សឿន សំណាង - La Reine Media

កូនក្រមុំ និងកូនកំលោះពាក់អាវ Messi និង Mbappe ក្នុងពិធីរៀបការ

(ឥណ្ឌា)- កូនកំលោះ កូនក្រមុំមួយគូដែលស្រលាញ់បាល់ទាត់ នាំគ្នាពាក់អាវ Messi និង Mbappe នៅក្នុងពិធីរៀបមង្គលការ មុនពេលទៅទស្សនាការប្រកួតវគ្គផ្ដាច់ព្រ័ត្ររវាង អាហ្សង់ទីន និង បារាំង នៅ World Cup 2022 កាលពីថ្ងៃទី 18 ធ្នូ។

Sachin R និង R Athira ជាមនុស្សចុះសម្រុងនឹងគ្នាគ្រប់បញ្ហាក្នុងជីវភាព ប៉ុន្តែ Sachin គាំទ្រតារាបាល់ទាត់អាហ្សង់ទីន Lionel Messi ចំណែក Athira វិញ គឺជាអ្នកគាំទ្រក្រុមរបស់ បារាំង ដែលមានខ្សែប្រយុទ្ធ Kylian Mbappé Lottin។

នៅថ្ងៃរៀបការ Sachin ពាក់អាវរបស់ក្រុមជម្រើសជាតិអាហ្សង់ទីនដែលមានឈ្មោះ Messi ពេលដែល Athira ពាក់អាវក្រុមជម្រើសជាតិបារាំងដែលមានឈ្មោះ Mbappe។ ពួកគេពាក់អាវកីឡាពីក្រៅឈុតប្រពៃណីរបស់ជនជាតិឥណ្ឌា។

ក្រោយពិធីរៀបការ និងជប់លៀង គូស្នេហ៍ថ្មីនេះក៏ប្រញាប់ធ្វើដំណើរទៅផ្ទះរបស់ Sachin នៅទីក្រុងរដ្ឋបាលរបស់រដ្ឋ Kerala ចម្ងាយជាង 200 គីឡូម៉ែត្រ ដើម្បីទស្សនាការប្រកួតរវាង បារាំង និង អាហ្សង់ទីន ក្នុងវគ្គផ្ដាច់ព្រ័ត្រ។

ជនជាតិឥណ្ឌា ចូលចិត្តកីឡា cricket ប៉ុន្តែនៅភាគខាងត្បូងរដ្ឋ Kerala បាល់ទាត់ទើបជាកីឡាដែលមានការពេញនិយមជាងគេ។ អ្នកគាំទ្រ Messi នៅក្នុងរដ្ឋនេះក៏មានច្រើនផងដែរ។

នៅពាសពេញរដ្ឋខាងលើ ទង់បាល់ទាត់ និងអេក្រង់ទូរទស្សន៍ធំៗ ត្រូវបានដំឡើងដើម្បីឱ្យគ្រប់គ្នាអាចតាមដាន ជប់លៀង នៅពេល Messi និងក្រុមជម្រើសជាតិ ចូលប្រកួតវគ្គផ្ដាច់ព្រ័ត្រនៅ World Cup 2022។ មនុស្សរាប់ម៉ឺននាក់ប្រមូលផ្ដុំគ្នានៅតាមទីតាំងនានាដើម្បីតាមដានការប្រកួត ហើយក្រោយមកក៏នាំគ្នាចេញដើរតាមដងផ្លូវដើម្បីអបអរសាទរ៕

December 21, 2022

Lionel Messi គេងជាមួយពានមាស World Cup 2022

(អាហ្សង់ទីន)- ក្រោយពីត្រលប់ទៅ អាហ្សង់ទីន ខ្សែប្រយុទ្ធ Lionel Messi បានបង្ហោះរូបថតគាត់គេងជាមួយពាន់មាស World Cup 2022 ដែលក្រុមជម្រើសជាតិអាហ្សង់ទីន ទើបតែដណ្ដើមបាននៅ កាតា។

ម៉ោងប្រហែល 8 ព្រឹក ថ្ងៃទី 20 ធ្នូ (ម៉ោងនៅ អាហ្សង់ទីន) Messi បានបង្ហោះរូបថតចំនួន 3 សន្លឹកនៅលើទំព័របណ្ដាញសង្គមដែលបង្ហាញថា គាត់កំពុងគេងជាមួយពានមាស World Cup 2022។ «ថ្ងៃថ្មីល្អប្រសើរ» គាត់សរសេរដូច្នេះ។

