កញ្ញា គង់ វង្សយ៉ាទី ជាពិធីការិនីល្បីឈ្មោះ និងលេចធ្លោនៅក្នុងស្ថានីយទូរទស្សន៍ CTN តាមរយៈកម្មវិធី «រាត្រីកំសាន្ដ» ជាកម្មវិធីកំពុងពេញនិយមសម្រាប់យុវវ័យ នឹងមហាជនទូទៅ។ ទោះបីជានាងមានឱកាសទទួលបានការងារជាច្រើនទាំងថតស្ប៉ត ខារ៉ាអូខេ ភាពយន្ដ ដែលអាចរកបានប្រាក់ចំណូលច្រើនសន្ធឹកសន្ធាប់ ប៉ុន្ដែនាងហាក់មានចិត្ដស្ងប់ មិនជ្រួលនឹងភាពឡូយឆាយជាមួយរថយន្ដទំនើប ខណៈដែលមានតារាមួយចំនួន កំពុងតែបង្អួតរថយន្ដទំនើបៗតម្លៃរាប់ម៉ឺនដុល្លារ។
![](https://i0.wp.com/www.lareine.com.kh/wp-content/uploads/2017/08/IMG_3565-683x1024.jpg?resize=683%2C1024&ssl=1)
ពាក់ព័ន្ធនឹងរឿងនេះ កញ្ញា គង់ វង្សយ៉ាទី បានបញ្ជាក់ប្រាប់ថា រថយន្ដទំនើប នរណាក៏ចង់ដែរ ប៉ុន្ដែសម្រាប់នាងធ្វើអ្វីៗតែងតែប៉ាន់ស្មានពីសមត្ថភាព និងលទ្ធភាពរបស់ខ្លួន ដែលអាចធ្វើទៅបាន។ គង់ វង្សយ៉ាទី បន្ដថា៖ «ខ្ញុំមិនចង់យកប្រាក់ទៅចំណាយលើការផ្លាស់ប្ដូររថយន្ដទេ ដោយសារតែកន្លងមក ខ្ញុំត្រូវយកលុយមកធ្វើផ្ទះ ដើម្បីបានរស់នៅឲ្យស្រួលខ្លួននឹងគេជាមុនសិន។ ខ្ញុំមិនតូចចិត្ដទៅនឹងអ្វីដែលខ្ញុំកំពុងតែមានទេ ផ្ទុយទៅវិញខ្ញុំសប្បាយចិត្ដនូវដែលខ្ញុំធ្វើបានដោយសមត្ថភាពខ្លួន។ រថយន្ដទំនើបនរណាក៏ស្រឡាញ់ដែរ ប៉ុន្ដែបើមានលុយគួរតែធ្វើរឿងចាំបាច់ជាមុនសិន»។
គេនៅចាំបានថា នៅពេលកញ្ញា គង់ វង្សយ៉ាទី ចូលប្រឡូកសិល្បៈដំបូងក្នុងឆ្នាំ2011 ខណៈដែលនាងទទួលតំណែងតួឆ្នាស់ក្នុងរឿង «នាងឈូកស» គឺនាងមិនទាន់មាន រថយន្ដប្រើប្រាស់ផ្ទាល់ខ្លួនទេ។ ម្ដងម្កាលនាងត្រូវជិះរថយន្ដឈ្នួល និងជិះដោយសារមិត្ដភ័ក្ដិក្នុងសិល្បៈនៅឡើយ។ ក្រោយពីប្រជាប្រិយភាពនាងឡើងបន្ដិច គេឃើញនាងជិះរថយន្ដកាមេរីឆ្លាមសេរីឆ្នាំ 2008 បន្ទាប់មកក៏ប្ដូរមកជិះ Lexus RX 300 ពណ៌ខ្មៅរហូតមកដល់បច្ចុប្បន្ន។
![](https://scontent-sit4-1.xx.fbcdn.net/v/t1.0-9/19105933_1325366897571174_3154789271560665585_n.jpg?oh=35810b0a25d7f63de7e4cf8298409c3d&oe=5A2AC18D)
ពិធីការិនីរូបនេះបន្ដថា រថយន្ដទំនើប ឬមិនទំនើបមិនអីទេ សំខាន់ឲ្យតែនាងប្រើប្រាសរថយន្ដលើដងផ្លូវគោរពច្បាប់ចរាចរ និងមិនមានបញ្ហាអ្វីកើតឡើងនោះ នាងសប្បាយចិត្ដទៅហើយ ព្រោះរថយន្ដនាងកំពុងជិះនេះ វាបានមកពីកម្លាំងញើសឈាមនាងសុទ្ធសាធ។
![](https://scontent-sit4-1.xx.fbcdn.net/v/t1.0-9/18425183_1293697867404744_740390070134018073_n.jpg?oh=452e73f0caae4429b621eaf5ec44d83f&oe=59ED29F7)
កញ្ញា គង់ វង្សយ៉ាទី បន្ដទៀតថា៖ «រថយន្ដចាស់មែន សំខាន់យើងជាអ្នកបើកបរ ត្រូវមានការប្រុងប្រយ័ត្ន។ ខ្ញុំប្រើរថយន្ដនេះជាច្រើនឆ្នាំ ខ្ញុំក៏មិនដែលកើតមានបញ្ហាអ្វីឡើយ ព្រោះខ្ញុំ ចេះប៉ាន់ប្រមាណកម្លាំងខ្លួនឯងនៅពេលបើកបរ។ ពេលណាខ្ញុំអស់កម្លាំង ខ្ញុំបើកទៅរកកន្លែងមានសុវត្ថិភាព សម្រាកលុបមុខ ពេលមានកម្លាំងទើបធ្វើដំណើរបន្ដទៀត»៕
![](https://scontent-sit4-1.xx.fbcdn.net/v/t1.0-9/18010314_1268886926552505_7345339825680152088_n.jpg?oh=c8f4091b9b04a77c707ece9312cf2982&oe=59F576F1)