ក្នុងអំឡុង ២៤ ម៉ោង នៃថ្ងៃទី ២៥ ខែឧសភា ២០២២ កម្ពុជា មិនមានករណីជាសះស្បើយថ្មី អ្នកវិជ្ជមានថ្មី និងអ្នកស្លាប់ថ្មី ដោយសារកូវីដ-១៩ នោះទេ។
Author: សឿន សំណាង
ឱកាសល្អសម្រាប់បណ្ដាក្រុមហ៊ុនបច្ចេកវិទ្យានៅ កម្ពុជា! គម្រោងអភិវឌ្ឍនប្រព័ន្ធគ្រប់គ្រងការសិក្សា (LMS) កំពុងរង់ចាំដៃគូសហការ
វិទ្យាស្ថានតេជោសែន សាធារណការ និងដឹកជញ្ជូន កំពុងស្វែងរកក្រុមហ៊ុនបច្ចេកវិទ្យា ដើម្បីអភិវឌ្ឍនប្រព័ន្ធគ្រប់គ្រងការសិក្សា (LMS) បំណងចូលរួមលើកកម្ពស់ហេរដ្ឋារចនាសម្ព័ន្ធប្រកបដោយចីរភាព នេះបើតាមខ្លឹមសារនៃសេចក្ដីជូនដំណឹងដែលបានចុះផ្សាយនាព្រឹកថ្ងៃទី ២៦ ឧសភានេះ នៅលើទំព័របណ្ដាញសង្គមផ្លូវការរបស់ ក្រសួងសាធារណការ និងដឹកជញ្ជូន។
ការអភិវឌ្ឍនប្រព័ន្ធគ្រប់គ្រងការសិក្សានេះគឺជាផ្នែកមួយនៃការអនុវត្តគម្រោងកសាងសមត្ថភាព ស្តីពីវិធីសាស្ត្រថែទាំផ្លូវ-ថ្នល់ ដើម្បីលើកកម្ពស់ហេរដ្ឋារចនាសម្ព័ន្ធប្រកបដោយចីរភាព នៅបណ្តាប្រទេសកម្ពុជា-ឡាវ-វៀតណាម។ សេចក្ដីប្រកាសជូនដំណឹងបន្តថា «ការចូលរួមចំណែករបស់ លោក/លោកស្រី (ម្ចាស់ក្រុមហ៊ុនបច្ចេកវិទ្យា) នឹងជាចំណែកមួយនៃការសម្រេចបាននូវការអនុវត្តគម្រោង និងបានចូលរួមចំណែក ក្នុងការលើកកម្ពស់គុណភាពផ្លូវ-ថ្នល់ នៃប្រទេសកម្ពុជា ក៏ដូចជាប្រទេសឡាវ និងវៀតណាម ផងដែរ»។
លោក/លោកស្រី ជាម្ចាស់ក្រុមហ៊ុនបច្ចេកវិទ្យាដែលមានចំណាប់អារម្មណ៍ សូមផ្ញើទម្រង់ពាក្យស្នើសុំមកកាន់៖
Email: [email protected] និង cc ទៅកាន់ Email: [email protected]
ផុតកំណត់ទទួលពាក្យ៖ ថ្ងៃទី០៣ ខែមិថុនា ឆ្នាំ ២០២២
ព័ត៌មានបន្ថែមសូមស្កេន QR Code នៅក្នុងផ្ទាំងផ្សព្វផ្សាយ ឬទំនាក់ទំនងមកទូរស័ព្ទលេខ៖ 017 55 99 74 រៀងរាល់ម៉ោងធ្វើការ។
ទារក ១១ នាក់បានបាត់បង់ជីវិត ក្នុងហេតុការណ៍អគ្គិភ័យនៅ សេណេហ្គាល់
