ម្ចាស់ខ្សែក្រវាត់ពិភពលោក ៨ប្រភេទ ទម្ងន់ផ្សេងគ្នា Manny Pacquiao ទទួលស្គាល់ថា គូប្រកួតនាពេលខាងមុខនេះគឺ Jeff Horn ស្ថិតក្នុងសមត្ថភាពដែលមិនអាចដឹងបាន ប៉ុន្តែ បានប្រាប់កីឡាករប្រដាល់សញ្ជាតិអូស្ត្រាលីរូបនេះថា រូបគេត្រូវតែស្ថិតក្នុងសមត្ថភាពខ្ពស់បំផុតរបស់គេដើម្បីធ្វើឱ្យប្រាកដថា ការប្រកួតដណ្តើមខ្សែក្រវាត់ពិភពលោក WBO ក្នុងទម្ងន់ ៦៦,៧គីឡូក្រាមរបស់ពួកគេ នឹងផ្តល់ការរីករាយដល់អ្នកគាំទ្រ។
![](https://i0.wp.com/www.lareine.com.kh/wp-content/uploads/2017/04/maxresdefault-1024x576.jpg?resize=696%2C392&ssl=1)
Pacquiao បានធ្វើដំណើរទស្សនកិច្ចទៅកាន់ប្រទេសអូស្ត្រាលីកាលពីថ្ងៃចន្ទ ដើម្បីផ្សព្វផ្សាយការប្រកួតរបស់ពួកគេនៅថ្ងៃទី២ ខែកក្កដា ខាងមុខនេះ នៅសង្វៀន Lang Park និងបាននិយាយជាមួយនឹងអ្នកយកព័ត៌មាន នៅមុនពេលត្រូវបានស្វាគមន៍ដោយអ្នកគាំទ្រ។ Pacquiao បានប្រាប់បណ្តាញសារព័ត៌មានក្នុងស្រុកថា៖ «ខ្ញុំមិនដឹងពីសមត្ថភាពរបស់គេឡើយ ប៉ុន្តែ ខ្ញុំដឹងថា រូបគេជាអ្នកប្រយុទ្ធម្នាក់។ ខ្ញុំមិនទាន់បានទស្សនាការប្រកួតរបស់គេនៅឡើយទេ ប៉ុន្តែ ខ្ញុំនឹងត្រួតពិនិត្យទៅលើការប្រកួត៣លើកចុងក្រោយរបស់គេ»។ កីឡាករប្រដាល់របស់ហ្វីលីពីនរូបនេះបានបន្ថែមទៀតថា៖ «សាររបស់ខ្ញុំសម្រាប់រូបគេគឺត្រូវតែខិតខំហ្វឹកហាត់ឱ្យបានរឹងមាំ និងត្រូវតែធ្វើឱ្យប្រាកដថា អ្នកស្ថិតក្នុងកម្រិតរឹងមាំ១០០ភាគរយសម្រាប់ការប្រកួតនៅថ្ងៃទី២ ខែកក្កដា ហេតុនេះ យើងអាចផ្តល់ការប្រកួតដ៏ជក់ចិត្តមួយ ហើយយើងអាចផ្តល់ការរំភើបដល់អ្នកគាំទ្រ»។
![](https://i0.wp.com/www.lareine.com.kh/wp-content/uploads/2017/04/boxer-manny-pacquiao-of-the-philippines-works-out-in-advance-of-his-wbo-welterweight-bout-against-jessie-vargas-in-los-angeles-4.jpg?resize=670%2C377&ssl=1)
ការប្រកួតជាមួយនឹង Horn ដែមិនកំណត់ត្រាឈ្នះ១៦លើក និងស្មើ១លើកនោះ នឹងក្លាយជាការប្រកួតជាលើកទី១របស់ Pacquiao ចាប់តាំងពីរូបគេបានឈ្នះពិន្ទុជាឯកច្ឆន្ទលើកីឡាករអាមេរិក Jessie Vargas ក្នុងទីក្រុង Las Vegas កាលពីខែវិច្ឆិកា។ Pacquiao មានកំណត់ត្រាឈ្នះ៥៩លើក ចាញ់៦លើក និងស្មើ២លើក ក្នុងនោះផ្តួលដៃគូឲ្យសន្លប់ចំនួន៣៨លើក៕
ប្រភពព័ត៌មាន៖ Reuters