Author: សឿន សំណាង

រថយន្ត Ford Everest ស៊េរីថ្មីឆ្នាំ 2023 ត្រូវបានដាក់សម្ពោធជាផ្លូវការនៅប្រទេសកម្ពុជា
[ភ្នំពេញ – ថ្ងៃទី ០៥ ខែសីហា ឆ្នាំ ២០២២] ក្រុមហ៊ុន អ អិម អេ (ខេមបូឌា) ម.ក ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបានប្រារព្ធពិធីសម្ពោធជាផ្លូវការនៃរថយន្ត Ford Everest ស៊េរីថ្មីឆ្នាំ 2023 ដែលកម្មវិធីនេះបានប្រារព្ធធ្វើឡើងនៅ ដឹ ព្រេមៀ សេនធ័រ សែនសុខ។
កម្មវិធីនេះត្រូវបានបែងចែកជា 2 ផ្នែក ពេលព្រឹកជាកម្មវិធីបើកបរសាកល្បង ដែលអតិថិជនទាំងអស់អាចអញ្ជើញចូលរួមបើកបរសាកល្បងជាមួយរថយន្ត Ford Everest ស៊េរីថ្មីឆ្នាំ 2023 ជាមួយនឹងអ្នកជំនាញបច្ចេកទេស Ford និងទទួលបានការរៀនពីវគ្គបណ្តុះបណ្តាលស្តីពីការបើកបរដែលធ្វើឲ្យលោកអ្នកទទួលបានបទពិសោធន៏បើកបរដ៏ថ្មីស្រឡាងជាមួយនឹងបច្ចេកវិទ្យាយ៉ាងច្រើនលើសពីការរំពឹងទុក មិនតែប៉ុណ្ណោះអតិថិជនថែមទាំងមានឱកាសលេងហ្គេមដើម្បីទទួលបានរង្វាន់យ៉ាងច្រើនសន្ធឹកសន្ធាប់ផងដែរ។
សម្រាប់កម្មវិធីពេលល្ងាចគឺជាពិធីសម្ពោធជាផ្លូវការនៃរថយន្តនេះដែលបានអញ្ជើញចូលរួមពីសំណាក់ភ្ញៀវកិត្តិយស និងអតិថិជន Ford យ៉ាងច្រើនកុះកររហូតដល់ទៅជាង 2,000 នាក់ឯណោះ។
ឆ្លៀតក្នុងឱកាសនេះដែរ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានថ្លែងសុន្ទរកថានៅក្នុងអង្គពិធីនេះដែរ ដែលលោកបានមានប្រសាសន៍ថា៖ “ដោយមើលឃើញពីការគាំទ្រ និងការនិយមប្រើប្រាស់ពីសំណាក់អតិថិជនមកកាន់រថយន្ត SUV ប៉ុន្មានឆ្នាំចុងក្រោយនេះគួរឲ្យកត់សម្គាល់ ទើបក្រុមហ៊ុនសម្រេចនាំចូលនូវរថយន្ត SUV ជាច្រើនម៉ូឌែលមកជាបន្តបន្ទាប់ ហើយក្នុងថ្ងៃនេះដែរយើងនឹងធ្វើការសម្ពោធដាក់លក់ជាផ្លូវការនៃរថយន្ត Ford Everest ស៊េរីថ្មីឆ្នាំ 2023 ដែលជារថយន្ត Luxury Off-Road ដែលត្រូវបានផ្លាស់ប្តូររូបរាងថ្មីទាំងស្រុង និងបច្ចេកវិទ្យាឆ្លាតលើសពីការរំពឹងទុក ពោលគឺការរចនារូបរាងផ្នែកខាងក្រៅយ៉ាងទាន់សម័យ និងការរចនាផ្នែកខាងក្នុងផ្តល់ជូននូវសុវត្ថិភាព ផាសុកភាព ប្រណិតភាពប្រៀបបានដូចជាជម្រកដ៏កក់ក្តៅមួយ ជាពិសេសស័ក្តិសមបំផុតសម្រាប់អតិថិជនដែលចូលចិត្តដំណើរកម្សាន្តបែបផ្សងព្រេង។”
រថយន្ត Ford Everest ស៊េរីថ្មីឆ្នាំ 2023 គឺជារថយន្ត Luxury Off-Road SUV ដែលមានទាំងភាពប្រណិត ទំនើបទាន់សម័យ និងធន់រឹងមាំអាចបើកបរបានគ្រប់ស្ថានភាពផ្លូវដោយសារតែរថយន្តនេះបានបំពាក់មកជាមួយនឹងប្រព័ន្ធសុវត្ថិភាព និងបច្ចេកវិទ្យាច្រើនលើសពីការរំពឹងទុកដូចជា៖
- ម៉ាស៊ីនម៉ាស៊ូត 0L Bi-Turbo ជំនាន់ថ្មី ដែលត្រូវអភិវឌ្ឍន៍ និងកែប្រែបន្ថែមឲ្យកាន់តែមានកម្លាំងខ្លាំង និងស្ងាត់ជាងមុន
- ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) ដែលនេះគឺជាលើកដំបូងដែល Ford បានបំពាក់ប្រអប់លេខជាប្រភេទអេឡិចត្រូនិចបែបនេះនៅលើរថយន្ត SUV នេះ ដែលប្រអប់លេខនេះមិនត្រឹមតែការរចនាស្រស់ស្អាតដូចរថយន្តស្ព័រប៉ុណ្ណោះទេ តែថែមទាំងមានមុខងារយ៉ាងច្រើនសម្បូរបែបដូចជា៖ ការចូលលេខរលូន និងធូរជាងមុន ការដំណើរការដោយស្វ័យប្រវត្តជាមួយនឹងប្រព័ន្ធជំនួយចូលចតដោយស្វ័យប្រវត្ត 0 ជំនាន់ថ្មី និងសុវត្ថិភាពខ្ពស់បំផុតនោះគឺ នៅពេលដែលលោកអ្នកបានពន្លត់ម៉ាស៊ីនដោយមិនបានចូលលេខទៅ P ប្រអប់លេខនឹងធ្វើការចូលលេខទៅលេខ P ដោយខ្លួនឯងដើម្បីធានាជូននូវសុវត្ថិភាពពេលចតរថយន្ត
- ប្រព័ន្ធជំនួយចូលចតដោយស្វ័យប្រវត្ត 0 ជំនាន់ថ្មី (Active Park Assist 2.0) ដែលរថយន្តនឹងដំណើរការចូលចតដោយស្វ័យប្រវត្តដោយលោកអ្នកគ្រាន់តែចុចនូវប៊ូតុងមួយតែប៉ុណ្ណោះ នោះរថយន្តនឹងធ្វើការចូលចតដោយស្វ័យប្រវត្ត ពោលគឺវាជួយបង្វិលចង្កូត ដំណើរការហ្វ្រាំង និងហ្គ៊ែរ និងប្រអប់លេខក៏នឹងធ្វើការចូលលេខខ្លួនឯង ដោយពុំចាំបាច់មានការចូលរួមពីអ្នកបើកបរឡើយ
- ជាប្រព័ន្ធថ្មីស្រឡាងដែលមានបំពាក់លើតែរថយន្ត Ford Everest នោះគឺប្រព័ន្ធចាប់ហ្វ្រាំងបន្ទាន់ដោយស្វ័យប្រវត្តក្រោយពេលមានការប៉ះទង្គិច (Post-Impact Braking) ដែលជំនូយក្នុងការចាប់ហ្រ្វាំងក្រោយមានការប៉ះទង្គិច ដោយការពាររថយន្តលោកអ្នកមិនឲ្យរ៉េទៅប៉ះរថយន្តដ៏ទៃទៀត
- កុងទ័រឌីជីថលថ្មីស្រឡាងទំហំរហូតដល់ 4 អ៊ីញ (12.4” Digital Instrument Cluster)ដែលនូវផ្តល់ទិន្នន័យយ៉ាងលម្អិតពីរថយន្ត
- អេក្រង់ Touchscreen បញ្ឈរធំចំកណ្តាលទំហំ 12 អ៊ីញ (12-Inch Infotainment Screen) ផ្តល់នូវរូបភាពរស់រវើក
- ប្រព័ន្ធកាមេរ៉ា 360 ដឺក្រេកម្រិតខ្ពស់ជុំវិញរថយន្ត (360^oCamera Split-View Display)
- ប្រព័ន្ធបើកឃ្លុបក្រោយដោយគ្រាន់តែគ្រវាសជើង (Hands-Free Liftgate)
- បូករួមជាមួយនឹងប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែល Ford បានបំពាក់នៅលើរថយន្ត SUV ដ៏ប្រណិតមួយនេះ
គួរបញ្ជាក់ផងដែរថាសម្រាប់ទីផ្សារប្រទេសកម្ពុជា Ford Cambodia ប្រកាសបើកទទួលការកក់ជាផ្លូវការជាមួយនឹងរថយន្ត Ford Everest Sport ស៊េរីថ្មីឆ្នាំ 2023 ជាមួយនឹងតម្លៃជាង 6 ម៉ឺនដុល្លា និងរថយន្ត Ford Everest Titanium ស៊េរីថ្មីឆ្នាំ 2023 ជាមួយនឹងតម្លៃជាង 7 ម៉ឺនដុល្លា សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរនៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
- អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
- អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
- អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
- អគារតាំងបង្ហាញរថយន្ត Ford Trade-In ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 077 722 999
- អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
- អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
August 6, 2022
បណ្ដាប្រទេសដែលផលិតឧស្ម័នច្រើនជាងគេក្នុងពិភពលោក! រុស្ស៊ី មិនមែនឈរលំដាប់លេខ១ឡើយ
ទិន្នន័យពី របាយការណ៍ស្ថិតិថាមពលពិភពលោក របស់ BP (ក្រុមហ៊ុនប្រេងឧស្ម័នរបស់ ចក្រភពអង់គ្លេស) បានបង្ហាញថា រុស្ស៊ី មិនមែនជាប្រទេសដែលផលិតឧស្ម័នធំជាងគេក្នុងពិភពលោកទេ ប៉ុន្តែ តំណែងនេះគឺជារបស់ សហរដ្ឋអាម៉េរិក។
ចាប់តាំងពីផ្ទុះសង្គ្រាមនៅ អ៊ុយក្រែន តម្លៃឧស្ម័នធម្មជាតិរបស់ពិភពលោក បានកើនឡើងខ្ពស់ខ្លាំង។ ប្រការនេះកើតឡើងក្នុងគ្រាដែលប្រភពផ្គត់ផ្គង់កំពុងថយចុះចាប់ពីរដូវស្លឹកឈើជ្រុះក្នុងពីឆ្នាំ ២០២១។
ការកាត់បន្ថយឧស្ម័នដែលនាំចេញទៅ អឺរ៉ុប ពីសំណាក់ ទីក្រុងមូស្គូ កាន់តែធ្វើឱ្យស្ថានការណ៍អាក្រក់ឡើងៗ រុញច្រានតម្លៃឧស្ម័ននៅ ទ្វីបនេះ ឡើងខ្ពស់ជាងជិត ១០ ដង ធៀបនឹងតម្លៃមធ្យមមុនពេលកើតមានសង្គ្រាមនៅ អ៊ុយក្រែន។
រុស្ស៊ី គឺជាប្រទេសផលិតឧស្ម័នធំជាងគេលំដាប់ទីពីរក្នុងពិភពលោក ដោយក្ដៅក្ដាប់ ១៧.៤% នៃបរិមាណឧស្ម័នសរុបដែលពិភពលោកបានផលិត បន្ទាប់ពី សហរដ្ឋអាម៉េរិក ដែលកាន់កាប់ ២៣.១%។ បណ្ដាប្រទេសក្រៅពីនេះ ដែលស្ថិតក្នុង top ៥ នៃបណ្ដាប្រទេសផលិតឧស្ម័នច្រើនជាងគេបង្អស់ក្នុងពិភពលោក (២០២១) រួមមាន អ៊ីរ៉ង់ (៦.៤%), ចិន (៥.២%) និង កាតា (៤.៤%)។
August 6, 2022
សាធារណរដ្ឋកូរ៉េ ផ្ដល់ «ទិដ្ឋាការហាត់ការ» ក្នុងវិស័យបច្ចេកវិទ្យាជាន់ខ្ពស់ សម្រាប់និស្សិតបរទេស
កាលពីថ្ងៃទី ០៥ សីហា ក្រសួងយុត្តិធម៌ របស់ សាធារណរដ្ឋកូរ៉េ (កូរ៉េខាងត្បូង) បានឱ្យដឹងថា និស្សិតដែលមកពីសាកលវិទ្យាល័យល្បីឈ្មោះនៅបរទេស នឹងត្រូវបានអនុញ្ញាតឱ្យចូលហាត់ការនៅក្នុងបណ្ដាក្រុមហ៊ុនបច្ចេកវិទ្យាជាន់ខ្ពស់ និងវិទ្យាស្ថានស្រាវជ្រាវរបស់ កូរ៉េខាងត្បូង ទៅតាមកម្មវិធីទិដ្ឋាការថ្មី ដើម្បីជួយបង្កើនសមត្ថភាពប្រកួតប្រជែងរបស់បណ្ដាក្រុមហ៊ុននៅប្រទេសនេះ។
យោងតាមការប្រកាសរបស់ ក្រសួងយុត្តិធម៌កូរ៉េខាងត្បូង កម្មវិធីផ្ដល់ទិដ្ឋាការហាត់ការក្នុងវិស័យបច្ចេកវិទ្យាជាន់ខ្ពស់ (D-10-3) សម្រាប់និស្សិតមកពីសាកលវិទ្យាល័យធំៗនៅបរទេស នឹងមានសុពលភាពចាប់ពីថ្ងៃទី ៨ សីហាខាងមុខ។
ទិដ្ឋាការ D-10-3 នឹងផ្ដល់ជូននិស្សិតដែលសិក្សាជំនាញបច្ចេកវិទ្យាជាន់ខ្ពស់នៅក្នុងសាកលវិទ្យាល័យចំនួន ២០០ ដែលល្អបំផុតក្នុងពិភពលោក ត្រូវបានវាយតម្លៃ ជ្រើសរើសដោយទស្សនាវដ្ដី Time របស់ សហរដ្ឋអាម៉េរិក ឬមកពីសាកលវិទ្យាល័យលំដាប់កំពូលទាំង ៥០០ ដែលដាក់ចំណាត់ថ្នាក់ដោយ QS World University Rankings)។
ក្រៅពីនិស្សិតដែលមានលក្ខខណ្ឌដូចខាងលើ និស្សិតទាំងឡាយដែលបានបញ្ចប់ការសិក្សាផ្នែកជំនាញបច្ចេកវិទ្យាជាន់ខ្ពស់ពីបណ្ដាសាកលវិទ្យាល័យលំដាប់កំពូលៗក្នុងពិភពលោក នៅក្នុងរយៈពេល ៣ ឆ្នាំចុងក្រោយនេះ ក៏នឹងទទួលបានវីសាប្រភេទ D-10-3 នេះដែរ។
