សឿន សំណាង - La Reine Media

ក្រសួងពាណិជ្ជកម្ម ជូនដំណឹងស្ដីពី «តម្លៃលក់រាយប្រេងឥន្ធនៈថ្មី ចាប់ពីថ្ងៃទី 21 ដល់ថ្ងៃទី 30 វិច្ឆិកា 2022

នាព្រឹកថ្ងៃទី 21 វិច្ឆិកា នេះ ក្រសួងពាណិជ្ជកម្ម បានចេញសេចក្ដីជូនដំណឹងស្ដីពី «តម្លៃលក់រាយប្រេងឥន្ធនៈថ្មី ដែលអនុវត្តចាប់ពីថ្ងៃទី 21 ដល់ថ្ងៃទី 30 វិច្ឆិកា 2022។

សេចក្ដីជូនដំណឹងថ្មីនេះបង្ហាញថា ចាប់ពីថ្ងៃទី 21 វិច្ឆិកាដល់ 30 វិច្ឆិកា 2022 តម្លៃលក់រាយប្រេងឥន្ធនៈនឹងចុះមកនៅ 4,350 រៀល/លីត្រ សម្រាប់ប្រេងសាំងធម្មតា EA92 និង 5,000 រៀល/លីត្រ សម្រាប់ប្រេងម៉ាស៊ូត DO 50ppm។

យោងតាមការប្រៀបធៀបជាមួយនឹងតម្លៃប្រេងនាពេលកន្លង ឃើញថា តម្លៃប្រេងសាំងដែលអនុវត្តចាប់ពីថ្ងៃទី 21 ដល់ 30 ខែវិច្ឆិកា 2022 មានការធ្លាក់ចុះ ក្នុងនោះ សាំងធ្លាក់ថ្លៃ 50 រៀល ខណៈដែលម៉ាស៊ូតធ្លាក់ថ្លៃ 100 រៀល។

ព័ត៌មានលម្អិត សូមអានសេចក្ដីជូនដំណឹងរបស់ ក្រសួងពាណិជ្ជកម្ម ខាងក្រោម ៖

November 21, 2022

តេឡេស្កុប James Webb រកឃើញកាឡាក់ស៊ីចំនួនពីរក្នុងចំណោមកាឡាក់ស៊ីចំណាស់បំផុត

ដោយមានសមត្ថភាព «សង្កេតមើលអតីតកាល» កំពូលតេឡេស្កុប James Webb របស់ ណាសា (NASA) កំពុងតែនាំមកនូវទស្សនីយភាពមិនធ្លាប់បានឃើញពីមុនមក ស្ដីពីចក្រវាលក្នុងដំណាក់កាលដំបូង។

យោងតាមលទ្ធផលនៃការស្រាវជ្រាវដែលបានចុះផ្សាយលើទស្សនាវដ្ដី Astrophysical Journal Letters កាលពីថ្ងសទី 17 វិច្ឆិកា តេឡេស្កុប James Webb បានសង្កេតឃើញកាឡាក់ស៊ីពីរ ក្នុងចំណោមកាឡាក់ស៊ីវ័យចំណាស់ៗ និងឆ្ងាយបំផុតក្នុងចក្រវាល រួមមាន GlASS-z12 និង GLASS-z10។

កាឡាក់ស៊ី GlASS-z12 បានបញ្ចេញពន្លឺរយៈពេល 350 លានឆ្នាំ ក្រោយករណីផ្ទុះ Big Bang ខណៈដែល GlASS-z10 កើនឡើងប្រហែល 250 លានឆ្នាំ ក្រោយបន្ទុះ Big Bang។ មុននោះ កាលពីឆ្នាំ 2016 តេឡេស្កុបអវកាស Hubble បានរកឃើញថា GN-z11 ដែលកាលណោះត្រូវបានអ្នកវិទ្យាសាស្ត្រចាត់ទុកថាជា កាឡាក់ស៊ីចំណាស់បំផុត ដោយកកើតឡើងប្រហែល 400 លានឆ្នាំ ក្រោយបន្ទុះ Big Bang។ បន្ទុះ Big Bang បានកើតឡើងកាលពី 13.8 ពាន់លានឆ្នាំមុន ប៉ុន្តែ បច្ចុប្បន្ន ទ្រឹស្ដីនេះហាក់កំពុងត្រូវរង្គោះរង្គើដោយសាររបកគំហើញថ្មីៗរបស់ James Webb។

