![Chelsea and Everton](https://lareine.com.kh/wp-content/uploads/2017/05/Chelsea-and-Everton.jpg)
គ្រាប់បាល់ស៊ុតបញ្ចូលទីយ៉ាងល្អរបស់ខ្សែបម្រើប្រយុទ្ធ Pedro បានជួយឲ្យក្រុម Chelsea បោះជំហានកាន់តែកៀកឆ្ពោះទៅកាន់ការឈ្នះពាន Premier League ខណៈដែលក្រុមតោខៀវមួយនេះ បានកត់ត្រាជ័យជម្នះយ៉ាងកក់ក្តៅក្នុងលទ្ធផល ៣-០ លើក្រុម Everton កាលពីថ្ងៃអាទិត្យ។
![](https://i0.wp.com/www.lareine.com.kh/wp-content/uploads/2017/05/Chelsea-and-Everton-300x169.jpg?resize=696%2C392&ssl=1)
ក្រុមរបស់លោក Antonio Conte ត្រូវបានខិតខំព្យាយាមយ៉ាងខ្លាំងដើម្បីទម្លុះតំបន់ការពារដ៏រឹងមាំរបស់ក្រុម Everton ប៉ុន្តែ គ្រាប់បាល់ស៊ុតបញ្ចូលទីពីចម្ងាយយ៉ាងល្អក្នុងតង់ទី២របស់ Pedro បានជួយឲ្យក្រុម Chelsea ស្ថិតនៅលើផ្លូវឆ្ពោះទៅកាន់ការឈ្នះការប្រកួតជាលើកទី៤ក្នុងចំណោមការប្រកួតលីក៥លើកចុងក្រោយរបស់ពួកគេ។ គ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់ខ្សែការពារ Gary Cahill និងខ្សែបម្រើ Willian បានបំពេញការទទួលជ័យជម្នះនេះតែម្តង ខណៈដែលក្រុមតោខៀវ បានរក្សាការនាំមុខ៤ពិន្ទុដដែលនៅលើកំពូលតារាង។
![](https://i0.wp.com/www.lareine.com.kh/wp-content/uploads/2017/05/The-Blues-300x196.jpg?resize=696%2C455&ssl=1)
លោក Antonio Conte បានប្រាប់ទូរទស្សន៍ Sky Sports ថា៖ «លទ្ធផលនេះ ផ្តល់ឲ្យយើងនូវការជឿជាក់យ៉ាងច្រើន។ ពេលនេះ វាពិតជាសំខាន់ណាស់ក្នុងការត្រៀមលក្ខណៈសម្រាប់ការប្រជែងនៅដំណាក់កាលចុងក្រោយ។ ប្រសិនបើក្នុងការប្រកួតបន្ទាប់ជាមួយនឹងក្រុម Middlesbrough យើងមិនឈ្នះ យើងនឹងបាត់បង់ជ័យជម្នះ។ យើងត្រូវតែមើលមួយជំហានទៅមួយជំហាន។ Chelsea ដែលបច្ចុប្បន្នកំពុងតែមាន៨១ពិន្ទុនោះ ត្រូវការឈ្នះត្រឹមតែ៣លើកទៀតប៉ុណ្ណោះពីការប្រកួត៤លើកចុងក្រោយ ខណៈដែលពួកគេនឹងត្រូវធ្វើជាម្ចាស់ផ្ទះទទួលក្រុម Middlesbrough មុននឹង West Brom, Watford និង Sunderland៕
ប្រភពព័ត៌មាន៖ Mirror