សឿន សំណាង - La Reine Media

ការសិក្សាស្រាវជ្រាវបង្ហាញថា «2/3 នៃប្រជាជនរបស់ អូស្ត្រាលី បានឆ្លងជំងឺកូវីដ-19»

ក្រោយការស្រាវជ្រាវ និងការវាយតម្លៃច្រើនលើកអំពីសមត្ថភាពបង្ការជំងឺឆ្លងរបស់កុមារ និងមនុស្សពេញវ័យនៅ អូស្ត្រាលី ក្រុមអ្នកស្រាវជ្រាវយល់ថា ប្រជាជនប្រមាណ 2/3 របស់ អូស្ត្រាលី បានឆ្លងជំងឺកូវីដ-19 ក្នុងនោះមានកុមារផងដែរ។

នេះគឺជាលទ្ធផលនៃការសិក្សាស្រាវជ្រាវ និងវាយតម្លៃ 2 លើក អំពីសមត្ថភាពបង្ការការឆ្លងជំងឺរបស់កុមារ និងមនុស្សពេញវ័យនៅ អូស្ត្រាលី។

ការស្រាវជ្រាវបង្ហាញថា កុមារប្រហែល 79% ដែលមិនទាន់ត្រូវបានចាក់វ៉ាក់សាំងបង្ការ និងមានអាយុចាប់ពី 1 ដល់ 4 ឆ្នាំ បានឆ្លងវីរុសកូវីដ-19 ខណៈកុមារ 67% ដែលមានអាយុពី 5 ដល់ 11 ឆ្នាំ និងភាគច្រើនបានចាក់វ៉ាក់សាំង សុទ្ធតែធ្លាប់បានឆ្លងជំងឺនេះ។ ក្នុងចំណោមមនុស្សដែលមានអាយុចាប់ពី 12 ដល់ 19 ឆ្នាំ អត្រានៃការធ្លាប់ឆ្លងកូវីដគឺប្រហែល 70%។

អ្នកជំនាញផ្នែកជំងឺឆ្លង Archana Koirala មកពី មជ្ឈមណ្ឌលស្រាវជ្រាវ និងតាមដានយុទ្ធនាការជាតិចាក់វ៉ាក់សាំង (NCIRS) បានបញ្ជាក់ថា លទ្ធផលនៃការស្រាវជ្រាវបង្ហាញថា យ៉ាងហោចណាស់ក៏មានកុមារប្រមាណ 2/3 នៅ អូស្ត្រាលី ធ្លាប់បានឆ្លងកូវីដ-19។

លោក Archana Koirala សង្កត់ធ្ងន់ថា ការស្រាវជ្រាវនេះបន្តផ្ដល់ព័ត៌មានសំខាន់ក្នុងការបង្កើនការយល់ដឹងអំពីកម្រិតនៃការឆ្លងរាលដាលរបស់វីរុស SARS-CoV-2 (វីរុសបង្កជំងឺកូវីដ-19) ឥទ្ធិពលនៃការចាក់វ៉ាក់សាំង និងការឆ្លង ធៀបនឹងកម្រិតនៃភាពស៊ាំក្នុងសហគមន៍៕

November 4, 2022

កូរ៉េខាងត្បូង បញ្ចេញយន្តហោះទៅទប់ទប់ ខណៈយន្តហោះចម្បាំងកូរ៉េខាងជើង ជិត 200 គ្រឿងនៅក្បែរព្រំដែន

ក្រោយពីរកឃើញយន្តហោះចម្បាំងជាង 180 គ្រឿងរបស់ កូរ៉េខាងជើង អគ្គសេនាធិការចម្រុះ (JCS) របស់ កូរ៉េខាងត្បូង ក៏បានបញ្ចេញក្រុមយន្តហោះចម្បាំងរបស់ខ្លួនទៅទប់ទល់។

យោងតាមសារព័ត៌មាន Yonhap និង Reuters អគ្គសេនាធិការចម្រុះ (JCS) របស់ កូរ៉េខាងត្បូង ប្រកាសនាថ្ងៃទី 04 វិច្ឆិកានេះថា ប្រទេសនេះបានបញ្ចេញក្រុមយន្តហោះចម្បាំងទៅទល់ទប់ បន្ទាប់ពីបានឃើញយន្តហោះចម្បាំងជាង 180 គ្រឿងរបស់ កូរ៉េខាងជើង ស្ថិតនៅក្បែរព្រំដែន។

