ខ្សែប្រយុទ្ធដ៏មានឥទ្ធិពល Neymar បានបង្ហាញពីស្នាមញញឹមដ៏រីករាយ និងបានជជែកលេងជាមួយនឹងលោក Jackie Chan (ឈិន ឡុង) តាមរយៈកម្មវិធី FaceTime។ ខ្សែប្រយុទ្ធអន្តរជាតិប្រេស៊ីលរូបនេះ បានជួបជាមួយនឹងលោក Jaycee Chan ដែលជាកូនប្រុសបង្កើតរបស់តារាសម្តែងដ៏ល្បី Jackie Chan ហើយ Neymar បានស្នើសុំថា តើ Jackie អាចបញ្ជូនការឱបរឹតដ៏កក់ក្តៅមួយទៅកាន់ឪពុករបស់ខ្លួន បានដែរឬទេ?។
![](https://i0.wp.com/www.lareine.com.kh/wp-content/uploads/2017/08/Neymar-in-China.jpg?resize=696%2C463&ssl=1)
អ្នកទាំងពីរបានបង្ហោះរូបរបស់ខ្លួននៅលើបណ្តាញសង្គម Instagram ខណៈដែល Neymar បានបង្ហោះរូប Selfie ជាមួយនឹងលោក Jaycee និងរូបថតដែលបង្ហាញពីរូបគេកំពុងតែជជែកជាមួយនឹងលោក Jackie Chan។ Neymar ហាក់ដូចជាស្ថិតក្នុងអារម្មណ៍ដ៏រីករាយ បើទោះបីមានពាក្យចចាមអារ៉ាមជាច្រើនទាក់ទងនឹងអនាគតរបស់គេក៏ដោយ ខណៈដែលតារាឆ្នើមរបស់ក្លិប Barcelona រូបនេះ ត្រូវបានរំពឹងទុកថា នឹងត្រូវទៅត្រួតពិនិត្យសុខភាពរបស់គេនៅឯក្លិប PSG នៅត្រឹមសប្តាហ៍នេះ។
ក្លិបយក្ស Paris Saint-Germain របស់បារាំងពោរពេញដោយការជឿជាក់ថា ការផ្ទេររបស់ Neymar នឹងត្រូវកើតឡើងនៅត្រឹមសប្តាហ៍នេះ ក្រោយពីពួកគេបានរៀបចំផែនការជាច្រើនមុននឹងធ្វើការប្រកាសពីការចុះហត្ថលេខាជាមួយរូបគេ និងក្លិប Barcelona ក្នុងតម្លៃខ្លួន222លានអឺរ៉ូ (ស្មើនឹង262.5លានដុល្លារអាមេរិក) ដែលជាតម្លៃទិញរំលាយកិច្ចសន្យារបស់តារាឆ្នើមរូបនេះ។
![](https://i0.wp.com/www.lareine.com.kh/wp-content/uploads/2017/08/Neymar-JR.jpg?resize=696%2C464&ssl=1)
កុងត្រារយៈពេល 5ឆ្នាំត្រូវបានរៀបចំរួចជាស្រេចអស់រយៈពេលជាច្រើនថ្ងៃមកហើយ និងរង់ចាំតែការចុះហត្ថលេខារបស់ខ្សែប្រយុទ្ធអន្តរជាតិប្រេស៊ីលរូបនេះប៉ុណ្ណោះ។ ខ្សែប្រយុទ្ធវ័យ25ឆ្នាំរូបនេះ កាលពីថ្ងៃចន្ទ បានស្ថិតក្នុងប្រទេសចិន ដើម្បីធ្វើការផ្សព្វផ្សាយឲ្យម្ចាស់ឧបត្ថម្ភមួយរបស់គេ ហើយអាចនឹងធ្វើដំណើរចេញពីទីនោះទៅកាន់ទីក្រុងដូហាដើម្បីជួបជាមួយនឹងម្ចាស់កម្មសិទ្ធិក្លិប PSG និងដើម្បីត្រួតពិនិត្យសុខភាព។
ក្លិបយក្សរបស់បារាំងមួយនេះកំពុងតែខិតខំព្យាយាមយ៉ាងខ្លាំងអស់រយៈពេល2សប្តាហ៍មកហើយ ដើម្បីបំពេញការផ្ទេរមួយនេះ ចាប់តាំងពី Neymar បានធ្វើការទាក់ទងជាមួយពួកគេ ដោយដឹងថា កីឡាកររូបនេះចង់ចាកចេញពីក្លិប Barcelona៕
ប្រភពពី៖ The Sun