សឿន សំណាង - La Reine Media

មហាសេដ្ឋី អ៊ីឡុន ម៉ាស (Elon Musk) ចូលគ្រប់គ្រងបណ្ដាញសង្គម Twitter

មហាសេដ្ឋីអាម៉េរិក លោក អ៊ីឡុន ម៉ាស ត្រូវបានគេអះអាងថា បានសម្រេចរាល់ជំហានចុងក្រោយនៅក្នុងការចូលគ្រប់គ្រង Twitter និងបញ្ឈប់បុគ្គលិកជាន់ខ្ពស់ជាច្រើននាក់។

យោងតាម CNBC នាយកប្រតិបត្តិរបស់ Twitter លោក Parag Agrawal និងនាយកផ្នែកហិរញ្ញវត្ថុ Ned Segal បានចាកចេញពីទីស្នាក់ការកណ្ដាលនៅ San Francisco។ អ្នកទាំងពីរនឹងឈប់ធ្វើការនៅ Twitter ចាប់ពីថ្ងៃទី 28 តុលា ក្រោយពី អ៊ីឡុន ម៉ាស ចូលគ្រប់គ្រង។

ប្រភពព័ត៌មានរបស់ WSJ បានឱ្យដឹងថា Agrawal និង Segal ត្រូវបានលោក ម៉ាស បញ្ឈប់ ក្រោយពីម្ចាស់ Tesla បានទៅកាន់ការិយាល័យរបស់ Twitter កាលពីថ្ងៃទី 27 តុលា។ ចំណែក Bloomberg វិញ ផ្សាយថា ក្រៅពី Agrawal និង Segal ក៏នៅមានមេដឹកនាំផ្នែកច្បាប់ និងគោលការណ៍ Vifaya Gadde រួមនឹង ទីប្រឹក្សារួម Sean Edgett ផងដែរ ដែលត្រូវបានបញ្ឈប់ពីការងារ។

Agrawal នឹងមិនចាកចេញដោយដៃទទេឡើយ។ យោងតាម Reuters កិច្ចសន្យារវាង Agrawal និង Twitter តម្រូវឱ្យបណ្ដាញសង្គមនេះបង់ប្រាក់ប្រហែល 42 លានដុល្លារដល់ Agrawal។

តំណាងរបស់បណ្ដាញសង្គម Twitter មិនទាន់មានការបកស្រាយនៅឡើយ ដោយបានបដិសេធការស្នើសុំការអធិប្បាយអំពីបញ្ហាខាងលើ។

កាលពីថ្ងៃទី 27 តុលា មហាសេដ្ឋី អ៊ីឡុន ម៉ាស បានទៅដល់ទីស្នាក់ការរបស់ Twitter និងនាំយកឡាបូលាងដៃមួយមកតាមខ្លួន ព្រមទាំងបានបង្ហោះវីដេអូខ្លីមួយនៅលើបណ្ដាញសង្គមនេះ។ នៅលើទំព័រព័ត៌មានផ្ទាល់ខ្លួន លោក ម៉ាស ក៏បានប្ដូរខ្លឹមសារណែនាំខ្លួនទៅជា «ម្ចាស់ Twitter» ផងដែរ ដែលនេះត្រូវបាន Business Insider វាយតម្លៃថា ជាកាយវិការបង្ហាញថា លោក ម៉ាស មានគម្រោងធ្វើជា CEO របស់ Twitter។

លោក អ៊ីឡុន ម៉ាស កាលពីខែមេសា 2022 ប្រកាសថា សម្រេចបានកិច្ចព្រមព្រៀងទិញ Twitter។ ប៉ុន្តែ ខែកក្កដា 2022 លោក ម៉ាស បែរជាប្រកាសដកខ្លួន ដោយចោទថា បណ្ដាញសង្គមនេះបានរំលោភលើកិច្ចព្រមព្រៀង។ ខែកញ្ញាកន្លងទៅ លោក ម៉ាស ក៏បានប្ដូរចិត្ត ដោយថា លោកនឹងនៅតែទិញ Twitter ក្នុងតម្លៃ 44 ពាន់លានដុល្លារអាម៉េរិកដូចមុន៕

October 28, 2022

ឥណ្ឌា ធ្វើសមយុទ្ធយោធាជាមួយ អាម៉េរិក នៅក្បែរ ព្រំដែនចិន

ឥណ្ឌា កំពុងតែរៀបផែនការសម្រាប់សមយុទ្ធយោធាទ្វីភាគី និងពហុភាគីជាច្រើននៅមុនដំណាច់ឆ្នាំ 2022 ដើម្បីកែលំអសមត្ថភាពផ្ទុំកម្លាំងយុទ្ធសាស្ត្រជាមួយបណ្ដាប្រទេសស្និទ្ធស្នាល។

