Author: អេបិល

បានទស្សនាហើយ រឿងខ្លី «រឹងមាំ» សម្ដែងបវរកញ្ញា រឿន ណាត ជារឿងពេញ
មើលពីចំណងជើងភាពយន្តជីវិតខ្លីរបស់ផលិតកម្មសាស្ត្រា «រឹងមាំ» ដែលសម្ដែងដោយតារាស្រីរូបស្អាត កញ្ញា រឿន ណាត ជាការទទួលសម្តែងលើកដំបូងនេះ គឺបានធ្វើឱ្យទស្សនិកជនជាច្រើនចាប់អារម្មណ៍ និងគិតថាសាច់រឿងនេះល្អ សាកសមនិងឱ្យនាងសម្តែង ព្រោះមើលលទៅនាងគឺជានារីម្នាក់ ដែលរឹងមាំ ។
តាមរយៈការបង្ហាញសាររូបភាព Poster និងព័ត៌មានកន្លងមក ហ្វេនៗជាច្រើនទន្ទឹងចាំទស្សនាសាច់រឿងទាំងមូល និងមានការពោលសរសើរមុនថា រឿន ណាត មានបុគ្គលិកលក្ខណៈអង់អាច មិនខ្លាចអ្វីហើយហ៊ានតស៊ូទៅមុខ ដោយមិនរុញរានោះទេ។ ចង់ដឹងថារឿងនេះ មានសាច់រឿង មានអត្ថន័យដូចមិចខ្លះ តើតួស្រីក្នុងរឿងនេះ មានឧបសគ្គអ្វីខ្លះនោះ សូមទស្សនារឿងខ្លីនិយាយអំពីជីវិត « រឹងមាំ» ខាងក្រោមនេះ៖

January 28, 2019
ម្ចាស់បទ «បឹងហ្គាវ៉ាន់សូឡូ » មរណភាពហើយ
ប្រិយមិត្តពិតជាស្គាល់មិនខាន បទ «បឹងហ្គាវ៉ាន់សូឡូ» ដែលជាបទទទួលបានការពេញនិយមជាច្រើន ហើយក៏មានតារាចម្រៀងជាច្រើបានយកបទនេះមកច្រៀងឡើងវិញដែរ។
ដោយឡែក ថ្មីៗនេះនៅលើបណ្ដាញសង្គមហ្វេសប៊ុកទទួលបានដំណឹងក្តុក្តួលថា ម្ចាស់បទនេះ បានទទួលមរណភាពហើយ ដោយរាគាពាធ នៅវេលាម៉ោង6ល្ងាច តាំងពីថ្ងៃទី17ខែមករា ឆ្នាំ2019 ក្នុងជន្មាយុ 80ឆ្នាំ នៅឯសហរដ្ឋអាមេរិក។ ។ សូមជម្រាបថា លោកយាយ ឈុន វណ្ណា ជាតារាចម្រៀងជើងចាស់ដ៏ល្បីមួយរូបនៅអំឡុងទសវត្សទី 60 -70 ហើយអ្នកចំរៀងក្រុមសិល្បៈយោធាភិរម្យ ជាមួយលោកតា ជិន សាខន ដែលជាស្វាមី។ បើតាមប្រភបបានឱ្យដឹងថា សពរបស់លោកយាយទើបនឹងត្រូវបានបូជាកាលពីថ្ងៃសុក្រទី 25 ខែមករានេះ។ យ៉ាងណាក្តី ដំណឹងនេះពិតជាធ្វើឱ្យអ្នកគាំទ្ររបស់លោកយាយនៅស្រុកខ្មែរ មានការសោកស្តាយជាពន់ពេកចំពើការបាត់បង់រូបលោកយាយ៕
https://youtu.be/YoxC6ifItCQ

January 28, 2019
លោក ព្រាប សុវត្តិ ព្រមទាំងកូនៗទាំង 3 នាក់ ចូលរួមរំលែកទុក្ខ លោក ខេមរៈ សេរីមន្ត ទំាងទឹកមុខក្រៀមក្រំ
គេមើលឃើញថា បន្ទាប់ពីសពប្អូនស្រី លោក ខេមរៈ សិរីមន្ដ បានមកដល់គេហដ្ឋាន នៅមុខសួនសុបិន្តចំការព្រីង ខណ្ឌសែនសុខ រាជធានីភ្នំពេញ ហើយនោះ គេឃើញថា ហ្វេនៗអ្នកគាំទ្រនិងសិល្បៈជាច្រើន ទៅដល់ទីនោះភ្លាម មានវត្តមានដូចជា លោក ហេង ឡុង អ្នកនាង ចន ច័ន្ទលក្ខណា កញ្ញា សុខ ពីសី អ្នកនាង ពេជ្រ សោភា ព្រមទាំងតារាប្រុសស្រីជាច្រើនទៀត ដែលម្នាក់សុទ្ធតែរន្ធត់ចិត្ត និងបង្ហាញពីការស្តាយស្រណោះ ខេមរៈ ស្រីពៅ គ្រប់គ្នា។
