សឿន សំណាង - La Reine Media

ស្ថានីយផ្គត់ផ្គង់អគ្គិសនីដំណើរការស្វ័យប្រវត្តនៅលើឋានព្រះចន្ទ (វីដេអូ)

ក្រុមហ៊ុនធុរកិច្ចថ្មីរបស់ កាណាដា អភិវឌ្ឍស្ថានីយផលិតថាមពលដើរដោយពន្លឺព្រះអាទិត្យចល័តអាចបញ្ចូលអគ្គិសនីឱ្យបណ្ដារ៉ូបូតដែលផ្លាស់ទីចូលទៅក្នុងតំបន់ជម្រាលងងឹតនៅលើឋានព្រះចន្ទ។

តំបន់ជម្រាលងងឹតជានិច្ចនៅប៉ូលខាងត្បូងរបស់ព្រះចន្ទ ត្រូវបានអ្នកវិទ្យាសាស្ត្រយកចិត្តទុកដាក់ជាខ្លាំង ព្រោះតែវាអាចជាកន្លែងដែលលាក់អាថ៌កំបាំងស្ដីពីអតីតកាលរបស់ប្រព័ន្ធព្រះអាទិត្យ។ ប៉ុន្តែ ដោយសារតែពន្លឺព្រះអាទិត្យមិនចាំងទៅលើតំបន់ទាំងនោះ បណ្ដារ៉ូបូតដែលទៅកាន់ជម្រាលងងឹត នឹងត្រូវពឹងលើតែថាមពលតិចតួចនៅក្នុងថ្មរបស់ពួកវា។

ដើម្បីផ្ដល់ថាមពលស្ថិរភាពបន្ថែមទៀតទៅឱ្យរ៉ូបូតស្រាវជ្រាវព្រះចន្ទនាពេលអនាគត ក្រុមហ៊ុនធុរកិច្ចថ្មីរបស់ កាណាដា Stells Space គ្រោងនឹងនាំ «ស្ថានីយថាមពលដំណើរការស្វ័យប្រវត្ត» ទៅចុះលើដីរបស់ឋានព្រះចន្ទនៅឆ្នាំ 2025 ដើម្បីផ្គត់ផ្គង់អគ្គិសនីដល់តំបន់ជម្រាលគ្មានពន្លឺ អនុញ្ញាតឱ្យរ៉ូបូតបញ្ចូលថាមពលឡើងវិញ នេះបើតាម Space ចុះផ្សាយកាលពីថ្ងៃទី 21 វិច្ឆិកា 2022។

ស្ថានីយថាមពលខាងលើមានឈ្មោះថា Mobile Power Rover 1 (MPR-1)។ យន្តការនេះដំណើរការតាមរយៈការដាក់ដុំសម្រាប់ផ្ដល់ថាមពលនៅតំបន់ជម្រាលងងឹត បន្ទាប់មក MPR-1 នឹងឈរត្រដាងផ្ទាំងសូឡាក្រោមពន្លឺថ្ងៃ រួចបញ្ជូនអគ្គិសនីតាមខ្សែកាបទៅកាន់ដុំសម្រាប់បញ្ចូលថាមពល ដែលនៅទីនោះ បណ្ដារ៉ូបូតអាចទាញយកអគ្គិសនីដោយមិនបាច់ប្រើខ្សែ៕

November 23, 2022

កូរ៉េខាងត្បូង សាកល្បងខែលប្រឆាំងកាំជ្រួចប្លោងក្នុងស្រុកជាលើកដំបូង

ប្រព័ន្ធការពាររយៈចម្ងាយឆ្ងាយ L-SAM របស់ កូរ៉េខាងត្បូង ដែលមានមុខងារដូចទៅនឹង THAAD របស់ សហរដ្ឋអាម៉េរិក បានកម្ទេចគោលដៅដែលគេធ្វើត្រាប់កាំជ្រួចប្លោងដោយជោគជ័យ នៅក្នុងការសាកល្បងកាលពីពេលថ្មីៗនេះ។

កាលពីថ្ងៃទី 22 វិច្ឆិកា មន្ត្រីក្រសួងការពារជាតិកូរ៉េខាងត្បូង បានឱ្យដឹងថា ប្រទេសនេះបានសាកល្បងដោយជោគជ័យនូវប្រព័ន្ធការពាររយៈចម្ងាយឆ្ងាយ L-SAM ដែលបាញ់ស្កាត់គោលដៅនានាដែលគេធ្វើត្រាប់កាំជ្រួចប្លោងរបស់សត្រូវ។ ពេលវេលា និងទីតាំងសាកល្បងមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ នេះទំនងជាលើកដំបូងដែលប្រព័ន្ធ L-SAM បាញ់សំដៅគោលដៅជាក់លាក់។

