Author: សឿន សំណាង

កូរ៉េខាងជើង ប្រកាសថា បានត្រៀមរួចរាល់សម្រាប់ការពង្រាយកម្លាំងនុយក្លេអែរ
មេដឹកនាំកូរ៉េខាងជើង លោក គីម ជុងអុន បានឱ្យដឹងថា ទីក្រុងព្យុងយ៉ាង បានត្រៀមខ្លួនរួចរាល់ក្នុងការប្រមូល និងពង្រាយកម្លាំងនុយក្លេអែរ ដើម្បីប្រឈមមុខនឹងការផ្ទុះសង្គ្រាមជាមួយ សហរដ្ឋអាម៉េរិក និង កូរ៉េខាងត្បូង។
«ជាថ្មីម្ដងទៀត ខ្ញុំអះអាងថា កូរ៉េខាងជើង តែងតែត្រៀមខ្លួនរួចរាល់សម្រាប់ការពង្រាយកម្លាំងកំញើញដោយអាវុធនុយក្លេអែរ ចំពោះការប្រឈមមុខជាមួយ សហរដ្ឋអាម៉េរិក» ទីភ្នាក់ងារសារព័ត៌មានរដ្ឋកូរ៉េខាងជើង KCNA ថ្ងៃនេះ ដកស្រង់សម្ដីរបស់លោក គីម ជុងអុន ថ្លែងនៅក្នុងព្រឹត្តិការណ៍រម្លឹកខួប ៦៩ ឆ្នាំនៃការបញ្ចប់សង្គ្រាមកូរ៉េ។
លោក គីម ជុងអុន ក៏បានព្រមានដល់ អាជ្ញាធរប្រធានាធិបតីកូរ៉េខាងត្បូង Yoon Suk-yeol ដោយបានឱ្យដឹងថា រាល់ការប្រឹងប្រែងក្នុងការវាយប្រហារលើ កូរ៉េខាងជើង នឹងត្រូវបានឆ្លើយតបដោយ «ការប្រល័យ»។ លោកបន្តថា «អាជ្ញាធរ និង កងទ័ពកូរ៉េខាងត្បូង ពិតជាខុសធ្ងន់ បើសិនពួកគេជឿថា អាចបិទដំណើរការ ឬកម្ទេចមួយផ្នែកនៃកងទ័ពរបស់ កូរ៉េខាងជើង ដោយវិធានការយោធា»។
ការព្រមានរបស់លោក គីម ជុងអុន ត្រូវបានលើកឡើងក្នុងគ្រាដែល ក្រុមមន្ត្រីអាម៉េរិក និង កូរ៉េខាងត្បូង ច្រើនខែមកនេះ យល់ថា កូរ៉េខាងជើង បានត្រៀមខ្លួនរួចរាល់សម្រាប់ការសាកល្បងអាវុធនុយក្លេអែរលើកទី ៧ នៅវាលតេស្តនុយក្លេអែរក្រោមដី Punggye-ri។ នេះនឹងក្លាយជាការសាកល្បងនុយក្លេអែរដំបូងរបស់ ទីក្រុងព្យុងយ៉ាង រាប់ចាប់តាំងពីខែកញ្ញា ២០១៧។
«ពិបាកក្នុងការរកឃើញតួលេខច្បាស់លាស់ ប៉ុន្តែ យើងយល់ថា កូរ៉េខាងជើង ចម្រាញ់សារធាតុ ប្លាតូនីញ៉ូម និងអ៊ុយរ៉ាញ៉ូម (plutonium and uranium) បានប្រហែល ១០% បន្ថែមទៀត» រដ្ឋមន្ត្រីក្រសួងការពារជាតិកូរ៉េខាងត្បូង លោក Lee Jong-sup ថ្លែងនៅក្នុងសភាកាលពីថ្ងៃទី ២៦ កក្កដា បន្ទាប់ពីត្រូវបានសួរថា កូរ៉េខាងជើង ផលិតអាវុធនុយក្លេអែរ បានប៉ុន្មានហើយ រាប់ចាប់ពីក្រោយសន្និសីទកំពូលកូរ៉េខាងត្បូង-កូរ៉េខាងជើង កាលពីខែមេសា ២០១៨។
លោក Lee ជឿថា កូរ៉េខាងជើង អាចសាកល្បងអាវុធនុយក្លេអែរ គ្រប់ពេល អាស្រ័យលើមេដឹកនាំ គីម ជុងអុន។ លោករដ្ឋមន្ត្រីការពារជាតិកូរ៉េខាងត្បូង អធិប្បាយថា កម្មវិធីនុយក្លេអែរ របស់ កូរ៉េខាងជើង គឺជា «ការគំរាមកំហែងដ៏ធ្ងន់ធ្ងរចំពោះ កូរ៉េខាងត្បូង និងសហគមន៍អន្តរជាតិ»៕
July 28, 2022
កូរ៉េខាងត្បូង នឹងបាញ់បង្ហោះយានអវកាសដំបូង ឡើងទៅឋានព្រះចន្ទ
កូរ៉េខាងត្បូង ជិតបានក្លាយជាប្រទេសទី ៧ ក្នុងពិភពលោកដែលបាញ់បង្ហោះយានអវកាសស្រាវជ្រាវឋានព្រះចន្ទដំបូងរបស់ខ្លួន ដែលគ្រោងនឹងគោចរជុំវិញភពរណបនេះយ៉ាងតិច ១ ឆ្នាំ។
Korea Pathfinder Lunar Orbiter (KPLO) ដែលជាយានអវកាសគោចរជុំវិញព្រះចន្ទដំបូងរបស់ កូរ៉េខាងត្បូង គ្រោងនឹងហោះឡើងទៅកាន់ទីអវកាសដោយប្រើប្រាស់រ៉ុក្កែត Falcon 9 របស់ SpaceX ពីមូលដ្ឋានទ័ពអាកាស Cape Canaveral នៅ Florida សហរដ្ឋអាម៉េរិក ក្នុងថ្ងៃទី ២ សីហាខាងមុខ។
