សឿន សំណាង - La Reine Media

អតីតនាយករដ្ឋមន្ត្រីជប៉ុន លោក Shinzo Abe ទទួលមរណភាពហើយ!

ទូរទស្សន៍ជប៉ុន NHK បានផ្សាយថា អតីតនាយករដ្ឋមន្ត្រី Shinzo Abe ទទួលមរណភាពហើយ នៅវេលាម៉ោង ១៧ និង ០៣ នាទី ថ្ងៃទី ៨ កក្កដា (ម៉ោងក្នុងស្រុក) បន្ទាប់ពីការប្រឹងប្រែងជួយសង្គ្រោះនៅក្នុងមន្ទីរពេទ្យ នេះបើតាមមន្ត្រីនៅមន្ទីរពេទ្យ។

«ក្រុមមន្ត្រីបក្សប្រជាធិបតេយ្យសេរី (LDP) ដែលកំពុងកាន់អំណាចនៅ ជប៉ុន ថ្ងៃនេះ បានឱ្យដឹងថា អតីតនាយករដ្ឋមន្ត្រី Shinzo Abe បានទទួលមរណភាពក្នុងវ័យ ៦៧ ឆ្នាំ នៅមន្ទីរពេទ្យក្នុងទីក្រុង Kashihara ខេត្ត Nara ជាទីដែលលោកកំពុងទទួលការព្យាបាល» ក្រោយពីត្រូវខ្មាន់កាំភ្លើងបាញ់ប្រហារ នេះបើតាមទូរទស្សន៍ជប៉ុន NHK ផ្សាយនាថ្ងៃនេះ។

នេះគឺជាករណីធ្វើឃាតដំបូងលើអតីតនាយករដ្ឋមន្ត្រី ឬនាយករដ្ឋមន្ត្រីកំពុងកាន់អំណាចរបស់ ជប៉ុន រាប់ចាប់ពីសម័យយោធានិយមកាលពីទសវត្សរ៍ឆ្នាំ ១៩៣០។

អតីតនាយករដ្ឋមន្ត្រីជប៉ុន លោក Shinzo Abe ត្រូវបានបុរសជាជនសង្ស័យម្នាក់បាញ់ប្រហារដោយប្រើប្រាស់កាំភ្លើងកែច្នៃកាលពីព្រឹកថ្ងៃទី ៨ កក្កដានេះ នៅពេលលោកកំពុងថ្លែងសុន្ទរកសំឡេងឆ្នោតជូនសមាជិកបក្សប្រជាធិបតេយ្យសេរី (LDP) នៅចំពោះមុខប្រជាពលរដ្ឋជាច្រើនសិបនាក់។

យោងតាមប្រភពព័ត៌មានពី តួក្យូ នៅថ្ងៃទី ៨ កក្កដានេះ Tetsuya Yamagami ដែលជាជនសង្ស័យក្នុងករណីឃាតកម្មលើ អតីតនាយករដ្ឋមន្ត្រីជប៉ុន នៅទីក្រុង Nara ភាគខាងលិចប្រទេសជប៉ុន បានសារភាពថា ខ្លួនជាមេគំនិត។

ទូរទស្សន៍ NHK ដកស្រង់ប្រភពព័ត៌មានពីប៉ូលិស បានឱ្យដឹងថា ជនសង្ស័យបានសារភាពថា ខ្លួនមិនពេញចិត្តនឹង អតីតនាយករដ្ឋមន្ត្រី Abe និងមានបំណងធ្វើឃាតអ្នកនយោបាយនេះ។ សមត្ថកិច្ចប្រមូលបានកាំភ្លើងមួយដើមនៅកន្លែងកើតហេតុ ដែលហាក់ជាកាំភ្លើងកែច្នៃដោយខ្លួនឯង។

NHK ឱ្យដឹងថា ជនសង្ស័យធ្លាប់បម្រើការនៅក្នុងជួរកងទ័ពជប៉ុន ក្នុងរយៈពេល ៣ ឆ្នាំ ហើយបច្ចុប្បន្នរស់នៅក្នុងទីក្រុង Nara។

July 8, 2022

ជនសង្ស័យក្នុងករណីធ្វើឃាតអតីតនាយករដ្ឋមន្ត្រីជប៉ុន សារភាពថា «ខ្លួនជាមេគំនិត»

យោងតាមប្រភពព័ត៌មានពី តួក្យូ នៅថ្ងៃទី ៨ កក្កដានេះ Tetsuya Yamagami ដែលជាជនសង្ស័យក្នុងករណីឃាតកម្មលើ អតីតនាយករដ្ឋមន្ត្រីជប៉ុន លោក Shinzo Abe ក្នុងថ្ងៃដដែលនៅទីក្រុង Nara ភាគខាងលិចប្រទេសជប៉ុន បានសារភាពថា ខ្លួនជាមេគំនិត។

