ការរួមផ្សំជាមួយនឹងកត្តាបច្ចេកវិទ្យា បានជួយឱ្យតម្លៃភាគហ៊ុនរបស់ក្រុមហ៊ុនផលិតនំភីហ្សា Domino កើន ៣២ ដង ក្នុងអំឡុងជិត ១០ ឆ្នាំ។
អតីតនាយកប្រតិបត្តិ របស់ Domino លោក Patrick Doyle ធ្លាប់បាននិយាយច្រើនដងក្នុងរយៈពេលច្រើនឆ្នាំកន្លងថា «យើងខ្ញុំគឺជាក្រុមហ៊ុនបច្ចេកវិទ្យាលក់នំភីហ្សា»។ ដូច្នេះតើដំណើរឆ្ពោះទៅជា «ក្រុមហ៊ុនបច្ចេកវិទ្យាដើរលក់នំភីហ្សា» របស់ Domino កើតឡើងដោយរបៀបណា?
ក្រោយមួយរយៈពេលនៃការរីកចម្រើននៅក្នុងអំឡុងចុងសតវត្សរ៍ទី ២០ ក្រុមហ៊ុន Domino ក៏បានឈានចូលដល់ដំណាក់កាលធម្មតា «ដូចគេ ដូចឯង» នៅដើមសតវត្សរ៍ទី ២។ វិបត្តិហិរញ្ញវត្ថុឆ្នាំ ២០០៨ បានប៉ះពាល់ដល់ក្រុមហ៊ុនទាំងឡាយនៅទូទាំងសកលលោក ហើយ Domino ក៏មិនបានរួចខ្លួនដែរ ដោយជាប់បំណុលរហូតដល់ ១.៧ ពាន់លានដុល្លារ។
ដើម្បីបន្ថយសម្ពាធផ្នែកហិរញ្ញវត្ថុ Domino បានកាត់បន្ថយការចំណាយទៅលើវត្ថុធាតុដើម ប៉ុន្តែ ប្រការនេះបានធ្វើឱ្យគុណភាពនំភីហ្សារបស់ពួកគេត្រូវធ្លាក់ចុះ ហើយអតិថិជនក៏ចាប់ផ្ដើមចាកចេញ។ ក្នុងអំឡុងពីឆ្នាំ ២០០៦ ដល់ ២០០៨ ប្រាក់ចំណូលក្នុងស្រុករបស់ក្រុមហ៊ុននេះបានថយចុះ ១០%។ ហាងដែលក្រុមហ៊ុននេះផ្ដល់សិទ្ធិក៏ថយចុះអស់ ១០០ ហាង ខណៈដែលតម្លៃភាគហ៊ុនក៏ដាំក្បាលចុះមកនៅក្រោម ៣ ដុល្លារ/ហ៊ុន។
នៅពេលជួបការលំបាកខ្លាំង ក្រុមហ៊ុននេះបានសម្រេចចិត្តប្ដូរផ្លាស់វិធីសាស្ត្រធ្វើជំនួញ។ ដំបូង ពួកគេបានធ្វើយុទ្ធនាការឃោសនាដើម្បីទទួលស្គាល់ថា គុណភាពនំភីហ្សារបស់ពួកគេពិតជាអន់ថយ។ ក្រោយមក ពួកគេបានសន្យាជាមួយអតិថិជនថា គុណភាពនំនឹងត្រូវបានផ្លាស់ប្ដូរ។ ទាំងនេះគឺជាយុទ្ធនាការឃោសនាដែលទទួលបានជោគជ័យបំផុត។
បន្ទាប់មកទៀត ពួកគេចាប់ផ្ដើមវិនិយោគកាន់តែច្រើនទៅលើកត្តាបច្ចេកវិទ្យា។ នេះគឺជា «អាវុធ» សំខាន់ដែលបានជួយឱ្យ Domino យកឈ្នះលើ Pizza Hut កាលពីឆ្នាំ ២០១៧។
ឆ្នាំ ២០០៨ Domino បានផ្ដើមប្រើប្រាស់កម្មវិធីបច្ចេកវិទ្យាដែលអនុញ្ញាតឱ្យអតិថិជនអាចតាមដានដំណើរការនៃការប្រគល់នំភីហ្សារបស់ពួកគេ។ ប្រការនេះមិនត្រឹមតែជួយឱ្យអតិថិជនមានទំនុកចិត្តប៉ុណ្ណោះទេ តែក៏ជួយឱ្យ Domino ធ្វើជំនួញប្រកបដោយប្រសិទ្ធភាពនៅក្នុងផ្នែកដឹកជញ្ជូន។