កាលពីខែឧសភាឆ្នាំនេះ KPLO ត្រូវបានដាក់ឈ្មោះថា Danuri ដែលជាពាក្យរួមផ្សំពីពាក្យ «ព្រះចន្ទ» និង «រីករាយ» ក្នុងភាសាកូរ៉េ។ បេសកកម្មនេះត្រូវបានចាត់ទុកថាជាជំហានដំបូងក្នុងកម្មវិធីអវកាសឆ្ងាយរបស់ កូរ៉េខាងត្បូង ដែលរួមមាន ការនាំរ៉ូបូតចុះចតលើឋានព្រះចន្ទនៅឆ្នាំ ២០៣០ និងបេសកកម្មនាំយកសំណាកដីព្រះចន្ទមកកាន់ផែនដី។
Danuri មានទម្ងន់ប្រហែល ៤១៨ គីឡូក្រាម, ទទឹង ១.៨២ ម៉ែត្រ, បណ្ដោយ ២.១៤ ម៉ែត្រ និងកម្ពស់ ២.២៩ ម៉ែត្រ។ វិទ្យាស្ថានស្រាវជ្រាវអវកាសចរណ៍កូរ៉េខាងត្បូង (KARI) បានឱ្យដឹងថា Danuri ស្រាលជាងយានអវកាសរបស់ប្រទេសដទៃ។
Danuri នឹងត្រូវបានបំពាក់ឧបករណ៍វិទ្យាសាស្ត្រចំនួន ៦ ក្នុងនោះ ៥ ឧបករណ៍ត្រូវបានអភិវឌ្ឍដោយស្ថាប័នក្នុងស្រុក ខណៈដែលឧបរកណ៍ ១ ទៀតគឺជាការផ្គត់ផ្គង់របស់ ណាសា។ ឧបករណ៍ទាំងនេះរួមមាន ម៉ាស៊ីនថតភូមិសាស្ត្រឋានព្រះចន្ទ (LUTI), កាមេរ៉ា PolCam, ឧបករណ៍វាស់ដែនម៉ាញេទិច KMAG, ឧបករណ៍វាស់កាំរស្មីហ្គាម៉ា KGRS, ឧបករណ៍ DTNPL និង កាមេរ៉ាកម្លាំងខ្លាំង ShadowCam របស់ ណាសា។
តាមគម្រោង Danuri នឹងហោះទៅដល់ឋានព្រះចន្ទប្រហែលពាក់កណ្ដាលខែធ្នូ។ យានអវកាសនេះនឹងគោចរជុំវិញឋានព្រះចន្ទយ៉ាងតិចមួយឆ្នាំ។ ភារកិច្ចរបស់ Danuri គឺការវាស់ដែនម៉ាញេទិកនៃឋានព្រះចន្ទ និងវាយតម្លៃលើប្រភពធនធានដូចជា ទឹកជាដើម និងគូរផែនទីដើម្បីជួយដល់ការជ្រើសរើសទីតាំងចុះចតនៅពេលអនាគត៕
July 27, 2022
ក្រពើខ្នាតយក្សស៊ីសាច់អ្នកនេសាទ ត្រូវប៉ូលិស និងប្រជាពលរដ្ឋចាប់បាន
(ឥណ្ឌូណេស៊ី)-សាកសពរបស់អ្នកនេសាទម្នាក់ឈ្មោះ Samsul Bahri ត្រូវបានរកឃើញនៅក្នុងពោះរបស់សត្វក្រពើមួយក្បាលប្រវែង ៨ មែត្រ នៅក្នុងខេត្ត Kalimantan ខាងជើង កាលពីថ្ងៃទី ២២ កក្កដា។
សត្វក្រពើខ្នាតធំនេះត្រូវក្រុមប៉ូលិស និងប្រជាពលរដ្ឋចាប់បាន ក្រោយពីវាបានស៊ីសាច់អ្នកនេសាទម្នាក់អាយុ ៤៥ ឆ្នាំ នៅ ឥណ្ឌូណេស៊ី។ Samsul Bahri ត្រូវបានក្រពើលបខាំ និងស៊ីជាអាហារកាលពីថ្ងៃទី ១៩ កក្កដា ពេលកំពុងរកបង្គានៅលើទន្លេ Semaja ក្នុងស្រុក Nunukan នៃខេត្ត Kalimantan ខាងជើង នេះបើតាម Daily Star។
សមត្ថកិច្ចក្នុងតំបន់ បានតាមរកសត្វក្រពើខាងលើអស់ ៣ ថ្ងៃមកហើយ បន្ទាប់ពីជនរងគ្រោះបានបាត់ខ្លួន។ ក្រុមប៉ូលិសបានរកឃើញ និងចាប់បានសត្វក្រពើមួយក្បាលប្រវែង ៤.៩ ម៉ែត្រ និងមួយក្បាលទៀតប្រវែង ៤ ម៉ែត្រ។ ប៉ុន្តែ ក្រោយការពិនិត្យ សមត្ថកិច្ចមិនបានឃើញសាកសពជនរងគ្រោះក្នុងពោះក្រពើទាំងនេះឡើយ។
ថ្ងៃទី ២២ កក្កដា ក្រុមបុគ្គលិកស្វែងរកក៏បានដាក់អន្ទាក់ និងចាប់បានក្រពើមួយក្បាលប្រវែងជិត ៨ ម៉ែត្រ ហើយក៏បានបាញ់ថ្នាំសណ្ដំ។ ពួកគេរកឃើញដៃជើង និងឆ្អឹងមនុស្សនៅក្នុងពោះក្រពើនេះ ដូច្នេះ សមត្ថកិច្ចក៏បានសន្និដ្ឋានថា សាកសពនេះគឺជារបស់ Samsul។
