សឿន សំណាង - La Reine Media

ចិនចាប់ផ្ដើមការងារដំឡើងប្រព័ន្ធទម្រ-ទួរប៊ីនខ្យល់អណ្ដែតលើសមុទ្រជ្រៅដំបូង

ការងារដំឡើងទម្រ-ទួរប៊ីនខ្យល់អណ្ដែតនៅលើតំបន់សមុទ្រជ្រៅជាង 100 ម៉ែត្រដំបូងរបស់ប្រទេសចិន និងមានចម្ងាយជាង 100 គីឡូម៉ែត្រពីឆ្នេរ ត្រូវបានចាប់ផ្ដើមកាលពីថ្ងៃទី 03 មេសា 2023។

ប្រព័ន្ធទម្រ និងទួរប៊ីនផលិតអគ្គិសនីដោយកម្លាំងខ្យល់អណ្ដែតលើសមុទ្រជ្រៅដំបូងរបស់ប្រទេសចិន កាលពីថ្ងៃទី 03 មេសាត្រូវបាននាំទៅដល់អណ្ដូងរ៉ែប្រេងក្នុងតំបន់សមុទ្រក្បែរខេត្ត Hainan ក្រោយការធ្វើដំណើរបីថ្ងៃពីទីក្រុងមួយរបស់ប្រទេសចិន ដែលមានចម្ងាយ 333 គីឡូម៉ែត្រ។

ប្រព័ន្ធខាងលើនេះគ្រោងនឹងដំណើរការបានយ៉ាងតិច 25 ឆ្នាំ នៅក្នុងតំបន់សមុទ្រជ្រៅជាង 100 ម៉ែត្រ ដើម្បីផ្គត់ផ្គង់អគ្គិសនីស្អាតសម្រាប់ការផលិតឧស្ម័ន និងប្រេងឆៅនៅលើតំបន់សមុទ្រដែលមានចម្ងាយពីឆ្នេររបស់ខេត្ត Hainan ប្រហែល 136 គីឡូម៉ែត្រ។

ប្រព័ន្ធទម្រ-ទួរប៊ីនខ្យល់សមុទ្រដែលមានឈ្មោះថា CNOOC Guanlan កម្ពស់ 35 ម៉ែត្រ និងទម្ងន់ប្រហែល 4,000 តោននេះ ត្រូវបានឧបត្ថម្ភ និងផលិតដោយសាជីវកម្មរុករកប្រេងឧស្ម័នលើសមុទ្រចិន (CNOOC)។

សកម្មភាពដំឡើងទម្រ-ទួរប៊ីនខ្យល់ CNOOC Guanlan នៅលើសមុទ្រជម្រៅជាង 100 ម៉ែត្ររបស់ CNOOC

CNOOC Guanlan នឹងត្រូវបានតភ្ជាប់បាតសមុទ្រដោយប្រើប្រាស់ខ្សែច្រវាក់យុថ្កាចំនួន 9។ វានឹងមិនផ្អៀងនៅក្នុងពេលមានខ្យល់កម្លាំង 50 គីឡូម៉ែត្រ/ម៉ោង ហើយអាចទប់ទល់នឹងព្យុះធំៗទៀតផង។

ការងារដំឡើងឧបករណ៍សំខាន់ៗរបស់ CNOOC Guanlan នឹងត្រូវរួចរាល់នៅក្នុងខែឧសភា 2023 ខាងមុខ៕

April 5, 2023

បុរសម្នាក់ជួបសំណាងធំ ពេលបានរកឃើញដុំថ្មមានផ្ទុកមាស 2.6 គីឡូក្រាម

អ្នករុករកមាសម្នាក់នៅអូស្ត្រាលី អរស្ទើរហោះ ដូចបានត្រូវឆ្នោតធំនៅពេលគាស់ឃើញដុំថ្មដែលមានផ្ទុកមាសតម្លៃ 160,000 ដុល្លារអាម៉េរិក នៅលើវាលស្រែក្នុងរដ្ឋ Victoria។

ដោយគ្រាន់តែប្រើប្រាស់ម៉ាស៊ីនស្វែងរកលោហធាតុតម្លៃទាប អ្នករុករកមាសម្នាក់សុំមិនបញ្ចេញឈ្មោះបានរកឃើញវត្ថុមានតម្លៃនៅក្នុងតំបន់ដែលល្បីឈ្មោះថាជា «ត្រីកោណមាស» នៅ Victoria ជាទីដែលធ្លាប់បានក្លាយជាចំណុចកណ្ដាលនៃសកម្មភាពរុករកមាសនៅក្នុងទសវត្សរ៍ឆ្នាំ 1800។

នៅពេលនាំយកដុំថ្មដែលខ្លួនបានរកឃើញ ទៅកាន់ហាង Lucky Strike Gold ក្នុងទីរួមស្រុក Geelong ដែលនៅក្បែរនោះដើម្បីឱ្យគេពិនិត្យ បុរសខាងលើភ្ញាក់ផ្អើលជាខ្លាំង ពេលដឹងពីតម្លៃរបស់វា។ ដុំថ្មនោះមានទម្ងន់ជាង 4.6 គីឡូក្រាម តែមានមាសរហូតដល់ 2.6 គីឡូក្រាម និងត្រូវបានម្ចាស់ហាង Lucky Strike Gold ទិញក្នុងតម្លៃ 160,000 ដុល្លារអាម៉េរិក។