ក្នុងថ្ងៃដដែល គណៈកម្មការការពារជាតិរបស់ សភាកូរ៉េខាងត្បូង ក៏បានអនុម័តសេចក្ដីសម្រេចថ្កោលទោសចំពោះសកម្មភាពបង្កហេតុដោយការបាញ់ប្លោងមីស៊ីលរបស់ កូរ៉េខាងជើង ព្រមទាំងបានស្នើឱ្យ ទីក្រុងព្យុងយ៉ាង មិនធ្វើការសាកល្បងអាវុធនុយក្លេអែរលើកទី 7 ផងដែរ។

សេចក្ដីថ្កោលទោសរបស់ សភាកូរ៉េខាងត្បូង លើកឡើងថា «បើសិន កូរ៉េខាងជើង នៅតែបន្តបង្កហេតុ ពួកគេប្រាកដជាត្រូវអន្តរជាតិដាក់ឱ្យនៅឯកោ បំផ្លាញខ្លួនឯង នាំឱ្យរបបរបស់ គីម ជុងអុន ពិបាកបន្តរស់រានមានជីវិត»។

សេចក្ដីសម្រេចខាងលើក៏បានព្រមានថា ទីក្រុងព្យុងយ៉ាង នឹងត្រូវខាតបង់ខ្ពស់សម្រាប់រាល់ស្ថានការណ៍ដែលកើតមានបន្ទាប់នោះ៕

November 4, 2022

អារ៉ាប៊ីសាអូឌីត បង្កើតក្រុមហ៊ុនផលិតរថយន្តអគ្គិសនីដំបូង ដើម្បីរួមចំណែកកាត់បន្ថយការបំភាយឧស្ម័ន

ក្រុមហ៊ុនផលិតរថយន្តអគ្គិសនីដំបូងរបស់ ប្រទេសអារ៉ាប៊ីសាអូឌីត ដែលមានឈ្មោះថា Ceer នឹងសហការជាមួយ Foxconn ដែលជាក្រុមហ៊ុនឯកជនធំបំផុតមួយរបស់ កោះតៃវ៉ាន់ ដើម្បីអភិវឌ្ឍរចនាសម្ព័ន្ធអគ្គិសនីសម្រាប់រថយន្ត។

កាលពីថ្ងៃទី 03 វិច្ឆិកា អារ៉ាប៊ីសាអូឌីត បានប្រកាសបង្ហាញក្រុមហ៊ុនផលិតរថយន្តអគ្គិសនីដំបូងរបស់ពួកគេ នៅក្នុងកិច្ចប្រឹងប្រែងដើម្បីធ្វើពិពិធកម្មសេដ្ឋកិច្ចរបស់ប្រទេសនេះ ដែលជាអ្នកនាំចេញប្រេងឆៅធំជាងគេបង្អស់ក្នុងពិភពលោក។

យោងតាមទីភ្នាក់ងារសារព័ត៌មានរបស់ អារ៉ាប៊ីសាអូឌីត (SPA) ក្រុមហ៊ុនរថយន្តអគ្គិសនីដំបូងរបស់ប្រទេសនេះនឹងរួមចំណែកក្នុងការឆ្ពោះទៅរកការកាត់បន្ថយការបំភាយឧស្ម័នកាបូន និងជំរុញស្ថិរភាពដើម្បីដោះស្រាយផលប៉ះពាល់នៃបញ្ហាបម្រែបម្រួលអាកាសធាតុ។ Ceer នឹងសហការជាមួយ Foxconn ជាក្រុមហ៊ុនឯកជនធំបំផុតមួយរបស់ កោះតៃវ៉ាន់ ដើម្បីអភិវឌ្ឍរចនាសម្ព័ន្ធអគ្គិសនីរបស់រថយន្ត។

ក្រុមហ៊ុន Ceer ឱ្យដឹងថា នឹងផលិតរថយន្តអគ្គិសនីច្រើនប្រភេទដើម្បីឆ្លើយតតាមតម្រូវការអ្នកប្រើប្រាស់នៅក្នុងប្រទេស ក្នុងតំបន់មជ្ឈិមបូព៌ា និង អាហ្វ្រិកខាងជើង ក្នុងនោះមានរថយន្តប្រភេទសេដាន់ និងរថយន្តកីឡាពហុមុខងារផងដែរ។