ទន្លេ Semaja ក៏ដូចជាប្រជុំកោះ ឥណ្ឌូណេស៊ី ទាំងមូល គឺជាជម្រករបស់សត្វក្រពើចំនួន ១៤ ប្រភេទ។ ក្រពើនៅក្នុងតំបន់ច្រកទន្លេ ភាគច្រើនជាប្រភេទធំៗ និងកាចសាហាវ។ Dede Hariana ប្រធានអង្គភាពសង្គ្រោះ Tarakan ឱ្យដឹងថា ករណីមនុស្សត្រូវក្រពើវាយប្រហារកំពុងតែកើនឡើងនៅក្នុងតំបន់ ភាគច្រើនគឺនៅក្នុងបណ្ដាភូមិជាប់មាត់ទន្លេ។ លោកក៏បានអំពាវនាវឱ្យប្រជាជនបង្កើនការប្រុងប្រយ័ត្ន៕
July 27, 2022
New York ស្នើឱ្យ WHO ប្ដូរឈ្មោះជំងឺអុតស្វា (Monkeypox)
New York ដែលជាទីក្រុងមានករណីឆ្លងជំងឺអុតស្វាច្រើនជាងគេនៅ សហរដ្ឋអាម៉េរិក បានស្នើឱ្យ អង្គការសុខភាពពិភពលោក (WHO) ប្ដូរឈ្មោះជំងឺនេះ ព្រោះតែបារម្ភថា ឈ្មោះអុតស្វានេះអាចធ្វើឱ្យអ្នកជំងឺមានអារម្មណ៍ខ្មាសអៀន ប៉ះពាល់ដល់ផ្លូវចិត្ត។
«យើងខ្ញុំកាន់តែបារម្ភអំពីបាតុភូតដែលមានលក្ខណអវិជ្ជមាន និងការរើសអើងដែលឈ្មោះវីរុសអុតស្វាអាចប៉ះពាល់ដល់សហគមន៍ដែលងាយរងគ្រោះ» Ashwin Vasan សមាជិកគណៈកម្មការសុខាភិបាលទីក្រុង New York សរសេរសំបុត្រផ្ញើទៅកាន់ ប្រធានអង្គការសុខភាពពិភពលោក Tedros Adhanom Ghebreyesus កាលពីថ្ងៃទី ២៦ កក្កដា។
Vasan បានរម្លឹកដល់ការដែល WHO កាលពីខែកន្លងក៏បានស្នើឱ្យប្ដូរឈ្មោះវីរុសអុតស្វានេះ។ លោកឱ្យដឹងថា «ពាក្យដូចជា អុតស្វា មានប្រភពពីប្រវត្តិសាស្ត្រដែលបង្ហាញអំពីការរើសអើងពូជសាសន៍ដ៏សោកសៅចំពោះសហគមន៍ជនជាតិស្បែកខ្មៅ»។
លោក Vasan ក៏បានបញ្ជាក់ថា ជំងឺនេះ តាមពិតមិនមានប្រភពពីសត្វស្វាឡើយ ប៉ុន្តែ ត្រូវបានដាក់ឈ្មោះនេះដោយសារតែក្រុមអ្នកវិទ្យាសាស្ត្រកំណត់បានអត្តសញ្ញាណរបស់វីរុស តាមរយៈការពិសោធលើសត្វស្វានៅក្នុងបន្ទប់ពិសោធន៍។
Vasan ក៏បាននិយាយអំពីផលប៉ះពាល់អវិជ្ជមានទាក់ទិននឹងព័ត៌មានមិនពិតនៅក្នុងដំណាក់កាលវីរុស HIV ទើបតែបង្ហាញវត្តមានដំបូង ក៏ដូចជាគ្រោះនៃការរើសអើងពូជសាសន៍ដែលសហគមន៍ជនជាតិអាស៊ីត្រូវប្រឈមមុខ បន្ទាប់ពី អតីតប្រធានាធិបតីអាម៉េរិក ដូណាល់ ត្រាំ បានហៅ nCoV (កូវីដ-១៩) ថា «វីរុសចិន»។
July 27, 2022
កម្ពុជា គឺជាប្រទេស «សោកសៅបំផុត» នៅអាស៊ីអាគ្នេយ៍! ការស្ទង់មតិរបស់ Gallup បង្ហាញដូច្នេះ
លទ្ធផលនៃការស្ទង់មតិដែលធ្វើឡើងដោយ Gallup បានបង្ហាញថា កម្ពុជា ឈរលំដាប់លើគេបង្អស់នៅ អាស៊ីអាគ្នេយ៍ ស្ដីពីអារម្មណ៍ «សោកសៅ» ខណៈដែល ហ្វ៊ីលីពីន គឺជាប្រទេសដែល «តានតឹងបំផុត» ក្នុងតំបន់នេះ។
Gallup ដែលជាក្រុមហ៊ុនប្រឹក្សា និងវិភាគទិន្នន័យលំដាប់កំពូលលើពិភពលោក និងមានមូលដ្ឋាននៅ វ៉ាស៊ីងតោន សហរដ្ឋអាម៉េរិក ថ្មីៗនេះបានប្រកាសលទ្ធផលនៃការស្ទង់មតិស្ដីពីស្ថានភាពអារម្មណ៍ពីវិជ្ជមានរហូតដល់អវិជ្ជមាន របស់ប្រជាជននៅក្នុងប្រទេសជាង ១០០ ក្នុងនោះមានទាំងបណ្ដាប្រទេសនៅក្នុង តំបន់អាស៊ីអាគ្នេយ៍ ផងដែរ។
លទ្ធផលនៃការស្ទង់មតិបង្ហាញថា កម្ពុជា គឺជាប្រទេស «សោកសៅ» បំផុត នៅ អាស៊ីអាគ្នេយ៍ ដោយ ៤២% ក្នុងចំណោមមនុស្សដែលត្រូវបានសួរ ឆ្លើយថា ពួកគេទើបតែបានឆ្លងកាត់ភាពសោកសៅ។ រីឯ ហ្វ៊ីលីពីន វិញ ឈរលំដាប់ទីពីរ ដោយមានអត្រា ៣៥% បានឆ្លើយថា «សោកសៅ» ខណៈដែល វៀតណាម ឈរលំដាប់ទីបី ដោយមាន ២៧%។
ចំណែក អារម្មណ៍ «ភាពតានតឹង» វិញ ហ្វ៊ីលីពីន ឈរលំដាប់ទីមួយនៅក្នុងតំបន់អាស៊ីអាគ្នេយ៍។ ប្រទេសថៃ កម្ពុជា និង វៀតណាម ឈរពីក្រោយតាមលំដាប់បន្តបន្ទាប់គ្នា។