ទូរទស្សន៍ NHK ដកស្រង់ប្រភពព័ត៌មានពីប៉ូលិស បានឱ្យដឹងថា ជនសង្ស័យបានសារភាពថា ខ្លួនមិនពេញចិត្តនឹង អតីតនាយករដ្ឋមន្ត្រី Abe និងមានបំណងធ្វើឃាតអ្នកនយោបាយនេះ។ សមត្ថកិច្ចប្រមូលបានកាំភ្លើងមួយដើមនៅកន្លែងកើតហេតុ ដែលហាក់ជាកាំភ្លើងកែច្នៃដោយខ្លួនឯង។

NHK ឱ្យដឹងថា ជនសង្ស័យធ្លាប់បម្រើការនៅក្នុងជួរកងទ័ពជប៉ុន ក្នុងរយៈពេល ៣ ឆ្នាំ ហើយបច្ចុប្បន្នរស់នៅក្នុងទីក្រុង Nara។

ជប៉ុន គឺជាប្រទេសដែលគ្រប់គ្រងយ៉ាងតឹងរឹងទៅលើអាវុធជាតិផ្ទុះ។ ដូច្នេះ ករណីបាញ់ប្រហារដោយកាំភ្លើង ពិតជាកម្រកើតមាននៅប្រទេសនេះ។ យោងតាមសៀវភៅសរបស់ ស្ថាប័នប៉ូលិសជាតិ (NPA) ក្នុងឆ្នាំ ២០២០ ប្រទេសនេះមានការចាប់ខ្លួនចំនួន ២១ ករណី ទាក់ទិននឹងការប្រើប្រាស់អាវុធខុសច្បាប់ ក្នុងនោះមាន ១២ ករណីទាក់ទងនឹងក្រុមសង្គមងងឹត។

លោក Abe វ័យ ៦៧ ឆ្នាំ គឺជានាយករដ្ឋមន្ត្រីដែលកាន់តំណែងបានយូរជាងគេនៅ ជប៉ុន។ លោកបានជាប់ឆ្នោត និងកាន់តំណែងនេះជាលើកដំបូងកាលពីឆ្នាំ ២០០៦ ប៉ុន្តែ ត្រូវលាលែងនៅខែកញ្ញា ២០០៧ ដោយសារបញ្ហាសុខភាព។ លោក Abe បន្តឈរឈ្មោះជាបេក្ខភាពនាយករដ្ឋមន្ត្រី និងបានជាប់ឆ្នោត កាន់តំណែងនេះជាថ្មីចាប់ពីឆ្នាំ ២០១២ រហូតដល់ពេលលាលែងម្ដងទៀតកាលខែសីហា ២០២០ ដោយសារជំងឺចាស់៕

វត្ថុតាងដែលប៉ូលិសបានរកឃើញនៅកន្លែងកើតហេតុ សង្ស័យថាជាកាំភ្លើងកែច្នៃរបស់ជនសង្ស័យ

July 8, 2022

នាយករដ្ឋមន្ត្រីជប៉ុន ថា ស្ថានភាពរបស់លោក Abe «ធ្ងន់ធ្ងរខ្លាំងណាស់»

នាយករដ្ឋមន្ត្រី Kishida បានឱ្យដឹងថា ស្ថានភាពរបស់លោក Abe កំពុងមានសភាពធ្ងន់ធ្ងរខ្លាំងណាស់ ក្រោយពីត្រូវគេលួចធ្វើឃាត ហើយក្រុមវេជ្ជបណ្ឌិត «កំពុងប្រយុទ្ធ» ដើម្បីសង្គ្រោះជីវិតរបស់គាត់។

«វិធីសាស្ត្រសង្គ្រោះបន្ទាន់ទាំងឡាយត្រូវបានអនុវត្ត ក្រុមវេជ្ជបណ្ឌិតកំពុងប្រយុទ្ធដើម្បីដណ្ដើមជីវិតជូនគាត់» នាយករដ្ឋមន្ត្រីជប៉ុន លោក Fumio Kishida ថ្លែងនៅក្នុងសន្និសីទសារព័ត៌មានក្នុង ទីក្រុងតូក្យូ នាថ្ងៃនេះ ស្ដីពីបញ្ហាឃាតកម្មលើលោក Shinzo Abe ដែលត្រូវបានខ្មាន់កាំភ្លើងបាញ់ប្រហារនៅពេលលោកកំពុងឃោសនារកសំឡេងឆ្នោតនៅទីក្រុង Nara ខេត្ត Nara ភាគខាងលិចប្រទេសជប៉ុន។