ពលរដ្ឋបរទេសទាំងឡាយដែលមានទិដ្ឋាការប្រភេទ D-10-3 អាចចូលហាត់ការងារនៅក្នុងបណ្ដាក្រុមហ៊ុន ឬវិទ្យាស្ថានស្រាវជ្រាវនៅ កូរ៉េខាងត្បូង ក្នុងវិស័យបច្ចេកវិទ្យាជាន់ខ្ពស់ ដែលទាក់ទងនឹងជំនាញមួយចំនួន មានដូចជា បច្ចេកវិទ្យាបន្ទះអេឡិចត្រូនិក (semiconductor), ព័ត៌មានវិទ្យា, គ្រប់គ្រងបច្ចេកវិទ្យា, បច្ចេកវិទ្យាណាតូ, អេឡិចត្រូនិចឌីជីថល និងបច្ចេកវិទ្យាជីវសាស្ត្រ ជាដើម។
រដ្ឋាភិបាលកូរ៉េខាងត្បូង ក៏នឹងអាចពន្យារសុពលភាពនៃការស្នាក់នៅសម្រាប់ពលរដ្ឋបរទេសដែលហាត់ការផ្នែកបច្ចេកវិទ្យាជាន់ខ្ពស់ ដើម្បីជួយឱ្យពួកគេអាចស្វែងរកការងារបានធ្វើនៅ កូរ៉េខាងត្បូង និងជួយដល់ការប្ដូរពីទិដ្ឋការ D-10-3 ទៅជាទិដ្ឋាការពលកម្ម ឬទិដ្ឋាការបើកក្រុមហ៊ុនផងដែរ។
ទោះជាយ៉ាងណាក៏ដោយ រដ្ឋាភិបាលកូរ៉េខាងត្បូង ក៏បានកំណត់ចំនួនអ្នកហាត់ការដែលជាពលរដ្ឋបរទេស ក្នុងអត្រាមិនឱ្យលើសពី ២០% ធៀងនឹងបុគ្គលិកសរុបនៅក្នុងបណ្ដាក្រុមហ៊ុនក្នុងស្រុក៕
August 6, 2022
មជ្ឈិមបូព៌ា បង្កើនការផលិតឧស្ម័នដើម្បីបំពេញតម្រូវការពិភពលោក
មជ្ឈិមបូព៌ា ដែលជាតំបន់នាំចេញប្រេងរ៉ែលំដាប់កំពូលរបស់ពិភពលោក កំពុងរកវិធីបង្កើនការផលិត និងនាំចេញឧស្ម័នធម្មជាតិ នៅពេលតម្រូវការចំពោះថាមពលប្រភេទនេះនឹងកើនឡើងនៅក្នុងប្រទេស ក៏ដូចជានៅទូទាំងសកលលោកនាប៉ុន្មានឆ្នាំខាងមុខ។
ទំព័រ oilprice.com បានចុះផ្សាយថា កាតា ដែលជាប្រទេសនាំចេញឧស្ម័នធម្មជាតិរាវ (LNG) ធំជាងគេមួយក្នុងពិភពលោក បាននាំមុខគេក្នុងវិស័យឧស្ម័ននៅ មជ្ឈិមបូព៌ា ក្នុងរយៈពេលច្រើនឆ្នាំមកហើយ គ្រាដែលបណ្ដាប្រទេសដទៃក្នុងតំបន់ដែលសម្បូរឧស្ម័នធម្មជាតិនេះ បែរជាមិនបានយកចិត្តទុកដាក់ក្នុងការវិនិយោគទៅលើវិស័យនេះ។ ក៏ប៉ុន្តែ ពេលនេះ ប្រទេសទាំងនោះសុទ្ធតែកំពុងចាប់ផ្ដើមប្ដូរផ្លាស់ឥរិយាបថដើម្បីចាប់យកឱកាស ក្នុងពេលតម្លៃឧស្ម័នធម្មជាតិកើនឡើងខ្ពស់។
ក្រុមអ្នកផលិតប្រេងធំៗក្នុងអង្គការ OPEC មានដូចជា អារ៉ាប៊ីសាអូឌីត និងអេមីរ៉ាតអារ៉ាប់រួម (UAE) ជាដើម បាន និងកំពុងបង្កើនបរិមាណឧស្ម័នក្នុងប្រទេស។
ទីផ្សារឧស្ម័នទូទាំងពិភពលោក បានប្រែប្រួលខ្លាំងចាប់តាំងពី រុស្ស៊ី ចូលលុកលុយ អ៊ុយក្រែន។ តម្រូវការចំពោះ LNG ត្រូវបានគេព្យាករថា នឹងកើនឡើងខ្ពស់ខ្លាំងនៅ អឺរ៉ុប នៅពេលទ្វីបនេះ ស្វែងរកវិធីដើម្បីបញ្ចប់ការពឹងផ្អែកលើប្រេង និងឧស្ម័នរបស់ រុស្ស៊ី។ នេះគឺជាកត្តាវិជ្ជមានសម្រាប់បណ្ដាប្រទេសផលិតប្រេងឥន្ធនៈនៅ មជ្ឈិមបូព៌ា សម្រាប់ការបង្កើនបរិមាណឧស្ម័ន LNG។