បើទោះជាការរកឃើញខាងលើនេះគឺជារឿងគួរឱ្យចាប់អារម្មណ៍ ប៉ុន្តែ ក្រុមស្រាវជ្រាវយល់ថា ត្រូវការពេលវេលាបន្ថែមទៀតដើម្បីវិភាគ និងកំណត់ឱ្យដឹងច្បាស់អំពីអាយុកាលរបស់ GlASS-z12 និង GLASS-z10៕

កាឡាក់ស៊ីពីរដែលទើបត្រូវបានរកឃើញ ស្ថិតនៅខាងក្រៅនៃបណ្ដុំកាឡាក់ស៊ី Abell 2744

កាឡាក់ស៊ី GlASS-z10 (1) និង GLASS-z12 (2)

November 21, 2022

ក្រុមហ៊ុនចិន សាកល្បង «ឡានហោះ» ដែលអាចដោះចេញពីគ្នាដំបូងគេលើពិភពលោក (វីដេអូ)

គំរូឡានហោះមួយអាចប្ដូរការពីការធ្វើដំណើរនៅលើដី ទៅជាការហោះហើរលើអាកាសបានដោយងាយ ត្រូវបានបង្ហាញនៅ Chongqing ប្រទេសចិន កាលពីសប្ដាហ៍កន្លង។

ឡានហោះមានកៅអីចំនួន 2 នេះគឺជាប្រភេទដំបូងគេលើពិភពលោកដែលអាចដោះចេញពីគ្នាបាន និងត្រូវបានបង្ហាញនៅទីក្រុង Chongqing ភាគនិរតីនៃ ប្រទេសចិន កាលពីថ្ងៃទី 18 វិច្ឆិកា 2022។

ឡានហោះនេះអាចដឹកវត្ថុទម្ងន់ជាង 500 គីឡូក្រាម និងហោះក្នុងល្បឿន 80 គីឡូម៉ែត្រ/ម៉ោង។ យានយន្តនេះត្រូវបានសហការក្នុងការអភិវឌ្ឍដោយ មជ្ឈមណ្ឌលច្នៃប្រឌិត Chongqing នៃ វិទ្យាស្ថានបច្ចេកវិទ្យាប៉េកាំង រួមនឹងក្រុមហ៊ុនបច្ចេកវិទ្យា Cool Black (ប៉េកាំង) និង អាជ្ញាធរនៃទីក្រុង Chongqing។

ដោយប្រើប្រាស់បច្ចេកវិទ្យាកំណត់ទិស ណែនាំ និងដំឡើងដ៏សុក្រឹត អ្នកប្រើប្រាស់អាចប្ដូរផ្លាស់ផ្នែកនានារបស់ឡានហោះនេះ ពីរបបបើកបរលើដី ទៅជាការហោះហើរលើអាកាសបានយ៉ាងងាយស្រួល។ ឡានហោះនេះអាចហោះឡើង និងចុះចតដោយត្រង់ជាមួយនឹងកាប៊ីនឆ្លាតវៃ។

ថ្វីបើគម្រោងឡានហោះនេះកំពុងស្ថិតនៅក្នុងដំណាក់កាលដំបូងនៅឡើយ ប៉ុន្តែ ភាគីក្រុមហ៊ុនបាននិយាយថា ការហោះហើរ ក៏ដូចជាការបើកបរនៅលើដីដែលបង្ហាញជាសាធារណៈ នឹងត្រូវធ្វើឡើងនាពេលឆាប់ៗខាងមុខនៅទីក្រុង Chongqing៕

November 21, 2022

វិស័យមាន់បំពងរបស់ កូរ៉េខាងត្បូង «ផ្ទុះឡើង» ដោយសារ World Cup

ភាគហ៊ុនដែលទាក់ទងនឹងវិស័យឧស្សាហកម្មមាន់នៅលើផ្សារមូលបត្ររបស់ កូរ៉េខាងត្បូង ត្រូវបានគេព្យាករថា នឹងកើនឡើងខ្ពស់ខ្លាំងនៅពេលដំណាលគ្នានឹងព្រឹត្តិការណ៍ World Cup 2022 នៅ ប្រទេសកាតា។