«ខ្ញុំត្រូវបានគេរាយការណ៍ថា ស្ថានភាពរបស់គាត់ពិតជាធ្ងន់ធ្ងរណាស់។ ខ្ញុំបួងសួងសូមឱ្យអតីតនាយករដ្ឋមន្ត្រី Abe រួចពីគ្រោះថ្នាក់» លោក Kishida ថ្លែងដូច្នេះ និងបន្ថែមថា សមត្ថកិច្ចនឹងអនុវត្តវិធានការសមស្របដើម្បីគ្រប់គ្រងស្ថានការណ៍ និងបានសង្កត់ធ្ងន់ថា ករណីផ្ទុះអាវុធគឺជា «សកម្មភាពដែលមិនអាចអត់ឱនឡើយ»។

មន្ត្រីជាន់ខ្ពស់មួយរូបរបស់ បក្សប្រជាធិបតេយ្យសេរី បានឱ្យដឹងថា លោក Abe កំពុងត្រូវបានបញ្ចូលឈាម ហើយស្ថានភាពរបស់គាត់ «ពិតជាគួរឱ្យបារម្ភខ្លាំងណាស់»។

យោងតាមភ្នាក់ងារសារព័ត៌មានរបស់ Asahi Shimbun ជនសង្ស័យឈរចម្ងាយប្រហែល ៥ ម៉ែត្រ ពីលោក Abe និងបាញ់ ២ គ្រាប់សំដៅទៅគាត់។ ភ្លាមនោះ លោក Abe ក៏ដួលទៅលើដី ហើយឈាមក៏ហូរចេញពេញដើមទ្រូង។

លោក Abe ត្រូវបានបញ្ជូនទៅកាន់មន្ទីរពេទ្យនៃសាកលវិទ្យាល័យវេជ្ជសាស្ត្រ Nara ដើម្បីសង្គ្រោះបន្ទាន់។ លោក Abe បានដឹងខ្លួនវិញនៅពេលដឹកតាមឧទ្ធម្ភាគចក្រ ប៉ុន្តែក្រោយមកក៏សន្លប់ទៀត នេះបើតាមប្រភពព័ត៌មានជប៉ុន។

July 8, 2022

វិនាទីដែលអង្គរក្សផ្ដួលជនសង្ស័យក្នុងករណីឃាតកម្មលើអតីតនាយករដ្ឋមន្ត្រីជប៉ុន លោក Abe

ក្រុមអង្គរក្សលោតចូលចាប់ខ្លួន Tetsuya Yamagami បន្ទាប់ពីជនសង្ស័យរូបនេះបានបាញ់ ២ គ្រាប់សំដៅអតីតនាយករដ្ឋមន្ត្រីជប៉ុន លោក Shinzo Abe កាលពីព្រឹកមិញ។

អង្គរក្ស ២ រូបរបស់ អតីតនាយករដ្ឋមន្ត្រីជប៉ុន លោក Abe បានចាប់ជើងចាប់ដៃរបស់ Tetsuya Yamagami បន្ទាប់ពីជនសង្ស័យវ័យ ៤១ ឆ្នាំរូបនេះ បានដកកាំភ្លើងបាញ់ ២ គ្រាប់សំដៅលោក Abe ដែលកំពុងថ្លែងសុន្ទរកថា នៅក្នុងទីក្រុង Nara ខេត្ត Nara ភាគខាងលិចប្រទេសជប៉ុន នៅព្រឹកថ្ងៃទី ៨ កក្កដា។

Yamagami ត្រូវបានគេជឿថា ប្រើប្រាស់កាំភ្លើងកែច្នៃដោយខ្លួនឯង បានចូលទៅក្បែរលោក Abe ក្នុងចម្ងាយប្រហែល ១០ ម៉ែត្រ ប៉ុន្តែ ក្រុមអង្គរក្សមិនបានឃើញសកម្មភាពគួរឱ្យសង្ស័យរបស់បុរសនេះទាន់ពេលនោះទេ។ បន្ទាប់ពី Yamagami បាញ់បាញ់ប្រហារ ២ គ្រាប់ ទើបក្រុមអង្គរក្សធ្វើសកម្មភាព។

នៅជុំវិញអតីតនាយករដ្ឋមន្ត្រី Abe គឺជាក្រុមអ្នកយកព័ត៌មាន និងក្រុមអង្គរក្ស ចំណែកប្រជាជនប្រហែល ៣០ នាក់ផ្សេងទៀត ឈរឆ្ងាយពីលោកតែប៉ុន្មានម៉ែត្រប៉ុណ្ណោះ។

លោក Abe ធ្វើដំណើរទៅកាន់ទីក្រុង Nara គឺដើម្បីឃោសនារកសំឡេងឆ្នោតឱ្យសមាជិកបក្សប្រជាធិបតេយ្យសេរី នៅមុនការបោះឆ្នោតសភាជាន់ខ្ពស់ដែលគ្រោងនឹងធ្វើឡើងនៅថ្ងៃទី ១០ កក្កដា។ ក្រុមអង្គរក្សរបស់លោក Abe គឺជាសមាជិកនៃកងកម្លាំងប៉ូលិសការពារសន្តិសុខ នៃ នាយកដ្ឋានប៉ូលិសតូក្យូ ដែលមានជំនាញការពារថ្នាក់ដឹកនាំសំខាន់។

