ម្ចាស់ជើងឯកអូឡាំពិក Joseph Schooling បានជួយឱ្យសិង្ហបុរីឈ្នះមេដាយមាស ជាលើកទី1 ក្នុងព្រឹត្តិការណ៍ Asian Games ឆ្នាំ2018 ក្រោយពីការពារពានក្នុងការប្រកួតហែលទឹកបែបមេអំបៅចម្ងាយ 100ម៉ែត្ររបស់គេយ៉ាងជោគជ័យកាលពីយប់ថ្ងៃពុធ។
Schooling បានប្រើប្រាស់ថិរវេលា 51.04វិនាទី ដើម្បីហែលទៅដល់ទីមុនគេ ក៏ដូចជានាំមុខលើគូប្រជែងយ៉ាងប្រកៀកបំផុតនៅឯមជ្ឈមណ្ឌលហែលទឹក Gelora Bung Karno ក្នុងទីក្រុងហ្សាការតា ខណៈដែលរូបគេក៏បានបង្កើតកំណត់ត្រាថ្មីកីឡាអាស៊ីនេះផងដែរ។ កីឡាករចិន Li Zhuhao បានឈ្នះមេដាយប្រាក់ ដោយប្រើប្រាស់ថិរវេលា 51.46វិនាទី ស្របពេលដែលកីឡាករជប៉ុន Yuki Kobori បានឈ្នះមេដាយសំរឹទ្ធជាមួយនឹងថិរវេលា51,77វិនាទី។
កីឡាករ Quah Zheng Wen ដែលជាមិត្តរួមជាតិរបស់ Schooling បានបញ្ចប់ក្នុងចំណាត់ថ្នាក់លេខ4 ក្រោយពីប្រើប្រាស់ថិរវេលា52.54វិនាទី។ Schooling បានប្រើប្រាស់ថិរវេលាតិចជាងគេបំផុតក្នុងការប្រកួតវគ្គជម្រុះ កាលពីព្រឹកថ្ងៃពុធ ខណៈដែល Quah ស្ថិតក្នុងចំណាត់ថ្នាក់លេខ4 ដូចគ្នា។ មេដាយមាសនេះគឺជាមេដាយទី2 របស់ Schooling ក្នុងព្រឹត្តិការណ៍ Asian Games ឆ្នាំ2018 ក្រោយពីរូបគេបានជួយឱ្យក្រុមហែលទឹកបុរសចម្ងាយ 4x200m ឈ្នះមេដាយសំរឹទ្ធកាលពីថ្ងៃចន្ទ។
កីឡាករវ័យ 23ឆ្នាំរូបនេះ បានស្ថិតក្នុងការចាប់អារម្មណ៍ខ្លាំង ក្រោយពីឈ្នះការប្រកួតហែលទឹកបែបមេបំបៅ ចម្ងាយ 100ម៉ែត្រ ក្នុងព្រឹត្តិការណ៍ Asian Games ឆ្នាំ2014 នៅទីក្រុង Incheon។ ក្រោយមក រូបគេបានបន្តធ្វើដំណើរជួយឱ្យសិង្ហបុរី ឈ្នះមេដាយមាសជាលើកទី1 ក្នុងព្រឹត្តិការណ៍អូឡាំពិក ដោយផ្តួលកីឡាករហែលទឹកដ៏ឆ្នើម Michael Phelps ក្នុងវគ្គផ្តាច់ព្រ័ត្រ កាលពីឆ្នាំ2014៕
ប្រភពពី៖ Channel News Asia