សារព័ត៌មានក្នុងស្រុកបានឱ្យដឹងថា កងទ័ពឥណ្ឌា កំពុងត្រៀមខ្លួនសម្រាប់ការធ្វើសមយុទ្ធយោធាជាមួយក្រុមប្រទេសជាដៃគូ នៅក្នុងអំឡុង 2 ខែចុងឆ្នាំនេះ។ ទ័ពជើងទឹកឥណ្ឌា នឹងចូលរួមសមយុទ្ធ 4 ភាគី Malabar នៅសមុទ្រជប៉ុន។ ទ័ពជើងគោកឥណ្ឌា នឹងធ្វើសមយុទ្ធជាមួយកងទ័ពរបស់ អូស្ត្រាលី និង 3 ប្រទេសរបស់ អាស៊ាន រួមនឹងសមយុទ្ធមួយទៀតនៅលើភ្នំជាមួយនឹង សហរដ្ឋអាម៉េរិក។ អ្វីដែលគួរឱ្យចាប់អារម្មណ៍ជាងគេ នោះគឺថា សមយុទ្ធរបស់ ឥណ្ឌា ជាមួយនឹង អាម៉េរិក នឹងធ្វើឡើងនៅក្បែរបន្ទាត់គ្រប់គ្រងជាក់ស្ដែង (LAC) រវាង ឥណ្ឌា និង ចិន។

យោងតាមផែនការនេះ ចាប់ពីថ្ងៃទី 08 ដល់ 18 វិច្ឆិកា ទ័ពជើងទឹកឥណ្ឌា រួមនឹង ទ័ពជើងទឹកអាម៉េរិក អូស្ត្រាលី និង ជប៉ុន នឹងចូលរួមធ្វើសមយុទ្ធ Malabar នៅលើសមុទ្ររបស់ទីក្រុង Yokoshuka ប្រទេសជប៉ុន។ នេះគឺជាឆ្នាំទីបីហើយដែលទ័ពជើងទឹករបស់បណ្ដាប្រទេសក្នុងក្រុមសន្ទនាសន្តិសុខ 4 ភាគី (Quadrilateral Security Dialogue-QSD) ដែលត្រូវបានគេស្គាល់ជាទូទៅថា Quad ចូលរួមធ្វើសមយុទ្ធ Malabar។ ប្រទេសទាំងនេះសុទ្ធតែប្រកាសថា ប្ដេជ្ញាទប់ស្កាត់រាល់ការកៀបសង្កត់នៅតំបន់ ឥណ្ឌូ-ប៉ាស៊ីហ្វិក។

ទាហានឥណ្ឌា និង អាម៉េរិក ធ្វើសមយុទ្ធកាលពីខែ សីហា 2022

ទន្ទឹមនឹងនេះ ទ័ពជើងគោកឥណ្ឌា ក៏កំពុងត្រៀមសម្រាប់សមយុទ្ធធំមួយជាមួយនឹងសមភាគីអាម៉េរិក ចាប់ពីថ្ងៃទី 15 វិច្ឆិកាដល់ 02 ធ្នូ។ សមយុទ្ធដែលមានឈ្មោះថា Yudh Abhyas នេះនឹងធ្វើឡើងនៅ Auli ក្នុងរដ្ឋ Uttarakhand របស់ ឥណ្ឌា ដែលមានចម្ងាយពីបន្ទាត់ LAC ជាមួយ ប្រទេសចិន តែ 100 គីឡូម៉ែត្រប៉ុណ្ណោះ។

ចំណែកពីថ្ងៃទី 28 វិច្ឆិកាដល់ 11 ធ្នូ កងទ័ពឥណ្ឌា និង អូស្ត្រាលី ក៏នឹងធ្វើសមយុទ្ធជើងគោករួមដែលមានឈ្មោះថា Austra-Hind ជាលើកដំបូងនៅ Mahajan នៃរដ្ឋ Rajasthan ប្រទេសឥណ្ឌា។

ឥណ្ឌា ក៏កំពុងមានសកម្មភាពការពារជាតិទ្វេភាគីជាមួយបណ្ដាប្រទេសក្នុង អាស៊ាន ផងដែរ ក្នុងនោះរួមមាន សមយុទ្ធជើងទឹក SIMBEX ជាមួយ សិង្ហបុរី នៅឈូងសមុទ្រ Bengal ដែលបានចាប់ផ្ដើមតាំងពីថ្ងៃទី 26 តុលា និងសមយុទ្ធ Agni Warrior ជាមួយ សិង្ហបុរី ចាប់ពីថ្ងៃទី 13 វិច្ឆិកាដល់ 30 វិច្ឆិកា។ ក្នុងពាក់កណ្ដាលចុងខែវិច្ឆិកា និងដើមខែធ្នូ កងទ័ពឥណ្ឌា ក៏នឹងចូលរួមធ្វើសមយុទ្ធ Harimau Shakti រួមជាមួយនឹង ម៉ាឡេស៊ី និងសមយុទ្ធ Garud Shakti នៅ ឥណ្ឌូណេស៊ី ផងដែរ។

រថពាសដែករបស់កងទ័ពឥណ្ឌា និង សិង្ហបុរី កាលពីឆ្នាំ 2019

ឥណ្ឌា អះអាងថា សមយុទ្ធទាំងនេះគឺដើម្បីកសាងទំនាក់ទំនងសហប្រតិបត្តិការយុទ្ធសាស្ត្រ និងសមត្ថភាពសហការការពារជាតិជាមួយបណ្ដាប្រទេសដែលមានគោលដៅរួម៕