តាមផែនការ ក្រុមហ៊ុននឹងបង្កើតបានការងារផ្ទាល់ និងប្រយោលប្រហែល 30,000 កន្លែង ហើយគ្រោងនឹងដាក់លក់រថយន្តអគ្គិសនីដំបូងរបស់ខ្លួនក្នុងទីផ្សារចាប់ពីឆ្នាំ 2025។

កាលពីខែវិច្ឆិកា 2021 នៅក្នុងកិច្ចប្រជុំ COP26 ស្ដីពីអាកាសធាតុ លើកទី 26 នៅ អង់គ្លេស អារ៉ាប៊ីសាអូឌីត បានសន្យាថា នឹងសម្រេចឱ្យបានគោលដៅបំភាយឧស្ម័នកម្រិតសូន្យនៅឆ្នាំ 2060៕

November 4, 2022

G7 និង អូស្ត្រាលី ឯកភាពគ្នាក្នុងការកំណត់តម្លៃពិតានចំពោះប្រេងឆៅរបស់ រុស្ស៊ី

ការកំណត់តម្លៃពិតាននេះគឺធ្វើឡើងដើម្បីធានាថា ទណ្ឌកម្មដើម្បីកាត់បន្ថយសមត្ថភាពរបស់ រុស្ស៊ី នៅក្នុងការប្រមូលធនធានសម្រាប់ធ្វើសង្គ្រាមនៅ អ៊ុយក្រែន មិនបង្កសម្ពាធទៅលើទីផ្សារប្រេងឆៅរបស់ពិភពលោក។

ក្រុមប្រទេសដែលមានវិស័យឧស្សាហកម្មរីកចម្រើនជាងគេក្នុងពិភពលោក (G7) និង ប្រទេសអូស្ត្រាលី បានឯកភាពគ្នាលើការកំណត់តម្លៃពិតានចំពោះប្រេងឆៅរបស់ រុស្ស៊ី ជំនួសឱ្យការបណ្ដោយតាមទីផ្សារ។

ក្រុមមន្ត្រីអាម៉េរិក និងបណ្ដាប្រទេសសមាជិក G7 បានពិភាក្សាគ្នាយ៉ាងសកម្មនៅក្នុងប៉ុន្មានសប្ដាហ៍កន្លងមកនេះអំពីផែនការកំណត់តម្លៃពិតានលើប្រេងឆៅដឹកជញ្ជូនតាមផ្លូវសមុទ្រ ដែលគ្រោងនឹងមានសុពលភាពចាប់ពីថ្ងៃទី 05 ធ្នូខាងមុខ ដើម្បីធានាថា ទណ្ឌកម្មនានារបស់ សហភាពអឺរ៉ុប និង សហរដ្ឋអាម៉េរិក ក្នុងបំណងកាត់បន្ថយសមត្ថភាពរបស់ រុស្ស៊ី នៅក្នុងការប្រមូលធនធានសម្រាប់ធ្វើសង្គ្រាមនៅ អ៊ុយក្រែន នឹងមិនបង្កសម្ពាធទៅលើទីផ្សារប្រេងឆៅរបស់ពិភពលោក។

តម្លៃពិតានដំបូងមិនទាន់ត្រូវបានកំណត់ជាក់លាក់ ប៉ុន្តែនឹងត្រូវបានលើកឡើងនៅប៉ុន្មានសប្ដាហ៍ខាងមុខ។ ដៃគូសហការក្នុងសម្ព័ន្ធភាពខាងលើបានឯកភាពគ្នាថា នឹងវាយតម្លៃអំពីតម្លៃពិតាននេះទៅតាមដំណាក់កាល និងកែសម្រួលបើសិនជាចាំបាច់។

ប្រទេសរុស្ស៊ី អាចទទួលបានផលចំណេញទៅតាមតម្លៃប្រេង Brent បើសិនមិនមានការកំណត់តម្លៃពិតាន ដោយសារតម្លៃប្រេងរបស់ប្រទេសនេះអាចកើនឡើងនៅពេលតម្លៃប្រេង Brent ឡើងថ្លៃទៅតាមការកាត់បន្ថយប្រភពផ្គត់ផ្គង់របស់ ទីក្រុងមូស្គូ ព្រោះថា រុស្ស៊ី គឺជាអ្នកផលិតប្រេងធំជាងគេមួយក្នុងពិភពលោក។

