សឿន សំណាង - La Reine Media

ពីឡុតរុស្ស៊ីបង្ហោះវីដេអូបង្ហាញពីយន្តហោះចម្បាំងហោះកៀកនឹង UAV របស់អាម៉េរិក

យន្តហោះចម្បាំងក្នុងត្រកូល Su-27 របស់រុស្ស៊ី ហោះទៅក្បែរយន្តហោះគ្មានមនុស្សបើក MQ-9 របស់អាម៉េរិក និងហោះទៅហួសព្រោះតែល្បឿនខុសគ្នា នៅក្នុងវីដេអូដែលទើបតែបង្ហោះនាពេលថ្មីៗនេះ ក្រោយពីមានហេតុការណ៍ធ្លាក់យន្តហោះ UAV របស់អាម៉េរិកនៅសមុទ្រខ្មៅ។

គណនី Fighter Bomber របស់អ្នកបើកបរយន្តហោះចម្បាំងរុស្ស៊ីម្នាក់ កាលពីថ្ងៃទី 15 មីនា បានបង្ហោះវីដេអូលើ Telegram បង្ហាញអំពីយន្តហោះចម្បាំងរុស្ស៊ី កំពុងហោះក្បែរយន្តហោះគ្មានមនុស្សបើក (UAV) MQ-9 របស់អាម៉េរិក។ ពេលវេលា និងទីកន្លែងថតវីដេអូនេះមិនត្រូវបានបង្ហើបឱ្យដឹង ហើយក៏មិនច្បាស់ថា នេះគឺជា MQ-9 ដែលបានធ្លាក់លើសមុទ្រខ្មៅ ឬយ៉ាងណានៅឡើយ។

វីដេអូមានរយៈពេលបួនវិនាទីបង្ហាញថា យន្តហោះចម្បាំងនេះស្ថិតក្នុងត្រកូល Su-27 តែមិនច្បាស់អំពីកំណែ ហោះទៅក្បែរ UAV អាម៉េរិកពីក្រោយ និងពីខាងស្ដាំ។ គម្លាតនេះអាចឱ្យគេមើលឃើញច្បាស់ផ្លាកលេខ «294» របស់ UAV។ UAV នេះគឺជាម៉ូដែល MQ-9 ប្រើប្រាស់ស្លាបកង្ហារចំនួនបួន និងត្រូវបានដំឡើងធុងប្រេងបន្ថែមដើម្បីបង្កើនចម្ងាយនៃការហោះហើរ ព្រមទាំងមានអង់តែនថ្មីនៅត្រង់ពោះរបស់វា។

ក្នុងវីដេអូ យន្តហោះទាំងពីរសុទ្ធតែហោះប្រកបដោយស្ថិរភាព មិនមានការហោះឆ្វែល ឬគំរាមដល់សុវត្ថិភាពគ្នា។ Su-27 របស់រុស្ស៊ី ហោះលឿនជាងឆ្ងាយធៀបនឹង UAV របស់អាម៉េរិក។

«នេះអាចជាមូលហេតុមួយដែលនាំឱ្យមានការប៉ះទង្គិតគ្នា ក្នុងនោះ យន្តហោះរុស្ស៊ីទំនងជាបានប៉ះ UAV ដោយអចេតនា ពេលដែល UAV របស់អាម៉េរិកផ្លាស់ប្ដូរល្បឿន ឬទិសដៅហោះហើរ» អ្នកជំនាញ Thomas Newdick របស់ទំព័រយោធា War Zone យល់ដូច្នេះ។

បញ្ជាការដ្ឋានកងទ័ពប្រចាំអឺរ៉ុបរបស់អាម៉េរិក បានឱ្យដឹងថា យន្តហោះចម្បាំង Su-27 ពីរគ្រឿងរបស់រុស្ស៊ី បានហោះមកក្បែរ ហោះកាត់មុខ និងបាញ់ប្រេងសាំងទៅលើ UAV MQ-9 Reaper នៅលើតំបន់សមុទ្រអន្តរជាតិកាលពីថ្ងៃទី 14 មីនា មុនពេលយន្តហោះ Su-27 មួយគ្រឿងផ្សេងទៀតប៉ះទង្គិចលើស្លាបកង្ហាររបស់ UAV បង្ខំឱ្យទ័ពអាកាសអាម៉េរិកទម្លាក់ UAV ចូលក្នុងសមុទ្រ។

មន្ទីរបញ្ចកោណនិយាយថា MQ-9 ពេលនោះកំពុងឈ្លបយកការណ៍ដូចធម្មតា។ អាម៉េរិកប្រើប្រាស់ MQ-9 សម្រាប់សកម្មភាពឈ្លបយកការណ៍ និងវាយប្រហារគោលដៅលើដី។ យន្តហោះគ្មានមនុស្សបើកនេះតែងហោះលើសមុទ្រខ្មៅដើម្បីតាមដានកងទ័ពរុស្ស៊ី។

ក្រុមមន្ត្រីរុស្ស៊ីបានច្រានចោលការចោទប្រកាន់ពីអាម៉េរិក និងយល់ថា UAV របស់អាម៉េរិកផ្លាស់ប្ដូរទិសដៅរហ័ស និងធ្លាក់ដោយឯកឯងនៅពេលបាត់បង់ការគ្រប់គ្រង។ ឯកអគ្គរដ្ឋទូតរុស្ស៊ីប្រចាំអាម៉េរិក Anatoly Antonov អះអាងថា MQ-9 កំពុងប្រមូលទិន្នន័យដើម្បីបញ្ជូនទៅឱ្យអ៊ុយក្រែន មុនពេលត្រូវធ្លាក់។