ក្នុងការជួញដូរនៅចុងសប្ដាហ៍កន្លង ភាគហ៊ុនរបស់ Kyochon F&B ដែលជាបណ្ដាញភោជនីយដ្ឋានធំជាងគេមួយនៅ កូរ៉េខាងត្បូង ត្រូវបានជូញដូរក្នុងតម្លៃ 12,600 វ៉ុន/ហ៊ុន នៅលើផ្សារមូលបត្រ Kospi ដែលតួលេខនេះកើន 2% ធៀបនឹងពេលបិទទ្វារ ហើយក៏ខ្ពស់ជាងជិត 27% បើធៀបនឹង 1 ខែមុននោះ។

ភាគហ៊ុនរបស់ Maniker ដែលជាអ្នកផលិតមាន់ក្នុងស្រុក និងក្រុមហ៊ុន Maniker F&G ដែលត្រូវបានដាក់ឱ្យជួញដូរនៅលើផ្សារហ៊ុន Kosdaq ក៏ឡើងថ្លៃក្នុងខែវិច្ឆិកានេះ។

ភាគហ៊ុនរបស់វិស័យឧស្សាហកម្មមាន់ឡើងថ្លៃនៅមុនរដូវកាល World Cup 2022 គឺមិនមានអ្វីចម្លែក ព្រោះថា អ្នកគាំទ្រវិស័យបាល់ទាត់នៅ កូរ៉េខាងត្បូង ចូលចិត្តញ៉ាំ «chimaek» ដែលជាមាន់បំពងអមនឹងស្រាបៀរនៅពេលទស្សនាការប្រកួតបាល់ទាត់៕

November 21, 2022

ប្រទេសកាតា បង្កើតបាន «ឯតទគ្គកម្មក្រៀមក្រំ» នៅ World Cup

(ប្រទេសកាតា)-បរាជ័យនៅចំពោះមុខ អេក្វាទ័រ ធ្វើឱ្យ កាតា ក្លាយជាក្រុមម្ចាស់ផ្ទះដំបូងគេដែលបានចាញ់នៅក្នុងការប្រកួតបើកឆាក World Cup។

ក្នុងការប្រកួតបើកឆាកកាលពីថ្ងៃទី 20 មករា កាតា បានចាញ់ អេក្វាទ័រ 0-2។ កីឡាករខ្សែប្រយុទ្ធ Enner Valencia រកបាន 2 គ្រាប់សម្រាប់ក្រុមជម្រើសជាតិអេក្វាទ័រ ដោយការទាត់បាល់ពិន័យនៅនាទីទី 16 និងការតែតបញ្ចូលទីនៅនាទីទី 31។

ដោយទទួលបានលទ្ធផលនេះ កាតា បានក្លាយជាម្ចាស់ផ្ទះដំបូងគេដែលចាញ់នៅក្នុងការប្រកួតបើកឆាកនៅ រដូវកាល World Cup។ ក្នុង 21 រដូវកាលមុននោះ ក្រុមម្ចាស់ផ្ទះ 22 ក្រុម សុទ្ធតែរកបានពិន្ទុ ក្នុងនោះមាន 16 ក្រុមបានឈ្នះ និង 6 ស្មើ។ World Cup 2002 គឺជារដូវកាល់តែមួយគត់ដែលមាន 2 ប្រទេសធ្វើជាម្ចាស់ផ្ទះ គឺ ជប៉ុន និង កូរ៉េខាងត្បូង។