ការស្ទង់មតិរបស់ Gallup ត្រូវបានធ្វើឡើងនៅក្នុងតំបន់ អាស៊ីអាគ្នេយ៍ ចាប់ពីឆ្នាំ ២០២១ ដល់ដើមឆ្នាំ ២០២២ ដោយការដាក់សំណួរនានាដែលមានចម្លើយចំនួន ៣ ឱ្យជ្រើសរើសគឺ «យល់ស្រប», «មិនយល់ស្រប» និង «មិនដឹង ឬបដិសេធការឆ្លើយ» ចំពោះមនុស្សដែលមានវ័យចាប់ពី ១៥ ឆ្នាំឡើងទៅ។
នៅក្នុងប្រធានបទ អារម្មណ៍ «ក្រោធខឹង» ប្រទេសឡាវ ឈរលើកំពូលតារាងនៅ អាស៊ីអាគ្នេយ៍ ខណៈដែល ហ្វ៊ីលីពីន ឈរលំដាប់លេខ ២ និង កម្ពុជា ឈរលេខ ៣ ក្នុងគ្រាដែល ថៃ, មីយ៉ានម៉ា និង ឥណ្ឌូណេស៊ី ឈរពីក្រោយបន្តបន្ទាប់គ្នា។
ប្រទេសសិង្ហបុរី ត្រូវបានគេរកឃើញថា មានការ «ក្រោធខឹង» និង «សោកសៅ» តិចជាងគេបង្អស់នៅក្នុង តំបន់អាស៊ីអាគ្នេយ៍។
កម្ពុជា បើទោះជាត្រូវបានគេរកឃើញថា «សោកសៅ» បំផុតនៅ អាស៊ីអាគ្នេយ៍ ប៉ុន្តែ បែរជាឈរលំដាប់កំពូលតារាងចំណាត់ថ្នាក់នៅ តំបន់នេះ និងជាប់លេខ ៥ លើលោក ក្នុងប្រធានបទស្ដីពី «បទពិសោធន៍រីករាយ (Experienced Enjoyment)» ដោយមានចម្លើយស្រប ៨៥% និងមិនស្រប ១៤%។ ក្នុងប្រធានបទនេះដែរ ឥណ្ឌូណេស៊ី, ម៉ាឡេស៊ី និងហ្វ៊ីលីពីន ឈរលំដាប់បន្តបន្ទាប់ សម្រាប់ តំបន់អាស៊ីអាគ្នេយ៍។
ចំណែកអារម្មណ៍ស្ដីពី «ស្នាមញញឹម ឬសំណើច (Smile or Laugh)» Gallup បានរកឃើញថា ឥណ្ឌូណេស៊ី ឈរលំដាប់ទីពីរលើលោក និងទីមួយនៅ អាស៊ីអាគ្នេយ៍ ដោយមានអ្នកឆ្លើយស្រប ៩០% និងមិនស្រប ១០% ខណៈដែល កម្ពុជា ស្ថិតនៅឈរលំដាប់ទីបួនលើពិភពលោក និងទីពីរនៅ អាស៊ីអាគ្នេយ៍ ដោយមានចម្លើយស្រប ៨៩% និងមិនស្រប ១០%។ ចំណែក ឡាវ ឈរលំដាប់ទីប្រាំក្នុងពិភពលោក ស្ដីពី «ស្នាមញញឹម ឬសំណើច»៕
July 27, 2022
ប្រេស៊ីល នឹងមានរោងចក្រផលិតអ៊ីដ្រូសែនបៃតង (green hydrogen) ធំបំផុតក្នុងពិភពលោក
រោងចក្ររបស់ក្រុមហ៊ុន Unigel ដែលគ្រោងនឹងចាប់ផ្ដើមដំណើរការនៅចុងឆ្នាំ ២០២៣ នឹងផលិតអ៊ីដ្រូសែនបៃតងប្រមាណ ១០,០០០ តោន និង អាម៉ូញាក់បៃតង ប្រមាណ ៦០,០០០ តោន នៅក្នុងដំណាក់កាលដំបូង។
ក្រសួងបរិស្ថានប្រេស៊ីល កាលពីថ្ងៃទី ២៦ កក្កដា បានប្រកាសថា សាជីវកម្មពហុជាតិ Unigel ទើបតែចាប់ផ្ដើមសាងសង់រោងចក្រផលិតអ៊ីដ្រូសែនបៃតង (green hydrogen) មួយ ដោយមានទុនវិនិយោគដំបូង ១២០ លានដុល្លារអាម៉េរិក នៅក្នុងទីក្រុង Camacari នៃរដ្ឋ Bahia ភាគឦសានប្រទេសនេះ។
រោងចក្ររបស់ Unigel គ្រោងនឹងដំណើរការចាប់ពីចុងឆ្នាំ ២០២៣ ហើយនឹងផលិតអ៊ីដ្រូសែនបៃតង ប្រមាណ ១០,០០០ តោន និង អាម៉ូញាក់បៃតង (green ammonia) ប្រមាណ ៦០,០០០ តោន នៅក្នុងដំណាក់កាលដំបូង។
Unigel គ្រោងនឹងបង្កើនការផលិតឱ្យបានច្រើនជាងតួលេខខាងលើ ៤ ដង នៅដើមឆ្នាំ ២០២៥ ដែលនេះនឹងជួយឱ្យរោងចក្រនៅ Camacari ក្លាយជាមូលដ្ឋានដែលផលិតអ៊ីដ្រូសែនបៃតង ធំជាងគេក្នុងពិភពលោក។
រោងចក្រថ្មីនេះនឹងប្រើប្រាស់បច្ចេកវិទ្យារបស់សាជីវកម្ម Thyssenkrupp Nucera របស់ អាល្លឺម៉ង់ ក្នុងនោះនឹងដំឡើងម៉ាស៊ីនបំបែកធាតុទឹក ឬហៅថា ម៉ាស៊ីនអេឡិចត្រូលីត្រទឹក (Water Electrolysis Machine) ចំនួន ៣ គ្រៀង ដែលមានកម្លាំង ៦០ MW ដើម្បីបំបែកអ៊ីដ្រូសែនចេញពីភាគល្អិតរបស់ទឹក។