រដ្ឋមន្ត្រីក្រសួងហិរញ្ញវត្ថុអាម៉េរិក Janet Yellen និងក្រុមមន្ត្រីដទៃទៀតរបស់ G7 បានឯកភាពអនុវត្តការកំណត់តម្លៃពិតានចំពោះប្រេងឆៅរបស់ រុស្ស៊ី ចាប់ពីថ្ងៃទី 05 ធ្នូ 2022 និងបណ្ដាផលិតផលកែច្នៃពីប្រេងឆៅចាប់ពីថ្ងៃទី 05 កុម្ភៈ 2023។

ចំណែកភាគីប្រទេសរុស្ស៊ី វិញ បាននិយាយថា ខ្លួននឹងមិនផ្គត់ផ្គង់ប្រេងទៅឱ្យបណ្ដាប្រទេសដែលកំណត់តម្លៃពិតាននេះជាដាច់ខាត៕

November 4, 2022

ការនាំចេញទំនិញរបស់កម្ពុជាទៅកាន់វៀតណាម សម្រេចបាន 1.5 ពាន់លានដុល្លារ ក្នុងរយៈពេល 9 ខែដើមឆ្នាំ 2022

ទំហំពាណិជ្ជកម្មទ្វេភាគីសរុបរវាង ប្រទេសកម្ពុជា និង ប្រទេសវៀតណាម សម្រេចបានជាង 4 ពាន់លានដុល្លារអាម៉េរិក នៅក្នុងរយៈពេល 9 ខែដើមឆ្នាំ 2022 ដែលនេះបានជួយឱ្យ ប្រទេសវៀតណាម ក្លាយជាដៃគូពាណិជ្ជកម្មធំជាងគេបង្អស់របស់ កម្ពុជា នៅក្នុង តំបន់អាស៊ាន។

ការនាំចេញទំនិញរបស់ កម្ពុជា ទៅកាន់ វៀតណាម សម្រេចបាន 1.5 ពាន់លានដុល្លារ កើន 3% ធៀបនឹងឆ្នាំ 2021 និងការនាំចូលទំនិញពី វៀតណាម សម្រេចបាន 3 ពាន់លានដុល្លារ កើន 35%។ ដូច្នេះ នៅក្នុងរយៈពេល 3 ត្រីមាសដើមឆ្នាំ 2022 នេះ ការដោះដូរទំនិញសរុបរវាង កម្ពុជា និង វៀតណាម សម្រេចបានជាង 4 ពាន់លានដុល្លារអាម៉េរិក កើន 22% ធៀបនឹងឆ្នាំ 2021។

នៅក្នុង តំបន់អាស៊ីអាគ្នេយ៍ ប្រទេសថៃ គឺជាដៃគូពាណិជ្ជកម្មធំជាងគេលំដាប់ទី 2 របស់ កម្ពុជា សម្រាប់ 9 ខែដើមឆ្នាំនេះ។ ក្នុងរយៈពេល 9 ខែដើមឆ្នាំ 2022 ការនាំចេញរបស់ កម្ពុជា ទៅកាន់ទីផ្សារប្រទេសថៃ សម្រេចបានជាង 6 រយលានដុល្លារអាម៉េរិក កើន 38% បើធៀបទៅនឹងរយៈពេលដូចគ្នានៅឆ្នាំ 2021 ខណៈដែលការនាំចេញរបស់ ប្រទេសថៃ មកកាន់ កម្ពុជា សម្រេចបានជិត 3 ពាន់លានដុល្លារអាម៉េរិក កើន 25%។ ជារួម ទំហំពាណិជ្ជកម្មទ្វេភាគីរវាង ប្រទេសថៃ និង កម្ពុជា សម្រេចបានជាង 3 ពាន់លានដុល្លារ កើន 27% ធៀបនឹង 9 ខែដើមឆ្នាំ 2021។

ដោយឡែក ការដោះដូរពាណិជ្ជកម្មរវាង កម្ពុជា ជាមួយនឹងបណ្ដាប្រទេសអាស៊ាន ក្នុងរយៈពេល 9 ខែដើមឆ្នាំ 2022 នេះ សម្រេចបានជាង 12 ពាន់លានដុល្លារអាមេរិក កើន 10% ធៀបនឹង 9 ខែដើមឆ្នាំមុន។ ចំណែកការដោះដូរពាណិជ្ជកម្មរវាង កម្ពុជា ជាមួយនឹងពិភពលោកទាំងមូល សម្រេចបានជាង 41 ពាន់លានដុល្លារអាមេរិក កើនជាង 18% បើធៀបនឹង 9 ខែដើមឆ្នាំ 2021៕

