ក្រុម Atletico Madrid និង Manchester City សុទ្ធសឹងបានជួបភាពរីករាយដូចគ្នាក្នុងការប្រកួតក្របខ័ណ្ឌ Champions League វគ្គ 16ក្រុមចុងក្រោយ ជើងទី1 កាលពីថ្ងៃពុធ ក្រោយពីដណ្តើមបានជ័យជម្នះរៀងៗខ្លួន។
ខ្សែប្រយុទ្ធ Cristiano Ronaldo បានខកខានក្នុងការរកគ្រាប់បាល់បញ្ចូលទី ខណៈដែលក្រុម Atletico បានយកឈ្នះក្នុងលទ្ធផល 2-០។
ដោយឡែក ក្នុងប្រទេសអាល្លឺម៉ង់វិញ ក្រុម Schalke បានស៊ុតបាល់បញ្ចូលទី 2គ្រាប់ ដើម្បីនាំមុខ 2-1 ប៉ុន្តែគ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Leroy Sane និង Raheem Sterling បានជួយឱ្យក្រុមនៅសល់សមាជិកត្រឹមតែ 10នាក់ Man City ដណ្តើមបានជ័យជម្នះក្នុងលទ្ធផល 3-2។
![](https://i0.wp.com/www.lareine.com.kh/wp-content/uploads/2019/02/Raheem-Sterling.jpg?resize=696%2C392&ssl=1)
ក្រោយពីការរកបានគ្រាប់បាល់តាមស្មើរបស់គេ Sane បានប្រាប់ទូរទស្សន៍ DAZN ទាំងរីករាយថា៖ «ខ្ញុំបានរង់ចាំឱកាសរបស់ខ្ញុំ និងចង់ស៊ុតបាល់ពីទីនោះ ដោយសារតែខ្ញុំធ្លាប់បានស៊ុតបាល់បញ្ចូលទីពីទីតាំងនោះ ហើយវាបានរក្សាការជឿជាក់របស់យើង»។
លោក Pep Guardiola អ្នកចាត់ការទូទៅរបស់ក្រុម Man City បានឱ្យដឹងថា៖ «យើងនឹងមិនបានឈានទៅវគ្គបន្តក្នុងយុទ្ធនាការនេះឡើយ ប្រសិនបើយើងមិនកែសម្រួលការលេងឱ្យបានល្អប្រសើរឡើងទេនោះ។ ទីបំផុត Sane និង Sterling បានបង្កើតឱ្យមានការប្រែប្រួល»។
លោក Diego Simeone គ្រូបង្វឹករបស់ក្រុម Atletico បានឱ្យដឹងថា៖ «យើងមិនទាន់បានឈានទៅវគ្គបន្តនៅឡើយទេ។ នៅមានការប្រកួត 1លើកទៀតដែលត្រូវលេង ហើយយើងដឹងថា យើងនឹងត្រូវតែជួបបញ្ហា»។
![](https://i0.wp.com/www.lareine.com.kh/wp-content/uploads/2019/02/schalke-man-city.jpg?resize=696%2C464&ssl=1)
Ronaldo បានវិលទៅកាន់រដ្ឋធានីអេស្ប៉ាញវិញ ក្រោយពីរូបគេបានទទួលភាពជោគជ័យមិនធ្លាប់មានពីមុនមកក្នុងយុទ្ធនាការនេះ ជាមួយនឹងក្រុម Real ប៉ុន្តែគូប្រកួតរបស់ពួកគេគឺជាក្រុមដែលត្រូវអបអរនៅពេលបញ្ចប់ការប្រកួត ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Jose Gimenez និង Diego Godin បានជួយឱ្យក្រុម Atletico ស្ថិតលើផ្លូវឆ្ពោះទៅកាន់វគ្គបន្ត។
លោក Massimiliano Allegri គ្រូបង្វឹករបស់ក្រុម Juventus បានឱ្យដឹងថា៖ «ជាកុសល យើងមិនបានរបូតគ្រាប់បាល់ទី3 ឡើយ ព្រោះការចាញ់ 2-០ គឺជាលទ្ធផលមួយដែលអាចស្រោចស្រង់បាន។ យើងមិនទាន់ធ្លាក់ចេញនៅឡើយទេ»៕