ខ្សែភាពយន្ដថៃល្បីៗប្រចាំឆ្នាំ2017ចំនួន 5 រឿងនឹងត្រូវដាក់បញ្ចាំងជូនទស្សនាដោយឥតគិតថ្លៃ ចាប់ពីថ្ងៃទី 7 – 11 ខែមិថុនា ឆ្នាំ2017 នៅរោងភាពយន្ដទំនើប Cineplex by Cell Card ស្ថិតក្នុងផ្សារទំនើបអ៊ីអនម៉ល ។
ដើម្បីជាការអបអរសាទរក្នុងពិធីពិព័រណ៌ភាពយន្ដថៃ (Thai Film Festival) ដែលរៀបចំឡើងដោយស្ថានតំណាងពាណិជ្ជកម្មនៃស្ថានឯកអគ្គរាជទូតថៃ នឹងនាំមកនូវខ្សែភាពយន្ដថៃល្បីៗចំនួន 5 រឿងមកចាក់បញ្ចាំងជូនទស្សនា។
លោក ជីរ៉ាវុឍ សុវណ្ណអាត អគ្គទីប្រឹក្សាពាណិជ្ជកម្មប្រចាំស្ថានទូតថៃ បានលើកឡើងថា កម្មវិធីនេះបង្កើតឡើងក្នុងគោលបំណងបើកឱកាសដល់ក្រុមហ៊ុនពាក់ព័ន្ធក្នុងវិស័យឧស្សាហកម្មភាពយន្ដរបស់ប្រទេសថៃ និងកម្ពុជា ឱ្យមានការជួបជជែកពិភាក្សាគ្នាលើកិច្ចការនេះ ដើម្បីចែករំលែកបទពិសោធរវាងគ្នា និងបង្កើនកិច្ចសហការធ្វើយ៉ាងណាឱ្យវិស័យភាពយន្ដរបស់ប្រទេសទាំងពីរមានភាពរីកចម្រើនបន្ថែមទៀត។
![](https://i0.wp.com/www.lareine.com.kh/wp-content/uploads/2017/06/18902429_779718558854203_1851134133_n.jpg?resize=696%2C392&ssl=1)
ភាពយន្ដដែលនឹងត្រូវដាក់បញ្ចាំងមានចំណងជើងថា៖ ”លោកយាយអាយុ20ឆ្នាំ” “តាមប្រមាញ់ខ្មោច” ”ចំនៀន វិវៀន តួម៉ន” “ស្នេហាយើង” និងរឿង ”ព្រះតេជគុណជែស4G”។ សូមបញ្ជាក់ថា ទស្សនិកជនអាចទៅទទួលយកសំបុត្រFree ក្នុងការចូលទស្សនារឿងនីមួយៗនៅបញ្ជរមុខរោងភាពយន្ត Cineplex by Cell Card។
អគ្គទីប្រឹក្សាពាណិជ្ជកម្មប្រចាំស្ថានទូតថៃ បានបញ្ជាក់ថា កម្មវិធីពិព័រណ៌ភាពយន្តនេះធ្លាប់បានរៀបចំឡើងចំនួន 3 លើករួចមកហើយ។ នេះគឺជាលើកទី 4 ដែលស្ថានតំណាងពាណិជ្ជកម្មនៃស្ថានឯកអគ្គរាជទូតថៃ បានរៀបចំឡើង ដោយលោកសង្ឃឹមថានឹងមានការគាំទ្រខ្លាំងពីសំណាក់ទស្សនិកជនដែលនិយមទស្សនាភាពយន្ដ។ ពិសេសសង្ឃឹមថា តាមរយៈកម្មវិធីនេះនឹងបង្កើតឱ្យមានកិច្ចសហការកាន់តែមានភាពស្អិតល្មួតជាងមុនរវាងពាណិជ្ជករភាពយន្ដថៃ និងកម្ពុជា។
គួររំឭកដែរថា កាលពីឆ្នាំ2016ខ្សែភាពយន្ដថៃត្រូវបានយកមកចាក់បញ្ចាំងនៅតាមរោងភាពយន្ដនៅក្នុងប្រទេសកម្ពុជាមានចំនួន10 រឿង ហើយនាពាក់កណ្តាលដើមឆ្នាំ2017នេះ ខ្សែភាពយន្ដថៃដែលបានចាក់បញ្ចាំងនៅតាមរោងភាពយន្ដមានចំនួន 5 រឿងហើយ៕
![](https://i0.wp.com/www.lareine.com.kh/wp-content/uploads/2017/06/18902050_1316829688394171_1214528230_n.png?resize=600%2C360&ssl=1)
រឿង តាមប្រមាញ់ខ្មោច
រឿង លោកយាយអាយុ ២០ឆ្នាំ
រឿង ចំនៀក វីវៀន តូម៉ន
រឿង ស្នេហាយើង
រឿង ព្រះតេជគុណជេស 4G