Author: សឿន សំណាង

អាវមហាក្សត្រប្រទានរបស់ Messi ត្រូវបានតំណាងរាស្ត្រអូម៉ង់ ស្នើទិញក្នុងតម្លៃខ្ពស់
(កាតា)- Ahmed Al Barwani ស្នើទិញអាវធំពណ៌ខ្មៅដែល Lionel Messi ទទួលបានពីព្រះមហាក្សត្រកាតា នៅក្នុងពិធីឡើងទទួលពានរង្វាន់ជើងឯក World Cup 2022។
«ពី រាជាណាចក្រអូម៉ង់ ខ្ញុំសូមអបអរអស់លោកដែលបានក្លាយជាម្ចាស់ជើងឯក World Cup 2022។ អាវ bisht អារ៉ាប់ គឺជានិមិត្តរូបរបស់ស្មារតីក្លាហាន និងប្រាជ្ញា។ ខ្ញុំនឹងជូនអ្នក 1 លានដុល្លារអាម៉េរិក ដើម្បីប្ដូរយកវា» Al Barwani ដែលជាមេធាវី និងជាសមាជិកសភារបស់ ប្រទេសអូម៉ង់ ដាក់សំណើតាមរយៈសារលើ Twitter កាលពីថ្ងៃទី 23 ធ្នូ 2022។
ក្នុងពិធីឡើងទទួលពានរង្វាន់ World Cup 2022 កាលពីថ្ងៃទី 18 ធ្នូ មហាក្សត្រកាតា បានប្រទានអាវ bisht ពណ៌ខ្មៅដល់កីឡាករ Messi របស់ អាហ្សង់ទីន។
យោងតាម Sun អាវ bisht គឺជាអាវប្រពៃណីសម្រាប់បុរសនៅក្នុងពិភពអារ៉ាប់ ដែលតែងត្រូវបានប្រើប្រាស់ដោយឥស្សរជនជាន់ខ្ពស់។ វាក៏ត្រូវបានវាយតម្លៃថាជាសញ្ញានៃការគោរព និងការផ្ដល់តម្លៃខ្ពស់។
តំណាងរាស្ត្រ Al Barwani បង្ហើបអំពីគម្រោងប្រើប្រាស់ បើសិនទិញបានអាវនេះពី Messi ថា «វានឹងត្រូវបានដាក់តាំងបង្ហាញដើម្បីរម្លឹកពីទិដ្ឋភាពដ៏គួរឱ្យមានមោទកភាពនោះ ជួយឱ្យយើងនឹកឃើញ ក៏ដូចជារម្លឹកយើងថា យើងអាចធ្វើបានគ្រប់យ៉ាង»។
សារព័ត៌មាន Sun បានឱ្យដឹងថា អាវ bisht ដូចរបស់ Messi មានតម្លៃប្រហែល 2,000 ដុល្លារអាម៉េរិក។ ក្នុងវគ្គផ្គាច់ព្រ័ត្រ កាតា បានត្រៀមអាវ bisht ចំនួន 2 សម្រាប់ Messi និងអ្នកចាំទីរបស់ បារាំង Hugo Lloris ក្នុងករណី បារាំង ដណ្ដើមបានជើងឯក។ អ្នកដែលកាត់ដែរអាវ bisht នេះគឺ Muhammad Abdullah Al-Salem៕

ទម្រង់នៃអាវ bists
December 24, 2022
សភាអាម៉េរិក អនុម័តច្បាប់ថវិកាជាតិតម្លៃជិត 1.7 ទ្រីលានដុល្លារ
ក្រុមអ្នកតាក់តែងច្បាប់អាម៉េរិក បានអនុម័តសេចក្ដីព្រាងច្បាប់ថវិកាជាតិថ្មីតម្លៃ 1.66 ទ្រីលានដុល្លារ ក្នុងនោះមាន 858 ពាន់លានដុល្លារ សម្រាប់វិស័យការពារជាតិ។
សេចក្ដីព្រាងច្បាប់ស្ដីពីការចំណាយថ្នាក់ជាតិនេះ ត្រូវបានសភាជាន់ទាបអាម៉េរិក អនុម័តកាលពីថ្ងៃទី 23 ធ្នូ 2022 ដោយមានសន្លឹកឆ្នោតគាំទ្រចំនួន 225 សំឡេង និងប្រឆាំង 201 សំឡេង។ មុននោះមួយថ្ងៃ សេចក្ដីព្រាងច្បាប់នេះត្រូវបានសភាជាន់ខ្ពស់អាម៉េរិក អនុម័តរួចហើយ ដោយមានសន្លឹងឆ្នោតគាំទ្រចំនួន 68 សំឡេង ក្នុងនោះមាន 18 សំឡេងមកពីបក្សសាធារណរដ្ឋ និងជំទាស់ 29 សំឡេង។
