សឿន សំណាង - La Reine Media

ណាតូ (NATO) ជិតធ្វើសមយុទ្ធទ័ពអាកាសធំបំផុតក្នុងប្រវត្តិសាស្ត្រ

អាល្លឺម៉ង់បានប្រកាសថា ណាតូ កំពុងរៀបផែនការធ្វើសមយុទ្ធទ័ពអាកាសធំបំផុតមិនធ្លាប់មានក្នុងអតីតកាល ដោយមានយន្តហោះយោធាចូលរួមចំនួន 220 គ្រឿង។

ព្រឹត្តិការណ៍សមយុទ្ធទ័ពអាកាស Air Defense 2023 របស់ណាតូនឹងធ្វើឡើងពីថ្ងៃទី 12 ដល់ 24 មិថុនា 2023 នៅអឺរ៉ុប នេះបើយោងតាមកងទ័ពអាល្លឺម៉ង់ (Bundeswehr) ដែលបានឱ្យដឹងកាលពីចុងសប្ដាហ៍កន្លង។ នេះគឺជាសមយុទ្ធទ័ពអាកាសធំបំផុតមិនធ្លាប់មានក្នុងប្រវត្តិសាស្ត្ររបស់សម្ព័ន្ធយោធាណាតូ ដោយមានទាហានចូលរួមសរុប 10,000 នាក់ និងយន្តហោះយោធាចំនួន 220 គ្រឿងមកពីសមាជិកចំនួន 24 ប្រទេស ក្នុងនោះមានទាំងហ្វាំងឡង់ដែលជាសមាជិកថ្មីរបស់ណាតូ។

ទ័ពអាកាសអាម៉េរិកនឹងបញ្ជូនយន្តហោះចំនួន 100 គ្រឿងទៅចូលរួមសមយុទ្ធ។ ស៊ុយអែតដែលជាប្រទេសកំពុងរង់ចាំការយល់ព្រមឱ្យចូលជាសមាជិកណាតូក៏នឹងចូលរួម Air Defense 2023។

ផែនការនៃសមយុទ្ធនេះត្រូវបានកសាងទៅតាមសេណារីយោ «ប្រើប្រាស់មាត្រាទី 5 នៃធម្មនុញ្ញរបស់ណាតូ» ដែលចែងអំពីគោលការណ៍ការពារជាក្រុមរបស់សម្ព័ន្ធយោធានេះនៅពេលសមាជិកណាមួយត្រូវរងការវាយប្រហារពីសត្រូវ។

ពីឡុតនឹងត្រូវប្រឈមនឹងមីស៊ីលដីប្រឆាំងអាកាស (ដោយការបង្ហាញត្រាប់), ឧបករណ៍រំខានរលកអេឡិចត្រូនិក និងការគំរាមកំហែងដទៃ។ Bundeswehr ឱ្យដឹងថា ខ្លឹមសារនៃសមយុទ្ធនេះ «នឹងមានការលំបាកខ្លាំង» ដើម្បីបង្កើនប្រសិទ្ធភាពឱ្យបានខ្ពស់បំផុតចំពោះសកម្មភាពសហការគ្នារវាងបណ្ដាសមាជិក និងដើម្បីបង្ហាញកម្លាំងរបស់ណាតូ។

សមយុទ្ធខាងលើនេះ ភាគច្រើនធ្វើឡើងនៅលើទឹកដីរបស់អាល្លឺម៉ង់ ប៉ុន្តែបើយោងតាមផែនទីដែលផ្ដល់ដោយ Bundeswehr ដែនអាកាសរបស់អេស្តូនីដែលមានព្រំដែនជាប់នឹងរុស្ស៊ី និងប្រទេសរ៉ូម៉ានី ជាប់នឹងអ៊ុយក្រែន ក៏អាចត្រូវបានប្រើប្រាស់។

Air Defense លើកទី 2023 នឹងត្រូវបានធ្វើឡើងបន្ទាប់ពីសមយុទ្ធ Defender Europe លើកទី 2023 ដែលដឹកនាំដោយសហរដ្ឋអាម៉េរិក ត្រូវបានធ្វើឡើងចាប់ពីថ្ងៃទី 22 មេសា នៅក្នុងដប់ប្រទេសនៅអឺរ៉ុប ដោយមានទាហានអាម៉េរិកចូលរួម 9,000 នាក់ និង 17,000 នាក់មកពី 26 ប្រទេសនៅជុំវិញពិភពលោក៕

April 10, 2023

ប្លែកភ្នែក! ព្រឹត្តិការណ៍ប្រណាំងគោយន្តនៅប្រទេសថៃដែលជាក្ដីសប្បាយរបស់អ្នកក្រ

ថ្មីៗនេះ ឆានែល YouTube CB Media បានចូលរួមតាមដានព្រឹត្តិការណ៍ប្លែក និងពិសេសនៅលើវាលស្រែនៅប្រទេសថៃ ជាទីដែលប្រជាកសិកររកឃើញភាពសប្បាយរីករាយរបស់ពួកគេ នោះគឺការប្រណាំងគោយន្ត។

នៅពេលដែលក្រុមមនុស្សឧស្សាហ៍ជាងគេទំនេរពីការធ្វើស្រែចំការ ការចិញ្ចឹមសត្វ ពួកគេក៏បានរកឃើញការសប្បាយនៅឯវាលស្រែ ដោយមានធុងស្រាបៀរ ចំណីអាហារ និងទស្សនាការប្រណាំងគោយន្តដ៏គួរឱ្យចាប់អារម្មណ៍។

