អ្នកគ្រប់គ្នាសុទ្ធតែបានឃើញរូបសញ្ញានៃក្រសួងអប់រំ យុវជន និងកីឡា ដែលមាននៅគ្រប់សៀវភៅសិក្សារបស់ក្រសួង សាលារៀន និងទីកន្លែងសំខាន់ៗជាច្រើនទៀត រួមទាំងនៅក្នុងបណ្តាញទំនាក់ទំនងសង្គមថែមទៀតផង តែមានមនុស្សជាច្រើនមិនទាន់បានដឹងថារូបសញ្ញានេះមានអត្ថន័យយ៉ាងណានោះទេ។
ទន្ទឹមនឹងនេះក៏មិនទាន់មានមនុស្សច្រើនប៉ុន្មានទេដែលដឹងពីប្រវត្តិនៃការកកើតរូបសញ្ញានេះ ថាកើតឡើងនៅពេលណា ហើយផ្នែកនីមួយៗនៅក្នុងរូបសញ្ញានេះបង្កប់អត្ថន័យអស្ចារ្យអ្វីខ្លះ?
តាមរយៈទស្សនាវដ្តីគ្រូបង្រៀនលេខ 1 ដែលសរសេរដោយលោក យ៉ង់ ធី បានបង្ហាញថា ក្រសួងអប់រំ យុវជន និងកីឡា មានសញ្ញាសម្គាល់ផ្ទាល់ខ្លួនតាំងពីឆ្នាំ 1948 ដែលសញ្ញានេះកើតឡើងដោយព្រះរាជក្រឹត្យលេខ 13 ស.ន ចុះថ្ងៃទី20 ខែមករា ឆ្នាំ1948។ អត្ថន័យនៃរូបសញ្ញានេះ ត្រូវបានគេកំណត់ និងបង្ហាញពីខ្លឹមសារដែលបានស្នើសុំប្រើប្រាស់ជាថ្មីនៅថ្ងៃទី 30 ខែធ្នូ ឆ្នាំ1993 ដោយក្រសួងអប់រំបានបែងចែកជាផ្នែកៗដូចជា៖
– រូបសញ្ញាមានរង្វង់មូលព័ទ្ធជុំវិញដោយក្បាច់ភ្ញីទេសពណ៌មាស ជាតំណាងឱ្យវប្បធម៌ខ្មែរ និងជានិមិត្តរូបស្រទាប់យុវជនកំពុងសិក្សាអប់រំ ដែលមានការរីកចម្រើនលូតលាស់ជាផ្កា ជាផ្លែ របស់ប្រទេសជាតិទៅអនាគត ។
– នៅចំកណ្ដាលពីលើកម្រងផ្កាក្បាច់ភ្ញីទេស មានកងរង្វង់មូលទ្រភ្លើងពណ៌មាស ជានិមិត្តរូបវិស័យកីឡា ដែលមានយុវវ័យជាអ្នកទ្រទ្រង់ និងបន្តវេន ។
– នៅលើផ្ទៃសញ្ញា មានកាំរស្មីពណ៌មាសចាំងបំភ្លឺគ្រប់ទិសទីលើផ្ទៃពណ៌ផ្ទៃមេឃ ជាពន្លឺនៃវិជ្ជាអប់រំ សតិបញ្ញា ស្មារតីដល់ប្រជាពលរដ្ឋខ្មែរទូទាំងព្រះរាជាណាចក្រកម្ពុជា ។
– ក្រណាត់ខ្សែបូ ពណ៌ផ្ទៃមេឃដែលមានចារឹកអក្សរពណ៌មាសក្រសួងអប់រំ យុវជន និងកីឡា ទ្រពីក្រោមជានិមិត្តរូបវិស័យអប់រំសិក្សា ដែលមានទំនាក់ទំនងជាមួយអន្តរជាតិ៕
![](https://scontent-kut2-1.xx.fbcdn.net/v/t1.0-9/20258387_1856364631056809_1569457706400538195_n.png?oh=1b9a3e32a9c9223fccd8d57e322237d2&oe=5A37C162)
![](https://scontent-kut2-1.xx.fbcdn.net/v/t1.0-9/20258223_1856364701056802_8695528142440942006_n.jpg?oh=5dde5caeca8563030c361e9093000972&oe=5A063597)
![](https://scontent-kut2-1.xx.fbcdn.net/v/t1.0-9/20246154_1856364654390140_4412837333495561987_n.jpg?oh=7774dd52e1978768e56d1dedaa94b1c4&oe=59EE81DF)
![](https://scontent-kut2-1.xx.fbcdn.net/v/t1.0-9/20431617_1856364641056808_1804241468247234450_n.jpg?oh=d88ec445cab060fa5181e3a8dcff7a80&oe=59F2517B)
![](https://scontent-kut2-1.xx.fbcdn.net/v/t1.0-9/20293101_1856364731056799_5651286797430730500_n.jpg?oh=1acb7618d6040983217dbaac70901e2f&oe=59F9B881)
![](https://scontent-kut2-1.xx.fbcdn.net/v/t1.0-9/20430135_1856364761056796_2423104686578721847_n.jpg?oh=2486acdad657fc99143c43d2070a82d8&oe=5A046E79)