(សេណេហ្គាល់)-ប្រធានាធិបតីនៃប្រទេសអាហ្វ្រិកខាងលិច សេណេហ្គាល់ បានឱ្យដឹងថា ទារកចំនួន ១១ នាក់ បានស្លាប់នៅក្នុងករណីឆេះមន្ទីរពេទ្យមួយនៅក្នុងទីក្រុង Tivaouane ភាគខាងលិចនៃ ប្រទេសនេះ។
«ខ្ញុំមានការឈឺចាប់ និងរន្ធត់ណាស់នៅពេលបានដឹងថា ទារកចំនួន ១១ នាក់បានស្លាប់ក្នុងហេតុការណ៍អគ្គិភ័យនៅមន្ទីរសម្ភពនៃមន្ទីរពេទ្យរដ្ឋនៅ Tivaouane» ប្រធានាធិបតីសេណេហ្គាល់ Macky Sall បង្ហោះសារនៅលើ Twitter កាលពីថ្ងៃទី ២៥ ឧសភា។ «ខ្ញុំសូមសម្ដែងការសោកស្ដាយ អាណិតអាសូរយ៉ាងជ្រាលជ្រៅបំផុតចំពោះឪពុកម្ដាយ និងគ្រួសារទារកទាំងនោះ»។
យោងតាមអ្នកនយោបាយ Diop Sy ឧបទ្ទវហេតុដែលកើតឡើងនៅក្នុងមន្ទីរពេទ្យ Mame Abdou Aziz Sy Dabakh នេះ គឺបណ្ដាលមកពីបញ្ហាចរន្តអគ្គិសនី ហើយថា អណ្ដាតភ្លើងឆាបឆេះយ៉ាងលឿន។
ប្រធានាធិបតីសេណេហ្គាល់ Macky Sall ចំណែកអភិបាលក្រុង លោក Demba Diop ឱ្យដឹងថា «ទារកចំនួន ៣ នាក់ ត្រូវបានជួយសង្គ្រោះទាន់ពេល»។
ជំងឺអុតស្វា (monkeypox)! ក្រុមអ្នកជំនាញថា មិនចាំបាច់ចាក់វ៉ាក់សាំងបង្ការទូលំទូលាយ
ក្រុមអ្នកជំនាញផ្នែករោគឆ្លងនៅ អាហ្វ្រិកខាងត្បូង យល់ថា មិនចាំបាច់ធ្វើយុទ្ធនាការចាក់វ៉ាក់សាំងទ្រង់ទ្រាយធំដើម្បីទប់ស្កាត់ជំងឺអុតស្វា (monkeypox) និងមិនជឿថា ជំងឺនេះអាចផ្ទុះឆ្លងរាលដាលដូចកូវីដ-១។
គិតត្រឹមថ្ងៃទី ២៥ ឧសភា ប្រទេសអាហ្វ្រិកខាងត្បូង មិនទាន់មានករណីវិជ្ជមាន ឬករណីសង្ស័យណាមួយនៅឡើយ ទាក់ទងនឹងជំងឺអុតស្វា។ ប៉ុន្តែ ក្រុមមន្ត្រីសុខាភិបាលរបស់ប្រទេសនេះ កំពុងតែមានការប្រុងប្រយ័ត្នខ្ពស់បន្ទាប់ពីមនុស្សជាង ២០០ នាក់ បានឆ្លង និងសង្ស័យថាបានឆ្លងជំងឺនេះនៅក្នុងប្រទេសចំនួន ១៩ ក្នុងពិភពលោក ដែលភាគច្រើននៅ អឺរ៉ុប រាប់ចាប់ពីដើមខែឧសភានេះ។
វីរុសបំប្លែងខ្លួនថ្មីដែលបង្កជំងឺអុតស្វានៅក្នុងការផ្ទុះឆ្លងកន្លង ធ្លាប់បង្កអត្រានៃការស្លាប់ប្រហែល ១% ប៉ុន្តែ ក្នុងការផ្ទុះឆ្លងថ្មីនេះ មិនទាន់មានករណីស្លាប់នៅឡើយ។
