោយសារសង្គ្រាមរវាង រុស្ស៊ី និង អ៊ុយក្រែន។

នេះគឺជាលើកទី ៥ ហើយ ដែល IEA បញ្ចេញប្រេងពីឃ្លាំងយុទ្ធសាស្ត្រ ចាប់តាំងពីឆ្នាំ ១៩៩១។ បរិមាណប្រេងសរុបក្នុងឃ្លាំងយុទ្ធសាស្ត្ររបស់បណ្ដាប្រទេសជាសមាជិក IEA គឺ ១.៥ ពាន់លានធុង៕

April 2, 2022

(វីដេអូ)-នាវាទេសចរណ៍ដើរដោយថាមពលអគ្គិសនីធំបំផុតក្នុងពិភពលោក ដំណើរការលើកដំបូង

ប្រទេសចិន កាលពីថ្ងៃទី ២៩ មិនា បានសម្ពោធដាក់ឱ្យប្រើប្រាស់នាវាទេសចរណ៍មួយគ្រឿងដែលមានប្រវែង ១០០ ម៉ែត្រ និងមានបំពាក់ថ្មដែលអាចផ្ទុកថាមពលប្រហាក់ប្រហែលនឹងថ្មរបស់រថយន្តអគ្គិសនី ១០០ គ្រឿង។

នាវាទេសចរណ៍ដំណើរការដោយថាមពលអគ្គិសនីធំជាងគេក្នុងពិភពលោក ដែលមានឈ្មោះថា «Yangtze River Three Gorges ១» កាលពីថ្ងៃអង្គារ ត្រូវបានដាក់ឱ្យដំណើរការជាលើកដំបូងនៅទីក្រុង Yichang, ខេត្ត Hubei ប្រទេសចិន។ នាវានេះបំពាក់ថ្មដែលមានកម្លាំង ៧,៥០០ គីឡូវ៉ាត់ម៉ោង ស្មើនឹងថាមពលថ្មរបស់រថយន្តអគ្គិសនីចំនួន ១០០ គ្រឿង បូកចូលគ្នា។

នាវា Yangtze River Three Gorges ១ អាចធ្វើដំណើរបានរយៈចម្ងាយ ១០០ គីឡូម៉ែត្រ បន្ទាប់ពីបញ្ចូលថាមពលពេញ ជួយសំច័យឥន្ធនៈបាន ៥៣០ តោន និងកាត់បន្ថយឧស្ម័នពុលបាន ១,៦៦០ តោន ដែលអាចរួមចំណែកក្នុងគោលដៅបន្សុទ្ធឧស្ម័នកាបូនក្នុងបរិយាកាសរបស់ អាជ្ញាធរចិន នៅឆ្នាំ ២០៦០។

នាវាទេសចរណ៍នេះមានបណ្ដោយប្រវែង ១០០ ម៉ែត្រ និងទទឹង ១៦.២ ម៉ែត្រ អាចដឹកភ្ញៀវបាន ១,៣០០ នាក់ ទៅទេសចរណ៍តាមបណ្ដោយទន្លេ Yangtze (Yangzi ឬ Chang Jiang) ត្រង់តំបន់ដែលឆ្លងកាត់ទីក្រុង Yichang នៅភាគខាងលិចនៃខេត្ត Hubei។

April 1, 2022

ណាសា សាកល្បងរ៉ុក្កែតកម្ពស់ ៩៨ ម៉ែត្រ ដើម្បីត្រៀមសម្រាប់ការហោះទៅកាន់ឋានព្រះចន្ទ

ណាសា (NASA) ធ្វើការសាកល្បងរ៉ុក្កែតខ្នាតយក្ស ជាប្រព័ន្ធបាញ់បង្ហោះ SLS ដែលប្រើប្រាស់ដើម្បីដឹកមនុស្សឡើងទៅកាន់ឋានព្រះចន្ទ ចាប់ពីថ្ងៃទី១ ដល់ទី ៣ ខែមេសា។

រ៉ុក្កែត SLS ត្រូវបានដឹកទៅកាន់ប្រព័ន្ធទម្រសម្រាប់បាញ់បង្ហោះរបស់ ណាសា នៅឯមជ្ឈមណ្ឌលអវកាស Kennedy កាលពី ២ សប្ដាហ៍មុន ក្រោយពីការចំណាយពេលអភិវឌ្ឍច្រើនឆ្នាំមកនេះ។ រ៉ុក្កែតនេះគឺជាចំណុចស្នូលក្នុងគម្រោងនាំអាកាសចររបស់ ណាសា ត្រលប់ទៅកាន់ឋានព្រះចន្ទជាលើកដំបូង បន្ទាប់ពីបានខកខានច្រើនទសវត្សរ៍ និងសម្រាប់គោលដៅបន្ទាប់ពីទៅកាន់ពិភពអង្គារ។