នៅព្រឹកថ្ងៃទី 28 ខែមករា នេះ គេបានឃើញមានវត្តមានរបស់ លោក ព្រាប សុវត្តិ ព្រមទាំងកូនៗទាំង 3 នាក់ បានឆ្លៀតពេលមកចូលរួមពិធីបុណ្យសពរបស់ប្អូនលោក ខេមរៈ សេរីមន្ត ផងដែរ ដោយក្នុងទឹកមុខក្រៀមក្រំជាទីបំផុត និងអារម្មណ៍សោកសៅស្ទើតែស្រក់ទឹកភ្នែកតាមលោក ខេមរៈ សេរីមន្ត ទៅហើយ។
ក្រឡែកមកមើលលោក ខេមរៈ សិរីមន្ដ វិញហាក់បីដូចជាទន់អស់ទាំងខ្លួនប្រាណ ដោយមានអ្នកចាំឈរទប់ពីក្រោយជាប់រហូត ព្រោះមើលទៅលោកក្តុកក្តួលអួលដើមក ខ្ទប់មុខយំមិនចេញ។ ពេលនេះក្រុមគ្រួសាររបស់លោក ខេមរៈ សិរីមន្ត កំពុងធ្វើបុណ្យតាមប្រពៃណី ហើយបើតាមការបញ្ជាក់ពីលោក ខេមរៈ សិរីមន្ត លើវីដេអូ បានឱ្យដឹងថា សពរបស់ប្អូនស្រីលោក នឹងដង្ហែរទៅបូជានៅវត្តសំរោងអណ្តែត នៅរសៀលម៉ោង 1 ថ្ងៃទី 28 ខែមករា ឆ្នាំ2019 នេះ ៕

January 28, 2019
Djokovic ផ្តួល Nadal ដើម្បីឈ្នះពាន Australian Open ជាលើកទី7
កីឡាករវាយកូនបាល់ Novak Djokovic បានឈ្នះពានព្រឹត្តិការណ៍ Australian Open ជាលើកទី7 និងកម្មវិធី Grand Slam ជាលើកទី3 ជាប់ៗគ្នាកាលពីថ្ងៃអាទិត្យ ខណៈដែលរូបគេបានផ្តួលកីឡាករ Rafael Nadal យ៉ាងងាយក្នុងទីក្រុង Melbourne។
កីឡាករសញ្ជាតិស៊ែប៊ីរូបនេះ បានកត់ត្រាជ័យជម្នះក្នុងលទ្ធផល 6-3 6-2 និង6-3 ដែលជាជ័យជម្នះដ៏ធំបំផុតក្នុងវគ្គផ្តាច់ព្រ័ត្រនៃពានដ៏ធំមួយ លើគូប្រជែងដ៏ខ្លាំងរបស់គេ។
កីឡាករអេស្ប៉ាញ Nadal វ័យ 32ឆ្នាំ ហាក់ដូចជាមិនអាចទប់ទល់នឹងភាពខ្លាំងរបស់កីឡាករមានចំណាត់ថ្នាក់លេខ1 ក្នុងពិភពលោករូបនេះបានឡើយ និងបានបង្កើតឱ្យមានកំហុសដល់ទៅ 28លើកឯណោះ។
Djokovic វ័យ 31ឆ្នាំ បានកត់ត្រាជ័យជម្នះដោយប្រើពេលអស់ 2ម៉ោង និង4នាទី ដើម្បីឡើងឈរពីលើម្ចាស់ជើងឯក 6សម័យកាល Roy Emerson និង Roger Federer។
ក្រោយពីឈ្នះពាន Grand Slam ជាលើកទី15 របស់គេ Djokovic បានឱ្យដឹងថា៖ «វាជាការប្រកួតមួយក្នុងចំណោមការប្រកួតដ៏ល្អបំផុត។ វាហាក់មិនពិតសោះដែលយើងនៅតែលេងក្នុងកម្រិតនេះ និងនៅតែប្រជែងពានដ៏ធំបំផុតក្នុងកីឡានេះ ហើយវាជាពេលវេលាដ៏អស្ចារ្យ»។
ស្របពេលជាមួយគ្នានេះ កីឡាការិនីវាយកូនបាល់ Naomi Osaka របស់ជប៉ុន បានបញ្ជាក់ថា នាងពិតជា«ស្ថិតក្នុងភាពភ្ញាក់ផ្អើល» ក្រោយពីបានគ្រប់គ្រងការភិតភ័យរបស់ខ្លួនដើម្បីយកឈ្នះលើកីឡាការិនី Petra Kvitova និងឈ្នះពាន Australian Open ក្នុងការប្រកួត 3សិតដ៏រំភើបមួយ ខណៈជ័យជម្នះនេះក៏បានធ្វើឱ្យនាងឡើងទៅឈរក្នុងចំណាត់ថ្នាក់លេខ1 លើតារាងពិភពលោកផងដែរ។
កីឡាការិនីមានចំណាត់ថ្នាក់លេខ4 ប្រចាំព្រឹត្តិការណ៍ និងជាម្ចាស់ជើងឯក US Open រូបនេះបានកត់ត្រាជ័យជម្នះក្នុងលទ្ធផល 7-6 (7/2) 5-7 និង6-2 ក្នុងការប្រកួត 2ម៉ោង និង27នាទីលើកីឡាការិនីរបស់ឆែក ដើម្បីឈ្នះពានក្នុងកម្មវិធី Grand Slam 2លើកជាប់ៗគ្នា៕