ការប្រកួតបើកឆាកនៅ World Cup 2022 ក៏ធ្វើឱ្យមានការភ្ញាក់ផ្អើលជាខ្លាំងនៅពេលកៅអីរាប់ពាន់ត្រូវបានទុកឱ្យនៅទំនេរនៅក្នុងតង់ទីពីរ។ យោងតាមទំព័រ Marca អ្នកគាំទ្ររបស់ក្រុមម្ចាស់ផ្ទះប្រហែល 15,000 នាក់ បានចាកចេញពីកន្លែង ក្រោយពី ក្រុមកាតា ចាញ់ក្រុមរបស់ អេក្វាទ័រ ខណៈដែលទំព័រ Ole វិញ យល់ថា អ្នកគាំទ្រចាកចេញគឺដើម្បីចៀសវាងការកកស្ទះផ្លូវ។

ទំព័រ Marca សរសេរថា ការចាកចេញរបស់ទស្សនិកជនគឺព្រោះតែពួកគេឃ្លាន។ អាហារឆាប់អស់ ចំណែកភេសជ្ជៈក៏មិនមានអ្វីក្រៅពីទឹកសុទ្ធ និងភេសជ្ជៈផ្អែម។ ប្រទេសកាតា ហាមការលក់ភេសជ្ជៈមានជាតិអាល់កុលនៅក្នុងកីឡដ្ឋាន។

ពិធីបើកការប្រកួតនៅ World Cup 2022 របស់ កាតា

នៅកីឡដ្ឋាន Al Bayt អ្នកគាំទ្រមួយចំនួនត្រូវពាក់អាវរងា ដោយសារតែគណៈកម្មការកីឡដ្ឋានបើកប្រព័ន្ធម៉ាស៊ីនត្រជាក់ដើម្បីជួយឱ្យកីឡាករទទួលបានផាសុកភាពជាងមុននៅក្នុងអាកាសធាតុឡើងកម្ដៅដល់ 32 អង្សាសេនៅ ប្រទេសកាតា៕

November 21, 2022

ធនាគារពិភពលោក ៖ កម្ពុជា មានសន្ទស្សន៍ភាពចាស់ទុំនៃបច្ចេកវិទ្យារដ្ឋាភិបាល «ល្អជាងមុន»

«អបអរសាទរដល់ ព្រះរាជាណាចក្រកម្ពុជា ដែលទទួលបានសន្ទស្សន៍ភាពចាស់ទុំនៃបច្ចេកវិទ្យារដ្ឋាភិបាល (GovTech Maturity Index — GTMI) កើនឡើងពីកម្រិត C កាលពីឆ្នាំ 2020 មកកម្រិត B នៅចុងឆ្នាំ 2022 នេះ» នេះបើតាមការឱ្យដឹងរបស់ ក្រសួងសេដ្ឋកិច្ច និងហិរញ្ញវត្ថុកម្ពុជា។

យោងតាមក្រសួងខាងលើ ថ្មីៗនេះ ធនាគារពិភពលោក បានបង្ហាញរបាយការណ៍ស្តីពីសន្ទស្សន៍ភាពចាស់ទុំនៃបច្ចេកវិទ្យារដ្ឋាភិបាល (GovTech Maturity Index—GTMI) ឆ្នាំ 2022 សម្រាប់ធ្វើការវាស់វែងលើការធ្វើបរិវត្តកម្មឌីជីថល នៅក្នុងរដ្ឋាភិបាល នៅតាមប្រទេសនីមួយ។

សន្ទស្សន៍ GTMI គឺជាការបន្សំនៃអនុសន្ទស្សន៍ 4 ទៀតគឺ 1-សន្ទស្សន៍នៃប្រព័ន្ធស្នូលរបស់រដ្ឋាភិបាល (Core Government Systems Index – CGSI), 2-សន្ទស្សន៍ការផ្តល់សេវាសាធារណៈ (Public Service Delivery Index – PSDI), 3-សន្ទស្សន៍ការចូលរួមរបស់ប្រជាពលរដ្ឋ (Citizen Engagement Index – CEI), និង 4-សន្ទស្សន៍បច្ចេកវិទ្យារដ្ឋាភិបាលជំរុញ (GovTech Enablers Index – GTEI)។

នៅក្នុងតំបន់អាស៊ីអាគ្នេយ៍ ប្រទេសដែលទទួលបានកម្រិត A មាន សិង្ហបុរី, ថៃ, ម៉ាឡេស៊ី, និង ឥណ្ឌូនេស៊ី, កម្រិត B មាន កម្ពុជា, វៀតណាម, ប្រ៊ុយណេ និងហ្វីលីពិន ខណៈកម្រិត C មាន ឡាវ និងកម្រិត D មាន មីយ៉ាន់ម៉ា៕