ប្រកាសខាងលើត្រូវបានលើកឡើងនៅក្នុងគ្រាដែល កូរ៉េខាងជើង បាញ់សាកល្បងមីស៊ីលប្លោងជាបន្តបន្ទាប់ ក្នុងនោះមានករណីបាញ់មីស៊ីលម្ដង 23 គ្រាប់កាលពីថ្ងៃទី 02 វិច្ឆិកា និងការបាញ់មីស៊ីលអន្តរទ្វីប (ICBM) Hwasong-17 ដែលអាចបាញ់បានចម្ងាយ 15,000 គីឡូម៉ែត្រ កាលពីថ្ងៃទី 18 វិច្ឆិកា។

L-SAM គឺជាប្រព័ន្ធការពារដែនអាកាសក្នុងស្រុករបស់ កូរ៉េខាងត្បូង ដែលបំពាក់មីស៊ីល 2 ប្រភេទ និងត្រូវបានអភិវឌ្ឍដោយអង្គភាពអភិវឌ្ឍការពារជាតិ (ADD)។ L-SAM ត្រូវបានអភិវឌ្ឍឡើងដើម្បីវាយស្កាត់មីស៊ីលប្លោង ហើយនឹងក្លាយជាស្រទាប់ការពាររយៈចម្ងាយឆ្ងាយនៅក្នុងប្រព័ន្ធខែលការពារដែនអាកាសច្រើនស្រទាប់របស់ប្រទេសនេះ។

តាមផែនការ ADD នឹងបង្ហើយដំណើរការអភិវឌ្ឍ L-SAM នៅឆ្នាំ 2024 ដើម្បីអាចផលិតក្នុងបរិមាណច្រើនចាប់ពីឆ្នាំ 2026 និងដាក់ពង្រាយចាប់ពីឆ្នាំ 2027៕

November 23, 2022

លោកខាងលិចជិតដល់ថ្ងៃកំណត់តម្លៃពិតានសម្រាប់ប្រេងរបស់រុស្ស៊ី

ក្រសួងហិរញ្ញវត្ថុអាម៉េរិក បានឱ្យដឹងថា ទីក្រុងវ៉ាស៊ីងតោន និងសម្ព័ន្ធមិត្តគ្រោងនឹងកំណត់តម្លៃពិតានលើប្រេងរបស់ រុស្ស៊ី ចាប់ពីថ្ងៃទី 05 ធ្នូ 2022 ដើម្បីកាត់ផ្ដាច់ប្រភពហិរញ្ញវត្ថុសំខាន់របស់ ទីក្រុងមូស្គូ។

កាលពីថ្ងៃទី 22 វិច្ឆិកា មន្ត្រីជាន់ខ្ពស់មួយរូបរបស់ ក្រសួងហិរញ្ញវត្ថុអាម៉េរិក និយាយថា សហភាពអឺរ៉ុប (EU) កំពុងប្រមូលមតិរបស់សមាជិកស្ដីពីតម្លៃ ហើយលោកខាងលិចនឹងអនុវត្តជំហានបន្ទាប់ដើម្បីកំណត់តម្លៃពិតានរបស់ ប្រេងរុស្ស៊ី ក្រោយពីនីតិវិធីនានាត្រូវបានបំពេញរួចរាល់។

តម្លៃពិតាននឹងក្លាយជាមូលដ្ឋានសម្រាប់ទណ្ឌកម្មដែលមានសុពលភាពចាប់ពីថ្ងៃទី 05 ធ្នូ 2022 ដែលហាមឃាត់បណ្ដាក្រុមហ៊ុនដឹកជញ្ជូន ឬផ្គត់ផ្គង់ការធានារាប់រងដល់ប្រេងរបស់ រុស្ស៊ី ដែលលក់ក្នុងតម្លៃខ្ពស់ជាងការកំណត់។

មន្ត្រីខាងលើបន្ថែមថា មិនមានមូលហេតុណាមួយដែលឱ្យគេយល់ថា ទីក្រុងមូស្គូ នឹងសងសឹកចំពោះគោលនយោបាយថ្មីនេះ ព្រោះថា «សកម្មភាពណាមួយក្នុងបំណងដំឡើងថ្លៃនឹងជះឥទ្ធិពលដល់អតិថិជនថ្មីរបស់ពួកគេ មានដូចជា ឥណ្ឌ និង ចិន ជាដើម»។

ក្រុមមន្ត្រីរបស់លោកខាងលិចនិយាយថា តម្លៃពិតាននៅតែអនុញ្ញាតឱ្យ រុស្ស៊ី រកបានប្រាក់ចំណេញ ប៉ុន្តែ មិនអនុញ្ញាតឱ្យពួកគេមានប្រភពចំណូលធំពីការឡើងថ្លៃប្រេង។