វីដេអូបង្ហាញពីយន្តហោះចម្បាំងរបស់រុស្ស៊ី ហោះកៀកនឹង UAV របស់អាម៉េរិក

នេះគឺជាការប៉ះទង្គិចផ្ទាល់ជាលើកដំបូងរវាងកងកម្លាំងរុស្ស៊ី និងអាម៉េរិក រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើងកាលពីខែកុម្ភៈឆ្នាំកន្លង។ ហេតុការណ៍នេះមិនបានធ្វើឱ្យមានការប្រឈមមុខដាក់គ្នានៅកន្លែងជាក់ស្ដែងបន្ទាប់ទៀតនោះទេ ប៉ុន្តែវាធ្វើឱ្យទ័ពអាកាសអាម៉េរិកខាតបង់អស់យ៉ាងតិច 30 លានដុល្លារអាម៉េរិក នៅពេល MQ-9 Reaper បានបាត់ខ្លួនទាំងស្រុងពីអាកាស៕

March 16, 2023

ទីក្រុងរបស់ឥណ្ឌូណេស៊ី តម្រូវឱ្យសិស្សចូលថ្នាក់រៀនតាំងពីព្រឹកព្រលឹម

ទីក្រុង Kupang ភាគខាងកើតប្រទេសឥណ្ឌូណេស៊ី កំពុងសាកល្បងកម្មវិធីសិក្សាមួយដែលតម្រូវឱ្យសិស្សចូលថ្នាក់រៀននៅវេលាម៉ោង 5 និង 30 នាទីព្រឹក ដើម្បី «លើកកម្ពស់វិន័យ» បង្កឱ្យមានមតិចម្រូងចម្រាសក្នុងសង្គម។

ទិដ្ឋភាពសិស្សសាលាស្ងាបពេលកំពុងធ្វើដំណើរទៅកាន់សាលារៀននៅពេលព្រឹកព្រលឹម បានក្លាយជារឿងសាមញ្ញនៅក្នុងប៉ុន្មានថ្ងៃកន្លងទៅនៅ Kupang ដែលជាទីក្រុងរដ្ឋបាលរបស់ខេត្ត Nusa Tenggara ភាពខាងកើត របស់ប្រទេសឥណ្ឌូណេស៊ី។ នោះគឺជាសិស្សចុងកម្រិតរបស់សាលាវិទ្យាល័យចំនួនដប់ដែលកំពុងអនុវត្តកម្មវិធីសាកល្បងចូលសាលារៀននៅម៉ោង 05 និង 30 នាទីព្រឹក។

កម្មវិធីដែលត្រូវបានប្រកាសកាលពីខែមុនដោយលោក Viktor Laiskodat អភិបាលក្រុង Kupang នេះ គឺធ្វើឡើងក្នុងលើកម្ពស់វិន័យសម្រាប់សិស្ស។ ក៏ប៉ុន្តែ កម្មវិធីទទួលបានការរិះគន់ច្រើនពីសាធារណជន។ អាណាព្យាបាលរបស់សិស្សនិយាយថា កូនៗរបស់ពួកគាត់អស់កម្លាំងខ្លាំងពេលត្រលប់មកផ្ទះ។ សាលារៀនផ្សេងទៀតនៅឥណ្ឌូណេស៊ី ជាធម្មតាតម្រូវឱ្យសិស្សចាប់ផ្ដើមរៀនពីម៉ោង 07 ឬម៉ោង 08 ព្រឹក។

អាជ្ញាធរឥណ្ឌូណេស៊ីបានស្នើឱ្យរដ្ឋាភិបាលធ្វើអន្តរាគមន៍ ពិនិត្យឡើងវិញចំពោះកម្មវិធីខាងលើ។ ចំណែកក្រុមមន្ត្រីក្នុងតំបន់ក៏បានស្នើឱ្យលុបចោលកម្មវិធីដែលពួកគេហៅថា «គោលនយោបាយគ្មានហេតុផល» ចំពោះសិស្សមួយនេះផងដែរ៕

March 15, 2023

តំណាងរាស្ត្រជប៉ុនមួយរូបដែល «មិនចូលធ្វើការសោះ» ត្រូវសភាដកហូតអភ័យឯកសិទ្ធិ

សមាជិកសភាជាន់ខ្ពស់ជប៉ុន Higashitani មានប្រភពពី YouTuber ល្បីឈ្មោះ ត្រូវបានដកហូតអភ័យឯកសិទ្ធិជាតំណាងរាស្ត្រ ព្រោះតែមិនបានមកកន្លែងធ្វើការទាល់តែសោះចាប់តាំងពីបានជាប់ឆ្នោតកាលពីឆ្នាំកន្លង។

ក្រុមប្រឹក្សាវិន័យរបស់សភាជប៉ុន កាលពីថ្ងៃទី 14 មីនា 2023 បានសម្រេចដកហូតអភ័យឯកសិទ្ធិនៅសភាជាន់ខ្ពស់របស់លោក Yoshikazu Higashitani ដែលត្រូវបានគេស្គាល់ថា GaaSyy អាយុ 51 ឆ្នាំ ដោយសារមិនដែលមកចូលរួមកិច្ចប្រជុំណាមួយសោះ ចាប់តាំងពីបានជាប់ឆ្នោតកាលពីខែកក្កដា 2022។