November 4, 2022

កម្ពុជា រកឃើញអ្នកឆ្លងវីរុសកូវីដ-19 ករណីថ្មី ចំនួន 0 នាក់ ក្នុងអំឡុង 24 ម៉ោងកន្លង

កម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 0 នាក់ ក្នុងអំឡុង 24 ម៉ោង នៃថ្ងៃទី 03 ខែវិច្ឆិកា ឆ្នាំ 2022។

ក្នុងអំឡុងពេលដដែល ក៏មានអ្នកជំងឺកូវីដ-19 ចំនួន 03 នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី 04 ខែវិច្ឆិកា ឆ្នាំ 2022 កម្ពុជា មានអ្នកឆ្លងកូវីដ-១៩ សរុប ៖ 137,995 នាក់, អ្នកជាសះស្បើយសរុប ៖ 134,933 នាក់ និងអ្នកស្លាប់សរុប ៖ 3,056 នាក់។

November 4, 2022

កូរ៉េខាងត្បូង ប្រកាសផែនការធ្វើសមយុទ្ធយោធាប្រចាំឆ្នាំ Taegeuk ដើម្បីទប់ទល់នឹង កូរ៉េខាងជើង

នាថ្ងៃទី 04 វិច្ឆិកានេះ កងទ័ពកូរ៉េខាងត្បូង បានប្រកាសថា នឹងធ្វើសមយុទ្ធយោធាលើប្រព័ន្ធកុំព្យូទ័រប្រចាំឆ្នាំដែលមានឈ្មោះថា Taegeuk នៅសប្ដាហ៍ក្រោយ ដើម្បីបង្កើនសមត្ថភាពប្រយុទ្ធប្រឆាំងនឹងការគំរាមកំហែងពីសំណាក់ កូរ៉េខាងជើង។

យោងតាម អគ្គសេនាធិការចម្រុះ (JCS) របស់ កូរ៉េខាងត្បូង សមយុទ្ធថ្នាក់បញ្ជាការដ្ឋាននេះនឹងអូសបន្លាយពេល 4 ថ្ងៃ ដោយគ្រោងនឹងចាប់ផ្ដើមពីថ្ងៃទី 07 វិច្ឆិកា។ សមយុទ្ធនេះនឹងធ្វើការហ្វឹកហាត់សមត្ថភាពប្រយុទ្ធនៅចំពោះមុខការគំរាមកំហែងនានា ក្នុងនោះក៏មានកម្មវិធីមីស៊ីលនុយក្លេអែររបស់ កូរ៉េខាងជើង និងសកម្មភាពបង្កហេតុនានាក្នុងពេលថ្មីៗនេះរបស់ ទីក្រុងព្យុងយ៉ាង។

បណ្ដាសមយុទ្ធការពារបែបនេះ មិនរួមបញ្ចូលជាមួយនឹងការហ្វឹកហាត់នៅលើទីតាំងជាក់ស្ដែងនោះទេ ប៉ុន្តែនឹងផ្ដោតទៅលើការបង្កើនសមត្ថភាពដោះស្រាយវិបត្តិ និងសមត្ថភាពសម្របខ្លួនទៅក្នុងសម័យសង្គ្រាម។

សមយុទ្ធលើកុំព្យូទ័រនេះនឹងមានការចូលរួមរបស់បណ្ដាទីបញ្ជាការប្រយុទ្ធរបស់ទ័ពជើងទឹក ជើងគោក និងជើងអាកាសរបស់ កូរ៉េខាងត្បូង៕

November 4, 2022

កូរ៉េខាងត្បូង ថា កូរ៉េខាងជើង បាញ់កាំភ្លើងធំ 80 គ្រាប់ទៅកាន់តំបន់ការពារយោធា

កងទ័ពកូរ៉េខាងត្បូង នាថ្ងៃទី 04 វិច្ឆិកានេះបានប្រកាសថា កូរ៉េខាងជើង បានបាញ់កាំភ្លើងធំប្រហែល 80 គ្រាប់ ទៅលើតំបន់ការពារយោធានៅតំបន់សមុទ្រភាគខាងកើតប្រទេសនេះ។