កាលពីថ្ងៃទី ២៥ ឧសភា នាយកប្រតិបត្តិរបស់ វិទ្យាស្ថានស្រាវជ្រាវជំងឺឆ្លង (NICD) របស់ ប្រទេសអាហ្វ្រិកខាងត្បូង Adrian Puren បានអះអាងថា មកដល់បច្ចុប្បន្ន ការចាក់វ៉ាក់សាំងទូលំទូលាយដើម្បីទប់ស្កាត់ជំងឺអុតស្វា គឺជារឿងមិនចាំបាច់។ យុទ្ធនាការចាក់វ៉ាក់សាំងបង្ការគួរផ្ដល់អាទិភាពឱ្យជំងឺដទៃ ដែលមានហានិភ័យឆ្លង និងស្លាប់ក្នុងអត្រាខ្ពស់។ ក៏ប៉ុន្តែ លោកបញ្ជាក់ថា ក្រុមមន្ត្រីសុខាភិបាលត្រូវតែមានការប្រុងប្រយ័ត្នចំពោះការផ្ទុះឆ្លងរបស់ជំងឺអុតស្វាលើកនេះ។
អ្នកជំនាញ Jacqueline Yeyer មកពី NICD ថ្លែងថា ការផ្ទុះឆ្លងជំងឺអុតស្វាលើកនេះមិនមានអ្វីខុសប្លែកពីធម្មតា ក្រៅតែពីទីតាំងផ្ទុះឆ្លង។ លោកស្រីឱ្យដឹងថា ការវិភាគហ្សែនវីរុសបង្កជំងឺអុតស្វាដែលផ្ទុះឆ្លងនាបច្ចុប្បន្ន ក៏បានបង្ហាញថា មិនមានអ្វីខុសពីវីរុសបង្កជំងឺអុតស្វាដែលបានផ្ទុះឆ្លងកាលពីប៉ុន្មានឆ្នាំកន្លងនៅ នីហ្សេរីយ៉ា។ ជំងឺអុតស្វាបច្ចុប្បន្ន ផ្ទុះឆ្លងនៅតំបន់ផ្សេងដែលមិនមែននៅ អាហ្វ្រិកខាងលិច និង អាហ្វ្រិកកណ្ដាល។
លោកស្រី Weyer ជឿថា វីរុសអុតស្វាមិនឆ្លងរាលដាលលឿនដូចទៅនឹងវីរុសកូវីដ-១៩ ហើយរលកនៃការឆ្លងជំងឺអុតស្វាលើកនេះអាចត្រូវបានគ្រប់គ្រងយ៉ាងឆាប់រហ័សតាមរយៈការធ្វើតេស្ត ការតាមរកអ្នកពាក់ព័ន្ធ ការតាមដានអាការ និងការធ្វើចត្តាឡីស័ក ជំនួសឱ្យការចាក់វ៉ាក់សាំង។
ចំណែកសាស្ត្រាចារ្យ Moritz Kraemer មកពីសាកលវិទ្យាល័យ Oxford (អង់គ្លេស) វិញ យល់ថា បច្ចុប្បន្នមិនទាន់មានទិន្នន័យគ្រប់គ្រាន់សម្រាប់ធ្វើការព្យាករចំពោះការឆ្លងរាលដាលរបស់ជំងឺនេះ។
យោងតាម អង្គការសុខភាពពិភពលោក (WHO) ជំងឺអុតស្វា មិនងាយឆ្លងពីមនុស្សទៅមនុស្ស។ វីរុសនេះឆ្លងនៅពេលមនុស្សប៉ះពាល់គ្នាយូរជាមួយនឹងរបួស ធាតុរាវរបស់រាងកាយ តំណក់ទឹកផ្លូវដង្ហើម ឬសម្ភរដែលមានផ្ទុកវីរុស ដូចជា ភួយខ្នើយជាដើម។ អាការដំបូងនៃជំងឺអុតស្វា គឺ ក្ដៅខ្លួន ឈឺក្បាល ហើមកូនកណ្ដុរ ឈឺខ្នង និងសាច់ដុំ ក្រោយមកក៏ចេញពងមានខ្ទុះលើស្បែកនៅត្រង់មុខ ដៃ និងកន្លែងជាច្រើនទៀតរបស់រាងកាយ។ រោងសញ្ញាចាប់ផ្ដើមបង្ហាញខ្លួនក្នុងរង្វង់ពី ១ ទៅ ២ សប្ដាហ៍ រាប់ចាប់ពីពេលឆ្លងវីរុស។
