ភ្នំពេញៈ ការបង្ហោះរូបថតថ្នាក់ថ្នម និងថែបថែកូនប្រុសច្បងខ្លួន ដែលសល់ពីចំណងស្នេហ៍ស្វាមីទី ១ របស់ពិធីការិនីទូរទស្សន៍ ដែលចេះភាសាអង់គ្លេសជ្រៅជ្រះ ស្ទាត់ជំនាញ និងសម្បូរវោហារមិនចាញ់តារាកំប្លែង អ្នកនាង ខៀវ សានសាណា ក៏បង្កការងឿងឆ្ងល់ពេញបណ្តាញសង្គមយ៉ាងខ្លាំង ក៏បានព្រលយចេញជាពាក្យចចាមអារាមសង្ស័យថា ទំនងជាអ្នកនាងមានក្តីប្រាថ្នាចង់បានបុត្រជាមួយនឹងស្វាមីទី ២ ទៀតទេដឹង?
![](https://i0.wp.com/www.lareine.com.kh/wp-content/uploads/2017/04/sana-2-300x300.jpg?resize=343%2C343&ssl=1)
![](https://i0.wp.com/www.lareine.com.kh/wp-content/uploads/2017/04/Sansana-Khieu23-300x200.jpg?resize=512%2C341&ssl=1)
ពិធីការិនីកូន ២ សម្រស់នៅតែស្រស់ស្អាត អ្នកនាង ខៀវ សានសាណា ក៏ច្រានចោលភ្លាមតែម្តងទៅនឹងចម្ងល់របស់មហាជនដែលថា នាងកំពុងតែត្រៀមចិត្តកាយពពោះជូនស្វាមីទី ២ ជនជាតិអូស្ត្រាលីលោក Seraj Sutton ដែរថា៖ «នៅមិនទាន់មានគម្រោងដូច្នោះ នៅឡើយនោះទេ! សព្វថ្ងៃនេះពួកយើងរវល់ខ្លាំងណាស់នឹងការងាររៀងខ្លួន ដូច្នេះត្រូវរង់ចាំមើលមួយរយៈសិន»។ ពិធីការិនីល្បីប្រចាំទូរទស្សន៍ My TV និង CTN អ្នកនាង ខៀវ សានសាណា នាពេលមួយរយៈក្រោយនេះ គេសង្កេតឃើញនាងច្រើនតែកាន់កម្មវិធីកម្សាន្តរបស់ក្មេងៗរួមមានដូចជាកម្មវិធី Bet Your Baby ជាដើមនៅ CTN ដូច្នេះហើយបានជានាងងាកមកនឹកឃើញរើសរើរូបថតកូនប្រុសច្បងមកបង្ហោះរំឮកអនុស្សាវរីយ៍ពេញបណ្តាញសង្គមនោះ។
![](https://i0.wp.com/www.lareine.com.kh/wp-content/uploads/2017/04/sana-1-300x300.jpg?resize=390%2C390&ssl=1)
![](https://i0.wp.com/www.lareine.com.kh/wp-content/uploads/2017/04/sana-10-300x300.jpg?resize=389%2C389&ssl=1)
អ្នកនាង ខៀវ សានសាណា ក៏បានបកស្រាយនូវសារ ដែលនាងបានបង្ហោះជាភាសាអង់គ្លេសមួយឃ្លានោះថា៖ « អស់ពេល ៧ ឬ ៨ ឆ្នាំ កន្លងផុតមកហើយ ដែលខ្ញុំបានសម្រាលកូនប្រុសដំបូង។ ហើយខ្ញុំបានសម្រេចចិត្តជ្រើសយកគាត់ សុខចិត្តចោលទ្រព្យធននានា ដែលបានពីការងារកំពុងតែមានរាសីឡើង និងចោលអ្នកស្គាល់ទាំងឡាយពីកាលមុន។ ពេលនោះពិតជាពិបាកសម្រេចចិត្តបំផុតសម្រាប់ខ្ញុំ។ តែពេលនេះ នាងខ្ញុំគិតថា ជាការសម្រេចដ៏ត្រឹមត្រូវសម្រាប់ជីវិតខ្លួនឯង។ ជាពិសេស នាពេលយើងបានរៀបការ ហើយមានកូនដំបូង ក៏សម្រេចចិត្តតាមស្វាមី និងជ្រើសរើសផ្លូវរក្សាទុកកូន ដោយសុខចិត្តលះបង់ចោលការងារដែលខ្លួនស្រឡាញ់»។
![](https://i0.wp.com/www.lareine.com.kh/wp-content/uploads/2017/04/Sansana-Khieu21-300x200.jpg?resize=526%2C350&ssl=1)
![](https://i0.wp.com/www.lareine.com.kh/wp-content/uploads/2017/04/sananaa-217x300.jpg?resize=253%2C350&ssl=1)
ពិធីការិនីដែលសម្បូរវោហារ ចេះបត់បែនតាមស្ថានភាព នៃកម្មវិធីរូបនេះបានបន្តថា៖ «ជាមួយគ្នានេះដែរ នាងខ្ញុំគ្រាន់តែចង់ចែករំលែក នូវសារដាស់ស្មារតីមួយចំណែកតូចនេះ ទៅដល់ស្រ្តីទាំងឡាយដែលមានវ័យស្របាលៗនឹងខ្ញុំកាលពី ៨ ឆ្នាំមុន ជាស្ថានភាពពិបាកប្រហាក់ប្រហែលគ្នា នៅក្នុងការសម្រេចចិត្តព្រោះតែមានវ័យខ្ចីគំនិត។ ជាពិសេសនោះ នៅពេលស្រ្តីយើងមានកូនដំបូង សុំកុំសម្រេចចិត្តខុសដោយមិនព្រមរក្សាទុក្ខនូវសាច់ឈាមរបស់ខ្លួនអី។ ដូចជារូបខ្ញុំអ៊ីចឹង បានសម្រេចចិត្តរក្សាកូនប្រុសច្បង Samuel Elson Bowser ឥឡូវនេះ ខ្ញុំបានចង់ចាំថ្ងៃកំណើតរបស់គេ ហើយក៏សប្បាយចិត្តក្នុងនាមជាម្តាយមួយដែលរូបស្រឡាញ់កូន»។ យ៉ាងណាមិញ ពិធីការិនីដែលល្បីទាំងការងារលើឆាក និងបានធ្វើឲ្យមហាជនចាប់អារម្មណ៍ទាំងលើខ្សែជីវិតគូរបស់នាងដែរនោះ អ្នកនាង ខៀវ សានសាណា ក៏បានសំណូមពរដល់ស្រ្តីគ្រប់រូបដែលបានសម្រេចចិត្តរៀបការរួចហើយ ក៏ត្រូវត្រៀមចិត្តទទួលយកនូវការគិតដ៏ត្រឹមត្រូវ និងមានស្មារតីរឹងមាំរបស់ខ្លួនផងដែរ៕
![](https://i0.wp.com/www.lareine.com.kh/wp-content/uploads/2017/04/sana-300x200.jpg?resize=411%2C274&ssl=1)
![](https://i0.wp.com/www.lareine.com.kh/wp-content/uploads/2017/04/sana1-300x200.jpg?resize=417%2C278&ssl=1)