កាលពីរាត្រីថ្ងៃទី11 ខែមិថុនា ឆ្នាំ2017 គឺជារាត្រីចុងក្រោយនៃការប្រគំតន្រ្តីរបស់ក្រុមតារាចម្រៀងប្រុស 2PM ជាជំនួបជាមួយអ្នកគាំទ្រ គឺនៅក្នុងពេលនោះហើយ ដែលសមាជិក្នុងក្រុម គឺលោក Taec Yeon បានបង្ហើបប្រាប់ដល់អ្នកគាំទ្ររបស់លោកថា នៅពេលយើងបែកគ្នា បើអ្នកទាំងអស់គ្នានឹកខ្ញុំ គ្រាន់តែមើលទូរទស្សន៍ទៅបាត់នឹកហើយ។
ជាឱកាសល្អក្នុងការផ្សព្វផ្សាយពីរឿងភាគថ្មីក្នុងទូរទស្សន៍របស់តារាប្រុស Taec Yeon ដែលពេលនោះលោកបានប្រាប់ទៅអ្នកគាំទ្រថា “បើពិតជានឹកខ្ញុំមែន គឺគ្រាន់តែទស្សនារឿងភាគថ្មី ដែលមានចំណងជើងថា “Save Me” ដែលនឹងចាក់បញ្ចាំងនៅលើកញ្ចក់ទូរទស្សន៍នារដូវក្ដៅនេះទៅ នឹងបាត់នឹកខ្ញុំហើយ” ។ នៅពេលនោះ Taec Yeon បានបញ្ចេញអារម្មណ៍អាឡោះអាល័យកម្សត់ចំពោះអ្នកគាំទ្រលោក ព្រមទាំងនិយាយដដែលៗទៀតថា នឹងជួបគ្នាតាមរយៈរឿងភាគនៅក្នុងកញ្ចក់ទូរទស្សន៍។
គួរបញ្ជាក់ផងដែរថា រឿងភាគថ្មីដែលមានចំណងជើងថា “Save Me” នឹងដាក់បញ្ចាំងនៅតាមកញ្ចក់ទូរទស្សន៍ប៉ុស្ដិ៍ OCN នៅក្នុងខែសីហាខាងមុខនេះ និងសូមរំឭកបន្តិចផងដែរថា នៅក្នុងរឿងខាងលើនេះ Taec Yeon ត្រូវបានសម្ដែងជាតួឯកប្រុស គូគ្នាជាមួយតួឯកស្រី Seo Ye Ji រួមទាំងតារាល្បីៗជាច្រើនរូបទៀត ដូចជា Woo Do Hwan, Jo Sung Ha, Park Ji Young, Jo Jae Yoon ជាដើម៕