ប្រធានក្រុមហ៊ុន Unigel លោក Roberto Noronha អះអាងថា គម្រោងរោងចក្រ Catamari នឹងជួយឱ្យក្រុមហ៊ុននេះនាំមុខគេក្នុងវិស័យបន្សាបកាបូននៅ ប្រេស៊ីល។
លោក Noronha ឱ្យដឹងថា ប្រេស៊ីល មានសក្ដានុពលខ្លាំងក្លាក្នុងការផលិតអគ្គិសនីពីកម្លាំងខ្យល់ និងថាមពលព្រះអាទិត្យ ដូច្នេះ Unigel ជឿថា ប្រទេសនេះនឹងមានឱកាសនាំមុខពិភពលោកក្នុងវិស័យអ៊ីដ្រូសែនបៃតង ដែលជាដំណោះស្រាយក្នុងការរក្សាថាមពលស្អាតតាមរយៈការបំប្លែងថាមពលកកើតឡើងវិញ ឱ្យទៅជាឥន្ធនៈមិនមានកាបូន។
July 27, 2022
សហរដ្ឋអាម៉េរិក បញ្ចេញប្រេងទៅក្នុងទីផ្សារ ២០ លានធុងបន្ថែមទៀត ពីឃ្លាំងយុទ្ធសាស្ត្រ
អាជ្ញាធរអាម៉េរិក បង្ហើបឱ្យដឹងថា ប្រទេសនេះនឹងលក់ប្រេង ២០ លានធុងថែមទៀត ពីឃ្លាំងប្រេងរ៉ែយុទ្ធសាស្ត្រ (SPR) ដើម្បីជួយបញ្ចុះតម្លៃប្រេងសាំងក្នុងទីផ្សារនាបច្ចុប្បន្ន។
កាលពីថ្ងៃទី ២៦ កក្កដា រដ្ឋាភិបាលរបស់លោក បៃដិន បានឱ្យដឹងថា សហរដ្ឋអាម៉េរិក នឹងបញ្ចេញប្រេងពីឃ្លាំងយុទ្ធសាស្ត្រចំនួន ២០ លានធុងទៀត ដើម្បីបញ្ចុះតម្លៃប្រេងសាំងដែលកំពុងតែឡើងថ្លៃខ្ពស់។
មុននោះ កាលពីចុងខែមីនា ប្រធានាធិបតី បៃដិន បានចេញបញ្ជាឱ្យបញ្ចេញប្រេងចំនួន ១ លានធុង/ថ្ងៃ ពីSPR ក្នុងរយៈពេល ៦ ខែ ដើម្បីបញ្ចុះតម្លៃប្រេងសាំង ក្នុងគ្រាដែលសង្គ្រាមនៅ អ៊ុយក្រែន កំពុងបង្កឱ្យមានការរឹតត្បិតប្រភពផ្គត់ផ្គង់ប្រេងរ៉ែនៅលើទីផ្សារអន្តរជាតិ។
មន្ត្រីជាន់ខ្ពស់របស់ មូលនិធិរូបិយវត្ថុអន្តរជាតិ (IMF) Pierre-Olivier ក្នុងថ្ងៃដដែលបានថ្លែងថា «បរិស្ថានបច្ចុប្បន្ន បង្ហាញថា លទ្ធភាពដែលសេដ្ឋកិច្ចរបស់ សហរដ្ឋអាម៉េរិក អាចចៀសវាងពីវិបត្តិបាន គឺពិតជាស្ដួចស្ដើង»។ លោក Olivier ក៏បានព្រមានថា សូម្បីតែបញ្ហាភ្ញាក់ផ្អើលតូចមួយ» ក៏អាចរុញច្រានសេដ្ឋកិច្ចរបស់ សហរដ្ឋអាម៉េរិក ធ្លាក់ទៅក្នុងឱនភាព៕
July 27, 2022
តំណាងរាស្ត្រអាម៉េរិក លើកឡើងដំណាក់កាលសំខាន់បំផុតសម្រាប់ អ៊ុយក្រែន ក្នុងសង្គ្រាមប្រឆាំង រុស្ស៊ី
តំណាងរាស្ត្រនៅ សភាជាន់ទាបអាម៉េរិក លោក Smith បានថ្លែងថា ពី ៣ ទៅ ៦ សប្ដាហ៍ខាងមុខគឺជាពេលវេលាសំខាន់បំផុតចំពោះ អ៊ុយក្រែន មុនពេលរដូវត្រជាក់ចូលមកដល់ និងត្រូវជួយដល់ ទីក្រុងកៀវ កាន់តែច្រើន កាន់តែល្អ។
«នៅពេលនេះ ចូរជួយពួកគេកាន់តែច្រើនកាន់តែល្អ ព្រោះពី ៣ ទៅ ៦ សប្ដាហ៍ខាងមុខពិតជាសំខាន់ខ្លាំងណាស់» តំណាងរាស្ត្រសភាជាន់ទាបអាម៉េរិក Adam Smith ប្រធានគណៈកម្មការយោធារបស់ សភាជាន់ទាបអាម៉េរិក កាលពីថ្ងៃទី ២៥ កក្កដា បានថ្លែងអំពីអ្វីដែលលោកបានដឹងតាមរយៈ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ក្រោយទស្សនកិច្ច រដ្ឋធានីកៀវ នាពេលកន្លង។
«បច្ចុប្បន្នគឺជារដូវក្ដៅ ប៉ុន្តែ បណ្ដាខែក្នុងរដូវរងាកំពុងតែចូលមកយ៉ាងលឿន។ សីតុណ្ហភាពចុះត្រជាក់ជាង និងលក្ខខណ្ឌមិនអំណោយផលល្អនឹងប្រែក្លាយការប្រយុទ្ធទៅជាសង្គ្រាមដែលត្រូវចំណាយច្រើន ផ្ដល់ផលប្រយោជន៍សំខាន់ដល់ រុស្ស៊ី។ ចូរផ្ដល់អាទិភាពជួយពួកគេឱ្យបានច្រើនជាងនេះ មុនពេលកងកម្លាំងរុស្ស៊ី មានប្រៀបជាង» តំណាងរាស្ត្រអាម៉េរិក បញ្ជាក់ដូច្នេះ។
