សឿន សំណាង - La Reine Media

សភាអ៊ីរ៉ាក់ អនុម័តច្បាប់ «ហាមធ្វើប្រក្រតីភាព» ឡើងវិញ ជាមួយ ប្រទេសអ៊ីស្រាអែល

កាលពីថ្ងៃទី ២៦ ឧសភា សភារបស់ ប្រទេសអ៊ីរ៉ាក់ បានអនុម័តសេចក្ដីព្រាងច្បាប់មួយដែលហាមអាជ្ញាធរប្រទេសនេះ ធ្វើប្រក្រតីភាពឡើងវិញលើទំនាក់ទំនងជាមួយនឹង ប្រទេសអ៊ីស្រាអែល។ ឥរិយាបថនេះត្រូវបានធ្វើឡើងក្នុងគ្រាដែលប្រទេសមួយចំនួនក្នុង ពិភពអារ៉ាប់ បានធ្វើប្រក្រតីភាពទំនាក់ទំនងជាមួយ អ៊ីស្រាអែល ដោយមាន អាម៉េរិក ជាអ្នកផ្សះផ្សា។

ចាប់តាំងពី អ៊ីស្រាអែល ប្រកាសឯករាជ្យកាលពីឆ្នាំ ១៩៤៨ មកដល់បច្ចុប្បន្ន ប្រទេសអ៊ីរ៉ាក់ មិនធ្លាប់បានទទួលស្គាល់ រដ្ឋជ្វីហ្វ ម្ដងណាឡើយ ហើយពលរដ្ឋ និងក្រុមហ៊ុនរបស់ អ៊ីរ៉ាក់ ក៏មិនត្រូវបានអនុញ្ញាតឱ្យទៅកាន់ ប្រទេសអ៊ីស្រាអែល និងសហការណ៍ជាមួយប្រទេសនេះ។ ប៉ុន្តែ ច្បាប់ថ្មីដែលទើបត្រូវបាន សភាអ៊ីរ៉ាក់ អនុម័តនេះ រឹតតែមានភាពតឹងរឹងបន្ថែមទៀត ដោយអនុញ្ញាតឱ្យមានការដាក់ទោសទណ្ឌលើកិច្ចប្រឹងប្រែងទាំងឡាយដែលចង់ធ្វើប្រក្រតីភាពទំនាក់ទំនងរវាង ប្រទេសអ៊ីរ៉ាក់ និង ប្រទេសអ៊ីស្រាអែល។

ច្បាប់ខាងលើនេះត្រូវបានស្នើដោយ Moqtada al-Sadr ដែលជាអាចារ្យអ៊ីស្លាម និកាយ Shi’ite ក្នុងពេលដែលសម្ព័ន្ធមិត្តរបស់អាចារ្យរូបនេះ កំពុងកាន់កាប់សំឡេងភាគច្រើននៅសភា ដែលបានបោះឆ្នោតកាលពីខែតុលា ២០២១។ សម្ព័ន្ធមិត្តនេះមាននិន្នាការប្រឆាំងនឹងទំនាក់ទំនងជាមួយ អាម៉េរិក និង អ៊ីស្រាអែល។

គិតមកដល់បច្ចុប្បន្ន ប្រទេសអារ៉ាប់ មួយចំនួន ក្នុងនោះរួមមានទាំង អារ៉ាប់រួម (United Arab Emirates) និង បារ៉ែន ផងដែរ កំពុងលើកកម្ពស់ទំនាក់ទំនងជាមួយ អ៊ីស្រាអែល។ ចំណែក អារ៉ាប៊ីសាអូឌីត វិញ បានលើកឡើងនូវលក្ខខណ្ឌជាថ្នូរនឹងការធ្វើប្រក្រតីភាពជាមួយ អ៊ីស្រាអែល ដោយស្នើឱ្យដោះស្រាយសំណើបង្កើតរដ្ឋរបស់ជនជាតិ ប៉ាលេស្ទីន នៅលើដែនដីដែលត្រូវបាន អ៊ីស្រាអែល កាន់កាប់ចាប់តាំងពីការផ្ទុះសង្គ្រាមនៅ ជម្ឈិមបូព៌ា កាលពីឆ្នាំ ១៩៦៧។