ប្រធានាធិបតីអាម៉េរិក ចូ បៃដិន ប្រកាសថា នឹងចុះហត្ថលេខាលើសេចក្ដីព្រាងច្បាប់នេះ និងសរសើរថា នេះគឺជាភស្ដុតាងបង្ហាញថា បក្សសាធារណរដ្ឋ និងបក្សប្រជាធិបតេយ្យ អាចរួមគ្នាដោះស្រាយបញ្ហាសម្រាប់ជនជាតិអាម៉េរិក»។
សេចក្ដីព្រាងច្បាប់ថវិកាជាតិថ្មីដែលមានតម្លៃ 1.66 ទ្រីលានដុល្លារនេះ គឺកើនឡើងប្រហែល 160 ពាន់លានដុល្លារ ធៀបនឹងឆ្នាំកន្លង។
សេចក្ដីព្រាងច្បាប់ស្ដីថ្មីនេះក៏រួមបញ្ចូលទាំងជំនួយបន្ទាន់តម្លៃ 44.9 ពាន់លានដុល្លាររបស់ សហរដ្ឋអាម៉េរិក សម្រាប់ អ៊ុយក្រែន ផងដែរ។
December 24, 2022
បាតុកម្មហិង្សាផ្ទុះឡើងនៅប្រទេសបារាំង ក្រោយករណីបាញ់រះសម្លាប់មនុស្សច្រើននាក់
ក្រុមបាតុករជនជាតិឃើដ (Kurd) ប៉ះទង្គិចនឹងប៉ូលិសនៅ បារីស នៅពេលពួកគេខឹង និងរិះគន់ថា អាជ្ញាធរធ្វើសកម្មភាពតិចពេកនៅក្នុងការទប់ស្កាត់ករណីបាញ់រះបណ្ដាលឱ្យមនុស្ស 3 នាក់ស្លាប់។
បាតុកម្មហិង្សានេះបានកើតឡើងកាលពីថ្ងៃទី 23 ធ្នូ នៅពេលក្រុមបាតុករព្យាយាមចូលទៅជិតរដ្ឋមន្ត្រីក្រសួងមហាផ្ទៃបារាំង Gerald Darmanin ក្នុងពេលលោកមកពិនិត្យកន្លែងកើតហេតុនៃករណីបាញ់ប្រហារសម្លាប់មនុស្ស 3 នាក់នៅ រដ្ឋធានីបារីស ដែលបានកើតឡើងប៉ុន្មានម៉ោងមុននោះ។
ក្រុមមនុស្សដែលកំពុងខឹង នាំគ្នាគប់របស់របរសំដៅលើក្រុមប៉ូលិស និងចោទអាជ្ញាធរថា ធ្វើសកម្មភាពតិចពេក មិនអាចទប់ស្កាត់អំពើបាញ់ប្រហារនេះបាន។ ក្រុមបាតុករក៏បានវាយបំផ្លាញរថយន្តប៉ូលិសដែលនៅក្បែរនោះផងដែរ។
កងកម្លាំងប៉ូលិសប្រឆាំងកុបកម្មបារាំង ក្រោយមកក៏បានប្រើប្រាស់គ្រាប់បែកផ្សែងបង្ហូរទឹកភ្នែកដើម្បីរំសាយក្រុមបាតុករ។
សមត្ថកិច្ចបារាំង បានចាប់ខ្លួនជនសង្ស័យនៅក្នុងហេតុការណ៍បាញ់រះដែលបានបណ្ដាលឱ្យមនុស្ស 3 នាក់ស្លាប់ និង 3 នាក់ទៀតរងរបួស។ ជនសង្ស័យវ័យ 69 ឆ្នាំរូបនេះ ធ្លាប់ប្រព្រឹត្តប្រើប្រាស់អាវុធខុសច្បាប់ និងវាយប្រហារលើជនចំណាកស្រុកនៅក្នុងតង់បណ្ដោះអាសន្ននាពេលកន្លង។
សមត្ថកិច្ចបារាំង កំពុងស៊ើបអង្កេតលើលទ្ធភាពដែលថា ការវាយប្រហាររបស់ជនសង្ស័យនេះ គឺជារឿងរើសអើងជាតិសាសន៍។
កាលពីឆ្នាំ 2013 សកម្មជននយោបាយជនជាតិឃើដ 3 រូប ត្រូវបានគេបាញ់សម្លាប់នៅ បារីស ក្នុងនោះក៏មានសមាជិកក្រុមសហស្ថាបនិករបស់ បក្សពលករជាតិឃើដ ផងដែរ៕
December 24, 2022
រាជរដ្ឋាភិបាលកម្ពុជា សម្រេចបង្កើតក្រុងអរិយក្សត្រ នៃខេត្តកណ្ដាល
យោងតាមរដ្ឋធម្មនុញ្ញ ព្រះរាជក្រឹត្យ ព្រះរាជក្រម អនុក្រឹត្យទាំងឡាយដែលពាក់ព័ន្ធ និងតាមសំណើរបស់ រដ្ឋមន្ត្រីក្រសួងមហាផ្ទៃ រាជរដ្ឋាភិបាលកម្ពុជា សម្រេចបង្កើត ក្រុងអរិយក្សត្រ នៃខេត្តកណ្ដាល ដែលស្ថិតនៅទល់មុខ រាជធានីភ្នំពេញ។