សង្គ្រាមនៅ អ៊ុយក្រែន ដែលបានផ្ទុះឡើងកាលពីថ្ងៃទី 24 កុម្ភៈ 2022 បានធ្វើឱ្យតម្លៃថាមពលកើនឡើងខ្ពស់ខ្លាំង នាំមកនូវប្រាក់ចំណេញយ៉ាងសម្បើមដល់ រុស្ស៊ី ហើយជួយឱ្យប្រទេសនេះកាត់បន្ថយបាននូវផលប៉ះពាល់ពីទណ្ឌកម្មដែលលោកខាងលិចបានដាក់លើ ទីក្រុងមូស្គូ។ សហរដ្ឋអាម៉េរិក និងសម្ព័ន្ធមិត្ត ឱ្យដឹងថា ការកំណត់តម្លៃពិតានលើប្រេង មិនត្រឹមតែដើម្បីដកហូតប្រភពចំណូលរបស់ រុស្ស៊ី នោះទេ ប៉ុន្តែក៏ជួយកាត់បន្ថយការឡើងថ្លៃថាមពលនៅទូទាំងពិភពលោកផងដែរ៕

November 23, 2022

(World Cup 2022)-អារ៉ាប៊ីសាអូឌីត អនុញ្ញាតឱ្យពលរដ្ឋឈប់សម្រាកមួយថ្ងៃ ក្រោយក្រុមជម្រើសជាតិឈ្នះ អាហ្សង់ទីន

មហាក្សត្រ Salman ប្រកាសឱ្យប្រជាពលរដ្ឋទាំងអស់របស់ អារ៉ាប៊ីសាអូឌិត ឈប់សម្រាកពីការងារនៅថ្ងៃទី 23 វិច្ឆិកា ដើម្បីអបអរជ័យជម្នះរបស់ក្រុមបាល់ទាត់ជម្រើសជាតិប្រទេសនេះ ដែលបានយកឈ្នះលើក្រុមរបស់ អាហ្សង់ទីន នៅ World Cup 2022។

«ថ្ងៃស្អែក 23 វិច្ឆិកា នឹងជាថ្ងៃសម្រាករបស់បុគ្គលិកទាំងអស់នៅក្នុងស្ថាប័នរដ្ឋ និងក្រុមហ៊ុនឯកជន ក៏ដូចជាសិស្សសាលាគ្រប់កម្រិត» ប្រកាសរបស់មហាក្សត្រ Salman របស់ អារ៉ាប៊ីសាអូឌីត លើកឡើងដូច្នេះ។

ការសម្រេចឱ្យមានការឈប់សម្រាកពីការងារមួយថ្ងៃដែលត្រូវបានមហាក្សត្រ Salman អនុម័តនេះ ត្រូវបានធ្វើឡើងទៅតាមសំណើរបស់រាជទាយាទ Mohammed bin Salman ដើម្បីអបអរជ័យជម្នះរបស់ក្រុមបាល់ទាត់ជម្រើសជាតិអារ៉ាប៊ីសាអូឌីត ដែលបានយកឈ្នះលើក្រុមរបស់ អាហ្សង់ទីន ក្នុងការប្រកួតនៅ World Cup 2022 ។

ជ័យជម្នះ 2-1 របស់ អារ៉ាប៊ីសាអូឌីត នៅចំពោះមុខ អាហ្សង់ទីន កាលពីថ្ងៃទី 22 វិច្ឆិកា ត្រូវបានគេចាត់ទុកថាជារឿងគួរឱ្យភ្ញាក់ផ្អើលបំផុតក្នុងប្រវត្តិសាស្ត្រ World Cup។ ប្រទេសមជ្ឈិមបូព៌ាមួយនេះបានយកឈ្នះលើបេក្ខភាពលំដាប់កំពូលមួយសម្រាប់តំណែងជើងឯករបស់រដូវកាលនេះ។

Lionel Messi រកបានមួយគ្រាប់ឱ្យ អាហ្សង់ទីន នៅក្នុងការទាត់បាល់ពិន័យនៅនាទីទី 10 ប៉ុន្តែ ការស៊ុតបញ្ចូលទី 2 គ្រាប់របស់ អារ៉ាប៊ីសាអូឌីត នៅក្នុងតង់ទីពីរ បានធ្វើឱ្យក្រុមរបស់ អាម៉េរិកខាងត្បូង ត្រូវបរាជ័យយ៉ាងអាម៉ាស់៕

https://www.youtube.com/watch?v=O3ubNZjK9mQ

November 23, 2022

(World Cup 2022)-អ្នកសារព័ត៌មានអាម៉េរិក ថា ត្រូវអាជ្ញាធរកាតា ស្នើឱ្យដោះអាវពេលចូលទស្សនាការប្រកួត

អ្នកសារព័ត៌មានអាម៉េរិក Wahl បានឱ្យដឹងថា គាត់ត្រូវបានគេបង្ខំឱ្យដោះអាវដែលមានរូបឥន្ទធនូ ដែលជានិមិត្តសញ្ញាគាំទ្រសហគមន៍ភេទទីបី នៅពេលទៅទស្សនាការប្រកួតបាល់ទាត់ World Cup នៅ ប្រទេសកាតា។