November 19, 2022

យន្តហោះបុកជាមួយរថយន្តពន្លត់អគ្គិភ័យ បណ្ដាលឱ្យឆាបឆេះសន្ធោសន្ធោនៅ ប៉េរូ (វីដេអូ)

យន្តហោះ A320 របស់ក្រុមហ៊ុន LATAM ដែលកំពុងហោះឡើង បានបុកជាមួយនឹងរថយន្តពន្លត់អគ្គិភ័យកំពុងបរលើផ្លូវ បណ្ដាលឱ្យយន្តហោះឆាបឆេះ និងធ្វើឱ្យមនុស្ស 2 នាក់បាត់បង់ជីវិត។

ក្រុមហ៊ុនអាកាសចរណ៍ LATAM Airlines បានឱ្យដឹងថា ហេតុការណ៍បានកើតឡើងនៅឯព្រលានយន្តហោះអន្តរជាតិ Jorge Chavez របស់ ប្រទេសប៉េរូ កាលពីថ្ងៃទី 18 វិច្ឆិកា នៅពេលរថយន្តពន្លត់អគ្គិភ័យបើកបរលើផ្លូវរត់របស់យន្តហោះ ចំពេលយន្តហោះ Airbus A320neo របស់ក្រុមហ៊ុននេះកំពុងហោះឡើង។

បន្ទាប់ពីការប៉ះទង្គិចធ្ងន់ យន្តហោះក៏បានឆាបឆេះយ៉ាងសន្ធោសន្ធៅ និងធ្លាក់ពីផ្លូវរត់ ហើយអ្នកដំណើរ និងបុគ្គលិកហោះហើរទាំងអស់ត្រូវបានឈ្លៀសចេញពីកន្លែងកើតហេតុដោយសុវត្ថិភាព។ ក៏ប៉ុន្តែ បុគ្គលិក 2 នាក់នៅលើរថយន្តពន្លត់អគ្គិភ័យ បាត់បាត់បង់ជីវិត។

អាជ្ញាធរក្នុងតំបន់បានប្រកាសថា កំពុងស្រាវជ្រាវរកមូលហេតុនៃឧបទ្ទវហេតុទៅតាមការយល់ឃើញថា នេះគឺជាករណីសម្លាប់មនុស្សដោយអចេតនា។

នេះគឺជាឧបទ្ទវហេតុទីពីរនៅក្នុងរយៈពេលមិនដល់មួយខែ របស់ LATAM Airlines។ កាលពីថ្ងៃទី 28 តុលា 2022 យន្តហោះ A320 មួយគ្រឿងរបស់ក្រុមហ៊ុននេះ ត្រូវចុះចតជាបន្ទាន់នៅ ប្រទេសប៉ារ៉ាហ្កាយ បន្ទាប់ពីផ្នែកខាងមុខរបស់វា ត្រូវបានកម្ទេចនៅក្នុងតំបន់អាកាសធាតុអាក្រក់៕

…

November 19, 2022

សហគ្រាសអាស៊ី នាំគ្នាបង្ហាញខ្លួន «ច្រើនមិនធ្លាប់មានពីមុន» នៅក្នុងព្រឹត្តិការណ៍ World Cup Qatar 2022

បណ្ដាក្រុមហ៊ុនអាស៊ី បានចំណាយប្រាក់យ៉ាងច្រើនដើម្បីយកឈ្នះលើក្រុមម្ចាស់ឧបត្ថម្ភរបស់លោកខាងលិចនៅក្នុងរដូវកាលប្រកួតបាល់ទាត់ពិភពលោក (World Cup) ដែលជិតធ្វើឡើងនៅ ប្រទេសកាតា។

