ការវិនិយោគគម្រោងជលវប្បដ្ឋានត្រីទឹកសាប-ទឹកប្រៃ និងជម្រកអភិរក្សសត្វលើទំហំផ្ទៃដី 100ហិកតាដែលមានទំហំវិនិយោគសរុប 70លានដុល្លារ នឹងត្រូវកសាងឡើងនៅខេត្តសៀមរាប។តាមការលើកឡើងរបស់សមាជិកក្រុមប្រឹក្សាភិបាល និងប្រធានក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀមក្នុងពិធីបើកសម្ពោធការចាប់ផ្ដើមការសាងសង់ជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វ។
គម្រោងនេះ ជារបស់ក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម (Angkor Wildlife and Aquarium)ដែលត្រូវបានបង្កើតឡើងក្នុងទម្រង់ជាដៃគូរវាងវិនិយោគិនកម្ពុជា និងវិនិយោគិនជប៉ុនក្រោមកិច្ចសហការជាមួយ ICM Inc. (International Concept Management Inc.) ពីសហរដ្ឋ អាមេរិកដែលរៀបចំរចនាប្លង់ គ្រប់គ្រងគម្រោង និងប្រតិបត្តិការជលវប្បដ្ឋាន និងឧទ្យានសមុទ្រនៅទូទាំងពិភពលោក។
លោក Roger R. Reynolds បានបន្ថែមថា គម្រោងនេះ គឺមានច្រើនលើសពីត្រឹមជាជលវប្ប ដ្ឋាន ឬឧទ្យានសត្វទៅទៀត។ ជាមួយគ្នានេះ ក្រុមលោកនឹងកសាងជម្រកធម្មជាតិប្រកបដោយគុណ ភាពខ្ពស់ សម្រាប់ថែរក្សាសត្វព្រៃរស់នៅលើគោកក្នុងតំបន់អាស៊ី មិនថាពួកវាជាពូជសង្រ្គោះ ឬ បង្ខាំងទុកនោះទេ។
ចំពោះទំហំវិនិយោគសរុបសម្រាប់គម្រោងនេះមាន 3ដំណាក់កាល ដោយការចំណាយក្នុងដំណាក់កាលដំបូងស្មើនឹង 18លានដុល្លារ។ ការសាងសង់ក្នុងដំណាក់កាលទី1 នឹងប្រើពេល 2ឆ្នាំ ដោយមានការបើកការដ្ឋាននៅក្នុងខែឧសភា ឆ្នាំ2019 និងបញ្ចប់ត្រឹមខែឧសភា ឆ្នាំ2021។
គម្រោងនេះនឹងមានសួនរុក្ខសាស្រ្ត សាលតាំងពិព័រណ៍ ជម្រកល្មូន និងគំរូភូមិនេសាទខ្មែរដែលភ្ញៀវអាចដើរកម្សាន្ដ ទិញទំនិញ និងរីករាយទទួលទានម្ហូបអាហារ និងភេសជ្ជៈក្នុងស្រុកមួយចំនួន។ គម្រោងជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វនេះនឹងក្លាយជាគោលដៅទេសចរណ៍លំដាប់ពិភពលោក។ សម្រាប់គោលដៅរបស់គម្រោងនេះ គឺធានាថា វានឹងក្លាយជាគោលដៅទាក់ទាញបំផុតទី2 បន្ទាប់ពីប្រាសាទអង្គរវត្ត។
ឯកឧត្តម ទិត ចន្ថា រដ្ឋមន្ត្រីស្តីទីក្រសួងទេសចរណ៍បានមានប្រសាសន៍ថា គម្រោងវិនិយោគនេះជាការធ្វើពិពិធកម្មផលិតផល និងសេវាកម្មទេសចរណ៍ប្រកបដោយភាពច្នៃប្រឌិតក្នុងគោលដៅទេសចរណ៍ និងជាផលិតផលទេសចរណ៍ថ្មីមួយទៀតសម្រាប់ខេត្តសៀមរាបដែលនឹងបង្កើតភាពទាក់ទាញថ្មីជំរុញអ្នកទេសចរមកកាន់ខេត្តសៀមរាបបន្តការស្នាក់នៅជាមធ្យមពាក់កណ្តាលថ្ងៃទៀតផង។
ឯកឧត្តមបានលើកឡើងថា នេះជាបេសកកម្មយុទ្ធសាស្រ្តសំខាន់របស់យើងដើម្បីសម្រេចបាននូវការអភិវឌ្ឍវិស័យទេសចរណ៍រយៈពេលវែងនៅក្នុងប្រទេស។ រដ្ឋាភិបាលកម្ពុជាបានកំណត់វិស័យទេសចរណ៍ថាជា “មាសបៃតង” និងជាអាទិភាពមួយក្នុងចំណោមអាទិភាពខ្ពស់បំផុត សម្រាប់ការអភិវឌ្ឍសេដ្ឋកិច្ចសង្គមនៅក្នុងប្រទេសដែលបានរួមចំណែក 12.7% ចំពោះផលិតផលក្នុងស្រុក សរុប និងបង្កើតការងាររាប់សែនកន្លែង និងឱកាសរកស៊ី។ គម្រោងនេះក៏នឹងដើរតួយ៉ាងសំខាន់ក្នុងការកាត់បន្ថយភាពក្រីក្រ ការការពារបរិស្ថាន និងការអភិរក្សធនធានវប្បធម៌ និងធនធានធម្មជាតិ និងការអភិវឌ្ឍប្រកបដោយចីរភាព។
ឯកឧត្ដមឯកអគ្គរដ្ឋទូតស្តីទីស្ថានទូតសហរដ្ឋអាមេរិកប្រចាំនៅកម្ពុជាបានឱ្យដឹងថា គម្រោងនេះជាគម្រោងមួយក្នុងចំណោមការវិនិយោគធំជាងគេរបស់អាមេរិកនៅកម្ពុជាក្នុងរយៈពេលជាច្រើនឆ្នាំមកនេះ ហើយនេះគឺជាអ្វីដែលយើងត្រូវអបអរ និងទទួលស្គាល់។ ឯកឧត្តមបានបន្ដទៀតថា ដោយសារការគាំទ្ររបស់សហរដ្ឋអាមេរិក ជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វ នឹងក្លាយជាគោលដៅទេសចរណ៍ថ្នាក់ពិភពលោក។
ឯកឧត្ដមចាត់ទុកការវិនិយោគនេះគឺជាគំរូដ៏ប្រពៃមួយ ហើយកាលណាច្បាប់ទម្លាប់មានភាពច្បាស់លាស់ ហើយដំណើរការលទ្ធកម្មមានភាពបើកចំហ ប្រទេសកម្ពុជាពិតជាអាចទទួលបានប្រយោជន៍ពីទំនាក់ទំនងជាមួយដៃគូច្រើនដើម្បីទទួលបានលទ្ធផលល្អបំផុតសម្រាប់ប្រទេស និងប្រជាជនកម្ពុជា។
ឯកឧត្ដមឯកអគ្គរដ្ឋទូតបានបញ្ជាក់ថា៖«ការអភិវឌ្ឍនេះមានភាពស្របឥតខ្ចោះជាមួយនឹងផលប្រយោជន៍ទាំងនោះ ហើយវាពិតជាទាក់ទាញពលរដ្ឋកម្ពុជាឱ្យចង់រៀនថែមទៀតអំពីប្រព័ន្ធបរិស្ថាន អេកូឡូស៊ីដ៏សម្បូរបែបនៃមាតុភូមិរបស់ពួកគេ»៕