ប្រហែល 4 ម៉ោងក្រោយមក សាររបស់ Messi នៅលើបណ្ដាញសង្គម ទទួលបានការចុចចូលចិត្តជិត 30 លានលើក។

Messi និងក្រុមជម្រើសជាតិអាហ្សង់ទីន បានទៅដល់ព្រលានយន្តហោះ Ezeiza ម៉ោងប្រហែល 2 និង 23 នាទីទាបភ្លឺថ្ងៃដដែល។ ប្រធានក្រុមរបស់ អាហ្សង់ទីន គឺជាអ្នកកាន់ពានជាញឹកញាប់។ ពួកគេទៅកាន់ទីស្នាក់ការកណ្តាលរបស់សហព័ន្ធបាល់ទាត់អាហ្សង់ទីន តាមរយៈរថយន្តក្រុងគ្មានដំបូល ក្រោមការអបអរសាទរពីមនុស្សរាប់សែននាក់។

នៅទីស្នាក់ការកណ្តាលរបស់សហព័ន្ធបាល់ទាត់អាហ្សង់ទីន គ្រូបង្វឹក Lionel Scaloni និងកូនសិស្សរបស់គាត់ ត្រូវបានទទួលស្វាគមន៍ដោយការបាញ់កាំជ្រួច។ Messi និងក្រុមជម្រើសជាតិសម្រាកនៅទីនេះ មុនពេលចូលរួមហែក្បួនអបអរសាទរ។

December 21, 2022

ក្រុមជម្រើសជាតិអាហ្សង់ទីន ត្រូវបង្ខំចិត្តឡើងឧទ្ធម្ភាគចក្រហែក្បួនអបអរសាទរជ័យជម្នះនៅ World Cup

Messi និងក្រុមជម្រើសជាតិអាហ្សង់ទីន ត្រូវបោះបង់ការហែក្បួនដោយរថយន្តក្រុងគ្មានដំបូល និងឡើងឧទ្ធម្ភាគចក្រហោះពីលើរដ្ឋធានី ដោយសារមនុស្សរាប់លាននាក់ចេញដើរតាមដងផ្លូវចូលរួមអបអរសាទរជើងឯក World Cup 2022។

ការហែក្បួនដោយរថយន្តក្រុងគ្មានដំបូលនៅលើផ្លូវក្នុង រដ្ឋធានីប៊ុយណូស៊ែ ធ្វើឡើងក្នុងថ្ងៃទី 20 ធ្នូ ដើម្បីឱ្យប្រជាជនអាចចូលរួមសប្បាយនឹងតំណែងជើងឯក World Cup 2022 ដែលក្រុមបាល់ទាត់ជម្រើសជាតិអាហ្សង់ទីន ដណ្ដើមបាន។ យោងតាមការគណនា មនុស្សប្រហែល 4 លាននាក់បានចូលរួមហែក្បួននេះ ធ្វើឱ្យដងផ្លូវត្រូវណែនណាន់តាន់តាប់។

រថយន្តក្រុងត្រូវបរយឺតៗនៅកណ្ដាលហ្វូងមនុស្សរាប់លាននាក់ នៅពេលឆ្ពោះទៅកាន់ Obelisk ព្រោះតែដងផ្លូវចង្អៀតខ្លាំង។ មនុស្សមួយចំនួនថែមទាំងព្យាយាមលោតឡើងរថយន្តក្រុងរបស់ក្រុមបាល់ទាត់។

ក្បួនហែដែលអូសបន្លាយពេល 8 ទៅតាមផែនការ ត្រូវបានកាត់បន្ថយពេលវេលា ដោយសារការបារម្ភអំពីសន្តិសុខ ហើយក្រុមកីឡាករត្រូវចាកចេញពីរថយន្តក្រុង ដើម្បីឡើងឧទ្ធម្ភាគចក្រ។ ឧទ្ធម្ភាគចក្រនេះ ក្រោយមកក៏ហោះក្រឡឹងវិមាន Obelisk ពីលើហ្វូងមនុស្ស។

ក្រុមជម្រើសជាតិអាហ្សង់ទីន បានត្រលប់ទៅដល់ព្រលានយន្តហោះ Ezeiza នៅ រដ្ឋធានីប៊ុយណូស៊ែ វេលាម៉ោងប្រហែល 3 ថ្ងៃទី 20 ធ្នូ ពេលមនុស្សរាប់ពាន់នាក់បានរង់ចាំអបអរសាទរ។

នៅវេលាថ្ងៃត្រង់ មនុស្សរាប់លាននាក់បានប្រមូលផ្ដុំគ្នានៅកណ្ដាលរដ្ឋធានី។ មនុស្សម្នាលើករូបថតរបស់ Messi និងអតីតកំពូលតារាបាល់ទាត់ Diego Maradona ទន្ទឹមនឹងការលេងតន្ត្រី ស្រែកហ៊ោ និងសកម្មភាពផ្សេង។

ដងផ្លូវក៏ចាប់ផ្ដើមទូលាយបន្តិច ក្រោយពីក្រុមបាល់ទាត់ឡើងឧទ្ធម្ភាគចក្រ។ មនុស្សមួយចំនួនសោកស្ដាយ ព្រោះតែមិនបានជួបក្រុមជម្រើសជាតិនេះ។

ដើម្បីចូលរួមអបអរសាទរជ័យជម្នះនៅ World Cup 2022 រដ្ឋាភិបាលអាហ្សង់ទីន កាលពីថ្ងៃទី 20 ធ្នូ បានអនុញ្ញាតឱ្យប្រជាជនឈប់សម្រាកពីការងារមួយថ្ងៃ លើកលែងតែវិស័យចាំបាច់មួយចំនួន៕

December 21, 2022

ក្មេងស្រីអាយុ 5 ឆ្នាំ ធ្លាក់ចូលកូនរណ្ដៅជម្រៅ 10 ម៉ែត្រ នៅវៀតណាម

ក្នុងពេលលេងសប្បាយនៅក្នុងការដ្ឋានសំណង់ ក្មេងស្រីអាយុ 5 ឆ្នាំម្នាក់បានធ្លាក់ចូលទៅក្នុងរណ្ដៅតូចមួយ និងជាប់ក្នុងរយៈពេលរាប់សិបនាទីមុនពេលអាចទាញឡើងបាន។

គ្រោះថ្នាក់នេះកើតឡើងនៅពេលក្មេងស្រីរងគ្រោះដែលមានផ្ទះនៅក្បែរការដ្ឋានសំណង់ កំពុងរត់លេងជាមួយមិត្តភក្ដិក្នុងតំបន់ក្បែរគម្រោងបុរីមួយកន្លែងនៅភាគខាងត្បូងប្រទេសវៀតណាម កាលពីថ្ងៃទី 19 ធ្នូ។ ពេលកំពុងរត់លេង ក្មេងស្រីម្នាក់នេះក៏រអិលជើងធ្លាក់ចូលទៅក្នុងរណ្ដៅជ្រៅដែលធ្វើដើម្បីចាក់សសរបេតុង។

ពេលឮសំឡេងស្រែកឱ្យជួយ សន្តិសុខ និងកម្មករក៏រត់មកមើល ប៉ុន្តែមិនបានជួយបាន ដោយសារតែរណ្ដៅមានអង្កត់ផ្ចិតត្រឹមតែ 30 សម។ ក្មេងស្រីនេះស្រែកយំជាមិនឈប់ដោយភាពភ័យខ្លាច និងរន្ធត់។

ក្រុមពន្លត់អគ្គិភ័យ និងសង្គ្រោះ ក្នុងតំបន់ចំនួន 14 នាក់ រួមនឹងឧបករណ៍ជួយសង្គ្រោះ មិនយូរប៉ុន្មានក៏បានមកដល់កន្លែងកើតហេតុ។ មាត់រណ្ដៅតូចពេក បុគ្គលិកសង្គ្រោះមិនអាចចុះទៅជួយបាន។ ការពង្រីករណ្ដៅក៏ត្រូវចំណាយពេលច្រើន ហើយដីក៏អាចធ្លាក់កប់ជនរងគ្រោះ ដូច្នេះត្រូវរកវិធីផ្សេង។

