សឿន សំណាង - La Reine Media

ប្រេងពិភពលោកបញ្ចប់ការជួញដូរក្នុងថ្ងៃទី ២៦ កញ្ញា ដោយការធ្លាក់ថ្លៃ ខណៈដែលតម្លៃប្រាក់ដុល្លារអាម៉េរិក បន្តកើនឡើង

តម្លៃប្រេងដាំក្បាលចុះ ខណៈតម្លៃប្រាក់ដុល្លារអាម៉េរិករក្សាបានកំណើន នៅពេលរតនាគារជាតិអាម៉េរិក (Fed) ដំឡើងការប្រាក់ ៧៥ ពិន្ទុជាលើកទី ៣ ក្នុងសប្ដាហ៍កន្លង។

តម្លៃប្រេងពិភពលោកបញ្ចប់ការជួញដូរកាលពីថ្ងៃទី ២៦ កញ្ញា ដោយការថយចុះ ក្រោមសម្ពាធពីការឡើងថ្លៃរបស់ប្រាក់ដុល្លារអាម៉េរិក។ តម្លៃប្រេង WTI ប្រគល់ក្នុងខែកញ្ញា ២០២២ ធ្លាក់ថ្លៃ ២.០៣ ដុល្លារ ឬ ២.៦% ចុះមកនៅត្រឹម ៧៦.៧១ ដុល្លារ/ធុង នៅ New York។ តម្លៃប្រេង Brent ប្រគល់ក្នុងអំឡុងពេលដូចខាងលើ ក៏ធ្លាក់ថ្លៃ ២.០៩ ដុល្លារ ឬ ២.៤% មកនៅត្រឹម ៨៤.០៦ ដុល្លារ/ធុង នៅ London។

ប្រេងធ្លាក់ថ្លៃនៅពេលប្រាក់ដុល្លារអាម៉េរិកបន្តឡើងថ្លៃ ក្រោយពី Fed បានដំឡើងការប្រាក់ ៧៥ ពិន្ទុជាលើកទី ៣ ក្នុងសប្ដាហ៍កន្លង និងព្រមានថា នឹងដំឡើងថ្លៃបន្តទៀត។

សន្ទស្សន៍ USD សម្រាប់វាស់ស្ទង់កម្លាំងរបស់ប្រាក់ដុល្លារអាម៉េរិក ធៀបនឹងរូបិយប័ណ្ណថ្លៃៗចំនួន ៦ ផ្សេងទៀត កើន ០.៨១% ដោយឡើងដល់ ១១៣.១០៣ នៅក្នុងពេលបញ្ចប់ការជួញដូរកាលពីម្សិលមិញ ក្រោយពីបានកើន ១.៦៥% កាលពីម្សិលម្ង៉ៃ។

តម្លៃរបស់ប្រេងពិភពលោកតែងតែមានការប្រែប្រួលផ្ទុយទៅនឹងតម្លៃរូបិយប័ណ្ណដុល្លារអាម៉េរិក៕

September 27, 2022

ជប៉ុន ប្រារព្ធពិធីបូជាភ្លើងសពលោក ស្ហីនហ្សូ អាបេ (Shinzo Abe) នៅថ្ងៃនេះ

ពិធីបូជាសពអតីតនាយករដ្ឋមន្ត្រីជប៉ុន លោក ស្ហីនហ្សូ អាបេ គ្រោងនឹងចាប់ផ្ដើមនៅវេលាម៉ោង ១៤ ថ្ងៃទី ២៧ កញ្ញានេះ (ម៉ោង ១២ នៅ កម្ពុជា) នៅឯសាលប្រកួតក្បាច់គុន Nippon Budokan ក្នុង រាជធានីតូក្យូ។

រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីជប៉ុន Hirokazu Matsuno នឹងឡើងថ្លែងការណ៍ចាប់ចាប់ពិធីបូជាសពអតីតនាយករដ្ឋមន្ត្រីជប៉ុន ស្ហីនហ្សូ អាបេ នៅថ្ងៃនេះ។ បន្ទាប់មក នាយករដ្ឋមន្ត្រី Fumio Kishida និងក្រុមមន្ត្រីជាន់ខ្ពស់ជប៉ុន រួមនឹងអតីតនាយករដ្ឋមន្ត្រី Yoshihide Suga នឹងអានសុន្ទរកថា រម្លឹកវិញ្ញាណក្ខន្ធលោក អាបេ។