ការសម្រេចចិត្តរបស់សភាជប៉ុននេះត្រូវបានធ្វើឡើងបន្ទាប់ពីបានស្នើឱ្យលោក GaaSyy មកកាន់រាជធានីតូក្យូដើម្បីសូមអភ័យទោសដោយផ្ទាល់ចំពោះអវត្តមានជាបន្តបន្ទាប់របស់ខ្លួន និងបន្ថែមថា នេះគឺជាឱកាសចុងក្រោយរបស់លោក។ ក៏ប៉ុន្តែ GaaSyy មិនបានបង្ហាញខ្លួន ហើយនៅតែធ្វើសកម្មភាពលើឆានែល YouTube ប្រកាសពីគម្រោងជួយដល់ហេតុការណ៍រញ្ជួយដីនៅប្រទេសតួកគី។

តំណែងរបស់ GaaSyy នឹងត្រូវបានដាក់ជំនួសដោយបេក្ខភាពមួយរូបមកពីបក្ស Seijika Joshi 48 របស់លោក។ ជំនួសមុខឱ្យ GaaSyy តំណាងរាស្ត្រ Satoshi Hamada របស់បក្ស Seijika Joshi 48 បានជំទាស់នឹងការសម្រេចរបស់សភា ដោយថ្លែងថា វាផ្ទុយទៅនឹងបំណងរបស់អ្នកដែលបានបោះឆ្នោតជូន GaaSyy។

មុនពេលបានក្លាយជាតំណាងរាស្ត្រ លោក GaaSyy មានឈ្មោះល្បីនៅលើបណ្ដាញសង្គម YouTube ដោយសារតែធ្វើវីដេអូនិយាយពីបុគ្គលល្បីឈ្មោះជាប្រចាំ។

លោក Yoshikazu Higashitani ដែលត្រូវបានគេស្គាល់ថា GaaSyy

លោក GaaSyy ត្រូវបានគេជឿថា កំពុងស្ថិតនៅទីក្រុងឌូបៃ ប្រទេសអេមីរ៉ាតអារ៉ាប់រួម។ លោក GaaSyy ប្រាប់ថា មិនអាចវិលត្រលប់មកកាន់ជប៉ុន ព្រោះបារម្ភពីការចាប់ខ្លួន។ នៅជប៉ុន ប៉ូលិសកំពុងស៊ើងអង្កេតលើរូបលោក GaaSyy ក្រោមការចោទប្រកាន់ពីបទគំរាម និងបរិហាកេរ្តិ៍បុគ្គលល្បីឈ្មោះ នៅក្នុងបណ្ដាវីដេអូដែលលោកបានបង្ហោះលើបណ្ដាញសង្គម។

ការដកហូតអភ័យឯកសិទ្ធិរបស់តំណាងរាស្ត្រគឺជាការពិន័យធ្ងន់ធ្ងរបំផុតសម្រាប់សមាជិកសភានៅជប៉ុន។ រាប់ចាប់ពីឆ្នាំ 1950 សភាជប៉ុនបានសម្រេចចិត្តដកអភ័យឯកសិទ្ធិតែពីរករណីប៉ុណ្ណោះ ហើយលោក Yoshikazu Higashitani គឺជាតំណាងរាស្ត្រដំបូងដែលត្រូវបានបណ្ដេញពីសភា ព្រោះតែអវត្តមានជាបន្តបន្ទាប់៕

March 15, 2023

កែវយឹតអវកាស James Webb ថតបានវត្ថុអវកាសខ្នាតយក្សដែលជិតផ្ទុះជាស៊ូពើណូវ៉ា

កែវយឹតអវកាស James Webb របស់ណាសា បានបញ្ជូនមកកាន់ផែនដីនូវរូបថតលំអិតមិនធ្លាប់បានឃើញពីមុនរបស់ផ្កាយធំមួយដួងដែលកំពុងស្ថិតក្នុងដំណាក់កាលចុងក្រោយនៃជីវិត។

ផ្កាយមួយដួងនេះត្រូវបានគេហៅថា WR 124 ដែលមានចម្ងាយពីផែនដីប្រហែល 15,000 ឆ្នាំពន្លឺ (ឆ្នាំពន្លឺគឺជាការធ្វើដំណើរក្នុងមួយឆ្នាំរបស់ពន្លឺ ហើយមួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ) នៅក្នុងកញ្ចុំផ្កាយ Sagittarius។ ផ្កាយនេះធ្ងន់ជាង 30 ដងធៀបនឹងព្រះអាទិត្យ ហើយបានបញ្ចេញឧស្ម័ន ធូលីប្រហាក់ប្រហែល 10 ដង ធៀបនឹងព្រះអាទិត្យ គិតត្រឹមពេលត្រូវបានសង្កេត។

ក្នុងរូបភាពដែលថតបានដោយកាម៉េរិកនានារបស់កែវយឹតអវកាស James Webb និងត្រូវបានណាសាប្រកាសបង្ហាញកាលពីថ្ងៃទី 14 មីនា ផ្កាយ WR 124 លេចឡើងយ៉ាងច្បាស់នៅចំកណ្ដាលពពកធូលី ឬនេប៊ូឡា (Nebula) ដែលមានអង្កត់ផ្ចិតឡើងដល់ 10 ឆ្នាំពន្លឺ។

ផ្កាយ WR 124 លេចឡើងយ៉ាងច្បាស់នៅចំកណ្ដាលពពកធូលី ឬនេប៊ូឡា (Nebula)

