សឿន សំណាង - La Reine Media

ស្រឡាងអគ្គិសនីដឹកអ្នកដំណើរដោយស្វ័យប្រវត្តដំបូងគេលើពិភពលោក

(ស៊ុយអែត) – ស្តុកខុលបានក្លាយជាទីក្រុងដំបូងគេលើពិភពលោកដែលដាក់ឱ្យប្រើប្រាស់ស្រឡាងដឹកអ្នកដំណើរបែបពាណិជ្ជកម្មស្វ័យប្រវត្តដំណើរការទាំងស្រុងដោយថាមពលអគ្គិសនី។

ម៉ូដែលស្រឡាងមានដងខ្លួនពីរដែលអាចដាក់មនុស្សបាន 25 នាក់នេះនឹងធ្វើសកម្មភាពរវាងបណ្ដាកោះ Kungsholmen និង Soder Mellarstrand នៅរដ្ឋធានីស្តុកខុល ក្នុងរយៈពេល 15 ម៉ោងជាប់ៗគ្នាជារៀងរាល់ថ្ងៃ ចាប់ពីខែមិថុនា 2023។ នេះបើតាមគេហទំព័រ Zeam។

ស្រឡាងទំនើបនេះស្ថិតក្នុងគម្រោងបង្កើតឱ្យមានមធ្យោបាយធ្វើដំណើរដែលមានស្ថិរភាពក្នុងទីក្រុង និងទាក់ទាញចំណាប់អារម្មណ៍ពីសាធារណជនជាងមុន។ គម្រោងដែលបានចាប់ផ្ដើមនៅឯសាកលវិទ្យាល័យវិទ្យាសាស្ត្រ និងបច្ចេកវិទ្យាន័រវែស (NTNU) នៅ Trondheim នេះ បាននាំឱ្យមានវត្តមានក្រុមហ៊ុនបច្ចេកវិទ្យា Zeabuz។ Zeabuz ផ្គត់ផ្គង់ប្រព័ន្ធស្វ័យប្រវត្តសម្រាប់ស្រឡាងដឹកអ្នកដំណើរ។

ដំណើរការរបស់ស្រឡាងប្រវែង 12 ម៉ែត្រនេះ នឹងត្រូវបានតាមដានពីបន្ទប់គ្រប់គ្រងនៅលើដីគោក។ ស្រឡាងនេះមានដំបូល និងច្រកឡើងចុះនៅខាងមុខ និងខាងក្រោយ។ មធ្យោបាយធ្វើដំណើរនេះត្រូវបានផលិតដោយក្រុមហ៊ុនសាងសង់កប៉ាល់ Brodrene Aa ដែលមានវត្តមានតាំងពីឆ្នាំ 1947។

គម្រោងស្រឡាងអគ្គិសនីស្វ័យប្រវត្តរបស់ស៊ុយអែត នឹងជួយជំរុញការធ្វើដំណើរតាមផ្លូវទឹក កាត់បន្ថយការកកស្ទះចរាចរណ៍ផ្លូវគោក និងបន្ថយការបំភាយឧស្ម័នពុល៕

April 25, 2023

ក្រុមបាល់ទាត់បុរសទីពីរដែលបានមកដល់កម្ពុជា ដើម្បីត្រៀមខ្លួនសម្រាប់ស៊ីហ្គេមលើកទី 32

ល្ងាចថ្ងៃទី 25 មេសានេះ ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសឥណ្ឌូណេស៊ី បានមកដល់អាកាសយានដ្ឋានអន្តរជាតិភ្នំពេញ ដើម្បីត្រៀមខ្លួនសម្រាប់ការប្រកួតនៅស៊ីហ្គេមលើកនេះ។

U-22 ឥណ្ឌូណេស៊ី គឺជាក្រុមបាល់ទាត់ជម្រើសជាតិទីពីរដែលបានមកដល់ទឹកដីកម្ពុជា ដើម្បីត្រៀមខ្លួនសម្រាប់ចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍។ ក្រុមបាល់ទាត់បុរសដែលបានមកដល់កម្ពុជាមុនគេគឺ U-22 ហ្វ៊ីលីពីន។

U-22 ឥណ្ឌូណេស៊ី ក៏ជាក្រុមដំបូងគេដែលបានបំពេញបញ្ជីឈ្មោះកីឡាករដែលត្រូវចូលរួមប្រកួតនៅស៊ីហ្គេមលើកនេះ។ U-22 ឥណ្ឌូណេស៊ី មានឈ្មោះកីឡាករជាច្រើនដែលធ្លាប់បានចូលរួមប្រកួតនៅស៊ីហ្គេមលើកទី 31 ក្រោមការដឹកនាំរបស់គ្រូបង្វឹក Shin Tae-yong មានដូចជា អ្នកចាំទី Ernando Ari, ខ្សែការពារកណ្ដាល Rizky Ridho, ខ្សែការពារស្លាបទាំងពីរគឺ Pratama Arhan និង Alfeandra Dewangga, ខ្សែបម្រើ Marselino Ferdinan, Witan Sulaeman។ល។ ទន្ទឹមនឹងនេះ គ្រូបង្វឹក Indra Sjafri ក៏បន្ថែមកីឡាករថ្មីជាច្រើននាក់ដែលមានអាយុពី 19 ដល់ 21 ឆ្នាំ។