នៅពេលអតីតនាយករដ្ឋមន្ត្រីកំពុងថ្លែងការណ៍ ក៏ស្រាប់តែមានបុរសម្នាក់ដើរមកពីក្រោយ នេះបើតាមនារីម្នាក់ដែលមានវត្តមាននៅកន្លែងកើតហេតុ។ នាងបន្តថា «គ្រាប់ដំបូងឮដូចជាសំឡេងកាំភ្លើងជ័រ។ គ្រាប់ទីពីរច្បាស់ជាងមុន អាចឃើញភ្លើង និងផ្សែង។ ក្រោយគ្រាប់កាំភ្លើងទីពីរបានផ្ទុះ គ្រប់គ្នាចូលមកមើល និងធ្វើចលនាបេះដូងឱ្យគាត់»។

យោងតាមទូរទស្សន៍ Fuji ជនសង្ស័យគឺជាអតីតសមាជិកកងកម្លាំងការពារដែនសមុទ្រជប៉ុន។ បច្ចុប្បន្ន គេមិនទាន់ដឹងច្បាស់អំពីគោលបំណងនៃឃាតកម្មនេះ ក៏ដូចជាប្រភពអាវុធដែលជននេះបានប្រើប្រាស់នៅឡើយ។

ប្រភពព័ត៌មានខ្លះថា លោក Abe បានដួលសន្លប់ ប៉ុន្តែ បានដឹងខ្លួនខ្លះៗនៅពេលកំពុងដឹកតាមឧទ្ធម្ភាគចក្រទៅកាន់មន្ទីរពេទ្យ។ ក៏ប៉ុន្តែ ក្រុមមន្ត្រីសុខាភិបាលនៅមន្ទីរពេទ្យនោះ បានបដិសេធការអធិប្បាយអំពីស្ថានភាពរបស់លោក។

ប្រធានទីស្ដីការគណៈរដ្ឋមន្ត្រីជប៉ុន Hirokazu Matsuno ថ្លែងថា «បើទោះមូលហេតុជាអ្វីក៏ដោយ សកម្មភាពឃោរឃៅដូច្នេះមិនត្រូវលើកលែងទោសជាដាច់ខាត ហើយយើងថ្កោលទោសយ៉ាងខ្លាំងក្លាបំផុត»។

លោក Abe វ័យ ៦៧ ឆ្នាំ គឺជានាយករដ្ឋមន្ត្រីដែលកាន់តំណែងបានយូរជាងគេនៅ ជប៉ុន។ លោកបានជាប់ឆ្នោត និងកាន់តំណែងនេះជាលើកដំបូងកាលពីឆ្នាំ ២០០៦ ប៉ុន្តែ ត្រូវលាលែងនៅខែកញ្ញា ២០០៧ ដោយសារបញ្ហាសុខភាព។ លោក Abe បន្តឈរឈ្មោះជាបេក្ខភាពនាយករដ្ឋមន្ត្រី និងបានជាប់ឆ្នោត កាន់តំណែងនេះជាថ្មីចាប់ពីឆ្នាំ ២០១២ រហូតដល់ពេលលាលែងម្ដងទៀតកាលខែសីហា ២០២០ ដោយសារជំងឺចាស់៕

July 8, 2022

បារាំង គ្រោងនឹងចំណាយ ២០ ពាន់លានអឺរ៉ូ «ដើម្បីបង្កើនលទ្ធភាពទិញ» ដល់ប្រជាពលរដ្ឋ

គណៈរដ្ឋមន្ត្រីបារាំង បានបង្ហាញសេចក្ដីលម្អិតនៃកញ្ចប់ថិការជំនួយដែលមានតម្លៃ ២០ ពាន់លានអឺរ៉ូ (ប្រហែល ២០.៣ ពាន់លានដុល្លារអាម៉េរិក) ដើម្បីដោះស្រាយបញ្ហាអាទិភាពទីមួយ នោះគឺការបង្កើនលទ្ធភាពទិញ ក៏ដូជាទប់ទល់នឹងកំណើននៃអតិផរណាដែល បារាំង ថាគ្រោងនឹងឡើងដល់ ៥.៨% ក្នុងខែមិថុនាកន្លងទៅ។

ខ្លឹមសារសំខាន់នៅក្នុងសេចក្ដីព្រាងច្បាប់ស្ដីពី «ការបង្កើនលទ្ធភាពទិញ» សម្រាប់ប្រជាជន របស់ រដ្ឋាភិបាលបារាំង គឺការទប់កំណើននៃតម្លៃប្រេងឥន្ធនៈ ដែលត្រូវបានចាត់ទុកថាជាមូលហេតុចម្បងដែលនាំឱ្យអតិផរណាកើនឡើងខ្ពស់ក្នុងរយៈពេលកន្លង។