Grant Wahl អ្នកសារព័ត៌មានអាម៉េរិក ដែលធ្លាប់ធ្វើការឱ្យ Sports Illustrated ហើយបច្ចុប្បន្នមានគេហទំព័រផ្ទាល់ខ្លួន បានឱ្យដឹងថា គាត់ត្រូវបានឃាត់ខ្លួនក្នុងរយៈពេលខ្លីនៅខាងក្រៅកីឡដ្ឋាននៅ កាតា ព្រោះតែពាក់អាវមានរូបឥន្ទធនូដែលគាំទ្រដល់សហគមន៍ភេទទីបី (LGBTQ)។

លោក Wahl ប្រាប់ថា កម្លាំងសន្តិសុខរបស់ World Cup មិនអនុញ្ញាតឱ្យគាត់ចូលទស្សនាការប្រកួតរវាង ក្រុមជម្រើសជាតិអាម៉េរិក និង រាជាណាចក្រ Wales នៅកីឡដ្ឋាន Ahmad Bin Ali ក្នុងតំបន់ Al Rayyan និងបានស្នើឱ្យគាត់ដោះអាវនោះចេញ។ Wahl ក៏បាននិយាយថា ទូរស័ព្ទរបស់គាត់ត្រូវគេរឹបអូសនៅពេលគាត់បង្ហោះហេតុការណ៍នេះនៅលើ Twitter។

យោងតាមលោក Wahl មេសន្តិសុខម្នាក់ ក្រោយមកក៏បានរកគាត់ និងបានសូមអភ័យទោស ហើយអនុញ្ញាតឱ្យគាត់ចូលទៅក្នុងកីឡដ្ឋាន។ លោក Wahl ក៏បានឱ្យដឹងថា បានទទួលបានការសូមអភ័យទោសពីតំណាងរបស់ FIFA ផងដែរ។

ទាក់ទិននឹងហេតុការណ៍ខាងលើ មកដល់បច្ចុប្បន្ន ភាគីខាង FIFA មិនទាន់មានប្រតិកម្មឆ្លើយតបបែបណានៅឡើយ។

កាតា ចាត់ទុកស្នេហារបស់មនុស្សភេទដូចគ្នាគឺជា «រឿងខុសច្បាប់»។ ច្បាប់របស់ កាតា ចែងថា គូស្នេហ៍មនុស្សភេទដូចគ្នាអាចត្រូវបានពិន័យជាប្រាក់ និងដាក់ពន្ធនាគារ។ រដ្ឋាភិបាលកាតា ក៏មិនទទួលស្គាល់អាពាហ៍ពិពាហ៍មនុស្សភេទដូចគ្នា ក៏ដូចជាសកម្មភាពគាំទ្រសិទ្ធិរបស់សហគមន៍ LGBTQ៕

November 22, 2022

ដាណឺម៉ាក សាងសង់កោះសិប្បនិម្មិតសម្រាប់ដាក់ទួរប៊ីនខ្យល់ខ្នាតយក្ស 600 គ្រឿងដើម្បីផលិតអគ្គិសនី

ក្រោយសាងសង់រួចរាល់នៅឆ្នាំ 2030 កោះថាមពលដែលមានទុនវិនិយោគ 34 ពាន់លានដុល្លារអាម៉េរិកនេះ អាចផ្គត់ផ្គង់អគ្គិសនីតាមតម្រូវការរបស់មនុស្ស 10 លានគ្រួសារនៅ អឺរ៉ុប។

កោះសិប្បនិម្មិតដែល ប្រទេសដាណឺម៉ាក កំពុងសាងសង់នេះ អាចដាក់ទួរប៊ីនខ្យល់ខ្នាតយក្ស កម្ពស់ 260 ម៉ែត្រចំនួន 600 គ្រឿង។ កោះនេះធំប៉ុនទីលានបាល់ទាត់ចំនួន 18 បូកចូលគ្នា និងស្ថិតនៅចម្ងាយពីឧបទ្វីប Jutland 80 គីឡូម៉ែត្រទៅទិសខាងលិច ដើម្បីប្រើប្រាស់កម្លាំងខ្យល់នៅលើសមុទ្រឱ្យបានជាអតិបរមា។

តាមផែនការរបស់ រដ្ឋាភិបាលដាណឺម៉ាក គម្រោងនេះនឹងត្រូវធ្វើឱ្យរួចរាល់នៅឆ្នាំ 2030។ កោះសិប្បនិម្មិតនេះនឹងផ្គត់ផ្គង់អគ្គិសនីបានច្រើនជាងទ្វេដង ឬ 3 ដងនៅក្នុងអនាគត ធៀបនឹងបរិមាណអគ្គិសនីដែល ដាណឺម៉ាក់ ផលិតបានពីបណ្ដាស្ថានីយនៅលើសមុទ្រនាបច្ចុប្បន្ន និងខ្ពស់ជា 1.5 ដង ធៀបនឹងបរិមាណអគ្គិសនីដែលប្រទេសនេះប្រើប្រាស់ក្នុងមួយឆ្នាំ ដែលនេះអាចផ្គត់ផ្គង់តាមតម្រូវការរបស់មនុស្ស 10 លានគ្រួសារនៅ អឺរ៉ុប។