ប្រភពពី៖ Channel News Asia
January 28, 2019
រដ្ឋាភិបាលដកការិយាល័យស្រុកដែលមិនចាំបាច់ ដើម្បីជំរុញសេដ្ឋកិច្ច និងបង្កើនប្រសិទ្ធភាពការងារ
នាពេលបច្ចុប្បន្ននេះ នៅតាមបណ្តាស្រុក-ក្រុងនានា មានការិយាល័យចំណុះមន្ទីរជាច្រើនដែលកំពុងបើកដំណើរការ តែមិនសូវមានការងារប្រតិបត្តិការ ហើយមានការិយាល័យដែលចាំបាច់ត្រឹមតែ 2-3ប៉ុណ្ណោះដែលដំណើរការជាប់ជាប្រចាំ។ ស្ថានភាពបែបនេះត្រូវបានរាជរដ្ឋាភិបាលមើលឃើញថា អាចជាចំណុចមួយក្នុងការខ្ជះខ្ជាយលើថវិកាជាតិ។
នៅថ្ងៃទី25 ខែមករា ឆ្នាំ2019 នេះសម្តេចតេជោហ៊ុន សែន បានមានប្រសាសន៍នៅក្នុងជំនួបជាមួយកម្មករ-កម្មការិនីនៅខេត្តកំពតថា នាពេលខាងមុខនេះនឹងមានការកែសម្រួលរចនាសម្ព័ន្ធថ្នាក់ស្រុក-ក្រុង ដោយមិនឱ្យមានការិយាល័យរបស់មន្ទីរនៃក្រសួងនីមួយៗធ្លាក់ទៅដល់ក្រោមទៀតទេ។
សម្តេចតេជោ ហ៊ុន សែន បានមានប្រសាសន៍ថា៖ «សម្លឹងមើលទៅ ទុកតែ 3ផ្នែកទេ អប់រំត្រូវតែមានហើយ សុខាភិបាលត្រូវតែមានការិយាល័យ ព្រោះទាក់ទងនឹងសេវាព្យាបាលជូនប្រជាជន ហើយរៀបចំដែនដីក៏ត្រូវតែមានដែរ ព្រោះមានការងារពាក់ព័ន្ធនឹងការគ្រប់គ្រងដីធ្លី ក្រៅពីនោះការិយាល័យស្រដៀងៗគ្នាមានមុខងារប្រហែលៗគ្នាត្រូវដាក់មួយកញ្ចប់»។
សម្តេចនាយករដ្ឋមន្ត្រីបានលើកឡើងផងដែរថា ការរៀបចំបែបនេះអាចនឹងប្រើប្រាស់ទឹក-ភ្លើងតិចជាងមុន មនុស្សធ្វើការតិចជាងមុន មធ្យោបាយក៏តិចជាងមុនដែរ ហេតុនេះគួរតែធ្វើការកែទម្រង់ដាក់ជាចង្កោមតែម្តង។ ការកែទម្រង់នេះមានលទ្ធភាពក្នុងការជួយឱ្យសេដ្ឋកិច្ចស្ទុះឡើង ហើយប្រសិទ្ធភាពក៏កាន់តែខ្ពស់ផងដែរ៕
January 28, 2019
លោក Queiroz ព្រមានពីការភ្លាត់ស្នៀតពេលប៉ះជប៉ុន នៅរាត្រីនេះ
លោក Carlos Queiroz គ្រូបង្វឹកនៃក្រុមបាល់ទាត់ជម្រើសជាតិអ៊ីរ៉ង់ បានព្រមានពីការភ្លាត់ស្នៀត ក្រោយពីបានឈានទៅវគ្គពាក់កណ្តាលផ្តាច់ព្រ័ត្រ ប៉ុន្តែការធ្លាក់ចេញរបស់ក្រុមបាល់ទាត់ជម្រើសជាតិកូរ៉េខាងត្បូង និងអូស្ត្រាលី បានធ្វើឱ្យក្រុមមានរហស្សនាមថា Team Melli មួយនេះ ជាក្រុមមានប្រៀបដាច់ក្នុងការឈ្នះពាន។
ប៉ុន្តែដំបូងឡើយ ពួកគេត្រូវតែយកឈ្នះលើក្រុមម្ចាស់ជើងឯក 4សម័យកាល ជប៉ុន នៅរាត្រីនេះឱ្យបានជាមុនសិន នៅមុនពេលក្រុមម្ចាស់ផ្ទះអេមីរ៉ាតអារ៉ាប់រួម ជួបជាមួយនឹងក្រុមជម្រើសជាតិកាតា ក្នុងរយៈពេល 24ម៉ោងបន្ទាប់។
ក្នុងពេលស្ថិតក្រោមសម្ពាធក្នុងការឈ្នះពានកីឡាបាល់ទាត់ដ៏ធំបំផុតរបស់អាស៊ីជាលើកទី1 បើគិតចាប់តាំងពីឆ្នាំ1976 ក្រុមជម្រើសជាតិអ៊ីរ៉ង់ បានឈានទៅវគ្គបន្តនៃយុទ្ធនាការនេះយ៉ាងងាយ ខណៈដែលគូប្រជែងខ្លាំងៗរបស់ពួកគេជាច្រើន បានជួបការខកចិត្ត។