បុគ្គលិកសង្គ្រោះបានប្រើវិធីចិត្តសាស្ត្រដើម្បីរម្ងាប់អារម្មណ៍ភ័យខ្លាច រួចទម្លាក់ខ្សែ និងឧបករណ៍សង្គ្រោះចូលក្នុងរណ្ដៅ និងណែនាំក្មេងស្រីនេះតាមលំដាប់លំដោយដើម្បីទាញឡើង។ ប្រហែល 20 នាទីក្រោយមក ក្មេងស្រីរងគ្រោះក៏ត្រូវបានទាញឡើងមកលើដោយសុវត្ថិភាព និងបញ្ចូលទៅកាន់មន្ទីរពេទ្យ។ បច្ចុប្បន្ន សុខភាពរបស់ក្មេងស្រីនេះបានល្អប្រសើរវិញហើយ។

យោងតាមសារព័ត៌មាន VNexpress កាលពីឆ្នាំ 2015 ហេតុការណ៍ប្រហាក់ប្រហែលនេះក៏បានកើតឡើងនៅវៀតណាម។ ក្នុងពេលរត់លេង ក្មេងស្រីអាយុ 7 ឆ្នាំម្នាក់បានធ្លាក់ចូលអណ្ដូងជម្រៅ 13 ម៉ែត្រ។ ក្រោយការប្រឹងប្រែងអស់រយៈពេល 10 ម៉ោង ក្នុងការជីកអណ្ដូងមួយទៀតនៅក្បែរនោះ អាជ្ញាធរក៏សង្គ្រោះបានជោគជ័យ៕

December 20, 2022

ស្ត្រីម្នាក់ដែល Messi ឱបដោយសុភមង្គលដំបូងគេក្រោយវគ្គផ្ដាច់ព្រ័ត្រ World Cup 2022 ជាអ្នកណា?

(កាតា)- ទិដ្ឋភាព Lionel Messi ឱបស្ត្រីម្នាក់នៅលើទីលានប្រកួត បន្ទាប់ពីបញ្ចប់វគ្គផ្ដាច់ព្រ័ត្ររបស់ World Cup 2022 កំពុងតែធ្វើឱ្យមានភាពរំជើបរំជួលដល់ពិភពលោក។

វីដេអូដែលត្រូវបានចែករំលែកតគ្នាលើបណ្ដាញសង្គមបង្ហាញថា កាលពីថ្ងៃទី 18 ធ្នូ នៅពេលចប់ការប្រកួតទាត់បាល់ប៉េណាំងទី ដែល អាហ្សង់ទីន ដណ្ដើមបានពានរង្វាន់ជើងឯក Messi និងក្រុមជម្រើសជាតិអាហ្សង់ទីន ក៏បានអបអរជ័យជម្នះនៅលើទីលានប្រកួត។ ពេលនោះស្រាប់តែមានស្ត្រីម្នាក់រត់មកទាញដៃកំពូលកីឡាករនេះ។ Messi ក៏ងាកក្រោយ និងស្រវាឱបភ្លាមក្នុងភាពសប្បាយរីករាយ។ ចំណែកស្ត្រីម្នាក់នេះក៏យំនៅពេលបានឮ Messi ខ្សឹបប្រាប់រឿងអ្វីមួយ។

ស្ត្រីវ័យ 42 ឆ្នាំនេះមានឈ្មោះថា Antonia Farias ជាមេចុងភៅរបស់ក្រុមជម្រើសជាតិអាហ្សង់ទីន ដែលត្រូវបាន Messi និងមិត្តរួមក្រុមរបស់គាត់ហៅថា «បងស្រី»។

នេះមិនមែនជាលើកដំបូងទេដែល Antonia Farias ចូលរួមអបអរសាទរជ័យជម្នះរបស់ក្រុមអាហ្សង់ទីន ក្រោយដណ្ដើមបានជោគជ័យ។ ឆ្នាំ 2021 មេចុងភៅរូបនេះក៏បានធ្វើដំណើរជាមួយក្រុមជម្រើសជាតិអាហ្សង់ទីន ចូលរួមប្រកួតក្នុងវគ្គផ្ដាច់ព្រ័ត្រ Copa America នៅ ប្រេស៊ីល និងយកឈ្នះលើក្រុមម្ចាស់ផ្ទះ 1-0។ ពាក់កណ្ដាលឆ្នាំនេះ គាត់ក៏មានវត្តមាននៅពេលក្រុមអាហ្សង់ទីន ផ្ដួល អ៊ីតាលី នៅ Conmebol-UEFA Champions Cup 2022 ផងដែរ។