កោះសិប្បនិម្មិតនេះក៏មានថ្មសម្រាប់ផ្ទុកថាមពលអគ្គិសនី និងរោងចក្រអេឡិចត្រូលីស (electrolysis plant) សម្រាប់ផលិតអ៊ីដ្រូបៃតងផងដែរ។

សហភាពអឺរ៉ុប ក៏កំពុងមានគម្រោងបង្កើនការផលិតអគ្គិសនីដើរដោយកម្លាំងខ្យល់នៅលើសមុទ្រពី 12 GW នាបច្ចុប្បន្ន ឱ្យឡើងដល់ 300 GW នៅឆ្នាំ 2050។ កោះថាមពលខាងលើរបស់ ដាណឺម៉ាក អាចជាជំហានដ៏ធំមួយឆ្ពោះទៅរកគោលដៅនោះ។ ឆ្នាំ 2040 អគ្គិសនីផលិតពីកម្លាំងខ្យល់លើសមុទ្រអាចផ្គត់ផ្គង់តាមតម្រូវការរបស់មនុស្ស 150 លានគ្រួសារនៅពាសពេញ ទ្វីបអឺរ៉ុប៕

November 22, 2022

ហេតុអ្វីមហាសេដ្ឋីទីមួយនៅប្រទេសវៀតណាម ចំណាយប្រាក់រាប់រយលានដុល្លារដើម្បីសង់រោងចក្រផលិតថ្មផ្ទុកថាមពលក្នុងរយៈពេលមិនដល់មួយឆ្នាំ?

ថ្មផ្ទុកថាមពលត្រូវបានគេចាត់ទុកថាជាកត្តា «ស្លាប់រស់» នៅក្នុងការអភិវឌ្ឍរថយន្តដើរដោយអគ្គិសនី ខណៈដែលស្ថានភាពខ្វះប្រភពផ្គត់ផ្គង់ត្រូវបានគេព្យាករថានឹងមានសភាពធ្ងន់ធ្ងរក្នុងរយៈពេលច្រើនឆ្នាំខាងមុខ។

មហាសេដ្ឋីវៀតណាម ហ្វាំ ញឹត វឿង សង់រោងចក្រផលិតថ្មផ្ទុកថាមពល 2 កន្លែង តម្លៃរាប់រយលានដុល្លារអាម៉េរិក

ថ្មីៗនេះ ក្រុមហ៊ុន VinES និងក្រុមហ៊ុន Gotion, Inc. បានចាប់ផ្ដើមអនុវត្តគម្រោងសង់រោងចក្រផលិតថ្មផ្ទុកថាមពលសម្រាប់រថយន្តអគ្គិសនីនៅ ប្រទេសវៀតណាម។

គម្រោងនេះមានទុនសរុប 275 លានដុល្លារអាម៉េរិក លើផ្ទៃដីទំហំ 14 ហិកតា និងអាចផលិតថ្មដែលអាចផ្ទុកអគ្គិសនីបាន 5 GWh/ឆ្នាំ ស្មើនឹងថ្មចំនួន 30 លាន cell ក្នុងមួយឆ្នាំ។ តាមផែនការ រោងចក្រនេះនឹងចាប់ផ្ដើមដំណើរការផលិតក្នុងបរិមាណច្រើនចាប់ពីត្រីមាសទី 3 ឆ្នាំ 2024 និងក្លាយជារោងចក្រផលិតថ្ម LFP ដំបូងនៅ វៀតណាម ដែលនេះក៏រួមចំណែកក្នុងការបង្កើតការងាររាប់រយកន្លែងសម្រាប់ប្រជាជនក្នុងតំបន់។

មុននោះ កាលពីខែធ្នូ 2021 VinES បានបើកការដ្ឋានសាងសង់រោងចក្រផលិត និងវេចខ្ចប់ប្រអប់ថ្មមួយនៅលើផ្ទៃដី 8 ហិកតា សម្រាប់ដំណាក់កាលដំបូង ដែលអាចផលិតប្រអប់ថ្មបាន 100,000 ក្នុងមួយឆ្នាំ ដោយចំណាយដើមទុនប្រហែល 160 លានដុល្លារអាម៉េរិក។ បច្ចុប្បន្នការងារសាងសង់រោងចក្រនេះកំពុងស្ថិតក្នុងដំណាក់កាលបង្ហើយចុងក្រោយ មុនពេលដាក់ឱ្យដំណើរការចាប់ពីខែធ្នូ 2022 ដើម្បីផ្គត់ផ្គង់ថ្ម Lithium សម្រាប់រថយន្តអគ្គិសនី VinFast។

