សឿន សំណាង - La Reine Media

ជនភៀសខ្លួនរាប់សិបនាក់បានស្លាប់នៅក្នុងរថយន្តសណ្ដោងរឺម៉ក នៅ សហរដ្ឋអាម៉េរិក

សាកសពរបស់មនុស្សជាង ៤០ នាក់ ដែលត្រូវបានគេជឿថាជាក្រុមជនភៀសខ្លួន ត្រូវបានប្រទះឃើញនៅក្នុងរថយន្តសណ្ដោងរឺម៉កមួយគ្រឿងត្រូវគេទុកចោលក្បែរទីក្រុង San Antonio រដ្ឋ Texas សហរដ្ឋអាម៉េរិក។

សាកសពជនចំណាកស្រុកជាង ៤០ នាក់ ដែលពុំមានលិខិតស្នាមជាប់តាមខ្លួនខាងលើ ត្រូវបានរកឃើញក្នុងរថយន្តសណ្ដោងរឺម៉កដែលមានកង់ចំនួន ១៨ កាលពីថ្ងៃទី ២៧ មិថុនា ខណៈដែលមនុស្សជាង ១០ នាក់ផ្សេងទៀតត្រូវបញ្ជូនទៅកាន់មន្ទីរពេទ្យ។ សមត្ថកិច្ចមិនទាន់បញ្ជាក់អំពីចំនួនមនុស្សស្លាប់ ប៉ុន្តែ តំណាងរាស្ត្រ Tony Gonzales បានឱ្យដឹងថា ករណីនេះមានមនុស្ស ៤២ នាក់ បានបាត់បង់ជីវិត។

«ថ្ងៃនេះ នៅ San Antonio សីតុណ្ហភាពគឺជាង ៣៨ អង្សាសេ។ ចូលគិតស្រមៃមើល មនុស្សដែលត្រូវបានគេទុកចោលក្នុងរថយន្តកង់ ១៨ តើនឹងទៅជាយ៉ាងណា។ ៤២ នាក់ បានបាត់បង់ជីវិត» លោក Tony Gonzales បង្ហោះសារនៅលើ Twitter ដូច្នេះ។

បច្ចុប្បន្ន ទាំងស្ថាប័នប៉ូលិស ទាំងក្រសួងសន្តិសុខផ្ទៃក្នុង របស់ សហរដ្ឋអាម៉េរិក មិនទាន់មានការអធិប្បាយអ្វីចំពោះករណីនេះនៅឡើយ។

យោងតាមសារព័ត៌មានក្នុងស្រុក San Antonio ថ្មីៗនេះបានរងរលកកម្ដៅយ៉ាងធ្ងន់ធ្ងរ។ នៅពេលសីតុណ្ហភាពឡើងខ្ពស់ ជនភៀសខ្លួនក្បែរព្រំដែន ម៉ិកស៊ិក ងាយនឹងត្រូវបាត់បង់ជាតិទឹក អស់កម្លាំង និងស្លាប់។

គិតត្រឹមថ្ងៃទី ២៧ មិថុនា តំបន់ San Antonio បានឆ្លងកាត់រលកកម្ដៅជិត ៣៨ អង្សាសេ ចំនួន ១៧ ថ្ងៃមកហើយ។ តំបន់ភាគច្រើននៃរដ្ឋ Texas កំពុងរងផលប៉ះពាល់ធ្ងន់ធ្ងរដោយសារគ្រោះរាំងស្ងួត ចំណែកទន្លេ Frio នៅភាគខាងលិចនៃទីក្រុង San Antonio ក៏កំពុងរីងហួតហែង។

June 28, 2022

រថយន្តអគ្គិសនីប្រើថាមពលព្រះអាទិត្យ អាចរត់បាន ៧០ គីឡូម៉ែត្រជារៀងរាល់ថ្ងៃ

ក្រុមហ៊ុនធុរកិច្ចថ្មីរបស់ ហូឡង់ សាកល្បងរថយន្តអគ្គិសនីតម្លៃ ២៥០,០០០ អឺរ៉ូ ដែលដើរដោយថាមពលថាមពលព្រះអាទិត្យទាំងស្រុង និងគ្រោងផលិតនៅរដូវស្លឹកឈើជ្រុះខាងមុខ។

ក្រោមកម្ដៅថ្ងៃយ៉ាងក្ដៅនៅភាគខាងជើងនៃ ប្រទេសអេស្ប៉ាញ Lightyear 0 ដែលជារថយន្តអគ្គិសនីព្រះអាទិត្យរយៈចម្ងាយឆ្ងាយ បានត្រៀមខ្លួនរួចរាល់ និងបានធ្វើការរត់សាកល្បង មុននឹងចាប់ផ្ដើមផលិតជាលើកដំបូង នៅក្នុងរដូវស្លឹកឈើជ្រុះឆ្នាំនេះ។