ជើងហោះហើរដំបូងរបស់ SLS នឹងត្រូវបានធ្វើឡើងនៅចុងឆ្នាំ ២០២២ ក្នុងបេសកកម្ម Artemis។ រ៉ុក្កែតនេះនឹងនាំយាន Orion គ្មានមនុស្សបើកបរ ទៅកាន់ទីអវកាស និងហោះជុំវិញឋានព្រះចន្ទ។ តាមផែនការ ដំណើរនៃការហោះហើរនឹងអូសបន្លាយពេលពី ៤ ទៅ ៦ សប្ដាហ៍។

នៅមុនការហោះហើរខាងលើ SLS នឹងត្រូវឆ្លងកាត់ការធ្វើតេស្តជាច្រើនលើកដើម្បីធានាថា ប្រព័ន្ធទាំងឡាយរបស់វាដំណើរការល្អ។ ការសាកល្បងដំបូងមួយចំនួននឹងត្រូវធ្វើឡើងចាប់ពីថ្ងៃនេះ រហូតដល់ថ្ងៃទី ៣ មេសា។

April 1, 2022

យានអវកាសរបស់ Blue Origin ដឹកអ្នកទេសចរណ៍ ៦នាក់ ឡើងទៅកាន់កម្ពស់ ១០០ គីឡូម៉ែត្រ ដោយជោគជ័យ

ប្រព័ន្ធរ៉ុក្កែត និងយាន New Shepard ហោះឡើងដោយជោគជ័យពីព្រលានបាញ់បង្ហោះ Launch Site One របស់ Blue Origin ក្នុងរដ្ឋ Texas ខាងលិច នៅវេលាម៉ោង ២០និង៥៨នាទី ថ្ងៃទី ៣១ មីនា (ម៉ោងនៅភ្នំពេញ)។

ប្រព័ន្ធរ៉ុក្កែត និងយាន New Shepard បាននាំអ្នកទេសចរណ៍ ៦ នាក់ ឡើងទៅកាន់កម្ពស់ប្រហែល ១០០ គីឡូម៉ែត្រ ក្នុងតំបន់អវកាសក្រោមគន្លងគោចរ។ ប្រហែល ១០ នាទីក្រោយការហោះឡើង ក្រុមហោះហើរក៏បានត្រលប់មកកាន់ផែនដី។ ទូសម្រាប់ក្រុមហោះហើរបានចុះចតលើវាលខ្សាច់ Texas ដោយមានជំនួយពីឆត្រយោង។

បេសកកម្មខាងលើដែលមានឈ្មោះថា NS-២០ គឺជាជើងហោះហើរទី ២០ របស់ រ៉ុក្កែត New Shepard និងជាជើងហោះហើរដឹកមនុស្សទី ៤ របស់ Blue Origin ហើយក៏ជាជើងហោះហើរទីមួយដែលមិនមានអ្នកល្បីឈ្មោះចូលរួម។

April 1, 2022

(វីដេអូ)-ទ័ពអាកាសរបស់ អ៊ុយក្រែន ទំនងជាបានចូល «វាយប្រហារសំដៅឃ្លាំងប្រេងក្នុងទឹកដីរុស្ស៊ី»

មន្ត្រីក្នុងខេត្ត Belgorod ភាគខាងលិចរបស់ ប្រទេសរុស្ស៊ី និយាយថា ឧទ្ធម្ភាគចក្ររបស់ អ៊ុយក្រែន បានបាញ់ចូលទឹកដីរបស់ រុស្ស៊ី និងវាយប្រហារសំដៅលើឃ្លាំងប្រេង នៅក្នុងការវាយប្រហារជាលើកដំបូងទៅក្នុងទឹកដីរបស់ រុស្ស៊ី។

«អគ្គិភ័យនៅឯឃ្លាំងប្រេង គឹជាលទ្ធផលនៃការវាយប្រហារតាមអាកាសដោយឧទ្ធម្ភាគចក្រប្រដាប់អាវុធរបស់ កងទ័ពអ៊ុយក្រែន។ ឧទ្ធម្ភាគចក្រទាំងនោះបានចូលឈ្លានពានដែនអាកាសរបស់ រុស្ស៊ី ក្នុងកម្ពស់ទាប។ កម្មករ ២ នាក់ បានរងរបួសក្នុងហេតុការណ៍ននោះ មិនមានអ្នកស្លាប់» Vyacheslav Gladkov អភិបាលខេត្ត Belgorod សរសេរនៅលើបណ្ដាញសង្គមនាថ្ងៃនេះ។