ពពកធូលីដ៏ធំសម្បើមនេះគឺជាវត្ថុធាតុដែលខ្ទាតចេញពីផ្កាយចាស់ៗនៅក្នុងការបញ្ចេញឧស្ម័នដ៏ច្របូកច្របល់។ នេះគឺជាសញ្ញាបង្ហាញថា ផ្កាយកំពុងស្ថិតក្នុងដំណាក់កាលបាត់បង់ម៉ាស មុនពេលក្លាយទៅជាស៊ូពើណូវ៉ា (supernova) ជាពេលដែលប្រតិកម្មសរុបរបស់នុយក្លេអែរក្នុងស្នូលផ្កាយឈប់ដំណើរការ ហើយសម្ពាធរបស់ទម្ងន់ធ្វើឱ្យវាដួលរលំ និងផ្ទុះ។

https://www.youtube.com/watch?v=qWIbotZoTM8

ផ្កាយ WR 124 រួមចំណែកជួយឱ្យក្រុមអ្នកវិទ្យាសាស្ត្រយល់ដឹងបន្ថែមអំពីប្រវត្តិដំបូងនៃការកកើតចក្រវាល៕

March 15, 2023

ដើម្បីត្រៀមទៅប្រកួតនៅ World Cup ក្រុម U-20 ឥណ្ឌូណេស៊ី «ផ្ដល់សញ្ជាតិ» ដល់កីឡាករអឺរ៉ុបច្រើននាក់

ក្រុមបាល់ទាត់ជម្រើសជាតិបុរសអាយុក្រោមម្ភៃឆ្នាំរបស់ប្រទេសឥណ្ឌូណេស៊ី (U-20 ឥណ្ឌូណេស៊ី) កំពុងតែត្រៀមសម្រាប់ការផ្ដល់សញ្ជាតិដល់កីឡាករបាល់ទាត់អឺរ៉ុបចំនួនបីរូប ក្នុងបំណងពង្រឹងកម្លាំងសម្រាប់ទៅចូលរួមប្រកួតដណ្ដើមពានរង្វាន់បាល់ទាត់ U-20 World Cup 2023។

U-20 ឥណ្ឌូណេស៊ី មិនបានឡើងទៅកាន់វគ្គ ¼ នៅឯពានរង្វាន់ U-20 អាស៊ី បន្ទាប់ពីត្រូវចាញ់ U-20 អ៊ីរ៉ាក់, ឈ្នះ U-20 ស៊ីរី និងស្មើ U-20 អ៊ូសបេគីស្ថានកាលពីពេលថ្មីៗនេះ។

ថ្វីបើមិនស្ថិតក្នុងចំណោមបួនក្រុមដែលខ្លាំងបំផុតប្រចាំតំបន់អាស៊ី តែ U-20 ឥណ្ឌូណេស៊ី នៅតែមានសិទ្ធរួមដំណើរជាមួយក្រុមកូរ៉េខាងត្បូង, ជប៉ុន អ៊ីរ៉ាក់ និងអ៊ូសបេគីស្ថាន ឡើងទៅប្រកួតនៅដណ្ដើមពាន់រង្វាន់ U-20 World Cup 2023 ព្រោះតែ U-20 ឥណ្ឌូណេស៊ីគឺជាក្រុមម្ចាស់ផ្ទះ។

ថ្មីៗនេះ កូនសិស្ស និងគ្រូបង្វឹក Shin Tae-yong របស់ U-20 ឥណ្ឌូណេស៊ី បានទទួលភារកិច្ចក្នុងការឆ្លងឱ្យផុតវគ្គសន្សំពិន្ទុនៅ U-20 World Cup 2023 ដែលនឹងធ្វើឡើងនាពេលខាងមុខ។ ដើម្បីសម្រេចបានភារកិច្ចនេះ ឥណ្ឌូណេស៊ីកំពុងប្រឹងប្រែងរៀងចំការផ្ដល់សញ្ជាតិដល់កីឡាករបីរូបដែលកំពុងលេងនៅអឺរ៉ុប រួមមាន Justin Hubner, Ivar Jenner និង Raphael Struick។

ខាងលើនេះសុទ្ធតែជាកីឡាករដែលមានជំនាញប្រកបដោយសក្ដានុពល និងកំពុងលេងឱ្យក្លឹបនានានៅអង់គ្លេស និងហូឡង់។ ប្រធានសហព័ន្ធកីឡាបាល់ទាត់ឥណ្ឌូណេស៊ី លោក Erick Thohir ថ្លែងថា «អំពីការផ្ដល់សញ្ជាតិ គ្រប់យ៉ាងកំពុងដំណើរការទៅតាមផែនការដែលបានកំណត់»៕

March 15, 2023

អ្នកនិពន្ធរបស់ភាពយន្តរឿង «លោកគ្រូថាងចេង» (Journey to the West) ទទួលមរណភាព

(ប្រទេសចិន) – Dai Yinglu ដែលជាអ្នកនិពន្ធមួយរូបរបស់ខ្សែភាពយន្តរឿង «លោកគ្រូថាងចេង» (Journey to the West) 1982 បានទទួលមរណភាពកាលពីថ្ងៃទី 14 មីនា 2023 ក្នុងវ័យ 82 ឆ្នាំ។

យោងតាម The Paper លោក Dai Yinglu បានលាចាកលោកនៅឯទីក្រុងប៉េកាំង ដោយសារវ័យចំណាស់ កម្លាំងខ្សោយ។ អ្នកសម្ដែង Liu Xiao Ling Tong (តួអង្គស៊ុនអ៊ូខុង) បាននិយាយថា អ្នកនិពន្ធ Dai Yinglu គឺជាមិត្ត និងជាគ្រូរបស់លោក។ លោក Liu Xiao Ling Tong មានការសោកស្ដាយណាស់នៅពេលអ្នកនិពន្ធទាំងបីរូបរបស់ភាពយន្តរឿង «លោកគ្រូថាងចេង» សុទ្ធតែបានលាចាកលោកអស់ទៅហើយ។

