នៅទីបំផុតតារាចម្រៀង បញ្ញាសិទ្ឋិ បានវិលមកដល់មាតុភូមិកំណើតវិញហើយបន្ទាប់ពីលោកចាកចេញទៅសម្តែងនៅប្រទេសអូស្ត្រាលី។ ការមកកម្ពុជាវិញគឺមុនកំណត់ដើម្បីឱ្យគេដឹងច្បាស់ថា លោកមិនបានរត់ទៅណាគេចទៅណាដូចការលើកឡើងឡើយ។
ដំណើរមកស្រុកកំណើតវិញគឺ លោកបញ្ចប់ការសម្តែងនៅអូស្ត្រាលីហើយបន្តទៅញ៉ូហ្សឺឡែន១ខែ ត្រូវលោករំសាយដោយសារមានរឿងមិនសប្បាយចិត្ត វាយប្រហារលោកថាគេចពីបញ្ហាមិនព្រមសងបំណុលម្ចាស់ក្លិបល្បីមួយឱ្យដាច់ស្រេច។ មូលហេតុនេះហើយទើបលោកវិលមកឱ្យគេជឿជាក់ថា លោកមិនមានបំណងដើរហើរចោលស្រុកដូចការបំពុលព័ត៌មាន។
តបតាមសារអេឡិចត្រូនិច បញ្ញា សិទ្ឋិ ឱ្យដឹងថា រឿងលុយបំណុលនៅជាមួយក្លិបមួយលោកបានដោះស្រាយសងបញ្ចប់រួចរាល់ច្រើនថ្ងៃមកហើយក្នុងចំនួនទឹកប្រាក់ 2715.80$ ទៅកាន់ក្រុមហ៊ុន sound club ដោយលោកបានចរចារអស់ហើយ។ លោកសូមឱ្យព័ត៌មានដែលមិនទាន់ជ្រាបមេត្តាទទួលដឹងឭផងហើយការណ៍ដែលទាក់ទងលោកមិនបានព្រោះលោកជាប់ភារៈសម្តែងមិនបានទទួលទូរស័ព្ទ។ លោកមានបញ្ហាថវិកាក៏ដោយសារតែងាកមកចំណាយថ្លៃព្យាបាលម្តាយ ហើយក៏មិនរត់គេចដែរដោយខំរកលុយដល់ស្រុកគេដោះឱ្យអស់ព្រោះលោកមានកិត្តិយសក្នុងសង្គមដែរ។ លោកសង្ឃឹមថាបងប្អូនទាំងអស់ជ្រាបដំណឹងផងហើយមេត្តាស្ងប់នឹងអ្នកដែលជាន់ពន្លិចលោកសូមទទួលដឹងផង។
តាមដំណឹងបញ្ញា សិទ្ឋិ ទទួលការងារសិល្បៈភ្លាមៗមិនសម្រាកនោះទេ ដើម្បីរកប្រាក់បន្តទៀត ហើយក្នុងសប្តាហ៍នេះលោកចេញទៅថៃដើម្បីបំពេញភារៈចាំបាច់មួយផងដែរ៕