«នេះគឺជាដុំថ្មមានមាសច្រើនបំផុតដែលខ្ញុំធ្លាប់បានពិនិត្យក្នុងអាជីព 43 ឆ្នាំកន្លង» Darren Kamp ម្ចាស់ហាង Lucky Strick Gold ចែករំលែកនៅលើបណ្ដាញសង្គមស្ដីពីដុំថ្មផ្ទុកមាសខាងលើ កាលពីសប្ដាហ៍កន្លង។

អូស្ត្រាលី បើទោះជាត្រូវបានវាយតម្លៃថាជាទឹកដីដែលមានមាសច្រើនជាងគេលើពិភពលោក ប៉ុន្តែការរកឃើញដូចករណីខាងលើនេះពិតជាកម្រកើតមាន។ កំណត់ត្រាស្ដីពីដុំមាសធំបំផុតដែលធ្លាប់រកឃើញនៅអូស្ត្រាលី បានទៅលើវត្ថុមួយដែលមានឈ្មោះថា «Welcome Stranger»។ វាមានទម្ងន់ 66 គីឡូក្រាម និងមានតម្លៃប្រហែល 2.7 លានដុល្លារអាម៉េរិក។ យោងតាមសារមន្ទីរ Victoria ដុំមាសនេះត្រូវបានអ្នករុករកមាសពីរនាក់រកឃើញកាលពីឆ្នាំ 1869៕

April 5, 2023

Messi នឹងមានប្រាក់បៀវត្សរ៍ខ្ពស់ជាងជិតទ្វេដងធៀបនឹង Ronaldo បើព្រមទាត់ឱ្យគូប្រជែងរបស់ Al Nassr

ក្លឹបបាល់ទាត់មួយនៅអារ៉ាប៊ីសាអូឌីត រំពឹងថានឹងអាចនាំយក Lionel Messi មកកាន់អាស៊ី និងឆ្ពោះទៅកាន់គោលដៅបង្កើត «Real Madrid vs Barcelona កំណែអារ៉ាប៊ីសាអូឌីត»។

យោងតាមអ្នកយកព័ត៌មានជំនាញខាងលើការទិញដូរកីឡាករ Fabrizio Romano ក្លឹប Al Hilal របស់អារ៉ាប៊ីសាអូឌីតមានបំណងនាំយក Lionel Messi មកប្រកួតនៅអាស៊ី។ ក្លឹបនេះសុខចិត្តចំណាយ 350 លានផោន/ឆ្នាំ ដើម្បីទិញកំពូលតារាបាល់ទាត់របស់អាហ្សង់ទីនរូបនេះ។ Al Hilal ត្រូវបានគេជឿថា បានផ្ញើសំណើទៅកាន់កីឡាករវ័យ 35 ឆ្នាំ លោក Messi ហើយថា នឹងអាចចរចាគ្នានៅរដូវក្ដៅនេះ។

បើសិន Messi យល់ព្រមតាមសំណើ គាត់នឹងបានចូលរួមការប្រកួតដណ្ដើមពានរង្វាន់ Saudi Pro League ដែលទីនោះក៏មានវត្តមានរបស់ Cristiano Ronaldo។ ពេលនោះ កំពូលតារាបាល់ទាត់ទាំងពីររូបនេះនឹងបានប្រកួតក្នុងពានរង្វាន់មួយជាមួយគ្នាជាលើកដំបូង រាប់ចាប់ពីឆ្នាំ 2018។ ទន្ទឹមនឹងនេះ ក្លឹប Al Hilal និង Al Nassr នឹងដើរតួជា «Barcelona vs Real Madrid កំណែអារ៉ាប៊ីសាអូឌីត»។

ក្នុងករណីយល់ព្រមទាត់ឱ្យ Al Hilal កំពូលតារាបាល់ទាត់ Messi នឹងទទួលបានប្រាក់បៀវត្សរ៍ខ្ពស់ជាង Ronaldo (ដែលបច្ចុប្បន្នទទួលបាន 177 លានផោន/ឆ្នាំ) ពី Al Nassr ទៅទៀត។

ទំព័រ Goal.com បានផ្សាយថា កាលពីសប្ដាហ៍កន្លង Messi រកប្រាក់ចំណូលបានបីលានអឺរ៉ូ (ជិត 3.3 លានដុល្លារអាម៉េរិក)/ខែពីក្លឹប PSG ដែលតួលេខនេះខ្ពស់ជាងគេលំដាប់ទីបី បន្ទាប់ពី Kylian Mbappe និង Neymar។ យោងតាម Sporting News Messi បានចុះកិច្ចសន្យាតម្លៃ 41 លានដុល្លារអាម៉េរិក/រដូវកាលជាមួយ PSG ដែលមានសុពលភាពរហូតដល់ខែមិថុនា 2023។