Antonia Farias ចូលរួមជាមួយបម្រើក្រុមបាល់ទាត់អាហ្សង់ទីន ចាប់ពីឆ្នាំ 2010។ ក្នុងរាល់ការប្រកួត Antonia Farias មានតួនាទីស្រាវជ្រាវ ពិភាក្សាជាមួយអ្នកជំនាញផ្នែកសុខភាពដើម្បីត្រៀមមុខអាហារដែលសមស្រប សុវត្ថិភាព និងមានជីវជាតិគ្រប់គ្រាន់សម្រាប់កីឡាករ។

ដោយសារតែកិច្ចការម៉ត់ចត់ និងមនោសញ្ចេតនារបស់ Antonia Farias ទើបធ្វើឱ្យសមាជិករបស់ក្រុមជម្រើសជាតិអាហ្សង់ទីន ក្នុងនោះមាន Messi ជាដើម ចាត់ទុកស្ត្រីមេចុងភៅរូបនេះដូចទៅនឹងសាច់ញាតិ៕

December 20, 2022

ជនគ្មានផ្ទះសំបែងម្នាក់យំខ្សឹកខ្សួលនៅពេលទទួលបានអាវ Messi

បរុសគ្មានផ្ទះសំបែងម្នាក់នៅ រដ្ឋធានីរបស់ អាហ្សង់ទីន យំខ្សឹកខ្សួល នៅពេលកំលោះមួយក្រុមជូនអាវ Messi ដើម្បីចូលរួមអបអរក្រុមបាល់ទាត់ជម្រើសជាតិដែលដណ្ដើមបានពានរង្វាន់ជើងឯក World Cup 2022។

វីដេអូដែលត្រូវបានចែករំលែកលើបណ្ដាញសង្គមកាលពីថ្ងៃទី 19 ធ្នូ បង្ហាញថា កំលោះម្នាក់ពាក់អាវលេខ 10 របស់ខ្សែប្រយុទ្ធ Lionel Messi ឱបបុរសគ្មានផ្ទះសំបែងម្នាក់នៅលើដងផ្លូវក្នុង រដ្ឋធានីប៊ុយណូស៊ែ។ ក្រោយមក មានកំលោះម្នាក់ទៀតចូលមកក្បែរ ដោះអាវកីឡាលេខ 10 ដែលកំពុងពាក់ ជូនទៅបុរសនោះ និងឱបដោយក្ដីអាណិតអាសូរ។

បុរសគ្មានផ្ទះសំបែងនោះឱនក្បាលសម្ដែងការអរគុណ ហើយក៏កាន់ថើបអាវ យំ និងចាប់ផ្ដើមពាក់អាវថ្មីនោះ។ គាត់លុតជង្គង់លើផ្លូវបណ្ដើរ យំបណ្ដើរ និងសំពះ ធ្វើកាយវិការជាឈើឆ្កាង បង្ហាញការបួងសួងជូនពរ។ កំលោះម្នាក់ផ្សេងទៀតក៏បានចូលមកឱបបុរសនោះ ខណៈដែលមនុស្សនៅជុំវិញស្រែកហ៊ោអបអរសាទរ។

វីដេអូនេះបានធ្វើឱ្យអ្នកលេងបណ្ដាញសង្គមមានការរំភើប រំជួលចិត្ត។ អ្នកខ្លះថា ប្រហែលជាយូរមកហើយដែលគាត់មានអារម្មណ៍ថា មិនអាចចូលរួមបរិយាកាសសប្បាយរីករាយក្នុងសង្គមនឹងគេ។

«ជួយឱ្យគាត់បានចូលរួមក្នុងព្រឹត្តិការណ៍អបអរសាទរផង មិនដូច្នេះទេ គាត់នឹងក្លាយជាមនុស្សនៅក្រៅព្រឹត្តិការណ៍នៅលើទឹកដីរបស់ខ្លួន» អ្នកលេងបណ្ដាញសង្គមម្នាក់សរសេរដូច្នេះ។

https://www.youtube.com/watch?v=2DLfy7Y28VM

អាហ្សង់ទីន ដណ្ដើមបានតំណែងជើងឯក World Cup 2022 ក្នុងគ្រាប្រទេសនេះប្រឈមនឹងស្ថានភាពសេដ្ឋកិច្ចលំបាក។ អង្គការមនុស្សធម៌ Habitat for Humanity គណនាឃើញថា ប្រជាជនអាហ្សង់ទីន ជាង 40% កំពុងរស់នៅក្នុងភាពក្រីក្រ។ រូបភាពអ្នកគ្មានផ្ទះសំបែង ឬអ្នកដើរលក់ទំនិញតាមដងផ្លូវគឺជារូបភាពដែលគេមើលឃើញរាល់ថ្ងៃនៅក្នុង រដ្ឋធានីប៊ុយណូស៊ែរ និងបណ្ដាទីក្រុងដទៃទៀតរបស់ អាហ្សង់ទីន៕