យោងតាមប្រពៃណី ព្រះចៅអធិរាជជប៉ុន Naruhito និងព្រះមហេសី Masako, អតីតព្រះចៅអធិរាជជប៉ុន Akihito និងមហេសី នឹងមិនយាងចូលរួមពិធីបូជាសព ប៉ុន្តែទ្រង់ចាត់តំណាងមកជំនួស។ សមាជិកផ្សេងទៀតរបស់រាជវង្សជប៉ុន មានដូចជា រាជទាយាទ Akishino និងមហាសី Kiko នឹងដាក់កម្រផ្ការំលែកទុក្ខ។ បន្ទាប់មកទៀត ភ្ញៀវសំខាន់ៗដែលចូលរួមបុណ្យសព នឹងឡើងថ្លែងការណ៍ជាបន្តបន្ទាប់ ដើម្បីជាការចូលរួមរំលែកទុក្ខនៃគ្រួសារសព។

ពិធីបុណ្យសពនេះនឹងបញ្ចប់ដោយការដង្ហែធាតុរបស់សពលោក អាបេ និងដាក់កម្រផ្កាដើម្បីជាការគោរពដល់វិញ្ញាណក្ខន្ធ។ បច្ចុប្បន្ន មិនមានព័ត៌មានច្បាស់លាស់អំពីទីតម្កល់ ឬបញ្ចុះធាតុរបស់សពលោក អាបេ នៅឡើយ។ ប៉ុន្តែ មុននោះ មានដំណឹងថា ធាតុលោក អាបេ អាចនឹងត្រូវបានដង្ហែយកទៅកាន់ស្រុកកំណើតនៅឯខេត្ត Yamaguchi និងបញ្ចុះនៅក្នុងទីបញ្ចុះសពរបស់គ្រួសារ នៅក្បែរផ្នូររបស់ឪពុកលោក គឺលោក Shintaro Abe។

ពិធីបុណ្យសពរបស់លោក អាបេ គ្រោងនឹងអូសបន្លាយពេល ១ ម៉ោងកន្លះ ដោយមានការចូលរួមរបស់ភ្ញៀវប្រមាណ ៧០០ នាក់ ក្នុងនោះមានមេដឹកនាំ និងអតីតមេដឹកនាំមកពី ៥០ ប្រទេសផងដែរ៕

September 27, 2022

ហ្វ៊ីលីពីន បិទទ្វារក្រុមហ៊ុនល្បែងជិត ២០០ កន្លែង និងបណ្ដេញជនជាតិចិន ៤ ម៉ឺននាក់

ក្រុមមន្ត្រីហ្វ៊ីលីពីន បានប្រកាសថា ប្រទេសនេះនឹងបិទទ្វារក្រុមហ៊ុនល្បែងបរទេសចំនួន ១៧៥ ស្ថាប័ន និងបណ្ដេញបុគ្គលិកជនជាតិចិន ប្រហែល ៤ ម៉ឺននាក់។

«ការបោសសម្អាតត្រូវបានធ្វើឡើងបន្ទាប់ពីមានរបាយការណ៍ស្ដីពីសកម្មភាពសម្លាប់មនុស្ស ចាប់ជំរិត និងអំពើឃោរឃៅរបស់ ពលរដ្ឋចិន ដែលធ្វើទៅលើអ្នកមកពីស្រុកជាមួយគ្នារបស់ពួកគេ» អ្នកនាំពាក្យរបស់ ក្រសួងយុត្តិធម៌ហ្វ៊ីលីពីន Jose Dominic Clavano កាលពីថ្ងៃទី ២៦ កញ្ញា បានប្រកាសដូច្នេះ។