May 27, 2022

ករណីឆ្លងជំងឺអុតស្វា (monkeypox) នៅ កាណាដា និង សហរដ្ឋអាម៉េរិក បន្តកើនឡើង

ស្ថាប័នសុខាភិបាលសាធារណៈរបស់ ប្រទេសកាណាដា (PHAC) កាលពីម្សិលមិញ បានរកឃើញអ្នកឆ្លងជំងឺអុតស្វា (monkeypox) បន្ថែមទៀត។

ក្នុងសេចក្ដីប្រកាស PHAC ឱ្យដឹងថា ក្រៅពីករណីឆ្លងជំងឺអុតស្វាចំនួន ១៦ នាក់ដែលបានរកឃើញមុននោះនៅ Quebec បច្ចុប្បន្ន កាណាដា មានករណីឆ្លងសរុប ២៦ ហាក់ហើយ ក្នុងនោះរួមមាន ២៥ ករណីនៅ Quebec និង ១ ករណីនៅ Ontario។ ការប្រកាសខាងលើក៏បានអះអាងថា អាចនឹងមានច្រើនករណីទៀតនៅក្នុងរយៈពេលប៉ុន្មានថ្ងៃខាងមុខ គ្រាដែលមន្ទីរពិសោធន៍របស់ PHAC បន្តទទួលបានសំណាកថ្មីពីមូលដ្ឋាននានា។

ក្នុងថ្ងៃដដែល មជ្ឈមណ្ឌលទប់ស្កាត់ និងគ្រប់គ្រងជំងឺឆ្លង (CDC) របស់ សហរដ្ឋអាម៉េរិក ក៏បានប្រកាសថា បានរកឃើញអ្នកឆ្លងជំងឺអុតស្វាចំនួន ៩ ករណីនៅក្នុង ៧ រដ្ឋ រួមមាន California, Florida, Massachusetts, New York, Utah, Virginia និង វ៉ាស៊ីងតោន។ ក្នុងពេលដ៏ខ្លីខាងមុខ នឹងមានករណីឆ្លងថ្មីជាច្រើនទៀត នេះបើតាមការវាយតម្លៃរបស់ក្រុមមន្ត្រីសុខាភិបាលអាម៉េរិក ខណៈដែល CDC អាម៉េរិក ស្នើឱ្យក្រុមវេជ្ជបណ្ឌិត និងប្រជាជនបង្កើនការប្រុងប្រយ័ត្នជាមួយនឹងរោគសញ្ញានៃជំងឺនេះ។

យោងតាម អង្គការសុខភាពពិភពលោក (WHO) ជំងឺអុតស្វា មិនងាយឆ្លងពីមនុស្សទៅមនុស្ស។ វីរុសនេះឆ្លងនៅពេលមនុស្សប៉ះពាល់គ្នាយូរជាមួយនឹងរបួស ធាតុរាវរបស់រាងកាយ តំណក់ទឹកផ្លូវដង្ហើម ឬសម្ភរដែលមានផ្ទុកវីរុស ដូចជា ភួយខ្នើយជាដើម។ អាការដំបូងនៃជំងឺអុតស្វា គឺ ក្ដៅខ្លួន ឈឺក្បាល ហើមកូនកណ្ដុរ ឈឺខ្នង និងសាច់ដុំ ក្រោយមកក៏ចេញពងមានខ្ទុះលើស្បែកនៅត្រង់មុខ ដៃ និងកន្លែងជាច្រើនទៀតរបស់រាងកាយ។ រោងសញ្ញាចាប់ផ្ដើមបង្ហាញខ្លួនក្នុងរង្វង់ពី ១ ទៅ ២ សប្ដាហ៍ រាប់ចាប់ពីពេលឆ្លងវីរុស។

May 27, 2022

តួកគី ចាប់បាន «មេបញ្ជាការ» ថ្មីរបស់ក្រុមភេរវករ រដ្ឋអ៊ីស្លាម (Islamic State)

ក្រុមមន្ត្រីនៃ ប្រទេសតួកគី បានឱ្យដឹងថា អាជ្ញាធរប្រទេសនេះបានចាប់ខ្លួនមេបញ្ជាការថ្មីរបស់ក្រុមភេរវករ រដ្ឋអ៊ីស្លាម (IS) នៅក្នុងការឆ្មក់ចូលចាប់ខ្លួននៅឯ ទីក្រុងអ៊ីស្តង់ប៊ុល (Istanbul)។