រដ្ឋាភិបាលបារាំង នឹងពន្យារសុពលភាពនៃវិធានការគ្រប់គ្រងកំណើនរបស់តម្លៃអគ្គិសនីឱ្យនៅក្នុងអត្រា ៤% និងបង្កកតម្លៃឧស្ម័នរហូតដល់ខែតុលា ២០២។ អត្រាជំនួយ ១៨ សេន សម្រាប់ប្រេងសាំង ១ លីត្រ នឹងត្រូវបានពន្យាររហូតដល់ខែកញ្ញា ហើយក្រោយមកបន្ថយបន្តិចម្ដងៗ មុនពេលលុបចោលនៅខែធ្នូ ២០២។ ក្រៅពីនេះ គ្រួសារដែលមានប្រាក់ចំណូលទាបប្រហែល ១២ លានគ្រួ ក៏នឹងទទួលបានខ្ទង់ប្រាក់ជំនួយផ្នែកថាមពលពី ១០០ ដល់ ៣០០ អឺរ៉ូ ផងដែរ។

រដ្ឋាភិបាលបារាំង បានស្នើឱ្យមានការដំឡើងប្រាក់ខែប្រចាំឆ្នាំមុនកាលកំណត់ ៤% ដល់ពលរដ្ឋដែលបានចូលនិវត្តន៍ និង ៣.៥% ដល់មន្ត្រីរដ្ឋការនៅក្នុងខែកក្កដានេះ។ ប្រការនេះនឹងធ្វើឱ្យរដ្ឋាភិបាលត្រូវចំណាយថវិកាជាតិអស់ប្រហែល ៧.៥ ពាន់លានអឺរ៉ូបន្ថែមទៀត។

ក្រៅពីនេះ សេចក្ដីព្រាងច្បាប់ស្ដីពី «ការបង្កើនលទ្ធភាពទិញ» របស់ រដ្ឋាភិបាលបារាំង ក៏ថែមទាំងលើកឡើងនូវវិធានការហិរញ្ញវត្ថុជាច្រើនផ្សេងទៀតដូចជា ការផ្ដល់ជំនួយដល់គ្រួសារដែលមានប្រាក់ចំណូលទាបចំនួន ១០០ អឺរ៉ូ សម្រាប់ថ្លៃអាហារ, ១០០ អឺរ៉ូ ដើម្បីត្រៀមសម្រាប់ឆ្នាំសិក្សាថ្មី រួមនឹងប្រាក់ឧបត្ថម្ភ ៥០ អឺរ៉ូ សម្រាប់ក្មេងម្នាក់, ថ្លៃឈ្នួលផ្ទះត្រូវបានកំណត់មិនឱ្យឡើងលើសពី ៣.៥% រហូតដល់ខែតុលា ២០២៣, ថ្លៃសេវាទូរទស្សន៍រដ្ឋ ១៣៨ អឺរ៉ូ ត្រូវបានលុបចោល, ខ្ទង់ប្រាក់អាហារូបករណ៍សម្រាប់និស្សិតនឹងត្រូវបង្កើន ៤% បន្ថែមទៀត។

តាមគម្រោង សេចក្ដីព្រាងច្បាប់ស្ដីពី «ការបង្កើនលទ្ធភាពទិញ» ខាងលើ នឹងត្រូវបាននាយករដ្ឋមន្ត្រីបារាំង Elisabeth Borne បញ្ជូនឡើងទៅកាន់សភានៅថ្ងៃទី ១៨ កក្កដាខាងមុខ ប៉ុន្តែ សេចក្ដីព្រាងច្បាប់នេះទំនងជានឹងត្រូវជួបការជំទាស់ពីក្រុមប្រឆាំងនៅក្នុងសភា៕

July 8, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមវេលាទៀបភ្លឺ ថ្ងៃទី ០៨ ខែកក្កដា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១២ នាក់ទៀត ដែលសុទ្ធតែជាករណីឆ្លងក្នុងសហគមន៍ ខណៈដែលអ្នកជាសះស្បើយថ្មី និងករណីស្លាប់ថ្មីដោយសារជំងឺនេះ មិនទាន់មាន។

គិតមកទល់ពេលនេះ កម្ពុជា មានករណីឆ្លងថ្មីសរុបចំនួន ១៣៦,៣២៦ នាក់, ករណីជាសះស្បើយចំនួន ១៣៣,២០៦ និងករណីស្លាប់សរុបចំនួន ៣,០៥៦ នាក់។

July 8, 2022

អតីតនាយករដ្ឋមន្ត្រីជប៉ុន Shinzo Abe «លែងមានសញ្ញានៃជីវិត» បន្ទាប់ពីត្រូវគេធ្វើឃាត

យោងតាមប្រភពព័ត៌មានជាច្រើន អតីតនាយករដ្ឋមន្ត្រីជប៉ុន លោក Shinzo Abe មិនមានសញ្ញាដែលបង្ហាញថា លោកអាចរួចពីមរណភាពឡើយ បន្ទាប់ពីត្រូវគេបាញ់ប្រហារ។