October 28, 2022

ដោយបារម្ភអំពីការសាកល្បងអាវុធប្រល័យលោករបស់ កូរ៉េខាងជើង សាស្ត្រាចារ្យកូរ៉េខាងត្បូង សង់បន្ទប់លាក់ខ្លួនក្រោមដី

បារម្ភអំបើសិនជា កូរ៉េខាងត្បូង រងការវាយប្រហារពីអាវុធនុយក្លេអែរ Lee Tae-goo នឹងចុះទៅក្នុងបន្ទប់លាក់ខ្លួនក្រោមដី និងនៅទីនេះពីរសប្ដាហ៍ដើម្បីចៀសវាងពីវិទ្យុសកម្ម។

ដោយមានជញ្ជាំងក្រាស់សង់អំពីបេតុង ច្រកចេញចូលធ្វើអំពីដែកថែប និងប្រព័ន្ធបន្សុទ្ធខ្យល់ សាស្ត្រាចារ្យផ្នែកស្ថាបត្យកម្មកូរ៉េខាងត្បូង Lee Tae-goo ជឿជាក់ថា បន្ទប់ក្រោមដីនេះអាចជួយឱ្យលោករស់រានមានជីវិតក្នុងគ្រោះមហន្តរាយនុយក្លេអែរ និងអាចទប់ទល់នឹងមីស៊ីលធម្មតាបាន។

បន្ទប់ក្រោមដីនេះស្ថិតនៅក្នុងបរិមាណក្បែរផ្ទះរបស់លោក Lee នៅក្នុងទីក្រុង Jecheon ចម្ងាយពី រដ្ឋធានីសេអ៊ូល ប្រហែល 120 គីឡូម៉ែត្រទៅទិសអាគ្នេយ៍។ លោក Lee បានចំណាយប្រាក់អស់ប្រហែល 70 លានវ៉ុន (48,000 ដុល្លារអាម៉េរិក) ក្នុងការសាងសង់បន្ទប់ក្រោមដី ហើយនេះមិនទាន់គិតដល់ថ្លៃកម្មករនៅឡើយ។

ខ្ទង់ប្រាក់ខាងលើត្រូវបានចំណាយដោយកម្មវិធីស្រាវជ្រាវមួយរបស់ ក្រសួងអប់រំកូរ៉េខាងត្បូង បន្ទាប់ពីលោក Lee បានដាក់សំណើ និងបានទទួលការយល់ព្រម។ នេះគឺជាផ្នែកមួយនៅក្នុងយុទ្ធនាការរបស់សាស្ត្រាចារ្យ Lee ក្នុងបំណងអំពាវនាវដល់ ប្រជាជនកូរ៉េខាងត្បូង យកចិត្តទុកដាក់ជាងមុននៅក្នុងការត្រៀមខ្លួនដើម្បីទប់ទល់នឹងមហន្តរាយនុយក្លេអែរ។

«កូរ៉េខាងជើង មានចម្ងាយពីទីនេះត្រឹមតែ 100 គីឡូម៉ែត្រ ហើយពួកគេអាចបាញ់មីស៊ីលបំពាក់នុយក្លេអែរ ឬជីវសាស្ត្រ» សាស្ត្រាចារ្យ Lee មកពីសាកលវិទ្យាល័យ Semyung និយាយដូច្នេះ។ លោក Lee ក៏មានការបារម្ភអំពីលទ្ធភាពដែលរោងចក្រប្រតិកម្មនុយក្លេអែររបស់ កូរ៉េខាងត្បូង ជួបបញ្ហាដូចទៅនឹងមហន្តរាយនៅ Fukushima របស់ ជប៉ុន។

កូរ៉េខាងត្បូង និង កូរ៉េខាងជើង ជាមូលដ្ឋានគឺនៅតែស្ថិតក្នុងស្ថានការណ៍សង្គ្រាម ព្រោះថា ជម្លោះប្រដាប់អាវុធចន្លោះពីឆ្នាំ 1950 ដល់ 1953 ត្រូវបានបញ្ចប់ដោយកិច្ចព្រមព្រៀងផ្អាកការប្រយុទ្ធតែប៉ុណ្ណោះ មិនមែនជាសន្ធិសញ្ញាសន្តិភាពឡើយ។ ភាគីទាំងពីរតែងតែចោទប្រកាន់គ្នាថា «មានសកម្មភាពបង្កហេតុ» ធ្វើឱ្យភាពតានតឹងមានហានិភ័យក្លាយជាជម្លោះប្រដាប់អាវុធ។

កូរ៉េខាងជើង បានសាកល្បងអាវុធនុយក្លេអែរ 6 លើកមកហើយ ក្នុងនោះ លើកដំបូងគឺនៅឆ្នាំ 2006 និងបានបាញ់សាកល្បងមីស៊ីលជាច្រើនលើក។ ថ្មីៗនេះ ទីក្រុងព្យុងយ៉ាង ក៏បានឱ្យដឹងថា ពួកគេបានធ្វើសមយុទ្ធ «វាយប្រហារដោយអាវុធនុយក្លេអែរយុទ្ធសាស្ត្រ» ក្រោមការតាមដានរបស់មេដឹកនាំ គីម ជុងអុន។