December 20, 2022

ក្រុមហ៊ុនមួយគ្រោងបង្កើតរោងចក្រផលិតកេសកាតុងនៅខេត្តកណ្ដាល

សំណើសុំវិនិយោគបង្កើតរោងចក្រផលិតកេសកាតុងរបស់ក្រុមហ៊ុន DAY SEN PACKAGE ទទួលបានការអនុម័តរួចហើយ នេះបើតាម ក្រុមប្រឹក្សាអភិវឌ្ឍន៍កម្ពុជា ចុះផ្សាយនៅថ្ងៃទី 20 ធ្នូ 2022។

គម្រោងវិនិយោគដែលទើបទទួលបានការអនុម័តពី គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នេះ មានទីតាំងនៅ ផ្លូវជាតិលេខ 51 ភូមិស្រែអំព្រុំ ឃុំសំរោងលើ ស្រុកអង្គស្នួល ខេត្តកណ្តាល។

យោងតាម ក្រុមប្រឹក្សាអភិវឌ្ឍកម្ពុជា ក្រុមហ៊ុន DAY SEN PACKAGE គ្រោងបណ្ដាក់ទុន ប្រមាណ 5.4 លានដុល្លារអាម៉េរិក និងអាចបង្កើតការងារបានចំនួនជិត 800 កន្លែង។

December 20, 2022

ពិភពលោកសម្រេចបាន «កិច្ចព្រមព្រៀងសន្តិភាពជាមួយធម្មជាតិ»

បណ្ដាប្រទេសបានយល់ព្រមចុះហត្ថលេខាលើ «កិច្ចព្រមព្រៀងសន្តិភាពជាមួយធម្មជាតិ» ដើម្បីប្រែត្រលប់ការបំផ្លិចបំផ្លាញចំពោះបរិស្ថាន និងប្រព័ន្ធជីវសាស្ត្រទូទាំងសកលលោកដែលបានកើតឡើងរាប់ទសវត្សរ៍កន្លង។

ក្រៅការចរចាប្រកបដោយភាពតានតឹង 4 ឆ្នាំ ប្រទេសជាង 190 បានជួបភិភាក្សាគ្នានៅក្នុងសន្និសីទកំពូលស្ដីពីជីវចម្រុះ COP15 របស់ អង្គការសហប្រជាជាតិ ដែលចិនធ្វើជាអ្នកសម្របសម្រួល និងត្រូវបានធ្វើឡើងនៅ ប្រទេសកាណាដា ដើម្បីសង្គ្រោះតំបន់ដីគោក មហាសមុទ្រ និងជីវិតនៅលើផែនដីពីការបំពុលបរិស្ថាន ឱនភាព និងវិបត្តិអាកាសធាតុ។

ក្នុងកិច្ចប្រជុំកំពូលកាលពីព្រឹកថ្ងៃទី 19 ធ្នូ 2022 រដ្ឋមន្ត្រីក្រសួងបរិស្ថាន និងអេកូឡូស៊ីចិន Huang Runqiu ប្រធាន COP15 ប្រកាសថា «សន្ធិសញ្ញាសន្តិភាពជាមួយធម្មជាតិ» ត្រូវបានអនុម័ត បើទោះមានការជំទាស់ពី សាធារណរដ្ឋកុងហ្កោ ជាប្រទេសដែលស្នើឱ្យមានការផ្ដល់ជំនួយបន្ថែមទៀតសម្រាប់បណ្ដាប្រទេសកំពុងអភិវឌ្ឍ។

មេដឹកនាំរបស់ សហភាពអឺរ៉ុប (EU) Ursul von der Leyen ឱ្យដឹងថា កិច្ចព្រមព្រៀងនេះគឺជា «គ្រឹះសម្រាប់សកម្មភាពសកលស្ដីពីជីវចម្រុះ ជាការបំពេញបន្ថែមពីលើកិច្ចព្រមព្រៀងទីក្រុងបារីស ស្ដីពីអាកាសធាតុ»។