ចំណែកកីឡាករដែលអវត្តមានដ៏គួរឱ្យចាប់អារម្មណ៍បំផុតរបស់ U-22 ឥណ្ឌូណេស៊ី ប្រហែលជា Ronaldo Kwateh ដែលជាតារាបាល់ទាត់មួយរូបរបស់ប្រទេសនេះ។ អវត្តមានរបស់ Ronaldo Kwateh ទំនងបណ្ដាលមកពីការរងរបួសពេលប្រកួត។ ក៏ប៉ុន្តែ ប្រធានក្រុមគ្រូបង្វឹករបស់ឥណ្ឌូណេស៊ី បានអះអាងថា «ខ្ញុំមិនបារម្ភអ្វីឡើយនៅពេលអវត្តមាន Ronaldo»។

នៅស៊ីហ្គេមលើកនេះ U-22 ឥណ្ឌូណេស៊ីស្ថិតក្នុងពូល A ជាមួយនឹងកម្ពុជា ហ្វ៊ីលីពីន មីយ៉ាន់ម៉ា និងទីម័រខាងកើត។ U-22 ឥណ្ឌូណេស៊ី នឹងត្រូវប្រកួតជាមួយ U-22 ហ្វ៊ីលីពីន វេលាម៉ោង 16 គត់ ថ្ងៃទី 29 មេសា។ ក្នុងថ្ងៃនោះដែរក៏នឹងមានការប្រកួតរវាងក្រុមម្ចាស់ផ្ទះកម្ពុជា ជាមួយនឹងទីម័រខាងកើត នៅវេលាម៉ោង 19 គត់៕

April 25, 2023

បេសកកម្មឡើងទៅកាន់ឋានព្រះចន្ទ ៖ ណាសាកំពុងញាប់ដៃញាប់ជើងផលិត និងដំឡើងរ៉ុក្កែតសម្រាប់អ្នកអវកាស

(សហរដ្ឋអាម៉េរិក) – ក្រុមអ្នកអវកាសដែលចូលរួមក្នុងបេសកកម្ម Artemis កំពុងត្រៀមសម្រាប់ការហោះហើរឆ្ងាយបំផុតក្នុងប្រវត្តិសាស្ត្រ នៅក្នុងយានអវកាស Orion នាឆ្នាំ 2024 ក្នុងនោះ រ៉ុក្កែតរបស់ពួកគេក៏កំពុងស្ថិតក្នុងដំណាក់កាលដំឡើង។

នៅក្នុងវីដេអូដែលចែករំលែកដោយមជ្ឈមណ្ឌលហោះហើរអវកាស Marshall របស់ណាសា កំណាត់ស្នូលរបស់រ៉ុក្កែតនៃប្រព័ន្ធបាញ់បង្ហោះ SLS ដែលប្រើក្នុងបេសកកម្ម Artemis 2 កំពុងត្រូវបានផលិតនៅឯរោងចក្រដំឡើង Michoud របស់ណាសា ស្ថិតក្នុងតំបន់ New Orleans។ កំណាត់ទាំងប្រាំរបស់រ៉ុក្កែតប្រវែង 65 ម៉ែត្រ ត្រូវបានតភ្ជាប់គ្នា ហើយកំណាត់ដែលដាក់គ្រឿងម៉ាស៊ីនទំនងជាផ្នែកចុងក្រោយបង្អស់។ នេះបើតាម Space ចុះផ្សាយកាលពីថ្ងៃទី 24 មេសា។

បន្ទាប់ពីបានផលិតរួចរាល់ កំណាត់ស្នូល SLS នឹងត្រូវបានដឹកជញ្ជូនឆ្លងកាត់ឈូងសមុទ្រម៉ិកស៊ិកទៅកាន់ Florida ។ នៅទីនោះ យានសម្រាប់បាញ់បង្ហោះនឹងត្រូវបានដំឡើងជារូបរាងពេញលេញ។