ដំណឹងនេះគឺយោងតាម អនុក្រឹត្យស្ដីពី ការបង្កើតក្រុងអរិយក្សត្រ នៃខេត្តកណ្ដាល របស់ រាជរដ្ឋាភិបាលកម្ពុជា លេខ 272 អនក្រ.បក ចុះថ្ងៃទី 23 ធ្នូ 2022។
អនុក្រឹត្យនេះចែងថា ក្រុងអរិយក្សត្រ នឹងកាត់យកឃុំចំនួន 06 ពីស្រុកខ្សាច់កណ្ដាល គឺឃុំបាក់ដាវ ឃុំកោះឧកញ៉ាតី ឃុំព្រែកអំពិល ឃុំព្រែកលួង ឃុំព្រែកតាកូវ និងឃុំស្វាយជ្រំ រួមនឹងឃុំចំនួន 05 ពីស្រុកល្វាឯម គឺឃុំអរិយក្សត្រ ឃុំសារិកាកែវ ឃុំពាមឧកញ៉ាអុង ឃុំព្រែកក្មេង និងឃុំបារុង។ ក្រុងអរិយក្សត្រ នឹងមានទីតាំងរដ្ឋបាល នៅក្នុងសង្កាត់អរិយក្សត្រ។
អនុក្រឹត្យនេះក៏បានបញ្ជាក់ថា បទប្បញ្ញត្តិទាំងឡាយណាដែលផ្ទុយពីអនុក្រឹត្យនេះ ត្រូវចាត់ទុកជានិរាករណ៍។
December 24, 2022
(AFF Cup 2022) – ការប្រកួតរវាងក្រុមម្ចាស់ផ្ទះឥណ្ឌូណេស៊ី និង កម្ពុជា ចាប់ផ្ដើមហើយ
ឥណ្ឌូណេស៊ី ប្រាកដជាត្រូវជួបការលំបាកនៅពេលប៉ះក្រុមរបស់ កម្ពុជា នៅក្នុងជុំដំបូងរបស់ពួកគេនៅ AFF Cup 2022 ដែលគ្រាប់បាល់ចាប់ផ្ដើមរមៀលនៅវេលាម៉ោង 16 និង 30 នាទីថ្ងៃទី 23 ធ្នូ 2022។
«កម្ពុជា ហ៊ានលេងបាល់ គ្រប់គ្រងបាល់ បញ្ជូនបាល់បានល្អ។ ខ្ញុំគិតថា ពួកគេកំពុងរីកចម្រើនយ៉ាងលឿន និងមានសមត្ថភាពបង្កការភ្ញាក់ផ្អើល» នេះគឺសម្ដីរបស់ខ្សែការពារ Witan Sulaeman និយាយនៅលើ Youtube របស់ PSSI នៅមុនការប្រកួតនាថ្ងៃនេះ។
ម៉ោង 16 និង 30 នាទីថ្ងៃទី 23 ធ្នូ 2022 ការប្រកួតបានចាប់ផ្ដើម ក្នុងនោះ កម្ពុជា ក្នុងឈុតពណ៌ស ចំណែក ឥណ្ឌូណេស៊ី ក្នុងឈុតពណ៌ក្រហម។
សំណាញ់ទីរបស់ កម្ពុជា ត្រូវរងការវាយលុកយ៉ាងរហ័ស ប៉ុន្តែ អាជ្ញាកណ្ដាល មិនទទួលស្គាល់គ្រាប់បាល់ឈ្នះរបស់ ឥណ្ឌូណេស៊ី។
នាទីទី 7 ឥណ្ឌូណេស៊ី រកបាន 1 គ្រាប់ទៅហើយ! ខ្សែប្រយុទ្ធ Egy ទទួលបានពី Arhan មុនពេលយកឈ្នះ Soksela។
នាទីទី 16 កម្ពុជា រកបានគ្រាប់បាល់ស្មើ 1-1 ដោយការតែតរបស់ Krya ក្នុងគ្រាអ្នកចាំទី Nadeo របស់ ឥណ្ឌូណេស៊ី។
ឥណ្ឌូណេស៊ី បន្តវាយលុក ប៉ុន្តែ កម្ពុជា ហាក់មិនបានជ្រួលជ្រើមតាមសភាពការណ៍។
នាទីទី 28 Klok របស់ ឥណ្ឌូណេស៊ី ទាត់បាល់ពិន័យជ្រុង ប៉ុន្តែ មិនបង្កគ្រោះថ្នាក់ដល់ កម្ពុជា។
ប្រហែលនាទីទី 35 ឥណ្ឌូណេស៊ី រកបាន 1 គ្រាប់ទៀត និងនាំមុខកម្ពុជា 2-1។
ចប់តង់ទីមួយក្នុងលទ្ធផល ឥណ្ឌណេស៊ីនាំមុខកម្ពុជា 2-1។
ចប់ការប្រកួត ឥណ្ឌូណេស៊ី ឈ្នះ កម្ពុជា 2-1 ។
…
December 23, 2022