ការផ្ដល់អាវុធឱ្យ អ៊ុយក្រែន នៅតែជាបញ្ហាចម្រូងចម្រាសនៅ សហរដ្ឋអាម៉េរិក។ រដ្ឋាភិបាលលោក បៃដិន បានផ្ដល់ជំនួយ ៨.២ ពាន់លានដុល្លារដល់ អ៊ុយក្រែន រួចហើយ រាប់ចាប់តាំងពី រុស្ស៊ី បើកការឈ្លានពានកាលពីចុងខែកុម្ភៈ។
លោក Adam Smith ប្រធានគណៈកម្មការយោធារបស់ សភាជាន់ទាបអាម៉េរិក
ក៏ប៉ុន្តែ រដ្ឋាភិបាលអាម៉េរិក មិនចង់បញ្ជូនអាវុធរយៈចម្ងាយឆ្ងាយទៅឱ្យ អ៊ុយក្រែន ដោយសារតែការបារម្ភអំពីការកើនឡើងនៃភាពតានតឹង ដែលអាចនាំទៅរកសង្គ្រាមលោកលើកទីបី។
July 27, 2022
កម្មវិធីសម្ពោធរថយន្ត Ford Everest ស៊េរីថ្មីឆ្នាំ 2023 សម្រាប់អ្នកសារព័ត៌មាន
[ភ្នំពេញ – ថ្ងៃទី ២៥ ខែកក្កដា ឆ្នាំ២០២២] ក្រុមហ៊ុន អ អិម អេ (ខេមបូឌា) ម.ក ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបានប្រារព្ធកម្មវិធីសម្ពោធរថយន្ត Ford Everest ស៊េរីថ្មីឆ្នាំ 2023 ជាមួយអ្នកសារព័ត៌មានដែលកម្មវិធីនេះបានប្រារព្ធធ្វើឡើងនៅសណ្ឋាគារ សុខា ភ្នំពេញ។ កម្មវិធីនេះបានប្រព្រឹត្តទៅយ៉ាងជោគជ័យដែលនេះជាឱកាសដ៏ល្អសម្រាប់មិត្តអ្នកសារព័ត៌មានក្នុងការទទួលជ្រាប និងស្វែងយល់ពីរថយន្តបន្ថែមមុនពេលប្រកាសចេញលក់ជាផ្លូវការ។ កម្មវិធីនេះត្រូវបានអញ្ជើញចូលរួមក្រោមវត្តមានដ៏ខ្ពង់ខ្ពស់របស់លោក ងន សាំង អគ្គនាយកនៃក្រុមហ៊ុន អ អិម អេ ខេមបូឌា លោកស្រី Pritika Maharaj ប្រធានគ្រប់គ្រងគម្រោងរថយន្ត Ford Ranger និង Ford Everest នៃក្រុមហ៊ុន Ford Motor Company ប្រចាំប្រទេសអូស្រ្តាលី លោក Peerakorn Sophonsiri ប្រធានផ្នែកទីផ្សារនៃក្រុមហ៊ុន Ford Motor Company ប្រចាំអាស៊ីប៉ាស៊ីហ្វិក និងមិត្តអ្នកសារព័ត៌មានយ៉ាងច្រើនកុះករ។
ឆ្លៀតក្នុងឱកាសនេះដែរ លោក ងន សាំង បានមានប្រសាសន៍ថា៖ “ថ្ងៃនេះខ្ញុំពិតជាមានសេចក្តីសោមនស្សរីករាយក្រៃលែងដែលបានអញ្ជើញចូលរួមក្នុងកម្មវិធីសម្ពោធរថយន្ត Ford Everest ស៊េរីថ្មីឆ្នាំ 2023 ជាមួយអ្នកសារព័ត៌មាន ជាពិសេសទៀតនោះគឺ ក្រុមហ៊ុន អ អិម អេ ខេមបូឌាមានកិត្តិយសបានអញ្ជើញលោកស្រី Pritika Maharaj ប្រធានគ្រប់គ្រងគម្រោងរថយន្ត Ford Ranger និង Ford Everest នៃក្រុមហ៊ុន Ford Motor Company ប្រចាំប្រទេសអូស្រ្តាលី មកធ្វើបទបង្ហាញពីរថយន្ត Ford Everest ស៊េរីថ្មីឆ្នាំ 2023 ជូនដល់បងប្អូនមិត្តអ្នកសារព័ត៌មាន និងបានធ្វើការបង្ហាញលម្អិតពីផ្នែកនីមួយៗនៃរថយន្តនេះផងដែរ។”
លោកស្រី Pritika Maharaj បានមានប្រសាសន៍ថា៖ “រថយន្ត Ford Everest ស៊េរីថ្មីឆ្នាំ 2023 គឺបានត្រៀមខ្លួនរួចជាស្រេចក្នុងដំណើរកម្សាន្តបែបផ្សងព្រេងរបស់លោកអ្នកជាមួយនឹងភាពធន់ រឹងមាំ ផាសុកភាពជូនដល់អ្នកដំណើរ និងបច្ចេកវិទ្យាច្រើនលើសពីការរំពឹងទុក ដើម្បីផ្តល់ជូននូវការបើកបរដ៏រីករាយ និងមានទំនុកចិត្ត។”
មិនត្រឹមតែប៉ុណ្ណោះលោកស្រី Pritika Maharaj ក៏បានធ្វើបទបង្ហាញយ៉ាងក្បោះក្បាយ និងលម្អិតបន្ថែមពីចំណុចពិសេសរបស់ Ford Everest ស៊េរីថ្មីដូចជា៖