បើសិនគ្រប់យ៉ាងកើតឡើងដូចផែនការ ទីភ្នាក់ងារអវកាសអាម៉េរិកនឹងបាញ់បង្ហោះបេសកកម្ម Artemis II នៅក្នុងខែវិច្ឆិកា ឆ្នាំ 2024។ បេសកកម្មនេះនឹងដឹកអវកាសចរបួនរូបនៅក្នុងជើងហោះហើរសាកល្បងដែលត្រូវគោចរជុំវិញគន្លងតារាវិថីរបស់ឋានព្រះចន្ទ មុនពេលត្រលប់មកកាន់ផែនដីដើម្បីពិនិត្យ និងវាយតម្លៃប្រព័ន្ធនានារបស់រ៉ុក្កែត និងយានអវកាស។ ទិន្នន័យដែលប្រមូលបានពីជើងហោះហើរនេះនឹងត្រូវប្រើប្រាស់សម្រាប់បេសកកម្ម Artemis III។

អ្នកអវកាសដែលនឹងត្រូវហោះហើរក្នុងបេសកម្ម Artemis II រួមមាន បីនាក់មកពីណាសា គឺ មេបញ្ជាការ Reid Wiseman, អ្នកបើកបរ Victor Glover និងអ្នកជំនាញខាងបេសកកម្ម Christina Koch រួមនឹងអ្នកអវកាស Jeremy Hansen មកពីទីភ្នាក់ងារអវកាសកាណាដា៕

April 25, 2023

កម្ពុជាផ្ដល់សញ្ជាតិដល់អត្តពលិកយូដូអ៊ុយក្រែនច្រើននាក់សម្រាប់ការប្រកួតនៅស៊ីហ្គេម

ក្រុមអត្តពលិកយូដូកម្ពុជាគ្រោងនឹងផ្ដល់សញ្ជាតិដល់អត្តពលិកអ៊ុយក្រែនចំនួនបីនាក់ ក្នុងនោះមានយ៉ាងតិចពីរនាក់នឹងត្រូវបានអនុញ្ញាតឱ្យចូលប្រកួតនៅព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32។

«កម្ពុជាផ្ដល់សញ្ជាតិដល់អត្តពលិកដូចទៅនឹងបណ្ដាប្រទេសជាច្រើនផ្សេងទៀតដើម្បីលើកកម្ពស់សមិទ្ធផលនៃការប្រកួតអន្តរជាតិ» ប្រធានផ្នែកកីឡានៃសហព័ន្ធកីឡាយូដូហ្វ៊ីលីពីន (PJF) Emir Reyes បានប្រាប់សារព័ត៌មាន Malaya ដូច្នេះ។

Emir Reyes បន្ថែមថា «ពួកគេកំពុងផ្ដល់សញ្ជាតិដល់អត្តពលិកយូដូអ៊ុយក្រែនបីរូប ហើយយ៉ាងតិចពីររូបក្នុងចំណោមនោះនឹងចូលរួមប្រកួតនៅស៊ីហ្គេមលើកទី 32»។

យោងតាមសារព័ត៌មានខាងលើ Reyes បានដឹងអំពីរឿងនេះពេលកំពុងធ្វើការជាមួយអគ្គលេខាធិការនៃ PJF លោក Dave Carter (អ្នកទទួលបន្ទុកវិញ្ញាសាយូដូស៊ីហ្គេមលើកទី 32) ក្នុងការបណ្ដុះបណ្ដាលក្រុមអាជ្ញាកណ្ដាល និងមន្ត្រីបច្ចេកទេសរបស់វិញ្ញាសានេះនៅរាជធានីភ្នំពេញ។

Emir Reyes ឱ្យដឹងថា ម្នាក់នឹងប្រកួតនឹងប្រកួតក្នុងប្រភេទទម្ងន់ 66 គីឡូក្រាម ជាមួយនឹង Shugen Nakano របស់ហ្វ៊ីលីពីន។ PJF កំពុងស្វែងរកព័ត៌មានលម្អិតអំពីអត្តពលិកពីររូបខាងលើដើម្បីឱ្យដឹង ពួកគេបំពានច្បាប់យូដូអន្តរជាតិ ឬអត់។

ភាគីខាងកម្ពុជា មកដល់ពេលនេះហាក់មិនទាន់មានប្រតិកម្មអ្វីនៅឡើយ ទាក់ទងនឹងព័ត៌មានខាងលើ។

អ៊ុយក្រែនត្រូវបានគេចាត់ទុកថាជាប្រទេសខ្លាំងក្នុងវិញ្ញាសាក្បាច់គុនយូដូ ឬចំបាប់។ យូដូអ៊ុយក្រែនធ្លាប់ដណ្ដើមបានមេដាយប្រាក់ចំនួនមួយគ្រឿង មេដាយសំរឹទ្ធបីគ្រឿងក្នុងប្រវត្តិសាស្ត្រអូឡាំពិក។ ចំណែកកម្ពុជាវិញ នៅស៊ីហ្គេមលើកទី 31 ក្រុមយូដូកម្ពុជាដណ្ដើមបានមេដាយសំរឹទ្ធចំនួនមួយគ្រឿងក្នុងប្រភេទទម្ងន់ 62 គីឡូក្រាមផ្នែកនារី។