នៅ ប្រទេសកាតា កាលពីឆ្នាំមុន រដ្ឋាភិបាលបានប្រកាសគម្រោង LNG ធំជាងគេបង្អស់ក្នុងពិភពលោក នោះគឺគម្រោង North Field East (NFE) ដើម្បីបង្កើនការផលិត LNG របស់ប្រទេសនេះ ពី ៧៧ លានតោន ឱ្យឡើងដល់ ១១០ លានតោនជារៀងរាល់ឆ្នាំ។ គម្រោងនេះនឹងចាប់ផ្ដើមការផលិតនៅត្រីមាសទី ៤ ឆ្នាំ ២០២៥ ដោយត្រូវចំណាយប្រាក់វិនិយោគប្រមាណ ២៨.៧៥ ពាន់លានដុល្លារអាម៉េរិក។ ដំណាក់កាលទីពីរនៃការពង្រីកគម្រោងខាងលើ នោះគឺគម្រោង North Field South (NFS) ដែលគ្រោងនឹងបង្កើនការផលិតពី ១១០ លានតោន ដល់ឡើង ១២៦ លានតោនជារៀងរាល់ឆ្នាំ ដោយគ្រោងនឹងផ្ដើមការផលិតចាប់ពីឆ្នាំ ២០២៧។
ក្រៅពី ប្រទេសកាតា បណ្ដាប្រទេសក្នុងតំបន់ មជ្ឈិមបូព៌ា ដទៃទៀតក៏កំពុងពង្រីកសកម្មភាពក្នុងវិស័យផលិត និងនាំចេញឧស្ម័នធម្មជាតិរាវនេះដែរ ក្នុងនោះ ប្រទេសដែលលេចធ្លោជាងគេបន្ទាប់ពី កាតា គឺ អេមីរ៉ាតអារ៉ាប់រួម និង ប្រទេសអូម៉ង់។

August 6, 2022
LAMBORGHINI អភិវឌ្ឍកំពូលរថយន្តអគ្គិសនី ល្បឿនលឿនជាងរថយន្តម៉ាស៊ីនសាំង
ក្រុមហ៊ុនផលិតរថយន្តកីឡាប្រណិត Lamborghini បានឱ្យដឹងថា ពួកគេកំពុងអភិវឌ្ឍម៉ូដែលរថយន្ត hybrid និងរថយន្តអគ្គិសនី ដែលបរបានលឿនជាង Huracan V10 និង Aventador V12។
បច្ចេកវិទ្យា hybrid និងអគ្គិសនី អាចជំរុញឱ្យមានយុគសម័យជឿនលឿនថ្មីនៅក្នុងវិស័យរថយន្ត ដោយវាមានប្រសិទ្ធភាព និងកម្លាំងខ្លាំងជាងបណ្ដាកំពូលរថយន្តដែលដំណើរការដោយម៉ាស៊ីនសាំងនាបច្ចុប្បន្នទៅទៀត។
ប្រធានក្រុមហ៊ុន Lamborghini លោក Stephan Windelmann បានឱ្យដឹងថា អគ្គិសនីបើកផ្លូវឱ្យមានឱកាសថ្មីសម្រាប់ក្រុមហ៊ុន រួមទាំងម៉ូដែលរថយន្តទីបួនដែលជិតនឹងបង្ហាញខ្លួន នោះគឺម៉ូដែល SUV ប្រភេទអគ្គិសនី។
«ខ្ញុំគិតថា យើងនឹងមានឱកាសល្អក្នុងបណ្ដាឆ្នាំខាងមុខ ដើម្បីបង្ហាញថា ក្រុមហ៊ុនអាចប្រសើរជាងបច្ចុប្បន្ន ទាក់ទងនឹងទម្រង់រូបរាង»៕
August 5, 2022
វិស័យអាកាសចរណ៍នៅ តំបន់អាស៊ីអាគ្នេយ៍ ចាប់ផ្ដើមងើបឡើងវិញ ប៉ុន្តែ កំពុង «ចាំមើលផ្លូវ» ចិន
ទីផ្សារអាកាសចរណ៍នៅ តំបន់អាស៊ីអាគ្នេយ៍ កំពុងតែងើបឡើងវិញជាបណ្ដើរៗ និងមានសញ្ញាណវិជ្ជមានជាច្រើនដែលនាំឱ្យមានក្ដីសង្ឃឹម ប៉ុន្តែ នៅតែត្រូវការការជួយរុញច្រានពី ចិនដីគោក។
បណ្ដាក្រុមហ៊ុនអាកាសចរណ៍នៅ អាស៊ីអាគ្នេយ៍ បានចាប់ផ្ដើមប្រសើរឡើងវិញទាក់ទងនឹងការកក់សំបុត្រ នៅពេលវិធានការរឹតបន្តឹងការដើរហើរក្នុងតំបន់ត្រូវបានបន្ធូរបន្ថយ រួមនឹងការជំរុញវិស័យទេសចរណ៍ឡើងវិញពីសំណាក់អាជ្ញាធរនៃបណ្ដាប្រទេស។
«យើងជឿថា រដូវកាលធ្វើដំណើរច្រើនចាប់ពីខែតុលាឆ្នាំនេះ នឹងមានអតិថិជនច្រើនបំផុតក្នុងអំឡុង ២ ឆ្នាំកន្លង» លោក Nond Kalinta ប្រធានពាណិជ្ជកម្មរបស់ Thai Airways បានប្រាប់ Nikkei Asia ដូច្នេះ។
ចំនួនអតិថិជនរបស់ Thai Airways ពី អឺរ៉ុប កំពុងតែមានការកើនឡើង ក្នុងនោះ ចំនួនភ្ញៀវប្រចាំថ្ងៃ កើនឡើងជិត ៦ ដង ក្នុងអំឡុងពេលពីខែមករា ដល់មិថុនាឆ្នាំនេះ។
យន្តហោះរបស់ក្រុមហ៊ុន Philippine Airlines