រោងចក្រផលិតរថយន្តអគ្គិសនី VinFast របស់ Vingroup

យោងតាមមេដឹកនាំក្រុមហ៊ុន VinES ក្រុមហ៊ុនបណ្ដាក់ទុនរួមគ្នាជាមួយនឹង Gotion គឺជាផ្នែកមួយដ៏សំខាន់ក្នុងយុទ្ធសាស្ត្រ «ម្ចាស់ការ» ស្ដីពីប្រភពផ្គត់ផ្គង់ថ្មផ្ទុកអគ្គិសនីសម្រាប់រថយន្ត VinFast និងយុទ្ធសាស្ត្រក្លាយជាក្រុមហ៊ុនផ្ដល់សេវាកម្មផ្នែកថាមពលរបស់ VinES ក៏ដូចជាយុទ្ធសាស្ត្រ «មុម 3» នៃក្រុមហ៊ុន Vingroup របស់ មហាសេដ្ឋីវៀតណាម ហ្វាម ញឹត វឿង (Pham Nhat Vuong)។

ពិភពលោកកំពុងតែខ្វះថ្មផ្ទុកថាមពលសម្រាប់រថយន្តអគ្គិសនី

វិស័យឧស្សាហកម្មរថយន្តកំពុងតែមានការប្រែប្រួលយ៉ាងខ្លាំងក្លា ក្នុងគ្រាដែលរថយន្តដើរដោយប្រេងឥន្ធនៈហ្វូស៊ីល កំពុងតែត្រូវបានបង្ខំឱ្យ «ចាកចេញ» បន្តិចម្ដងៗ ហើយទុកកន្លែងសម្រាប់រថយន្តអគ្គិសនី (EV)។ យោងតាម អង្គការថាមពលអន្តរជាតិ (IEA) បរិមាណរថយន្តអគ្គិសនីដែលលក់ចេញក្នុងទីផ្សារត្រូវបានព្យាករថានឹងកើនឡើងខ្ពស់ខ្លាំងក្នុងឆ្នាំ 2022 ពោលគឺនឹងឡើងដល់ 13% នៅទូទាំងពិភពលោក។

ក្នុងការផលិតរថយន្តអគ្គិសនី គេមិនអាចមិននិយាយដល់បច្ចេកវិទ្យាស្នូលរបស់រថយន្តប្រភេទនេះ នោះគឺថ្មផ្ទុកថាមពល ព្រោះវាមានចំណែករហូតដល់ 1/3 នៅក្នុងការចំណាយសរុបសម្រាប់ការផលិតរថយន្តអគ្គិសនីមួយគ្រឿង។ ថ្មផ្ទុកអគ្គិសនីបច្ចុប្បន្ន កំពុងខ្វះក្នុងបរិមាណច្រើន ហើយគ្រោងនឹងខ្វះច្រើនបន្ថែមទៀតនៅពេលបណ្ដាក្រុមហ៊ុនផលិតរថយន្ត នាំគ្នាបោះបង់ម៉ាស៊ីនចំហេះក្នុង។

មូលហេតុទាំងឡាយខាងលើនេះហើយ បាន និងកំពុងជំរុញឱ្យ មហាសេដ្ឋីវៀតណាម ក៏ដូចជាក្រុមហ៊ុន Vingroup ផ្ដោតសំខាន់ទៅលើការផលិតថ្មផ្ទុកថាមពលសម្រាប់រថយន្តអគ្គិសនី៕

November 22, 2022

កីឡដ្ឋានទាំង 8 សម្រាប់ World Cup 2022 នៅ ប្រទេសកាតា

ដើម្បីបម្រើដល់ការប្រកួត 64 ប្រកួត ក្នុងក្របខណ្ឌ World Cup 2022 ដែលចាប់ផ្ដើមពីថ្ងៃទី 20 វិច្ឆិកាដល់ 18 ធ្នូ 2022 ប្រទេសកាតា ប្រើប្រាស់កីឡដ្ឋានចំនួន 8 ដែលក្នុងនោះកីឡដ្ឋាននីមួយៗមានរចនាបថពិសេសដាច់ដោយឡែក។

ទី 1 ៖ ក្នុងចំណោមកីឡដ្ឋានទាំង 8 ខាងលើ កីឡដ្ឋាន Lusail ក្នុងទីក្រុង Lusail ប្រទេសកាតា អាចដាក់មនុស្សបានរហូតដល់ 80,000 នាក់។ នេះគឺជាកីឡដ្ឋានធំជាងគេបង្អស់ក្នុងរដូវកាល World Cup 2022 ជាទីដែលនឹងមានការប្រកួតផ្ដាច់ព្រ័ត្រ។

កីឡដ្ឋាន Lusail ដែលត្រូវបានរចនាឡើងដោយក្រុមហ៊ុន Foster + Partners និងក្រុមហ៊ុន Populous នេះ គឺយកលំនាំតាមពន្លឺ និងស្រមោលរបស់គោម។ ផ្នែកខាងមុខរបស់កីឡដ្ឋានរួមមានបន្ទះក្ដោបរាងត្រីកោណ និងគ្រោងដែកថែប រួមនឹងរូបភាពលំអដែលត្រាប់តាមរចនាបថនៃរូបភាពនៅលើចានក្នុងតំបន់។