ក្រុមមន្ត្រីជាន់ខ្ពស់របស់ តួកគី សុំមិនបញ្ចេញឈ្មោះ កាលពីថ្ងៃទី ២៦ ឧសភា បានបង្ហើបឱ្យដឹងថា កម្លាំងចារកម្ម និងប៉ូលិសប្រឆាំងភេរវកម្មរបស់ប្រទេសនេះ បានឆ្មក់ចូលចាប់ខ្លួនបុរសម្នាក់នៅ អ៊ីស្តង់ប៊ុល ដែលពួកគេជឿថា ជាមេបញ្ជាការថ្មីរបស់ក្រុមភេរវករ អង្គការរដ្ឋអ៊ីស្លាម (IS) ក្រោយពីមេភេរវករ Abu Ibrahim al-Qurashi ត្រូវបាន អាម៉េរិក កម្ចាត់កាលពីខែកុម្ភៈ។

គេហទំព័រ OdaTV របស់ តួកគី បានឱ្យដឹងថា បុរសដែលត្រូវបានចាប់ខ្លួននោះគឺ Abu al-Hassan al-Qurayshi ប៉ុន្តែ មិនបានឱ្យដឹងអំពីព័ត៌មានលម្អិត។ ព័ត៌មាននានាកន្លងមកក៏បានបញ្ជាក់ថា មេបញ្ជាការថ្មីនៃក្រុមភេរវករ IS មានឈ្មោះថា Abu al-Hassan al-Qurayshi ប៉ុន្តែ មានព័ត៌មានតិចតួចនៅឡើយទាក់ទងនឹងបុរសរូបនេះ។

ប្រធានាធិបតីតួកគី Recep Tayyip Erdogan ត្រូវបានគេជឿថា បានទទួលរបាយការណ៍ស្ដីពីយុទ្ធនាការឆ្មក់ចូលចាប់ខ្លួនមេភេរវករខាងលើកាលពីថ្ងៃទី ២៦ ឧសភា ហើយគ្រោងនឹងប្រកាសព័ត៌មាននេះជាផ្លូវការនៅប៉ុន្មានថ្ងៃខាងមុខ។

ក្រុមមន្ត្រីតួកគី ឱ្យដឹងថា ការចាប់ខ្លួននេះត្រូវបានធ្វើឡើងក្រោយពីអាជ្ញាធរបានតាមដានជម្រករបស់បុរសនេះអស់រយៈពេលយ៉ាងយូរ។ យោងតាម OdaTV ប៉ូលិសតួកគី មិនបានផ្ទុះអាវុធឡើយនៅក្នុងការវាយឆ្មក់នេះ។

តួកគី បានប្រយុទ្ធជាមួយ អង្គការរដ្ឋអ៊ីស្លាម នៅក្នុងប្រទេសនេះ និងនៅ ប្រទេសស៊ីរី ក្នុងប៉ុន្មានឆ្នាំចុងក្រោយនេះ។ ព័ត៌មានស្ដីពីការចាប់ខ្លួនមេភេរវករថ្មីនេះត្រូវបានលើកឡើងក្នុងគ្រាដែល រដ្ឋាភិបាលក្រុងអង់ការ៉ា ប្រកាសថា ជិតបើកយុទ្ធនាការយោធាថ្មីនៅ ស៊ីរី ដើម្បីប្រឆាំងនឹងក្រុមជនជាតិ Kurd ដែលមាន សហរដ្ឋអាម៉េរិក នៅពីក្រោយ ប៉ុន្តែ ត្រូវបាន តួកគី ចាត់ទុកជាក្រុមភេរវករ។

អតីតមេបញ្ជាការរបស់ ក្រុមភេរវកររដ្ឋអ៊ីស្លាម Abu Ibrahim al-Qurashi ត្រូវបានកងកម្លាំងពិសេសរបស់ សហរដ្ឋអាម៉េរិក វាយឆ្មក់ចូលក្នុងផ្ទះនៅ Idlib ភាគពាយព្យនៃ ប្រទេសស៊ីរី កាលពីថ្ងៃទី ៣ កុម្ភៈ។ យោងតាម មន្ត្រីសេតវិមាន និងក្រុមមន្ត្រីការពារជាតិអាម៉េរិក al-Qurashi បានបំផ្ទុះគ្រាប់បែកអត្តឃាតដើម្បីបញ្ចៀសការចាប់ខ្លួន។