ក្រុមហ៊ុនដឹកជញ្ជូនតាមផ្លូវដែកកម្ពុជា ប្រមូលទុនជាលើកទីពីរនៅផ្សារហ៊ុនកម្ពុជា
ក្រុមហ៊ុន រ៉ូយ៉ាល់ រេលវេ បោះផ្សាយលក់មូលបត្របំណុលជាសាធារណៈជាលើកទីពីរ ដោយគ្រោងចុះបញ្ជីនៅថ្ងៃចុងខែធ្នូ នៅផ្សារមូលបត្រកម្ពុជា។
យោងតាមខ្លឹមសារក្នុងសន្និសីទសារព័ត៌មានកាលពីថ្ងៃទី 22 ធ្នូ 2022 ក្រុមហ៊ុន រ៉ូយ៉ាល់ រេលវេ ម.ក (Royal Railways (Cambodia)) ប្រកាសបោះផ្សាយលក់មូលបត្របំណុលជាសាធារណៈ ដែលមានតម្លៃ 24 លានដុល្លារអាមេរិកបន្ថែមទៀត ដែលគ្រោងនឹងចុះបញ្ជីនៅថ្ងៃទី 29 ធ្នូ 2022។
នេះគឺជាលើកទីពីរហើយដែល រ៉ូយ៉ាល់ រេលវេ ប្រកាសប្រមូលទុនតាមរយៈការលក់មូលបត្របំណុល បន្ទាប់ពីបានបោះផ្សាយលើកដំបូងក្នុងទំហំទឹកប្រាក់សរុបប្រមាណ 10 លានដុល្លារអាមេរិក កាលពីថ្ងៃទី 31 តុលា 2022។
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនិយ័តករមូលបត្រកម្ពុជា
រ៉ូយ៉ាល់ រេលវេ បានគឺជាក្រុមហ៊ុនដែលបោះផ្សាយសញ្ញាបណ្ណ ឬមូលបត្របំណុលផ្នែកហេដ្ឋារចនាសម្ព័ន្ធដំបូងគេបង្អស់នៅ កម្ពុជា និងជាក្រុមហ៊ុនទី 8 ដែលបានចុះបញ្ជីប្រមូលទុននៅផ្សារមូលបត្រកម្ពុជា។ ការបោះផ្សាយលក់មូលបត្របំណុលលើកនេះរបស់ រ៉ូយ៉ាល់ រេលវេ អាចជាការប្រមូលទុនចុងក្រោយនៅផ្សារមូលបត្រកម្ពុជា សម្រាប់ឆ្នាំ 2022 នេះបើតាម ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនិយ័តករមូលបត្រកម្ពុជា។
រ៉ូយ៉ាល់ រេលវេ ម.ក ជាក្រុមហ៊ុនផ្តល់សេវាកម្មដឹកជញ្ជូនទំនិញ និងអ្នកដំណើរតាមរថភ្លើងនៅ កម្ពុជា និងជាក្រុមហ៊ុនបុត្រសម្ព័ន្ធរបស់ រ៉ូយ៉ាលក្រុប (Royal Group) ដែលមាន អ្នកអុកញ៉ា គិត ម៉េង ជាប្រធាន៕
December 23, 2022
ទីក្រុងនិម្មិតដំបូងរបស់ ប្រទេសអេហ្ស៊ីប ក្នុងចក្រវាល Metaverse
ក្រុមហ៊ុនមួយនៅ ប្រទេសអេហ្ស៊ីប ទើបតែបានបង្ហាញ MetaTut ដែលជាទីក្រុងនិម្មិតដំបូងរបស់ប្រទេសនេះនៅក្នុងចក្រវាលនិយម Metaverse។
គម្រោងនេះត្រូវបានបង្កើតឡើងក្នុងបំណងរម្លឹកខួប 100 ឆ្នាំនៃការរកឃើញចេតិយតម្កល់ព្រះសពរបស់មហាក្សត្រ Tutankhamun។
គំនិតស្ដីពីទីក្រុងនិម្មិតខាងលើគឺយោងទៅតាមការសន្មត់ដោយការប្រឌិតថា ស្ដេច Tutankhamun មានព្រះជន្មឡើងវិញនៅឆ្នាំ 2022 ដើម្បីសម្រេចនូវអ្វីដែលទ្រង់ប្រាថ្នាចង់បាននៅ អេហ្ស៊ីប។
ក្នុងទីក្រុងនិម្មិត MetaTut ភ្ញៀវអាចដើរទស្សនាក្នុងដំណើរឆ្លងពេលវេលា និងទីកន្លែង ស្វែងយល់អំពីប្រវត្តិសាស្ត្ររបស់ អេហ្ស៊ីប ហើយអាចលេងកម្សាន្ត ក៏ដូចជាធ្វើអន្តរកម្មជាមួយអ្នកដទៃនៅក្នុងបរិយាកាសនិម្មិត។