កៅអីរបស់កីឡដ្ឋាន Lusail ត្រូវបានបែងចែកជា 3 ថ្នាក់។ ដំបូលដែលធ្វើអំពី PTFE អនុញ្ញាតឱ្យពន្លឺចាំងចំស្មៅដើម្បីឱ្យវាលូតលាស់បានល្អ ទន្ទឹមនឹងនេះ ក៏អាចរារាំងខ្យល់ក្ដៅ និងធូលីពីខាងក្រៅ និងផ្ដល់ម្លប់ ជួយកាត់បន្ថយសម្ពាធដែលប្រព័ន្ធម៉ាស៊ីនត្រជាក់ត្រូវរាប់រង។

ក្រោយរដូវកាល World Cup 2022 កីឡាដ្ឋាន Lusail នឹងត្រូវបានប្ដូរទៅជាមជ្ឈមណ្ឌលមួយដែលមានអគារស្នាក់នៅតម្លៃទាប ហាងទំនិញ ភោជនីយដ្ឋាន បន្ទប់ពិគ្រោះជំងឺ និងសាលារៀន។

ទី 2 ៖ World Cup 2022 ត្រូវបានសម្ពោធបើកការប្រកួតកាលពីថ្ងៃទី 20 វិច្ឆិកានៅកីឡដ្ឋាន Al Bayt។ កីឡដ្ឋានដែលត្រូវបានសម្ពោធដាក់ឱ្យដំណើរការកាលពីឆ្នាំ 2021 នេះ គឺជាស្ថាបត្យកម្មដែលរចនាដោយក្រុមហ៊ុន Dar Al-Handasah។ នេះគឺជាកន្លែងមួយក្នុងចំណោមកីឡដ្ឋានសម្រាប់ការប្រកួតវគ្គពាក់កណ្ដាលផ្ដាច់ព្រ័ត្រ។ ក្រោយការប្រកួត World Cup កីឡដ្ឋានដែលដាក់មនុស្សបាន 60,000 នាក់នេះ នឹងត្រូវបានបន្ថយមកនៅត្រឹម 40,000 កៅអី។

ទី 3 ៖ កីឡដ្ឋាន Ahmad Bin Ali នៅ Umm Al Afaei ផ្ទុកមនុស្សបាន 40,000 នាក់។ ក្រោយ World Cup កៅអីចំនួន 20,000 របស់កីឡដ្ឋាននេះនឹងត្រូវបានរើចេញ និងប្រើប្រាស់សម្រាប់ព្រឹត្តិការណ៍កីឡាដទៃទៀត។ កីឡដ្ឋាន Ahmad Bin Ali នឹងក្លាយជាកន្លែងស្នាក់នៅរបស់កីឡាករក្នុងប្រទេស។ កីឡដ្ឋាននេះត្រូវបានរចនាដោយក្រុមហ៊ុន Ramboll and Pattern Design។

ទី 4 ៖ កីឡដ្ឋាន Al Janoub នៅ Al Wakrah អាចដាក់មនុស្សបាន 40,000 នាក់។ កីឡដ្ឋាននេះនឹងត្រូវក្រុមបាល់ទាត់ក្នុងស្រុកប្រើប្រាស់ និងកាត់បន្ថយកន្លែងអង្គុយមកនៅត្រឹម 20,000 កន្លែង ក្រោយពី World Cup 2022 បានបញ្ចប់។ AECOM និង Zaha Hadid Architects គឺជាក្រុមដែលបានរចនាកីឡដ្ឋាននេះ។

ទី 5 ៖ កីឡដ្ឋាន Al Thumama នៅ Al Thumama អាចដាក់មនុស្សបាន 40,000 នាក់។ កីឡដ្ឋានដែលត្រូវបានសម្ពោធដាក់ឱ្យប្រើប្រាស់កាលពីឆ្នាំ 2021 នេះ ត្រូវបានរចនាឡើងដោយស្ថាបត្យករ Ibrahim M. Jaidah។ ក្រោយ World Cup 2022 កៅអី 20,000 នឹងត្រូវយកចេញ ខណៈដែលសណ្ឋាគារលំដាប់ខ្ពស់មួយនឹងត្រូវបានបង្កើតឡើងនៅជាន់ខាងលើ។

ទី 6 ៖ កីឡដ្ឋាន Education City នៅតំបន់ Al Rayyan អាចដាក់មនុស្សបាន 40,000 នាក់។ កីឡដ្ឋានដែលត្រូវបានរចនាឡើងដោយក្រុមហ៊ុន Fenwick-Iribarren Architects និង Pattern Desing នេះ ត្រូវបានបើកដំណើរការកាលពីឆ្នាំ 2020។ ក្រោយ World Cup កៅអី 20,000 នឹងត្រូវបានរើចេញ ហើយ Education City នឹងក្លាយជាកីឡដ្ឋានសម្រាប់សាធារណៈ ខណៈជាន់លើគេនឹងក្លាយជាសាលាសម្រាប់សាកលវិទ្យាល័យនៅក្បែរនោះ។