May 27, 2022

មន្ត្រីសេតវិមាន ព្យាករថា ការដែល រុស្ស៊ី ក្ស័យធន នឹងមិនប៉ះពាល់ធ្ងន់ធ្ងរដល់ អាម៉េរិក

មន្ត្រីសេតវិមាន បានឱ្យដឹងថា សហរដ្ឋអាម៉េរិក អះអាងថា សេណារីយោ រុស្ស៊ី ក្ស័យធន នឹងមិនប៉ះពាល់ធ្ងន់ធ្ងរដល់សេដ្ឋកិច្ចរបស់ សហរដ្ឋអាម៉េរិក និងពិភពលោកឡើយ។

«យើងព្យាករថា ផលប៉ះពាល់ដល់សេដ្ឋកិច្ចអាម៉េរិក ក៏ដូចជាពិភពលោកនៅក្នុងសេណារីយោនេះ មិនគួរឱ្យព្រួយបារម្ភឡើយ ព្រោះថា រុស្ស៊ី បច្ចុប្បន្នត្រូវបានដាក់ឱ្យនៅឯកោផ្នែកហិរញ្ញវត្ថុស្រាប់ហើយ» លេខាសារព័ត៌មានរបស់ សេតវិមាន Karine Jean-Pierre ថ្លែងនៅក្នុងសន្និសីទសារព័ត៌មានកាលពីថ្ងៃទី ២៦ ឧសភា។

លោកស្រីឱ្យដឹងថា ក្រសួងហិរញ្ញវត្ថុអាម៉េរិក នៅតែតាមដានយ៉ាងយកចិត្តទុកដាក់លើស្ថានការណ៍ និងរក្សាការពិភាក្សាជាមួយសហគមន៍ហិរញ្ញវត្ថុអន្តរជាតិ។

រដ្ឋាភិបាលអាម៉េរិក កាលពីថ្ងៃទី ២៥ ឧសភា ប្រកាសថា មិនបន្តសុពលភាពនៃបទបញ្ជាបន្ធូរបន្ថយទណ្ឌកម្មផ្នែកហិរញ្ញវត្ថុលើ រុស្ស៊ី ដែលបានអនុញ្ញាតឱ្យប្រទេសនេះទូទាត់សងបំណុលដល់ម្ចាស់បំណុលនៅ សហរដ្ឋអាម៉េរិក ដែលបានទិញមូលបត្របំណុលរបស់ រដ្ឋាភិបាលរុស្ស៊ី។ ការសម្រេចចិត្តផ្អាកការដាក់ទណ្ឌកម្មមុននោះ បានអស់សុពលភាពកាលពីថ្ងៃទី ២៥ ឧសភា ធ្វើឱ្យ រុស្ស៊ី មិនអាចបន្តការទូទាត់បំណុល និងការប្រាក់ដែលដល់ថ្ងៃកំណត់ត្រូវសង ដោយសារ អាម៉េរិក រាំងខ្ទប់ការទូទាត់អន្តរជាតិចំពោះ រុស្ស៊ី។

សហរដ្ឋអាម៉េរិក និងសម្ព័ន្ធមិត្ត បាន និងកំពុងដាក់ទណ្ឌកម្មផ្នែកហិរញ្ញវត្ថុសំដៅលើ រុស្ស៊ី ចាប់ពីខែកុម្ភៈ បន្ទាប់ពី ប្រធានាធិបតី ពូទីន បានបើកយុទ្ធនាការយោធាពិសេសនៅ អ៊ុយក្រែន។ ទណ្ឌកម្មសំខាន់ៗដែល រុស្ស៊ី កំពុងទទួលរង មានដូចជា ការសម្រេចលុប រុស្ស៊ី ចេញពីប្រព័ន្ធទូទាត់ប្រាក់អន្តរជាតិ SWIFT, ការរាំងខ្ទប់ធនាគារជាតិរុស្ស៊ី មិនឱ្យចូលប្រើប្រាស់ទុនបម្រុងផ្នែករូបិយប័ណ្ណអន្តរជាតិនៅបរទេស និងហាមមិនឱ្យធ្វើការជាមួយបណ្ដាធនាគារនៅ សហរដ្ឋអាម៉េរិក រួមនឹងប្រទេសមួយចំនួនផ្សេងទៀត។