គោយន្តទាំងឡាយដែលចូលរួមការប្រណាំងនេះគឺសុទ្ធតែត្រូវបានប្រើប្រាស់ក្នុងការធ្វើស្រែចំការនៅប្រទេសថៃ។ ពួកវាត្រូវបានប្រជាកសិករហៅថា E-tak ឬ E-tan ហើយនេះគឺជាការកែច្នៃរបស់ជាងម៉ាស៊ីនរបស់ថៃ និងមានសណ្ឋានស្រដៀងនឹងម៉ាស៊ីនកាត់ស្មៅនៅសហរដ្ឋអាម៉េរិក។

អ្នកចូលរួមប្រកួតនឹងមានវិធីដោយឡែកដើម្បីបង្ហាញសមត្ថភាពរបស់ខ្លួន ក៏ដូចជាគោយន្ត។ ជាក់ស្ដែង គោលការណ៍នៃព្រឹត្តិការណ៍ប្រកួតនេះគឺមិនមានការកំណត់អ្វីទាំងអស់ ដោយគ្រប់យ៉ាងត្រូវបានកែច្នៃតាមចិត្ត។

YouTuber Chad Bee របស់ឆានែល CB Media ឱ្យដឹងថា «អ្នកដែលចូលរួមប្រកួតក៏មានសិទ្ធិយកម៉ាស៊ីនបម្រុងមកជាមួយ ព្រោះថា ម៉ាស៊ីនអាចមានបញ្ហាក្នុងពេលប្រកួត»។

ទីកន្លែងប្រណាំងគោយន្តនេះគឺស្ថិតនៅលើវាលស្រែដែលពេញដែលសម្បូរឧបសគ្គ។ គោយន្តទាំងអស់គឺជារបស់កែច្នៃធម្មតា មិនមានប្រព័ន្ធ ឬបច្ចេកវិទ្យាទំនើបណាមួយឡើយ។

នៅក្នុងការប្រកួត ពេលខ្លះ អ្នកបញ្ជាក៏ត្រូវបានគ្រវាត់ធ្លាក់ចេញពីគោយន្ត។ ដោយហេតុនេះហើយ ពួកគេតែងតែប្រើប្រាស់ឧបករណ៍ការពារខ្លួនមួយចំនួន មានដូចជា មួកសុវត្ថិភាព និងបន្ទះដែកការពារជើងដែលច្នៃដោយខ្លួនឯងជាដើម៕

April 10, 2023

ប្រហោងខ្មៅបង្កើតបានជាជ្រលងផ្កាយថ្មីមួយជួរប្រវែងពីរសែនឆ្នាំពន្លឺ

ក្រុមអ្នកវិទ្យាសាស្ត្ររកឃើញប្រហោងខ្មៅ (black hole) ខ្នាតយក្សមួយកំពុង «រត់គេច» ពីកាឡាក់ស៊ីរបស់វា ដែលនេះអាចបណ្ដាលមកពីការប៉ះទង្គិចរវាងប្រហោងខ្មៅ និងប្រហោងខ្មៅ។

លទ្ធផលនៃការស្រាវជ្រាវដែលត្រូវបានចុះផ្សាយលើទស្សនាវដ្ដី Astrophysical Journal Letters កាលពីថ្ងៃទី 06 មេសា បានឱ្យដឹងថា ប្រហោងខ្មៅខាងលើនេះមានម៉ាសធំជាង 20 លានដងនៃម៉ាសព្រះអាទិត្យ និងធ្វើដំណើរក្នុងល្បឿន 6.4 លានគីឡូម៉ែត្រ/ម៉ោង។ វាត្រូវបានប្រទះឃើញដោយចៃដន្យនៅពេលអ្នកស្រាវជ្រាវមកពីសាកលវិទ្យាល័យ Yale ពិនិត្យទិន្នន័យរូបភាពពីតេឡេស្កុបអវកាស Hubble។

«យើងបានឃើញពន្លឺមួយខ្សែដែលស្ទើរតែត្រង់ជួរ (ប្រវែង 200,000 ឆ្នាំពន្លឺ ដែលមួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ) ឆ្ពោះទៅកាន់ចំណុចកណ្ដាលរបស់កាឡាក់ស៊ីមួយ។ ដោយសារមិនធ្លាប់ឃើញពីមុនមក យើងក៏សម្រេចចិត្តស្រាវជ្រាវដោយប្រើតេឡេស្កុប Keck I នៃស្ថានីយសង្កេត WM Kech នៅ Hawaii» ប្រធានក្រុមស្រាវជ្រាវ Pieter van Dokkum មកពីសាកលវិទ្យាល័យ Yale ឱ្យដឹងដូច្នេះ។