Messi ទទួលបានប្រាក់បៀវត្សរ៍គោលប្រចាំឆ្នាំ 41 លានដុល្លារអាម៉េរិក ស្មើនឹងជាង 788,000 ដុល្លារ/សប្ដាហ៍។ The Athletic ផ្សាយថា Messi ទទួលបានប្រាក់រង្វាន់ពី PSG តម្លៃ 30 លានដុល្លារអាម៉េរិក។ បើគិតទាំងប្រាក់បៀវត្សរ៍ ប្រាក់រង្វាន់ ប្រាក់ឧបត្ថម្ភ និងប្រាក់លក់សិទ្ធិផ្សាយតាមទូរទស្សន៍ទៀត Messi មានប្រាក់ចំណូលជិត 75 លានដុល្លារ/ឆ្នាំ ស្មើនឹង 1.44 លានដុល្លារ/សប្ដាហ៍៕

April 5, 2023

ក្រុមហ៊ុនផលិតថ្មផ្ទុកអគ្គិសនីរបស់ឥណ្ឌូណេស៊ី Swap Energy ប្រមូលទុនបានជាង 7 លានដុល្លារ

Swap Energy ដែលជាក្រុមហ៊ុនផ្គត់ផ្គត់ដំណោះស្រាយសម្រាប់ការប្ដូរថ្មម៉ូតូអគ្គិសនី មានទីស្នាក់ការកណ្ដាលនៅឥណ្ឌូណេស៊ី ប្រមូលទុនបានប្រហែល 7.2 លានដុល្លារអាម៉េរិក នៅក្នុងជុំនៃការប្រមូលទុនមុន Series A ដែលនាំមុខដោយ Ondine Capital។

Ondine Capital បានវិនិយោគជិតបីលានដុល្លារទៅលើ Swap Energy នៅជុំនេះ។ បណ្ដាក្រុមហ៊ុនដែលបានចូលរួមវិនិយោគក្នុងជុំប្រមូលទុននេះ មានដូចជា មូលនិធិ SBI Kejora, Indonesia PT Wahana Sentosa Cemerlang និង New Energy Nexus។

Randolph Hsu ដែលជាស្ថាបនិករបស់ Ondine Capital បានបញ្ជាក់អំពីព័ត៌មានខាងលើ និងបន្ថែមថា ក្រុមហ៊ុន Ondine Capital មានកៅអីមួយនៅក្នុងក្រុមប្រឹក្សាភិបាលរបស់ Swap Energy។

អាយុកាលរបស់ថ្មផ្ទុកថាមពលគឺជាចំណុចសំខាន់ចំពោះអ្នកប្រើប្រាស់ម៉ូតូអគ្គិសនី។ Swap Energy ត្រូវបានបង្កើតឡើងកាលពីឆ្នាំ 2019 គឺដើម្បីដោះស្រាយបញ្ហានេះ តាមរយៈការកសាងស្ថានីយប្ដូរថ្មសម្រាប់របស់ម៉ូតូអគ្គិសនី។ បច្ចុប្បន្ន Swap Energy មានស្ថានីយប្ដូរថ្មជាង 800 កន្លែងនៅក្នុង 14 ខេត្តក្រុងរបស់ឥណ្ឌូណេស៊ី។

កាលពីឆ្នាំ 2021 ក្រុមហ៊ុន Swap Energy បានបង្កើតយីហោម៉ូតូអគ្គិសនីមួយដែលមានឈ្មោះថា Smoot។ មួយឆ្នាំក្រោយមក Swap Energy និង Smoot សហការជាមួយ Grab និងក្រុមហ៊ុនអគ្គិសនីរដ្ឋ PLN ដើម្បីអភិវឌ្ឍបណ្ដាញយានយន្តអគ្គិសនីនៅឥណ្ឌូណេស៊ី។

ជាអ្នកផលិតនីកែល (សមាសធាតុសំខាន់របស់ថ្មផ្ទុកអគ្គិសនី) លំដាប់កំពូលមួយលើពិភពលោក ឥណ្ឌូណេស៊ីកំពុងប្រឹងប្រែងដើម្បីក្លាយជាមជ្ឈមណ្ឌលផលិតយានយន្តអគ្គិសនីរបស់ពិភពលោក។ ឥណ្ឌូណេស៊ីកំណត់គោលដៅផលិតម៉ូតូអគ្គិសនីឱ្យបាន 2.5 លានគ្រឿង និងរថយន្តអគ្គិសនីឱ្យបាន 600,000 គ្រឿងត្រឹមឆ្នាំ 2030 សមស្របនឹងការសន្យាកាត់បន្ថយឧស្ម័នផ្ទះកញ្ចក់ 29% នៅក្នុងដំណាក់កាលដូចគ្នា។