ទ្វីបអាស៊ី ពីមុនមក មិនធ្លាប់បានបង្ហាញវត្តមានច្រើនដូចនៅ World Cup លើកនេះ ទាំងក្នុង និងក្រៅទីលានបាល់ទាត់។ ក្រុមបាល់ទាត់ 6 ក្រុមរបស់ អាស៊ី ក្នុងចំណោម 32 ក្រុម នឹងប្រកួតនៅ World Cup 2022 ដែលនេះគឺជាតួលេខច្រើនជាងពេលណាៗទាំងអស់។ ចំណែកនៅក្រៅទីលានប្រកួត បណ្ដាក្រុមហ៊ុនរបស់ អាស៊ី មានរហូតដល់ 9 ស្ថាប័ន ក្នុងចំណោមដៃគូសហការ និងម្ចាស់ឧបត្ថម្ភទាំង 14 ស្ថាប័នរបស់ FIFA នារដូវកាលនេះ។

នេះគឺជាការប្រែប្រួលធំធៀបនឹង World Cup នៅ អាស៊ី ដែល ជប៉ុន និង កូរ៉េខាងត្បូង ធ្វើជាម្ចាស់ផ្ទះ កាលពី 20 ឆ្នាំមុន។ កាលណោះមានតែម្ចាស់ឧបត្ថម្ភ 6 ស្ថាប័នប៉ុណ្ណោះដែលជារបស់ អាស៊ី ក្នុងចំណោមម្ចាស់ឧបត្ថម្ភ 15 ស្ថាប័នរបស់ FIFA។ ក្រៅពីនេះគឺសុទ្ធតែជាក្រុមហ៊ុនរបស់ អឺរ៉ុប និង សហរដ្ឋអាម៉េរិក។

ការឧបត្ថម្ភគឺជាបញ្ហាសំខាន់សម្រាប់ FIFA។ បន្ទាប់ពីការលក់អាជ្ញាប័ណ្ណផ្សាយបន្តផ្ទាល់តាមទូរទស្សន៍ (2.6 ពាន់លានដុល្លារ) ការឧបត្ថម្ភគឺប្រភពចំណូលធំបំផុត ដោយរួមចំណែករហូតដល់ 1.35 ពាន់លានដុល្លារ ប្រហែល 29% នៃប្រាក់ចំណូលសរុបរបស់ FIFA ក្នុងឆ្នាំ 2022។

ក្នុងចំណោមក្រុមហ៊ុនដែលជាម្ចាស់ឧបត្ថម្ភធំៗនៅ World Cup 2022 ក៏មានក្រុមហ៊ុនធុរកិច្ចថ្មីផ្នែកអប់រំរបស់ ឥណ្ឌា Byju’s បើទោះប្រទេសនេះមិនមានក្រុមបាល់ទាត់ទៅចូលរួមប្រកួត។ ដូចគ្នានេះដែរ ចិន ក៏មិនមានក្រុមបាល់ទាត់ទៅប្រកួតនៅ World Cup ប៉ុន្តែមានម្ចាស់ឧបត្ថម្ភរហូតដល់ 4 ស្ថាប័ន ខណៈដែល សិង្ហបុរី មាន 1 ស្ថាប័ន។

កូរ៉េខាងត្បូង មានក្រុមបាល់ទាត់នៅ World Cup និងមានម្ចាស់ឧបត្ថម្ភចំនួន 1 ស្ថាប័ន គឺ Hyundai-Kia។ ចំណែក ប្រទេសម្ចាស់ផ្ទះ កាតា មានម្ចាស់ឧបត្ថម្ភចំនួន 2។

បណ្ដាក្រុមបាល់ទាត់របស់ អាស៊ី ដែលចូលរួមប្រកួតនៅ World Cup លើកនេះ នៅតែមានចំនួនតិច ក៏ប៉ុន្តែ ក្រុមម្ចាស់ឧបត្ថម្ភដែលមកពីទ្វីបនេះ ត្រូវបានគេសង្ឃឹមថា នឹងមានឥទ្ធិពលភាគច្រើនទៅលើទស្សនិកជន ទាំងនៅក្នុងទីផ្សារក្នុងស្រុក និងអន្តរជាតិ៕

November 19, 2022

កប៉ាល់ផ្គត់ផ្គង់ឧស្ម័នធម្មជាតិរាវ (LNG) ធំជាងគេលើពិភពលោក ត្រូវបានដាក់ឱ្យដំណើរការសេវាកម្ម