រថយន្ត Lightyear 0 ត្រូវបានអភិវឌ្ឍដោយក្រុមហ៊ុនធុរកិច្ចថ្មីរបស់ ហូឡង់ Lightyear។ ដោយមានផ្ទាំងសូឡាជាច្រើនផ្ទាំងត្រូវបានបំពាក់លើដងខ្លួន រថយន្តនេះ អាចរត់បានចម្ងាយ ៧០ គីឡូម៉ែត្រ ជារៀងរាល់ថ្ងៃ ដោយប្រើប្រាស់ថាមពលព្រះអាទិត្យទាំងស្រុង។

Lex Hoefsloot ដែលជានាយកប្រតិបត្តិរបស់ Lightyear បានឱ្យដឹងថា «នេះទើបតែជាជំហានដំបូងប៉ុណ្ណោះ។ រថយន្តដែលមានតម្លៃ ២៥០,០០០ អឺរ៉ូ នេះ គឺជាគ្រឿងដំបូង វាជួយបញ្ជាក់អំពីលទ្ធភាព។ វាគឺជាយានយន្តសម្រាប់បញ្ជាក់អំពីបច្ចេកវិទ្យា»។

«ប៉ុន្តែ គោលដៅរបស់យើងគឺរួមទាំងទីផ្សារតម្លៃទាបនៅក្នុងអំឡុង ៣ ឆ្នាំ ជាមួយនឹងរថយន្តតម្លៃ ៣០,០០០ អឺរ៉ូ» លោក Lex Hoefsloot អះអាងដូច្នេះ។

យោងតាមក្រុមហ៊ុន Lightyear រថយន្តសិទ្ធិផ្ដាច់មុខ ចំនួន ៩៤៦ គ្រឿង នឹងត្រូវបានផលិតនៅពេលខាងមុខ និងប្រគល់ជូនអតិថិជននៅក្នុងខែវិច្ឆិកា។

June 27, 2022

រដ្ឋាភិបាលម៉ាឡេស៊ី ចំណាយ ២០ ពាន់លានដុល្លារអាម៉េរិក សម្រាប់ជួយដល់ប្រជាជន ចាប់ពីស្បៀងអាហារ រហូតដល់ថាមពល

រដ្ឋមន្ត្រីក្រសួងហិរញ្ញវត្ថុម៉ាឡេស៊ី Zafrul Tengku Abdul Aziz បានឱ្យដឹងថា រហូតមកដល់ឆ្នាំនេះ ខ្ទង់ប្រាក់ដែលរដ្ឋាភិបាលគ្រោងនឹងផ្ដល់ជាជំនួយដល់ប្រជាជននឹងមានរហូតដល់ជិត ៧៧.៣ ពាន់លានរីងហ្គីតម៉ាឡេស៊ី (MYR) ដែលប្រហាក់ប្រហែលនឹង ២០ ពាន់លនដុល្លារអាម៉េរិក។

ប្រភពព័ត៌មានពី គូឡាឡាំពួ ដកស្រង់របាយការណ៍ហិរញ្ញវត្ថុទី ១០០ ដែលប្រកាសក្នុងថ្ងៃទី ២៧ មិថុនា បានឱ្យដឹងថា ដើម្បីកាត់បន្ថយសម្ពាធចំពោះប្រជាជនក្រីក្រ រដ្ឋាភិបាលបាន និងគ្រោងផ្ដល់ជំនួយ រួមមានដូចជា ខ្ទង់ប្រាក់សម្រាប់ទិញប្រេងសាំង, ប្រេងម៉ាស៊ូត, ឧស្ម័នរាវ (LPG), ប្រេងឆា, ម្សៅមី និងអគ្គិសនី។ រាល់ខ្ទង់ជំនួយនេះនៅក្នុងឆ្នាំ ២០២២ គឺជាកញ្ចប់ជំនួយធំជាងគេបង្អស់ក្នុងប្រវត្តិសាស្ត្រ ធៀបនឹងបណ្ដារដ្ឋាភិបាលមុន។

ក៏ប៉ុន្តែ លោករដ្ឋមន្ត្រីហិរញ្ញវត្ថុ Zafrul Tengku Abdul Aziz បានបន្ថែមថា រដ្ឋាភិបាលនឹងបន្តអនុវត្តគោលនយោបាយនានាដើម្បីទប់ទល់នឹងបញ្ហាទំនិញឡើងថ្លៃ ទន្ទឹមនឹងការជួយដល់ប្រជាជនដែលត្រូវការជំនួយដោយផ្ទាល់។