ចំណែក Philippine Airlines វិញ បានកំណត់គោលដៅស្ដារជើងហោះហើរឡើងវិញឱ្យបាន ៨០% ធៀបនឹងដំណាក់កាលមុនសម័យកូវីដ-១៩។ ក្នុងខែមីនា ក្រុមហ៊ុននេះដឹកភ្ញៀវអន្តរជាតិបាន ១,៥០០ ជើង រួមមានជើងហោះហើរទៅមក ជប៉ុន, អាម៉េរិកខាងជើង និងមជ្ឈិមបូព៌ាផងដែរ។
កាលពីខែមិថុនា ក្រុមហ៊ុនអាកាសចរណ៍ Garuda Indonesia របស់ ប្រទេសឥណ្ឌូណេស៊ី ដែលវិះនឹងក្ស័យធន សម្រេចបានកិច្ចព្រមព្រៀងមួយជាមួយម្ចាស់បំណុល ដើម្បីបន្ថយខ្ទង់បំណុលប្រហែល ៩.៥៤ ពាន់លានដុល្លារអាម៉េរិក។ ក្រុមហ៊ុននេះក៏គ្រោងនឹងទទួលខ្ទង់បានប្រាក់វិនិយោគជាង ៧ ទ្រីលានរូពៀផងដែរ ពីរដ្ឋាភិបាល។
ដំណឹងទាំងនេះពិតជាគួរឱ្យមានក្ដីសង្ឃឹម ប៉ុន្តែ ក្រុមហ៊ុនអាកាសចរណ៍នានានៅតែទន្ទឹងរង់ចាំដំណឹងល្អបំផុតដើម្បីអាចឱ្យសកម្មភាពបម្រើសេវាកម្មរបស់ពួកគេដំណើរការប្រក្រតី នោះគឺ គេត្រូវការឱ្យការធ្វើដំណើរទៅមកពី ប្រទេសចិន «ល្អប្រសើរឡើងវិញ»។
យន្តហោះរបស់ក្រុមហ៊ុន Garuda Indonesia
ភ្ញៀវពី ប្រទេសចិន ហាក់មិនទាន់ត្រលប់មកវិញ។ ទីក្រុងប៉េកាំង ស្នើឱ្យប្រតិបត្តិករទេសរណ៍ផ្អាកការបញ្ចេញកញ្ចប់ទេសចរណ៍ជាក្រុមទៅបរទេស និងបន្តអនុវត្តវិធានការទប់ស្កាត់កូវីដ-១៩។ នាយកដ្ឋានអាកាសចរណ៍ស៊ីវិលចិន (CAAC) អនុញ្ញាតឱ្យដំណើរការចំពោះតែជើងហោះហើរមួយចំនួនដែលគ្រប់គ្រងដោយក្រុមហ៊ុនបរទេស។
គួរបញ្ជាក់ថា អ្នកដំណើរជាង ១០% របស់ Thai Airways នៅលើជើងហោះហើរអន្តរជាតិក្នុងឆ្នាំ ២០១៩ (មុនកូវីដ-១៩) គឺជា ជនជាតិចិន៕
August 5, 2022
ការសិក្សាស្រាវជ្រាវ ៖ វិស័យមូលបត្រនាំមកនូវប្រាក់ចំណេញខ្ពស់ជាងអចលនទ្រព្យ ប៉ុន្តែ បន្ថែមគម្លាតរវាងអ្នកមាន និងអ្នកក្រ
ទីផ្សារមូលបត្របានឡើងថ្លៃខ្ពស់ជាង ៥ ដង ធៀបនឹងអត្រានៃកំណើនរបស់តម្លៃអចលនទ្រព្យ រាប់ចាប់ពីឆ្នាំ ១៩៥០ នេះបើតាមរបាយការណ៍របស់ NBER។
សម្រាប់ជនជាតិអាម៉េរិក ក៏ដូចជាមនុស្សភាគច្រើននៅលើផែនដី ការដែលមានដី និងផ្ទះ គឺជាវិធីសន្សំទ្រព្យមួយដ៏ពេញនិយម។ ក៏ប៉ុន្តែ របាយការណ៍ថ្មីរបស់ ការិយាល័យស្រាវជ្រាវសេដ្ឋកិច្ចជាតិ (NBER) របស់ សហរដ្ឋអាម៉េរិក បានឱ្យដឹងថា ទម្រង់វិនិយោគដែលនាំមកនូវប្រាក់ចំណេញខ្ពស់ជាងគេគឺមូលបត្រ ពោលគឺមិនមែនអចលនទ្រព្យឡើយ នៅក្នុងអំឡុងពេលច្រើនទសវត្សរ៍មកនេះ។
យោងតាមរបាយការណ៍ស្រាវជ្រាវខាងលើ ទីផ្សារមូលបត្របានឡើងថ្លៃខ្ពស់ជាង ៥ ដង ធៀបនឹងអត្រានៃកំណើនរបស់តម្លៃអចលនទ្រព្យ រាប់ចាប់ពីឆ្នាំ ១៩៥០។ នេះមានន័យថា ពលរដ្ឋអាម៉េរិក ដែលវិនិយោគទៅលើទីផ្សារមូលបត្រ រកបានប្រាក់ចំណេញខ្ពស់ជាង ធៀបនឹងអ្នកវិនិយោគទៅក្នុងវិស័យអចលនទ្រព្យ។
«នេះគឺជាមូលហេតុមួយដែលធ្វើឱ្យមានការកើនឡើងនៃគម្លាតរវាងអ្នកមាន និងអ្នកក្រ ទាក់ទិននឹងជាតិសាសន៍នៅ សហរដ្ឋអាម៉េរិក។ ជនជនអាម៉េរិកស្បែកខ្មៅ មានទ្រព្យស្ថិតក្នុងវិស័យអចលនទ្រព្យច្រើនជាងមូលបត្រ ហើយប្រការនេះមិនមានអំណោយផលល្អសម្រាប់ពួកគេ» Business Insider ស្រង់របាយការណ៍របស់ NBER ឱ្យដឹងដូច្នេះ។