May 27, 2022

ក្រុមហ៊ុនឱសថរបស់ ស្វ៊ីស អភិវឌ្ឍឧបករណ៍ PCR សម្រាប់តេស្តរកវីរុសអុតស្វា (monkeypox)

ក្រុមហ៊ុនផលិតឱសថ Roche របស់ ប្រទេសស្វ៊ីស កាលពីថ្ងៃទី ២៥ ឧសភា បានប្រកាសថា អភិវឌ្ឍឧបករណ៍តេស្តប្រភេទ PCR ដែលអាចរកឃើញវីរុសបង្កជំងឺអុតស្វា។

យោងតាមក្រុមហ៊ុន Roche ម៉ាស៊ីនធ្វើតេស្ត PCR កំណែដំបូងអាចរកឃើញវីរុសដែលស្ថិតក្នុងអម្បូរ Orthopoxvirus, ចំណែកកំណែទីពីរអាចរកឃើញវីរុសបង្កជំងឺអុតស្វា ខណៈដែលកំណែទីបីអាចរកឃើញវីរុសទាំងពីរប្រភេទនេះ។

អង្គការសុខភាពពិភពលោក (WHO) យល់ថា ការធ្វើតេស្តដោយម៉ាស៊ីន PCR គួរត្រូវបានផ្ដល់អាទិភាពមុនគេដោយសារតែវាមានភាពសុក្រឹតខ្ពស់។

នៅទូទាំងសកលលោក ករណីឆ្លងជំងឺអុតស្វា បានកើនឡើងដល់ ២១៩ នាក់ នេះគឺជាការប្រកាសរបស់ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអឺរ៉ុប (ECDC) ធ្វើឡើងកាលពីម្សិលមិញ។

ដោយមើលឃើញហានិភ័យ ប្រទេសអេស្ប៉ាញ បានរៀបគម្រោងទិញវ៉ាក់សាំងបង្ការជំងឺអុតស្វា Imvanex និងថ្នាំប្រឆាំងវីរុស Tecovirimat តាមរយៈយន្តការរបស់ សហភាពអឺរ៉ុប ដើម្បីទប់ស្កាត់ការឆ្លងរាលដាល។ វ៉ាក់សាំង Imvanex ត្រូវបានអភិវឌ្ឍដោយក្រុមហ៊ុន Bavarian Nordic របស់ ដាណឺម៉ាក និងត្រូវបានស្ថាប័នឱសថអឺរ៉ុប ទទួលស្គាល់រួចហើយ។

នៅ សហរដ្ឋអាម៉េរិក វ៉ាក់សាំង Imvanex ក៏ត្រូវបានអាជ្ញាធរគ្រប់គ្រងអាហារ និងឱសថ (FDA) ផ្ដល់ការការអនុញ្ញាតឱ្យលក់ក្នុងទីផ្សារជាមួយនឹងឈ្មោះ Jynneos សម្រាប់ប្រឆាំងនឹងជំងឺអុតធំ និងជំងឺអុតស្វា។

May 26, 2022

ពិភពលោករកឃើញករណីឆ្លងជំងឺអុតស្វា (monkeypox) ជាង ២០០ នាក់ហើយ!

នៅទូទាំងសកលលោក ករណីឆ្លងជំងឺអុតស្វា បានកើនឡើងដល់ ២១៩ នាក់ នេះគឺជាការប្រកាសរបស់ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអឺរ៉ុប (ECDC) ធ្វើឡើងកាលពីម្សិលមិញ។