អតីត CEO របស់ Domino លោក Ritch Allison និយាយថា «ចុងភៅនឹងដឹងបានថា នៅពេលណាពួកគេគួរត្រៀបអាហារដោយយោងទៅលើទិន្នន័យស្ដីពីដំណើរការនៃការដឹកជញ្ជូន។ បន្ទាប់ពីអ្នកដឹកជញ្ជូនត្រលប់មកវិញ ចុងភៅអាចប្រកាសឱ្យដឹងថា ផ្លូវណាដែលចំណេញបំផុតសម្រាប់ការធ្វើដំណើរទៅប្រគល់ទំនិញ។
ឆ្នាំ ២០១៤ ក្រុមហ៊ុននេះបានដាក់ឱ្យប្រើប្រាស់ជំនួយការនិម្មិត AI Dom ជួយឱ្យអតិថិជនបញ្ជាទិញតាមរយៈសំឡេងនិយាយ។ យោងតាមទិន្នន័យចាស់ ជំនួយការ AI Dom ថែមទាំងអាចដឹងបាននូវប្រភេទអាហារដែលអតិថិជនចូលចិត្ត ហើយក្រោយមកក៏អាចបញ្ជាទិញជំនួសអតិថិជន។ មកដល់ដំណាក់កាលនេះ កេរ្ដិ៍ឈ្មោះរបស់ Domino កាន់តែល្អប្រសើរជាងមុន។
ព្រោះតែការប្ដូរផ្លាស់ខាងលើ ឆ្នាំ ២០១៥ ប្រាក់ចំណូលចំនួនពាក់កណ្ដាលរបស់ Domino គឺបានមកពីការលក់តាមអនឡាញ ដោយកាន់កាប់ចំណែកទីផ្សាររហូតដល់ ៣១% នៅទូទាំង សហរដ្ឋអាម៉េរិក។
ឆ្នាំ ២០១៦ ក្រុមហ៊ុន Domino បានក្លាយជាក្រុមហ៊ុនប្រគល់ទំនិញដោយប្រើប្រាស់យន្តហោះគ្មានមនុស្សបើកដំបូងគេក្នុងពិភពលោក។ បើទោះមិនទទួលបានជោគជ័យប៉ុន្មាន ប៉ុន្តែ ក្រុមហ៊ុនក៏បានកែលម្អបន្ថែម ដោយការប្រើប្រាស់យានគ្មានមនុស្សបើកបរ និងកងអគ្គិសនី។
ឆ្នាំ ២០១៩ Domino បានសហការជាមួយ Ford ដើម្បីបង្កើតរថយន្តគ្មានមនុស្សបើកប្រគល់ទំនិញស្វ័យប្រវត្ត។ ពួកគេក៏បានសហការជាមួយក្រុមហ៊ុន Rad Power ក្នុងការផលិតកង់អគ្គិសនីផងដែរ ដែលជួយឱ្យអ្នកប្រគល់ទំនិញ អាចយកនំ ១៥ ឈុតក្នុងពេលតែមួយ និងធ្វើដំណើរក្នុងល្បឿនលឿនជាង ៣០ គីឡូម៉ែត្រ/ម៉ោង។
ឆ្នាំ ២០១៩ ប្រាក់ចំណូលបានមកពីការលក់តាមអនឡាញ បានកើនដល់ជាង ៥០% ធៀបនឹងប្រាក់ចំណូលសរុបរបស់ក្រុមហ៊ុននេះនៅទូទាំងពិភពលោក។
ប្រាក់ចំណូលចេះតែកើនឡើងបន្ទាប់ពីមានការកែប្រែ។ ឆ្នាំ ២០១០ Domino រកបានតែ ១.៥ ពាន់លានដុល្លារ ប៉ុន្តែ ឆ្នាំ ២០១៨ តួលេខនេះបានឡើងដល់ ៣.៤ ពាន់លានដុល្លារ ពោលគឺកើន ១១% ជារៀងរាល់ឆ្នាំ គិតចាប់ពី ២០១០ ដល់ឆ្នាំ ២០១៨។ ក្នុងគ្រានោះដែរ តម្លៃភាគហ៊ុនរបស់ Domino ក៏បានកើនឡើងរហូតដល់ ៣,២០០% ស្មើនឹង ៣២ ដងឯណោះ ក្នុងរយៈពេលជិត ១០ ឆ្នាំ។
នៅពេលដែលអតិថិជនកំពុងមានទំនោរទៅរកបណ្ដាក្រុមហ៊ុនដែលផ្ដល់សេវាកម្មប្រកបដោយភាពងាយស្រួលសម្រាប់ពួកគេ ក្រុមហ៊ុនទាំងឡាយណាដែលចេះចាប់យកឱកាសបែបនេះនឹងមានប្រៀបជាងមិនតិចឡើយ នៅចំពោះមុខគូប្រជែង៕