វីដេអូដែលបានចែករំលែកនៅលើបណ្ដាញសង្គមបង្ហាញថា ឧទ្ធម្ភាគចក្របំពាក់អាវុធ Mi-២៤ ហោះក្នុងកម្ពស់ទាប និងបាញ់គ្រាប់រ៉ុក្កែត បង្កឱ្យមានការផ្ទុះខ្លាំង។

ក្រុមមន្ត្រីក្នុងតំបន់ឱ្យដឹងថា កំពុងប្រមូលកម្លាំងដើម្បីគ្រប់គ្រងអគ្គិភ័យ ខណៈដែលប្រជាជនក្បែរកន្លែងកើតហេតុត្រូវបានឈ្លៀសចេញ។

ក្រសួងការពារជាតិរបស់ ប្រទេសរុស្ស៊ី ក៏ដូចជារបស់ ប្រទេសអ៊ុយក្រែន មិនទាន់មានការអធិប្បាយអ្វីនៅឡើយចំពោះហេតុការណ៍នេះ។

Belgorod ស្ថិតនៅក្បែរព្រំដែនជាមួយ អ៊ុយក្រែន និងក្បែរ Kharkov ដែលជាទីក្រុងធំទីពីររបស់ អ៊ុយក្រែន។ តំបន់ Belgorod ធ្លាប់ត្រូវបានប្រើប្រាស់ជាទីតាំងប្រមូលទ័ពរបស់ រុស្ស៊ី មុនពេលប្រទេសនេះបើកយុទ្ធនាការយោធានៅ អ៊ុយក្រែន។

នេះមិនមែនជាលើកដំបូងនោះទេ ដែលទឹកដីរបស់ រុស្ស៊ី ត្រូវបានវាយប្រហារចាប់តាំងពី រុស្ស៊ី បានបើកការឈ្លានពានលើ អ៊ុយក្រែន ប៉ុន្តែវាជាលើកដំបូងដែល កងទ័ពអ៊ុយក្រែន រងការចោទប្រកាន់។ ហេតុការណ៍វាយប្រហារមុននោះ សុទ្ធតែត្រូវបានចាត់ទុកថា ជាការវាយប្រហារដោយកាំភ្លើងធំ ឬកាំជ្រួចផ្លោង ពី អ៊ុយក្រែន។

April 1, 2022

យន្តហោះយោធារបស់ កូរ៉េខាងត្បូង ប៉ះគ្នានៅលើអាកាស! មនុស្សច្រើននាក់បានបាត់បង់ជីវិត

យន្តហោះសម្រាប់ហ្វឹកហ្វឺន ២ គ្រឿង របស់ទ័ពអាកាសនៃ ប្រទេសកូរ៉េខាងត្បូង បានហោះបុកគ្នានៅលើមេឃពេលកំពុងហ្វឹកហាត់ បណ្ដាលឱ្យអ្នកបើកបរ ៣ នាក់ ត្រូវបាត់បង់ជីវិត និងម្នាក់បាត់ខ្លួន។

ទ័ពអាកាសកូរ៉េខាងត្បូង បានឱ្យដឹងថា ហេតុការណ៍នេះកើតឡើងកាលពីថ្ងៃត្រង់ទី ១ មេសា នៅពេលយន្តហោះសម្រាប់ការហ្វឹកហាត់ KT-១ ចំនួន ២ គ្រឿង ហោះប៉ះគ្នានៅលើអាកាសក្បែរទីក្រុង Sacheon ភាគអាគ្នេយ៍ប្រទេសនេះ ដែលមានចម្ងាយប្រហែល ៦ គីឡូម៉ែត្រ ពីមូលដ្ឋានរបស់ក្រុមហោះហើរ។

«ទោះជាបានប្រឹងប្រែងដើម្បីគេចពីគ្រោះថ្នាក់ ប៉ុន្តែ អ្នកបើកបរ ៣ នាក់ នៅតែបាត់បង់ជីវិត និងម្នាក់ត្រូវបាត់ខ្លួន។ សមត្ថកិច្ចបានបង្កើតក្រុមស៊ើបអង្កេត និងវាយតម្លៃការខូចខាត» ប្រកាសរបស់ទ័ពអាកាសកូរ៉េខាងត្បូង ឱ្យដឹងដូច្នេះ។