ករណីវិជ្ជមាននឹង កូវីដ-១៩ ថ្មី នៅ កូរ៉េខាងជើង ខ្ពស់ជាងគេបង្អស់ក្នុងពិភពលោក
ក្នុងអំឡុង ២៤ ម៉ោងកន្លង ពិភពលោកបានរកឃើញករណីវិជ្ជមានថ្មីជាង ៥២៧,០០០ នាក់ និងស្លាប់ជាង ១,០០០ នាក់ ដោយសារកូវីដ-១។ កូរ៉េខាងជើង នាំមុខគេក្នុងករណីវិជ្ជមានថ្មី។
យោងតាម worldometer.info គិតត្រឹមម៉ោង ០៦ ព្រឹក នៃថ្ងៃទី ២៦ ឧសភា (ម៉ោងនៅ កម្ពុជា) ពិភពលោកបានរកឃើញអ្នកវិជ្ជមាននឹងកូវីដ-១៩ សរុបចំនួនជាង ៥២៩,៣៩៨,០០០ នាក់ ក្នុងនោះមានជាង ៦,៣០៥,០០០ នាក់បានបាត់ជីវិត។ ករណីវិជ្ជមានថ្មីក្នុងរយៈពេល ២៤ ម៉ោងកន្លងគឺ ៥២៧,៧១១ នាក់ និងស្លាប់ថ្មីចំនួន ១,២៥៩ នាក់។
ក្នុងអំឡុង ២៤ ម៉ោងកន្លង កូរ៉េខាងជើង នាំមុខគេក្នុងពិភពលោកស្ដីពីចំនួនអ្នកឆ្លងកូវីដ-១៩ ថ្មី ដោយបានរកឃើញចំនួន ១១៥,៩៨០ ករណី។ ឈរលំដាប់ទីពីរគឺ សហរដ្ឋអាម៉េរិក ដោយរកឃើញជាង ៥១,០០០ ករណី។ ទីបីគឺ អាល្លឺម៉ង់ រកឃើញជាង ៤៧,០០០ ករណី។
ក្នុងអំឡុងពេលខាងលើ សហរដ្ឋអាម៉េរិក ឈរលំដាប់ទីមួយស្ដីពីតួលេខនៃករណីស្លាប់ថ្មីដោយសារកូវីដ-១៩ (១៥៤ នាក់), អាល្លឺម៉ង់ ឈរលំដាប់ទីពីរ (១៤៧ ករណី) និង អ៊ីតាលី ឈរលំដាប់ទីបី (១៣៧ ករណី)។
សហរដ្ឋអាម៉េរិក នៅតែជាប្រទេសដែលរងផលប៉ះពាល់ធ្ងន់ធ្ងរជាងគេដោយសារកូវីដ-១។ ករណីវិជ្ជមានសរុបនៅ សហរដ្ឋអាម៉េរិក គឺជាង ៨៥ លាននាក់ ក្នុងនោះមានករណីស្លាប់ជាង ១ លាននាក់ ខណៈដែល ឥណ្ឌា ឈរលំដាប់ទីពីរ និង ប្រេស៊ីល ឈរលំដាប់ទីបី។
ចិន-វៀតណាម បើកចក្រព្រំដែន Jinshuihe- Ma Lu Thang ឡើងវិញហើយ
នៅថ្ងៃទី ២៥ ឧសភានេះ មន្ត្រីព្រំដែនខាងជើងរបស់ វៀតណាម បានឱ្យដឹងថា សកម្មភាពនាំចេញ-នាំចូលផលិតផលតាមច្រកទ្វារព្រំដែន Ma Lu Thang (វៀតណាម) និង Jinshuihe (ចិន) ចាប់ផ្ដើមដំណើរការឡើងវិញ ក្រោយផ្អាកសកម្មភាពអស់មួយរយៈពេលយូរ។