ផលិតផលម៉ូតូអគ្គិសនី ថ្មផ្ទុកថាមពលអគ្គិសនីរបស់ Swap

កត្តាសំខាន់មួយក្នុងការជំរុញការប្រើប្រាស់យានយន្តអគ្គិសនីគឺការរីកចម្រើននៃហេដ្ឋារចនាសម្ព័ន្ធ រួមមានទាំងស្ថានីយបញ្ចូលថាមពលអគ្គិសនីសម្រាប់យានយន្តអគ្គិសនី និងស្ថានីយប្ដូរថ្មផ្ទុកអគ្គិសនី។ ទន្ទឹមនឹងក្រុមហ៊ុន Swap Energy នៅក្នុងវិស័យអភិវឌ្ឍហេដ្ឋារចនាសម្ព័ន្ធសម្រាប់ថ្មផ្ទុកអគ្គិសនីរបស់ឥណ្ឌូណេស៊ី ក៏នៅមានក្រុមហ៊ុន Volta Indonesia និង EVolt Charging Network ផងដែរ៕

April 5, 2023

ផ្លូវការ៖ ក្រុមបាល់ទាត់បុរស U-22 កម្ពុជា ស្ថិតក្នុងក្រុមគ្រាប់ពូជទីមួយ

គណៈកម្មការរៀបចំការប្រកួតស៊ីហ្គេមលើកទី 32 (Cambodia SEA Games Organizing Committee) បានប្រកាសជាផ្លូវការនូវចំណាត់ថ្នាក់គ្រាប់ពូជរបស់វិញ្ញាសាបាល់ទាត់បុរស។

ក្រុម U-22 កម្ពុជា ដែលជាក្រុមម្ចាស់ផ្ទះរបស់ស៊ីហ្គេមលើកទី 32 បានបញ្ចូលខ្លួនទៅក្នុងក្រុមគ្រាប់ពូជទីមួយរបស់វិញ្ញាសាបាល់ទាត់បុរស។ ចំណែកម្ចាស់ជើងឯកស៊ីហ្គេមរដូវកាលកន្លង (វៀតណាម) ក៏ស្ថិតនៅក្នុងក្រុមគ្រាប់ពូជទីមួយ។

កម្ពុជាដែលបានបញ្ចូលខ្លួនទៅក្នុងក្រុមគ្រាប់ពូជទីមួយបានធ្វើឱ្យថៃត្រូវធ្លាក់ចុះទៅក្នុងក្រុមគ្រាប់ពូជទីពីរ ដែលមាន U-22 ឥណ្ឌូណេស៊ី។

ក្រុមគ្រាប់ពូជទីបីមានវត្តមានរបស់ម៉ាឡេស៊ី និងមីយ៉ាន់ម៉ា។ ចំណែកបួនក្រុមដែលនៅសល់គឺ សិង្ហបុរី ហ្វ៊ីលីពីន ឡាវ និងទីម័រខាងកើតត្រូវស្ថិតក្នុងក្រុមទីបួន។

ថ្ងៃទី 05 មេសានេះ ពិធីចាប់លេខចែកពូលវិញ្ញាសាបាល់ទាត់របស់ស៊ីហ្គេមលើកទី 32 នឹងត្រូវធ្វើឡើង។ នៅក្នុងវិញ្ញាសាបាល់ទាត់បុរស U-22 កម្ពុជាត្រូវបញ្ចូលខ្លួនទៅក្នុងពូល A ដែលមានឈ្មោះសម្គាល់ថា A1។ U-22 វៀតណាមនឹងស្ថិតនៅក្នុងពូល B ដែលមានឈ្មោះសម្គាល់ថា B1។ បន្ទាប់មកទៀតនឹងមានការចាប់លេខសម្រាប់ក្រុមជម្រើសជាតិដែលនៅសល់។

ចំណាត់ថ្នាក់ក្រុមគ្រាប់ពូជនៅស៊ីហ្គេមលើកទី 32

នៅស៊ីហ្គេមលើកនេះ វិញ្ញាសាបាល់ទាត់បុរសនឹងនៅសល់តែដប់ក្រុមគត់ ព្រោះតែការដកខ្លួនរបស់ប្រទេសព្រុយណេ។ ដប់ក្រុមនៅអាស៊ីអាគ្នេយ៍នេះនឹងត្រូវចែកស្មើគ្នាជាពីរពូល។ ពីរក្រុមដែលជាប់លេខមួយ និងលេខពីរនៅពូលនីមួយៗនឹងបានឡើងទៅកាន់វគ្គពាក់កណ្ដាលផ្ដាច់ព្រ័ត្រ។

តាមគម្រោង វិញ្ញាសាបាល់ទាត់បុរសនៅស៊ីហ្គេមលើកនេះនឹងចាប់ផ្ដើមប្រកួតពីថ្ងៃទី 29 មេសា 2023។ ក្រុមដែលនៅក្នុងពូល A នឹងបានទាត់នៅឯកីឡដ្ឋានមរតកតេជោក ខណៈដែលក្រុមនៅពូល B នឹងទាត់នៅឯកីឡដ្ឋានព្រីនស៍ (Prince Stadium)។ ដោយឡែក វិញ្ញាសាបាល់ទាត់នារីនឹងប្រកួតចាប់ពីថ្ងៃទី 02 ដល់ទី 15 ឧសភា 2023 នៅឯកីឡដ្ឋាន RSN និងកីឡដ្ឋាន RCAF (ស្ដាតចាស់)៕