ក្រោយពីក្រុមជម្រើសជាតិអ៊ីរ៉ង់បានយកឈ្នះលើក្រុមជម្រើសជាតិចិនក្នុងលទ្ធផល 3-០ ក្នុងវគ្គ 8ក្រុមចុងក្រោយដើម្បីបង្ហាញពីភាពខ្លាំងឱ្យក្រុមជប៉ុនឃើញហើយនោះ លោក Queiroz បានបញ្ជាក់ថា៖ «យើងដឹងថា ត្រីឆ្លាមធំៗនឹងតម្រង់មកកាន់យើង។ អ្វីដែលយើងបានធ្វើនៅពេលប្រកួតជាមួយនឹងក្រុមជម្រើសជាតិចិន នឹងមិនគ្រប់គ្រាន់ឡើយ»។
ស្របពេលជាមួយគ្នានេះ លោកគ្រូបង្វឹក Hajime Moriyasu បានបញ្ជាក់កាលពីថ្ងៃអាទិត្យថា ក្រុមជប៉ុនរបស់លោកនឹងប្រើប្រាស់ផែនការបស់ខ្លួនដូចមុនដដែលក្នុងវគ្គពាក់កណ្តាលផ្តាច់ព្រ័ត្រ នៅពេលជួបជាមួយនឹងក្រុមជម្រើសជាតិអ៊ីរ៉ង់។
ការឈ្នះជាប់ៗគ្នាតាមរយៈការរកបានគ្រាប់បាល់តែ 1គ្រាប់ ក្នុងនោះរាប់បញ្ចូលទាំងការយកឈ្នះលើក្រុមជម្រើសជាតិអារ៉ាប៊ីសាអ៊ូឌីត បើទោះបីជប៉ុនមានឱកាសគ្រប់គ្រងបាល់ត្រឹមតែ 23ភាគរយ បានបង្កើតឱ្យមានការចងចាំក្នុងយុទ្ធនាការ Euro ឆ្នាំ2004 ដែលនៅពេលនោះក្រុមជម្រើសជាតិក្រិក បានឈ្នះពានដ៏មិននឹកស្មានដល់តាមរយៈការដណ្តើមបានលទ្ធផលស្រដៀងគ្នានេះ៕

ប្រភពពី៖ France24

January 28, 2019
សិស្សកម្ពុជាទស្សនកិច្ចសិក្សានៅប្រទេសសិង្ហបុរី
កុមារកម្ពុជាទទួលបានមេដាយមាស និងពានរង្វាន់ឆ្នើម ក្នុងជំនួបទស្សនកិច្ចសិក្សាយុវជនបរិស្ថានប្រចាំឆ្នាំ២០១៩ (Youth Environmental Summit) ក្នុងចំណោម៦ប្រទេស ដោយលើកយកប្រធានបទ “ការកែច្នៃសម្រាម និងសម្ភារៈប្រើប្រាស់រួច” ។ កុមារកម្ពុជា ដែលទទួលបានមេដាយមាស និងពានរង្វាន់ឆ្នើមនោះ មកពីលារៀនវ៉េស្ទឡាញន៍ស្ថិនក្នុងកម្រិតអាយុ៩ ដល់១២ ឆ្នាំ (Junior Participant) ហើយដំណឹងនេះជួយលើកស្ទួយកិតិនាម និងមោទភាព ជាតិសម្រាប់ប្រទេសកម្ពុជាក្នុងឆាកអន្តរជាតិ។
លោក គង់ សំនៀង ប្រធាននាយករដ្ឋបាល និងប្រតិបត្តិការនៃក្រុមហ៊ុន វេសឡាញ អេឌ្យូខេសិន គ្រុបបានមានប្រសាសន៍ថាៈ នេះមោទនភាពរបស់សាលារៀនវ៉េស្ទឡាញន៍ ក៏ដូចជាប្រទេសកម្ពុជា ដែលទទួលបានមេដាយមាស និងពានរង្វាន់ឆ្នើមស្តីពីបរិស្ថាន ហើយនេះស្តែងចេញពីការខិតខំប្រឹងប្រែង និងការបញ្ចេញសមត្ថិភាពរបស់ប្អូនៗសិស្សានុសិស្សនៅលើឆាកអន្តរជាតិ។
លោកបានបន្ថែមទៀតថា នេះជាលើកទី៥ហើយ ដែលសាលារៀនវ៉េស្ទឡាញន៍ បានបញ្ជូនសិស្សានុសិស្សចំនួន២៤នាក់ ទៅប្រទេសសិង្ហបុរី ហើយនឹងបន្តបញ្ជូនជាបន្តបន្ទាប់ទៀតដោយសារសាលាមានអនុស្សរណៈយោគយល់គ្នាជាមួយ Youth Ambassador Singapore ។ សិស្សដែលត្រូវបានជ្រើសរើសទៅ ត្រូវតែប្តេជ្ញានិងខិតខំធ្វើការងារជាក្រុមនិងចូលរួមធ្វើសកម្មភាពផ្សេងៗនិងជាសិស្សឆ្នើមនិងជាសិស្សដែលប្រើប្រាស់ភាសាអង់គ្លេសបាន។ ក្រៅពីចំណេះដឹងបានពីប្រធានបទបរិស្ថានសិស្សានុសិស្សបានទទួលចំនេះដឹងពីការធ្វើការជាក្រុម ការចេះអភិវឌ្ឍខ្លួនពេលគ្មានអាណាព្យាបាលគ្រប់គ្រង ការគ្រប់គ្រងពេលវេលា ភាពមានម្ចាស់ការលើខ្លួនឯងជាពិសេសការចេះថែរក្សាអនាម័យផ្ទាល់ខ្លួននិងបរិស្ថានដែលជាកត្តាចម្បងស្របពេលដែលប្រទេសកម្ពុជាជាប្រទេសដែលកំពុងអភិវឌ្ឍន៍។