យោងតាមលោក Lee អ្នកដែលបានសាងសង់បន្ទប់លាក់ខ្លួនក្រោមដីដូចលោក ភាគច្រើនមិនចង់ឱ្យគេដឹង ព្រោះខ្លាចថា នឹងមានញាតិមិត្ត អ្នកជិតខាងមកសុំជ្រក។

«កាលពីពេលខ្ញុំកំពុងសង់បន្ទប់ក្រោមដីនេះ អ្នកណាៗក៏និយាយថា ពួកគេនឹងមកលាក់ខ្លួននៅទីនេះ បើសិន កូរ៉េខាងត្បូង ត្រូវរងការវាយប្រហារ។ បន្ទប់ក្រោមដីនេះដាក់មនុស្សបានតែ 12 នាក់ប៉ុណ្ណោះ៕

សាស្ត្រាចារ្យផ្នែកស្ថាបត្យកម្មកូរ៉េខាងត្បូង Lee Tae-goo នៅក្នុងបន្ទប់ក្រោមដីរបស់គាត់

October 28, 2022

ទីក្រុងមួយរបស់ប្រទេសចិន អភិវឌ្ឍស្ថានីយដែលផលិតអគ្គិសនីដើរដោយកម្លាំងខ្យល់ បានច្រើនជាងប្រទេសន័រវែសទៅទៀត

រដ្ឋបាលទីក្រុង Chaozhou នៃខេត្ត Guangdong របស់ ប្រទេសចិន បានអនុម័តផែនការ 5 ឆ្នាំថ្មី ស្ដីពីការអភិវឌ្ឍថាមពល ក្នុងនោះក៏មានគម្រោងផលិតអគ្គិសនីដើរដោយកម្លាំងខ្យល់នៅលើសមុទ្រចំនួនពីរដែលមានកម្លាំងសរុប 43.3 GW និងផលិតអ៊ីដ្រូសែនបៃតងផងដែរ។

នេះគឺជាកំណែផែនការអភិវឌ្ឍថាមពលលើកទី 14 របស់ទីក្រុង Chaozhou សមស្របជាមួយនឹងតម្រូវការរបស់ប្រទេសជាតិ និងផែនការអភិវឌ្ឍរបស់ខេត្ត។ ផែនការនេះនឹងត្រូវចាប់ផ្ដើមអនុវត្តពីថ្នាក់មូលដ្ឋាន។

ទីក្រុង Chaozhou មានសក្ដានុពលខ្លាំងសម្រាប់ការអភិវឌ្ឍបណ្ដាញផលិតអគ្គិសនីដើរដោយកម្លាំងខ្យល់ ដោយសារតែសមុទ្រមានខ្យល់ខ្លាំង អនុញ្ញាតឱ្យផលិតអគ្គិសនីបានពី 750W/m2 ដល់ 850W/m2។ ទន្ទឹមនឹងនេះ កំពង់ផែសមុទ្ររបស់ Chaozhou ក៏នឹងជួយដល់ការដឹកជញ្ជូនទួរប៊ីន ស្លាបកង្ហារ និងគ្រឿងបន្លាស ដែលសមស្របសម្រាប់ការសាងសង់ស្ថានីយផលិតអគ្គិសនីដោយកម្លាំងខ្យល់លើសមុទ្រ ហើយអាចផលិតអគ្គិសនីបាន 43.3 GW។

ក្នុងរយៈពេល 5 ឆ្នាំរបស់គម្រោង តំបន់មូលដ្ឋាននឹងបង្កលក្ខណៈងាយស្រួលសម្រាប់ការសិក្សា និងអនុវត្តគម្រោងផលិតអគ្គិសនីដោយកម្លាំងខ្យល់នៅលើសមុទ្ររបស់ក្រុង Chaozhou ហើយក្រោយមកនឹងជំរុញការអភិវឌ្ឍទ្រង់ទ្រាយធំរបស់ផែនការនេះ។

បណ្ដាគម្រោងដំបូងៗក្នុងផែនការខាងលើនេះនឹងត្រូវបានដាក់ទីតាំងនៅក្នុងតំបន់សេដ្ឋកិច្ចពិសេស ដែលមានឈ្មោះថា Guangdong East Site 6 និង Guangdong East Site 7។

ដំបូងពួកគេនឹងដំឡើងបណ្ដាញដែលមានកម្លាំង 10.8 GW នៅក្នុងគម្រោង Guangdong East Site 6 ដែលស្ថិតនៅលើសមុទ្ររបស់ទីក្រុង Chaozhou និងទីក្រុង Shantou។ ទីតាំងគម្រោងស្ថិតនៅចម្ងាយពីឆ្នេរប្រហែលពី 72 គីឡូម៉ែត្រ ទៅ 160 គីឡូម៉ែត្រ និងជម្រៅពី 15 ដល់ 50 ម៉ែត្រ។

