សឿន សំណាង - La Reine Media

4 ក្រុមហ៊ុនគ្រោងវិនិយោគជាង 16 លានដុល្លារបង្កើតរោងចក្រថ្មីនៅកម្ពុជា

គម្រោងបង្កើតរោងចក្រថ្មីចំនួន 4 កន្លែងនៅ ភ្នំពេញ និងខេត្តព្រះសីហនុ ដែលមានទុនវិនិយោគសរុបប្រមាណជាង 16 លានដុល្លារអាម៉េរិកនេះ នឹងបង្កើតការងារជាង 700 នាក់។

គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាគម្រោងវិនិយោគ ជូនដល់ក្រុមហ៊ុនចំនួន 4 រួមមាន ៖

ក្រុមហ៊ុន QUAN MING SHUN (CAMBODIA) NEW MATERIALS CO., LTD. ៖ គម្រោងបង្កើតរោងចក្រផលិតក្តារប៉ាកេ និងក្តារបន្ទះ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, ក្នុងទុនវិនិយោគប្រមាណ 6.6 លានដុល្លារអាម៉េរិក និងអាចបង្កើតការងារបានចំនួនប្រមាណ 300 នាក់។

ក្រុមហ៊ុន CHUANGJU PLASTICS (CAMBODIA) CO., LTD. ៖ គម្រោងបង្កើតរោងចក្រផលិតថង់ប្លាស្ទិក ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, ក្នុងទុនវិនិយោគប្រមាណ 6.1 លានដុល្លារអាម៉េរិក និងអាចបង្កើតការងារបានចំនួនប្រមាណ 300 នាក់។

ក្រុមហ៊ុន TB PACKAGING (CAMBODIA) CO., LTD. ៖ គម្រោងបង្កើតរោងចក្រផលិតផលិតផលធ្វើពីក្រដាស ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, ក្នុងទុនវិនិយោគចំនួន 2 លានដុល្លារអាម៉េរិក និងអាចបង្កើតការងារបានចំនួនប្រមាណ 80 នាក់។

ក្រុមហ៊ុន VP PRINTING AND PACKAGING CO., LTD. ៖ គម្រោងបង្កើតរោងចក្របោះពុម្ព និងផលិតផលិតផលវិចខ្ចប់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូលយ៉ាល់ គ្រុប ភ្នំពេញ, រាជធានីភ្នំពេញ ក្នុងទុនវិនិយោគប្រមាណ 1.6 លានដុល្លារអាម៉េរិក និងអាចបង្កើតការងារបានចំនួនប្រមាណ 60 នាក់៕

December 26, 2022

រកឃើញពិភពចំនួនពីរក្នុងតំបន់អាចរស់នៅបាន និងស្ថិតនៅមិនឆ្ងាយពីផែនដី

ពិភពទាំងពីរដែលទើបត្រូវបានរកឃើញនេះ មានម៉ាសប៉ុននឹងផែនដី និងវិលយ៉ាងលឿនជុំវិញផ្កាយក្រហម GJ 1002 ដែលមានចម្ងាយ 16 ឆ្នាំពន្លឺពីប្រព័ន្ធព្រះអាទិត្យរបស់មនុស្ស។

ក្រុមអ្នកវិទ្យាសាស្ត្របានរកឃើញពិភពខាងក្រៅប្រព័ន្ធព្រះអាទិត្យចំនួន 2 ដែលអាចរស់នៅបាន កំពុងវិលជុំវិញផ្កាយមេរបស់ពួកវាដែលមានឈ្មោះថា GJ 1002។ ពួកវាមានចម្ងាយពីផែនដីត្រឹមតែ 16 ឆ្នាំពន្លឺប៉ុណ្ណោះ និងមានម៉ាសប៉ុននឹងផែនដី ស្ថិតក្នុងតំបន់ដែលអាចមានជីវិត ពោលគឺមិនក្ដៅពេក ហើយក៏មិនត្រជាក់ពេក ដែលអនុញ្ញាតឱ្យមានវត្តមានទឹករាវ។ របកគំហើញនេះត្រូវបានប្រកាសលើទស្សនាវដ្ដី Astronomy & Astrophysics និង Space កាលពីថ្ងៃទី 20 ធ្នូ 2022។

ពិភព GJ 1002b ដែលស្ថិតនៅខាងក្នុងបង្អស់ ចំណាយពេលប្រហែលតែ 10 ថ្ងៃប៉ុណ្ណោះគឺបញ្ចប់ការគោចរមួយជុំផ្កាយមេ ខណៈដែលពិភពមួយទៀតគឺ GJ 1002C ត្រូវការពេល 21 ថ្ងៃ។