បច្ចុប្បន្ន MetaTut បានដាក់ឱ្យទស្សនាទីតាំងចំនួន 4 រួមមាន ជ្រលងភ្នំរបស់មហាក្សត្រនានា បន្ទប់ព្រះអាទិត្យ រាជវាំង Akhenaton និងបន្ទប់តន្ត្រី។
ក្រៅពីឧបករណ៍បង្ហាញទិដ្ឋភាពនិម្មិត (virtual reality device) MetaTut ក៏អាចត្រូវបានចូលទស្សនាតាមរយៈកុំព្យូទ័រ ឬទូរស័ព្ទឆ្លាតវៃផងដែរ៕

December 23, 2022
យានស្រាវជ្រាវរបស់មនុស្សនៅលើដីភពអង្គារ ឈប់ដំណើរការក្រោយរយៈពេល 4 ឆ្នាំ
បេសកកម្មបង្កើតផែនទីខាងក្នុងភពព្រះអង្គាររបស់យានស្រាវជ្រាវ InSight បានបញ្ចប់កាលពីថ្ងៃទី 20 ធ្នូ ដោយសារតែត្រូវគ្របដណ្ដប់ដោយធូលី។
បន្ទាប់ពីជាង 4 ឆ្នាំដែលត្រូវបានបាញ់បង្ហោះឡើងទៅកាន់ពិភពអង្គារ យាន InSight ក៏បានឈប់ដំណើរការចាប់ពីថ្ងៃទី 20 ធ្នូ 2022។ យានរបស់ ណាសា នេះ ត្រូវបានគេជឿថា អស់ថាមពល ព្រោះតែធូលីក្រាស់គ្របដណ្ដប់លើផ្ទាំងសូឡារបស់វា។
ដោយត្រូវបានបំពាក់ឧបករណ៍វាស់ស្ទង់ទំនើបៗ ក្នុងរយៈពេល 4 ឆ្នាំកន្លង InSight បានបំពេញបេសកកម្មបង្កើតផែនទីខាងក្នុង ក្រោមស្រទាប់ដីរបស់ពិភពក្រហមមួយនេះ តាមរយៈការកត់ត្រាករណីរញ្ជួយដីប្រមាណ 1,300 លើក។ ប្រការនេះជួយឱ្យអ្នកវិទ្យាសាស្ត្រអាចដឹងបានថា ស្នូលរបស់ពិភពអង្គារពិតជារាវ ហើយស្រទាប់ខាងក្រៅរបស់ពិភពនេះក៏ស្ដើងជាងការគិតកន្លងមក ដោយវាអាចត្រូវបានបង្កើតឡើងពីស្រទាប់ចំនួន 3។
ធូលីគ្របដណ្ដប់ពេញពីលើផ្ទាំងសូឡារបស់យាន InSight
បាតុភូតរញ្ជួយដីអាចជាលទ្ធផលដែលកើតពីភាពមិនប្រក្រតីរបស់សីតុណ្ហភាព ដោយសារតែស្រទាប់ខាងក្រៅរបស់ពិភពអង្គារ។ កន្លងមក បេសកកម្មរបស់ InSight ក៏ធ្លាប់ជួបបរាជ័យម្ដងរួចហើយ ទាក់ទិននឹងឧបករណ៍វិទ្យាសាស្ត្រវាស់ស្ទង់សីតុណ្ហភាព។ ឧបករណ៍នេះត្រូវកប់ក្នុងដីជម្រៅ 5 ម៉ែត្រដើម្បីវាស់កម្ដៅ ប៉ុន្តែវាមិនអាចជីករុលចុះជ្រៅបាន ហើយបេសកកម្មនេះក៏ត្រូវបានបោះបង់ចោលកណ្ដាលទី៕
December 23, 2022
សិស្សស្រីនៅ អាហ្វហ្គានីស្ថាន អស់សង្ឃឹម ព្រោះតែរបបតាលីបង់ ហាមការសិក្សា
ក្រោយការប្រឹងប្រែងមើលមេរៀនអស់ជាច្រើនសប្ដាហ៍ សិស្សស្រីនៅ អាហ្វហ្គានីស្ថាន ក៏បានទទួលដំណឹងដ៏មហាអាក្រក់ នោះគឺ «តាលីបង់ ហាមសិស្សស្រីទាំងអស់ចូលសិក្សានៅមហាវិទ្យាល័យ»។
«ខ្ញុំមិនបានឈប់ ហើយនៅតែបន្តការមើលមេរៀន» នារីម្នាក់សុំមិនបញ្ចេញឈ្មោះ បានប្រាប់ CNN កាលពីថ្ងៃទី 21 ធ្នូ មួយថ្ងៃក្រោយពី អាជ្ញាធរតាលីបង់ ចេញបទបញ្ជាហាមសិស្សស្រីនៅ អាហ្វហ្គានីស្ថាន ចូលរៀននៅមហាវិទ្យាល័យ ដោយមិនមានការកំណត់ពេលវេលា។ «ព្រឹកនោះ ខ្ញុំនៅតែទៅសាលារៀន» នារីខាងលើបន្ថែមដូច្នេះ។