វិញ្ញាសាយូដូនៅស៊ីហ្គេមលើកនេះនឹងប្រកួតចាប់ពីថ្ងៃទី 13 ឧសភា នៅមជ្ឈមណ្ឌលសន្និបាត និងពិព័រណ៍អន្តរជាតិ ជ្រោយចង្វារ រាជធានីភ្នំពេញ។

April 25, 2023

ក្រុមហ៊ុនផលិតម៉ូតូអគ្គិសនីនៅប្រទេសក្បែរខាងកម្ពុជា ប្រមូលទុនបានបីលានដុល្លារដើម្បីបង្កើនការផលិត

Selex Motors ដែលជាក្រុមហ៊ុនផលិតម៉ូតូអគ្គិសនី និងថ្មផ្ទុកថាមពលសម្រាប់ម៉ូតូអគ្គិសនី កំពុងប្រមូលទុនតម្លៃបីលានដុល្លារអាម៉េរិក ក្នុងនោះក៏មានការចូលរួមវិនិយោគពី ADB Ventures, Schneider Electric Energy Access Asia, Touchstone Partners និង Sopoong Ventures ផងដែរ។

ខ្ទង់វិនិយោគថ្មីខាងលើនេះនឹងត្រូវបានប្រើប្រាស់ដើម្បីពង្រីកទំហំនៃខ្សែច្រវាក់ផលិតកម្ម និងគាំទ្រដល់ការលក់ម៉ូតូអគ្គិសនី និងបង្កើតប្រព័ន្ធប្ដូរថ្មផ្ទុកថាមពលនៅតាមបណ្ដាទីក្រុងធំៗនៅប្រទេសវៀតណាម ក៏ដូចជាការពង្រីកតំបន់ពាណិជ្ជកម្មរបស់ Selex ។ នេះបើតាម CEO របស់ក្រុមហ៊ុន Selex Motors ។

ម៉ូតូអគ្គិសនីរបស់ក្រុមហ៊ុន Selex Motors ត្រូវបានរចនាឡើងសម្រាប់គោលដៅប្រើប្រាស់ក្នុងកម្រិតខ្ពស់ដូចជាការប្រគល់ទំនិញជាដើម។ ម៉ូតូរបស់ក្រុមហ៊ុនវៀតណាមមួយនេះផ្ដល់ការគាំទ្រដល់ដំណោះស្រាយនៅក្នុងការប្ដូរថ្មផ្ទុកថាមពលដែលអាចធ្វើដំណើរបានរហូតដល់ 150 គីឡូម៉ែត្រ ដោយប្រើពេលដក និងដាក់ថ្មមិនដល់ពីរនាទី។

ខ្ទង់ប្រាក់វិនិយោគខាងលើនេះត្រូវបានប្រមូលនៅពេលវិស័យយានយន្តអគ្គិសនីទទួលបានចំណាប់អារម្មណ៍ខ្លាំងនៅអាស៊ីប៉ាស៊ីហ្វ៊ិក ដោយទីផ្សារនៅតំបន់នេះត្រូវបានគណនាឃើញថានឹងមានតម្លៃឡើងដល់ជាង 777 ពាន់លានដុល្លារអាម៉េរិកនៅត្រឹមឆ្នាំ 2027។

ក្រុមហ៊ុន Selex Motors ត្រូវបានបង្កើតឡើងកាលពីឆ្នាំ 2018 នៅប្រទេសវៀតណាម ដោយជនជាតិវៀតណាមបីរូបគឺ បណ្ឌិត ង្វៀន ហឺវហ្វឿកង្វៀន, បណ្ឌិត ង្វៀន ត្រុងហៃ និងអ្នកជំនាញផ្នែក IoT ង្វៀន ឌិញក្វាង។

April 25, 2023

ក្រុមហ៊ុនពីរនៅកម្ពុជា គ្រោងនឹងបង្កើតរោងចក្រកាត់ដេរ និងផលិតសម្ភារៈវេចខ្ចប់តម្លៃជាងដប់លានដុល្លារ

ក្រុមហ៊ុន FITLY APPAREL និងក្រុមហ៊ុន WH PACKAGING ទទួលបានការយល់ព្រមពីគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ដើម្បីវិនិយោគទៅលើគម្រោងចំនួនពីរដែលមានទុនសរុបចំនួនជាងដប់លានដុល្លារអាម៉េរិក។ នេះបើតាមទំព័របណ្ដាញសង្គមផ្លូវការរបស់ក្រុមប្រឹក្សាអភិវឌ្ឍន៍កម្ពុជា ចុះផ្សាយកាលពីថ្ងៃទី 24 មេសា។