Dai Yinglu កើតនៅខេត្ត Heilongjiang ប្រទេសចិន។ លោកបានបញ្ចប់ការសិក្សាផ្នែកអក្សរសាស្ត្រចិននៅមហាវិទ្យាល័យ Heilongjiang ហើយក្រោយមកក៏ធ្វើការនៅវិទ្យាស្ថានល្ខោនចិន។ គាត់ធ្លាប់បានសរសេរសាច់រឿងសម្រាប់ល្ខោន និងភាពយន្តជាច្រើន។

ខ្សែភាពយន្តរឿង «លោកគ្រូថាងចេង» (Journey to the West) ត្រូវបានផលិតដោយទូរទស្សន៍ជាតិចិន និងមជ្ឈមណ្ឌលផលិតកម្មភាពយន្តទូរទស្សន៍ចិន គឺជាស្នាដៃដ៏លេចធ្លោមួយរបស់លោក Dai Yinglu។ ភាពយន្តនេះដឹកនាំសម្ដែងដោយ Yang Jie សហការនិពន្ធដោយ Dai Yinglu, Yang Jie និង Zou Yiqing។ វាត្រូវបានចាក់បញ្ចាំងចាប់ពីឆ្នាំ 1982។

លោក Liu Xiao Ling Tong ដែលធ្លាប់សម្ដែងជាតួអង្គស៊ុនអ៊ូខុង (ឆ្វេង) និងលោក Dai Yinglu

អ្នកនិពន្ធ Dai Yinglu (ពាក់អាវធំ), Zou Yiqing (អាវក្រហម)។ ខាងក្រោម ពីឆ្វេងមកស្ដាំ៖ Dai Yinglu, Yang Jie, Zou Yiqing

អ្នកសម្ដែង Liu Xiao Ling Tong (តួអង្គស៊ុនអ៊ូខុង)

March 15, 2023

រថយន្តអគ្គិសនីខ្នាតតូចរបស់ក្រុមហ៊ុនចិន កំពុងទាក់ទាញការប្រើប្រាស់ច្រើននៅឥណ្ឌូណេស៊ី

ម៉ូដែលរថយន្តអគ្គិសនីខ្នាតតូចរបស់ក្រុមហ៊ុនចិន កំពុងតែបញ្ជ្រាបខ្លួនទៅគ្រប់កន្លុកកន្លៀតក្នុងទីផ្សារអន្តរជាតិនាពេលថ្មីៗនេះ ក្នុងនោះក៏មាន Wuling ផងដែរ។

មានតម្លៃប្រហែលតែ 5,500 ដុល្លារអាម៉េរិក រថយន្តអគ្គិសនីខ្នាតតូចរបស់ក្រុមហ៊ុន Wuling ទាក់ទាញអតិថិជនបានយ៉ាងច្រើននៅទីផ្សារប្រទេសចិន ដោយប្រើពេលយ៉ាងខ្លី។ រថយន្តអគ្គិសនីរបស់ Wuling ថែមទាំងលក់ដាច់ជាង Tesla ទៅទៀតនៅក្នុងទីផ្សារក្នុងស្រុក។ បន្ទាប់ពីទទួលបានការគាំទ្រច្រើននៅប្រទេសចិន Wuling ក៏ចាប់ផ្ដើមវាយលុកទីផ្សារអន្តរជាតិ។

ទីផ្សារអន្តរជាតិមួយក្នុងចំណោមទីផ្សារដែល Wuling វាយលុកខ្លាំងជាងគេគឺឥណ្ឌូណេស៊ី ជាទីដែលមានអ្នកប្រើប្រាស់ម៉ូតូច្រើនជាងគេមួយនៅអាស៊ីអាគ្នេយ៍។ ក្រោយពេលត្រូវបានប្រកាសដាក់លក់ មានមតិខ្លះយល់ថា រថយន្តអគ្គិសនីរបស់ Wuling នឹង «ឆាប់ស្លាប់» នៅលើទីផ្សារមួយនេះ។

ឥណ្ឌូណេស៊ី មានអ្នកប្រើប្រាស់ម៉ូតូច្រើនជាងគេមួយនៅអាស៊ីអាគ្នេយ៍

ក៏ប៉ុន្តែ ការពិតពុំមែនដូច្នោះឡើយ។ ម៉ូដែលរថយន្តអគ្គិសនី Wuling Air ដែលត្រូវបាន និងកំពុងលក់ក្នុងតម្លៃត្រឹមតែ 16,000 ដុល្លារអាម៉េរិក ទាបជាងពាក់កណ្ដាលធៀបនឹងគូប្រជែងដទៃ បានទាក់ទាញចំណាប់អារម្មណ៍របស់អ្នកប្រើប្រាស់នៅឥណ្ឌូណេស៊ី។

Wuling Air ត្រូវបានចាត់ទុកជាម៉ូដែលរថយន្តអគ្គិសនីតូច សាមញ្ញ និងស្រួលប្រើ ឆ្ពោះទៅកាន់អនាគត និងជាដំណោះស្រាយល្អសម្រាប់ប្រជាជនក្នុងទីក្រុងធំៗរបស់ឥណ្ឌូណេស៊ី។

យោងតាមសមាគមឧស្សាហកម្មរថយន្តឥណ្ឌូណេស៊ី ក្រោយការបង្ហាញវត្តមានបាន 6 ខែ (តាំងពីខែសីហា 2022) ចំនួនរថយន្តអគ្គិសនី Wuling Air ដែលបានលក់ចេញ បានកើនឡើងដល់ប្រមាណ 8,000 គ្រឿង និងបានគ្រប់គ្រងទីផ្សាររថយន្តអគ្គិសនីនៅឥណ្ឌូណេស៊ី។