យោងតាមលោក Aziz មួយផ្នែកធំនៃកញ្ចប់ថវិការបស់រដ្ឋាភិបាល ត្រូវបានចំណាយដើម្បីដោះស្រាយផលប៉ះពាល់ពីកូវីដ-១៩ ដែលរួមមានទាំងការទិញវ៉ាក់សាំងចាក់ជូនដោយមិនគិតថ្លៃ និងការផ្ដល់ជំនួយជាប្រាក់ខែក្នុងសម័យកូវីដ-១៩។ រដ្ឋាភិបាលបានផ្ទេរប្រាក់ជាង ២០ ពាន់លានរីងហ្គីត ទៅឱ្យក្រុមហ៊ុនជាង ៣៥០,០០០ស្ថាប័ន ដើម្បីរក្សាការងារជូននិយោជិត បុគ្គលិក និងកម្មករក្នុងស្រុកជិត ៣ លាននាក់៕

June 27, 2022

(វីដេអូ)-កើតមានហេតុការណ៍រត់ជាន់គ្នានៅក្នុងពិធីហែក្បួននៅ ទីក្រុងញូវយ៉ក សហរដ្ឋអាម៉េរិក

កាលពីថ្ងៃទី ២៦ មិថុនា ហេតុការណ៍រត់ជាន់គ្នាមួយបានកើតឡើងក្នុងព្រឹត្តិការណ៍ហែក្បួននៅលើដងផ្លូវនៃ ទីក្រុងញូវយ៉ក សហរដ្ឋអាម៉េរិក ពេលមនុស្សរាប់រយនាក់ភ័យស្លន់ស្លោ រត់យករួចខ្លួន ព្រោះតែច្រឡំសំឡេងផ្ទុះរបស់កាំជ្រួច ថាជាសំឡេងគ្រាប់កាំភ្លើង។

ប៉ូលិសនៅ ទីក្រុងញូវយ៉ក (NYPD) បានឱ្យដឹងថា កម្លាំងសន្តិសុខមិនបានផ្ទុះអាវុធនៅក្នុងពេលនោះឡើយ។ សំណាងល្អ ហេតុការណ៍រត់ជាន់គ្នានេះមិនបានធ្វើឱ្យមានអ្នករងរបួសធ្ងន់ធ្ងរ។

មនុស្សរាប់ម៉ឺននាក់ បានចូលរួមព្រឹត្តិការណ៍សម្រាប់សហគមន៍មនុស្សភេទទីបី (LGBT) នៅ ទីក្រុងញូវយ៉ក កាលពីម្សិលមិញ។ នេះគឺជាព្រឹត្តិការណ៍ធំទីពីរនៅ សហរដ្ឋអាម៉េរិក បន្ទាប់ពីក្បួនដង្ហែនៅ San Francisco និងជាព្រឹត្តិការណ៍ហែក្បួនលើកដំបូងរបស់សហគមន៍ LGBT រាប់ចាប់ពីពេលកូវីដ-១៩ បានផ្ទុះឆ្លងរាលដាល៕

https://twitter.com/The5HbK/status/1541230864243208192?s=20&t=hwhiksmrDKYG3jOWYAIl7A

June 27, 2022

អាម៉េរិក ថា រុស្ស៊ី នឹងខាតបង់ប្រាក់ជិត ២០ ពាន់លានដុល្លាររៀងរាល់ឆ្នាំ ដោយសារតែមាស

រដ្ឋមន្ត្រីក្រសួងការបរទេសអាម៉េរិក Antony Blinken យល់ថា ការដាក់ទណ្ឌកម្មលើមាសរបស់ រុស្ស៊ី នឹងធ្វើឱ្យប្រទេសនេះ ខាតបង់ប្រាក់ចំណូលក្នុង ១ ឆ្នាំៗ ប្រហែល ១៩ ពាន់លានដុល្លារអាម៉េរិក។