ប្រទេសចិន កាលពីថ្ងៃទី 15 វិច្ឆិកា បានដាក់ដំណើរការកប៉ាល់ដឹកជញ្ជូនឧស្ម័នធម្មជាតិរាវ (LNG) ខ្នាតយក្សមួយគ្រឿងដែលអាចផ្គត់ផ្គង់ LNG បាន 1,650 ម៉ែត្រគុប/ម៉ោង។

កប៉ាល់ដឹកជញ្ជូន និងផ្គត់ផ្គង់ឧស្ម័នធម្មជាតិរាវដំបូងរបស់ ប្រទេសចិន ឈ្មោះ Offshore Oil 301 ត្រូវបានធ្វើឱ្យប្រសើរឡើង និងបញ្ចេញពីរោងចក្រនៅទីក្រុង Guangzhou ខេត្ត Guangdong ដើម្បីចាប់ផ្ដើមផ្គត់ផ្គង់ថាមពលឱ្យបណ្ដាកប៉ាល់ដើរដោយ LNG នេះបើតាមក្រុមហ៊ុនប្រេងឧស្ម័នលើលំហសមុទ្រចិន (CNOOC)។

កប៉ាល់ផ្គត់ផ្គង់ LNG គឺជាប្រភេទកប៉ាល់ចល័តដ៏សំខាន់ក្នុងការជំរុញការប្រើប្រាស់ LNG ជាថាមពលសម្រាប់យានយន្តក្នុងការដឹកជញ្ជូន។

ក្រុមអ្នកជំនាញអះអាងថា ការរីកចម្រើនថ្មីបំផុតនេះរបស់ ចិន នឹងដើរតួនាទីយ៉ាងសកម្មក្នុងការកសាងមជ្ឈមណ្ឌលផ្គត់ផ្គង់ LNG ដល់បណ្ដាកប៉ាល់អន្តរជាតិ ព្រមទាំងជំរុញការផ្លាស់ប្ដូរថាមពល និងការអភិវឌ្ឍថាមពលបៃតង។

កប៉ាល់ Offshore Oil 301 ដំបូងឡើយគឺជាកប៉ាល់ដឹក LNG ធម្មតា មានបណ្ដោយ 184.7 ម៉ែត្រ និងទទឹង 28.1 ម៉ែត្រ អាចដឹកឧស្ម័នធម្មជាតិរាវ LNG បាន 30,000 ម៉ែត្រគុប។

មុខងារផ្គត់ផ្គង់ LNG ត្រូវបានធ្វើឱ្យប្រសើរឡើងតាមរយៈការបន្ថែមឧបករណ៍ជាច្រើនដូចជា ឧបករណ៍ផ្ទុកឧស្ម័ន ប្រព័ន្ធផ្គត់ផ្គង់ (បូម) ពីកប៉ាល់ទៅកប៉ាល់ និងឧបករណ៍ធ្វើឱ្យរាវឡើងវិញ ក៏ដូចជាប្រព័ន្ធសុវត្ថិភាព និងប្រព័ន្ធផ្សេងៗទៀត។

ក្រោយពីត្រូវបានធ្វើឱ្យប្រសើរឡើង Offshore Oil 301 មានកម្លាំងអាចបូមឧស្ម័នបាន 1,650 ម៉ែត្រគុប/ម៉ោង នាំឱ្យវាក្លាយជាកប៉ាល់ផ្គត់ផ្គង់ឧស្ម័នធម្មជាតិរាវ LNG ធំជាងគេបង្អស់លើពិភពលោក និងអាចផ្ដល់សេវាកម្មដល់បណ្ដាកប៉ាល់ដឹកកុងតឺន័រ កប៉ាល់ដឹកប្រេងឆៅ និងកប៉ាល់ដឹកជញ្ជូនយានយន្ត (Ro-Ro Ship) ខ្នាតធំ។