ការស្រាវជ្រាវមួយរបស់ Fed New York (ធនាគារជាតិអាម៉េរិក សាខា New York) កាលពីឆ្នាំមុនបានបង្ហាញថា ជាង ៩០% នៃមនុស្សដែលបានចូលរួមការស្ទង់មតិ ប្រាប់ថា ចូលចិត្តកាន់កាប់អចលនទ្រព្យជាជាងការវិនិយោគទៅក្នុងទីផ្សារមូលបត្រ ហើយសូម្បីតែនៅក្នុងពេលទីផ្សារមូលបត្របង្កើតបានកំណត់ត្រាថ្មីៗជាបន្តបន្ទាប់ ក៏ឥរិយាបថនេះមិនបានប្ដូរផ្លាស់ដែរ។
«ក្នុងអំឡុងពេលប្រហែលពីឆ្នាំ ១៩៥០ ដល់ ២០១៩ ផ្ទះស្នាក់នៅ និងទ្រព្យដែលមិនមានជាហិរញ្ញវត្ថុ បានគ្របដណ្ដប់លើមុខជំនួញមួយភាគធំរបស់ ជនជាតិអាម៉េរិកស្បែកខ្មៅ ខណៈដែលវាមានតែ ៤១% ប៉ុណ្ណោះ នៅក្នុងខ្ទង់វិនិយោគរបស់ ជនជាតិអាម៉េរិកស្បែកស។ ទ្រព្យដែលជាទម្រង់ភាគហ៊ុនរបស់ ជនជាតិអាម៉េរិកស្បែកខ្មៅ មានតែ ៧% ប៉ុណ្ណោះ ទាបជាងឆ្ងាយ បើធៀបនឹង ១៨% របស់ ជនជាតិអាម៉េរិកស្បែកស» របាយការណ៍ខាងលើបង្ហាញដូច្នេះ។
របាយការណ៍នេះបន្ថែមថា «ការឡើងថ្លៃខ្ពស់នៃទីផ្សារមូលបត្រ បាននាំឱ្យទ្រព្យរបស់ក្រុមអ្នកមានកំពូលៗ ដែលភាគច្រើនបំផុតជា ជនជាតិអាម៉េរិកស្បែកស បានកើនឡើងខ្ពស់ខ្លាំង»។
ក្រុមអ្នកស្រាវជ្រាវរបស់ NBER បង្ហាញថា ក្នុងអំឡុងសម័យកូវីដ-១៩ កម្រិតនៃការប្រមូលផ្ដុំរបស់ទ្រព្យនៅ សហរដ្ឋអាម៉េរិក បានឡើងដល់កំពូល រាប់ចាប់ពីសង្គ្រាមលោកលើកទីពីរ ក្នុងនោះមានគ្រួសារតែ ០.០១% ប៉ុណ្ណោះ ដែលកាន់កាប់ ៣៦% នៃទ្រព្យឯកជនសរុបទូទាំងប្រទេស។
ក្រុមអ្នកស្រាវជ្រាវរបស់ NBER សន្និដ្ឋានថា គោលនយោបាយនានាដែលបែងចែកទ្រព្យឡើងវិញ នឹងជួយកាត់បន្ថយបានភ្លាមៗនូវវិសមភាពរវាងអ្នកមាន និងអ្នកក្រ។ ផ្ទុយទៅវិញ បើសិនជាវិធានការស្ដីពីរចនាសម្ព័ន្ធត្រូវបានអនុវត្តសន្សឹមៗ គេនឹងអាចត្រូវចំណាយពេលរាប់សតវត្សរ៍ ដើម្បីទទួលបានប្រសិទ្ធភាព។ ទោះជាបែបនេះក្ដី ក្រុមនេះសង្កត់ធ្ងន់ថា វិធីសាស្ត្រទាំងពីរនេះសុទ្ធតែមានសារសំខាន់ និងចាំបាច់៕
August 5, 2022
ក្រសួងសាធារណការ ណែនាំដល់អ្នកបើកបរ យកឯកសារពាក់ព័ន្ធតាមខ្លួន ពេលធ្វើចរាចរណ៍លើដងផ្លូវ
ដើម្បីចូលរួមអនុវត្តច្បាប់ស្ដីពីចរាចរណ៍ផ្លូវគោក ក្រសួងសាធារណការ និងដឹកជញ្ជូន ណែនាំដល់អ្នកបើកបរយានយន្តនៅលើផ្លូវថ្នល់ យកឯកសារពាក់ព័ន្ធភ្ជាប់តាមខ្លួន មានដូចជា បណ្ណបើកបរច្បាប់ដើមជាដើម។ល។
ព័ត៌មានលម្អិត សូមអានសេចក្ដីជូនដំណឹងរបស់ ក្រសួងសាធារណការ និងដឹកជញ្ជូន ខាងក្រោម ៖
August 5, 2022
គម្រោងវិនិយោគថ្មីចំនួន ៥ ត្រូវបានអនុម័តឱ្យដំណើរការនៅខេត្តក្រុងមួយចំនួន ក្នុងនោះមានផលិតផលសូឡាផងដែរ
គម្រោងវិនិយោគថ្មីចំនួន ៥ ដែលមានតម្លៃជាង ២៦ លានដុល្លារ ត្រូវបានសម្រេចចេញវិញ្ញាបនបត្រចុះបញ្ជី ឱ្យដំណើរការនៅខេត្តក្រុងមួយចំនួន ៣ នេះបើតាម គណៈកម្មាធិការវិនិយោគកម្ពុជា នៃ ក្រុមប្រឹក្សាអភិវឌ្ឍន៍កម្ពុជា ដែលបានឱ្យដឹងកាលពីព្រឹកមិញនេះ។
គម្រោងវិនិយោគថ្មីទាំងនេះរួមមាន ៖