មាសគឺជាទំនិញនាំចេញដែលនាំមកនូវប្រាក់ចំណូលច្រើនលំដាប់ទីពីររបស់ រុស្ស៊ី បន្ទាប់ពីថាមពល។ រុស្ស៊ី នឹងបាត់បង់ ១៩ ពាន់លានដុល្លារអាម៉េរិក/ឆ្នាំ ពីការនាំចេញមាស ហើយភាគច្រើនពីបណ្ដាប្រទេស G៧» រដ្ឋមន្ត្រីការបរទេស Blinken បានប្រាប់ CNN ដូច្នេះ។ មន្ត្រីរូបនេះព្យាករថា ផលប៉ះពាល់ពីទណ្ឌកម្មនេះចំពោះសេដ្ឋកិច្ចរបស់ រុស្ស៊ី នឹងស្ដែងឱ្យឃើញច្បាស់នៅក្នុងឆ្នាំខាងមុខ។

មុននោះ យោងតាមប្រកាសរបស់ រដ្ឋាភិបាលអង់គ្លេស ៤ ប្រទេសរួមមាន អង់គ្លេស, សហរដ្ឋអាម៉េរិក, កាណាដា និង ជប៉ុន នៅឯកិច្ចប្រជុំកំពូលរបស់ G៧ នៅ អាល្លឺម៉ង់ កាលពីថ្ងៃទី ២៦ មិថុនា បានប្រកាសដាក់ចេញនូវបទបញ្ជាហាមការនាំចូលមាសពី រុស្ស៊ី។

យោងតាមបណ្ដាញព័ត៌មាន RT សម្ដីរបស់រដ្ឋមន្ត្រីការបរទេសអាម៉េរិក Blinken គឺមិនទាន់ត្រឹមត្រូវ។ ជាក់ស្ដែង ទំនិញនាំចេញដែលមានចំណេញខ្ពស់លំដាប់ទីពីររបស់ រុស្ស៊ី គឺ ស្បៀងអាហារ។ ប្រាក់ចំណូលដែលបានពីការនាំចេញកសិផលរបស់ រុស្ស៊ី បានឡើងដល់ ៣៧ ពាន់លានដុល្លារអាម៉េរិក ក្នុងឆ្នាំ ២០២។

ទោះជាយ៉ាងណាក៏ដោយ រុស្ស៊ី ទំនងជានៅតែអាចលក់មាសទៅឱ្យបណ្ដារោងចក្រកែច្នៃ ឬស្វែងរកអតិថិជនថ្មីនៅ ប្រទេសចិន ឥណ្ឌា ឬ មជ្ឈិមបូព៌ា ដូចទៅនឹងអ្វីដែលពួកគេបានធ្វើចំពោះប្រេង និងឧស្ម័ន៕

June 27, 2022

តោះត្រៀមៗ!! សាប៊ូកក់សក់ និងក្រែមបន្ទន់សក់ Pantene ចំនួន៤ម៉ឹនកញ្ចប់ នឹងចែកជូនហ្វ្រីៗទៅដល់អតិថិជន!

ផលិតផលថែរក្សាសក់លំដាប់ពិភពលោក Pantene, បានប្រកាសថា នឹងចែកជូនផលិតផល Pantene ដល់ទៅ ៤ ម៉ឺនកញ្ចប់ដោយឥតគិតថ្លៃជូនដល់អតិថិជន!

ថ្មីៗនេះ Pantene បានធ្វើកំណែទម្រង់សាប៊ូកក់សក់ និងក្រែមបន្ទន់សក់កញ្ចប់ថ្មី ដែលត្រូវបានរួមបញ្ចូលគ្នាដោយប្រូវីតាមីន ជាមួយនឹងប្រេងអង្ករជប៉ុន ដើម្បីជួយពង្រឹងសរសៃសក់ពីខាងក្នុង – កាត់បន្ថយសក់ជ្រុះ (ដោយសារបែកចុង) ដោយប្រើជាប្រចាំ។

ដើម្បីអបអរសាទរចំពោះការចេញនូវរូបរាងថ្មីនេះ ក្រុមហ៊ុន Pantene នឹងធ្វើការចែកជូនផលិតផលដោយឥតគិតថ្លៃ ដែលនឹងធ្វើឡើងនៅតាមបន្ដាផ្សារនាៗនៅរាជធានីភ្នំពេញ និងខេត្តសៀមរាប!

– សម្រាប់ រាជធានីភ្នំពេញ នឹងធ្វើឡើងចាប់ពីថ្ងៃទី ២០ ដល់ ២៤ ខែមិថុនា ឆ្នាំ ២០២២

– សម្រាប់ខេត្តសៀមរាប នឹងធ្វើឡើងចាប់ពីថ្ងៃទី ២៦ ដល់ ២៨ ខែមិថុនា ឆ្នាំ ២០២២

ដោយផ្អែកទៅលើគោលការណ៍អ្នកមកមុនបានមុន ចំនួនមានកំណត់ ហើយលក្ខខណ្ឌទាំងឡាយត្រូវបានអនុវត្ត។

សាកល្បងប្រើ Pantene ថ្ងៃនេះ ដើម្បីទទួលបានសក់ដ៏រឹងមាំ និងមានសុខភាពល្អ!