ជំនួបទស្សនកិច្ចសិក្សាយុវជនបរិស្ថានត្រូវបានរៀបចំឡើងជារៀងរាល់ឆ្នាំនៅប្រទេសសិង្ហបុរី ក្នុងគោលបំណងផ្តល់ឳកាសដល់កុមារ និងយុវជនបង្ហាញគំនិតច្នៃបង្កើតថ្មីៗ ផ្លាស់ប្តូរបទពិសោធន៍ការសិក្សា ការយល់ដឹងពិបរិស្ថានធម្មជាតិ ការថែរក្សាបរិស្ថាន ការគ្រប់គ្រងសម្រាម ការបំពុលទឹក ការចេះកែច្នៃសំរាមនិងសម្ភារៈដែលប្រើប្រាស់រួច ដើម្បីចូលរួមចំណែកថែរក្សាបរិស្ថានលើពិភពលោក។
យុវតី ប៊ុនណា បូណារ័ត្ន សិស្សសាលារៀនវ៉េស្ទឡាញន៍បាននិយាយថា៖«ខ្ញុំសប្បាយចិត្តដែលបានចូលរួមកម្មវិធីនេះ។ វាជាបទពិសោធន៍ដ៏ធំមួយនៃជីវិតយើង។ យើងបានរៀនសូត្រជាច្រើននៅទីនោះ។ សិង្ហបុរីជាប្រទេសដែលមានបរិស្ថានស្អាត។ ដូច្នេះអ្វីដែលទទួលបានពីការរៀនសូត្រនៅសិង្ហបុរីយើងនឹងយកមកអនុវត្តនៅកម្ពុជា»។ ណារ័ត្ន បានបញ្ជាក់ថា«ខ្ញុំចង់ឱ្យកម្ពុជា ស្អាតដូចនៅសិង្ហបុរី»។
បូណារ័ត្ន បានឱ្យដឹងថាៈនៅទីនោះគាត់ទទួលបានបទពិសោធន៍ក្នុងការធ្វើការជាក្រុមការទទួលខុសត្រូវលើខ្លួនឯង និងបានសិក្សាអំពីបិរស្ថានដូចជា ការបំពុលទឹក ការថែរក្សាបរិស្ថាន ការគ្រប់គ្រងសម្រាម ការកែច្នៃសំរាមនិងសម្ភារៈដែលប្រើប្រាស់រួច។
ជំនួបទស្សនកិច្ចសិក្សាយុវជនបរិស្ថាននេះ មានយុវជនចូលរួមប្រមាណ៣៦៥នាក់ ដែលមកពីប្រទេសសិង្ហបុរី ចិន កម្ពុជា វៀតណាម ម៉ាឡេស៊ី ឥណ្ឌូនេស៊ី មានរយៈពេល៣ថ្ងៃ ចាប់ពីថ្ងៃទី២៥ ដល់ថ្ងៃទី២៦ ខែមករា។ ចំណែកប្រទេសកម្ពុជាវិញ មានសាលារៀនចំនួន៥ ដែលបានចូលរួមកម្មវិធីជំនួបយុវជនបរិស្ថាននេះ។
សូមបញ្ជាក់ថា សាលារៀនវ៉េស្ទឡាញន៍ និងណត្សឡាញន៍ចាប់ផ្តើមដំណើរក្នុងឆ្នាំ២០០៨ ហើយរហូតដល់ពេលបន្ចុប្បន្ននេះមានសិស្សចំនួនប្រមាណ ១២ ០០០ (មូយម៉ឺនពីរពាន់នាក់) និងមាន១០សាខា ក្នុងរាជធានីភ្នំពេញ។ សាលារៀននឹងអនុវត្តកម្មវិធីសិក្សាគោល កម្មវិធីសិក្សាអម និងកម្មវិធីសិក្សាបន្ថែម ឱ្យកាន់តែប្រសើរឡើងលើគ្រប់ចំណុច ជាពិសេសចំណេះដឹង និងជំនាញសម្រាប់សតវត្សទី ២១ (21st Century Skills) ជាពិសេសជំនាញទំនាក់ទំនង ជំនាញធ្វើការជាក្រុម គំនិតច្នៃប្រឌិត និងការគិតវិភាគបែបស៊ីជម្រៅ(4 Cs: Communication, Collaboration, Creativity and Critical Thinking) ភាសាចិន ចំណេះដឹងផ្នែក ហិរញ្ញវត្ថុ ទម្លាប់ល្អទាំង ៧ សម្រាប់យុវជន និងសហគ្រិនភាព ដែលជាបំណិនជីវិតចាំបាច់សម្រាប់ភាពជោគជ័យក្នុងការងារអាជីវកម្ម និង ការរស់នៅនាពេលអនាគត ។ ទន្ទឹមនឹងនេះដែរ ចំណេះដឹង និងជំនាញទាក់ទងនឹងវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា និងសិល្បៈ (STEM & Arts) ជំរុញឱ្យមានការផ្លាស់ប្តូរបទពិសោធដល់សិស្សានុសិស្ស តាមរយៈការបោះជំរំ នៅតាមបណ្តាប្រទេសនានានៃសហគមន៍អាស៊ាន និងប្រទេសដទៃទៀត ព្រមទាំងការស្វែងរកសាលារៀនជាដៃគូក្នុងស្រុក និងនៅបរទេស ដើម្បីផ្តល់អាហារូបករណ៍ ដល់សិស្សានុសិស្សនៃសាលារៀនវ៉េស្ទឡាញន៍ និងសាលារៀនណត្សឡាញន៍គ្រប់សាខា ។

January 28, 2019
សពតារាចម្រៀងស្រីក្នុងដួងចិត្ត ខេមរៈ ស្រីពៅ ដឹកពីឥណ្ឌា មកដល់កម្ពុជាព្រឹកស្អែកនេះ
មហាជនជាច្រើនជាអ្នកគាំទ្រ កំពុងសោកសៅ និងអាល័យចំពោះមរណភាពរបស់កញ្ញាខេមរៈ ស្រីពៅ នឹកស្មានមិនដល់ និងគួរឱ្យរន្ធត់ចិត្តជាខ្លាំង ព្រោះកញ្ញាបានលាចាកទៅយ៉ាងស្ងាត់ៗ និងឃ្លាតពីសិល្បះមួយរយៈធំ ហើយស្រាប់តែបាត់បង់ជីវិតដោយសារជំងឺជំងឺសួត និងក្រលៀន និងផុតដង្ហើមនៅរសៀលម៉ោង1 ក្នុងថ្ងៃទី25 ខែមករា ឆ្នាំ2019 នេះ។
ប៉ុន្មានម៉ោងមុននេះ លោក ខេមរៈ ភារុណ ដែលត្រូវជាបងប្រុសរបស់ ខេមរៈ ស្រីពៅ កំពុងតែវិលវុលនឹកអាណិតប្អូនស្រីរបស់លោកជាខ្លាំង ដោយលោកបានបន្ដបង្ហោះសារ និងរូបភាពជាច្រើនអំពីប្អូនស្រី។ ជាក់ស្តែងពេលទៅដល់ប្រទេសឥណ្ឌាដើម្បីនាំសពប្អូនស្រីមកប្រទេសកំណើតវិញ លោកបានយកនំ និងទឹកមួយដប ហើយបានបង្ហោះសារដ៏គួរឱ្យសង្វែកចិត្តថា«អូនផឹកទឹកអោយច្រើនចាំបងនាំអូនទៅផ្ទះយើងទៅជួបបងប្អូនយើងវិញ»។
សូមជម្រាបដែរថា សពរបស់តារាចម្រៀង ខេមរៈ ស្រីពៅ នឹងត្រូវដឹកតាមយន្តហោះ ចេញពីប្រទេសឥណ្ឌានៅម៉ោង12រំលងអាធ្រាត្រ ថ្ងៃទី26 ទី 27 (យប់នេះ) ខែមករានេះ ដោយត្រូវប្រើរយៈពេលហោះហើរ រហូតដល់ទៅ 10ម៉ោង ទើបមកដល់ប្រទេសកម្ពុជា នៅថ្ងៃស្អែកដើម្បីរៀបចំធ្វើបុណ្យតាមប្រពៃណី។ ដោយយកមកធ្វើបុណ្យនៅឯគេហដ្ឋាន នៅមុខសួនសុបិន្តចំការព្រីង ខណ្ឌសែនសុខ រាជធានីភ្នំពេញ៕

January 26, 2019
កក្រើកកម្ពុជាម្ដងទៀត !! ត្រៀមជួបជាមួយកំពូលតារាកំប្លែងថៃលោក កូទី យប់នេះ
នៅរសៀលថ្ងៃទី26 ខែមករា ឆ្នាំ 2018នេះ កំពូលតារាកំប្លែងលោក កូទី បានមកដល់ប្រទេសកម្ពុជាជាថ្មី ដោយការបង្ហាញខ្លួនលើកនេះ ដែលធ្វើឱ្យអ្នកគាំទ្រជាច្រើននាក់ភ្ញើកផ្អើល មានការចាប់អារម្មណ៍ជាងមុន ដោយសារតែបង្ហាញខ្លួនលើកនេះ ជាការសម្ដែងដ៏អស្ចារ្យ។ ខុសពីគ្រាមុនៗ កំពូលតារាកំប្លែងក្នុងរឿង «ខ្មោចត្រឡោកបែក » រូបនេះ មកកម្ពុជាលើកដើម្បីមកសម្ដែងខនសឺតទ្រង់ទ្រាយធំជាមួយតារាខ្មែរ នៅកោះពេជ្រ ។