ថ្វីបើតួលេខខាងលើមិនច្រើនបើធៀបនឹងចំនួនរថយន្តរបស់ Wuling ដែលបានលក់ចេញនៅសហរដ្ឋអាម៉េរិក និងប្រទេសចិន ប៉ុន្តែជាក់ស្ដែង 8,000 គ្រឿងនេះគឺស្មើនឹង 78% នៃទីផ្សាររថយន្តអគ្គិសនីនៅឥណ្ឌូណេស៊ី។

Wuling Air មានរូបរាងតូច មានកម្ពស់ 1.6 ម៉ែត្រ និងអាចដាក់មនុស្សបានបួននាក់។ វាជារថយន្តអគ្គិសនីដែលមានតម្លៃទាបជាងគេនៅឥណ្ឌូណេស៊ីនាបច្ចុប្បន្ន។

នៅឥណ្ឌូណេស៊ី រថយន្តអគ្គិសនី Nissan Leaf ឬ Hyundai Ioniq 5 បច្ចុប្បន្នមានតម្លៃប្រហែល 48,000 ដុល្លារអាម៉េរិក។ ចំណែក Wuling កំណែស្ដង់ដាមានតម្លៃ 16,000 ដុល្លារ និងកំណែខ្ពស់មានតម្លៃ 20,000 ដុល្លារនៅក្នុងទីផ្សារមួយនេះ៕

March 15, 2023

ណាសា (NASA) អភិវឌ្ឍយានអវកាសថ្មីដើម្បីអូសទម្លាក់ស្ថានីយអវកាសអន្តរជាតិ

(សហរដ្ឋអាម៉េរិក) – ទីភ្នាក់ងារអវកាសអាម៉េរិក (ណាសា-NASA) កំពុងរៀបផែនការអភិវឌ្ឍយានអវកាសមួយដែលអាចអូសស្ថានីយអវកាសអន្តរជាតិ (ISS) ចេញពីគន្លងគោចរ ដើម្បីឱ្យ ISS រំលាយខ្លួនឯងពេលហោះធ្លាក់ឆ្លងកាត់បរិយាកាសផែនដី។

ក្នុងសន្និសីទសារព័ត៌មានកាលពីថ្ងៃទី 13 មីនា ណាសាឱ្យដឹងថា នឹងចំណាយប្រាក់ 180 លានដុល្លារដើម្បីផលិតយានអវកាសមួយសម្រាប់ជួយឱ្យ ISS ចាកចេញផុតពីគន្លងគោចរដោយសុវត្ថិភាព និងទម្លាក់ខ្លួនទៅលើសមុទ្រ ក្រោយពីបានបញ្ចប់ដំណើរការនៅឆ្នាំ 2030។ យានអវកាសថ្មីរបស់ណាសា ក៏នឹងគាំទ្រដល់សកម្មភាពចាកចេញពីគន្លងតារាវិថីរបស់បណ្ដាដៃគូសហការរបស់ ISS ដែលរួមមាន ស្ថាប័នអវកាសរបស់សហរដ្ឋអាម៉េរិក រុស្ស៊ី អឺរ៉ុប កាណាដា និងជប៉ុន។

គម្រោងនៅចំពោះមុខគឺការបញ្ឆេះម៉ាស៊ីនរបស់យានអវកាសដឹកទំនិញស្វ័យប្រវត្ត Progress របស់រុស្ស៊ី ដើម្បីឱ្យ ISS បន្ទាបខ្លួនជាបណ្ដើរ។ រុស្ស៊ីក៏បានប្រកាសដកខ្លួនពី ISS បន្ទាប់ពីឆ្នាំ 2024 ដើម្បីសាងសង់ស្ថានីយអវកាសផ្ទាល់ខ្លួន។ ព័ត៌មាននេះទំនងជាបានជំរុញឱ្យណាសាអភិវឌ្ឍយានអវកាសថ្មី។

ណាសាក៏បានឱ្យដឹងថា ថវិកាដែលត្រូវប្រើប្រាស់នៅឆ្នាំក្រោយសម្រាប់កម្មវិធី Artemis គឺ 8.1 ពាន់លានដុល្លារ។ កញ្ចប់ថវិកានេះនឹងជួយឱ្យណាសាអនុវត្តបេសកកម្ម Artemis 2 និង Artemis 3 នៅឆ្នាំ 2024 និង 2025។ នេះបើយោងតាមទំព័រ Space។

បេសកកម្ម Artemis 2 នឹងនាំអ្នកអវកាសហោះជុំវិញឋានព្រះចន្ទ ខណៈដែល Artemis 3 នឹងចុះចតក្បែរប៉ូលខាងត្បូងរបស់ព្រះចន្ទនៅក្នុងបេសកកម្មមានមនុស្សដំបូង រាប់ចាប់តាំងពីសម័យ Apollo 17 កាលពីឆ្នាំ 1972។ ចំណែក បេសកកម្ម Artemis 4 ដែលគ្រោងនឹងដំឡើងស្ថានីយអវកាស Gateway របស់ណាសានៅលើគន្លងគោចរព្រះចន្ទ នឹងត្រូវពន្យារពេលដល់ឆ្នាំ 2028 បើសិនជាគ្រប់យ៉ាងដំណើរការត្រូវតាមផែនការ៕