ក្រុមស្រាវជ្រាវជឿថា ព្រឹត្តិការណ៍នេះកើតឡើងដោយសារការប៉ះទង្គិចគ្នារវាងប្រហោងខ្មៅខ្នាតយក្សចំនួនបី នៅពេលកាឡាក់ស៊ីមេចំនួនពីររបស់ពួកវាត្រូវច្របាច់បញ្ចូលគ្នាកាលពី 50 លានឆ្នាំមុន។ ក្នុងនោះ កាឡាក់ស៊ីមួយមានប្រហោងខ្មៅពីរវិលជុំវិញគ្នា ខណៈកាឡាក់ស៊ីមួយទៀតមានប្រហោងខ្មៅខ្នាតយក្សចំនួនមួយ។ ការប៉ះគ្នារវាងប្រហោងខ្មៅទាំងបីនេះកើតឡើងយ៉ាងច្របូកច្របល់ ហើយចុងក្រោយ មួយក្នុងចំណោមប្រហោងខ្មៅទាំងបីនេះបានប្រើប្រាស់បរិមាណចលនាពីប្រហោងខ្មៅពីរផ្សេងទៀត បោះពួយសំដៅទៅកាន់ទីអវកាសខាងក្រៅកាឡាក់ស៊ីរបស់វា។

នៅពេលប្រហោងខ្មៅរត់គេច វាក៏បានប៉ះនឹងលំហរបស់អវកាសដែលមានផ្ទុកពេញដោយធូលី ហើយស្រូបពួកវានៅក្នុងដំណើរការមួយដែលហៅថា ការប្រមូលផ្ដុំ (Accretion) នាំឱ្យកើតមានផ្កាយថ្មីៗជាបន្តបន្ទាបតាមពីក្រោយផ្លូវគោចរ។

ទ្រឹស្ដីស្ដីពីប្រហោងខ្មៅរត់គេចត្រូវបានលើកឡើងដំបូងនៅក្នុងទសវត្សរ៍ឆ្នាំ 1970។ បើសិនការសង្កេតបន្ទាប់ពីតេឡេស្កុបអវកាស James Webb និងស្ថានីយសង្កេតកាំរស្មី X Chandra អាចបញ្ជាក់ពីការសន្និដ្ឋានរបស់ក្រុមអ្នកស្រាវជ្រាវខាងលើ នោះវាអាចពង្រឹងទ្រឹស្ដីដែលមានអាយុ 50 ឆ្នាំមួយនេះ៕

April 10, 2023

សិង្ហបុរីបើកឡើងវិញ «ដំណើរទេសចរណ៍មិនគិតថ្លៃ» ពីព្រលានយន្តហោះ Changi

ភ្ញៀវដែលធ្វើដំណើរឆ្លងកាត់ទឹកដី Changi រយៈពេលខ្លីបំផុតត្រឹម 5.5 ម៉ោង អាចចូលរួមដំណើរទេសចរណ៍មិនគិតថ្លៃនៅសិង្ហបុរី។

ព្រលានយន្តហោះ Changi រួមនឹងក្រុមហ៊ុនអាកាសចរណ៍ Singapore Airlines និងនាយកដ្ឋានទេសចរណ៍ សិង្ហបុរី បានសហការគ្នាក្នុងការបើកឡើងវិញកម្មវិធី «ទេសចរណ៍សិង្ហបុរីដោយមិនគិតថ្លៃ» ចាប់ពីដើមខែមេសា ក្រោយពីការផ្អាកមួយរយៈពេលដោយសារវិបត្តិកូវីដ-19។

កម្មវិធីមិនគិតថ្លៃខាងលើនឹងមានដំណើរកម្សាន្តចំនួនបួនសម្រាប់ភ្ញៀវ រួមមាន City Sights Tour, Heritage Tour, Jewel Tour (មានតាំងពីមុនកូវីដ និងបានកែលំអ) រួមនឹង Tour ថ្មី Changi Precinct។ អ្នកដឹកនាំដំណើរកម្សាន្តទាំងនេះសុទ្ធតែនិយាយភាសាអង់គ្លេស។

ដំណើរកម្សាន្តរយៈពេល 2.5 ម៉ោងនេះ បម្រើដល់ភ្ញៀវដែលឆ្លងកាត់សិង្ហបុរីយ៉ាងតិច 5.5 ម៉ោង។ គោលដៅរបស់កម្មវិធីដំណើរកម្សាន្តមិនគិតថ្លៃនេះគឺធ្វើឡើងដើម្បីបង្កើនការយល់ដឹងរបស់ភ្ញៀវអន្តរជាតិចំពោះសិង្ហបុរី និងដើម្បីទាក់ទាញភ្ញៀវមកទស្សនាច្រើនដង។ គណៈកម្មការរៀបចំដំណើរកម្សាន្តខាងលើគ្រោងនឹងបង្កើនចំនួន Tour នេះឱ្យឡើងដល់ 9 នាពេលខាងមុខ។ កាលពីឆ្នាំ 2019 ភ្ញៀវជាង 80,000 នាក់បានចូលរួមដំណើរកម្សាន្តដោយមិនគិតថ្លៃនេះ។

ដំណើរកម្សាន្តដោយមិនគិតថ្លៃ Changi Precinct Tour នឹងនាំភ្ញៀវទៅកាន់តំបន់ភាគខាងកើតជុំវិញអាកាសយានដ្ឋាន Changi ស្វែងយល់ពីជីវភាពរបស់ប្រជាជនក្នុងតំបន់កណ្ដាលរបស់ Tampines ភូមិឋាន និងឆ្នេរសមុទ្រ Changi។