យោងតាមក្រុមអ្នកស្រាវជ្រាវនៅវិទ្យាស្ថាន Canarias (IAC) ផ្កាយ GJ 1002 មានម៉ាសស្មើនឹង 1/8 នៃម៉ាសព្រះអាទិត្យ។

ការប្រៀបធៀបរវាងបណ្ដាភពក្នុងប្រព័ន្ធព្រះអាទិត្យ និងភពក្នុងប្រព័ន្ធផ្កាយ GJ 1002

របកគំហើញនេះគឺជាលទ្ធផលនៃកិច្ចសហការរវាងឧបករណ៍ ESPRESSO របស់ស្ថានីយសង្កេតអឺរ៉ុបខាងត្បូង (ESO) ស្ថិតនៅលើសមុទ្រខ្សាច់ Atacama ក្នុងប្រទេសស៊ីលី និង CARMENES ក្នុងឯស្ថានីយ Calar Alto នៅ Andalucia ប្រទេសអេស្ប៉ាញ។ CARMENES តាមដាន GJ 1002 ចាប់ពីឆ្នាំ 2017 ដល់ 2019 ចំណែក ESPRESSO ប្រមូលទិន្នន័យស្ដីពីផ្កាយក្រហមអំឡុងឆ្នាំ 2019 ដល់ 2021៕

December 26, 2022

ក្រុមហ៊ុនចិន អភិវឌ្ឍបណ្ដាញផ្កាយរណបផ្គត់ផ្គង់អ៊ីនធើណិតដូច Starlink

ក្រុមហ៊ុនឯកជន GalaxySpace របស់ ប្រទេសចិន កំពុងបង្កើនល្បឿនក្នុងការស្រាវជ្រាវ និងអភិវឌ្ឍ «បណ្ដុំផ្កាយរណប» ដើម្បីបង្កើតបណ្ដាញបញ្ជូនអ៊ីនធើណិត 5G ទូទាំងសកលលោក។

GalaxySpace បានឱ្យដឹងថា បណ្ដាញផ្កាយរណបអ៊ីនធើណិតដែលពួកគេរចនាឡើង អាចដាក់ត្រួតលើគ្នារាប់សិបគ្រឿង និងបាញ់បង្ហោះដំណាលគ្នាក្នុងរ៉ុក្កែតតែមួយ ដែលនេះអាចជួយកាត់បន្ថយការចំណាយទៅលើការប្រើប្រាស់រ៉ុក្កែត និងពេលវេលាសម្រាប់សាងសង់បណ្ដាញផ្កាយរណប។

ក្រុមហ៊ុន GalaxySpace បានកំណត់គោលដៅបាញ់បង្ហោះបណ្ដាញផ្កាយរណបទៅក្នុងគន្លងគោចរកម្រិតទាបរបស់ផែនដី និងបង្កើតបណ្ដាញអ៊ីនធើណិត 5G នៅទូទាំងពិភពលោក។ កាលពីថ្ងៃទី 05 មីនា 2022 ក្រុមហ៊ុននេះបានបាញ់បង្ហោះផ្កាយរណប 6 គ្រឿងពីមជ្ឈមណ្ឌលបាញ់បង្ហោះផ្កាយរណប Xichang ជាទីដែលបានបញ្ជាក់អំពីបច្ចេកវិទ្យាអ៊ីនធើណិត និងសមត្ថភាពនៃការផ្ដល់សេវាកម្មរបស់ «បណ្ដុំផ្កាយរណបអ៊ីនធើណិត»។

Chang Ming ប្រធានគម្រោងផ្កាយរណបរបស់ GalaxySpace បានឱ្យដឹងថា ការអភិវឌ្ឍប្រព្រឹត្តទៅបានរលូន។ ផ្កាយរណបដែលអាចត្រូវបានដាក់ត្រួតលើគ្នារបស់ក្រុមហ៊ុននេះនឹងត្រូវបានបាញ់បង្ហោះនៅដើមឆ្នាំក្រោយ៕

December 26, 2022

យន្តហោះយោធាចិនជាង 40 គ្រឿង ហោះឆ្លងបន្ទាត់កណ្ដាលនៃច្រកសមុទ្រតៃវ៉ាន់

យន្តហោះចម្បាំង និងយន្តហោះឈ្លបយកការណ៍ 43 គ្រឿងរបស់ ប្រទេសចិន ហោះឆ្លងបន្ទាត់កណ្ដាលលើច្រកសមុទ្រតៃវ៉ាន់ នៅក្នុងការចូលទៅជិតកោះនេះក្នុងទ្រង់ទ្រាយធំបំផុតមិនធ្លាប់មាននាពេលកន្លង។