April 5, 2023

ណាតូលើកទង់បញ្ចូលហ្វាំងឡង់ជាសមាជិកទី 31

ណាតូ (NATO) នាថ្ងៃទី 04 មេសា 2023 បានទទួលយកប្រទេសហ្វាំងឡង់ជាសមាជិកទី 31 របស់សម្ព័ន្ធយោធា។

កាលពីថ្ងៃទី 04 មេសា រដ្ឋមន្ត្រីក្រសួងការបរទេសហ្វាំងឡង់ Pekka Haavisto បានប្រគល់ឯកសារយល់ព្រមចូលជាសមាជិកណាតូ ទៅឱ្យសមភាគីអាម៉េរិក Antony Blinken នៅឯទីស្នាក់ការកណ្ដាលរបស់សម្ព័ន្ធយោធានេះនាទីក្រុងព្រុចសែល ប្រទេសបែលហ្ស៊ិក ក្រោមវត្តមានរបស់អគ្គលេខាធិការ Jens Stotenberg។ «ដោយការទទួលឯកសារចូលជាសមាជិក យើងប្រកាសថា ហ្វាំងឡង់គឺជាសមាជិកទី 31 របស់អង្គការនៃសន្ធិសញ្ញាអាត្លង់ទិចខាងជើង» លោក Blinken ថ្លែងដូច្នេះ។

ចំណែកអគ្គលេខាធិការណាតូ លោក Stoltenberg ក៏បានប្រកាសស្វាគមន៍ហ្វាំងឡង់ដែលបានចូលជាសមាជិករបស់សម្ព័ន្ធយោធា។ លោក Stoltenberg ថ្លែងថា ប្រធានាធិបតីរុស្ស៊ី វ្ល៉ាឌីមៀ ពូទីន ចង់បិទខ្ទប់ច្រកទ្វាររបស់ណាតូ ប៉ុន្តែបានបរាជ័យ។ «ពេលនេះ ហ្វាំងឡង់មានមិត្តភ័ក្តិជាសម្ព័ន្ធមិត្តដែលខ្លាំងក្លាបំផុតលើពិភពលោក»។

ដូចទៅនឹងសមាជិកដទៃទៀតរបស់ណាតូ ហ្វាំងឡង់ ចាប់ពីពេលនេះតទៅត្រូវបានការពារដោយមាត្រាទី 5 ដែលជាគោលនយោបាយការពារជាក្រុមរបស់សម្ព័ន្ធមិត្ត នៅពេលសមាជិកណាមួយត្រូវបានវាយប្រហារ។ ទន្ទឹមនឹងនេះ ហ្វាំងឡង់ក៏ត្រូវត្រៀមខ្លួនសម្រាប់ការការពារសមាជិកដទៃរបស់សម្ព័ន្ធយោធានេះផងដែរ។

ណាតូលើកទង់បញ្ចូលហ្វាំងឡង់ជាសមាជិកទី 31

បណ្ដាប្រទេសជាសមាជិកណាតូ បានអបអរសាទរចំពោះសមាជិកថ្មី ខណៈដែលក្រសួងការបរទេសរុស្ស៊ីឱ្យដឹងថា ហ្វាំងឡង់បានបង្កកំហុសដ៏គ្រោះថ្នាក់ ហើយថា ទំនាក់ទំនងទ្វេភាគីនឹងរងផលវិបាកធ្ងន់ធ្ងរ។

រុស្ស៊ី និងហ្វាំងឡង់មានព្រំដែនជាប់គ្នាប្រវែងប្រហែល 1,300 គីឡូម៉ែត្រ។ ទីក្រុងមូស្គូ មុននោះបានប្រកាសថា នឹងបង្កើនវត្តមានទ័ពនៅតំបន់ភាគខាងលិច និងពាយព្យ ជាប់ព្រំដែនជាមួយហ្វាំងឡង់។

កាលពីថ្ងៃទី 04 មេសា រដ្ឋមន្ត្រីក្រសួងការបរទេសហ្វាំងឡង់ Pekka Haavisto បានប្រគល់ឯកសារយល់ព្រមចូលជាសមាជិកណាតូ ទៅឱ្យសមភាគីអាម៉េរិក Antony Blinken នៅឯទីស្នាក់ការកណ្ដាលរបស់សម្ព័ន្ធយោធានេះនាទីក្រុងព្រុចសែល ប្រទេសបែលហ្ស៊ិក

ហ្វាំងឡង់ និងស៊ុយអែត កាលពីខែឧសភា 2022 បានដាក់ពាក្យសុំចូលជាសមាជិកណាតូ។ បច្ចុប្បន្ន ស៊ុយអែតនៅជួបឧបសគ្គពីតួកគី និងហុងគ្រី ក្នុងការចូលជាសមាជិកសម្ព័ន្ធយោធានេះ ព្រោះតែបញ្ហាដែលទាក់ទិននឹងប្រទេសទាំងនេះ៕