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនដូចខាងក្រោម៖

ទីមួយ៖ ក្រុមហ៊ុន FITLY APPAREL CO., LTD មានគម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិអង្គកែវ សង្កាត់ចោមចៅទីបី ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ 5.3 លានដុល្លារអាម៉េរិក និងអាចបង្កើតការងារបានចំនួន 1,891 កន្លែង។

ទីពីរ៖ ក្រុមហ៊ុន WH PACKAGING មានគម្រោងបង្កើតរោងចក្រផលិតសម្ភារៈវេចខ្ចប់ ដែលមានទីតាំងវិនិយោគស្ថិតនៅផ្លូវជាតិលេខ 6 ភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្តកណ្តាល ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 1,076 កន្លែង។

ជាសរុប ក្រុមហ៊ុនទាំងពីរខាងលើមានទុនសរុបចំនួន 10.4 លានដុល្លារអាម៉េរិក និងបង្កើតការងារបានជិតពីរពាន់កន្លែង៕

April 25, 2023

កីឡាការិនីនៃក្រុមបាល់ទាត់ជម្រើសជាតិហ្វ៊ីលីពីនប្ដេជ្ញាដណ្ដើមមេដាយមាសនៅស៊ីហ្គេមកម្ពុជា

ខ្សែការពារ Hali Long បានអះអាងថា ក្រុមបាល់ទាត់នារីហ្វ៊ីលីពីននឹងប្រឹងប្រែងឡើងឱ្យដល់វគ្គផ្ដាច់ព្រ័ត្រនៅស៊ីហ្គេមលើកទី 32 ដើម្បីនាំយកមេដាយមាសជូនប្រទេសជាតិ។

យោងតាមទំព័រ One Sports របស់ហ្វ៊ីលីពីន កីឡាការិនីខ្សែការពាររបស់ក្រុមបាល់ទាត់នារីជម្រើសជាតិរបស់ប្រទេសនេះ ថ្មីៗនេះបានចែករំលែកព័ត៌មានដ៏គួរឱ្យចាប់អារម្មណ៍ស្ដីពីគោលដៅរបស់ Filipinas (រហ័សនាមរបស់ក្រុមបាល់ទាត់នារីជម្រើសជាតិហ្វ៊ីលីពីន) នៅស៊ីហ្គេមលើកទី 32 នៅក្នុងកម្មវិធីកីឡា «The Game»។

Hali Long ឱ្យដឹងថា បន្ទាប់ពីមេដាយសំរឹទ្ធនៅស៊ីហ្គេមលើកទី 31 ក្រុមបាល់ទាត់នារីជម្រើសជាតិហ្វ៊ីលីពីន កំពុងឆ្ពោះទៅរកមេដាយដទៃទៀតនៅឯព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023 ដែលនឹងធ្វើឡើងនៅកម្ពុជានាប៉ុន្មានថ្ងៃខាងមុខ។

«សម្រាប់ខ្ញុំ គោលដៅរបស់ក្រុមនារីជម្រើសជាតិហ្វ៊ីលីពីនត្រូវតែជាមេដាយមាស ឬសំរឹទ្ធ។ យើងមិនចង់ឡើងដល់វគ្គផ្ដាច់ព្រ័ត្រហើយក្រោយមកត្រូវបរាជ័យ។ ក្រុមនារីជម្រើសជាតិហ្វ៊ីលីពីនចង់មានវត្តមាននៅក្នុងការប្រកួតចុងក្រោយ និងដណ្ដើមបានជ័យជម្នះ» Hali Long ឱ្យដឹងដូច្នេះ។

ក្នុងរយៈពេលពីរឆ្នាំមកនេះ ក្រុមបាល់ទាត់នារីហ្វ៊ីលីពីនបានរីកចម្រើនគួរឱ្យកត់សម្គាល់។ Hali Long រួមនឹងមិត្តរួមក្រុមដណ្ដើមបានសំបុត្រទៅចូលរួមប្រកួតនៅ World Cup 2023 ។ ទន្ទឹមនឹងនេះ Filipinas ក៏បានយកឈ្នះលើក្រុមវៀតណាម និងថៃ ក្លាយជាជើងឯកនៅ AFF Cup 2022 ។

ជាងនេះ ក្រុមបាល់ទាត់នារីហ្វ៊ីលីពីនក៏បានបង្ហាញកម្លាំងដ៏ល្អរបស់ខ្លួននៅវគ្គជម្រុះទីមួយនៅ Olympic Paris 2024 ដោយបានផ្ដួលប៉ាគីស្ថាន (4-0), តាហ្ស៊ីគីស្ថាន (8-0) និងហុងកុង (4-0) ហើយក៏បានឡើងដល់វគ្គជម្រុះទីពីរ។