ស្ថាប័នស្វ័យការពាររបស់ កោះតៃវ៉ាន់ ថ្ងៃនេះបានឱ្យដឹងថា យន្តហោះយោធា 71 គ្រឿង និងនាវាយោធាចិន 7 គ្រឿង បានបង្ហាញខ្លួននៅក្នុងតំបន់នានានៅជុំវិញកោះតៃវ៉ាន់ កាលពីព្រឹកថ្ងៃទី 26 ធ្នូ 2022។ ក្នុងចំណោមនេះ មានយន្តហោះចម្បាំងធុនធ្ងន់ J-11, J-16 និង Su-30 ចំនួន 36 គ្រឿង និងយន្តហោះចម្បាំងធុនស្រាល J-10 ចំនួន 6 គ្រឿង រួមនឹងយន្តហោះឈ្លបយកការណ៍គ្មានមនុស្សបើក (UAV) CH-4 ចំនួន 1 គ្រឿង បានហោះឆ្លងបន្ទាត់កណ្ដាលរបស់ចក្រសមុទ្រតៃវ៉ាន់ ជាខ្សែបន្ទាត់ដែលគេយល់ថាជាព្រំដែនកំណត់ច្រកសមុទ្រតៃវ៉ាន់។

យន្តហោះ 4 គ្រឿងក៏បង្ហាញវត្តមាននៅភាគនិរតីនៃតំបន់កំណត់អត្តសញ្ញាណការពារដែនអាកាសតៃវ៉ាន់ រួមមានយន្តហោះប្រមាញ់នាវាមុជទឹក Y-8, យន្តហោះចម្បាំងផ្នែកអេឡេត្រូនិក, UAV WZ-7 និងយន្តហោះព្រមានរហ័ស KJ-500។

នេះគឺជាយុទ្ធនាការឡោមព័ទ្ធធំបំផុតមិនធ្លាប់មានពីមុនមករបស់កងកម្លាំងប្រដាប់អាវុធចិន នៅជុំវិញកោះតៃវ៉ាន់។ «យើងបន្តតាមដានសភាពការណ៍ និងដាក់ពង្រាយយន្តហោះចម្បាំង នាវាចម្បាំង និងប្រព័ន្ធមីស៊ីលដើម្បីប្រតិកម្មនឹងសកម្មភាពនេះ» ស្ថាប័នស្វ័យការពាររបស់ កោះតៃវ៉ាន់ បញ្ជាក់ដូច្នេះ ខណៈដែលភាគីខាង ប្រទេសចិន មិនទាន់បញ្ចេញយោបល់អ្វីនៅឡើយ។

ប្រទេសចិន តែងចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន ហើយថានឹងប្រើកម្លាំងបាយដណ្ដើមយកមកកាន់កាប់ បើសិនជាចាំបាច់។ សហរដ្ឋអាម៉េរិក ទទួលស្គាល់គោលនយោបាយ «ចិនតែមួយ» ប៉ុន្តែ គឺជាអ្នកផ្គត់ផ្គង់ផ្នែកយោធាសំខាន់បំផុតរបស់ កោះតៃវ៉ាន់ ដើម្បីជួយឱ្យ កោះនេះអាចការពារខ្លួនពីសត្រូវ៕

December 26, 2022

«បញ្ជីឈ្មោះក្រុមកីឡាករបាល់ទាត់ឆ្នើមបំផុតប្រចាំឆ្នាំ 2022» របស់ L’Équipe

Lionel Messi និង Kylian Mbappe ជាដើម សុទ្ធតែមានឈ្មោះ ប៉ុន្តែ Cristiano Ronaldo វិញ មិនមានវត្តមាននៅក្នុងបញ្ជីឈ្មោះស្ដីពីកីឡាករឆ្នើមបំផុតប្រចាំឆ្នាំ 2022 ដែលជ្រើសរើសដោយទីភ្នាក់ងារសារព័ត៌មានកីឡាបារាំង L’Équipe។

