បើយោងទៅតាមមន្ត្រីប៉ូលិសនៅថ្ងៃអង្គារនេះ សន្តិសុខនឹងត្រូវរឹតបន្តឹង ខណៈដែលក្រុមម្ចាស់ផ្ទះ Paris Saint-Germain នឹងសម្លឹងរកការដណ្តើមយកជ័យជម្នះលើក្រុម Monaco ម្តងទៀត ក្នុងការប្រកួតពាន French Cup វគ្គពាក់កណ្តាលផ្តាច់ព្រ័ត្រ។
![](https://i0.wp.com/www.lareine.com.kh/wp-content/uploads/2017/04/PSG-v-Monaco.jpg?resize=690%2C460&ssl=1)
វិធានការអង្កេតយ៉ាងពិសេស នឹងត្រូវអនុវត្តនៅជុំវិញកីឡដ្ឋាន Parc des Princes របស់ក្រុម PSG ក្នុងនោះរាប់បញ្ចូលទាំងការបន្ថែមការត្រួតពិនិត្យពិសេសបន្ថែមលើផ្នែកសន្តិសុខសម្រាប់អ្នកថ្មើរជើង និងរថយន្តផងដែរ។ ការរឹតបន្តឹងនេះកើតឡើង ក្នុងរយៈពេលតិចជាង១សប្តាហ៍ បើគិតចាប់តាំងពីប៉ូលិសម្នាក់ត្រូវបានសម្លាប់ក្នុងការវាយប្រហារបែបភេវរកម្មមួយក្នុងទីក្រុងប៉ារីស។ PSG បានបំបាក់ក្រុម Monaco យ៉ាងចាស់ដៃក្នុងលទ្ធផល ៤-១ កាលពីដើមខែមេសានេះ ដើម្បីឈ្នះពាន League Cup របស់បារាំង ហើយស្របពេលដែលក្រុម Monaco ផ្តោតអារម្មណ៍តែទៅលើការប្រកួតពានក្របខ័ណ្ឌអឺរ៉ុប និង Ligue 1 ក្រុម PSG របស់លោក Unai Emery នឹងមានឱកាសដ៏ល្អម្តងទៀតក្នុងការប្រកួតពាន French Cup វគ្គពាក់កណ្តាលផ្តាច់ព្រ័ត្រ នៅរាត្រីនេះ។
![](https://i0.wp.com/www.lareine.com.kh/wp-content/uploads/2017/04/Monaco-and-PSG.jpg?resize=696%2C464&ssl=1)
ខ្សែបម្រើស្លាប Angel Di Maria របស់ PSG បានបង្ហាញទម្រង់លេងយ៉ាងល្អសម្រាប់ឆ្នាំ២០១៧ ខណៈដែលខ្សែបម្រើអន្តរជាតិអាហ្សង់ទីនរូបនេះ បានស៊ុតបាល់បញ្ចូលទី១៧គ្រាប់ក្នុងការប្រកួត១៨លើក បើគិតចាប់តាំងពីដើមឆ្នាំនេះ។ ខ្សែបម្រើស្លាបអន្តរជាតិអាហ្សង់ទីនរូបនេះ ដែលបានរកគ្រាប់បាល់បញ្ចូលទី១គ្រាប់ និងជួយឲ្យមិត្តរួមក្រុមខ្លួនរកបាន២គ្រាប់ផ្សេងទៀតក្នុងជំនួបរវាងក្រុមទាំងពីរកាលពីថ្ងៃទី១ ខែមេសានោះ បានប្រាប់គេហទំព័ររបស់ PSG ថា៖ «អំឡុងការប្រកួតពាន League Cup វគ្គផ្តាច់ព្រ័ត្រ យើងមានភាពខ្លាំង១០០ភាគរយ។ យើងបានលេងការប្រកួតដ៏ល្អឥតខ្ចោះ ហើយវាការប្រកួតដ៏អស្ចារ្យមួយ»។ Di Maria បានបន្ថែមទៀតថា៖ ក្នុងពេលប្រកួតជាមួយនឹងក្រុម Monaco ក្នុងវគ្គពាក់កណ្តាលផ្តាច់ព្រ័ត្រ យើងត្រូវតែបង្ហាញពីទម្រង់លេងដ៏ល្អឥតខ្ចោះនោះម្តងទៀត។ ការប្រកួតនេះនឹងចាប់ផ្តើមនៅម៉ោង ២:០៥ទៀបភ្លឺ៕
ការជួបគ្នា៣លើកចុងក្រោយរវាងក្រុមទាំងពីរ
02.04.17 Monaco 1-4 Paris SG
30.01.17 Paris SG 1-1 Monaco
29.08.16 Monaco 3-1 Paris SG