- ម៉ាស៊ីនម៉ាស៊ូត 0L Bi-Turbo ជំនាន់ថ្មី ដែលត្រូវអភិវឌ្ឍន៍ និងកែប្រែបន្ថែមឲ្យកាន់តែមានកម្លាំងខ្លាំង និងស្ងាត់ជាងមុន
- ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) ដែលនេះគឺជាលើកដំបូងដែល Ford បានបំពាក់ប្រអប់លេខជាប្រភេទអេឡិចត្រូនិចបែបនេះនៅលើរថយន្ត SUV នេះ ដែលប្រអប់លេខនេះមិនត្រឹមតែការរចនាស្រស់ស្អាតដូចរថយន្តស្ព័រប៉ុណ្ណោះទេ តែថែមទាំងមានមុខងារយ៉ាងច្រើនសម្បូរបែបដូចជា៖ ការចូលលេខរលូន និងធូរជាងមុន ការដំណើរការដោយស្វ័យប្រវត្តជាមួយនឹងប្រព័ន្ធជំនួយចូលចតដោយស្វ័យប្រវត្ត 0 ជំនាន់ថ្មី និងសុវត្ថិភាពខ្ពស់បំផុតនោះគឺ នៅពេលដែលលោកអ្នកបានពន្លត់ម៉ាស៊ីនដោយមិនបានចូលលេខទៅ P ប្រអប់លេខនឹងធ្វើការចូលលេខទៅលេខ P ដោយខ្លួនឯងដើម្បីធានាជូននូវសុវត្ថិភាពពេលចតរថយន្ត
- ប្រព័ន្ធជំនួយចូលចតដោយស្វ័យប្រវត្ត 0 ជំនាន់ថ្មី (Active Park Assist 2.0) ដែលរថយន្តនឹងដំណើរការចូលចតដោយស្វ័យប្រវត្តដោយលោកអ្នកគ្រាន់តែចុចនូវប៊ូតុងមួយតែប៉ុណ្ណោះ នោះរថយន្តនឹងធ្វើការចូលចតដោយស្វ័យប្រវត្ត ពោលគឺវាជួយបង្វិលចង្កូត ដំណើរការហ្វ្រាំង និងហ្គ៊ែរ និងប្រអប់លេខក៏នឹងធ្វើការចូលលេខខ្លួនឯង ដោយពុំចាំបាច់មានការចូលរួមពីអ្នកបើកបរឡើយ
- កុងទ័រឌីជីថលថ្មីស្រឡាងទំហំរហូតដល់ 4 អ៊ីញ (12.4” Digital Instrument Cluster)ដែលនូវផ្តល់ទិន្នន័យយ៉ាងលម្អិតពីរថយន្ត
- អេក្រង់ Touchscreen បញ្ឈរធំចំកណ្តាលទំហំ 12 អ៊ីញ (12-Inch Infotainment Screen) ផ្តល់នូវរូបភាពរស់រវើក
- ប្រព័ន្ធកាមេរ៉ា 360 ដឺក្រេកម្រិតខ្ពស់ជុំវិញរថយន្ត (360^oCamera Split-View Display)
- ប្រព័ន្ធបើកឃ្លុបក្រោយដោយគ្រាន់តែគ្រវាសជើង (Hands-Free Liftgate)
- បូករួមជាមួយនឹងប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែល Ford បានបំពាក់នៅលើរថយន្ត SUV ដ៏ប្រណិតមួយនេះ
គួរបញ្ជាក់ផងដែរថាសម្រាប់ទីផ្សារប្រទេសកម្ពុជា Ford Cambodia ប្រកាសបើកទទួលការកក់ជាផ្លូវការជាមួយនឹងរថយន្ត Ford Everest Sport ស៊េរីថ្មីឆ្នាំ 2023 ជាមួយនឹងតម្លៃជាង 6 ម៉ឺនដុល្លា និងរថយន្ត Ford Everest Titanium ស៊េរីថ្មីឆ្នាំ 2023 ជាមួយនឹងតម្លៃជាង 7 ម៉ឺនដុល្លា សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរនៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
- អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
- អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
- អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
- អគារតាំងបង្ហាញរថយន្ត Ford Trade-In ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 077 722 999
- អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
- អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
July 26, 2022
ប្រធានផ្នែកប្រតិបត្តិថ្មី (COO) របស់ Facebook គឺជាអ្នកណា?