ដំណើរ Jewel Tour នឹងនាំភ្ញៀវទៅទស្សនាទីតាំងល្បីឈ្មោះមួយចំនួនមានដូចជា ជ្រលងព្រៃ Shiseido, Vortex HSBC Rain (ជ្រោះទឹកធ្លាក់ក្នុងផ្ទះខ្ពស់ជាងគេលើលោក – 40 ម៉ែត្រ)។ល។

ចំណែក City Sight Tour វិញ នឹងនាំទៅកាន់ខណ្ឌដែលនៅកណ្ដាលទីក្រុងសិង្ហបុរី។ ភ្ញៀវនឹងបានចូលមើលសារមន្ទីរជាតិ និងស្ពាន Anderson។ រថយន្តដឹកភ្ញៀវក្នុងដំណើរកម្សាន្តនេះក៏ត្រូវឆ្លងកាត់ឆកសមុទ្រ Marina ផងដែរ។

ដំណើរកម្សាន្ត Heritage Tour នឹងចូលទស្សនាសារមន្ទីរ និងវត្តសារីរិកធាតុព្រះពុទ្ធ (Buddha Tooth Relic Temple & Museum) ទីក្រុងនាវា ទីក្រុងអារ៉ាប់ និងច្រកផ្លូវ Haji។

ដំណើរកម្សាន្តទាំងនេះក៏នាំភ្ញៀវទៅកាន់ទីតាំងពិសេសមួយចំនួនផ្សេងទៀតដើម្បីស្វែងយល់អំពីការរីកចម្រើនរបស់ប្រទេសសិង្ហបុរី។

ដើម្បីចូលរួមដំណើរកម្សាន្តដោយមិនគិតថ្លៃនេះ ភ្ញៀវត្រូវតែមានកាតឡើងយន្តហោះ លិខិតឆ្លងដែន និងការបញ្ជាក់អំពីការកក់ដំណើរកម្សាន្ត។ ភ្ញៀវអាចចុះឈ្មោះដោយការស្កេនកូដ QR នៅឯបញ្ជរ Free Singapore Tour ឬ គេហទំព័រកក់ដំណើរកម្សាន្ត៕

April 8, 2023

ក្រុមហ៊ុន Geely ដាក់បង្ហាញឡានហោះអគ្គិសនីធំបំផុតនៅប្រទេសចិន

ឡានហោះអគ្គិសនីគំរូដែលហោះឡើង និងចុះចតដោយត្រង់ AE200 ដែលមានស្លាបប្រវែង 14.5 ម៉ែត្រ កាលពីថ្ងៃទី 06 មេសា ត្រូវបានដាក់បង្ហាញជាលើកដំបូងនៅក្នុងខេត្ត Sichuan ភាគនិរតីប្រទេសចិន។

ឡានហោះមានមនុស្សបើក AE200 ត្រូវបានអភិវឌ្ឍតែឯងដោយ Aerofugia ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតរថយន្តចិន Geely។ កាលពីថ្ងៃទី 06 មេសា ឡានហោះនេះត្រូវបានដាក់បង្ហាញជាលើកដំបូងនៅទីក្រុង Chengdu របស់ខេត្ត Sichuan។

AE200 គឺជាឡានហោះអគ្គិសនីប្រភេទហោះឡើង និងចុះចតត្រង់ ធំជាងគេបង្អស់ និងបានធ្វើការសាកល្បងហោះហើរលើកដំបូងនៅប្រទេសចិន។ ឡានហោះនេះមានកម្ពស់ 3.5 ម៉ែត្រ បណ្ដោយ 9.5 ម៉ែត្រ និងស្លាបមានប្រវែង 14.5 ម៉ែត្រ អាចដឹកមនុស្សបានប្រាំនាក់។

ដងខ្លួនរបស់ឡានហោះនេះធ្វើអំពីវត្ថុធាតុ composite ដែលជួយកាត់បន្ថយសំឡេងរំខាន។ ក្នុងអនាគត AE200 អាចហោះហើរលើកម្ពស់ចាប់ពី 300 ដល់ 1,000 ម៉ែត្រ និងហោះបានចម្ងាយពី 200 ដល់ 300 គីឡូម៉ែត្រ ក្នុងល្បឿន 250 គីឡូម៉ែត្រ/ម៉ោង។

នៅពេលមានវត្តមានក្នុងទីផ្សារជាផ្លូវការ ឡានហោះអគ្គិសនី AE200 នឹងត្រូវបានដាក់ឱ្យដំណើរការហោះហើររវាងទីក្រុង និងទីក្រុង៕

April 8, 2023

ខ្សែបម្រើ McTominay របស់ស្កុតឡែនលេចធ្លោលើវាលស្មៅក៏ព្រោះតែមានស្រីស្នេហ៍ដ៏ស្រស់ស្អាត

កីឡាករខ្សែបម្រើ Scott Francis Mctominay ត្រូវបានមនុស្សមួយចំនួនចាត់ទុកថា «បុរសមានសំណាង» ពេលអ្នកគាំទ្រសរសើរថា មានមិត្តស្រីដ៏ស្រស់ស្អាតឈ្មោះ Cam Reading។

កីឡាករខ្សែបម្រើរូបនេះគឺជាតារាបាល់ទាត់មួយរូបនៅក្នុងការប្រកួតឈ្នះអេស្ប៉ាញ 2-0 របស់ស្កុតឡែន ដោយស៊ុតបញ្ចូលទីបានពីរគ្រាប់ ជួយឱ្យក្រុមរបស់ស្កុតឡែននាំមុខគេនៅវគ្គសន្សំពិន្ទុនៅ Euro 2024។

