នាថ្ងៃទី ២៩ ដល់៣០ ខែមេសា នេះ ក្រុមហ៊ុន ខ្មែរ ប៊ែវើរីជីស នឹងរៀបចំ ព្រឹត្តិការណ៍ជិះកង់ Run & Ride សប្បុរសធម៌ដើម្បីកម្ពុជា ដើម្បីរក ថវិកា ទៅបរិច្ចាគសម្រាប់ការជួយកែលម្អហេដ្ឋារចនាសម្ព័ន្ធសាលារៀនតាមខេត្តដែលខ្វះខាត។
![](https://i0.wp.com/www.lareine.com.kh/wp-content/uploads/2017/04/17626515_1297386510316139_7540279108240115880_n.jpg?resize=696%2C441&ssl=1)
គ្រូបបង្វឹកកីឡាប្រណាំងកង់ជម្រើសជាតិកម្ពុជា លោក អេង លីនបានឱ្យដឹងថា កម្មវិធី Run & Ride នេះនឹងទាក់ទាញចំណាប់អារម្មណ៍មហាជនបានច្រើន ជាពិសេសក្លឹបអ្នកជិះកង់ផ្សេងៗ ព្រោះអ្នកជិះកង់ជាច្រើននឹងមកជួបគ្នាសាកល្បងសមត្ថភាព។ ព្រឹត្តិការណ៍នេះ មិនត្រឹមតែប្រណាំងកង់សប្បាយហើយនោះទេ គឺយើងបានចូលរួមធ្វើការងារសង្គមដ៏ល្អមួយ គឺចូលរួមរៃអង្គាសថវិកា ជួយ ទៅដល់សាលារៀនបាក់បែកខូចខាត ដែលត្រូវការជំនួយពីយើង។
![](https://i0.wp.com/www.lareine.com.kh/wp-content/uploads/2017/04/17757186_864807450337858_2416497541687189053_n.jpg?resize=696%2C392&ssl=1)
កាលពីខែធ្នូ ឆ្នាំ២០១៦កន្លងទៅ មានព្រឹត្តិការប្រណាំងកង់ «ជិះកង់ដើម្បីកុមារ» នៅខេត្តសៀមរាប ដែលទាក់ទាញអ្នកចូលរួមបានជាច្រើនរយនាក់ ហើយកម្មវិធីនោះក៏ត្រូវបានឧបត្ថម្ភធំដោយក្រុមហ៊ុន ខ្មែរ ប៊ែវើរីជីស នេះផងដែរ។
គួបញ្ជាក់ផងដែរថា កម្មវិធីនេះចែកចេញជាពីរវិញ្ញាសាកីឡា គឺប្រណាំងកង់ចម្ងាយ ១០០គីឡូម៉ែត្រ តាមផ្លូវជាតិលេខ៦A ពីក្រុងភ្នំពេញឆ្ពោះទៅខេត្តកំពង់ចាម នៅថ្ងៃសៅរ៍ ទី២៩ ខែមេសា និងរត់ពាក់កណ្ដាលម៉ារ៉ាតុង ក្នុងទីក្រុងភ្នំពេញ នៅថ្ងៃអាទិត្យ ទី៣០ ខែមេសា។ វិញ្ញាសាទាំងពីរនឹងចេញដំណើរពីមុខសាលមហោស្រពកោះពេជ្រ៕