ភ្នំពេញៈ ដោយសារធ្លាប់លេចឮរលកព័ត៌មានល្ហៀងៗថា មានកន្លង់ទាំងចាស់ក្មេងប្រមាណ ៤ ឬ ៥ នាក់កំពុងតែ ចោមរោមប្រជែងដាក់ពាក្យសុំធ្វើជាម្ចាស់បេះដូងមិនទាន់បង្ហាញមុខច្បាស់ និងស្របពេលចូលឆ្នាំថ្មីនេះ ឃើញតារាសម្តែងបបូរមាត់សិចស៊ី ម៉ាក់ សែនសូនីតា ហៅកញ្ញា តូតា បានបង្ហោះរូបរថយន្តទំនើបទៅវត្តទៀតនោះ ក៏បង្កើតជារឿងចម្ងល់សួរដេញដោលគ្នាបែបខ្សិបខ្សៀវថា ទំនងម្ចាស់រថយន្តទំនើបម៉ាក Lexus 570 គេជូននាងជាកាដូបញ្ចាំងចិត្តស្នេហ៍ទេដឹង? តែតារាសម្តែងស្រីស្រស់ រាងតូចច្រឡឹងសម្រស់នៅចាំទើបមានវ័យ ២៣ ឆ្នាំ ដែលទើបតែបានវិលត្រឡប់ពីថតកុនក្រៅប្រទេសឲ្យផលិតកម្មមួយសុំមិនបង្ហើបប្រាប់ កញ្ញា ម៉ាក់ សែនសូនីតា ក៏បកស្រាយទាំងឆ្ងល់ថា៖ «នាងខ្ញុំបានទិញរថយន្តម៉ាក Lexus 570 ពីពេលណាមកបង? អត់មានទេ!នាងខ្ញុំមានតែរថយន្តធ្លាប់ជិះយូរមកហើយម៉ាក Land Cruiser ស៊េរីឆ្នាំ២០០៩ ពណ៌ខ្មៅប៉ុណ្ណោះ»។
![](https://i0.wp.com/www.lareine.com.kh/wp-content/uploads/2017/04/Mak-Sensonita.6.jpg?resize=696%2C803&ssl=1)
![](https://i0.wp.com/www.lareine.com.kh/wp-content/uploads/2017/04/Mak-Sensonita.5.jpg?resize=696%2C928&ssl=1)
មើលទៅតារាស្រីដែលគេបានឃើញសម្បូរដំណើរកម្សាន្តលម្ហែកាយនៅឯប្រទេសម្ចាស់មហាកំពែងចិន សមុទ្រខ្សាច់អារ៉ាប់ និងបានបង្ហោះដុំដុល្លារច្រើនសន្ធឹកសន្ធាប់សម្ញែងធ្វើឲ្យភ្ញាក់ផ្អើលទៅដល់មហាជន តាមបណ្ដាញអ៊ីនស្តាក្រាម ពេលកន្លងមក ហាក់ដូចជាមានការស្រឡាញ់ពេញចិត្តរថយន្តម៉ាក Land Cruiser ស៊េរីឆ្នាំ២០០៩ នោះណាស់ ដោយបានបន្តទៀតថា៖ «ហើយនាងខ្ញុំក៏មិនមានបំណងចង់ដូរដោះម៉ាកស៊េរីអ្វីផ្សេងទេព្រោះថា រថយន្តនេះធ្លាប់ជិះយូរហើយដែរ និងម្យ៉ាងទៀតជារថយន្តប្រើប្រេងម៉ាស៊ូតទៀតផងមិនសូវចំណាយខ្ពស់ដូចសាំង»។
![](https://i0.wp.com/www.lareine.com.kh/wp-content/uploads/2017/04/Mak-Sensonita.7.jpg?resize=696%2C522&ssl=1)
![](https://i0.wp.com/www.lareine.com.kh/wp-content/uploads/2017/04/Mak-Sensonita.3.jpg?resize=696%2C928&ssl=1)
បើតាមការប្រមាញ់មើល និងតាមដានមើលពីសំណាក់មហាជននោះឃើញថា តារាសម្តែងស្រីនៅតែមានសម្រស់ស្រស់ស្អាត មិនជ្រេតាមវ័យ ម៉ាក់ សែនសូនីតា ហៅ តូតា គឺមានរាសីឡើងក្រឺតៗ ក្នុងការងារសិល្បៈទាំងការថតស្ប៉តពាណិជ្ជកម្ម និងសម្តែងកុនមិនចេះដាច់ឡើយ។ ក្រៅពីរឿងកុនភាគចំនួនពីរ ដែលមួយថតរបស់ផលិតករជាតារាសម្តែងដែរគឺលោក សុវណ្ណ មករា ដែលមានជាង ៤០ ភាគ មានចំណងជើងថា «បញ្ចប់ស្នេហ៍ត្រឹមអូន» និងកុនភាគទី ២ សុំលាក់ចំណងជើងសិន ប្រហែលជាមានជាង ៤០ ភាគដែរ ថតសម្រាប់ចាក់បញ្ចាំងនៅឯប៉ុស្តិ៍ទូរទស្សន៍ PNN និងនៅពេលថ្មីៗនេះនាងក៏ទើបតែបានចុះកុងត្រាមួយផ្សេងទៀតផងដែរ។
![](https://i0.wp.com/www.lareine.com.kh/wp-content/uploads/2017/04/Mak-Sensonita.jpg?resize=696%2C464&ssl=1)
![](https://i0.wp.com/www.lareine.com.kh/wp-content/uploads/2017/04/Tota-4.jpg?resize=696%2C951&ssl=1)
តារាសម្តែង និងតារាម៉ូដែលល្បីឈ្មោះទាំងវ័យក្មេងកញ្ញា ម៉ាក់ សែនសូនីតា បង្ហើបប្រាប់ថា៖ «ទើបតែបានចុះកុងត្រាថ្មីថតកុនមួយទៀត ដែលនាងខ្ញុំទើបទៅថតនៅក្រៅប្រទេស តែសុំលាក់ផលិតកម្ម និងចំណងជើងរឿងសិនដែរព្រោះថា នាងខ្ញុំនៅទើបចាប់ផ្តើមថត។ ចាំថតបានប្រហែលជា ១០ ទៅ ២០ ភាគរយ នឹងបង្ហើបប្រាប់មហាជនមិនខានឡើយ»។ តារាស្រីបបូរមាត់សិចស៊ីកញ្ញា តូតា ក៏ធ្លាប់បានថ្លែងក្នុងរបៀបដាក់ខ្លួនមិនចង់ទទួលស្គាល់យកពីភាពជោគជ័យក្នុងវិស័យភាពយន្ត និងមានទីផ្សារច្រើននោះឡើយដែរថា៖ «អរគុណមហាជនដែលសរសើរ! តែនាងខ្ញុំដូចជាមិនសូវកាក់កបខ្លាំងអ្វីប៉ុន្មាននោះទេសម្រាប់ភាពយន្ត តែមានការផ្សំគ្នាថតកុន និងថតស្ប៉តផ្សាយពាណិជ្ជកម្ម ទើបនាងខ្ញុំមានការមមាញឹកខ្លាំងនាពេលកន្លងមក»៕
![](https://i0.wp.com/www.lareine.com.kh/wp-content/uploads/2017/04/Tota.jpg?resize=696%2C928&ssl=1)
![](https://i0.wp.com/www.lareine.com.kh/wp-content/uploads/2017/04/Tota-5.jpg?resize=696%2C696&ssl=1)