នៅពេលថ្មីៗនេះ តារាពហុជំនាញ ខាត់ សុឃីម ក៏បានចូលរួមយ៉ាងសកម្មផងដែរក្នុងការស្វែងរកការឧបត្ថម្ភនានាជួយដល់កុមារកម្សត់ខាងលើ ហើយអ្នកនាងក៏បានប្រកាសត្រៀមដាក់លក់សម្លៀកបំពាក់របស់អ្នកនាងផ្ទាល់ដើម្បីប្រមូលថវិកាបន្ដិចបន្ដួច ជួយឧបត្ថម្ភការព្យាបាលសង្គ្រោះជីវិតកុមារ លី ហេង ដែលត្រូវឡានកុងតឺន័រកិនដាច់ជើងមួយចំហៀងយ៉ាងគួរឱ្យអាណោចអាធម្ម និងកំពុងត្រូវការជំនួយបន្ទាន់ក្នុងការព្យាបាលនៅប្រទេសវៀតណាម។
ដោយនឹកសោកស្តាយ និងអាណិតអាសូរកុមារាកម្សត់នោះខ្លាំងពេក អ្នកនាងខាត់ សុឃីម បានខំព្យាយាមប្រឹងប្រែងស្វះស្វែងរកជំនួយសប្បុរសធម៌ ទាំងអារម្មណ៍ក្ដុកក្តួលនៅពេលធ្វើការ Live Video លក់សម្លៀកបំពាក់។ តារាពហុជំនាញ អ្នកនាង ខាត់ សុឃីម បានបង្ហោះសារថា៖ សួស្តីអូនៗបងៗ នៅចាំក្មេងប្រុសដែលជួបគ្រោះថ្នាក់ចរាចរណ៍ត្រូវឡានកិនដែរឬទេ គាត់ត្រូវកាត់ជើងចោល គាត់ត្រូវកាត់ប្រដាប់ភេទទៀត អាសូរណាស់ កូនគេកូនឯង ហើយគាត់ឥឡូវកំពុងតែត្រូវការជំនួយខ្លាំងដើម្បីសង្គ្រោះឱ្យផុតពីមច្ចុរាជ100% អ៊ីចឹងមានតែសង្ឃឹមលើបងប្អូនយើងទាំងអស់គ្នា តិចក្តីច្រើនក្តីតាមសទ្ធា ម៉ាក់អូនយៀនធានា100% នៃថវិកានឹងទៅដល់ដៃអាណាព្យាបាលក្មេងដោយគ្មានបាត់មួយកាក់មួយសេនឡើយ បើអ្នកចង់ចូលរួមឆាតមកខ្ញុំនឹងធ្វើការឡាយផ្ទាល់ លក់ខោអាវ1ទឹករបស់ខ្ញុំ ដើម្បីជួយក្មួយ បានប៉ុន្មានយកប៉ុណ្ណឹង មក មក មហាមិត្ត រួមគ្នា ធ្វើបុណ្យ។
ខណៈអ្នកនាង ខាត់ សុឃីម កំពុងធ្វើការ Live លក់សម្លៀកបំពាក់ដើម្បីជួយដល់ក្មេងកម្សត់ខាងលើ ក្នុងនោះក៏មានអ្នកទស្សនា និងសប្បុរសជនជាច្រើនបានចូលជាវភ្លាមៗនូវសម្លៀកបំពាក់ដែលពួកគេស្រឡាញ់ ហើយក៏ជាចំណែកមួយដើម្បីជួយដល់កុមារកម្សត់ផងដែរ។
សូមជម្រាបបន្ថែមថា ក្មេងប្រុសកម្សត់មានវ័យ 8ឆ្នាំនោះត្រូវបានឡានធុនធ្ងន់បើកកិនពីលើជើង បណ្តាលឱ្យរងរបួសធ្ងន់ រហូតត្រូវខាងមន្ទីរពេទ្យសម្រេចកាត់ជើងដែលរងរបួសនោះចេញដើម្បីសង្រ្គោះជីវិតរបស់ប្អូន ហើយពេលនេះប្អូនកំពុងតែការទទួលការព្យាបាលសង្គ្រោះបន្ទាន់នៅឯមន្ទីរពេទ្យមួយក្នុងប្រទេសវៀតណាម។ ដោយសារតែក្រុមគ្រួសាររបស់ប្អូនមានជីវភាពខ្វះខាត មិនមានថវិកាគ្រប់គ្រាន់ក្នុងការព្យាបាលរបួសដ៏ធ្ងន់ធ្ងររបស់ប្អូន ធ្វើឱ្យមហាជនជាច្រើនមិនអាចមើលនឹងភ្នែកបាន ក៏នាំគ្នាជួយស្វះស្វែងរកការឧបត្ថម្ភពីសប្បុរសជននានាជាបន្តបន្ទាប់។ បើទោះជាមានការជួយឧបត្ថម្ភ ពីសប្បុរសជននានាហើយក្ដី ប៉ុន្តែការចំណាយផ្សេងៗក៏នៅតែត្រូវការបន្ថែមនៅឡើយ ព្រោះនៅពេលនេះប្អូនប្រុស លី ហេង កំពុងស្ថិតនៅក្នុងបន្ទប់សង្គ្រោះបន្ទាន់នៅឡើយ៕
![](https://scontent.fpnh3-1.fna.fbcdn.net/v/t1.0-9/38698867_2076802829303206_3132984973766688768_n.jpg?_nc_cat=0&oh=d4d184c8435217117df2d44c76b3b579&oe=5BFCD53C)
![](https://scontent.fpnh3-1.fna.fbcdn.net/v/t1.0-9/38458659_2076814785968677_1744356518653853696_n.jpg?_nc_cat=0&oh=e0ec2de43a71c9c3cdec5abf06b4b858&oe=5BCBA42C)
![](https://i0.wp.com/poraman.com/datastore/uploads-editor/08-07-2018/images/poraman-khat-sokhim-03.jpg?resize=696%2C407&ssl=1)
![](https://i0.wp.com/poraman.com/datastore/uploads-editor/08-07-2018/images/poraman-khat-sokhim-01.jpg?resize=696%2C378&ssl=1)