យោងតាម Yonhap កងទ័ពកូរ៉េខាងត្បូង នាថ្ងៃទី 04 វិច្ឆិកានេះបានប្រកាសថា កូរ៉េខាងជើង បានបាញ់កាំភ្លើងធំប្រហែល 80 គ្រាប់ទាំងយប់ទៅលើតំបន់ការពារយោធានៅតំបន់សមុទ្រភាគខាងកើតប្រទេសនេះ ដែលនេះជាការរំលោភលើកិច្ចព្រមព្រៀងឆ្នាំ 2018 ជាមួយនឹង កូរ៉េខាងត្បូង ស្ដីពីការកាត់បន្ថយភាពតានតឹងផ្នែកយោធា។

សកម្មភាពខាងលើបានកើតមានឡើងក្នុងពេលដែល កូរ៉េខាងជើង បន្តការបាញ់មីស៊ីលជាបន្តបន្ទាប់នាពេលកន្លង។

ដោយឡែកនៅក្នុងថ្ងៃទី 2-2 វិច្ឆិកា កូរ៉េខាងជើង បានបាញ់មីស៊ីលជិត 30 គ្រាប់ទៅកាន់សមុទ្រភាគខាងកើត និងភាគខាងលិចប្រទេសនេះ។

ក្នុងចំណោមមីស៊ីលដែល កូរ៉េខាងជើង បានបាញ់ មាន 1 គ្រាប់បានធ្លាក់ក្បែរដែនសមុទ្ររបស់ កូរ៉េខាងត្បូង និង 1 គ្រាប់ទៀតដែល កូរ៉េខាងត្បូង ជឿថាជាមីស៊ីលអន្តរទ្វីប Hwasong-17៕

November 4, 2022

អេស្ប៉ាញ ៖ បាតុកររាប់ពាន់នាក់ទាមទារឱ្យនិយោជកដំឡើងប្រាក់ខែ

បញ្ហាអតិផរណានៅ ប្រទេសអេស្ប៉ាញ បានថយចុះមកនៅត្រឹម 7.3% ក្នុងខែតុលាឆ្នាំនេះ បើធៀបនឹងជាង 10% ក្នុងបណ្ដាខែនៅរដូវក្ដៅ ចំណែកប្រាក់ខែវិញ បានឡើងតែ 1% ប៉ុណ្ណោះ ដែលនេះធ្វើឱ្យជីវភាពរបស់ពលករត្រូវធ្លាក់ទៅក្នុងស្ថានភាពលំបាក។

ពលរដ្ឋអេស្ប៉ាញ រាប់ពាន់នាក់ បានប្រមូលផ្ដុំគ្នានៅលើទីលាន Plaza Mayor នៅ រាជធានីម៉ាឌ្រីដ ដើម្បីធ្វើបាតុកម្មទាមទារដំឡើងប្រាក់ខែ។ នេះគឺជាបាតុកម្មទ្រង់ទ្រាយធំដំបូងនៅប្រទេសនេះ រាប់ចាប់ពីវិបត្តិនៃការចំណាយក្នុងការរស់នៅ។

ក្រុមបាតុករនាំគ្នាលើកបដាដែលសរសេរពាក្យស្លោក និងស្រែកហ៊ោជយឃោសន៍ទាមទារឱ្យនិយោជកដំឡើងប្រាក់ខែ ក្នុងគ្រាដែលទំនិញឡើងថ្លៃខ្ពស់។

ក្នុងកិច្ចសម្ភាសជាមួយទូរទស្សន៍ SER លោក Unai Sordo អគ្គលេខាធិការនៃសហជីពធំបំផុតនៅ អេស្ប៉ាញ CCOO បានសង្កត់ធ្ងន់ថា បំណងខាងលើរបស់ពលករគឺជារឿងសមស្រប។

ក្រុមសហជីពនៅ អេស្ប៉ាញ ចង់ឱ្យមានការដំឡើងប្រាក់ខែប្រហែលពី 4 ទៅ 4.5% នៅក្នុងឆ្នាំនេះ និង ពី 2.5 ទៅ 3% នៅក្នុង 2 ឆ្នាំបន្តបន្ទាប់ខាងមុខ។