ទោះជាយ៉ាងណាក៏ដោយ Hali Long នៅតែប្ដេជ្ញាផ្ដោតការយកចិត្តទុកដាក់ខ្ពស់សម្រាប់គោលដៅនៅស៊ីហ្គេមកម្ពុជា។ នាងយល់ថា ក្រុមនារីហ្វ៊ីលីពីននឹងមិន «ដេកលក់» នៅលើជោគជ័យដែលដណ្ដើមបាននាពេលកន្លងនោះឡើយ។

កីឡាការិនីនៃក្រុមបាល់ទាត់ជម្រើសជាតិហ្វ៊ីលីពីន

នៅស៊ីហ្គេមលើកទី 32 ក្រុមបាល់ទាត់នារីជម្រើសជាតិហ្វ៊ីលីពីនស្ថិតក្នុងពូល A ដែលមានក្រុមវៀតណាម ម៉ាឡេស៊ី និងមីយ៉ាន់ម៉ា។ ដោយមានសមិទ្ធផល និងកម្លាំងខ្លាំងក្លានាពេលកន្លង ក៏ដូចជាបច្ចុប្បន្ន Hali Long និងក្រុមជម្រើសជាតិហ្វ៊ីលីពីនត្រូវបានវាយតម្លៃថាជាបេក្ខភាពដ៏លេចធ្លោសម្រាប់មេដាយមាសនៅស៊ីហ្គេមលើកនេះ៕

April 25, 2023

យន្តហោះកូនកាត់បាឡុងហោះទំនើប និងធំជាងគេបង្អស់លើពិភពលោក

(អង់គ្លេស) – យន្តហោះ Airlander 10 ឬ HAV 304 របស់ក្រុមហ៊ុន Hybrid Air Vehicles មានបណ្ដោយ 92 ម៉ែត្រ អាចហោះឡើងដល់កម្ពស់ 5,000 ម៉ែត្រ និងល្បឿន 145 គីឡូម៉ែត្រ/ម៉ោង។

George Land ដែលជាប្រធានផ្នែកអភិវឌ្ឍពាណិជ្ជកម្មរបស់ក្រុមហ៊ុន Hybrid Air Vehicles បានឱ្យដឹងថា បណ្ដាក្រុមហ៊ុនអភិវឌ្ឍយន្តហោះកូនកាត់នឹងកំណត់ឡើងវិញនូវវិធីដែលពិភពលោកស្រមៃអំពីអាកាសចរណ៍។ «យើងនឹងពិនិត្យមើលមធ្យោបាយហោះហើរកូនកាត់ខ្នាតយក្សប្ដូរផ្លាស់ការយល់ឃើញអំពីសកម្មភាពហោះហើរ» នេះបើតាម George Land។

ម៉ូដែលយន្តហោះកូនកាត់បាឡុងរបស់ក្រុមហ៊ុន Hybrid Air Vehicles (HAV) នៅប្រទេសអង់គ្លេស ដែលមានឈ្មោះថា Airlander 10 ឬ HAV 304 ហោះហើរជាលើកដំបូងកាលពីឆ្នាំ 2012។ យន្តហោះនេះរួមមាន បាឡុងអេល្យូម ដែលមានស្លាប និងកន្ទុយ រួមនឹងម៉ាស៊ីនម៉ាស៊ូតចំនួនបួនគ្រឿង។

យន្តហោះកូនកាត់ដូច Airlander នេះ ប្រើប្រាស់ទាំងកម្លាំងលើករបស់ឧស្ម័ន បច្ចេកទេស និងបច្ចេកវិទ្យាទំនើប ធ្វើឱ្យវាស្រាលជាងបរិយាកាសជាងមុន។ ប្រការនេះជួយកាត់បន្ថយការលំបាកនៅក្នុងការដឹកជញ្ជូនដែលតែងកើតមាននៅលើបាឡុងហោះបែបប្រពៃណីបច្ចុប្បន្ន។

ដងខ្លួនរបស់ Airlander ធ្វើពីក្រណាត់ច្រើនស្រទាប់ដែលភ្ជាប់ជាមួយគ្នាដើម្បីបង្កើនភាពធន់ និងរក្សាឧស្ម័នអេល្យូមបានល្អ។ ដោយមានបំពាក់មុខងារប្ដូរផ្លាស់ទំហំនៃកាប៊ីនផ្ទុកឧស្ម័នអេល្យូម ពីឡុតអាចបើកបរយន្តហោះកូនកាត់នេះបានយ៉ាងស្រួល។

ក្នុងករណីខួច Airlander អាចហោះទៅដល់កន្លែងជួសជុល និងបំពេញអេល្យូមតាមរយៈប្រព័ន្ធគ្រប់គ្រងសម្ពាធស្វ័យប្រវត្ត។ ឧស្ម័នអេល្យូមដែលលេចចេញតាមរន្ធនៅលើស្រទាប់ក្រណាត់ កើតឡើងយ៉ាងយឺត ដោយសារភាពខុសគ្នារវាងសម្ពាធមានកម្រិតទាប។