១. FUKKI APPAREL AND LAUNDRY TECHNOLOGY CO., LTD គម្រោងបង្កើតរោងចក្រកាត់ដេរ និងបោកគក់សម្លៀកបំពាក់ ដែលមានទីតាំងវិនិយោគស្ថិតនៅផ្លូវលេខ ៦ A ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ក្នុងទុនវិនិយោគប្រមាណ ៥.៤ លានដុល្លារអាមេរិក និងអាចបង្កើតការងារបានចំនួន ២,៤០៤ កន្លែង។
២. THE INHERITANCE (CAMBODIA) CO., LTD គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិអង្គសុគន្ធា ឃុំមហាឫស្សី ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥.៣ លានដុល្លារអាមេរិក និងអាចបង្កើតការងារបានចំនួន ១,០១៨ កន្លែង។
ដោយឡែក តាមសំណើសុំវិនិយោគរបស់ក្រុមហ៊ុន គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖
១- “Solar Long PV-Tech (Cambodia) Co., Ltd.” គម្រោងបង្កើតរោងចក្រផលិតបន្ទះសូឡា និងគ្រឿងបង្គុំ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ១២ លានដុល្លារអាមេរិក និងបង្កើតការងារបានចំនួនប្រមាណ ៥០០ នាក់។
២- “Cambodian Xihanouke Cabinet Co., Ltd.” គម្រោងបង្កើតរោងចក្រផលិតទូគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជឺ, ខេត្តព្រះសីហនុ, មានទុនវិនិយោគចំនួន ៣ លានដុល្លារអាមេរិក និងបង្កើតការងារបានចំនួនប្រមាណ ២៥០ នាក់។
៣- “Taica (Cambodia) Corporation” គម្រោងបង្កើតរោងចក្រផលិតគ្រាប់ជ័រ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៦២ ម៉ឺនដុល្លារអាមេរិក និងបង្កើតការងារបានចំនួនប្រមាណ ២០ នាក់។
August 5, 2022
ពិព័រណ៍ចម្លែក នៅ សិង្ហបុរី ៖ រូបសំណាកនិយាយអំពី «ពូជកូនកាត់» រវាងមនុស្ស និងសត្វ
ពិព័រណ៍ «Patricia Piccinini ៖ We are Connected» មានតាំងបង្ហាញស្នាដៃចម្លាក់ដែលមានភាពរស់រវើក ចម្លែកអស្ចារ្យ ស្ដីពីការ «បង្កាត់ពូជ» រវាងមនុស្ស និងសត្វ។
វិចិត្រការិនីជនជាតិអូស្ត្រាលី Patricia Piccinini ថ្លែងនៅក្នុងសន្និសីទសារព័ត៌មាននៅក្នុងព្រឹត្តិការណ៍តាំងពិព័រណ៍របស់នាងនៅឯសារមន្ទីរ ArtScience នៅ ប្រទេសសិង្ហបុរី។ Patricia Piccinini និងស្នាដៃរបស់នាង និយាយអំពីការព្រួយបារម្ភចំពោះអនាគតដែលមនុស្សមិនចង់បាន។
នាង Patricia Piccinini ធ្វើការនៅក្នុងប្រព័ន្ធផ្សព្វផ្សាយ និងការងារច្រើនប្រភេទ មានដូចជា ការគូរគំនូរ វីដេអូ សំឡេង ការបោះពុម្ភបែបឌីជីថល និងរូបចម្លាក់ជាដើម។ ការងាររបស់ Patricia តែងផ្តោតលើ «ផលវិបាកដែលគេមិនចង់បាន» បង្ហាញពីការព្រួយបារម្ភជុំវិញបញ្ហាសីលធម៌ក្នុងជីវសាស្ត្រ និងជួយឱ្យមើលឃើញពី «ពិភពអវិជ្ជមាន» (dystopias) ដែលគួរឱ្យខ្លាច នាពេលអនាគត។
ខាងក្រោមនេះគឺជាបណ្ដារូបចម្លាក់ដែលមានក្នុងពិព័រណ៍ «Patricia Piccinini ៖ We are Connected» របស់នាង Patricia Piccinini ៖

August 5, 2022