អតិផរណានៅ អេស្ប៉ាញ បានថយចុះមកនៅ 7.3% ក្នុងខែតុលាឆ្នាំនេះ ធៀបនឹងជាង 10% ក្នុងបណ្ដាខែនៅរដូវក្ដៅ។ ក៏ប៉ុន្តែ អត្រានេះនៅតែខ្ពស់ជាងឆ្ងាយ បើធៀបនឹងអំឡុងពេលដទៃ។

អតិផរណាកើនឡើងខ្ពស់ រួមនឹងបញ្ហាឱនភាពសេដ្ឋកិច្ច ភាគច្រើនគឺជាលទ្ធផលនៃផលប៉ះពាល់របស់សង្គ្រាមនៅ អ៊ុយក្រែន និងស្ថានភាពរអាក់រអួលនៃប្រភពផ្គត់ផ្គង់ឥន្ធនៈ និងឧស្ម័នដែលនាំចូលទៅ អឺរ៉ុប៕

November 4, 2022

ការបារម្ភអំពីឱនភាពសេដ្ឋកិច្ចសកល ធ្វើឱ្យប្រេងឆៅលើពិភពលោកធ្លាក់ថ្លៃ

បញ្ចប់ការជួញដូរក្នុងថ្ងៃទី 03 វិច្ឆិកា តម្លៃប្រេងឆៅ Brent ថយចុះ 1.49 ដុល្លារអាម៉េរិក ខណៈដែលប្រេងឆៅ WTI ធ្លាក់ថ្លៃ 1.83 ដុល្លារអាម៉េរិក។

តម្លៃប្រេងពិភពលោកធ្លាក់ចុះក្នុងការជួញដូរកាលពីថ្ងៃទី 03 វិច្ឆិកា (04 វិច្ឆិកានៅ កម្ពុជា) ក្នុងគ្រាដែលអត្រាការប្រាក់នៅ សហរដ្ឋអាម៉េរិក កើនឡើង បានរុញច្រានប្រាក់ដុល្លារអាម៉េរិក ឡើងថ្លៃខ្ពស់ ធ្វើឱ្យមានការបារម្ភអំពីវិបត្តិសេដ្ឋកិច្ចសកល ដែលប៉ះពាល់ដល់តម្រូវការប្រើប្រាស់ថាមពល។

ក៏ប៉ុន្តែល្បឿន និងអត្រានៃការធ្លាក់ថ្លៃរបស់ប្រេង ត្រូវបានទប់ទល់ដោយការបារម្ភអំពីប្រភពផ្គត់ផ្គង់ដែលត្រូវបានរឹតបន្តឹង។

បញ្ចប់ការជួញដូរនៅក្នុងទី 03 វិច្ឆិកា តម្លៃប្រេងឆៅ Brent ថយចុះ 1.49 ដុល្លារអាម៉េរិក (1.5%) មកនៅត្រឹម 94.67 ដុល្លារ/ធុង។ ចំណែកប្រេងឆៅ WTI ក៏បានធ្លាក់ថ្លៃ 1.83 ដុល្លារ (2%) ចុះមកនៅត្រឹម 88.17 ដុល្លារ/ធុង។

តម្លៃប្រេងឆៅ 2 ប្រភេទនេះ សុទ្ធតែបានកើនជាង 1% ក្នុងការជួញដូរកាលពីថ្ងៃទី 02 វិច្ឆិកា ដោយសារតែព័ត៌មានបង្ហាញថា បរិមាណប្រេងឆៅក្នុងឃ្លាំងយុទ្ធសាស្ត្ររបស់ សហរដ្ឋអាម៉េរិក បានថយចុះ បើទោះ រតនាគារជាតិអាម៉េរិក ដំឡើងអត្រាការប្រាក់ ហើយថានឹងពិចារណាអំពីការផ្អាកដំឡើងការប្រាក់នាពេលឆាប់ៗនេះ។ ប្រការនេះបានរុញច្រានតម្លៃរូបិយប័ណ្ណដុល្លារអាម៉េរិក ឡើងខ្ពស់ក្នុងថ្ងៃទី 03 វិច្ឆិកា។

ប្រាក់ដុល្លារឡើងថ្លៃ ធ្វើឱ្យតម្រូវការប្រេងថយចុះ បណ្ដាលឱ្យវាប្រែថ្លៃសម្រាប់អតិថិជនដែលទូទាត់ដោយការប្រើប្រាស់រូបិយប័ណ្ណដទៃក្រៅពីប្រាក់ដុល្លារអាម៉េរិក៕

November 4, 2022

Author: សឿន សំណាង