មុននេះ លោក Abe ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់ក្នុងស្ថានភាពបាត់បង់ស្មារតី ក្រោយពីត្រូវបានខ្មាន់កាំភ្លើងបាញ់ប្រហារនៅព្រឹកថ្ងៃទី ៨ កក្កដានេះ ពេលលោកកំពុងថ្លែងសុន្ទរកថា។

ប៉ូលិសបានចាប់ខ្លួនបរុសជាជនសង្ស័យម្នាក់ដែលមានអាយុខ្ទង់ជាង ៤០ ឆ្នាំ និងប្រមូលបានកាំភ្លើងមួយដើមនៅកន្លែងកើតហេតុ។

ប្រធានទីស្ដីការគណៈរដ្ឋមន្ត្រីជប៉ុន ប្រកាសថា នឹងកោះប្រជុំបន្ទាន់នៅម៉ោងប្រហែល ១១ ព្រឹក (ម៉ោងនៅ កម្ពុជា) នៃថ្ងៃទី ៨ កក្កដា។

លោក Abe វ័យ ៦៧ ឆ្នាំ គឺជានាយករដ្ឋមន្ត្រីដែលកាន់តំណែងបានយូរជាងគេនៅ ជប៉ុន។ លោកបានជាប់ឆ្នោត និងកាន់តំណែងនេះជាលើកដំបូងកាលពីឆ្នាំ ២០០៦ ប៉ុន្តែ ត្រូវលាលែងនៅខែកញ្ញា ២០០៧ ដោយសារបញ្ហាសុខភាព។ លោក Abe បន្តឈរឈ្មោះជាបេក្ខភាពនាយករដ្ឋមន្ត្រី និងបានជាប់ឆ្នោត កាន់តំណែងនេះជាថ្មីចាប់ពីឆ្នាំ ២០១២ រហូតដល់ពេលលាលែងម្ដងទៀតកាលខែសីហា ២០២០ ដោយសារជំងឺចាស់៕

>អតីតនាយករដ្ឋមន្ត្រីជប៉ុន ត្រូវបានបាញ់ចំដើមទ្រូង

July 8, 2022

អតីតនាយករដ្ឋមន្ត្រីជប៉ុន ត្រូវបានខ្មាន់កាំភ្លើងបាញ់ចំដើមទ្រូង

អតីតនាយករដ្ឋមន្ត្រីជប៉ុន លោក Shinzo Abe ត្រូវខ្មាន់កាំភ្លើងបាញ់ចំដើមទ្រូង នេះបើតាមការផ្សាយរបស់ NHK ខណៈដែល Reuters រាយការណ៍ថា លោកត្រូវបានបាញ់ចំក។

អតីតនាយករដ្ឋមន្ត្រីជប៉ុន លោក Shinzo Abe អាយុ ៦៧ ឆ្នាំ ដែលកំពុងថ្លែងការណ៍នៅឯទីក្រុង Nara ភាគខាងលិចប្រទេសនេះ កាលពីវេលាម៉ោង ១១ និង ៣០នាទី (ម៉ោង ៩ កន្លះនៅ ភ្នំពេញ) ក៏ស្រាប់តែត្រូវបានបុរសម្នាក់បាញ់ប្រហារពីក្រោយ។ ជនសង្ស័យដែលមានអាយុប្រហែលជាង ៤០ ឆ្នាំ ត្រូវបានប៉ូលិសចាប់ខ្លួន។

ទូរទស្សន៍ NHK បានរាយការណ៍ថា លោក Abe ត្រូវរងរបួស បន្ទាប់ពីត្រូវគ្រាប់កាំភ្លើងចំដើមទ្រូង និងត្រូវបានបញ្ជូនទៅកាន់មន្ទីរពេទ្យនៅក្បែរនោះ។ ចំណែក Reuters របស់ អង់គ្លេស វិញ បានផ្សាយថា លោក Abe ត្រូវគ្រាប់កាំភ្លើងចំក និងបានសន្លប់បាត់ស្មារតី។

លោក Abe កំពុងថ្លែងការណ៍ មុនពេលត្រូវខ្មាន់កាំភ្លើងបាញ់ប្រហារ

«ការិយាល័យពន្លត់អគ្គិភ័យក្នុងតំបន់បានឱ្យដឹងថា អតីតនាយករដ្ឋមន្ត្រី Abe ហាក់ស្ថិតក្នុងស្ថានភាពគាំងបេះដូង» ទូរទស្សន៍ NHK ផ្សាយដូច្នេះ ដែលនិយាយអំពីពាក្យដែលត្រូវបានគេប្រើប្រាស់នៅ ជប៉ុន សំដៅលើមនុស្សដែលមានហានិភ័យត្រូវបាត់បង់ជីវិត មុនពេលគ្រូពេទ្យបញ្ជាក់។