សម្រាប់ព័ត៌មានបន្ថែម សូមចូលទៅកាន់៖ គេហទំព័រហ្វេសបុកផេក Pantene Cambodia https://www.facebook.com/PanteneCambodiaPage

June 27, 2022

ណាតូ អាចនឹងដាក់ពង្រាយក្រុមទាហានទ្រង់ទ្រាយធំបំផុត រាប់ពីសង្គ្រាមត្រជាក់

គ្រប់អង្គភាពនៃកងទ័ពរបស់បស្ចិមលោក អាចនឹងត្រូវបានដាក់ពង្រាយទៅកាន់តំបន់ភាគខាងកើតរបស់សម្ព័ន្ធមិត្តណាតូ ដើម្បីទប់ទល់នឹង កងកម្លាំងរបស់ រុស្ស៊ី។

សារព័ត៌មាន អេស្ប៉ាញ El Pais ដកស្រង់ប្រភពព័ត៌មានច្បាស់ការណ៍ បានចេញផ្សាយថា នៅក្នុងកិច្ចប្រជុំកំពូលរបស់ ណាតូ នៅ Madrid នាពេលខាងមុខ ក្រុមមេដឹកនាំអាចនឹងធ្វើការសម្រេចចិត្តក្នុងការបញ្ជូនទាហានរាប់ពាន់នាក់ទៅកាន់មាត់ច្រករបស់ រុស្ស៊ី។ ណាតូ ក៏អាចនឹងកាត់ផ្ដាច់រាល់ទំនាក់ទំនងជាមួយ ទីក្រុងមូស្គូ ផងដែរ។

ក្រុមប្រទេសជាសមាជិកណាតូ បានត្រៀមខ្លួនរួចរាល់ហើយដើម្បីប្រែក្លាយ អឺរ៉ុបខាងកើត ឱ្យទៅជាមូលដ្ឋានទ័ព ដែលមានទាហានរាប់ពាន់នាក់ និងអាវុធទំនើបគ្រប់ប្រភេទ ក្នុងគ្រាដែលមានការបារម្ភអំពីការវាយប្រហារពីសំណាក់ រុស្ស៊ី។

សម្ព័ន្ធមិត្តដែលដឹកនាំដោយ សហរដ្ឋអាម៉េរិក នេះ «ចង់ផ្ញើសារថា ណាតូ បានត្រៀមរួចហើយដើម្បីប្រតិកម្មទៅនឹងរាល់សកម្មភាពបង្កហេតុ»។ នៅក្នុងកិច្ចប្រជុំនោះ ណាតូ នឹងជំរុញការចំណាយទៅលើវិស័យការពារជាតិ និងថវិការួមរបស់សម្ព័ន្ធមិត្តនេះ។

«ការពិភាក្សាសំខាន់នៅ Madrid នឹងធ្វើឡើងរវាងបណ្ដាប្រទេសនៅ អឺរ៉ុបខាងកើត ជាបណ្ដាប្រទេសដែលចង់ប្រែក្លាយកងវរសេនាតូច (មានទាហានពី ៣០០ ដល់ ១,៥០០ នាក់) ឱ្យទៅជាកងពលតូច (មានទាហានពី ៣,០០០ ទៅ ៥,០០០ នាក់) តាំងវត្តមានយូរអង្វែងនៅលើទឹកដីរបស់ពួកគេ។ ចំណែក សហរដ្ឋអាម៉េរិក ឬ អាល្លឺម៉ង់ គឺជាប្រទេសដែលចង់រក្សាយុទ្ធសាស្ត្រពង្រាយទ័ពតាមវេន ដើម្បីបង្ការករណីវិបត្តិសង្គ្រាម និងជម្លោះប្រដាប់អាវុធ» Jamie Shea អតីតមន្ត្រីជាន់ខ្ពស់ម្នាក់របស់ ណាតូ ដែលបច្ចុប្បន្នគឺជាអ្នកគ្រប់គ្រងមជ្ឈមណ្ឌលស្រាវជ្រាវសង្គ្រាម ប្រចាំសាកលវិទ្យាល័យដាណឺម៉ាកខាងត្បូង បានថ្លែងដូច្នេះ។