ក្នុងក្រុមទម្រង់ 4-4-2 ដែល L’Équipe បានប្រកាសកាលពីថ្ងៃទី 24 ធ្នូ 2022 Mbappe និង Karim Benzema ត្រូវបានដាក់ជាគូនៅលើខ្សែប្រយុទ្ធ។ Mbappe ទទួលបានជោគជ័យក្នុងឆ្នាំនេះ ទាំងនៅក្នុងថ្នាក់ក្លឹប ទាំងថ្នាក់ក្រុមជម្រើសជាតិ ដោយរកបាន 55 គ្រាប់។ ខ្សែប្រយុទ្ធវ័យ 24 ឆ្នាំនេះ បង្កើតបាន hat-trick (ស៊ុតបញ្ចូលទី 3 គ្រាប់ក្នុង 1 ប្រកួត) ក្នុងវគ្គផ្ដាច់ព្រ័ត្រនៅ World Cup 2022 ពេលប៉ះនឹង អាហ្សង់ទិន ហើយដណ្ដើមបានស្បែកជើងមាសសម្រាប់តំណែងស្ដេចកម្ទេចសំណាញ់ ដោយរកបាន 8 គ្រាប់ និងដណ្ដើមបានពាន Ligue 1 ជាមួយនឹងក្លឹប PSG។

Benzema មិនបានចូលរួមប្រកួតនៅ World Cup 2022 ប៉ុន្តែ ជាកីឡាខ្លាំងនៅថ្នាក់ក្លឹប ដោយសាររកបានពានរង្វាន់ធំៗចំនួន 3 ក្នុង 1 រដូវកាល (Treble) រួមមាន Super Cup អេស្ប៉ាញ, La Liga, Champions League នាំឱ្យគាត់ទទួលបានគ្រាប់បាល់មាស។ ជាសរុប Benzema ស៊ុតបញ្ចូលទីបាន 31 គ្រាប់ក្នុង 12 ខែកន្លង។

កីឡាករបារាំង មួយរូបផ្សេងទៀតដែលមានឈ្មោះក្នុងបញ្ជីរបស់ L’Équipe គឺ Theo Hernandez។ ចំណែក Messi ត្រូវបានដាក់ក្នុងខ្សែបម្រើខាងស្ដាំក្នុងក្រុមរបស់ L’Équipe។ Messi មិនសូវជោគជ័យនៅ PSG ប៉ុន្តែ នៅ World Cup 2022 កីឡាករអាហ្សង់ទីន រូបនេះ ដណ្ដើមបានពានរង្វាន់ជាច្រើន ដោយស៊ុតបញ្ចូលទីបាន 7 គ្រាប់។

L’Équipe ក៏បានលើកតម្កើង កីឡាករ 4 រូបនៅ លីគកំពូលអង់គ្លេស (English Premier League) គឺ Kevin de Bruyne, Kyle Walker, Casemiro និង Virgil van Dijk។ អតីតមិត្តរួមក្រុមពីរនាក់របស់កីឡាករប្រេស៊ីល គឺ ខ្សែបម្រើ Luka Modriic និងអ្នកចាំទី Thibaut Courtois ក៏មានវត្តមានផងដែរ។

ទីតាំងចុងក្រោយក្នុងក្រុមរបស់ L’Équipe គឺបានទៅលើ Josko Gvardiol។ នៅ World Cup 2022 ខ្សែការពារវ័យ 20 ឆ្នាំនេះ ទប់ស្កាត់បាល់បាន 37 លើក និងអូសបាល់ឡើងទៅលើបាន 202 លើក ហើយដណ្ដើមបានបាល់ 48 លើក។

បញ្ជីឈ្មោះក្រុមកីឡាករបាល់ទាត់ឆ្នើមបំផុតឆ្នាំ 2022 របស់ L’Équipe

Cristiano Ronaldo មិនមានឈ្មោះក្នុងបញ្ជីនេះរបស់ L’Équipe។ នៅ Man Utd កីឡាករនេះបាត់បង់តំណែងជាកីឡាករជម្រើសដំបូង និងរកបានតែ 3 គ្រាប់។ នៅ World Cup 2022 Ronaldo ក៏រកបានតែ 1 គ្រាប់ និងបាត់បង់តំណែងជាកីឡាករជម្រើសដំបូងនៅពេល ព័រទុយហ្កាល់ ឈ្មោះ ស្វ៊ីស 6-1 ក្នុងវគ្គ 18 ក្រុម និងចាញ់ ម៉ារ៉ុក 0-1 ក្នុងវគ្គ 8 ក្រុម។

L’Équipe គឺជាទីភ្នាក់ងារសារព័ត៌មានកីឡាដែលត្រូវបានបង្កើតឡើងកាលពីឆ្នាំ 1946 និងមានឈ្មោះល្បីល្បាញ និងពេញនិយមជាងគេនៅ ប្រទេសបារាំង៕