ក្រោយពីអ្នកស្រី Sheryl Sandberg ដែលជាដៃស្ដាំរបស់ CEO Facebook លោក Mark Zuckerberg បានសុំលាឈប់ពីតំណែង លោក Javier Olivan នឹងឡើងមកជំនួស។
Meta ដែលជាក្រុមហ៊ុនមេរបស់ Facebook ប្រកាសថា Javier Olivan នឹងចូលមកជំនួសអ្នកស្រី Sheryl Sandberg ដោយកាន់កាប់តំណែងប្រធានផ្នែកប្រតិបត្តិការ (COO) របស់ Facebook។ លោក Olivan ដើរតួនាទីសំខាន់ ប៉ុន្តែមិនសូវ «មាត់ក» ដោយបានជួយឱ្យបណ្ដាញសង្គមនេះរីកចម្រើនក្នុងរយៈពេល ១៥ ឆ្នាំកន្លង។
កាលពីថ្ងៃទី ២ កក្កដា អ្នកស្រី Sandberg បានបង្ហើបឱ្យដឹងថា នឹងលាលែងពីតំណែង COO របស់ Facebook នៅចុងឆ្នាំនេះ ដើម្បី «បង្កើតទំព័រថ្មី» ក្នុងជីវិត និងផ្ដោតទៅលើសកម្មភាពមនុស្សធម៌។ អ្នកស្រីបានសម្រេចចិត្តបែបនេះនៅក្នុងគ្រាដែល Meta កំពុងធ្វើដំណើរយ៉ាងត្រដាបត្រដួសដោយសារកំណើនយឺន និងការចំណាយខ្ពស់។ ក្រុមហ៊ុននេះកំពុងតែពង្រីកខ្លួនពីបណ្ដាញសង្គម ទៅផ្ដោតលើពិភពនិម្មិត (Virtual world)។
លោក Olivan កើត និងធំឡើងនៅ អេស្ប៉ាញ មានសញ្ញាបត្របរិញ្ញាផ្នែកវិស្វកម្មឧស្សាហកម្ម និងបច្ចេកទេសអគ្គិសនី ដែលបានមកពីសាកលវិទ្យាល័យ Navarra, សញ្ញាបត្រអនុបណ្ឌិតផ្នែកគ្រប់គ្រងពាណិជ្ជកម្ម របស់ សាកលវិទ្យាល័យ Stanford។
មុនពេលចូលធ្វើជា ប្រធានផ្នែកកំណើនអន្តរជាតិ (Director of International Growth) ឱ្យក្រុមហ៊ុន Facebook កាលពីឆ្នាំ ២០០៧ លោក Olivan ធ្លាប់ធ្វើការនៅក្រុមហ៊ុនអ៊ីនធើណិត NTT (ជប៉ុន) និង Siemens។ ពេលនោះ Facebook ទើបតែមានអ្នកប្រើប្រាស់ប្រចាំថ្ងៃ ប្រហែល ៤០ លាននាក់ប៉ុណ្ណោះ។ មកដល់ពេលនេះ «ម៉ាស៊ីនរកប្រាក់» នេះ ទាក់ទាញអ្នកប្រើប្រាស់បានជិត ៣.៦ ពាន់លាននាក់នៅលើ Facebook, Instagram, WhatsApp ។ល។
លោក Javier Olivan
ក្នុងនាមជា ប្រធានផ្នែកកំណើនអន្តរជាតិ Olivan បានជំរុញផែនការពង្រីកឥទ្ធិពលរបស់ Facebook នៅក្នុងបណ្ដាប្រទេសដូចជា ឥណ្ឌា, ជប៉ុន, រុស្ស៊ី, ឥណ្ឌូណេស៊ី និង ប្រេស៊ីលជាដើម។
ជាមួយនឹងតំណែង ប្រធានផ្នែកកំណើនអន្តរជាតិ ភារកិច្ចសំខាន់របស់លោក Olivan គឺគ្រប់គ្រងឧបករណ៍ និងមុខងារទាំងឡាយនៅលើ Facebook, Instagram, WhatsApp, Messenger។ ចំណែកតំណែងថ្មី (COO) លោក Olivan នឹងបន្តដឹកនាំសកម្មភាពអភិវឌ្ឍអាជីវកម្ម និងហេដ្ឋារចនាសម្ព័ន្ធ។ ប៉ុន្តែ បើតាម CEO Zuckerberg ការងារដែលលោក Olivan ត្រូវរ៉ាប់រងបន្ថែមទៀត នោះគឺ ផលិតផលផ្សព្វផ្សាយ និងពាណិជ្ជកម្ម៕
July 26, 2022