សូម្បីតែនៅពេល ណាតូ សម្រេចចិត្តមិនដាក់ពង្រាយទ័ពសរុប ប៉ុន្តែ បណ្ដាប្រទេសនៅ អឺរ៉ុបខាងកើត ក៏នៅតែអាចមានកងទ័ពច្រើនជាងបច្ចុប្បន្នទ្វេដង ដែលឈរជើងការពារតាមបន្ទាត់ព្រំដែន។ យោងតាម El Pais ក្រុមទាហាននៅមូលដ្ឋានក្នុង ប្រទេសប៉ូឡូញ និងបណ្ដាប្រទេសនៅតំបន់ បាល់ទិក ដែលបច្ចុប្បន្នមានចំនួនពី ១,០០០ ទៅ ១,៦០០ នាក់ ក៏នឹងត្រូវបានបង្កើនឡើងទ្វេដង ក៏ដូចជា ត្រូវបានបំពាក់អាវុធទំនើបជាងបច្ចុប្បន្ន។

ផែនទីនៃបណ្ដាប្រទេសណាតូ និង ហ្វាំងឡង់ និង ស៊ុយអែត

ក៏ប៉ុន្តែ បើសិនជា អេស្តូនី, ឡេតូនី និង លីទុយអានី ជំរុញសំណើ នោះការបង្កើនចំនួនទាហានរបស់ ណាតូ នឹងរួមមានគ្រប់អង្គភាព និងមានទាហានសរុប ១៥,០០០ នាក់។

ណាតូ បានបង្កើនទ្វេដងនូវចំនួនទាហាននៅក្នុងបណ្ដាប្រទេសជាសមាជិកដែលមានព្រំដែនជាប់នឹង អ៊ុយក្រែន រាប់ចាប់ពីចុងខែកុម្ភៈ។ យានយោធានានានៅក្នុងតំបន់ខាងលើ ក្នុងនោះមានយន្តហោះចម្បាំង ១៣០ គ្រឿងត្រូវបានដាក់ឱ្យស្ថិតក្នុងការប្រកាសអាសន្នកម្រិតខ្ពស់បំផុត ក្នុងពេលដែលនាវាចម្បាំង ១៤០ គ្រឿងក៏រក្សាវត្តមាននៅទីនោះ។ វត្តមានទាហានអាម៉េរិក នៅ អឺរ៉ុប ក៏បានកើនពី ៧០,០០០ ទៅ ១០០,០០០ នាក់ ចាប់តាំងពីខែកុម្ភៈ។

ណាតូ នឹងផ្លាស់ប្ដូរនិយមន័យអំពី រុស្ស៊ី នៅពេលធ្វើបច្ចុប្បន្នភាពអត្ថន័យយុទ្ធសាស្ត្រ។ មកដល់បច្ចុប្បន្ន រុស្ស៊ី នៅតែត្រូវបានចាត់ទុកថាជាប្រទេសមួយដែល «មិនមានការគំរាមកំហែងណាមួយ» ចំពោះ ណាតូ។ ជាងនេះ ទំនាក់ទំនងរវាងប្រទេសខ្លះនៅក្នុងសម្ព័ន្ធមិត្តណាតូ និង រុស្ស៊ី ថែមទាំងត្រូវបានអធិប្បាយថាជា «ភាពសំខាន់ជាយុទ្ធសាស្ត្រ»។

ទោះជាយ៉ាងណាក៏ដោយ នៅក្នុងអត្ថន័យយុទ្ធសាស្ត្រថ្មី រុស្ស៊ី នឹងត្រូវបានឱ្យនិយមន័យថាជា «ការគំរាមកំហែងផ្ទាល់» ដែលមានលទ្ធភាពវាយប្រហារគ្រប់ប្រទេសរបស់ ណាតូ។ អគ្គលេខាធិការរបស់ ណាតូ លោក Jens Stoltenberg ក៏បានព្រមានថា រុស្ស៊ី នឹងត្រូវបានចាត់ទុកថាជា «ការគំរាមកំហែង» នៅក្នុងឯកសារយុទ្ធសាស្ត្រថ្មី។

ចិន ដែលជាប្រទេសមិនធ្លាប់ត្រូវបាននិយាយដល់ ក៏នឹងមានឈ្មោះនៅក្នុងឯកសារថ្មីរបស់ ណាតូ។ ចិន នឹងត្រូវបានចាត់ទុកថាជា «ឧបសគ្គភូមិសាស្ត្រមានលក្ខណៈជាប្រព័ន្ធ» ចំពោះ ណាតូ៕

June 27, 2022

អគ្គិភ័យក្នុងផ្សារមួយ នៅ រាជធានីបាងកក (ប្រទេសថៃ) បណ្ដាលឱ្យមនុស្សស្លាប់ និងរបួសច្រើននាក់