មនុស្សប្រហែល ៣០ នាក់ កំពុងមានវត្តមាននៅក្នុងពេលលោក Abe កំពុងថ្លែងការណ៍ គ្រាដែលហេតុការណ៍ កើតឡើង។

July 8, 2022

ក្រសួងពាណិជ្ជកម្មរបស់ វៀតណាម ផ្ទល់ប្រាក់ជំនួយថ្លៃសាំងដល់ប្រជានេសាទ

ក្រសួងឧស្សាហកម្ម និងពាណិជ្ជកម្មវៀតណាម ទើបតែបានដាក់សំណើទៅកាន់នាយករដ្ឋមន្ត្រី ស្ដីពីការផ្ដល់ប្រាក់ឧបត្ថម្ភដល់ប្រជាពលរដ្ឋដែលរងផលប៉ះពាល់ពីបញ្ហាប្រេងសាំងឡើងថ្លៃ ក្នុងនោះក៏មានគោលដៅជាប្រជានេសាទផងដែរ។

យោងតាម ក្រសួងឧស្សាហកម្ម និងពាណិជ្ជកម្មវៀតណាម ប្រជានេសាទបាន និងកំពុងរងឥទ្ធិពលធ្ងន់ធ្ងរដោយសារប្រេងសាំងឡើងថ្លៃខ្ពស់ និងត្រូវកាត់បន្ថយសកម្មភាពនេសាទ និងការចំណាយប្រចាំថ្ងៃ។

ដោយមូលហេតុខាងលើ ក្រសួងឧស្សាហកម្ម និងពាណិជ្ជកម្មវៀតណាម ស្នើសុំនាយករដ្ឋមន្ត្រី ណែនាំឱ្យ ក្រសួងការងារ យុទ្ធជនពិការ និងសង្គមកិច្ច ដឹកនាំ សហការជាមួយ ក្រសួងហិរញ្ញវត្ថុ រួមនឹងបណ្ដាក្រសួងដែលពាក់ព័ន្ធ ក៏ដូចជាតំបន់ដែលមានសកម្មភាពនេសាទ ដើម្បីចាត់ចែងថវិកា ជួយសម្រួលតម្លៃប្រេងសាំងដល់ប្រជានេសាទ នេះបើតាមសារព័ត៌មានវៀតណាម VOV។

ការឧបត្ថម្ភប្រាក់សម្រាប់ថ្លៃប្រេងសាំងខាងលើនឹងជួយឱ្យប្រជានេសាទមានលទ្ធភាពចេញទៅនេសាទនៅលើផ្ទៃសមុទ្រដូចធម្មតា។ គិតមកដល់បច្ចុប្បន្ន កប៉ាល់ និងទូកនេសាទប្រមាណពី ៤០ ទៅ ៥០% បានផ្អាកសកម្មភាព ប៉ះពាល់ធ្ងន់ធ្ងរដល់ប្រាក់ចំណូល និងជីវភាពរស់នៅរបស់សហគមន៍នេសាទ។ បញ្ហានេះក៏បានជះឥទ្ធិពលដល់ប្រភពផ្គត់ផ្គង់ជលផលក្នុងប្រទេស និងការនាំចេញផងដែរ៕

July 8, 2022

អ្នកនយោបាយដំបូងដែលឈរឈ្មោះជាបេក្ខភាពនាយករដ្ឋមន្ត្រីអង់គ្លេស បន្ទាប់ពីការលាលែងរបស់លោក ចនសុន

តំណាងរាស្ត្រ Tom Tugendhat ប្រធានគណៈកម្មាធិការកិច្ចការបរទេសនៃសភាអង់គ្លេស ប្រកាសឈរឈ្មោះជាបេក្ខភាពសម្រាប់តំណែងនាយករដ្ឋមន្ត្រី បន្ទាប់ពី លោក បូរីស ចនសុន បានសម្រេចចិត្តលាលែងពីតំណែង។

ប្រធានគណៈកម្មាធិការកិច្ចការបរទេសនៃសភាអង់គ្លេស លោក Tom Tugendhat កាលពីយប់ថ្ងៃទី ៧ កក្កដា បានក្លាយជាមនុស្សដំបូងដែលប្រកាសឈរឈ្មោះជាបេក្ខភាពសម្រាប់កៅអីមេបក្សអភិរក្សនិយម ក្រោយពី នាយករដ្ឋមន្ត្រី បូរីស ចនសុន បានប្រកាសលាលែងពីតំណែង។