December 26, 2022

កម្ពុជា បើកការដ្ឋានស្ដារ និងលើកកម្រិតគុណភាពផ្លូវជាតិលេខ 41 ពីខេត្តកណ្ដាលដល់ខេត្តកំពក

ផ្លូវជាតិលេខ 41 អតីតផ្លូវព្រះបាទអង្គឌួង ពីថ្នល់ទទឹង ខេត្តកណ្ដាល រហូតដល់ស្រុកជុំគិរី ខេត្តកំពត ត្រូវបានប្រកាសបើកការដ្ឋានស្ដារ និងលើកកម្រិតគុណភាពនៅព្រឹកថ្ងៃទី 26 ធ្នូ 2022 នេះបើតាម ក្រសួងសាធារណការ និងដឹកជញ្ជូន។

ក្នុងពិធីសម្ពោធក្រោមអធិបតីភាពសម្ដេចតេជោ ហ៊ុន សែន ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានឱ្យដឹងថា គម្រោងស្ដារ និងលើកកម្រិតគុណភាពផ្លូវជាតិលេខ 41 នឹងត្រូវសាងសង់ជាប្រភេទផ្លូវក្រាលបេតុងកៅស៊ូ AC កម្រាស់ 5 សង់ទីម៉ែត្រ និងពង្រីកទទឹងតួផ្លូវរហូតដល់ 12 ម៉ែត្រ។ គម្រោងនេះ នឹងពង្រីកស្ពានចាស់ចំនួន 1 កន្លែង ដាក់លូ បំពាក់កាមេរ៉ាត្រួតពិនិត្យល្បឿនជាដើម។ល។

ផ្លូវជាតិលេខ 41 នេះ ឆ្លងកាត់ខេត្តចំនួន 4 រួមមាន ខេត្តកណ្តាល កំពង់ស្ពឺ តាកែវ និងខេត្តកំពត ក៏ដូចជាតភ្ជាប់ទៅកាន់កំពង់ផែពហុបំណងខេត្តកំពត និងមជ្ឈមណ្ឌលភស្តុភារកម្មដែលកំពុងសាងសង់ កំពង់ផែទេសចរណ៍ខេត្តកំពត និងកំពង់ផែទេសចរណ៍ខេត្តកែប-កោះទន្សាយ ដែលទើបសាងសង់រួច។ តាមរយៈខ្សែផ្លូវជាតិលេខ 3 លេខ 4 លេខ 31 និងលេខ 33 ផ្លូវជាតិលេខ 41 នេះក៏តភ្ជាប់ទៅតំបន់ទេសចរណ៍ធម្មជាតិ ដែលនៅតាមបណ្តាខេត្តព្រះសីហនុ ខេត្តកែប និងខេត្តកំពតផងដែរ។

គម្រោងដែលមានប្រវែងសរុបជាង 95 គីឡូម៉ែត្រ គិតចាប់ពីថ្នល់ទទឹង (ចំណុចប្រសព្វផ្លូវជាតិលេខ 4) ខេត្តកណ្តាល ទៅដល់ស្រុកជុំគិរី (ចំណុចប្រសព្វផ្លូវជាតិលេខ 3) ខេត្តកំពត នេះ នឹងត្រូវអនុវត្តការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ហើយគ្រោងនឹងបញ្ចប់ការសាងសង់នៅអំឡុងឆ្នាំ 2026។ គម្រោងនេះនឹងចំណាយថវិកាសរុបជាង 67 លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា៕

December 26, 2022

ទិដ្ឋភាពព្យុះព្រឹលវាយប្រហារទឹកដីអាម៉េរិក ក្នុងរដូវបុណ្យណូអែល

ព្យុះព្រឹលដ៏ធំកើតមាននៅក្នុងរដូវបុណ្យណូអែលឆ្នាំនេះ នាំឱ្យមានព្រឹលធ្លាក់យ៉ាងក្រាស់ បណ្ដាលឱ្យតំបន់ខ្លះត្រូវកក បង្កផលប៉ះពាល់ធ្ងន់ធ្ងរដល់មនុស្សរាប់លាននាក់នៅ សហរដ្ឋអាម៉េរិក។

ព្យុះព្រឹលចាប់ផ្ដើមកើតមានពីតំបន់សម្ពាធទាបលើ Five Great Lakes បន្តប្រែប្រួលនៅ សហរដ្ឋអាម៉េរិក បង្កការខូចខាតក្នុងទ្រង់ទ្រាយធំ ធ្វើឱ្យកកស្ទះចរាចរណ៍ក្នុងរដូវបុណ្យណូអែល។ រដ្ឋជាច្រើនស្ថិតក្នុងស្ថានភាពព្រឹលធ្លាក់យ៉ាងក្រាស់ និងមានភ្លៀង ទឹកជំនន់ ហើយអាកាសធាតុចុះត្រជាក់ខ្លាំង។