ក៏ប៉ុន្តែ ការប្ដេជ្ញាចិត្តរបស់នារីខាងលើ មិនមានប្រយោជន៍ឡើយ។ ក្រុមខ្មាន់កាំភ្លើងរបស់ តាលីបង់ ដែលបង្ហាញខ្លួនមុខខ្លោងទ្វារសាកលវិទ្យាល័យនៅ រដ្ឋធានីកាប៊ុល ដេញសិស្សស្រីទាំងអស់ដែលព្យាយាមចូលទៅក្នុងសាលា។
«នោះគឺជាទិដ្ឋភាពអាក្រក់ជាទីបំផុត» នារីម្នាក់និយាយដូច្នេះ។ «សិស្សស្រីស្ទើរតែទាំងអស់ ក្នុងនោះក៏មានរូបខ្ញុំ យំ និងស្នើសុំចូលសាលារៀន។ អ្នកនឹងមានអារម្មណ៍យ៉ាងណានៅពេលបណ្ដោយឱ្យសិទ្ធិរបស់ខ្លួនត្រូវបាត់បង់ដោយមិនអាចធ្វើអ្វីបាន?»។
ស្ត្រីនៅ អាហ្វហ្គានីស្ថាន ត្រូវប្រឈមមុខនឹងការបិទសិទ្ធិកាន់តែខ្លាំងឡើងៗ បន្ទាប់ពី តាលីបង់ ឡើងកាន់អំណាចកាលពីខែសីហាឆ្នាំកន្លង។ ការរំលោភសិទ្ធិដែលគួរឱ្យចាប់អារម្មណ៍បំផុតគឺបទបញ្ជាហាមសិស្សស្រីរៀននៅមហាវិទ្យាល័យ។
កាលពីខែមីនា 2022 តាលីបង់ បានហាមក្មេងស្រីចូលរៀននៅមធ្យមសិក្សា។ យោងតាម WSJ ដែលបានចុះផ្សាយកាលពីថ្ងៃទី 21 ធ្នូ 2022 ឱ្យដឹងថា តាលីបង់ ក៏បានហាមក្មេងស្រីនៅ អាហ្វហ្គានីស្ថាន រៀនបឋមសិក្សាផងដែរ។
ចំពោះសិស្ស និងនិស្សិតនៅ កាប៊ុល ការហាមសិស្សស្រីរៀននៅមហាវិទ្យាល័យ គឺជារឿងដ៏គួរឱ្យសោកសៅបំផុត ហើយសាហាវជាងការបំផ្ទុះគ្រាប់បែក អំពើហិង្សាដែលពួកគេបានជួបទៅទៀត។
បទបញ្ជាខាងលើរបស់ របបតាលីបង់ កំពុងរងការរិះគន់យ៉ាងខ្លាំងក្លាពីអន្តរជាតិ ក្នុងនោះ ប្រទេស និងអង្គការសិទ្ធិមនុស្សធំៗក៏បានប្រតិកម្មជំទាស់នឹងការសម្រេចនេះផងដែរ៕
December 23, 2022
រថយន្ត Ford Territory ស៊េរីថ្មីឆ្នាំ 2023 រូបរាងថ្មីទាំងស្រុង ត្រូវបានដាក់សម្ពោធជាផ្លូវការនៅប្រទេសកម្ពុជា
[ភ្នំពេញ – ថ្ងៃទី ២១ ខែធ្នូ ឆ្នាំ២០២២] ក្រុមហ៊ុន អ អិម អេ (ខេមបូឌា) បានបង្កើតនូវមហាព្រឹត្តិការណ៍ដ៏ធំសម្បើមជាថ្មីម្តងទៀតប្រចាំឆ្នាំនោះគឺការប្រារព្ធកម្មវិធីបើកបរសាកល្បង និងពិធីសម្ពោធជាផ្លូវការនៃរថយន្ត Ford Territory ស៊េរីថ្មីឆ្នាំ 2023 ដែលកម្មវិធីនេះបានប្រារព្ធធ្វើឡើងនៅ ដឹ ព្រេមៀ សេនធ័រ សែនសុខដែលមានភ្ញៀវកិត្តិយសអញ្ជើញចូលរួមប្រមាណជាង 3,500 នាក់។
លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ ខ្ញុំមានសេចក្តីសោមនស្សរីករាយ ក្រៃលែងដែលទីបំផុតយើងបាននាំយកនូវរថយន្ត Ford Territory ស៊េរីឆ្នាំ 2023 នេះមកដល់ទីផ្សារនៃព្រះរាជាណាចក្រកម្ពុជាហើយ។ ខ្ញុំក៏សូមថ្លែងអំណរគុណ ដល់អតិថិជន Ford គ្រប់រូបដែលបានធ្វើការអត់ធ្មត់និង ទន្ទឹងរងចាំអស់រយៈពេលជាច្រើនខែ ដើម្បីក្លាយជាម្ចាស់រថយន្តទំនើបនេះ ។ រថយន្ត Ford Territory ស៊េរីឆ្នាំ 2023 នេះ ត្រូវបានផ្លាស់ប្តូររូបរាងថ្មីទាំងស្រុង ដែលមានភាពទំនើប ប្រណិតភាព ផាសុខភាព ងាយស្រួលក្នុងការបើកបរ។ លើសពីនេះទៅទៀត យើងក៏សង្ឃឹមយ៉ាងមុតមាំថា Ford Territory ស៊េរីឆ្នាំ 2023 នឹងមានវត្តមាននៅលើដងផ្លូវក្នុងពេលឆាប់ៗនេះ ហើយនឹងទទួលបាននូវការពេញចិត្ត ក៏ដូចជាការគាំទ្រពីសំណាក់អតិថិជនផងដែរ ។ ”
កម្មវិធីសម្ពោធជាផ្លូវការ និងការបើកបរសាកល្បងនៃ រថយន្ត Ford Territory ស៊េរីឆ្នាំ 2023 នេះ ប្រារព្ធឡើងក្នុងគោលបំណងដើម្បីឲ្យអតិថិជនយល់ជ្រាបកាន់តែច្បាស់ពីវត្តមាននៃកំពូលរថយន្តអេសយូវី SUV មួយនេះជាមួយនឹងរូបរាងថ្មីទាំងស្រុង និងទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Territory ស៊េរីថ្មីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសFord ដើម្បីសាកល្បងនូវមុខងារដ៏ថ្មីស្រឡាង ប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយដែលបានបំពាក់នៅលើរថយន្តនេះ ។
កាន់តែពិសេសនោះគឺ ផ្នែកខាងក្រៅនៃរថយន្ត Ford Territory ស៊េរីឆ្នាំ 2023 នេះ ត្រូវបានរចនារូបរាងថ្មីទាំងស្រុង ជាមួយនឹងចង្កៀងមុខដែលមានភ្លើងបំភ្លឺពេលថ្ងៃ អំពូលកាត់អ័ព្ទ និងចង្កៀងខាងមុខជាប្រភេទ LED បិទនិងបើកហ្វាកូដដោយស្វ័យប្រវត្ត ជាមួយមុខងារ (Follow Me Home) ចង្កៀងក្រោយជាប្រភេទ LED បែប 3D ដែលមានពន្លឺភ្លឺច្បាស់ល្អ។ មិនតែប៉ុណ្ណោះ Ford Territory ស៊េរីឆ្នាំ 2023 នេះ ក៏មានបំពាក់នូវ សែនសឺចំនួន ១២គ្រាប់ជុំវិញរថយន្ត ផ្លឹតទឹកអូតូ និង កញ្ចក់ក្តោបអូតូ ដែលជួយអោយការបើកបរកាន់តែមានភាពឆ្លាតវៃ។
ចំណែកឯផ្នែកខាងក្នុងនៃរថយន្តនេះវិញ ត្រូវបានរចនាម៉ូដប្រណិត ធំទូលាយ ប្រកបដោយផាសុខភាព ដែលមានដូចជា៖
- កៅអីបែបប្រណិតដែលបានបំពាក់នូវមុខងារកៅអីត្រជាក់ផ្នែកខាងមុខ
- ដំបូលកញ្ចក់ធំអាច បិទនិងបើកបាន និងពោងសុវត្ថិភាពជុំវិញរថយន្ត
- រថយន្តនេះក៏បានបំពាក់នូវកុងទ័រឌីជីថលទំនើបទាន់សម័យទំហំ 3 អ៊ីញ
- អេក្រង់ Touch Screen កណ្តាលទំហំ 12 អ៊ីញ ជាមួយប្រព័ន្ធ Wireless Apple CarPlay និង Android Auto
- ចង្កឹះលេខអេឡិចត្រូនិច E-Shifter ដែលអាចធ្វើការដោយស្វ័យប្រវត្ត
- ប្រព័ន្ធហ្វ្រាំងដៃអេឡិចត្រូនិចស៊េរីថ្មី
- ប្រព័ន្ធសាកទូរស័ព្ទឥតខ្សែ (Wireless Charging)
- ចង្កូតអេឡិចត្រូនិច (EPAS) ធូរងារស្រួលពេលបើកបរ
- ប្រព័ន្ធបន្សុទ្ធខ្យល់ PM 2.5 និងគ្រប់គ្រងសីតុណ្ហភាពដោយស្វ័យប្រវត្ត
- ប្រព័ន្ធចុចបញ្ឆេះរថយន្ត (Smart key)