បុគ្គលិកពន្លត់អគ្គិភ័យប្រហែល ៣០ នាក់ ត្រូវបានបញ្ជូនទៅកាន់កន្លែងកើតហេតុ ដើម្បីស្វែងរកជនរងគ្រោះដែលបានបាត់ខ្លួននៅទីតាំងយន្តហោះធ្លាក់។

KT-១ គឺជាយន្តហោះសម្រាប់ហ្វឹកហ្វឺនកម្រិតបឋមដែលមានកៅអីចំនួន ២ និងអាចវាយប្រហារគោលដៅនៅលើដី។ យន្តហោះនេះត្រូវបានសហការផលិតដោយស្ថាប័នអភិវឌ្ឍវិស័យការពារជាតិ និងក្រុមហ៊ុនឧស្សាហកម្មអាកាសចរណ៍កូរ៉េខាងត្បូង។

យន្តហោះនេះបានហោះហើរសាកល្បងលើកដំបូងកាលពីឆ្នាំ ១៩៩១ និងត្រូវបានផលិតចាប់ពីឆ្នាំ ១៩៩៩ ក្នុងនោះមានជាង ១៧០ គ្រឿងត្រូវបាននាំចេញ និងប្រើប្រាស់នៅក្នុងជួរទ័ពអាកាសរបស់ កូរ៉េខាងត្បូង ឥណ្ឌូណេស៊ី ប៉េរូ សេណេហ្គាល់ និង តួកគី។

April 1, 2022

រុស្ស៊ី បញ្ចុះតម្លៃប្រេងសម្រាប់លក់ឱ្យ ឥណ្ឌា មកនៅទាបបំផុត

អាជ្ញាធររុស្ស៊ី កំពុងស្វែងរកវិធីដើម្បីអាចលក់ប្រេងឱ្យបានច្រើនជាងបច្ចុប្បន្ន នៅពេលដែលប្រេង Urals របស់ប្រទេសនេះ បាត់បង់ភាពទាក់ទាញ បន្ទាប់ពីកងទ័ពបានចូលឈ្លានពានលើ អ៊ុយក្រែន។

ប្រភពព័ត៌មានរបស់ Bloomberg បានឱ្យដឹងថា រុស្ស៊ី កំពុងតែស្នើលក់ប្រេង Urals ឱ្យ ឥណ្ឌា ជាមួយនឹងតម្លៃទាបជាង ៣៥ ដុល្លារ បើធៀបនឹងតម្លៃប្រេងនៅមុនដំណាក់កាលវិបត្តិនៅ អ៊ុយក្រែន។ រុស្ស៊ី ចង់ឱ្យ ឥណ្ឌា ទិញប្រេង ១៥ លានធុង/ឆ្នាំ។ យ៉ាងនេះក្ដី ការជជែកគ្នាទើបតែកើតឡើងនៅថ្នាក់រដ្ឋាភិបាលតែប៉ុណ្ណោះ ការសម្រេចចុងក្រោយគឺអាស្រ័យលើក្រុមហ៊ុននៅ ឥណ្ឌា។

ឥណ្ឌា បច្ចុប្បន្នគឺជាអ្នកនាំចូលប្រេងច្រើនជាងគេលំដាប់ទីពីរនៅ អាស៊ី ហើយក៏ជាប្រទេសមួយក្នុងចំណោមប្រទេសតិចតួចដែលបង្កើនការបញ្ជាទិញប្រេងពី រុស្ស៊ី។ ប្រេងរបស់ រុស្ស៊ី កំពុងបង្កើនវត្តមាននៅ ទ្វីបអាស៊ី នៅពេលត្រូវបណ្ដាប្រទេសលោកខាងលិច និង សហរដ្ឋអាម៉េរិក បដិសេធ ដោយសារតែសង្គ្រាមនៅ អ៊ុយក្រែន។ អតិថិជនសំខាន់របស់ រុស្ស៊ី បច្ចុប្បន្នគឺ ឥណ្ឌា និង ចិន។

April 1, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មីជាង ៥០ នាក់ទៀត ក្នុងថ្ងៃទី ៣១ មីនា ២០២២

អ្នកវិជ្ជមានថ្មីនឹង កូវីដ-១៩ ទាំង ៥៧ នាក់ ដែលទើបតែបានរកឃើញ គឺសុទ្ធតែជាករណីឆ្លងក្នុងសហគមន៍ និងសុទ្ធតែវិជ្ជមាននឹង អូមីក្រុង។

April 1, 2022

Author: សឿន សំណាង