លោក Clavano ឱ្យដឹងថា មូលហេតុដែលនាំឱ្យអាជ្ញាធរបិទទ្វារក្រុមហ៊ុនទាំង ១៧៥ ស្ថាប័នខាងលើ គឺដោយសារអាជ្ញាបណ្ណអាជីវកម្មរបស់ក្រុមហ៊ុនទាំងនោះអស់សុពលភាព ត្រូវរឹបអូស ឬដោយសារមិនបានទូទាត់បំណុលដល់រដ្ឋាភិបាលហ្វ៊ីលីពីន។ ចំណែកការបណ្ដេញពលរដ្ឋចិនឱ្យទៅស្រុកវិញ នឹងចាប់ផ្ដើមធ្វើឡើងពីខែតុលាខាងមុខ។

ស្ថានទូតចិនប្រចាំហ្វ៊ីលីពីន បានប្រកាសថា ទីក្រុងប៉េកាំង គាំទ្រសកម្មភាពខាងលើរបស់ អាជ្ញាធរហ្វ៊ីលីពីន។ ស្ថាប័ននេះបានអះអាងថា រដ្ឋាភិបាលចិន ប្ដេជ្ញាប្រឆាំងនឹងល្បែងស៊ីសង ហើយថា នឹងចាត់វិធានការតឹងរឹងដើម្បីប្រយុទ្ធប្រឆាំងនឹងអំពើនេះ»។

September 27, 2022

NIO មានគម្រោងដំឡើងស្ថានីយប្ដូរថ្មផ្ទុកថាមពលសម្រាប់រថយន្តអគ្គិសនី ១,០០០ កន្លែងនៅ អឺរ៉ុប

ក្រុមហ៊ុន NIO កំពុងតែជំរុញសកម្មភាពពាណិជ្ជកម្មក្នុងវិស័យជួលថ្មផ្ទុកថាមពលរបស់ខ្លួនដោយការពង្រីកស្ថានីយប្ដូរថ្មនៅពាសពេញទ្វីបអឺរ៉ុប។

ក្រុមហ៊ុនផលិតរថយន្តអគ្គិសនីរបស់ ចិន NIO បានកំណត់គោលដៅសំខាន់របស់ខ្លួននៅ អឺរ៉ុប ក្នុងការដំឡើងស្ថានីយប្ដូរថ្មផ្ទុកថាមពល។ ប្រធានក្រុមហ៊ុននេះ ថ្មីៗនេះបានឱ្យដឹងថា NIO មានគម្រោងផ្ដល់សេវាឱ្យជួលថ្មផ្ទុកថាមពល និងពង្រីកទំហំរបស់ស្ថានីយប្ដូរថ្មដែលមានស្រាប់ ដើម្បីទាក់ទាញអតិថិជន ក្នុងបំណងដណ្ដើមចំណែកទីផ្សាររថយន្តអគ្គិសនីដែលកំពុងរីកចម្រើននៅបរទេស។

NIO គឺជាក្រុមហ៊ុនបច្ចេកវិទ្យាមួយរបស់ ចិន ដែលជំនាញក្នុងការផលិតរថយន្តអគ្គិសនីលំដាប់គុណភាពខ្ពស់ បច្ចុប្បន្នកំពុងពង្រីកទីផ្សារក្នុងតំបន់អឺរ៉ុប។ ក្រៅពីការផ្គត់ផ្គង់រថយន្ត SUV និង សេដានដែលដំណើរការដោយថាមពលអគ្គិសនី ក្រុមហ៊ុន NIO ក៏នៅតែជាអ្នកនាំមុខគេនៅក្នុងវិស័យបច្ចេកវិទ្យាប្ដូរថ្មផ្ទុកថាមពលដើម្បីគាំទ្រដល់រថយន្តអគ្គិសនីរបស់ខ្លួន។

នៅ ប្រទេសចិន NIO មានស្ថានីយបញ្ចូលថាមពលអគ្គិសនីជាង ១,០០០ កន្លែង និងចាប់ផ្ដើមដាក់ពង្រាយនៅក្នុងទីផ្សារថ្មីៗបន្ថែមទៀត។

នៅ អឺរ៉ុប NIO បានលក់ និងចែកចាយរថយន្តអគ្គិសនីនៅ ប្រទេសន័រវែស និងពង្រីកទៅកាន់ ប្រទេសអាល្លឺម៉ង់ នៅក្នុងឆ្នាំនេះ។