លោក កូទី បានបង្ហាញអារម្មណ៍សប្បាយរីករាយយ៉ាងខ្លាំង នៅពេលចុះមកដល់ប្រទេសកម្ពុជា ជាពិសេសក្នុងពេលលោកឃើញវត្តមានអ្នកកាសែត និងអ្នកគាំទ្រខ្មែរ មកស្វាគមន៍ដល់ព្រលាន។ លោកថា នេះជាលើកទី3ហើយ ដែលលោកមកដល់ប្រទេសកម្ពុជា ដោយការបង្ហាញខ្លួនកាលពីពីរលើកមុន លោកមិនបានសម្ដែងខនសឺតដូចដំណើរមកកាន់កម្ពុជាលើកនេះទេ ទើបលោកចាត់ទុកថា ឱកាសសម្ដែងលើកដំបូងនៅក្នុងប្រទេសកម្ពុជាលើកនេះ នឹងធ្វើឱ្យលោកទទួលបាននូវបទពិសោធន៍ខ្ពស់ពីសិល្បៈកម្ពុជា។ លោកថា ខ្លួននឹងមានការសម្ដែងពិសេសលើឆាកដំបូងនៅកោះពេជ្រនៅប្រទេសកម្ពុជា ខណៈដែលការសម្ដែងនៅយប់ថ្ងៃទី26 ខែមករា នេះ នឹងទទួលជោគជ័យ ជាពិសេសក្នុងពេលលោកយល់ថា វត្តមានសម្ដែងកំប្លែងរបស់លោកនៅក្នុងភាពយន្តកន្លង ក៏មានអ្នកគាំទ្រខ្មែរស្គាល់លោកភាគច្រើន។ លោកថា ខ្លួននឹងមានគម្រោងទទួលសម្ដែងនៅក្នុងប្រទេសកម្ពុជាជាលើកទី2 ប្រសិនការសម្ដែងលើកដំបូងរបស់លោកនាយប់នេះ នៅកោះពេជ្រទទួលបានការគាំទ្រខ្លាំងក្លា។
លោកកូទី បានបញ្ជាក់ផងដែរថា លោកបានត្រៀមបទចម្រៀងពិរោះៗជាច្រើនបទសម្រាប់កម្សាន្ដអារម្មណ៍អ្នកគាំទ្រនារាត្រីនេះ ព្រមទាំងមានការកំប្លែងលេងជាមួយអ្នកគាំទ្រទៀតផង។ លោក កូទី គឺជាកំពូលតារាកំប្លែងល្បីល្បាញប្រចាំប្រទេសថៃ ដោយវត្តមានចេញសម្ដែងក្រៅប្រទេសរបស់លោកមិនមែនជាលើកទី1នោះទេ ខណៈដែលការសម្ដែងរបស់លោកនៅក្នុងស្រុក និងក្រៅប្រទេសកន្លងមានការគាំទ្រយ៉ាងភ្លូកទឹកភ្លូកដី។ លោកក៏ជាតំណាងផលិតផលភេសជ្ជៈប្រទាលកន្ទុយក្រពើដ៍ល្បីល្បាញមួយប្រចាំប្រទេសថៃ ដែលផលិតផលនេះ ក៏បាននាំមកកាន់ទីផ្សារកម្ពុជាផងដែរ៕

January 26, 2019
ធនាគារអេស៊ីលីដា លើកទឹកចិត្តបុគ្គលិកឱ្យចែករំលែកក្តីស្រឡាញ់ និងជួយមនុស្សតាមរយៈការផ្តល់ឈាមដោយស្ម័គ្រចិត្ត
ការផ្តល់ឈាមជាផ្នែកយ៉ាងសំខាន់ក្នុងការជួយសង្គ្រោះជីវិតប្រជាជនកម្ពុជាដែលកំពុងត្រូវការឈាមជាបន្ទាន់នៅតាមមន្ទីរពេទ្យនានាក្នុងប្រទេស។ ហេតុនេះការចូលរួមពីគ្រប់ភាគីនានាក្នុងសង្គម មានស្ថាប័នសាធារណៈ ស្ថាប័នឯកជន និងប្រជាជនទូទៅ ជារឿងចាំបាច់បំផុតសម្រាប់ស្ថានភាពកម្ពុជាបច្ចុប្បន្នដែលកំពុងមានតម្រូវការខ្ពស់ផ្នែកឈាម។
ដោយមើលឃើញពីតម្រូវការជាចាំបាច់ និងជាការបន្តសកម្មភាពចូលរួមចំណែកជួយដល់សង្គម ធនាគារ អេស៊ីលីដា ភីអិលស៊ី ដែលជាធានាគារពាណិជ្ជធំជាងគេនៅកម្ពុជា បានរៀបចំកម្មវិធីបរិច្ចាគឈាមដោយស្ម័គ្រចិត្តរបស់កម្មករនិយោជិត នៃការិយាល័យកណ្តាល និងសាខាក្នុងរង្វង់រាជធានីភ្នំពេញនៅថ្ងៃទី 25 ខែមករា ឆ្នាំ2019 ម្សិលមិញនេះ ដើម្បីផ្តល់ឱកាសឱ្យបុគ្គលិកបានចែករំលែកក្តីស្រឡាញ់ និងចូលរួមចំណែកជួយជីវិតប្រជាជនជាច្រើនដែលកំពុងត្រូវការឈាម។