April 5, 2023

ណាសាបង្ហាញក្រុមអ្នកអវកាសនៃគម្រោងហោះទៅកាន់ឋានព្រះចន្ទនៅឆ្នាំ 2024

(សហរដ្ឋអាម៉េរិក) – អវកាសចរបួនរូបរបស់ណាសា (NASA) នឹងហោះហើរនៅក្នុងបេសកកម្ម Artemis II ដែលដឹកមនុស្សទៅកាន់ឋានព្រះចន្ទជាលើកដំបូងក្នុងអំឡុង 50 ឆ្នាំមកនេះ និងគ្រោងនឹងធ្វើឡើងនៅក្នុងខែវិច្ឆិកា 2024។

ក្រុមអវកាសចរដែលត្រូវបានជ្រើសរើសសម្រាប់បេសកកម្ម Artemis II រួមមាន អ្នកអវកាស Reid Wiseman, Victor Glover, Christina Koch របស់ណាសា និង Jeremy Hansen របស់ទីភ្នាក់ងារអវកាសកាណាដា។

ប្រធានក្រុមអវកាសចរខាងលើគឺលោក Wiseman។ លោកគឺជាពីឡុតរបស់កងទ័ពជើងទឹកអាម៉េរិក អាយុ 47 ឆ្នាំ។ ណាសាបានជ្រើសរើសលោក Wiseman ឱ្យធ្វើជាអ្នកអវកាសលើកដំបូងកាលពីឆ្នាំ 2009។ Wiseman ធ្លាប់បានចូលរួមដំណើរហោះហើរ 165 ថ្ងៃទៅកាន់ស្ថានីយអវកាសអន្តរជាតិ (ISS) ដែលប្រើប្រាស់រ៉ុក្កែតរបស់រុស្ស៊ី កាលពីឆ្នាំ 2014។ លោកក៏ជាប្រធានការិយាល័យអ្នកអវកាសរបស់ណាសា ចាប់ពីឆ្នាំ 2020 ដល់ 2022។

Glover អាយុ 46 ឆ្នាំ ធ្លាប់ហោះទៅកាន់ ISS ដំបូង ដោយជិះយាន Crew Dragon របស់ SpaceX កាលពីឆ្នាំ 2021។ ចំណែក Koch អាយុ 44 ឆ្នាំ គឺជាអ្នកអវកាសឆ្នើម ដោយធ្លាប់ដើរក្នុងទីអវកាស 6 លើកកាលពីឆ្នាំ 2019។ Hansen អាយុ 47 ឆ្នាំ គឺជាអ្នកបើកបរយន្តហោះចម្បាំងដែលកាណាដាបានជ្រើសឱ្យទទួលការបណ្ដុះបណ្ដាលដើម្បីក្លាយជាអ្នកអវកាសកាលពីឆ្នាំ 2009។

បេសកកម្មព្រះចន្ទដំបូង (Artemis 1) គឺជាការហោះហើរគ្មានមនុស្សបើកបរ ដើម្បីពិនិត្យស្ថានភាពហោះហើរក្នុងទីអវកាសជ្រៅរបស់យាន Orion ហើយនឹងចុះចតលើផែនដីវិញ ដោយប្រើឆត្រយោង។ បើសិនជាអ្វីៗដំណើរការដោយរលូន នោះ Artemis 1 នឹងត្រូវបានបាញ់បង្ហោះនៅថ្ងៃទី 12 ខែកុម្ភៈ ឆ្នាំ 2022។

ចំណែកបេសកកម្ម Artemis 2 និង Artemis 3 វិញគឺ សុទ្ធតែមានអវកាសយានិកទៅជាមួយ។ តាមផែនការ Artemis 2 នៅតែប្រើប្រាស់រ៉ុក្កែត SLS Block 1 របស់ NASA ដើម្បីនាំយាន Orion ទៅហោះហើរជុំវិញឋានព្រះចន្ទ ខណៈ Artemis 3 នឹងប្រើប្រាស់ប្រព័ន្ធ Starship របស់ក្រុមហ៊ុន SpaceX ដើម្បីនាំយាន Orion ចុះចតលើដីឋានព្រះចន្ទ៕

April 4, 2023

ក្រុមហ៊ុនឯកជនចិនក្លាយជាអ្នកបាញ់បង្ហោះរ៉ុក្កែតប្រើឥន្ធនៈរាវជោគជ័យដំបូងគេក្នុងជើងទីមួយ

Space Pioneer បានក្លាយជាក្រុមហ៊ុនឯកជនដំបូងគេរបស់ប្រទេសចិន ដែលបានបាញ់បង្ហោះផ្កាយរណបដោយជោគជ័យ ដោយប្រើប្រាស់រ៉ុក្កែតដំណើរការដោយឥន្ធនៈរាវ។