កាលពីថ្ងៃទី ២២ មិថុនា ករណីអគ្គិភ័យមួយបានកើតឡើងនៅក្នុងផ្សារក្បែរទីប្រជុំជនចិន នៅ រាជធានីបាងកក ប្រទេសថៃ បណ្ដាលឱ្យមនុស្ស ២ នាក់បាត់បង់ជីវិត និង ៩ នាក់ផ្សេងទៀតរងគ្រោះដោយសារផ្សែង។

សារព័ត៌មានក្នុងស្រុកឱ្យដឹងថា មូលហេតុនៃករណីអគ្គិភ័យនេះ កើតឡើងដោយសារការផ្ទុះម៉ាស៊ីនបំប្លែងអគ្គិសនីនៅក្នុងអគារកម្ពស់ ៣ ជាន់។ អណ្ដាតភ្លើងបានឆាបឆេះអគារនានា និងបានបំផ្លាញរថយន្តអស់ជាច្រើនគ្រឿង។

ជនរងគ្រោះដែលបានស្លាប់នៅក្នុងហេតុការណ៍អគ្គិភ័យនេះរួមមាន ម្នាក់មានសញ្ជាតិមីយ៉ានម៉ា និងម្នាក់ទៀតជាជនជាតិថៃ។ ជនរងគ្រោះទាំងពីរនាក់នេះ សុទ្ធតែបានជាប់នៅខាងក្នុងអគារ នៅពេលអណ្ដាតភ្លើងកំពុងឆាបឆេះ។ អ្នកដែលត្រូវឈ្លក់ផ្សែង ភាគច្រើនគឺជាបុគ្គលិកពន្លត់អគ្គិភ័យ។

បច្ចុប្បន្ន អគ្គិភ័យនេះត្រូវបានគ្រប់គ្រងទាំងស្រុង ចំណែកសមត្ថកិច្ចក៏កំពុងស្រាវជ្រាវលើករណីនេះ៕

June 27, 2022

រុស្ស៊ី «ក្ស័យធនចំពោះបំណុលបរទេស» ជាលើកដំបូង រាប់ចាប់ពីឆ្នាំ ១៩១៨! ប៉ុន្តែ មូស្គូ ច្រានចោលអត្ថន័យនេះ

រុស្ស៊ី បានក្ស័យធនលើបំណុលបរទេសជាលើកដំបូង ក្រោយពីជាងមួយសតវត្សរ៍ ក្នុងគ្រាដែលត្រូវរងទណ្ឌកម្មធ្ងន់ធ្ងរពីបស្ចិមលោក ធ្វើឱ្យម្ចាស់បំណុលបរទេសត្រូវបិទខ្ទប់ប្រព័ន្ធទូទាត់បំណុលចំពោះកូនបំណុលជា ទីក្រុងមូស្គូ។

សារព័ត៌មាន Bloomberg បានរាយការណ៍ថា យោងតាមកាលបរិច្ឆេទចុងក្រោយ រុស្ស៊ី នឹងត្រូវបង់ការប្រាក់តម្លៃប្រហែល ១០០ លានដុល្លារអាម៉េរិក កាលពីថ្ងៃទី ២៧ ឧសភា ប៉ុន្តែ ត្រូវបានពន្យារពេលដល់ចុងថ្ងៃទី ២៦ មិថុនា។ ដោយសារតែមិនទាន់អាចទូទាត់ខ្ទង់ការប្រាក់តាមកាលកំណត់នេះ រុស្ស៊ី ត្រូវបានចាត់ទុកថា ធ្លាក់ទៅក្នុងស្ថានការណ៍ «ក្ស័យធន»។

ប្រភពព័ត៌មានអធិប្បាយថា នេះគឺជាការសំពងមួយយ៉ាងធ្ងន់ទៅលើកិត្យានុភាពជាតិរបស់ រុស្ស៊ី។ ប្រាក់អឺរ៉ូ ដែល រុស្ស៊ី កំពុងមាន ត្រូវបានជួញដូរនៅក្នុងកម្រិតលំបាករាប់ចាប់ពីដើមខែមីនា ចំណែកទុនបម្រុងផ្នែករូបិយប័ណ្ណបរទេសរបស់ធនាគារជាតិ ក៏នៅតែត្រូវបានបង្កក ខណៈដែលបណ្ដាធនាគារធំៗរបស់ រុស្ស៊ី ត្រូវបានកាត់ផ្ដាច់ពីប្រព័ន្ធហិរញ្ញវត្ថុសកល។