ភាគីទាំងសងខាង បានឯកភាពគ្នាលើចំណុចជាច្រើនដើម្បីបង្កភាពងាយស្រួលសម្រាប់ការដោះដូរទំនិញតាមច្រកព្រំដែននេះ ប៉ុន្តែ ក៏ត្រូវកំណត់យ៉ាងតឹងរឹងដើម្បីធានាលើកការអនុវត្តវិធានការទប់ស្កាត់កូវីដ-១៩ ផងដែរ។
មុននោះ ដោយសារតែកូវីដ-១៩ មានភាពស្មុគស្មាញខ្លាំង ភាគីខាងចិន បានផ្អាកការនាំចូលទំនិញពី ទឹកដីវៀតណាម ដែលឆ្លងកាត់ច្រកទ្វារព្រំដែន Jinshuihe-Ma Lu Thang ចាប់ពីថ្ងៃទី ២៣ តុលា ២០២១ ធ្វើឱ្យកសិផលរបស់ វៀតណាម និងការដោះដូរពាណិជ្ជកម្មអន្តរជាតិតាមច្រកព្រំដែននេះជួបការលំបាកខ្លាំង។
ប្រាក់ចំណូលរបស់ក្រុមហ៊ុន Chanel កើនឡើងខ្ពស់ដោយសារតែកែប្រែតម្លៃជាបន្តបន្ទាប់
ប្រាក់ចំណូលក្នុងឆ្នាំ ២០២១ របស់ក្រុមហ៊ុនបារាំង Chanel គឺ ១៥.៦ ពាន់លានដុល្លារអាម៉េរិក។
ឆ្នាំ ២០២១ ប្រាក់ចំណូលរបស់ក្រុមហ៊ុន Chanel គឺ ១៥.៦ ពាន់លានដុល្លារអាម៉េរិក នេះបើតាមទិន្នន័យដែលក្រុមហ៊ុននេះបានចែករំលែកជាមួយ Business of Fashion។ តួលេខនេះកើនឡើង ៥០% ធៀបនឹងចំណូលកាលពីឆ្នាំ ២០២០ និង ២៣% ធៀបនឹងឆ្នាំ ២០១៩។
ក្រុមហ៊ុននេះរកបានប្រាក់ចំណូលខ្ពស់ បើទោះជាបានចំណាយរហូតដល់ ១.៨ ពាន់លានដុល្លារទៅលើសកម្មភាពទីផ្សារកាលពីឆ្នាំកន្លង។ ផលិតផលដែលក្រុមហ៊ុន Chanel លក់ដាច់ជាងគេគឺខោអាវ គ្រឿងអលង្ការ និងនាឡិកា។ ផលិតផលទឹកអប់ ផលិតផលថែរក្សាសម្រស់របស់ក្រុមហ៊ុននេះក៏ទទួលបានជោគជ័យច្រើនផងដែរ។
នាយកផ្នែកហិរញ្ញវត្ថុ Patrick Blondiaux របស់ក្រុមហ៊ុន Chanel ឱ្យដឹងថា កំណើននៃការលក់ផលិតផលរបស់ក្រុមហ៊ុនគឺដោយសារការរួមផ្សំនៃ «ការធ្វើឱ្យមានតុល្យភាព» រវាងការដំឡើងថ្លៃ និងការបង្កើនបរិមាណផលិតផល។ Chanel បានដំឡើងថ្លៃ ៣ លើកក្នុងឆ្នាំ ២០២១ និង ១ លើកនៅដើមឆ្នាំនេះ ព្រោះតែការចំណាយលើវត្ថុធាតុដើម និងប្រាក់ឈ្នួលកាន់តែខ្ពស់។ ខែមីនាកន្លងទៅ ផលិតផលមួយចំនួនរបស់ Chanel ត្រូវបានលក់ថ្លៃខ្ពស់ទ្វេដង ធៀបនឹងតម្លៃមុនវិបត្តិកូវីដ-១៩។