ទ្រង់ទ្រាយរបស់ព្យុះព្រឹលនេះ ស្ទើរតែមិនធ្លាប់មានពីមុនមក ដោយវាអូសបន្លាយពីតំបន់ Five Great Lakes ក្បែរ ប្រទេសកាណាដា រហូតដល់ Rio Grande តាមបណ្ដោយព្រំដែនជាមួយនឹង ម៉ិកស៊ិក។

ស្ថាប័នជាតិឧតុនិយម (NWS) គណនាឃើញថា ពលរដ្ឋអាម៉េរិក ប្រហែល 60% បានទទួលសេចក្ដីព្រមាន ឬការណែនាំអំពីគ្រោះថ្នាក់ធម្មជាតិមួយនេះ។ ជើងហោះហើរជាង 2,300 ត្រូវបានលុបចោលក្នុងថ្ងៃទី 24 ធ្នូ។

អភិបាលក្រុង New York បានឱ្យដឹងថា រថយន្តពន្លត់អគ្គិភ័យស្ទើរតែទាំងអស់ត្រូវជាប់គាំង។ ព្រលានយន្តហោះក្នុងទីក្រុងត្រូវបិទទ្វាររហូតដល់ថ្ងៃទី 26 ធ្នូ។

បាតុភូតធម្មជាតិដ៏អាក្រក់នេះ ក៏ធ្វើឱ្យផ្ទះ និងទីតាំងអាជីវកម្មរាប់សែនកន្លែងនៅ សហរដ្ឋអាម៉េរិក ត្រូវដាច់ភ្លើង។ មនុស្សរាប់លាននាក់រស់នៅក្នុងស្ថានភាពព្រួយបារម្ភអំពីការដាច់ភ្លើង ខណៈដែលសកម្មភាពរបស់ប៉ូលិស និងកម្លាំងពន្លត់អគ្គិភ័យក៏ត្រូវជាប់គាំង។

យ៉ាងហោចណាស់មានមនុស្ស 22 នាក់បានស្លាប់នៅក្នុងហេតុការណ៍ទាក់ទងនឹងព្យុះព្រឹលនៅ សហរដ្ឋអាម៉េរិក។ តំបន់មួយចំនួនមានសីតុណ្ហភាពចុះត្រជាក់ខ្លាំង អាចគំរាមកំហែងដល់អាយុជីវិតរបស់អ្នកដំណើរដែលជាប់នៅលើដងផ្លូវដោយសារព្រឹល៕

December 26, 2022

តម្លៃខ្លួនរបស់កីឡាករជម្រើសជាតិអាហ្សង់ទីន កើនឡើងខ្ពស់ ក្រោយ World Cup 2022

តម្លៃខ្លួនរបស់ក្រុមជម្រើសជាតិអាហ្សង់ទីន កើន 69 លានដុល្លារអាម៉េរិក បន្ទាប់ពីដណ្ដើមបានពានរង្វាន់ជើងឯក World Cup 2022 នេះបើតាមសារព័ត៌មានកីឡារបស់ អាល្លឺម៉ង់ Transfermarkt ចុះផ្សាយកាលពីថ្ងៃទី 23 ធ្នូ។

ក្រុមជម្រើសជាតិអាហ្សង់ទីន មានកីឡាករ 7 រូបដែលមានតម្លៃខ្លួនកើនឡើងខ្ពស់នៅក្នុងទីផ្សារទិញដូរកីឡាករ ពិសេសគឺ Enzo Fernandez។ ដោយតម្លៃខ្លួនកើនពី 37 លាន ឡើងដល់ 58 លានដុល្លារអាម៉េរិក Fernandez គឺជាកីឡាករដែលមានតម្លៃខ្លួនកើនឡើងខ្ពស់ខ្លាំងជាងគេនៅឆ្នាំ 2022។

កាលពីរដូវក្ដៅ 2021 Benfica ទិញកីឡាករ Fernandez វ័យ 21 ឆ្នាំ ពី River Plate ក្នុងតម្លៃមិនដល់ 13 លានដុល្លារអាម៉េរិក។ Benfica ត្រូវបានគេជឿថា នឹងរកបានប្រាក់ចំណេញច្រើនពីការដោះដូរកីឡាករ Fernandez នៅរដូវកាលទិញដូរកីឡាករខាងមុខ។ កិច្ចសន្យារបស់ Fernandez ជាមួយនឹង Benfica នៅមានសុពលភាពដល់ឆ្នាំ 2027។