យោងតាម Reuters ក្រុមហ៊ុន NIO សង្ឃឹមថា នឹងដណ្ដើមបានចំណែកទីផ្សាររថយន្តអគ្គិសនីធំជាងគេនៅ អឺរ៉ុប ដោយការផ្ដល់ឱ្យអ្នកប្រើប្រាស់នូវតម្លៃទាបជាងគេ តាមរយៈកម្មវិធីដាក់ឱ្យជួលថ្មផ្ទុកថាមពលដែលគាំទ្រដោយបណ្ដាញស្ថានីយប្ដូរថ្មសម្រាប់រថយន្តអគ្គិសនីរបស់ខ្លួន។

នៅខាងក្រៅប្រទេសចិន NIO មានគម្រោងដំឡើងស្ថានីយប្ដូរថ្មផ្ទុកថាមពលសម្រាប់រថយន្តអគ្គិសនីឱ្យបាន ១,០០០ កន្លែងនៅត្រឹមឆ្នាំ ២០២៥ ក្នុងនោះ ភាគច្រើនគឺនៅ ទ្វីបអឺរ៉ុប៕

September 23, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២៣ ខែកញ្ញា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៣ នាក់ ក្នុងអំឡុង ២៤ ម៉ោង នៃថ្ងៃទី ២២ ខែកញ្ញា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៩ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

September 23, 2022

ក្រសួងសាធារណការ ចេញវីដេអូបញ្ជ្រាបការយល់ដឹងអំពីការប្រើប្រាស់ផ្លូវល្បឿនលឿន ភ្នំពេញ-ព្រះសីហនុ

ចាប់ពីថ្ងៃទី ១ ដល់ ៣១ ខែតុលា ឆ្នាំ ២០២២ ផ្លូវល្បឿនលឿនភ្នំពេញ-ព្រះសីហនុ ដែលជាផ្លូវល្បឿនលឿនថ្មី និងដំបូងបង្អស់ក្នុងប្រវត្តិសាស្ត្រកម្ពុជា នឹងដាក់ឱ្យដំណើរការសាកល្បងប្រើប្រាស់ដោយឥតគិតថ្លៃ។

ដើម្បីជួយឱ្យប្រជាពលរដ្ឋយល់ដឹងច្បាស់អំពីរបៀបរបបនៃការប្រើប្រាស់ ផ្លូវល្បឿនលឿនភ្នំពេញ-ព្រះសីហនុ មុនពេលចូលរួមធ្វើចរាចរណ៍ ចាប់ពីថ្ងៃទី ១ ដល់ ៣១ ខែតុលា ឆ្នាំ ២០២២ ក្រសួងសាធារណការ និងដឹកជញ្ជូន បានបញ្ចេញវីដេអូអប់រំមួយក្នុងបំណងបញ្ចៀសបញ្ហាដែលអាចកើតឡើងនៅពេលធ្វើដំណើរក្នុងផ្លូវនេះ។

ផ្លូវល្បឿនលឿនភ្នំពេញ-ព្រះសីហនុ ដែលមានប្រវែងសរុប ១៨៧,០៥ គីឡូម៉ែត្រ ត្រូវបានបើកការដ្ឋានសាងសង់កាលពីថ្ងៃទី ២២ ខែមីនា ឆ្នាំ ២០១៩។ តួផ្លូវនេះមានទទឹង ២៤ ម៉ែត្រ និងមាន ៤ គន្លង (២ ទៅ ២ មក) និងគន្លងឈប់បន្ទាន់ (១ ទៅ ១ មក) ក្រាលបេតុងកៅស៊ូ (AC) តភ្ជាប់ពីរាជធានីភ្នំពេញ ទៅដល់សង្កាត់លេខ៣ ក្រុងព្រះសីហនុ ខេត្តព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។ ផ្លូវនេះមានសួនច្បារខណ្ឌកណ្តាល មានផ្លូវបំបែកប្តូរទិស (Inter-Change) ភ្ជាប់មកផ្លូវជាតិលេខ ៤ ចំនួន ៦ កន្លែង មានកន្លែងឈប់សម្រាក ៣ កន្លែង និងចំណតរថយន្ត ១ កន្លែង។

សូមទស្សនាវីដេអូអប់រំខាងក្រោម ៖

September 23, 2022

វៀតណាម សម្ពោធ «ទិវាបញ្ញាសិប្បនិម្មិតវៀតណាម ២០២២»