ទី 7 ៖ កីឡដ្ឋានអន្តរជាតិ Khalifa នៅ Aspire អាចដាក់មនុស្សបាន 40,000 នាក់។ នេះគឺជាកីឡដ្ឋានតែមួយគត់ដែលត្រូវបានកែលំអ មិនមែនជាការសាងសង់ថ្មី។ កីឡដ្ឋាននេះសាងសង់កាលពីឆ្នាំ 1976 និងជួសជុល កែលំអឡើងវិញកាលពីឆ្នាំ 2017 ដោយក្រុមហ៊ុន Dar Al-Handasah។

ទី 8 ៖ កីឡដ្ឋាន 974 នៅ Ras Abu Aboud អាចដាក់មនុស្សបាន 40,000 នាក់ និងត្រូវបានសាងសង់ទាំងស្រុងពីកុងតឺន័រចំនួន 974 រួមនឹងដែកថែបប្រភេទម៉័រឌុល។ នេះគឺជាកីឡដ្ឋាន World Cup ដំបូងគេលើពិភពលោកដែលអាចដំឡើង និងដោះចេញបានក្រោយពីការប្រកួត។ កីឡដ្ឋានដែលរចនាឡើងដោយក្រុមហ៊ុន Fenwick-Iribarren Architects នេះ ត្រូវបានសម្ពោធកាលពីឆ្នាំ 2021។

November 22, 2022

ក្រសួងសុខាភិបាលកម្ពុជា រកឃើញករណីឆ្លងកូវីដ-19 ចំនួន 03 នាក់នៅក្នុង 24 ម៉ោងកន្លង

កម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 0 នាក់ ក្នុងអំឡុង 24 ម៉ោង នៃថ្ងៃទី 21 ខែវិច្ឆិកា ឆ្នាំ 2022។

ក្នុងអំឡុងពេលដដែល មានករណីជាសះស្បើយ ចំនួន 04 នាក់ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី 22 ខែវិច្ឆិកា ឆ្នាំ 2022 កម្ពុជា មានអ្នកឆ្លងកូវីដ-១៩ សរុប ៖ 138,035 នាក់, អ្នកជាសះស្បើយសរុប ៖ 134,947 នាក់ និងអ្នកស្លាប់សរុប ៖ 3,056 នាក់។

November 22, 2022

គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ 5 ប្រឈមនឹងការពន្យារពេលសាងសង់

គណៈកម្មការវិវេចនាលទ្ធកម្ម (PRC) នៃ ក្រសួងសាធារណការ និងដឹកជញ្ជូន បានបើកកិច្ចប្រជុំមួយកាលពីម្សិលមិញ ដើម្បីពិភាក្សាលើការពន្យារពេលនៃការសាងសង់របស់គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ 5។

ឯកឧត្តម សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន ទទួល បន្ទុកជាប្រធានគណៈកម្មការវិវេចនាលទ្ធកម្ម (PRC) កាលពីថ្ងៃទី 21 វិច្ឆិកា 2022 បានដឹកនាំកិច្ចប្រជុំស្តីពីគម្រោងរៀបចំច្រកទ្វាអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ 5 នៅទីស្ដីការក្រសួង ដោយមានការចូលរួមពីថ្នាក់ដឹកនាំក្រសួង និងតំណាងភាគីពាក់ព័ន្ធ។

យោងតាម ក្រសួងសាធារណការ និងដឹកជញ្ជូន កិច្ចប្រជុំនេះធ្វើឡើងដើម្បីពិភាក្សាលើការងារពន្យារពេលសាងសង់ បម្រែបម្រួល ការងារក្នុងកិច្ចសន្យា ការពន្យាពេលកិច្ចសន្យា និងការបន្ថែមប្រាក់ឈ្នួលសម្រាប់សេវាត្រួតពិនិត្យបច្ចេក ទេសគម្រោង ព្រមទាំងការស្នើសុំពិនិត្យលើបម្រែបម្រួលតម្លៃសម្ភារៈសំណង់ និងអត្រាប្តូរប្រាក់របស់ ក្រុមហ៊ុនសាងសង់។

គិតមកដល់បច្ចុប្បន្ន គម្រោងសាងសង់ស្ថានីយច្រកទ្វារព្រំដែនស្ទឹងបត់ និងផ្លូវតភ្ជាប់ទៅផ្លូវជាតិលេខ 5 សម្រេចវឌ្ឍនភាពការងារបាន 72% ក្នុងនោះរួមមាន ៖ អគារច្រកទ្វារអន្តរជាតិ និងផ្លូវតភ្ជាប់ទៅផ្លូវជាតិលេខ 5, អគារអន្តេវាសិកដ្ឋាន, ចំណតផ្ទេរផ្ទុកទំនិញ, ឃ្លាំង និង ទីលានកុងតឺន័រ៕

November 22, 2022

Author: សឿន សំណាង