ធនាគារជាតិនៃកម្ពុជា (NBC) និងក្រុមហ៊ុនបច្ចេកវិទ្យាទូទាត់ប្រាក់សកល Visa បានចុះហត្ថលេខាលើអនុស្សរណៈយោគយល់គ្នាមួយដើម្បីជំរុញឱ្យប្រជាពលរដ្ឋខ្មែរមានការយកចិត្តទុកដាក់បន្ថែមទៀតអំពីអក្ខរកម្មផ្នែកហិរញ្ញវត្ថុ ដែលអាចជាបច្ច័យមួយនាំឱ្យមានការសេចក្តីសម្រេចចិត្តបានល្អិតល្អន់ជាងមុន។
លោកជំទាវ ជា សិរី អគ្គនាយិកាបច្ចេកទេសធនាគារជាតិនៃកម្ពុជា មានប្រសាសន៍ថា ធនាគារជាតិនៃកម្ពុជា បានសហការជាមួយស្ថាប័នសាធារណៈ និងឯកជន ព្រមទាំងភាគីពាក់ព័ន្ធជាច្រើននៅក្នុងការអនុវត្តគម្រោងអប់រំផ្នែកហិរញ្ញវត្ថុនេះ។ ធនាគារជាតិនៃកម្ពុជាតែងយកចិត្តទុកដាក់យ៉ាងខ្លាំងចំពោះបញ្ហាអក្ខរកម្មផ្នែកហិរញ្ញវត្ថុ ព្រោះថានៅពេលដែលប្រជាពលរដ្ឋមានចំណេះដឹងផ្នែកនេះច្រើនវានឹងធ្វើឱ្យការអភិវឌ្ឍប្រព័ន្ធធនាគារមានភាពរឹងមាំប្រកបដោយចីរភាព។ ការជួយគាំទ្ររបស់ក្រុមហ៊ុន Visa ចំពោះយុទ្ធនាការ“តោះ! និយាយពីលុយ” និងកម្មវិធីចំណេះដឹងផ្នែកហិរញ្ញវត្ថុផ្សេងៗទៀត គឺជាគន្លឹះមួយដ៏សំខាន់ក្នុងដំណើរឆ្ពោះទៅកាន់កំណើនប្រកបដោយបរិយាប័ន្ន។
![](https://i0.wp.com/www.lareine.com.kh/wp-content/uploads/2017/08/20614053_1524730757591990_476446504_n.jpg?resize=696%2C464&ssl=1)
លោកជំទាវ បានថ្លែងថា៖“វាជាចំណុចល្អដែលយើងទទួលបានការបណ្តុះបណ្តាលចំណេះដឹងផ្នែកហិរញ្ញវត្ថុចំពោះក្មេងៗតាំងពីនៅតូច។ ទាំងនេះជាវិធីសាស្ត្រមួយដែលមានប្រសិទ្ធភាពបំផុត ដើម្បីឱ្យពួកគេមានចំណេះដឹង និងបានត្រៀមខ្លួនរួចជាស្រេចក្នុងការទទួល និងប្រើប្រាស់សេវាហិរញ្ញវត្ថុនាពេលអនាគត”។
លោកជំទាវបានបន្ដថា អក្ខរកម្មផ្នែកហិរញ្ញវត្ថុ គឺជាប្រព័ន្ធការពារដំបូងសម្រាប់អតិថិជន ពីព្រោះនៅពេលដែលអតិថិជនអាចធ្វើសេចក្តីសម្រេចចិត្តបានល្អិតល្អន់ ពួកគាត់អាចការពារខ្លួនដោយចៀសផុតពីការកេងបន្លំ និងអាចអភិវឌ្ឍសេដ្ឋកិច្ចគ្រួសារឱ្យបានប្រសើរជាងមុន តាមរយៈការជ្រើសរើស និងប្រើប្រាស់ផលិតផល និងសេវាកម្មហិរញ្ញវត្ថុត្រឹមត្រូវ។
ក្នុងអនុស្សរណៈយោគយល់គ្នានេះ ក្រុមហ៊ុន Visa បានគាំទ្រដល់ធនាគារជាតិនៃកម្ពុជាក្នុងការផលិតសៀវភៅអក្ខរកម្មហិរញ្ញវត្ថុ “តោះ! និយាយពីលុយ” ចំនួន30,000ក្បាលដែលនឹងត្រូវចែកចាយនៅតាមសាលារៀននានាសម្រាប់រយៈពេល 3ឆ្នាំ និងជួយអភិវឌ្ឍន៍ផែនការអក្ខរកម្មហិរញ្ញវត្ថុរយៈពេល 5ឆ្នាំសម្រាប់ប្រទេសកម្ពុជា។ កម្មវិធីសិក្សាអំពីអក្ខរកម្មផ្នែកហិរញ្ញវត្ថុ នឹងធ្វើការបណ្តុះបណ្តាលគ្រូបង្រៀននៅតាមសាលារៀនដើម្បីឱ្យពួកគាត់អាចចែករំលែកជំនាញអក្ខរកម្មហិរញ្ញវត្ថុជាមួយសិស្សរបស់ខ្លួន។
![](https://i0.wp.com/www.lareine.com.kh/wp-content/uploads/2017/08/20623949_1524730760925323_337920022_n.jpg?resize=696%2C522&ssl=1)
លោក Sean Preston នាយកគ្រប់គ្រងក្រុមហ៊ុន Visa ប្រចាំប្រទេសកម្ពុជា វៀតណាម និងឡាវ បានប្រាប់ថា លោកជឿថា ឧបករណ៍ហិរញ្ញវត្ថុដ៏
សំខាន់បំផុតសម្រាប់អភិវឌ្ឍបុគ្គល និងសេដ្ឋកិច្ចនោះ គឺចំណេះដឹង។ ដូច្នេះហើយបានជា Visa ធ្វើការសហការជាមួយធនាគារជាតិនៃកម្ពុជា ដើម្បីអភិវឌ្ឍកម្មវិធីអក្ខរកម្មផ្នែកហិរញ្ញវត្ថុ ដែលវានឹងជះឥទ្ធិពលជាវិជ្ជមានដល់ជីវិតរស់នៅរបស់ប្រជាជនខ្មែរទូទាំងប្រទេស។
អស់រយៈពេលជាង20ឆ្នាំ ក្រុមហ៊ុន Visa បានសហការជាមួយរដ្ឋាភិបាល សាលារៀន ធនាគារ និងអង្គការក្រៅរដ្ឋាភិបាល ដើម្បីអភិវឌ្ឍកម្មវិធីអក្ខរកម្មផ្នែកហិរញ្ញវត្ថុ ដែលបង្រៀនបុគ្គលពីរបៀបចំណាយការសន្សំ និងរៀបចំថវិកាប្រកបដោយទំនួលខុសត្រូវ។ កម្មវិធីអក្ខរកម្មផ្នែកហិរញ្ញវត្ថុរបស់ក្រុមហ៊ុន Visa មានលក្ខណៈងាយស្រួល និងទូលំទូលាយទូទាំងពិភពលោក។ បញ្ហាប្រឈមផ្នែកអប់រំផ្នែកហិរញ្ញវត្ថុ គឺមានភាពខុសៗគ្នា ដូច្នេះហើយទើបក្រុមហ៊ុន Visa បានបង្កើតមាតិកាដែលបំពេញតាមតម្រូវការវប្បធម៌ ភាសា និងភាពស្មុគស្មាញខុសៗគ្នាដោយមិនគិតពីអាយុ ការអប់រំ ឬភូមិសាស្ត្រឡើយ៕