យោងតាម ECDC បច្ចុប្បន្នមានប្រទេសជាង ១០ ដែលស្ទើរតែទាំងអស់គឺនៅ អឺរ៉ុប បានរាយការណ៍ថា ប្រទេសពួកគេមានករណីវិជ្ជមាននឹងវីរុសអុតស្វា។ នេះគឺជាលើកដំបូងដែលការផ្ទុះឆ្លងជំងឺមួយនេះបានកើតឡើងនៅ អឺរ៉ុប ដែលដើមឡើយមិនមានទំនាក់ទំនងអ្វីសោះជាមួយនឹងការផ្ទុះឆ្លងជំងឺនេះនៅ អាហ្វ្រិក កាលពីលើកមុន។

ស្ទើរតែទាំងអស់នៃករណីឆ្លងជំងឺនេះគឺជាបុរស និងបានសារភាពថា ធ្លាប់រួមភេទជាមួយនឹងមនុស្សភេទដូចគ្នា។ បច្ចុប្បន្ន អង់គ្លេស គឺជាប្រទេសដែលមានករណីឆ្លងជំងឺនេះច្រើនជាងគេ (៧១ នាក់), លំដាប់ទីពីរគឺ អេស្ប៉ាញ (៥១ នាក់) និង ព័រទុយហ្គាល់ (៣៧ នាក់)។ ក្រៅពី អឺរ៉ុប ប្រទេសកាណាដា ក៏មាន ១៥ នាក់ និង សហរដ្ឋអាម៉េរិក មាន ៩ នាក់។

ក្នុងប្រកាសកាលពីថ្ងៃទី ២៣ ឧសភា ប្រធានក្រុមបច្ចេកទេសនៃស្ថាប័នគ្រប់គ្រងជំងឺឆ្លងរបស់ អង្គការសុខភាពពិភពលោក លោកស្រី Maria Van Kerkhove បានអះអាងថា ពិភពលោកអាចគ្រប់គ្រង់ការឆ្លងរាលដាលរបស់ជំងឺអុតស្វាបាន។

May 26, 2022

អ្នកវិទ្យាសាស្ត្រអភិវឌ្ឍកញ្ចក់ធ្វើពីត្បូងពេជ្រ អាចគ្រប់គ្រងឡាស៊ែរកម្លាំង ១០ គីឡូវ៉ាត់

(សហរដ្ឋអាម៉េរិក)-ប្រភេទកញ្ចក់ពេជ្រថ្មីមានសភាពរឹងមាំកម្រិតខ្ពស់ ត្រូវបានកែច្នៃពីត្បូងពេជ្រ អាចប្រើប្រាស់ក្នុងការផលិតគ្រឿងអេឡិចត្រូនិក និងការបញ្ជូនព័ត៌មានក្នុងទីអវកាសឆ្ងាយ។

ក្រុមស្រាវជ្រាវរបស់សាលាវិស្វកម្ម និងវិទ្យាសាស្ត្រអនុវត្ត Harvard John A. Paulson (SEAS) ច្នៃកញ្ចក់ «មហារឹងមាំ» មានសមត្ថភាពទាញយក និងបញ្ជាកម្លាំងរបស់រលកឡាស៊ែរប្រភេទ CW (Continuous-Wave) ដែលមានថាមពលកម្រិតខ្ពស់។ ការស្រាវជ្រាវនេះទើបត្រូវបានចុះផ្សាយលើទស្សនាវដ្ដី Nature Communication កាលពីថ្ងៃទី ១១ ឧសភា។

ឡាស៊ែរដែលមានកម្លាំងខ្លាំងដើរតួនាទីយ៉ាងសំខាន់ក្នុងដំណើរការផលិតរថយន្ត រថភ្លើង និងយន្តហោះភាគច្រើន។ ក៏ប៉ុន្តែ ការច្នៃឧបករណ៍រឹងមាំដើម្បីបញ្ជាកាំរស្មីឡាស៊ែរកម្លាំងខ្លាំងដែលអាចកាត់ដែកថែបបានគឺជារឿងលំបាកជាទីបំផុត ព្រោះថា បើសិនជាឧបករណ៍ដែលប្រើសម្រាប់កំណត់ទិសរបស់ឡាស៊ែរជួបបញ្ហាក្នុងពេលធ្វើការ កាំរស្មីឡាស៊ែរនឹងអាចកម្ទេចប្រព័ន្ធម៉ាស៊ីនបាន។