ចំណុចពិសេសរបស់យន្តហោះកូនកាត់ Airlander 10 ដែលអាចដឹកអ្នកដំណើរបាន 100 នាក់ ឬទំនិញដប់តោននេះ គឺមិនសូវបំពុលបរិស្ថាន អាចប្រើបានយូរ ពហុមុខងារ មានភាពបត់បែនខ្ពស់ និងសន្សំសំច័យ។ល។

យន្តហោះ Airlander 10 ឬ HAV 304 របស់ក្រុមហ៊ុន Hybrid Air Vehicles

ម៉ាស៊ីនម៉ាស៊ូត V8 កម្លាំង 325 សេះ (242 kW) ចំនួនបួនគ្រឿងរបស់ Thielert Centurion ផ្ដល់ថាមពលដល់កង្ហារបួនគូនៅលើយន្តហោះកូនកាត់នេះ៕

April 25, 2023

ក្រោយពីបានបង្ហាញថ្វីជើងនៅអឺរ៉ុប តារាបាល់ទាត់ថៃមានទំនុកចិត្តខ្ពស់នៅមុនស៊ីហ្គេមកម្ពុជាមកដល់

ក្នុងថ្ងៃដំបូងនៃការជួបជុំរបស់ខ្លួននៅក្នុងក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ ដែលត្រៀមខ្លួនសម្រាប់ចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា ខ្សែប្រយុទ្ធ Achitpol Keereerom បាននិយាយដោយភាពជឿជាក់។

កាលពីល្ងាចថ្ងៃទី 24 មេសា U-22 ថៃ បានឈានចូលដល់ថ្ងៃហ្វឹកហាត់ទីបួនដើម្បីត្រៀមខ្លួនសម្រាប់ស៊ីហ្គេមលើកទី 32។ ក្នុងថ្ងៃហ្វឹកហាត់នៅតំបន់ទេសចរណ៍កីឡា Phatthana ខេត្ត Chonburi គ្រូបង្វឹក Issara Sritaro បន្តទទួលស្វាគមន៍វត្តមានរបស់កីឡាករមួយចំនួន ក្នុងនោះក៏មាន Achitpol Keereerom ដែលជាតារាបាល់ទាត់មួយរូបកំពុងប្រកួតឱ្យក្លឹបនៅអឺរ៉ុប។

Achitpol Keereerom បច្ចុប្បន្នស្ថិតក្នុងចំណោមកីឡាករវ័យក្មេងរបស់ក្លឹប Augsburg ដែលប្រកួតនៅឯពានរង្វាន់លំដាប់ទីបួនរបស់ប្រទេសអាល្លឺម៉ង់។ នៅមុនថ្ងៃត្រលប់មកជួបជុំក្រុម U-22 ថៃ ខ្សែប្រយុទ្ធកើតឆ្នាំ 2001 រូបនេះ បានបង្ហាញថ្វីជើងដ៏ល្អរបស់ខ្លួន ដោយការស៊ុតបញ្ចូលទីជួយឱ្យ Augsburg ឈ្នះ Hankofen-Hailing 2-1 នៅក្នុងវគ្គទី 33 នៃការប្រកួតដណ្ដើមពានរង្វាន់លំដាប់ទីបួននៅអាល្លឺម៉ង់។

នៅក្នុងការហ្វឹកហាត់ថ្ងៃដំបូងរបស់ខ្លួន បន្ទាប់ពីជួបជុំក្រុម U-22 ថៃ ខ្សែប្រយុទ្ធ Achitpon Keereerom បានថ្លែងដោយក្ដីរីករាយថា «ការទាត់បញ្ចូលទីឱ្យ Augsburg នៅមុនស៊ីហ្គេមមកដល់ គឺពិតជាបាននាំមកថាមពល និងភាពជឿជាក់ដល់ខ្ញុំយ៉ាងច្រើន។ ខ្ញុំចង់បន្តរក្សាកម្លាំងនេះនៅក្នុងពានរង្វាន់នាពេលខាងមុខ»។

«ខ្ញុំមិនមានការបារម្ភទាល់តែសោះនៅមុនស៊ីហ្គេមលើកទី 32។ ពួកយើងមកទីនេះក្នុងបំណងដណ្ដើមជ័យជម្នះ។ U-22 ថៃ ជឿជាក់លើសមត្ថភាពរបស់ខ្លួន ហើយនឹងប្រឹងប្រែងឱ្យអស់ពីលទ្ធភាព…។