- កញ្ចក់មើលក្រោយកាត់បន្ថយចំណាំងផ្លាត (Auto-Dimming)
ជាពិសេសនោះគឺអតិថិជននឹងពេញចិត្តជាមួយនឹងកម្លាំងម៉ាស៊ីនថ្មីនៃរថយន្ត Ford Territory ស៊េរីថ្មីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនសាំង 1.5L EcoBoost ដែលអាចផលិតកម្លាំងសេះបានរហូតដល់ទៅ 163 PS និងកម្លាំងរមួលកង់រហូតដល់ទៅ 250Nm និងប្រអប់លេខស្វ័យប្រវត្ត 7 វគ្គ ដែលផ្តល់នូវសន្ទុះខ្លាំងក្នុងការបើកបរ។
មិនតែប៉ុណ្ណោះនៅមានមុខងារប្រព័ន្ធសុវត្ថិភាព និងបច្ចេកវិទ្យាទំនើបៗចុងក្រោយ ជាច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖
- ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬ អ្នកថ្មើរជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត
- ប្រព័ន្ធបន្ថយល្បឿន រក្សាគម្លាតសុវត្ថិភាព ឈប់ និង ទៅមុខដោយស្វ័យប្រវត្តតាមរថយន្តខាងមុខ និងតម្រង់គន្លងផ្លូវ
- ប្រព័ន្ធផ្តល់សញ្ញាគ្រោះថ្នាក់ពេលបើកទ្វារថយន្ត
- អ្វីដែលអតិថិជននឹងពេញចិត្តខ្លាំងមួយទៀតនោះគឺ ប្រព័ន្ធបើក និងបិទឃ្លុបក្រោយដោយស្វ័យប្រវត្តដោយគ្រាន់តែគ្រវាសជើង
- អ្វីដែលកាន់តែអស្ចារ្យនោះគឺរថយន្ត Ford Territory ស៊េរីថ្មីឆ្នាំ 2023 បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពីចំណតដោយស្វ័យប្រវត្ត និងមានប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត ជាមួយនឹងអេក្រង់ Touchscreen 12 អ៊ីញ ។
រថយន្ត Ford Territory ស៊េរីថ្មីឆ្នាំ 2023 មានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ទៅ 6 ជម្រើសរួមមាន៖ ពណ៌ក្រហម ខៀវ ខ្មៅ ទឹកមាស សូកូឡា និងពណ៌ស។ ជាមួយនឹងតម្លៃពិសេសត្រឹមតែ $48,900 ដុល្លាតែប៉ុណ្ណោះ។
សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរ និងបើកបរសាកល្បងរថយន្ត Ford Territory ស៊េរីថ្មីឆ្នាំ 2023 នៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
- អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
- អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
- អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
- អគារតាំងបង្ហាញរថយន្ត Ford Trade-In ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 077 722 999 | 011 255 229
- អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
- អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
December 23, 2022