យោងតាម Global Times ក្រុមហ៊ុនចិន CNOOC កំពុងញាប់ដៃញាប់ជើងក្នុងការស្ថាបនាបណ្ដាមជ្ឈមណ្ឌលផ្គត់ផ្គង់ LNG អន្តរជាតិនៅតំបន់វាលរាបទន្លេ Zhu Jiang និងវាលរាបទន្លេ Yangtze។ ក្រោយពីត្រូវបានប្រគល់ឱ្យអតិថិជន កប៉ាល់ Offshore Oil 301 នឹងផ្គត់ផ្គង់ LNG ដំបូងដល់បណ្ដាកប៉ាល់អន្តរជាតិក្នុងពេលឆាប់ៗខាងមុខ៕

November 19, 2022

មេដឹកនាំកំពូលរបស់ កូរ៉េខាងជើង នាំកូនស្រីដើរមើលទីតាំងបាញ់មីស៊ីល

មេដឹកនាំកូរ៉េខាងជើង លោក គីម ជុងអុន រួមនឹងកូនស្រី ចូលរួមពិធីបាញ់មីស៊ីលប្លោង Hwasong-17 នេះបើតាមទីភ្នាក់ងារសារព័ត៌មាន KCNA។

នៅថ្ងៃទី 19 វិច្ឆិកានេះ ទីភ្នាក់ងារសារព័ត៌មាន KCNA បានប្រកាសថា កូរ៉េខាងជើង បានបាញ់មីស៊ីលអន្តរទ្វីប (ICBM) Hwasong-17 កាលពីថ្ងៃទី 18 វិច្ឆិកា។ រូបថតដែលប្រកាសដោយ KCNA បង្ហាញថា លោក គីម ជុងអុន រួមនឹងភរិយា និងកូនស្រី បង្ហាញខ្លួននៅក្នុងទីបញ្ជាការក្បែរតំបន់បាញ់មីស៊ីល។

រូបថតមួយសន្លឹកទៀតបង្ហាញថា កូនស្រីរបស់លោក គីម ជុងអុន ពាក់អាវក្រៅពណ៌ស កាន់ដៃឪពុកដើរនៅលើទីលានបាញ់មីស៊ីល ហើយនៅខាងក្រោយគឺជាមីស៊ីល Hwasong-17 ដែលស្ថិតក្នុងស្ថានភាពត្រៀមខ្លួនរួចរាល់សម្រាប់ការបាញ់។ កូរ៉េខាងជើង មិនទាន់បង្ហើបឱ្យដឹងអំពីឈ្មោះរបស់កូនស្រីលោក គីម ជុងអុន នេះនៅឡើយ។

សារព័ត៌មាន Reuters អះអាងថា នេះគឺជាលើកដំបូងហើយដែលលោក គីម ជុងអុន នឹងកូនស្រី ទៅកាន់ទីតាំងបាញ់សាកល្បងមីស៊ីលរបស់ កូរ៉េខាងជើង។

លោក គីម ជុងអុន (រូបឆ្វេងបង្អស់) និងកូនស្រី (រូបទីពីររាប់ពីឆ្វេង) រួមនឹងភរិយា (រូបទីបី) នៅកន្លែងបញ្ជាការក្នុងរូបថតដែល KCNA ប្រកាសនៅថ្ងៃទី 19 វិច្ឆិកា 2022

ក្រុមអ្នកជំនាញរបស់លោកខាងលិច ជឿថា លោក គីម ជុងអុន មានកូន 3 នាក់ រួមមានកូនស្រី 2 នាក់ និងកូនប្រុសម្នាក់។

អតីតកីឡាករបាល់បោះអាម៉េរិក Dennis Rodman កាលពីឆ្នាំ 2013 បានឱ្យដឹងថា លោក គីម ជុងអុន មានកូនស្រីម្នាក់ឈ្មោះ Ju-ae ហើយគាត់ក៏ធ្លាប់បានបីកុមារីនេះពេលទៅលេង កូរ៉េខាងជើង។ អ្នកជំនាញ Madden យល់ថា Ju-ae ដែលមានអាយុប្រហែល 12 ទៅ 13 ឆ្នាំនេះ នឹងចូលសាកលវិទ្យាល័យ ឬចូលបម្រើកងទ័ពនៅ 4 ទៅ 5 ឆ្នាំខាងមុខ៕

November 19, 2022

Author: សឿន សំណាង