![Nokia Smartphones ZEISS Optics](https://lareine.com.kh/wp-content/uploads/2017/07/1-1.jpg)
កាលពីឆ្នាំ 2004 ក្រុមហ៊ុន Nokia បានធ្វើការសហការជាមួយនឹងក្រុមហ៊ុន Carl Zeiss AG របស់អាល្លឺម៉ង់ ដោយនាំយកបច្ចេកវិទ្យាកាមេរ៉ា Carl Zeiss optic ដ៏ទំនើបមកបំពាក់លើទូរស័ព្ទ N Series ហើយ 8ឆ្នាំក្រោយមក ក្រុមហ៊ុនក៏នាំយកកាមេរ៉ានេះមកបំពាក់លើទូរស័ព្ទស៊េរី Lumia ដោយបន្ថែមនូវបច្ចេកវិទ្យាកាមេរ៉ា PureView ហើយឆ្នាំ 2017 នេះ ក្រុមហ៊ុនទាំង 2 បានធ្វើការសហការគ្នាម្ដងទៀត សម្រាប់បំពាក់លើស្មាតហ្វូន Android ថ្មីរបស់ Nokia ក្រោមការដឹកនាំពីក្រុមហ៊ុន HMD Global។
ការវិលរកមិត្តចាស់នេះដោយសារ Nokia ចង់បង្កើតប្រវត្តិសាស្រ្ដថ្មីម្ដងទៀត ក្រោមកិច្ចសហប្រតិបត្តិការក្នុងភាពជាដៃគូលើការអភិវឌ្ឍរួមគ្នារយៈពេលវែងនូវស្តង់ដារនៃរូបភាពថ្មីក្នុងឧស្សាហកម្មស្មាតហ្វូន ដែលនឹងនាំយកនូវកាមេរ៉ា Hardware លំដាប់អាជីពឈានមុនគេសម្រាប់ស្មាតហ្វូន Nokia Android។
HMD និង Zeiss មិនបានបញ្ជាក់លម្អិតអំពីផលិតផលអ្វីដែលពួកគេនឹងអភិវឌ្ឍ ឬក៏ប្រភេទបច្ចេកវិទ្យាថ្មីៗទាំងនោះទេ ប៉ុន្តែតាមការសន្និដ្ឋាន ក្រុមហ៊ុនចង់បង្កើតប្រវត្តិសាស្រ្ដម្ដងទៀតដូចកាលស៊េរីទូរស័ព្ទ Nokia Lumia 1020 ដែលមានកាមេរ៉ាទំហំ 41MP ដ៏ល្បីល្បាញក្នុងពិភពលោក៕