Fernandez ទទួលបានការសាទរខ្លាំងនៅពេលបណ្ដើរបាល់ និងស៊ុតបាល់ហោះកោងខ្ពស់សំដៅទី ជួយឱ្យ អាហ្សង់ទីន ឈ្នះ ម៉ិកស៊ិក 2-0 ក្នុងការប្រកួតជុំទីពីរនៃវគ្គសន្សំពិន្ទុរបស់ World Cup 2022។ ក្រោយរកបាន 1 គ្រាប់នេះ Fernandez ក៏ក្លាយជាកីឡាករជម្រើសដំបូង ហើយត្រូវបានជ្រើសរើសជាកីឡាករវ័យក្មេងឆ្នើមបំផុតនៅ World Cup 2022។ Fernandez មានតម្លៃខ្លួនស្មើនឹងខ្សែបម្រើ Cristian Romero របស់ Tottenham ហើយក៏ជាកីឡាករដែលមានតម្លៃខ្លួនខ្ពស់ជាងគេលំដាប់ទីពីរក្នុង ក្រុមជម្រើសជាតិអាហ្សង់ទីន បន្ទាប់ពី Lautaro Martinez។

ក្នុង ក្រុមជម្រើសជាតិអាហ្សង់ទីន ក្រៅពី Fernandez ក៏នៅមានកីឡាករច្រើនរូបទៀតដែលមានតម្លៃខ្លួនកើនឡើងខ្ពស់ រួមមានដូចជា Julian Alvarez កើនពី 34 លាន ឡើងដល់ 53 លានដុល្លារអាម៉េរិក និង Lionel Messi 53 លានដុល្លារ។

កីឡាករអាហ្សង់ទីន ដែលត្រូវបានកំណត់តម្លៃខ្លួនទាបជាងគេគឺ Nicolas Otamendi (3.1 លានដុល្លារ), Franco Armani (3.4 លាន), Alejandro Gomez (4.2 លាន) និង German Pezzella (5.3 លាន)។ ចំណែកកីឡាករលេចធ្លោ រួមមាន Emiliano Martinez (26.6 លាន), Alexis Mac Allister (34 លាន), Rodrigo De Paul (37 លាន), និង Nahuel Molina (19 លាន)។

តម្លៃខ្លួនសរុបរបស់កីឡាករជម្រើសជាតិអាហ្សង់ទីន នាបច្ចុប្បន្នគឺ 757 លានដុល្លារអាម៉េរិក ខ្ពស់ជាង 69 លានដុល្លារ ធៀបនឹង 688 លានដុល្លារ មុន World Cup 2022៕

December 24, 2022

Richarlison ទទួលបាន «ពានរង្វាន់ស៊ុតបញ្ចូលទីល្អបំផុត» នៅ World Cup 2022

(កាតា)- ការលោតផ្ដេកខ្លួនទាត់បាល់បញ្ចូលទីក្នុងការប្រកួតដែល ប្រេស៊ីល ឈ្នះ ស៊ែប៊ី 2-0 ត្រូវបានជ្រើសរើសជាឈុតស៊ុតបញ្ចូលទីល្អបំផុតនៅ World Cup 2022 ដែលទើបតែបានបញ្ចប់នៅ កាតា កាលពីថ្ងៃទី 18 ធ្នូ 2022។

កាលពីថ្ងៃទី 23 ធ្នូ FIFA បានប្រកាសថា Richarlison របស់ ក្រុមជម្រើសជាតិប្រេស៊ីល គឺជាអ្នកទទួលបាន«ពានរង្វាន់ស៊ុតបញ្ចូលទីល្អបំផុត» នៅ World Cup 2022។ ឈុតស៊ុតបាល់បញ្ចូលទីរបស់ខ្សែប្រយុទ្ធជនជាតិប្រេស៊ីល នៅក្នុងជុំដំបូងក្នុងពូល G ដែល ស៊ែប៊ី បានចាញ់ 2-0 កាលពីថ្ងៃទី 24 វិច្ឆិកា 2022 ទទួលបានសន្លឹកឆ្នោតគាំទ្រច្រើនជាងគេបង្អស់នៅក្នុងការបោះឆ្នោតជ្រើសរើសលើគេហទំព័ររបស់ FIFA។