សាស្ត្រាចារ្យ Marko Loncar មកពី SEAS និងជាសមាជិកនៃក្រុមស្រាវជ្រាវខាងលើឱ្យដឹងថា «បច្ចេកវិទ្យានេះផ្ដល់ក្ដីសង្ឃឹមក្នុងការកែសម្រួល ឬបង្កើតឧបករណ៍ថ្មីសម្រាប់គ្រប់គ្រងឡាស៊ែរកម្លាំងខ្លាំង»។

ក្រុមស្រាវជ្រាវអះអាងថា កញ្ចក់ត្បូងពេជ្ររបស់ពួកគេអាចស៊ូទ្រាំបានជាមួយនឹងកាំរស្មីឡាស៊ែរកម្លាំង ១០ គីឡូវ៉ាត់ ដោយមិនមានការខូចខាតណាទាំងអស់។

ក្រុមអ្នកជំនាញសង្ឃឹមថា ក្នុងពេលអនាគត កញ្ចក់ប្រភេទថ្មីនេះអាចត្រូវបានប្រើប្រាស់ក្នុងការផលិតគ្រឿងអេឡិចត្រូនិក ការពារជាតិ បញ្ជូនទិន្នន័យនៅទីអវកាសឆ្ងាយៗ និងក្នុងវិស័យជាច្រើនផ្សេងទៀត។

May 26, 2022

ប្រធានាធិបតី ពូទីន ដំឡើងប្រាក់ខែជូនជនជាតិរុស្ស៊ី

លោក ពូទីន សម្រេចចិត្តដំឡើងប្រាក់បៀវត្សយ៉ាងតិច ១០% ជូនពលរដ្ឋរបស់ខ្លួនដើម្បីទប់ទល់នឹងបញ្ហាទំនិញឡើងថ្លៃ ព្រមទាំងបានសារភាពថាសេដ្ឋកិច្ចជួបការលំបាកនៅក្នុងឆ្នាំនេះ។

«យើងបានពិភាក្សាបញ្ហានេះជាមួយនឹងរដ្ឋាភិបាលក្នុងរយៈពេលយូរមកហើយ ចុងក្រោយដំណោះស្រាយមួយត្រូវបានលើកឡើងបន្ទាប់ពីមានរឿងចម្រូងចម្រាសច្រើន» ប្រធានាធិបតីរុស្ស៊ី លោក វ្ល៉ាឌីមៀ ពូទីន ថ្លែងកាលពីថ្ងៃទី ២៥ ឧសភា ស្ដីពីការដំឡើងប្រាក់ខែចូលនិវត្តន៍ និងប្រាក់បៀវត្សអប្បបរមានៅប្រទេសនេះ ដើម្បីទប់ទល់នឹងអតិផរណាដែលកើនឡើងខ្ពស់ និងទណ្ឌកម្មរបស់លោកខាងលិច។

«ចាប់ពីថ្ងៃទី ១ កក្កដា ប្រាក់បៀវត្សអប្បបរមានឹងកើន ១០% ឡើងដល់ ១៥,២៧៩ រូប្ល/ខែ (ប្រហែល ២៥៧ ដុល្លារអាម៉េរិក)» ប្រធានាធិបតី ពូទីន ថ្លែងដូច្នេះ។

លោក ពូទីន បានព្យាករថា អតិផរណានៅ រុស្ស៊ី មិនលើសពី ១៥% ឡើយនៅក្នុងឆ្នាំនេះ និងបានសារភាពថា ឆ្នាំ ២០២២ គឺជាឆ្នាំលំបាកចំពោះសេដ្ឋកិច្ចប្រទេសនេះ។ ក៏ប៉ុន្តែ បុរសខ្លាំងរូបនេះបញ្ជាក់ថា បញ្ហានេះមិនជាប់ទាក់ទិននឹងយុទ្ធនាការយោធាពិសេសរបស់ខ្លួននៅ អ៊ុយក្រែន ឡើយ។

May 26, 2022

រថយន្ត Ford Ranger ស៊េរីថ្មីឆ្នាំ 2023 រូបរាងថ្មីទាំងស្រុង បានមកដល់ហើយ!