ទិវាបញ្ញាសិប្បនិម្មិតវៀតណាម ២០២២ (AI Summit Vietnam 2022) ត្រូវបានបើកនៅព្រឹកថ្ងៃទី ២៣ កញ្ញានេះ ដោយមានការចុះឈ្មោះចូលរួមពីភ្ញៀវជាតិ និងអន្តរជាតិរាប់ពាន់នាក់។

ពិធីសំខាន់ដំបូងរបស់ ទិវាបញ្ញាសិប្បនិម្មិតវៀតណាម ២០២២ គឺ AI4VN 2022 ត្រូវបានបើកនៅវេលាម៉ោង ៨ កន្លះ ថ្ងៃនេះ។

ក្រោមប្រធានបទ «ស្ដារសេដ្ឋកិច្ច កំណត់អនាគត» ខ្លឹមសារសំខាន់ៗជាច្រើននឹងត្រូវបានលើកយកមកជជែក ក្នុងនោះមានដូចជា ការបង្កើតចលករអភិវឌ្ឍ និងទិសដៅចាប់យកសមស្របសម្រាប់ វៀតណាម, ការអភិវឌ្ឍបណ្ដាញបញ្ញាសិប្បនិម្មិត, ការប្រើប្រាស់ និងលើកកម្ពស់ជីវភាពរស់នៅ និងដំណោះស្រាយសម្រាប់ជួយសហគ្រាសនានារីកចម្រើនរហ័សដោយប្រើប្រាស់បច្ចេកវិទ្យាបញ្ញាសិប្បនិម្មិត (AI)។ល។

កម្មវិធីនេះក៏ទទួលបានចំណាប់អារម្មណ៍ពីថ្នាក់ដឹកនាំរដ្ឋាភិបាល ស្ថាប័នរដ្ឋ ក្រុមហ៊ុនធំៗ អ្នកវិទ្យាសាស្ត្រ និងពិសេសគឺសហគមន៍អ្នកបច្ចេកវិទ្យាបញ្ញាសិប្បនិម្មិត។

វេទិកានេះត្រូវបានរំពឹងថា ជាកន្លែងសម្រាប់ចែករំលែក និងទទួលបទពិសោធន៍តាមរយៈរឿងរ៉ាវពិត និងសំណើដំណោះស្រាយដែលរួមចំណែកបង្កើតបានជាចលករសម្រាប់ការអភិវឌ្ឍបណ្ដាញ AI នៅ វៀតណាម។ នេះក៏ជាឱកាសជួយឱ្យសហគមន៍ក្នុងវិស័យ AI ក៏ដូចជាសហគមន៍អ្នកបច្ចេកវិទ្យា បានយល់បន្ថែមថា តើបច្ចេកវិទ្យាបញ្ញាសិប្បនិម្មិតបានផ្លាស់ប្ដូរជីវភាពរស់នៅរបស់មនុស្សបែបណាខ្លះ។ល។

រសៀលថ្ងៃដដែល ព្រឹត្តិការណ៍ខាងលើក៏នឹងមានពិធីផ្ដល់កិត្តិយសដល់បណ្ដាផលិតផល ដែលជាដំណោះស្រាយឆ្នើមដោយការប្រើប្រាស់ AI និងការផ្ដល់ពានរង្វាន់សម្រាប់ផលិតផលបញ្ញាសិប្បនិម្មិត ២០២២ (AI Awards 2022)។

ក្នុងរយៈពេល ២ ថ្ងៃពេញនៃព្រឹត្តិការណ៍នេះ ក៏មានការតាំងពិព័រណ៍ AI ដោយមានការចូលរួមពីក្រុមហ៊ុន វិទ្យាស្ថានស្រាវជ្រាវ និងសាកលវិទ្យាល័យជាង ២០ ស្ថាប័នផងដែរ៕

September 23, 2022

នាវាផ្ទុកយន្តហោះចម្បាំងអាម៉េរិក មកដល់ទឹកដីកូរ៉េខាងត្បូង ជាលើកដំបូងក្រោយអវត្តមានរយៈពេល ៤ ឆ្នាំ