រ៉ុក្កែតដែលត្រូវបានក្រុមហ៊ុនចិន Space Pioneer ហៅថា Tianlong 2 (Sky Dragon 2) នេះ ហោះឡើងពីមជ្ឈមណ្ឌលបាញ់បង្ហោះផ្កាយរណប Jiuquan (Jiuquan Satellite Launch Center) នៅភាគពាយព្យប្រទេសចិនកាលពីម៉ោង 16 និង 48 នាទី ថ្ងៃទី 02 មេសា។ មិនយូរប៉ុន្មានក្រោយការបាញ់បង្ហោះ រ៉ុក្កែតនេះក៏បានដាក់ពង្រាយផ្កាយរណបវាស់វែងពីចម្ងាយទៅក្នុងគន្លងគោចរដែលមានចម្ងាយប្រហែល 500 គីឡូម៉ែត្រពីផែនដីដោយជោគជ័យ។

ការបាញ់បង្ហោះនេះគឺជាលើកទីមួយហើយ ដែលរ៉ុក្កែតប្រើប្រាស់ឥន្ធនៈរាវអភិវឌ្ឍដោយក្រុមហ៊ុនឯកជនរបស់ចិន បានទៅដល់គន្លងតារាវិថីដោយជោគជ័យ។ Space Pioneer ក៏បានក្លាយជាក្រុមហ៊ុនដំបូងគេលើពិភពលោកដែលសម្រេចបានជោគជ័យនេះនៅក្នុងការប្រឹងប្រែងដំបូង។ នៅមុន Tianlong 2 រាល់រ៉ុក្កែតប្រើប្រាស់ឥន្ធនៈរាវដែលអភិវឌ្ឍដោយបណ្ដាក្រុមហ៊ុនឯកជនដទៃដូចជា SpaceX, Virgin Orbit និង LandSpace ជាដើម សុទ្ធតែបរាជ័យក្នុងការសាកល្បងបាញ់បង្ហោះលើកដំបូង។

Tianlong 2 គឺជារ៉ុក្កែតប្រើឥន្ធនៈរាវដែលមានបីជាន់ កម្ពស់ 32.8 ម៉ែត្រ ទទឹង 3.35 ម៉ែត្រ និងមានទម្ងន់ដែលអាចហោះឡើង 153 តោន។ វាអាចនាំយកទំនិញទម្ងន់ 2,000 គីឡូក្រាមឡើងទៅកាន់គន្លងគោចរកម្រិតទាបរបស់ផែនដី។ យោងតាម Space Pioneer រ៉ុក្កែតនេះប្រើប្រាស់ប្រេងកាតដែលមានប្រភពពីធ្យូងថ្ម៕

April 4, 2023

Nissan នឹងបញ្ចេញរថយន្តអគ្គិសនីតម្លៃទាបនៅលើទីផ្សារអន្តរជាតិ ដោយចាប់ផ្ដើមនៅឥណ្ឌា?

ថ្មីៗនេះ មានព័ត៌មានថា រថយន្តអគ្គិសនីច្រើនម៉ូដែលដែលផលិតឡើងក្រោមកិច្ចសហការរវាង Nissan និង Renault នឹងត្រូវបានបង្ហាញនៅប្រទេសឥណ្ឌា ខណៈ Nissan ឥណ្ឌា ក៏នឹងអាចបញ្ចេញរថយន្តអគ្គិសនីដំបូងៗរបស់ខ្លួន។

សារព័ត៌មានមួយចំនួននៅឥណ្ឌា បានរាយការណ៍អំពីការធ្វើតេស្តរថយន្ត SUV អគ្គិសនីប្រភេទប្រណិត Nissan Leaf ប៉ុន្តែ ក៏មានដំណឹងថា Nissan នឹងដាក់លក់រថយន្តអគ្គិសនីតម្លៃទាបនៅប្រទេសឥណ្ឌា។ រថយន្តតម្លៃទាបនេះនឹងប្រើប្រាស់រូបរាងរបស់រថយន្តម៉ាស៊ីនសាំង Micra ដែលបានឈប់ផលិតនៅឥណ្ឌាទៅហើយ។

កាលពីឆ្នាំមុន Nissan បានបង្ហាញរថយន្តអគ្គិសនីថ្មីរបស់ខ្លួននៅលើទីផ្សារអន្តរជាតិ។ រថយន្តអគ្គិសនីនេះគឺត្រូវបានយោងទៅតាមម៉ូដែលរថយន្តសាំង Micra និងត្រូវបានអភិវឌ្ឍដោយប្រើបច្ចេកវិទ្យា CMF-BEV ថ្មី។ Nissan Micra Electric ដែលជិតនឹងបង្ហាញខ្លួននឹងមានរូបរាងទាន់សម័យ រួមនឹងមុខងារដ៏អស្ចារ្យជាច្រើន។

បច្ចុប្បន្ន ក្រុមហ៊ុន Nissan កំពុងប្រឹងប្រែងផលិត និងគ្រោងចែកចាយរថយន្តអគ្គិសនីក្នុងបរិមាណច្រើនទៅកាន់ទីផ្សារអន្តរជាតិ ក្រោមកិច្ចសហការរបស់ Renault និង Mitsubishi។