កាលពីពេលថ្មីៗនេះនៅលើបណ្តាញសង្គមជាច្រើនមានការផ្ទុះនៃការចែកចាយ និងផ្សព្វផ្សាយពីរថយន្ត Ford Ranger ស៊េរីថ្មីឆ្នាំ 2023 យ៉ាងច្រើនសន្ធឹកសន្ធាប់ ជាពិសេសនោះគឺការបង្ហាញវត្តមានក្នុងកម្មវិធី Test Drive ខ្នាតធំនៅប្រទេសជិតខាងតែម្តង ទន្ទឹមជាមួយគ្នានេះដែរក៏មានមតិជាច្រើនបានបញ្ចេញលើការផ្សព្វផ្សាយនោះថាតើពេលណាទើបរថយន្តនេះមានវត្តមានក្នុងប្រទេសកម្ពុជា?

សម្រាប់ចម្លើយនោះគឺដើម្បីឆ្លើយតបទៅនឹងការទន្ទឹងរង់ចាំរបស់ប្រិយមិត្ត ដូច្នេះអតិថិជន និងប្រិយមិត្តគាំទ្រស្រឡាញ់រថយន្ត Ford Ranger អាចអញ្ជើញមកទស្សនារូបរាងពិត ក៏ដូចជាសាកសួរព័ត៌មាននៅតាមបណ្តាសាខាអគារតាំងបង្ហាញរថយន្ត Ford ការតាំងបង្ហាញរថយន្ត Ford តាមបណ្តាខេត្ត និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
ការតាំងបង្ហាញរថយន្ត Ford តាមបណ្តាខេត្ត លេខទូរស័ព្ទទំនាក់ទំនង៖ 095 666 356 | 031 9 666 356

May 26, 2022

តម្លៃប្រេងក្នុងពិភពលោក បន្តឡើងថ្លៃនៅក្នុងការជួញដូរនៅថ្ងៃទី ២៥ ខែឧសភា

ប្រេងបានឡើងថ្លៃនៅក្នុងថ្ងៃទី ២៥ ឧសភា ដោយសារតែប្រភពផ្គត់ផ្គង់ត្រូវបានរឹតត្បិត និងបណ្ដាក្រុមហ៊ុនចម្រាញ់ប្រេងអាម៉េរិក បង្កើនសកម្មភាពកែច្នៃប្រេង។

បញ្ចប់ការជួញដូរក្នុងថ្ងៃទី ២៥ ឧសភា តម្លៃប្រេង Brent ប្រគល់ក្នុងខែកក្កដា បានកើន ៤៧ សេនអាម៉េរិក ឡើងដល់ ១១៤.០៣ ដុល្លារ/ធុង ខណៈដែលតម្លៃប្រេងឆៅ WTI ប្រគល់ខែកក្កដា កើន ៥៦ សេនអាម៉េរិក ឡើងដល់ ១១០.៣៣ ដុល្លារក្នុង ១ ធុង។

ទិន្នន័យពីរដ្ឋាភិបាលបង្ហាញថា បរិមាណប្រេងឆៅក្នុងឃ្លាំងរបស់ សហរដ្ឋអាម៉េរិក បានថយចុះ ១ លានធុងក្នុងសប្ដាហ៍កន្លង, បរិមាណសាំងក្នុងឃ្លាំងក៏ថយចុះ ខណៈដែលបណ្ដាផលិតផលចម្រាញ់ពីប្រេងកើន ១.៧ លានធុង។

បណ្ដាក្រុមហ៊ុនចម្រាញ់ប្រេងបានបង្កើនល្បឿននៃការកែច្នៃប្រេង លើកកម្ពស់ផលិតភាពឡើងដល់ ៩៣.២% ដែលនេះគឺជាកម្រិតខ្ពស់បំផុតរាប់ចាប់ពីខែធ្នូ ឆ្នាំ ២០១៩។ ជាងនេះ ការដែលប្រភពផ្គត់ផ្គង់ប្រេងនៅជុំវិញពិភពលោកកំពុងបន្តត្រូវបានរឹតបន្តឹង ក៏បានបណ្ដាលឱ្យក្រុមហ៊ុនជាច្រើនគេចពីការទិញប្រេងរបស់ រុស្ស៊ី។ ទាំងនេះបាន និងកំពុងរួមចំណែកធ្វើឱ្យតម្លៃប្រេងពិភពលោកបន្តកើនឡើង។

May 26, 2022

Author: សឿន សំណាង