នាវាផ្ទុកយន្តហោះចម្បាំងអាម៉េរិក USS Ronald Reagan ថ្ងៃនេះបានចូលចតនៅកំពង់ផែរបស់ ប្រទេសកូរ៉េខាងត្បូង ជាលើកដំបូងក្រោយរយៈពេល ៤ ឆ្នាំ ដែលនេះត្រូវបានគេជឿថា ដើម្បីកំញើញ កូរ៉េខាងជើង។

ក្រុមប្រយុទ្ធនាវាផ្ទុកយន្តហោះចម្បាំង USS Ronald Reagan របស់ សហរដ្ឋអាម៉េរិក ថ្ងៃនេះបានចូលចតក្នុងកំពង់ផែ Busan ដែលមានចម្ងាយពី រដ្ឋធានីសេអ៊ូល ប្រហែល ៣៩០ គីឡូម៉ែត្រទៅទិសខាងត្បូង។ នេះគឺជាលើកដំបូងដែលនាវាផ្ទុកយន្តហោះចម្បាំងអាម៉េរិក មកកាន់ ទឹកដីកូរ៉េខាងត្បូង រាប់ចាប់តាំងពីឆ្នាំ ២០១៨។

ក្រុមប្រយុទ្ធនាវាផ្ទុកយន្តហោះចម្បាំង USS Ronald Reagan រួមមាន នាវាផ្ទុកយន្តហោះចម្បាំង USS Ronald Reagan, នាវាល្បាតសមុទ្របំពាក់មីស៊ីលមានប្រព័ន្ធនាំផ្លូវ USS Chancellorsville និងនាវាពិឃាត USS Barry។

តាមផែនការ ក្រុមប្រយុទ្ធនាវាផ្ទុកយន្តហោះចម្បាំង USS Ronald Reagan នឹងចូលរួមធ្វើសមយុទ្ធរួមជាមួយ កូរ៉េខាងត្បូង នៅលើសមុទ្រខាងកើតរបស់ប្រទេសនេះនៅចុងខែ។ នាវាមុជទឹកនុយក្លេអែរ USS Annapolis របស់ សហរដ្ឋអាម៉េរិក ក៏គ្រោងនឹងបង្ហាញវត្តមានផងដែរ។

USS Ronald Reagan មកកាន់ Busan នាថ្ងៃនេះ

«ការបញ្ជូននាវាផ្ទុកយន្តហោះចម្បាំងមកនេះគឺជាការសម្ដែងឱ្យឃើញអំពីភាពរឹងមាំរបស់សម្ព័ន្ធភាពអាម៉េរិក-កូរ៉េខាងត្បូង និងដើម្បីកំញើញការគំរាមកំហែងដោយមីស៊ីល និងអាវុធនុយក្លេអែររបស់ កូរ៉េខាងជើង» មន្ត្រីជាន់ខ្ពស់មួយរូបរបស់ កូរ៉េខាងត្បូង សុំមិនបញ្ចេញឈ្មោះ បានប្រាប់ទីភ្នាក់ងារសារព័ត៌មាន Yonhap ដូច្នេះ។

USS Ronald Reagan មកកាន់ Busan បន្ទាប់ពី ប្រធានាធិបតីអាម៉េរិក ចូ បៃដិន និងសមាសភាគីកូរ៉េខាងត្បូង យូន សកយ៉ល (Yoon Suk-yeol) បញ្ជាក់ជាថ្មីអំពីការសន្យាដែលថានឹងដាក់ពង្រាយសព្វាវុធយុទ្ធសាស្ត្ររបស់ សហរដ្ឋអាម៉េរិក «ឱ្យបានទាន់ពេល និងសហការនៅពេលចាំបាច់» នៅក្នុងជំនួបកំពូលនៅ សេអ៊ូល កាលពីខែឧសភា ២០២២។

កូរ៉េខាងជើង ថ្កោលទោសចំពោះសមយុទ្ធយោធារួមនានារវាង សហរដ្ឋអាម៉េរិក និង កូរ៉េខាងត្បូង ដោយចាត់ទុកថា ទាំងនោះគឺជាការត្រៀមសម្រាប់សង្គ្រាមប្រឆាំង កូរ៉េខាងជើង៕