បើទោះជាមានការប្រែប្រួលដូចខាងលើ ប៉ុន្តែ Chanel នៅតែរក្សាគោលការណ៍មួយ នោះគឺ អតិថិជននឹងត្រូវទិញនៅក្នុងហាងដោយផ្ទាល់។
ស្ថានីយចុះចតរបស់ ណាសា លើភពអង្គារ ថតរូបសែលហ្វ៊ីចុងក្រោយ មុននឹងលាមនុស្សលោក
ស្ថានីយចុះចត InSight បញ្ជូនរូបថតសែលហ្វ៊ីមកកាន់ផែនដី បង្ហាញថា ផ្ទាំងសូឡារបស់យាននេះពេញដោយធូលី ដែលជាឧបសគ្គចំពោះការបន្តបេសកកម្មរបស់វានៅលើពិភពអង្គារ។
បណ្ដារូបថតសែលហ្វ៊ី លើពិភពអង្គារ បានផ្ដល់ព័ត៌មានដ៏មានតម្លៃស្ដីពីស្ថានភាពរបស់យាន ដល់ក្រុមអ្នកវិទ្យាសាស្ត្រនៅលើផែនដី និងជួយឱ្យក្រុមអ្នកស្រលាញ់វិទ្យាសាស្ត្រអវកាស មានអារម្មណ៍ថា បានភ្ជាប់ទំនាក់ទំនងជាមួយក្រុម «អ្នកផ្សងព្រេង» នៅលើភពក្រហមដ៏សែនឆ្ងាយនេះ។
កាលពីថ្ងៃទី ២៤ ឧសភា មជ្ឈមណ្ឌលពិសោធន៍កម្លាំងរុញច្រាន (JPL) របស់ ណាសា បានចែករំលែកលើបណ្ដាញសង្គមនូវបណ្ដារូបថតដែលអាចជារូបសែលហ្វ៊ីចុងក្រោយរបស់ស្ថានីយចុះចត InSight ដែលបានថតកាលពីថ្ងៃទី ២៤ មេសា ឆ្នាំ ២០២២។ JPL ក៏បានប្រៀបធៀបរូបថតថ្មីនេះជាមួយនឹងរូបសែលហ្វ៊ី ដំបូង ដែលថតកាលពីខែធ្នូ ២០១៨ ផងដែរ។ ក្នុងការប្រៀបធៀប គេឃើញថា នៅក្នុងរូបថតថ្មីបំផុតនេះ ផ្ទាំងសូឡារបស់ InSight ពេញដោយធូលី។
រូបថតសែលហ្វ៊ីកាលពីថ្ងៃទី ២៤ មេសា ត្រូវបានប្រមូលផ្ដុំពីបណ្ដារូបថតជាច្រើនសន្លឹកដែលថតដោយកាមេរ៉ាបំពាក់លើដៃយន្តរបស់ InSight។ ដៃយន្តនេះ តាមគម្រោងនឹងត្រូវបានដាក់ឱ្យ «ចូលនិវត្តន៍» នៅខែឧសភានេះ។
ដោយសារតែបញ្ហាជាច្រើនកើតឡើងព្រោះតែស្រទាប់ធូលីដ៏ក្រាស់ យាន InSight គ្រោងនឹងត្រូវបាន ណាសា បញ្ចប់បេសកកម្មនៅចុងឆ្នាំ ២០២២។ InSight បានចុះចតលើពិភពអង្គារ កាលពីចុងឆ្នាំ ២០១៨។ ការដែលត្រូវលា InSight នេះគឺជារឿងគួរឱ្យស្រងេះស្រងោច ប៉ុន្តែ InSight ក៏បានសម្រេចភារកិច្ចជាច្រើនហើយដែរ ដូចជា ការបង្កើតផែនទីខាងក្នុងភពអង្គារ និងរកឃើញរញ្ជួយដីកម្លាំងខ្លាំងបំផុតនៅលើភពនេះជាដើម។ល។