McTominay ក៏ស៊ុតបញ្ចូលទីរបស់ក្រុមជម្រើសជាតិប្រទេសស៊ីប (Cyprus) បានពីរគ្រាប់កាលពីថ្ងៃទី 01 មេសា ធ្វើឱ្យគាត់លេចធ្លោជាងគេនៅក្នុងសប្ដាហ៍កន្លង ដោយរកបានបួនគ្រាប់តែឯង។

ក្នុងពេលដែល McTominay កំពុងរកគ្រាប់បាល់ដែលដណ្ដើមបាន 6 ពិន្ទុឱ្យស្កុតឡែន មិត្តស្រី Cam Reading របស់គាត់កំពុងសម្សាន្ត និងលើកទឹកចិត្តគាត់ពីមាត់សមុទ្រនៅឌូដៃ។

ស្រីស្អាត Cam Reading បានបង្ហោះរូបថតមួយចំនួនស្ដីពីដំណើរកម្សាន្តរបស់ខ្លួនកាលពីចុងសប្ដាហ៍មុន ហើយកីឡាករ McTominay ក៏ចូលបញ្ចេញមតិ ដោយសរសេរថា «អូនស្អាតណាស់ ទេពកញ្ញារបស់បង»។

នៅលើបណ្ដាញសង្គម កាលពីពេលថ្មីៗនេះ Cam Reading បានបង្ហោះរូបថតជាច្រើនសន្លឹកដ៏គួរឱ្យចាប់ចិត្ត។ រូបថតទាំងនេះក៏ទទួលបានការចាប់អារម្មណ៍ ក៏ដូចជាការសរសើរច្រើនពីអ្នកលេងបណ្ដាញសង្គម។

Cam Reading កំពុងតែលើកទឹកចិត្ត និងគាំទ្រមិត្តប្រុស McTominay ពីចម្ងាយ និងបានឱ្យដឹងថា នាងពិតជាមានមោទកភាពចំពោះខ្សែបម្រើរូបនេះ បន្ទាប់ពីរកបានពីរគ្រាប់ជូនស្កុតឡែននៅពេលប្រកួតជាមួយក្រុមប្រទេសស៊ីប។ Cam Reading សរសេរថា «ជ័យជម្នះពីរគ្រាប់ដ៏អស្ចារ្យ! មិនអាចមានមោទកភាពណាខ្លាំងជាងនេះ»។

សូមទស្សនារូបថតថតដ៏ស៊ិចស៊ីមួយចំនួនរបស់ Cam Reading ដែលជាមិត្តស្រីរបស់ខ្សែបម្រើជនជាតិស្កុតឡែន ៖

April 8, 2023

ប្រធានាធិបតីប្រេស៊ីល ស្នើឱ្យអ៊ុយក្រែនបោះបង់គ្រីមៀជាថ្នូរនឹងសន្តិភាព

ប្រធានាធិបតីប្រេស៊ីល ស្នើឱ្យអ៊ុយក្រែនធ្វើសម្បទានឧបទ្វីបគ្រីមៀ (Crimea) ទៅឱ្យរុស្ស៊ី ជាថ្នូរនឹងការបញ្ចប់សង្គ្រាម ប៉ុន្តែទីក្រុងកៀវបានច្រានចោល។

«បញ្ហាឧបទ្វីបគ្រីមៀអាចចរចាគ្នាបាន។ ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី មិនអាចចង់បានគ្រប់យ៉ាង។ ពិភពលោកត្រូវការស្ថិរភាព ហើយយើងត្រូវរកដំណោះស្រាយ» ប្រធានាធិបតីប្រេស៊ីល Luiz Inacio Lula da Silva ថ្លែងដូច្នេះកាលពីថ្ងៃទី 06 មេសា ពេលលោកស្នើឱ្យអ៊ុយក្រែនធ្វើសម្បទាននៅក្នុងបញ្ហាគ្រីមៀ ដើម្បីបញ្ចប់សង្គ្រាមឱ្យបានឆាប់។

ប្រធានាធិបតី Lula នៅសប្ដាហ៍ក្រោយនេះនឹងមានដំណើរទស្សនកិច្ចទៅកាន់ប្រទេសចិន និងមានគម្រោងពិភាក្សាអំពីបញ្ហាសង្គ្រាមរវាងរុស្ស៊ី និងអ៊ុយក្រែន។ ទីក្រុងប៉េកាំង មុននោះបានប្រកាសអំពីផែនការសន្តិភាព 12 ចំណុចសម្រាប់អ៊ុយក្រែន ក្នុងនោះក៏មានការអំពាវនាវដល់ភាគីនានាជួយដល់មូស្គូ និងកៀវ ដើម្បីដោះស្រាយវិបត្តិនេះ។

មេដឹកនាំប្រេស៊ីលបានលើកជាគំនិតស្ដីពីការបង្កើតក្រុមមួយដែលមានបណ្ដាប្រទេសជាអ្នកសម្រុះសម្រួលសម្រាប់បញ្ហារុស្ស៊ី-អ៊ុយក្រែន។ លោក Lula និយាយថា លោកជឿថា ក្រុមនេះនឹងត្រូវបានបង្កើតឡើងបន្ទាប់ពីដំណើរទស្សនកិច្ចរបស់លោកនៅប្រទេសចិន។