September 23, 2022

៤ តំបន់របស់ អ៊ុយក្រែន ធ្វើប្រជាមតិស្ដីពីការច្របាច់បញ្ចូលខ្លួនទៅក្នុងទឹកដីរុស្ស៊ី

ម្ចាស់ឆ្នោតនៅក្នុងតំបន់ចំនួន ៤ របស់ អ៊ុយក្រែន ដែលគ្រប់គ្រងដោយ រុស្ស៊ី នឹងបោះឆ្នោតសម្ដែងមតិចំពោះការច្របាច់បញ្ចូលទឹកដីទាំងនេះទៅក្នុងប្រទេសរុស្ស៊ី ចាប់ពីថ្ងៃនេះ និងទៅតាម ២ ដំណាក់កាល។

ទឹកដីផ្ដាច់ខ្លួន សាធារណរដ្ឋប្រជាមានិត Donetsk (DPR) និង សាធារណរដ្ឋប្រជាមានិត Lugansk (LPR) នៅក្នុងតំបន់ Donbass រួមនឹងតំបន់ដែលកាន់កាប់ដោយកងទ័ពរុស្ស៊ី នៅក្នុងខេត្ត Kherson និងខេត្ត Zaporizhzhia របស់ អ៊ុយក្រែន នឹងធ្វើប្រជាមតិអំពីបំណងច្របាច់បញ្ចូលទឹកដីទាំងនេះទៅក្នុងប្រទេសរុស្ស៊ី ចាប់ពីថ្ងៃទី ២៣ ដល់ថ្ងៃទី ២៧ កញ្ញា ២០២២។

ដំណើរការបោះឆ្នោតត្រូវបានចែកជា ២ ដំណាក់កាល នេះបើតាមមន្ត្រីស្និទ្ធនឹង រុស្ស៊ី នៅក្នុងតំបន់ខាងលើ។ ថ្ងៃបោះឆ្នោតផ្ទាល់នៅតាមទីតាំងរៀបចំការបោះឆ្នោតនឹងធ្វើឡើងក្នុងថ្ងៃទី ២៧ កញ្ញា។ ក្នុងរយៈពេល ៤ ថ្ងៃមុននោះ សន្លឹកឆ្នោតនឹងត្រូវបានប្រមូលទៅតាមតំបន់នីមួយៗ ដោយក្រុមមន្ត្រីរៀបចំការបោះឆ្នោតនឹងទៅដល់ផ្ទះប្រជាពលរដ្ឋដើម្បីទទួលសន្លឹកឆ្នោត។ មន្ត្រីស្និទ្ធនឹងរុស្ស៊ី និយាយថា វិធីសាស្ត្រនេះគឺដើម្បីការពារសន្តិសុខ។

ការរៀបចំបោះឆ្នោតប្រជាមតិខាងលើនេះ ត្រូវបានគាំទ្រដោយ រដ្ឋាភិបាលរុស្ស៊ី។ សន្លឹកឆ្នោតនៅ Donetsk និង Lugansk ត្រូវបានបោះពុម្ភជាភាសារុស្ស៊ី ដោយសារថា ក្រុមមន្ត្រីរបស់កងកម្លាំងផ្ដាច់ខ្លួន តាំងពីឆ្នាំ ២០២០ បានកំណត់យកភាសារុស្ស៊ី ជាភាសាផ្លូវការ។ ចំណែកខេត្ត Kherson និង Zaporizhzhia នឹងបោះពុម្ភសន្លឹកឆ្នោតជាភាសារុស្ស៊ី-អ៊ុយក្រែន។

ក្រោយពីមានការប្រកាសអំពីការបោះឆ្នោតប្រជាមតិនៅ Donetsk, Lugansk, Kherson និង Zaporizhzhia រដ្ឋាភិបាលអ៊ុយក្រែន កាលពីថ្ងៃទី ២០ កញ្ញា បានចោទថា នេះគឺជាការធ្វើប្រជាមតិបង្គ្រប់កិច្ចតែប៉ុណ្ណោះ។