ស្ថានភាពជំងឺកូវីដ-១៩ នៅ កម្ពុជា សម្រាប់ថ្ងៃទី ២៥ ខែឧសភា ២០២២
ក្នុងអំឡុង ២៤ ម៉ោង នៃថ្ងៃទី ២៤ ខែឧសភា ២០២២ កម្ពុជា មិនមានករណីជាសះស្បើយថ្មី អ្នកវិជ្ជមានថ្មី និងអ្នកស្លាប់ថ្មី ដោយសារកូវីដ-១៩ នោះទេ។
ដើម្បីបង្កហានិភ័យក្ស័យធនដល់ រុស្ស៊ី ក្រសួងហិរញ្ញវត្ថុអាម៉េរិក នឹងទប់ស្កាត់ការសងបំណុលរបស់ រុស្ស៊ី ចាប់ពីថ្ងៃនេះ
ក្រសួងហិរញ្ញវត្ថុអាម៉េរិក ប្រកាសថា បណ្ដាធនាគារ និងបុគ្គលជាពលរដ្ឋអាម៉េរិក នឹងត្រូវបានហាមចំពោះការទទួលយកខ្ទង់ប្រាក់ទូទាត់មូលបត្របំណុលពី រដ្ឋាភិបាលរុស្ស៊ី។
ម៉ោង ០ នៃថ្ងៃទី ២៥ ឧសភា (ម៉ោងនៅ New York) គឺជាពេលវេលាដែលបទបញ្ជាលើកលែងរបស់ សហរដ្ឋអាម៉េរិក ចំពោះ រុស្ស៊ី ត្រូវអស់សុពលភាព។ «OFAC (ការិយាល័យគ្រប់គ្រងទ្រព្យបរទេស) នឹងមិនបន្តសុពលភាពទៀតឡើយ» ក្រសួងហិរញ្ញវត្ថុអាម៉េរិក ប្រកាសដូច្នេះកាលពីថ្ងៃទី ២៤ ឧសភា។
បទបញ្ជាលើកលែងការហាមទទួលយកខ្ទង់ប្រាក់ទូទាត់លើមូលបត្របំណុលពី រដ្ឋាភិបាលរុស្ស៊ី ត្រូវបានលើកឡើងបន្ទាប់ពី សហរដ្ឋអាម៉េរិក ប្រកាសដាក់ទណ្ឌកម្មលើ រុស្ស៊ី ព្រោះតែសង្គ្រាមនៅ អ៊ុយក្រែន កាលពីចុងខែកុម្ភៈ។ បទបញ្ជានេះជួយឱ្យ រុស្ស៊ី នៅតែអាចទូទាត់សងក្នុងមូលបត្របំណុលបរទេស និងរួចផុតពីហានិភ័យក្ស័យធន។
គិតមកដល់បច្ចុប្បន្ន ជិត ៣ ខែបន្ទាប់ពីសង្គ្រាមនៅ អ៊ុយក្រែន បានផ្ទុះឡើង រុស្ស៊ី នៅតែបង្ហើយការទូទាត់ប្រាក់ជូនម្ចាស់បំណុល។ រុស្ស៊ី ធ្លាប់ជួបការលំបាកជាច្រើនលើក ដោយសារតែទណ្ឌកម្ម បណ្ដាលឱ្យពួកគេបាត់បង់ប្រភពចំណូលពីបរទេស និងមិនអាចចូលប្រើប្រាស់ខ្ទង់ថវិការបស់ខ្លួននៅបរទេស។
កាលពីសប្ដាហ៍កន្លង រដ្ឋមន្ត្រីក្រសួងហិរញ្ញវត្ថុអាម៉េរិក Janet Yellen ក៏បានឱ្យដឹងថា «មានលទ្ធភាព» ដែលថា ក្រសួងនេះនឹងមិនបន្តសុពលភាពចំពោះការលើកលែងការហាមទទួលយកខ្ទង់ប្រាក់ទូទាត់លើមូលបត្របំណុលពី រដ្ឋាភិបាលរុស្ស៊ី ព្រោះថា នេះគ្រាន់តែជាវិធានការបណ្ដោះអាសន្ន។