លោក លី ថៃ អនុប្រធាននាយកប្រត្តិបត្តិ និងជាគណៈប្រធាននាយកប្រតិបត្តិអភិបាលកិច្ចនៃធនាគារ អេស៊ីលីដា ភីអិលស៊ី បានលើកឡើងថា នេះជាលើកទី5 ហើយដែលធនាគារ រៀបចំការបរិច្ចាគឈាមដោយស្ម័គ្រចិត្តពីសហការីនៅជុំវិញរាជធានីភ្នំពេញ។ សហការីដែលចូលរួមនៅថ្ងៃនេះមានចំនួនប្រមាណជា 218នាក់ ដែលពួកគាត់មានចិត្តសប្បុរសក្នុងការចូលរួមចំណែកជួយគាំទ្រការងារសង្គម និងជាពិសេសគឺជួយសម្រាលបន្ទុកដល់អ្នកដែលកំពុងត្រូវការជំនួយឈាមនៅទូទាំងប្រទេស។
លោក លី ថៃ បានមានប្រសាសន៍ថា៖ «ខ្ញុំសូមថ្លែងអំណរគុណដល់សហការីទាំងអស់ដែលបានចូលរួមចំណែកក្នុងការបរិច្ចាគឈាមដោយស្ម័គ្រចិត្ត សម្រាប់ជាអំណោយដ៏សំខាន់សល់មជ្ឈមណ្ឌលជាតិផ្តល់ឈាមសម្រាប់បន្តជួយជីវិតមនុស្ស»។
លោកបានបន្ថែមផងដែរថា យើងនឹងបន្តសកម្មភាពជាវិជ្ជមាននេះបន្ថែមទៀតដើម្បីលើកទឹកចិត្តឱ្យមានការធ្វើអំពើរល្អដល់សង្គម និងបង្ហាញពីការយកចិត្តទុកដាក់ដល់គ្រប់ភាគីទាំងអស់ដែលកំពុងត្រូវការជំនួយ។ ការផ្តល់ឱកាសសម្រាប់បន្តសកម្មភាពទៅដល់ខេត្តឆ្ងាយៗ ឬសាខាដទៃផ្សេងទៀតនោះអាចនឹងធ្វើទៅបានប្រសិនបើដៃគូសហការ ជាពិសេសមជ្ឈមណ្ឌលជាតិផ្តល់ឈាមអាចមានពេលវេលាគ្រប់គ្រាន់ និងទៅដល់តំបន់នោះបាន។
លោកស្រី សុខ សោភា នាយិកាប្រតិបត្តិទីផ្សារ បានមានប្រសាសន៍ថា ការផ្តល់ឈាមជាសកម្មភាពប្រកបដោយគុណតម្លៃមួយដែលមនុស្សគ្រប់គ្នាអាចធ្វើបានដោយមិនប៉ះពាល់ដល់សុខភាពនោះទេ ហេតុនេះយើងម្នាក់ៗអាចធ្វើការប្រឹក្សាជាមួយអ្នកជំនាញ ឬអាចទៅដោយផ្ទាល់នៅមជ្ឈមណ្ឌលជាតិផ្តល់ឈាមដើម្បីបរិច្ចាគឈាមដោយសុវត្ថិភាព ហើយថែមទាំងអាចជួយដល់ជីវិតជនរងគ្រោះជាច្រើននាក់ផ្សេងទៀតក្នុងសង្គមដែលកំពុងត្រូវការឈាមជាចាំបាច់។
ប្រធានមជ្ឈមណ្ឌលជាតិផ្តល់ឈាម លោកវេជ្ជបណ្ឌិត ហុក គឹមចេង បានមានប្រសាសន៍ថាពីមួយឆ្នាំទៅមួយឆ្នាំ វិស័យឯកជនបានដើរតួនាទីយ៉ាងសំខាន់ក្នុងការទទួលខុសត្រូវសង្គមដោយការផ្តល់ឈាមមកកាន់មជ្ឈមណ្ឌលជាតិផ្តល់ឈាម ជាពិសេសគឺធនាការអេស៊ីលីដា ដែលតែងតែរួមចំណែកយ៉ាងសកម្ម។
លោកវេជ្ជបណ្ឌិត បានបន្ថែមទៀតថា សព្វថ្ងៃនេះមានអ្នកជំងឺជាច្រើនដែលបានបញ្ជូនមកមន្ទីរពេទ្យឯកទេសទាំងរដ្ឋ និងឯកជន ដែលកំពុងប្រឈមជាមួយបញ្ហាជាច្រើនដូចជាជំងឺថ្លើម ការបន្សាំសរីរាង្គ ជំងឺទឹកនោមផ្អែមរ៉ាំរ៉ៃ និងមហារីកជាដើម សុទ្ធតែកំពុងត្រូវការឈាមជាប្រចាំ ហេតុនេះយើងត្រូវការឈាមជាច្រើនជារៀងរាល់ឆ្នាំ។ នៅក្នុងឆ្នាំ 2018 នៃកម្ពុជាត្រូវការឈាមរហូតដល់ 8ម៉ឺនប្លោក ហើយបើប្រៀបធៀបនឹងឆ្នាំ 2017 មានការកើនឡើង 10%។ ចំនួននៃកំណើន 10% នឹងកើនឡើងជាបន្តទៀតនៅឆ្នាំបន្តបន្ទាប់ ហើយបើប៉ាន់ស្មានទៅយើងត្រូវការឈាមប្រមាណជាង 9ម៉ឺនប្លោកនៅក្នុងឆ្នាំ 2019 នេះ ស្របពេលដែលយើងកំពុងបង្កើនសមត្ថភាពសំខាន់ៗរបស់ឈាមដើម្បីព្យាបាលជំងឺរបស់ប្រជាជនឱ្យបានកាន់តែច្រើន៕

January 26, 2019