ក្នុងបញ្ជីឈ្មោះនៃក្រុម U-22 ថៃ ដែលត្រៀមសម្រាប់ស៊ីហ្គេមនៅកម្ពុជា Achitpol Keereerom គឺជាម្នាក់ក្នុងចំណោមកីឡាករថៃពីររូប (ក្នុងនោះមាន Chayapipat Suphanphat ទាត់ឱ្យក្លឹប Estoril របស់ព័រទុយហ្កាល់) ដែលកំពុងប្រកួតនៅអឺរ៉ុប។ Achitpol Keereerom កំពុងលេចធ្លោនៅពានរង្វាន់លំដាប់ទីបួននៃប្រទេសអាល្លឺម៉ង់ នៅពេលបានរួមចំណែករកបានពីរគ្រាប់ និងបង្កឱកាសបានមួយគ្រាប់ឱ្យ Augsburg ក្រោយការប្រកួត 566 នាទីនៅក្នុង 16 ប្រកួតនាពេលកន្លង៕

April 25, 2023

សង្គ្រាមនៅស៊ូដង់៖ ភាគីក្នុងជម្លោះយល់ព្រមឈប់បាញ់ 72 ម៉ោង

ភាគីជម្លោះទាំងពីរនៅប្រទេសស៊ូដង់ បានយល់ព្រមឈប់បាញ់រយៈពេល 72 ម៉ោង ដោយមូលហេតុមនុស្សធម៌ គ្រាដែលប្រទេសនានានាំគ្នាជម្លៀសពលរដ្ឋ។

កងកម្លាំងប្រដាប់អាវុធស៊ូដង់ (SAF) ប្រកាសអនុវត្តបទបញ្ជាឈប់បាញ់ 72 ម៉ោង ដែលចាប់ផ្ដើមពីម៉ោង 00 ថ្ងៃទី 25 មេសា ដោយបញ្ជាក់ថា សហរដ្ឋអាម៉េរិក និងអារ៉ាប៊ីសាអូឌីត បានដើរតួនាទីជាអ្នកសម្រុះសម្រួលក្នុងកិច្ចការនេះ។ កងកម្លាំងប៉ារ៉ា RSF នៅប្រទេសស៊ូដង់ ក៏បានបញ្ជាក់ថា បានយល់ព្រមផ្អាកការប្រយុទ្ធដើម្បីគាំទ្រដល់កិច្ចការមនុស្សធម៌។

រដ្ឋមន្ត្រីការបរទេសទេសអាម៉េរិក Antoni Blinken ឱ្យដឹងថា កិច្ចព្រមព្រៀងឈប់បាញ់នេះសម្រេចបានក្រោយមានកិច្ចចរចារយៈពេលពីរថ្ងៃ ដោយសារតែភាគីក្នុងជម្លោះមិនបានគោរពតាមបទបញ្ជាឈប់បាញ់មុននោះ។

នៅមុនបទបញ្ជាឈប់បាញ់ថ្មីមានសុពលភាព ភាគីជម្លោះនៅតែវាយប្រហារគ្នាយ៉ាងខ្លាំងក្លា នៅ Omdurman ដែលជាទីក្រុងមួយនៅក្បែររដ្ឋធានីខាទុំ។

បណ្ដាប្រទេសកំពុងជម្លៀសពលរដ្ឋចេញពីប្រទេសស៊ូដង់

ស៊ូដង់ស្ថិតនៅក្នុងតំបន់ភាគឦសានទ្វីបអាហ្វ្រិក ជាប់នឹងប្រទេសអេហ្ស៊ីប មានប្រជាជនជិត 48 លាននាក់។ សង្គ្រាមបានផ្ទុះឡើងរវាងកងទ័ពស៊ូដង់ និងកងកម្លាំង RSF តាំងពីថ្ងៃទី 15 មេសា 2023 បន្ទាប់ពីមានភាពតានតឹងខ្លាំងព្រោះតែផែនការច្របាច់បញ្ចូល RSF ទៅក្នុងជួរកងទ័ពស៊ូដង់។ មន្ទីរពេទ្យ និងសេវាសំខាន់ៗរបស់ប្រទេសនេះបានផ្អាកសកម្មភាពព្រោះតែសង្គ្រាម។

«មនុស្សយ៉ាងតិច 430 នាក់បានស្លាប់ និងជាង 3,700 នាក់រងរបួសនៅក្នុងការប្រយុទ្ធគ្នារវាងភាគីជម្លោះ ធ្វើឱ្យស្ថានភាពមនុស្សធម៌នៅប្រទេសនេះកាន់តែអាក្រក់ឡើង» នេះបើតាមអង្គការសុខភាពពិភពលោក (WHO)។ អង្គការសហប្រជាជាតិ (UN) បានឱ្យដឹងថា ប្រជាជនស៊ូដង់ប្រហែលពីរម៉ឺននាក់បានរត់ចេញពីតំបន់សង្គ្រាម និងសុំសិទ្ធិជ្រកកោននៅប្រទេសជិតខាង ឆាដ៕

April 25, 2023

Author: សឿន សំណាង