អ្នកនាំពាក្យរបស់ក្រសួងការបរទេសអ៊ុយក្រែន លោក Oleg Nikolenko កាលពីថ្ងៃទី 07 មេសា បានរិះគន់ចំពោះសំណើរបស់ប្រធានាធិបតីប្រេស៊ីល និងអះអាងថា ទីក្រុងកៀវនឹងមិនធ្វើសម្បទានទឹកដីជាដាច់ខាត ទោះជាមួយសង់ទីម៉ែត្រ។

«រាល់ការប្រឹងប្រែងសម្រុះសម្រួលដើម្បីស្ដារសន្តិភាពនៅអ៊ុយក្រែន ត្រូវតែយោងទៅលើការគោរពអធិបតេយ្យភាព និងបូរណភាពទឹកដីរបស់អ៊ុយក្រែន» លោក Nikolenko ថ្លែងដូច្នេះ។

កាលពីខែតុលា 2022 មហាសេដ្ឋីអាម៉េរិក លោក Elon Musk ក៏ធ្លាប់បានលើកឡើងនូវដំណោះស្រាយដូចទៅនឹងប្រធានាធិបតីប្រេស៊ីល ប៉ុន្តែក៏ត្រូវបានទីក្រុងកៀវបដិសេធ។

រុស្ស៊ីបានរឹបអូសយកឧបទ្វីបគ្រីមៀរបស់អ៊ុយក្រែន បន្ទាប់ពីការធ្វើប្រជាមតិកាលពីឆ្នាំ 2014។ មូស្គូនិយាយថា លទ្ធផលនៃការធ្វើប្រជាមតិបង្ហាញថា ប្រជាជនភាគច្រើននៅគ្រីមៀ ចង់ក្លាយជាផ្នែកមួយរបស់រុស្ស៊ី ប៉ុន្តែ អ៊ុយក្រែន និងបណ្ដាប្រទេសលោកខាងលិចចាត់ទុកថា នេះគឺជាទង្វើខុសច្បាប់។

វិមានក្រឹមឡាំងស្នើឱ្យអ៊ុយក្រែនទទួលស្គាល់អធិបតេយ្យភាពរបស់រុស្ស៊ីចំពោះគ្រីមៀ និងតំបន់មួយចំនួនទៀតដែលមូស្គូបានរឹបអូស ដើម្បីជាថ្នូរនឹងសន្តិភាព។ ទីក្រុងកៀវប្រកាសថា មិនចរចារកសន្តិភាព បើសិនរុស្ស៊ីមិនទាន់ចាកចេញពីដែនដីទាំងឡាយដែលពួកគេបានគ្រប់គ្រងនៅអ៊ុយក្រែន ក្នុងនោះមានឧបទ្វីបគ្រីមៀជាដើម៕

April 8, 2023

U-22 ថៃ ជួបការលំបាកក្នុងការប្រមូលកម្លាំងដែលខ្លាំងបំផុតនៅស៊ីហ្គេមលើកនេះ

កាលបរិច្ឆេទប្រកួតរបស់វិញ្ញាសាបាល់ទាត់នៅស៊ីហ្គេមលើកទី 32 មិនជាន់គ្នានឹង FIFA Days ហើយការប្រកួតនៅពានរង្វាន់ជើងឯកបាល់ទាត់ជាតិថៃ Thai League 1 កំពុងធ្វើឡើង ដូច្នេះ U-22 ថៃ ទំនងជាពិបាកក្នុងការប្រមូលកីឡាករខ្លាំងៗបំផុតមកទាត់នៅកម្ពុជា។

វិញ្ញាសាបាល់ទាត់បុរសនៅស៊ីហ្គេមលើកទី 32 នឹងធ្វើឡើងចាប់ពីថ្ងៃទី 29 មេសាដល់ 16 ឧសភា ខណៈដែល Thai League 1 ត្រូវប្រកួតរហូតដល់ថ្ងៃទី 12 ឧសភាទើបចប់។ ដោយសារតែមិនជាន់នឹងកាលបរិច្ឆេទ FIFA Days ដូច្នេះបណ្ដាក្លឹបនៅប្រទេសថៃមិនអាចត្រូវបានតម្រូវឱ្យបញ្ចេញកីឡាករក្នុងឱកាសនេះ។

សហព័ន្ធកីឡាបាល់ទាត់ថៃ (FAT) និងគណៈកម្មការរៀបចំ Thai League មានគោលការណ៍ផ្ដល់អាទិភាពឱ្យបណ្ដាពានរង្វាន់ចាប់ពីថ្នាក់ទ្វីបអាស៊ីឡើងទៅ។ បណ្ដាក្លឹបនឹងគាំទ្រដល់ក្រុម U-23 ច្រើនជាង នៅពេល FAT ត្រូវការប្រមូលកីឡាករទៅប្រកួតវគ្គជម្រុះ U-23 អាស៊ី ឬវគ្គជម្រុះ Olympic។ ហេតុនេះហើយ ទើប FAT ត្រូវចរចាជាមួយក្លឹបនីមួយៗដើម្បីសូមឱ្យផ្ដល់កីឡាករ។