ទោះជាយ៉ាងណាក៏ដោយ ស្ថានភាពក្ស័យធនបច្ចុប្បន្នរបស់ រុស្ស៊ី គឺគ្រាន់តែមានលក្ខណៈជា «និមិត្តរូប» ប៉ុណ្ណោះ និងមិនជារឿងសំខាន់សម្រាប់ រុស្ស៊ី នៅក្នុងពេលបច្ចុប្បន្ន ព្រោះថា វាមិនប៉ះពាល់ធ្ងន់ធ្ងរដល់សេដ្ឋកិច្ច-ទីផ្សាររបស់ប្រទេសនេះ។

ភាគីខាងរុស្ស៊ី បានទាត់ចោលអត្ថន័យដែលថា ខ្លួនត្រូវបានចាត់ទុកថា «ក្ស័យធន» ដោយប្រកាសថា រុស្ស៊ី មានប្រាក់គ្រប់គ្រាន់ដើម្បីសងបំណុលបរទេស ប៉ុន្តែ ត្រូវបានគេបង្ខំ ធ្វើឱ្យប្រទេសនេះមិនអាចទូទាត់សងបាន។ មុននោះ ទីក្រុងមូស្គូ បានប្រកាសថា ពួកគេនឹងទូទាត់បំណុលរដ្ឋាភិបាលប្រហែល ៤០ ពាន់លានដុល្លារអាម៉េរិក ដោយប្រើប្រាស់ប្រាក់រូប្លរុស្ស៊ី និងបាននិយាយថា នេះគឺជាកាលៈទេសៈដែលមិនអាចប្រឆាំងបាន។

រដ្ឋមន្ត្រីក្រសួងហិរញ្ញវត្ថុរុស្ស៊ី Anton Siluanov បាននិយាយថា «គ្រប់គ្នាក៏អាចប្រកាសអំពីរឿងគ្រប់យ៉ាងដែលពួកគេចង់។ ប៉ុន្តែ គ្រប់គ្នាដែលបានយល់អំពីអ្វីដែលកំពុងកើតឡើង សុទ្ធតែយល់ច្បាស់ថា នេះមិនមែនជាករណីក្ស័យធន»។

ប្រាក់សម្រាប់សងបំណុលបរទេសរបស់ រុស្ស៊ី បានជាប់គាំង បន្ទាប់ពី រដ្ឋមន្ត្រីក្រសួងហិរញ្ញវត្ថុអាម៉េរិក មិនអនុញ្ញាតឱ្យភាគីជាម្ចាស់មូលបត្របំណុលនៅ សហរដ្ឋអាម៉េរិក ទទួលយកការទូទាត់បំណុលពី រុស្ស៊ី ចំណែក សហភាពអឺរ៉ុប ក៏បានហាមភ្នាក់ងារទូទាត់របស់ រុស្ស៊ី។

ការក្ស័យធនបរទេស ឬការមិនមានលទ្ធភាពសងបំណុលបរទេស លើកចុងក្រោយរបស់ រុស្ស៊ី គឺនៅឆ្នាំ ១៩១៨ នៅក្នុងបដិវត្តន៍ Bolshevik នៅពេលមេដឹកនាំ Vladimir Lenin បដិសេធការសងបំណុលដែលប្រទេសនេះជំពាក់បរទេសក្នុងសម័យរាជានិយម។ ឆ្នាំ ១៩៩៨ រុស្ស៊ី បានឆ្លងកាត់វិបត្តិហិរញ្ញវត្ថុ និងការដួលរលំនៃប្រាក់រូប្ល ប៉ុន្តែ ប្រទេសនេះនៅតែអាចសងបំណុលប្រទេសបានក្នុងសម័យនោះ៕

June 27, 2022

ស្ថានភាពជំងឺកូវីដ-១៩ នៅ កម្ពុជា សម្រាប់ថ្ងៃទី ២៧ ខែមិថុនា ២០២២

ក្នុងអំឡុង ២៤ ម៉ោង នៃថ្ងៃទី ២៦ ខែមិថុនា ២០២២ កម្ពុជា មិនមានករណីជាសះស្បើយថ្មី, មិនមានករណីវិជ្ជមានថ្មី និងមិនមានករណីស្លាប់ថ្មី ដោយសារកូវីដ-១៩ នោះទេ។

នេះគឺជាថ្ងៃទី ៥១ ហើយ ដែល កម្ពុជា មិនមានករណីវិជ្ជមានថ្មីនឹងជំងឺកូវីដ-១៩។

June 27, 2022

Author: សឿន សំណាង