គម្រោង Guangdong East Site 7 កម្លាំង 32.5 GW ស្ថិតនៅភាគអាគ្នេយ៍របស់ទីក្រុង Chaozhou ជម្រៅចាប់ពី 11 ដល់ 50 ម៉ែត្រ។ គម្រោងទីពីរនេះមានចម្ងាយពីឆ្នេរចាប់ពី 75 គីឡូម៉ែត្រ ដល់ 185 គីឡូម៉ែត្រ។

យោងតាមការអះអាងរបស់ Bloomberg ដោយមានកម្លាំងខ្លាំងដូចខាងលើ គម្រោង Guangdong East Site 6 និង Guangdong East Site 7 នឹងផលិតអគ្គិសនីបានច្រើនជាងអគ្គិសនីសរុបដែលផលិតនៅទូទាំង ប្រទេសន័រវែស ទៅទៀត៕

October 27, 2022

ប្រទេសថៃ អនុញ្ញាតឱ្យជនបរទេសទិញផ្ទះ និងទិញដីធ្វើផ្ទះស្នាក់នៅជាកម្មសិទ្ធិផ្ទាល់ខ្លួន

អាជ្ញាធរថៃ បង្កើនការទាក់ទាញអ្នកវិនិយោគ អ្នកមាន និងអ្នកជំនាញខ្ពស់ពីបរទេស តាមរយៈការអនុញ្ញាតឱ្យពួកគេទិញផ្ទះ និងទិញដីធ្វើផ្ទះស្នាក់នៅជាកម្មសិទ្ធិផ្ទាល់ខ្លួន។

គណៈរដ្ឋមន្ត្រីថៃ កាលពីថ្ងៃទី 25 តុលា បានអនុម័តសំណើរបស់ ក្រសួងមហាផ្ទៃ ដែលស្នើឱ្យមានការអនុញ្ញាតឱ្យជនបរទេសទិញផ្ទះ ឬទិញដីជាកម្មសិទ្ធិផ្ទាល់ខ្លួន ក្នុងទំហំផ្ទៃដីឡើងដល់ 0.16 ហិកតា សម្រាប់ការសាងសង់ផ្ទះស្នាក់នៅ។ ក៏ប៉ុន្តែ ក្រុមអ្នកជំនាញព្រមានថា នេះអាចនឹងបង្កើតឱ្យមានសកម្មភាពជាឈ្មួញកណ្ដាលរបស់ជនបរទេសក្នុងវិស័យអចលនទ្រព្យនៅប្រទេសនេះ។

អ្នកនាំពាក្យរបស់ រាជរដ្ឋាភិបាលថៃ Anucha Burapachaisri កាលពីថ្ងៃទី 25 តុលា បានឱ្យដឹងថា អនុក្រឹត្យខាងលើរបស់ រាជរដ្ឋាភិបាលថៃ នឹងមានសុពលភាពក្នុងរយៈពេល 5 ឆ្នាំ ក្រោយពីត្រូវបានផ្សព្វផ្សាយនៅលើសារាចររាជាណាចក្រថៃ។ សារាចរណែនាំនេះអនុវត្តសម្រាប់ក្រុមជនបរទេសដែលជាអ្នកមាន អ្នកចូលនិវត្តន៍ ក្រុមមនុស្សដែលមានបំណងតាំងទីស្នាក់ការក្រុមហ៊ុននៅ ប្រទេសថៃ និងក្រុមមនុស្សដែលមានជំនាញខ្ពស់ ពិសេសក្នុងវិស័យបច្ចេកវិទ្យា។

ដើម្បីមានលក្ខខណ្ឌគ្រប់គ្រាន់ ពលរដ្ឋបរទេសនឹងត្រូវបានស្នើឱ្យបញ្ជាក់ថា ពួកគេបានវិនិយោគយ៉ាងតិច 40 លានបាត (ជាង 1 លានដុល្លារអាម៉េរិក) នៅ ប្រទេសថៃ និងអាចរក្សាការវិនិយោគក្នុងរយៈពេលយ៉ាងតិច 3 ឆ្នាំ រាប់ចាប់ពីថ្ងៃដាក់ពាក្យចុះឈ្មោះទិញផ្ទះ ឬដី។

ក្រសួងមហាផ្ទៃថៃ បានដាក់សេចក្ដីព្រាងសំណើខាងលើកាលពីខែឧសភា 2022 ក្នុងបំណងទាក់ទាញការវិនិយោគ និងក្រុមអ្នកមានពីបរទេស។

រដ្ឋាភិបាលថៃ សង្ឃឹមថា ក្នុងរង្វង់ 5 ឆ្នាំទៀត ប្រទេសនេះនឹងទាក់ទាញអ្នកមានពីបរទេសបានជាង 1 លាននាក់ មករស់នៅ ធ្វើការ និងវិនិយោគនៅប្រទេសនេះ ហើយគោលនយោបាយនេះនឹងអាចទាក់ទាញការបណ្ដាក់ទុនវិនិយោគជាង 1 ទ្រីលានបាត (ជាង 26 ពាន់លានដុល្លារអាម៉េរិក) ទៅក្នុងសេដ្ឋកិច្ចប្រទេសនេះ៕