គ្រូបង្វឹកថៃ Issara Sritaro សង្ឃឹមថា នឹងកោះហៅបានបណ្ដាកីឡាករសំខាន់ៗ មានដូចជា ខ្សែការពារ Chatmongkol Rueangthanarot, Jonathan Khemdee, ខ្សែបម្រើ Airfan Doloh, Channarong Promsrikaew ឬខ្សែប្រយុទ្ធ Teerasak Poeiphimai សម្រាប់ការប្រកួតនៅកម្ពុជា។ ប៉ុន្តែ កំពូលខ្សែប្រយុទ្ធ Suphanat Mueanta ដែលបច្ចុប្បន្នទាត់ឱ្យក្លឹប Buriram United មានភាគរយនៃអវត្តមានរហូតដល់ 99%។ គ្រូបង្វឹក U-22 ថៃ និយាយថា «Suphanat នឹងទៅកាន់អឹរ៉ុបដើម្បីហាត់ បន្ទាប់ពី Thai League 1 បានបញ្ចប់»។

កំពូលខ្សែប្រយុទ្ធ Suphanat Mueanta ទំនងជាពិបាកចូលរួមប្រកួតនៅស៊ីហ្គេមលើកនេះ

ទោះជាយ៉ាងណាក៏ដោយ គ្រូបង្វឹកថៃឱ្យដឹងថា បានពិភាក្សាជាមួយថ្នាក់ដឹកនាំក្លឹប Buriram និងសង្ឃឹមថា ក្លឹបនេះនឹងយល់ព្រមឱ្យ Suphanat ចូលប្រកួតនៅស៊ីហ្គេមចាប់ពីវគ្គពាក់កណ្ដាលផ្ដាច់ព្រ័ត្រ។

នៅស៊ីហ្គេមលើកនេះ បណ្ដាក្រុម U-22 ត្រូវបានអនុញ្ញាតឱ្យចុះឈ្មោះកីឡាករផ្លូវការត្រឹមតែ 20 នាក់ប៉ុណ្ណោះ។ ថៃដាក់គោលដៅដណ្ដើមមេដាយមាសឱ្យបាននៅស៊ីហ្គេមលើកទី 32 ក្រោយពីឈរមើលវៀតណាមគ្រប់គ្រងតំណែងជើងឯកពីរឆ្នាំជាប់គ្នា។ នៅកម្ពុជា ក្រុមបាល់ទាត់ជម្រើសជាតិថៃស្ថិតក្នុងពូល B ដែលនឹងត្រូវប្រកួតជាមួយសិង្ហបុរីនៅថ្ងៃទី 30 មេសា, ប៉ះម៉ាឡេស៊ីនៅថ្ងៃទី 06 ឧសភា, ប៉ះឡាវថ្ងៃទី 08 ឧសភា និងវៀតណាមនៅថ្ងៃទី 11 ឧសភា ឆ្នាំ 2023៕

April 7, 2023

រថយន្តក្រុងបើកបរស្វ័យប្រវត្តដំបូងគេលើពិភពលោកត្រៀមដំណើរការឆាប់ៗនេះ

រថយន្តក្រុងសាធារណៈបើកបរស្វ័យប្រវត្តដំបូងគេលើពិភពលោកនឹងត្រូវបានដាក់ឱ្យដំណើរការនៅប្រទេសស្កុតឡែនចាប់ពីខែឧសភា 2023 ។

រថយន្តក្រុងបើកបរស្វ័យប្រវត្តរបស់សាជីវកម្មដឹកជញ្ជូន Stagecoach នឹងចាប់ផ្ដើមដំណើរការនៅលើកំណាត់ផ្លូវប្រវែង 22.5 គីឡូម៉ែត្រ រួមមានស្ពានខ្សែកាប Forth Road ដ៏ល្បីឈ្មោះនៅ Edinburgh នៅថ្ងៃទី 15 ឧសភា។ រថយន្តប្រភេទនេះប្រាំគ្រឿងនឹងដំណើរការជារៀងរាល់ថ្ងៃ ដែលអាចដឹកអ្នកដំណើរបានប្រហែល 10,000 នាក់/សប្ដាហ៍។ យោងតាម Interesting Engineering នេះគឺជាលទ្ធផលនៃការធ្វើតេស្តជោគជ័យកាលពីខែមករា 2023 និងទទួលបានជំនួយផ្នែកហិរញ្ញវត្ថុពីរដ្ឋាភិបាលអង់គ្លេស។

Stagecoach បានឱ្យដឹងថា រថយន្តរបស់ពួកគេនឹងបើកបរក្នុងល្បឿនអតិបរមា 80 គីឡូម៉ែត្រ/ម៉ោង នៅលើផ្លូវល្បឿនលឿន។ ថ្វីបើរថយន្តនេះបើកបរដោយស្វ័យប្រវត្ត ប៉ុន្តែក៏មានបុគ្គលិកពីរនាក់ស្ថិតនៅក្នុងរថយន្ត ក្នុងនោះ ម្នាក់អង្គុយលើកៅអីអ្នកបើកបរដើម្បីតាមដានប្រព័ន្ធគ្រប់គ្រង និងម្នាក់ទៀតមានភារកិច្ចជួយដល់អ្នកដំណើរ។

គម្រោងនេះស្ថិតក្នុងគំនិតផ្ដួចផ្ដើម CAVForth Initiative របស់រដ្ឋាភិបាលអង់គ្លេស ដែលចាប់ផ្ដើមកាលពីឆ្នាំ 2019។