នៅលើទំព័រ Daily Telegraph លោក Tugendhat និយាយថា ចង់កសាង «សម្ព័ន្ធមិត្តស៊ីជម្រៅមួយ» នៅក្នុងវិស័យនយោបាយអង់គ្លេស នាំមកនូវការចាប់ផ្ដើមថ្មីសម្រាប់ប្រទេសជាតិ។ បើទោះជាប្ដេជ្ញាប្រជែងយកកៅអីមេបក្ស ប៉ុន្តែ លោក Tugendhat នៅតែចង់រក្សាទំនាក់ទំនងល្អជាមួយក្រុមដែលមានស្វាមីភក្ដិចំពោះលោក បូរីស ចនសុន។

ក្រុមអ្នកតាមដានស្ថានការណ៍អះអាងថា លោក Tugendhat គឺជាអ្នកនយោបាយដែលមាននិន្នាការតឹងរឹងចំពោះទំនាក់ទំនងជាមួយ ចិន។ លោក Tugendhat វ័យ ៤៩ ឆ្នាំ គឺជាអតីតមន្ត្រីទាហានដែលធ្លាប់ចូលរួមធ្វើសង្គ្រាមនៅ អ៊ីរ៉ាក់ និង អាហ្វហ្គានីស្ថាន ហើយក៏ធ្លាប់បានរិះគន់លើ វិធីដែលរដ្ឋាភិបាលអង់គ្លេស ដកទ័ពចេញពី អាហ្វហ្គានីស្ថាន ផងដែរ។

លោក Tugendhat បានចូលប្រលូកក្នុងឆាកនយោបាយចាប់តាំងពីឆ្នាំ ២០១៥ និងបានជាប់ឆ្នោតជាតំណាងរាស្ត្រកាលពីឆ្នាំ ២០១៩។ បុរសរូបនេះមិនធ្លាប់បានកាន់តំណែងអ្វីមួយនៅក្នុង រដ្ឋាភិបាលអង់គ្លេស ហើយក៏ទើបតែមានបទពិសោធន៍ក្នុងសភា។

តំណាងរាស្ត្រ Tom Tugendhat ប្រធានគណៈកម្មាធិការកិច្ចការបរទេសនៃសភាអង់គ្លេស

លោក Tugendhat មានសញ្ជាតិពីរ គឺ បារាំង និង អង់គ្លេស។ ឪពុករបស់ Tugendhat គឺលោក Michael Tugendhat ដែលជាចៅក្រមតុលាការជាន់ខ្ពស់ ចំណែកពូរបស់លោកវិញគឺ លោក Christopher Tugendhat ជា អតីតអនុប្រធានគណៈកម្មការអឺរ៉ុប។

បក្សអភិរក្សនិយម (Conservative Party) គ្រោងនឹងប្រកាសដំណើរការស្វែងរកអ្នកជំនួសលោក បូរីស ចនសុន នៅសប្ដាហ៍ក្រោយ។ លោក ចនសុន នឹងគ្រប់គ្រងតំណែងនាយករដ្ឋមន្ត្រីជាបណ្ដោះអាសន្ន ក្នុងអំឡុងពេលបោះឆ្នោតផ្ទៃក្នុងបក្សដើម្បីជ្រើសតាំងមេដឹកនាំថ្មី។

នាយករដ្ឋមន្ត្រីអង់គ្លេស លោក បូរីស ចនសុន ថ្មីៗនេះបានប្រឈមមុខនឹងបញ្ហា និងការរិះគន់ជាច្រើន ក្នុងនោះមានទាំងការដែលលោកបានធ្វើពិធីជប់លៀងក្នុងគ្រាដែល អង់គ្លេស កំពុងបិទខ្ទប់ដើម្បីបង្ការជំងឺកូវីដ-១៩ កាលពីឆ្នាំ ២០២០ បញ្ហាសេដ្ឋកិច្ចដែលត្រូវបានគេព្យាករថា មានហានិភ័យធ្លាក់ទៅក្នុងវិបត្តិ ព្រោះតែអស្ថិរភាពដែលទាក់ទិននឹងបញ្ហាទំនិញឡើងថ្លៃ និងវិបត្តិប្រេងឥន្ធនៈសកលដែលកើតឡើងដោយសារសង្គ្រាមនៅ អ៊ុយក្រែន។

លោក ចនសុន ត្រូវរងសម្ពាធកាន់តែខ្លាំងឡើងៗ រហូតដល់ធ្វើឱ្យលោកត្រូវសម្រេចចិត្តលាលែងពីតំណែង បន្ទាប់ពី រដ្ឋមន្ត្រី អនុរដ្ឋមន្ត្រី និងជំនួយការតំណាងរាស្ត្រជិត ៦០ រូប នៃគណបក្សអភិរក្សនិយម បាននាំគ្នាដាក់ពាក្យសុំលាលែងពីតំណែង រាប់ចាប់តាំងពីថ្ងៃទី ៥ កក្កដា៕

July 8, 2022

Author: សឿន សំណាង