October 27, 2022

ភាគហ៊ុន Twitter ត្រូវផ្អាកការជួញដូរនៅថ្ងៃទី 28 ខែតុលាខាងមុខ

គេហទំព័ររបស់ផ្សារមូលបត្រ New York (NYSE) បានឱ្យដឹងថា ភាគហ៊ុនរបស់ក្រុមហ៊ុន Twitter Inc នឹងត្រូវបានផ្អាកការជួញដូរបណ្ដោះអាសន្ននៅក្នុងថ្ងៃទី 28 តុលា 2022។

ការផ្អាកខាងលើនេះគឺត្រូវនឹងថ្ងៃចុងក្រោយនៃការកំណត់របស់តុលាការដែលបានតម្រូវឱ្យមហាសេដ្ឋី អ៊ីឡុន ម៉ាស (Elon Musk) បង្ហើយកិច្ចការទិញបណ្ដាញសង្គម Twitter ទៅតាមការសន្យា។

លោក ម៉ាស បានទៅធ្វើទស្សនកិច្ចទីស្នាក់ការកណ្ដាលរបស់ Twitter នៅទីក្រុង San Francisco សហរដ្ឋអាម៉េរិក កាលពីថ្ងៃទី 26 តុលា និងបានធ្វើបច្ចុប្បន្នភាពព័ត៌មានផ្ទាល់ខ្លួនរបស់លោកនៅលើបណ្ដាញសង្គមនេះទៅជា Chief Twit (ប្រធានក្រុមហ៊ុន Twitter) ផងដែរ។

Wall Street Journal បានផ្សាយថា ធនាគារនានាបានចាប់ផ្ដើមផ្ទេរប្រាក់ 13 ពាន់លានដុល្លារដើម្បីឱ្យលោក ម៉ាស ទិញ Twitter។ នេះគឺជាសញ្ញាថ្មីបំផុតដែលបង្ហាញថា ការទិញដូរដែលមានតម្លៃ 44 ពាន់លានដុល្លារនេះអាចសម្រេចបានជាស្ថាពរនៅចុងសប្ដាហ៍នេះ ក្រោយការប្រែប្រួលអស់ច្រើនខែ។

October 27, 2022

«អ្នកស្នងមរតករបស់ Samsung» ចូលគ្រប់គ្រងក្រុមហ៊ុនតម្លៃ 250 ពាន់លានដុល្លារជាផ្លូវការ

ក្រោយរយៈពេលជាង 2 ឆ្នាំដែលត្រូវបានពន្យារពេលព្រោះតែបញ្ហាផ្លូវច្បាប់ Jay Y. Lee នាពេលថ្មីៗនេះ ទើបតែត្រូវបានជ្រើសរើសជាប្រធានក្រុមហ៊ុន Samsung Electronics ជាផ្លូវការ។

នាថ្ងៃទី 27 តុលា ក្រុមប្រឹក្សាភិបាលរបស់ Samsung Electronics បានអនុម័តលើការជ្រើសរើសលោក Jay Y. Lee ជាប្រធានក្រុមហ៊ុនដែលមានតម្លៃ 250 ពាន់លានដុល្លារអាម៉េរិកមួយនេះ។ មុននោះ លោកត្រូវបានគេជឿថា នឹងចូលកាន់តំណែងនេះក្រោយពីឪពុករបស់លោកគឺលោក Lee Kun-hee បានទទួលមរណភាពកាលពីឆ្នាំ 2020 ប៉ុន្តែ ត្រូវបានពន្យារពេលដោយសារតែការស៊ើបអង្កេតរបស់តុលាការទាក់ទងនឹងអំពើសូកប៉ាន់ ដែលនាំឱ្យទាយាទរបស់ Samsung រូបនេះត្រូវជាប់ពន្ធនាគារពីរលើក។

ការចូលកាន់តំណែងប្រធានក្រុមហ៊ុនជាផ្លូវការនេះ ទំនងជានឹងមិនអាចធ្វើឱ្យមានការប្ដូរផ្លាស់ច្រើនក្នុងរយៈពេលខ្លីឡើយ ព្រោះថា ជាក់ស្ដែង លោក Jay Y. Lee បានដឹកនាំក្រុមហ៊ុននេះក្នុងមួយរយៈពេលកន្លងមកហើយ។ ក៏ប៉ន្តែ មុខតំណែងផ្លូវការនេះអាចជួយឱ្យលោកកំណត់ទិសដៅសម្រាប់ Samsung ឆ្ពោះចូលទៅជ្រៅក្នុងវិស័យផលិតបន្ទះឈីបអេឡិចត្រូនិក (semiconductor) និងបច្ចេកវិទ្យាជីវសាស្ត្រ។