Hassan Malik អ្នកវិភាគប្រចាំក្រុមហ៊ុន Loomis Sayles & Co (Boston សហរដ្ឋអាម៉េរិក) អះអាងថា ការដែលមិនអាចបន្តទទួលបានការលើកលែងទណ្ឌកម្ម «ប្រាកដជានឹងធ្វើឱ្យហានិភ័យនៃការក្ស័យធនរបស់ រុស្ស៊ី កើនឡើង»។ ប៉ុន្តែ ការសម្រេចរបស់ សហរដ្ឋអាម៉េរិក នេះ ធ្វើឱ្យក្រុមអ្នកវិនិយោគបរទេសពិបាកក្នុងការទទួលយកការទូទាត់បំណុល និងមិនប្រាកដថា ធ្វើឱ្យ រុស្ស៊ី ត្រូវក្ស័យធន។
ម្ចាស់បំណុលដែលមិនមែនជាពលរដ្ឋអាម៉េរិក នៅតែអាចទទួលយកការទូទាត់បំណុលពី រុស្ស៊ី។ ដោយសារតែម្ចាស់បំណុលភាគច្រើនរបស់ រុស្ស៊ី គឺនៅ អឺរ៉ុប ដូច្នេះ ម្ចាស់បំណុលនៅ សហរដ្ឋអាម៉េរិក អាចនឹងមិនមានច្រើនគ្រប់គ្រាន់ដើម្បីធ្វើឱ្យ រុស្ស៊ី ត្រូវប្រកាសក្ស័យធន នេះបើតាម ITI Capital ដែលជាក្រុមហ៊ុនឈ្មួញកណ្ដាលធំជាងគេមួយនៅ រុស្ស៊ី។
កាលពីថ្ងៃទី ២៧ ឧសភា រុស្ស៊ី ដល់ថ្ងៃត្រូវសងបំណុល ១០០ លានដុល្លារអាម៉េរិក។ ប៉ុន្តែ ដោយសារបទបញ្ជាលើកលែងទណ្ឌកម្មរបស់ អាម៉េរិក ជិតផុតកំណត់ រុស្ស៊ី ក៏បានចាប់ផ្ដើមទូទាត់ដល់ម្ចាស់បំណុលតាំងតែពីសប្ដាហ៍កន្លង។
បើសិនមិនបានសងបំណុលទាន់ពេល រុស្ស៊ី នឹងមានពេល ៣០ ថ្ងៃ ដើម្បីរកវិធីទូទាត់។ ដើមខែនេះ ពួកគេក៏បានសងបំណុលទាន់ពេលនៅនាទីចុងក្រោយ បន្ទាប់ពីខ្ទង់ប្រាក់សម្រាប់ទូទាត់បំណុលដំបូងត្រូវបានរាំងខ្ទប់។
ជាសរុប រុស្ស៊ី បច្ចុប្បន្ននៅជំពាក់បំណុលជាការប្រាក់នៃមូលបត្របំណុល ប្រហែល ១ ពាន់លានដុល្លារអាម៉េរិក ក្នុងឆ្នាំនេះ។ យ៉ាងនេះក្ដី រុស្ស៊ី ប្រហែលមិនជួបបញ្ហាធំឡើយ ព្រោះសម្បូរសាច់ប្រាក់សុទ្ធ ដែលបានមកពីការលក់ប្រេងឆៅ ឧស្ម័ន និងបណ្ដាទំនិញសំខាន់ៗជាច្រើនមុខផ្សេងទៀត។
ប្រាក់រូប្លរុស្ស៊ី មិនប្រែប្រួលច្រើនបន្ទាប់ពី សហរដ្ឋអាម៉េរិក ប្រកាសព័ត៌មានខាងលើ។ រូបិយប័ណ្ណនេះស្ថិតក្នុងក្រុមដែលមានការប្រែប្រួលល្អបំផុតពិភពលោកនាឆ្នាំនេះ និងតម្លៃបានកើនឡើង ៣០% ធៀបនឹងប្រាក់ដុល្លារអាម៉េរិក៕