Nissan ណែនាំរថយន្តអគ្គិសនីស៊េរីថ្មីទៅកាន់ទីផ្សារអឺរ៉ុប

រថយន្តអគ្គិសនីដែលប្រើប្រាស់រូបរាង Nissan Micra នឹងធ្វើដំណើរបានជាង 300 គីឡូម៉ែត្រ បន្ទាប់ពីបានបញ្ចូលថាមពលមួយពេញ ហើយវានឹងប្រជែងជាមួយ Tiago EV របស់ Tata Motors និង Comet EV របស់ MG ដែលជិតមានវត្តមានក្នុងទីផ្សារ។ ក៏ប៉ុន្តែ Nissan ឥណ្ឌា មិនទាន់ប្រកាសជាផ្លូវការស្ដីពីព័ត៌មានខាងលើនៅឡើយ៕

April 4, 2023

ស៊ីហ្គេម-អាស៊ានប៉ារ៉ាហ្គេមនៅកម្ពុជា៖ ការរៀបចំកម្លាំង-មធ្យោបាយសរុប បានធ្វើរួចរាល់ស្ទើរគ្រប់យ៉ាងរួចហើយ

(ភ្នំពេញ) – កម្ពុជាបានរៀបចំកម្លាំងសរុប មធ្យោបាយសរុប និងបានកសាងផែនការប្រកបដោយភាពហ្មត់ចត់ និងលម្អិតគួរជាទីកក់ក្តៅ ក្នុងការត្រៀមខ្លួនរួចរាល់ក្នុងនាមជាម្ចាស់ផ្ទះនៃការប្រកួតកីឡាអាស៊ីអាគ្នេយ៍លើកទី 32 និងអាស៊ានប៉ារ៉ាហ្គេម លើកទី 12។

ដំណឹងខាងលើត្រូវបាន ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ គណៈកម្មាធិការជាតិរៀបចំការប្រកួតកីឡាស៊ីហ្គេមកម្ពុជា (CAMSOC) និងអាស៊ានប៉ារ៉ាហ្គេមលើកទី 12 (CAMAPGOC) ឱ្យដឹងកាលពីល្ងាចថ្ងៃទី 03 មេសា 2023។ នេះបើយោងតាមទំព័រ Cambodia2023។

យោងតាមប្រធាន CAMSOC-CAMAPGOC វឌ្ឍនភាពការងាររៀបចំសម្រាប់ស៊ីហ្គេមលើកទី 32 មានចំណុចសំខាន់ៗមួយចំនួន មានជាអាទិ៍ ការងារសន្តិសុខ-សណ្តាប់ធ្នាប់ ការសង្គ្រោះព្យាបាល ការរៀបចំកម្លាំងសរុបមធ្យោបាយសរុប បានកសាងផែនការប្រកបដោយភាពហ្មត់ចត់ និងលម្អិតគួរជាទីកក់ក្តៅ។

បច្ចុប្បន្ន ព្រឹត្តិការណ៍ដែលកម្ពុជាធ្វើជាម្ចាស់ផ្ទះនេះ គ្រោងនឹងប្រើប្រាស់កងកម្លាំងសមត្ថកិច្ចសរុបជាង 5,000 នាក់ និងមន្ត្រីសុខាភិបាលប្រមាណ 3,000 នាក់។ ពិធីបើក-បិទរបស់ព្រឹត្តិការណ៍កីឡានេះនឹងមានអ្នកសម្ដែងទស្សនីយភាពប្រមាណ 3,000 នាក់ ក្នុងនោះមាន សិល្បករ-សិល្បការិនី មកពីក្រសួងវប្បធម៌ និងវិចិត្រសិល្បៈ ប្រមាណ 1,000 នាក់ កីឡាករ កីឡាការិនី និងកងទ័ព ចំនួនប្រមាណ 2,000 នាក់។

ទន្ទឹមនឹងនេះ ស៊ីហ្គេមទី 32 ក៏មានអ្នកស្ម័គ្រចិត្តចូលរួមជួយបំពេញការងារនានាប្រមាណ 5,000 នាក់ ដែលទាំងអស់ត្រូវបានជ្រើសរើស និងបំពាក់បំប៉នរួចរាល់។

ចំណែកការរៀបចំទីលានប្រកួត រួមទាំងការបំពាក់ឧបករណ៍សម្ភារបរិក្ខា និងរចនាសម្ព័ន្ធគ្រប់គ្រង ស្របតាមបទដ្ឋានបច្ចេកទេសកីឡា បាននិងកំពុងរៀបចំ និងជំរុញយ៉ាងសកម្មផងដែរ។ ចំពោះការតុបតែងលម្អតាមគោលដៅ និងតាមទីតាំងប្រកួត រដ្ឋបាលរាជធានី-ខេត្ត និងគណៈកម្មាធិការជាតិ CAMSOC-CAMAPGOC កំពុងសហការគ្នាជំរុញបន្តយ៉ាងសកម្ម។

នៅស៊ីហ្គេមលើកទី 32 នេះ មានកីឡាចំនួន 37 ប្រភេទ ដែលស្មើនឹង 581 វិញ្ញាសា។ ការប្រកួតកីឡាស៊ីហ្គេមលើកនេះ នឹងដំណើរការពីថ្ងៃទី 05 ដល់ទី 17 ឧសភា ឆ្នាំ 2023៕

April 4, 2023

Author: សឿន សំណាង