ក្រៅពីរថយន្តក្រុងសាធារណៈបើកបរស្វ័យប្រវត្តិ Stagecoach ក៏បង្ហាញរថយន្តក្រុងអគ្គិសនី 122 គ្រឿងដែលនឹងដំណើរការនៅក្នុងបណ្ដាញចផ្លូវរាចរណ៍សំខាន់ៗរបស់ចក្រភពអង់គ្លេសនៅក្នុងរយៈពេល 12 ខែទៀត។ ថ្មីៗនេះ Stagecoach បានណែនាំរថយន្តក្រុងដែលដំណើរការដោយអគ្គិសនីទាំងស្រុងនៅក្នុងទីក្រុងមួយចំនួន មានជាអាទិ៍ Perth, Aberdeen, Inverness និង Dunfermline នៅប្រទេសស្កុតឡែន ដែលជាទឹកដីភាគខាងជើងរបស់ចក្រភពអង់គ្លេស៕

April 7, 2023

រុស្ស៊ីនឹងជួយវៀតណាមក្នុងការអភិវឌ្ឍបច្ចេកវិទ្យាស្រាវជ្រាវនុយក្លេអែរថ្មី

គម្រោងសាងសង់មជ្ឈមណ្ឌលស្រាវជ្រាវវិទ្យាសាស្ត្រ និងបច្ចេកវិទ្យនុយក្លេអែរ (CNST) និងរោងចក្រស្រាវជ្រាវថ្មីនៅវៀតណាម កំពុងត្រូវបានរដ្ឋាភិបាលរុស្ស៊ី និងវៀតណាមពិភាក្សាដើម្បីឈានដល់ការចុះកិច្ចព្រមព្រៀងនាពេលខាងមុខ។

ព័ត៌មាននេះត្រូវបានចែករំលែកនៅក្នុងដំណើរទស្សនកិច្ចរបស់ឧបនាយករដ្ឋមន្ត្រីរុស្ស៊ី Chernyshenko Dmitry Nikolaevich និងក្រុមការងារ នៅវិទ្យាស្ថានថាមពលអាតូមិកវៀតណាម របស់ក្រសួងវិទ្យាសាស្ត្រ និងបច្ចេកវិទ្យា កាលពីព្រឹកថ្ងៃទី 07 មេសា។ នេះបើតាមការចុះផ្សាយរបស់សារព័ត៌មានវៀតណាម VNExpress។

ក្នុងជំនួបខាងលើ អនុរដ្ឋមន្ត្រីក្រសួងវិទ្យាសាស្ត្រវៀតណាម បានសង្កត់ធ្ងន់ថា វៀតណាម និងរុស្ស៊ីបានធ្វើកិច្ចសហប្រតិបត្តិការទ្វេភាគីក្នុងវិស័យអប់រំ បណ្ដុះបណ្ដាល វិទ្យាសាស្ត្រ និងបច្ចេកវិទ្យា។ ក្នុងវិស័យវិទ្យាសាស្ត្រ និងបច្ចេកវិទ្យាដែលភាគីទាំងពីរបានសហការ រួមមាន ថាមពលអាតូមិក បច្ចេកវិទ្យាជីវសាស្ត្រ វត្ថុធាតុថ្មី អេឡិចត្រូនិច និងបច្ចេកវិទ្យាស្វ័យប្រវត្ត។ល។

ក្នុងវិស័យថាមពលអាតូមិក អតីតសូវៀតធ្លាប់បានជួយវៀតណាមក្នុងការស្ដារ និងលើកកម្ពស់គុណភាពម៉ាស៊ីនប្រតិកម្មនុយក្លេអែរ (រ៉េអាក់ទ័រនុយក្លេអ៊ែរ) ដែលស្រាវជ្រាវនៅខេត្ត Da Lat ប្រទេសវៀតណាម។ បច្ចុប្បន្ន រុស្ស៊ីកំពុងជួយវៀតណាមក្នុងការអនុវត្តគម្រោងសាងសង់ CNST ដែលមានរោងចក្រស្រាវជ្រាវថ្មី។

ឧបនាយករដ្ឋមន្ត្រីរុស្ស៊ី Dmitry Chernyshenko ឱ្យដឹងថា សម្រាប់គម្រោងមជ្ឈមណ្ឌលស្រាវជ្រាវ CNST អង្គភាព RosAtom កំពុងត្រៀមឯកសារស្នើដេញថ្លៃ។ «ភាគីទាំងពីរបន្តពិភាក្សាគ្នា ហើយអាចចុះកិច្ចព្រមព្រៀងនៅពាក់កណ្ដាលឆ្នាំនេះ» លោក Dmitry Chernyshenko បញ្ជាក់ដូច្នេះ។

គម្រោងមជ្ឈមណ្ឌលស្រាវជ្រាវវិទ្យាសាស្ត្របច្ចេកវិទ្យានុយក្លេអែរត្រូវបានអនុវត្តទៅតាមកិច្ចព្រមព្រៀងអន្តររដ្ឋាភិបាលដែលចុះហត្ថលេខាកាលពីឆ្នាំ 2011។ គម្រោងនេះត្រូវបានរដ្ឋាភិបាលវៀតណាមអនុម័តគោលនយោបាយវិនិយោគកាលពីឆ្នាំ 2018៕

April 7, 2023

Author: សឿន សំណាង