លោក Jay Y. Lee ធ្លាប់បានជាប់ពន្ធនាគារពីរលើក

លោក Jay Y. Lee នឹងត្រូវនាំ Samsung ឆ្លងកាត់ដំណាក់កាលច្របូកច្របល់បំផុត រាប់ចាប់តាំងពីជីតា Lee Byung-Chull របស់លោក បានបង្កើតក្រុមហ៊ុននេះកាលពីឆ្នាំ 1938។ បណ្ដាប្រទេសធំៗដូចជា សហរដ្ឋអាម៉េរិក និង អឺរ៉ុប ជាដើម កំពុងជំរុញឱ្យ Samsung បង្កើនការវិនិយោគដើម្បីធានាប្រភពផ្គត់ផ្គង់បន្ទះឈីបអេឡិចត្រូនិក សម្រាប់ពួកគេ ពិសេសគឺនៅក្នុងស្ថានការណ៍ដែល វ៉ាស៊ីងតោន អនុវត្តយុទ្ធនាការដើម្បីកៀបមហិច្ឆតាក្នុងការផលិតបន្ទះឈីបអេឡិចត្រូនិក របស់ ប្រទេសចិន។

យោងតាមទិន្នន័យរបស់ Bloomberg លោក Lee កាន់កាប់ភាគហ៊ុន 1.63% នៅក្នុងក្រុមហ៊ុន Samsung Electronics និង 18.13% នៅក្នុងក្រុមហ៊ុន Samsung C&T។ បច្ចុប្បន្ន ប្រធានថ្មីរបស់ Samsung រូបនេះ មានទ្រព្យប្រហែល 5.9 ពាន់លានដុល្លារអាម៉េរិក៕

October 27, 2022

ក្រុមហ៊ុនរបស់ វៀតណាម បើកលក់យានជំនិះហោះប្រើអគ្គិសនី ៖ តម្លៃចាប់ពី 2 ពាន់លានដុង

យានជំនិះហោះរបស់ Airlios មាន 4 ជម្រើស និងមានតម្លៃចាប់ពី 2 ពាន់លានដុង ដែលប្រហែលនឹង 8 ម៉ឺនដុល្លារអាម៉េរិក។

កាលពីថ្ងៃទី 26 តុលា Airlios បានតាំងបង្ហាញម៉ូតូហោះឯកជនដំបូងគេនៅតំបន់ អាស៊ីអាគ្នេយ៍ នៅក្នុងពិព័រណ៍ Vietnam Motor Show 2022។ Airlios គឺជា startup មួយរបស់ វៀតណាម ដែលមានទីស្នាក់ការកណ្ដាលនៅ រដ្ឋធានីហាណូយ ប្រទេសវៀតណាម។

ក្រុមហ៊ុនធុរកិច្ចថ្មី Airlios ដាក់លក់យានជំនិះហោះរបស់ខ្លួនដែលរួមមាន 4 ជម្រើសគឺ Air One, Pegasus, Minotaur និង Custom និងមានតម្លៃជាបន្តបន្ទាប់គឺ 2 ពាន់លានដុង, 2.2 ពាន់លានដុង, 2.46 ពាន់លានដុង និង 2.46 ពាន់លានដុង។ ទាំងអស់សុទ្ធតែត្រូវបានផលិតនៅ វៀតណាម។

យានជំនិះហោះដែលដាក់តាំងបង្ហាញនេះគឺជាម៉ូដែលរបស់ Pegasus ដែលបានហោះហើរសាកល្បងជាង 100 ម៉ោង និងហោះបានរយៈចម្ងាយ 1,000 គីឡូម៉ែត្រ។

យោងតាមក្រុមហ៊ុន Airlios ផលិតផលនេះនឹងត្រូវបានដាក់លក់ក្នុងទីផ្សារចាប់ពីឆ្នាំ 2027 ក្រោមរូបភាពលក់ដាច់ ឬផ្ដល់ជាសេវាកម្មដឹកជញ្ជូន។

យានជំនិះហោះ Pegasus របស់ Airlios មានបណ្ដោយ 1.9 ម៉ែត្រ កម្ពស់ 1.15 ម៉ែត្រ និងស្លាបប្រវែង 2 ម៉ែត្រ។ ទម្ងន់របស់វាគឺ 220 គីឡូក្រាម ចំណែកទម្ងន់អតិបរមាសម្រាប់ការហោះហើរគឺ 320 គីឡូក្រាម មានន័យថា វាអាចផ្ទុកទម្ងន់បាន 100 គីឡូក្រាម។

Pegasus មានកៅអីតែមួយគត់ ប៉ុន្តែវាអាចត្រូវបានបញ្ជាតាមពីររបៀបគឺ បញ្ជាដោយផ្ទាល់ និងដាក់ឱ្យដំណើរការស្វ័យប្រវត្ត។ យានជំនិះនេះអាចហោះបានចម្ងាយ 33 គីឡូម៉ែត្រ ល្បឿន 100 គីឡូម៉ែត្រ/ម៉ោង ហោះបានរយៈពេល 20 នាទី និងកម្ពស់ 120 ម៉ែត្រ។

យានជំនិះហោះរបស់ក្រុមហ៊ុនវៀតណាម Airlios ប្រើប្រាស់ថ្មផ្ទុកអគ្គិសនីប្រភេទ lithium-ion និងប្រភពអគ្គិសនីបម្រុងមួយផ្សេងទៀត៕