Richarlison ស៊ុតបញ្ចូលទីដោយប្រើប្រាស់បច្ចេកទេសល្អបំផុតនៅពេលទទួលគ្រាប់បាល់ពីស្លាបខាងឆ្វេងរបស់ Vinicius នៅនាទីទី 73។ បន្ទាប់ពីការទទួលបាល់ ខ្សែប្រយុទ្ធរបស់ក្លឹប Tottenham នេះ ក៏បានលោតឡើង ផ្ដេកខ្លួនទាត់បាល់នៅកណ្ដាលកីឡាករ 3 នាក់របស់ ស៊ែប៊ី។ Richarlison ក៏ជាកីឡាករដែលរកបានគ្រាប់បាល់ឈ្នះដំបូងនៅនាទីទី 62 ផងដែរ។

យោងតាមសារព័ត៌មាន Sun ឈុតទាត់បាល់បញ្ចូលទីដ៏ស្អាតរបស់ Richarlison ក៏អាចនឹងទទួលបានពានរង្វាន់ Puskas សម្រាប់ឆ្នាំ 2022។ FIFA នឹងប្រកាសលទ្ធផលនៅក្នុងពិធីប្រគល់ពាន់រង្វាន់នានានៅដើមឆ្នាំ 2023។

https://www.youtube.com/watch?v=ZdKMjICkpXI

Richarlison ធ្លាប់លេង 5 រដូវកាលនៅ English Premier League, ស៊ុតបញ្ចូលទីបាន 53 គ្រាប់នៅក្នុង 152 ប្រកួតសម្រាប់ Watford និង Everton។ ចាប់ពីដើមរដូវកាល 2022-2023 ខ្សែប្រយុទ្ធវ័យ 25 ឆ្នាំរូបនេះ ទើបតែរកបាន 2 គ្រាប់ក្នុង 15 ប្រកួត សម្រាប់ Tottenham៕

December 24, 2022

រថយន្តអាចរត់បណ្ដើរ បញ្ចូលថាមពលអគ្គិសនីបណ្ដើរ លើផ្លូវល្បឿនលឿននៅ អាល្លឺម៉ង់

នៅពេលមនុស្សកំពុងឆ្ពោះទៅរកអនាគតដែលទីផ្សារត្រូវបានគ្រប់គ្រងដោយរថយន្តអគ្គិសនី ការប្រឹងប្រែងក្នុងការអភិវឌ្ឍ និងបង្ហាញប្រព័ន្ធបញ្ចូលថាមពលអគ្គិសនីដោយមិនប្រើខ្សែនៅលើដងផ្លូវ ក៏កំពុងតែកើនឡើង។

ពេលនេះ បណ្ដាញផ្លូវល្បឿនលឿន Autobahn ដ៏ល្បីឈ្មោះនៅ ប្រទេសអាល្លឺម៉ង់ នឹងត្រូវបានបំពាក់ប្រព័ន្ធបញ្ចូលថាមពលអគ្គិសនីគ្មានខ្សែ ដែលដំណាក់កាលដំបូងនឹងផ្ដោតទៅលើរថយន្តក្រុងសាធារណៈ ដែលដឹកអ្នកដំណើរទៅកាន់ទីក្រុង Balingen។

បច្ចេកវិទ្យានេះនឹងផ្គត់ផ្គង់ដោយក្រុមហ៊ុន Electreon របស់ អ៊ីស្រាអែល ដែលកំពុងសហការជាមួយ EnBW របស់ អាល្លឺម៉ង់។ Electreon នឹងដាក់ពង្រាយបណ្ដាញផ្លូវអគ្គិសនី (ERS) ប្រវែង 1 គីឡូម៉ែត្រ អមតាមផ្លូវមួយកំណាត់របស់ផ្លូវល្បឿនលឿន Autobahn ដើម្បីផ្គត់ផ្គង់អគ្គិសនីគ្មានខ្សែនៅពេលរថយន្តក្រុងកំពុងធ្វើដំណើរ។ ផ្លូវ Autobahn ក៏នឹងមានស្ថានីយបញ្ចូលថាមពលអគ្គិសនី 2 កន្លែងផងដែរ។

គម្រោងខាងលើនេះត្រូវបានកំណត់បន្ទាប់ពីគម្រោងសាកល្បងមួយរបស់ក្រុមហ៊ុនទាំងពីរ នៅ Karlsruhe របស់ អាល្លឺម៉ង់ ទទួលបានជោគជ័យ។ ក្រុមហ៊ុនអ៊ីស្រាអែល ក៏បានដំណើរការគម្រោងបញ្ចូលថាមពលអគ្គិសនីគ្មានខ្សែនៅ អ៊ីតាលី និង ស៊ុយអែត ផងដែរ៕

December 24, 2022

Author: សឿន សំណាង