ប្រធានាធិបតីអាម៉េរិក ចូ បៃដិន ក៏បានគាំទ្រកិច្ចព្រមព្រៀងនេះ ខណៈដែលអ្នកនាំពាក្យរបស់ ក្រសួងការបរទេសអាម៉េរិក Ned Price លើកសរសើរថា នេះគឹជាកិច្ចព្រមព្រៀងប្រកបដោយ «ភាពសកល និងមហិច្ឆតា»។

«សន្ធិសញ្ញាសន្តិភាពជាមួយធម្មជាតិ» នេះសន្យាថា ការពារផ្ទៃដីបៃតងចំនួន 30% នៅឆ្នាំ 2030 ដោយផ្ដល់ប្រាក់ជំនួយប្រចាំឆ្នាំចំនួន 30 ពាន់លានដុល្លារសម្រាប់ពិភពលោកដែលកំពុងអភិវឌ្ឍ និងទប់ស្កាត់ការផុតពូជរបស់ប្រភេទសត្វ រុក្ខជាតិដែលរងការគំរាមកំហែងដោយសារមនុស្ស។ កិច្ចព្រមព្រៀងនេះក៏សន្យាថា ការពារសិទ្ធិរបស់ប្រជាជនមូលដ្ឋានក្នុងនាមជាអ្នកគ្រប់គ្រងតំបន់ដីរបស់ពួកគេ។

គោលដៅដែលគួរឱ្យចាប់អារម្មណ៍ដទៃទៀតក្នុងកិច្ចព្រមព្រៀងនេះ រួមមាន ការសំច័យរាប់រយពាន់លានដុល្លារអាម៉េរិក តាមរយៈការកាត់បន្ថយជំនួយផ្នែកកសិកម្មដែលបង្កផលអាក្រក់ដល់បរិស្ថាន ការកាត់បន្ថយហានិភ័យពីថ្នាំការពារដំណាំ និងការដោះស្រាយបញ្ហាសត្វចង្រៃ។

អ្នកគ្រប់គ្រងរបស់ អង្គការយុទ្ធនាការសម្រាប់ធម្មជាតិ Brian O’Donnell បានហៅកិច្ចព្រមព្រៀងនេះថាជា «ការសន្យាការពារមហាសមុទ្រ និងដីគោកធំបំផុតក្នុងប្រវត្តិសាស្ត្រ»។

ក្រុមអ្នកជំនាញផ្នែកបរិស្ថានបានប្រៀបប្រដូចកិច្ចព្រមព្រៀងនេះទៅនឹងផែនការសម្រាប់របត់ថ្មីដើម្បីកាត់បន្ថយការកើនឡើងកម្ដៅនៅទូទាំងសកលលោកក្នុងកម្រិត 1.5 អង្សាសេ ទៅតាមកិច្ចព្រមព្រៀងទីក្រុងបារីសស្ដីពីអាកាសធាតុឆ្នាំ 2015 បើទោះអ្នកជំនាញខ្លះព្រមានថា វាមិនទាន់គ្រប់គ្រាន់៕

រដ្ឋមន្ត្រីក្រសួងបរិស្ថាន និងអេកូឡូស៊ីចិន Huang Runqiu ប្រធាន COP15

December 20, 2022

ឱសថថ្មីដែលត្រូវគេរំពឹងថា អាចព្យាបាលទាំងជំងឺកូវីដ ទាំងជំងឺមហារីក

(សហរដ្ឋអាម៉េរិក)- ក្រុមអ្នកវិទ្យាសាស្ត្រនៅសាកលវិទ្យាល័យ California ខាងត្បូង ទើបតែបានប្រកាសអំពីឱសថថ្មីមួយប្រភេទដែលអាចព្យាបាលទាំងជំងឺកូវីដ-19 ទាំងជំងឺមហារីកច្រើនប្រភេទ។