October 27, 2022

ការស្ថាបនាផ្លូវក្រវាត់ក្រុងទី 3 និងស្ពានឆ្លងកាត់ផ្លូវជាតិនៅជុំវិញ ភ្នំពេញ សម្រេចបានជិត 80% និងជិត 90%

ការងារស្ថាបនាផ្លូវក្រវាត់ក្រុងទី 3 សម្រេចបាន 77% ខណៈដែលការសាងសង់ស្ពានឆ្លងកាត់ទន្លបាសាក់ ឆ្លងកាត់ផ្លូវជាតិលេខ 2 និងផ្លូវជាតិលេខ 22 សម្រេចបាន 88% នេះបើតាម ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ព័ត៌មានខាងលើត្រូវបាន រដ្ឋមន្ត្រីក្រសួងសាធារណការ និងដឹកជញ្ជូន ថ្លែងនៅក្នុងសន្និសីទសារព័ត៌មាន ស្ដីពី «សមិទ្ធផលសម្រេចបានរយៈពេល 5 ឆ្នាំកន្លងមករបស់ ក្រសួងសាធារណការ និងដឹកជញ្ជូន» នាព្រឹកថ្ងៃទី 27 តុលា នៅទីស្ដីការគណៈរដ្ឋមន្ដ្រី។

យោងតាម ក្រសួងសាធារណការ និងដឹកជញ្ជូន ផ្លូវក្រវាត់ក្រុងទី 3 នេះ គឺចាប់ផ្តើមពីផ្លូវជាតិលេខ 4 ចំណុចគីឡូម៉ែត្រលេខ 14+105 ស្ថិតក្នុងភូមិជម្ពូវ័ន្ត សង្កាត់ចោមចៅ 3 ខណ្ឌពោធិ៍សែនជ័យ រាជធានីភ្នំពេញ ភ្ជាប់ទៅកាន់ផ្លូវទំនប់កប់ស្រូវ ផ្លូវជាតិលេខ 5 ស្ពានឈ្នះឈ្នះ មហាវិថីឈ្នះឈ្នះ និងផ្លូវជាតិលេខ 6។

ក្រោយពីបានស្ថាបនារួចរាល់ ផ្លូវក្រវាត់ក្រុងទី 3 ដែលមានតម្លៃ 267.67 លានដុល្លារអាមេរិកនេះ នឹងក្លាយជាផ្លូវក្រវាត់ក្រុងដ៏ធំ និងទំនើប ដែលតភ្ជាប់ទៅកាន់ផ្លូវជាតិលេខ 6, ផ្លូវជាតិលេខ 5, ផ្លូវជាតិលេខ 4, ផ្លូវជាតិលេខ 3, ផ្លូវជាតិលេខ 2 និងផ្លូវជាតិលេខ 21។ ផ្លូវក្រវាត់ក្រុងទី 3 នេះ ក៏នឹងមានស្ពានឆ្លងកាត់ទន្លេបាសាក់ និងកោះអន្លង់ចិន ភ្ជាប់ទៅកាន់ផ្លូវជាតិលេខ 1 ត្រង់ចំណុចគីឡូម៉ែត្រលេខ 24+840 ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន

ផ្លូវក្រវាត់ក្រុងទី 3 ដែលអនុវត្តការងារសាងសង់ដោយក្រុមហ៊ុន Shanghai Construction Group ក៏ភ្ជាប់ទៅចំណតផែកុងតឺន័រថ្មី របស់កំពង់ផែស្វ័យតភ្នំពេញ នៅក្នុងស្រុកកៀនស្វាយ ខេត្តកណ្ដាល និងបំពេញបន្ថែមសម្រាប់ការតភ្ជាប់ផ្លូវអាស៊ានហាយវ៉េយផងដែរ។

សូមបញ្ជាក់ថា គម្រោងផ្លូវក្រវាត់ក្រុងទី 3 នេះ ត្រូវបានបើកការដ្ឋានសាងសង់ កាលពីខែមករា ឆ្នាំ 2019 និងអនុវត្តការងារត្រួតពិនិត្យគម្រោងដោយក្រុមហ៊ុន Guangzhou Wanan Construction Supervision៕

October 27, 2022

ស្ថានភាពជំងឺកូវីដ-19 នៅ កម្ពុជា ប្រកាសនៅក្នុងថ្ងៃទី 27 ខែតុលា 2022

កម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 0 នាក់ ក្នុងអំឡុង 24 ម៉ោង នៃថ្ងៃទី 26 ខែតុលា ឆ្នាំ 2022។

ក្នុងអំឡុងពេលដដែល ក៏មានអ្នកជំងឺកូវីដ-19 ចំនួន 02 នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី 27 ខែតុលា ឆ្នាំ 2022 កម្ពុជា មាន អ្នកឆ្លងកូវីដ-១៩ សរុប ៖ 137,979 នាក់, អ្នកជាសះស្បើយសរុប ៖ 134,916 នាក់ និងអ្នកស្លាប់សរុប ៖ 3,056 នាក់។

October 27, 2022

Author: សឿន សំណាង