March 15, 2023

Erling Haaland បំបែកកំណត់ត្រារបស់ Mbappe ហើយឈ្នះដាច់លើ Messi, Ronaldo ក្រោយពី Man City ផ្ដួល Leipzig 7-0

(អង់គ្លេស) – ក្រោយជ័យជម្នះលើ Leipzig ក្នុងលទ្ធផល 7-0 កាលពីម្សិលមិញ Erling Haaland បានបំបែកកំណត់ត្រារបស់ Kylian Mbappe ក្លាយជាកីឡាករវ័យក្មេងបំផុតរកបាន 30 គ្រាប់នៅ Champions League។

Haaland ស៊ុតបញ្ចូលទីបានប្រាំគ្រាប់នៅក្នុងការប្រកួតឈ្នះ Leipzig 7-0 ក្នុងជើងទីពីរនៃវគ្គ 1/8។ អំឡុងពេលបង្កើតបាន hat-trick (រកបានបីគ្រាប់ក្នុងមួយប្រកួត) Haaland បានក្លាយជាកីឡាករវ័យក្មេងជាងគេ (អាយុ 22 ឆ្នាំ និង 236 ថ្ងៃ) ដែលរកបាន 30 គ្រាប់នៅឯពានរង្វាន់ Champions League។ កំណត់ត្រាចាស់គឺវ័យ 22 ឆ្នាំ និង 352 ថ្ងៃ របស់ Kylian Mbappe។

Haaland និង Mbappe សុទ្ធតែបានឆ្លងផុតឆ្ងាយពី Lionel Messi និង Cristiano Ronaldo។ Messi រកបាន 30 គ្រាប់នៅ Champions League ក្នុងវ័យ 23 ឆ្នាំ និងបីខែ ខណៈដែល Ronaldo រកបាន 30 គ្រាប់ក្នុងវ័យ 26 ឆ្នាំ និង 7 ខែ។

បើគិតអំពីចំនួនប្រកួត (25 ប្រកួត) Haaland ក៏ក្លាយជាកីឡាករដែលរកបាន 30 គ្រាប់ឆាប់ជាងគេបង្អស់នៅ Champions League។ ដោយមានឯតទគ្គកម្មនេះ Haaland ក៏យកឈ្នះលើកំណត់ត្រាចាស់របស់ Ruud Van Nistelrooy អតីតខ្សែប្រយុទ្ធរបស់ Man Utd និង Real ផងដែរ។

ទន្ទឹមនឹងនេះ Haaland ក៏តាមទាន់កំណត់ត្រាស៊ុតបញ្ចូលទីបានច្រើនជាងគេក្នុងមួយប្រកួតនៅ Champions League។ Messi ធ្លាប់កាន់កាប់កំណត់ត្រានេះ នៅពេលរកបានប្រាំគ្រាប់ក្នុងការប្រកួតជើងទីពីរនៃវគ្គ 1/8 នៅឆ្នាំ 2011-2012 ជារដូវកាលដែល Barca បានឈ្នះ Leverkusen 7-1។ ក្នុងខែតុលា 2014 Luiz Adriano ក៏បានក្លាយជាកីឡាករទីពីរដែលស៊ុតបញ្ចូលទីបានប្រាំគ្រាប់ក្នុងមួយប្រកួតនៅ Champions League ពេលដែល ក្រុម Shakhtar Donetsk បានឈ្នះ Bate Borisov 7-0 នៅវគ្គសន្សំពិន្ទុ។

ក៏ប៉ុន្តែ បើធៀបទៅនឹងសិស្សច្បងពីររូប ការស៊ុតបញ្ចូលទីប្រាំគ្រាប់ក្នុងមួយប្រកួតរបស់ Haaland នៅតែគួរឱ្យជក់ចិត្តជាងគេ។ ខ្សែប្រយុទ្ធរបស់ Man City ត្រូវការពេលតែ 57 នាទីប៉ុណ្ណោះដើម្បីសម្រេចបានលទ្ធផលនេះ ខណៈដែល Messi និង Adriano ត្រូវការ 84 នាទី និង 82 នាទី។

Haaland ក៏បំបែកកំណត់ត្រាស្ដីពីការរកបានគ្រាប់បាល់ច្រើនជាងគេក្នុងមួយរដូវកាលសម្រាប់ក្លឹប Man City។ ខ្សែប្រយុទ្ធជនជាតិន័រវែស កំពុងកាន់កាប់ 39 គ្រាប់ក្នុងរដូវកាល 2022-2023 ច្រើនជាងមួយគ្រាប់ធៀបនឹងកំណត់ត្រាចាស់របស់ Tommy Johnson ក្នុងរដូវកាល 1928-1929។

ពេលបានជួយឱ្យ Man City រកបានបីគ្រាប់នៅចុងការប្រកួតតង់ទីមួយ ចំនួន hat-trick របស់ Haaland ក៏បានកើនឡើងដល់ប្រាំលើកសម្រាប់ក្លឹបនៅគ្រាប់ការប្រកួតក្នុងរដូវកាលនេះ ច្រើនជាងបី hat-tricks បើធៀបនឹងកីឡាករដទៃនៅឯពានរង្វាន់ជើងឯកកំពូលៗចំនួនប្រាំនៅអឺរ៉ុប។ ខ្សែប្រយុទ្ធរបស់ន័រវែសនេះថែមទាំងក្លាយជាកីឡាករដែលកំពុងលេងនៅលីគកំពូលអង់គ្លេសដំបូងគេដែលរកបានប្រាំ hat-tricks ក្នុងមួយរដូវកាល រាប់ចាប់តាំងពី Harry Kane សម្រេចបានកាលពីរដូវកាល 2016-2017។

