ក្លិប Bayern Munich បានចុះហត្ថលេខាជាមួយនឹងខ្សែបម្រើអន្តរជាតិបារាំងដ៏មានឥទ្ធិពល Corentin Tolisso សម្រាប់តម្លៃខ្លួនជាកំណត់ត្រាក្នុងក្របខ័ណ្ឌ Bundesliga ដែលមានចំនួន 41.5លានអឺរ៉ូ (ស្មើនឹង 46.8លានដុល្លារអាមេរិក) ពីក្លិប Lyon កាលពីថ្ងៃពុធ។
Bayern បានឲ្យដឹងថា Tolisso វ័យ 22ឆ្នាំ បានចុះហត្ថលេខាលើកិច្ចសន្យារយៈពេល 5ឆ្នាំ ស្របពេលដែលក្លិប Lyon បានប្រកាសពីតម្លៃខ្លួននៃការផ្ទេរនេះ និងបានបញ្ជាក់ថា ការបន្ថែមប្រាក់ឧបត្ថម្ភផ្សេងៗ អាចនឹងធ្វើឲ្យតម្លៃខ្លួនរបស់ Tolisso កើនឡើងក្នុងទឹកប្រាក់ 6លានអឺរ៉ូ បន្ថែមទៀត។
![](https://i0.wp.com/www.lareine.com.kh/wp-content/uploads/2017/06/Tolisso-signs-for-Bayern.jpg?resize=696%2C445&ssl=1)
Tolisso បានប្រាប់គេហទំព័ររបស់ក្លិបនេះថា៖ «ខ្ញុំមានពេលវេលាដ៏អស្ចារ្យជាមួយនឹងក្លិប Lyon ហើយខ្ញុំពិតជាថ្លែងអំណរគុណចំពោះពេលវេលានោះ។ ខ្ញុំពិតជារីករាយណាស់ក្នុងការស្ថិតនៅក្នុងក្លិបមួយក្នុងចំណោមក្លិបដ៏ខ្លាំងបំផុតនៅអឺរ៉ុប។ ខ្ញុំមានគោលបំណងដ៏អស្ចារ្យសម្រាប់ពេលវេលារបស់ខ្ញុំនៅឯ FC Bayern នេះ។ ថ្ងៃនេះគឺជាថ្ងៃដ៏អស្ចារ្យមួយសម្រាប់ខ្ញុំ»។ Tolisso ដែលបានចូលរួមជាមួយនឹង Lyon តាំងពីមានវ័យ 13ឆ្នាំនោះ បានធ្វើការបង្ហាញខ្លួនជាលើកដំបូងរបស់គេក្នុងក្រុមឈុតធំ កាលពីឆ្នាំ 2013 និងបានបន្តលេងរហូតបានដល់ទៅ 60ប្រកួត ក្នុងនោះរាប់បញ្ចូលទាំងការប្រកួត32លើកក្នុងក្របខ័ណ្ឌ Champions League និង Europa League ផងដែរ ដោយបានស៊ុតបាល់បញ្ចូលទី29គ្រាប់។ រូបគេក៏ជាគោលដៅមួយសម្រាប់ក្លិប Chelsea ផងដែរ។
លោក Karl-Heinz Rummenigge ប្រធានក្លិប Bayern បានឲ្យដឹងថា៖ «យើងពិតជារីករាយណាស់ដែលយើងអាចចុះហត្ថលេខាជាមួយនឹងកីឡាករវ័យក្មេងម្នាក់ និងជាកីឡាករដ៏គួរឲ្យចាប់អារម្មណ៍ម្នាក់ នៅមុនពេលយុទ្ធនាការដ៏ស្វិតស្វាញមួយ។ Corentin Tolisso គឺជាគោលដៅរបស់លោកគ្រូបង្វឹក Carlo Ancelotti សម្រាប់តំបន់បម្រើរបស់យើង»៕
ប្រភពពី៖ FOXSports