យោងតាមលទ្ធផលនៃការសិក្សាស្រាវជ្រាវដែលបានប្រកាសលើទស្សនាវដ្ដី Nature Communications សាស្ត្រាចារ្យ Amy Lee នៅសាលាវេជ្ជសាស្ត្រ Keck រួមនឹងមិត្តរួមការងារ បានរកឃើញ GRP78 ដែលជាប្រូតេអ៊ីនមួយប្រភេទមានតួនាទីសំខាន់ក្នុងការឆ្លងរាលដាលនៃវីរុស nCoV និងវីរុសមួយចំនួនទៀត។ ការទប់ស្កាត់ដំណើរការផលិត GRP78 ដោយប្រើប្រាស់ថ្នាំ HA15 នឹងអាចទប់ទល់ការកើនឡើងនៃបរិមាណវីរុស។

ក្រុមអ្នកវិទ្យាសាស្ត្រប្រើប្រាស់ឧបករណ៍ mRNA ដើម្បីទប់ស្កាត់ការផលិតប្រូតេអ៊ីន GRP78 នៅក្នុងកោសិកាសួតរបស់មនុស្ស។ នៅពេលកោសិកាឆ្លង nCoV ពួកវានឹងបង្កើតប្រូតេអ៊ីនបំប្លែងខ្លួន ហើយបរិមាណវីរុសនឹងត្រូវមានកម្រិតទាបជាង និងពិបាកឆ្លងទៅកាន់កោសិកាដទៃជាងមុន។

ក្នុងការសិក្សាស្រាវជ្រាវដោយឡែកមួយទៀត សាស្ត្រាចារ្យ Lee ក៏បានបង្ហាញអំពីប្រសិទ្ធភាពរបស់ថ្នាំ HA15 នៅក្នុងការព្យាបាលជំងឺមហារីកផងដែរ។ ការរកឃើញដែលត្រូវបានប្រកាសកាលពីពេលថ្មីៗកន្លងទៅនៅលើទស្សនាវដ្ដី Neoplasia បង្ហាញថា ការកំណត់គោលដៅទៅលើបណ្ដាប្រូតេអ៊ីនជាក់លាក់ នឹងជួយប្រយុទ្ធប្រឆាំងនឹងជំងឺមហារីក។

ការប្រើប្រាស់ថ្នាំ HA15 ជាមួយនឹងថ្នាំ YUM70 អាចទប់ស្កាត់ការផលិត KRAS ដែលជាប្រូតេអ៊ីនបំប្លែងខ្លួន អាចបន្សាបថ្នាំ ឬហៅថា ស៊ាំនឹងថ្នាំ។ ថ្នាំ HA15 និង YUM70 ជួយបង្កើនសមត្ថភាពរស់រានរបស់បណ្ដាកោសិកាលំពែង សួត និងពោះវៀនធំ ដែលឆ្លងជំងឺមហារីក។

មុននោះ ការសិក្សាស្រាវជ្រាវមួយចំនួនក៏បានបង្ហាញថា វ៉ាក់សាំងកូវីដ-19 មានប្រសិទ្ធភាពក្នុងការព្យាបាលជំងឺមហារីក។ មូលហេតុគឺការព្យាបាលដែលសំដៅលើបណ្ដាប្រូតេអ៊ីន និងកោសិកា។ ការស្រាវជ្រាវដែលបានប្រកាសកាលពីថ្ងៃទី 13 ធ្នូ របស់ក្រុមហ៊ុន Moderna បង្ហាញថា វ៉ាក់សាំងព្យាបាលជំងឺមហារីកដែលយោងទៅលើបច្ចេកវិទ្យា mRNA មានប្រសិទ្ធភាពក្នុងការទប់ស្កាត់ដុំសាច់សាហាវនៅលើស្បែក៕

December 20, 2022

ករណីឆ្លងថ្មីនូវជំងឺកូវីដ-19 នៅកម្ពុជា បានថយចុះច្រើន ក្នុងអំឡុង 24 ម៉ោងកន្លង

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 19 នាក់ និងជាសះស្បើយ 23 នាក់ ខណៈមិនមានអ្នកស្លាប់ នៅក្នុងអំឡុង 24 ម៉ោងនៃថ្ងៃទី 19 ធ្នូ 2022។

គិតត្រឹមព្រឹក ថ្ងៃទី 20 ខែធ្នូ 2022 កម្ពុជា មានអ្នកឆ្លងកូវីដ-19 សរុប 138,438 នាក់, អ្នកជាសះស្បើយ 135,247 នាក់ និងអ្នកស្លាប់សរុប 3,056 នាក់។

December 20, 2022

Author: សឿន សំណាង