ទីក្រុងកៀវសង្កត់ធ្ងន់ថា ព្រឹត្តិការណ៍នេះនឹងមិនផ្លាស់ប្ដូរអាធិបតេយ្យ និងបូរណភាពទឹកដី ហើយថា កងទ័ពអ៊ុយក្រែន «មានសិទ្ធិរំដោះតំបន់ទាំងនោះ និងបន្តធ្វើដូច្នេះ»។ អ៊ុយក្រែន ក៏យល់ថា ការបោះឆ្នោតប្រជាមតិនេះនឹងបំផ្លាញឱកាសក្នុងការចរចាសន្តិភាពជាមួយ រុស្ស៊ី។

ចំណែកបណ្ដាប្រទេសលោកខាងលិច ក្នុងនោះ លេចធ្លោជាងគេគឺ សហរដ្ឋអាម៉េរិក និង ណាតូ ជាដើម ក៏បានរិះគន់ចំពោះផែនការលេបយកទឹកដីអ្នកជិតរបស់ រុស្ស៊ី នេះផងដែរ៕

September 23, 2022

តំណែង «មហាសេដ្ឋីវ័យក្មេងបំផុតក្នុងពិភពលោក» បានទៅលើជនជាតិកូរ៉េខាងត្បូង

យោងតាមរបាយការណ៍ថ្មី នារីដែលជាមហាសេដ្ឋីវ័យក្មេងបំផុតក្នុងពិភពលោករូបនេះ កើនឆ្នាំ ២០០៤ ពោលគឺឆ្នាំនេះនាងមានអាយុទើបតែ ១៨ ឆ្នាំប៉ុណ្ណោះ។

Kim Jung-youn កូនស្រីរបស់អតីតមហាសេដ្ឋី Kim Jung-ju ស្ថាបនិករបស់ Nexon (ក្រុមហ៊ុនហ្គេមអេឡិចត្រូនិចអនឡាញលើកុំព្យូទ័រ និងទូរស័ព្ទ) ដែលបានទទួលមរណភាពកាលពីខែកុម្ភៈ ២០២២ បានក្លាយជាមហាសេដ្ឋីវ័យក្មេងបំផុតក្នុងពិភពលោក បន្ទាប់ពីបានស្នងមរតកជាភាគហ៊ុននៅ Nexon នេះបើតាម Forbes។

Jung-youn និងបងស្រីរបស់នាង គឺ Jung-min បានទទួលមរតកជាភាគហ៊ុនក្នុងម្នាក់ ៣០.៧៨% នៅក្នុងក្រុមហ៊ុន NXC ដែលជាក្រុមហ៊ុនផ្ទាល់ខ្លួនរបស់សពលោក Kim Jung-ju ដែលជាឪពុករបស់ពួកនាង។

NXC គឺជាភាគហ៊ុនិកធំជាងគេនៅ Nexon ដោយកាន់កាប់ភាគហ៊ុនជិត ៤៨% នៅក្នុងក្រុមហ៊ុននេះ។ បន្ទាប់ពីបូករួមទាំងភាគហ៊ុនដែល Jung-youn និង Jung-min មាននៅក្នុង NXC ទ្រព្យសុទ្ធសរុបដែលពួកនាងកំពុងមានបានកើនដល់ ២.៥ ពាន់លានដុល្លារអាម៉េរិក។

យោងតាមទស្សនាវដ្ដី Forbes ក្រោយពីបានដកការចំណាយទៅលើពន្ធលើសិទ្ធិស្នងមរតកដែលត្រូវបានគណនាដោយក្រុមអ្នកជំនាញ នាង Kim Jung-youn នៅសល់ទ្រព្យសុទ្ធតម្លៃជាង ១.៥ ពាន់លានដុល្លារអាម៉េរិក ខណៈដែលនាង Kim Jung-min នៅសល់ ១ ពាន់លានដុល្លារ។ ចំណែកភរិយារបស់សពលោក Kim Jung-ju គឺមហាសេដ្ឋិនី Yoo Jung-hyun អាយុ ៥៣ ឆ្នាំ ទទួលបានភាគហ៊ុនជាមរតកពីស្វាមីនៅ NXC ចំនួន ៤.៥%។

កូរ៉េខាងត្បូង គឺជាប្រទេសមួយក្នុងចំណោមប្រទេសដែលយកពន្ធលើទ្រព្យជាមរតកខ្ពស់ជាងគេក្នុងពិភពលោក៕

September 22, 2022

Author: សឿន សំណាង