Haaland ធ្លាប់រកបាន 29 គ្រាប់ក្នុង 27 ប្រកួតសម្រាប់ Salzburg និង 86 គ្រាប់ក្នុង 89 ប្រកួតសម្រាប់ Dortmund។ កាលពីឆ្នាំ 2022 គាត់បានមកទាត់ឱ្យ Man City ក្នុងតម្លៃខ្លួន 66 លានដុល្លារអាម៉េរិក។ បច្ចុប្បន្ន Haaland នាំមុខគេក្នុងការដណ្ដើមយកតំណែងស្ដេចកម្ទេចសំណាញ់ទី Champions League 2022-2023 ដោយរកបានដប់គ្រាប់។ Haaland ស៊ុតបញ្ចូលទីបានច្រើនជាង Mohamed Salah ចំនួនពីរគ្រាប់ និងច្រើនជាង Mbappe បីគ្រាប់។ Mbappe អស់ឱកាសក្នុងការរកគ្រាប់បាល់បន្ថែម ព្រោះ PSG ត្រូវបានជម្រុះ។ ចំណែក Salah ក៏ទំនងជានឹងត្រូវមានវាសនាដូច Mbappe ដោយសារ Liverpool ចាញ់ Real 2-5 នៅជើងទីមួយនៃវគ្គ 1/8។

https://www.youtube.com/watch?v=HVuWbCAe0mU

Manchester City បានឡើងដល់វគ្គ 8 ក្រុមចុងក្រោយ (1/4) បន្ទាប់ពីបានឈ្នះ Leipzig 8-1 នៅវគ្គ 1/8។ ដោយសារតែនៅសល់ប្រហែលប្រាំប្រកួតទៀតនៅ Champions League នារដូវកាលនេះ Haaland ប្រាកដជារកបានគ្រាប់បាល់បន្ថែម និងបន្តបំបែកកំណត់ត្រានានាក្នុងវិស័យបាល់ទាត់៕

March 15, 2023

បឹងទឹកក្រោមដីដែលធំជាងគេបង្អស់លើពិភពលោករបស់ណាមីប៊ី

បឹងក្នុងល្អាងដង្ហើមនាគមានទំហំប្រហែលពីរហិកតា ជម្រៅជាង 200 ម៉ែត្រ ព្រមទាំងមានទឹកថ្លាឆ្វង់ និងមានសត្វ និងត្រីរស់នៅ។ នេះបើតាមទំព័រ IFL Science។

នៅជ្រៅក្នុងប្រទេសណាមីប៊ី មានល្អាងពេញដោយទឹកមួយដែលត្រូវបានគេហៅថា ល្អាងដង្ហើមនាគ (Dragon’s Breath)។ ល្អានេះមានលាក់បឹងក្រោមដីមិនស្ថិតក្រោមទឹកកកធំជាងគេលើពិភពលោក។ អស់ជាច្រើនទសវត្សរ៍ ពិភពលោកមិនដឹងអំពីទំហំពិតប្រាកដរបស់តំបន់មានទឹកមួយនេះ ព្រោះតែអ្នកវិទ្យាសាស្ត្រមិនអាចមុជទឹកចុះជ្រៅបានតាមចិត្ត។ ប៉ុន្តែ បច្ចេកវិទ្យាបច្ចុប្បន្ន បាន និងកំពុងតែបង្ហើបឱ្យដឹងអាថ៌កំបាំងរបស់ល្អាងនេះបន្តិចម្ដង។

ការស្រាវជ្រាវដោយប្រើប្រាស់រ៉ូបូតក្នុងប៉ុន្មានឆ្នាំចុងក្រោយនេះបង្ហាញថា ល្អាងដង្ហើមនាគមានជម្រៅជាង 200 ម៉ែត្រ។ អ្នកវិទ្យាសាស្ត្រពិបាកក្នុងការរកឃើញទំហំពិតប្រាកដរបស់បឹងក្រោមដីនេះ ប៉ុន្តែអ្នកជំនាញខ្លះជឿថា វាមានទំហំប្រហែលពីរហិកតា ធំជាង Lost Sea ដែលជាបឹងក្រោមដីមិនស្ថិតក្រោមទឹកកកធំជាងគេនៅសហរដ្ឋអាម៉េរិក និងធំជាងគេលំដាប់ទីពីរលើពិភពលោក ដោយមានទំហំប្រមាណ 1.8 ហិកតា។

ណាមីប៊ីគឺជាប្រទេសស្ថិតនៅជាប់នឹងមាត់សមុទ្រភាគខាងត្បូងរបស់ទ្វីបអាហ្វ្រិក។ ប្រទេសនេះមានល្អាងយ៉ាងតិច 124 កន្លែង។ ឈ្មោះ «ដង្ហើមនាគ» របស់ល្អាងនេះមានប្រភពពីជំនោរខ្យល់ក្ដៅ និងមានសំណើមនៅត្រង់ច្រកចេញចូល។ ទឹកក្នុងបឹងរបស់ល្អាងនេះមានសភាពថ្លាឆ្វង់ និងមានជីវិតរស់នៅ ក្នុងនោះ មានខ្លះមានទម្រង់ស្រដៀងជន្លេន កំពឹស ហើយក៏មានត្រីអណ្ដែងលឿងផងដែរ។

យោងតាមការស្រាវជ្រាវបែបទំនើបបច្ចុប្បន្ន ល្អាងនេះមានរូបរាងស្រដៀងទៅនឹងស្បែកជើងមានច្រមុះស្រួច៕

March 15, 2023

Author: សឿន សំណាង